ʼE Fakafeagai Te Akonaki Fakaʼatua Ki ʼAē ʼa Te Kau Temonio
“ ʼE līaki anai e ʼihi tanatou tui ʼo nātou muliʼi he ʼu palalau loi peʼe ko he ʼu akonaki ʼa te kau temonio.”—1 Timoteo 4:1.
1. Ko te tau feafeaʼi ʼaē ʼe lolotoga maʼuli ai nei te kau Kilisitiano?
KOUTOU fakakaukauʼi age muʼa ʼe koutou maʼuli ʼi he koga meʼa ʼe lolotoga hoko ai he tau. ʼE feafeaʼi anai hakita moe ʼaki te logoaʼa ʼo te ʼu pā fana pea mo hakita ʼala ake ʼo logo pe ki te ʼu logoaʼa ʼaia? Meʼa fakaʼofaʼofa foki, ʼi ʼihi potu ʼo te mālama, ʼe feiā ai te maʼuli ʼo te hahaʼi. Kae, ʼi te ʼaluʼaga fakalaumālie, ko te kau Kilisitiano fuli ʼe nātou maʼuʼuli feiā. ʼE nātou maʼuʼuli ʼi te lotolotoiga ʼo te tau lahi ʼe lolotoga fai talu mai te ʼu taʼu e 6 000 pea kua ʼāsili ʼosi ia, ia ʼaho nei. Koteā te tau loaloaga ʼaia? Ko te tau ʼaē ʼa te moʼoni mo te loi, ko te akonaki fakaʼatua ʼe fakafeagai ki te ʼu akonaki ʼa te kau temonio. ʼE mole mālohi fau tona higoaʼi ʼaē ko te tau—tāfito la te ʼu gāue ʼaē ʼe fai e te tahi ʼi te ʼu faʼahi fakafeagai ʼaia e lua—ko te fihi heʼe manavaʼofa pea mo fakatupu mate ʼaia e tahi kua hoko ʼi te hisitolia ʼo te malamanei.
2. (a) ʼI te manatu ʼa Paulo, ko ai te ʼu faʼahi e lua ʼaē ʼe fefakafeagaiʼaki? (b) Koteā te faka ʼuhiga ʼo “te tui” kia Paulo?
2 Ko te ʼapositolo ko Paulo neʼe talanoa ki te ʼu faʼahi e lua ʼo te fihi ʼaia ʼi tana faitohi ʼaē kia Timoteo: “Ko te talanoa ʼaē neʼe haʼu mai te ʼAtua ʼe ina ʼui fakalelei ʼi te ʼu temi ki ʼamuli, ʼe līaki anai e ʼihi tanatou tui ʼo nātou muliʼi he ʼu palalau loi peʼe ko he ʼu akonaki ʼa te kau temonio.” (1 Timoteo 4:1) Koutou fakatokagaʼi ʼo ʼuhiga mo te ʼu akonaki ʼa te kau temonio ʼe mālohi tāfito anai tanatou fakahala ʼi te ʼu “temi ki ʼamuli.” Ohage ko te ʼu ʼaho ʼo Paulo, ʼe toe feiā aipe mo totatou temi. Koutou toe fakatokagaʼi foki, ko te meʼa ʼaē ʼe fakafeagai ki te ʼu akonaki ʼa te kau temonio, ko te “tui.” ʼI henī, “ko te tui” ʼe faka ʼuhiga ki te akonaki fakaʼatua, ʼe fakatafito ki te ʼu talanoa ʼe haʼu mai te ʼAtua ʼaē ʼe tuʼu ʼi te Tohi-Tapu. Ko te faʼahiga tui ʼaia ʼe maʼuli ia. ʼE ina akoʼi te Kilisitiano ke ina fai te finegalo ʼo te ʼAtua. Ko te moʼoni ʼaia ʼe ina taki ki te maʼuli heʼegata.—Soane 3:16; 6:40.
3. (a) Koteā te meʼa ʼe hoko ki te kau vikitima ʼo te tau ʼaē ʼa te moʼoni pea mo te loi? (b) Ko ai te matapuna ʼo te ʼu akonaki loi?
3 Ko ʼaē pe ʼe mamaʼo ʼi te tui ʼe mole ina maʼu anai ia te maʼuli heʼegata. Ko te kau mate ʼaia ʼo te tau. ʼE ko he toe ikuʼaga fakamataku hakita tuku ia kita totonu ke fakahēhē e te ʼu akonaki ʼa te kau temonio! (Mateo 24:24) ʼE feafeaʼi anai koa hatatou faiga ke ʼaua naʼa tou mamate ʼi te tau ʼaia? ʼAki hatatou līaki fakahagatonu te ʼu akonaki loi ʼaia, heʼe ko te ʼu akonaki ʼe lagolago ki “te pule ʼo te kau temonio,” ko Satana te Tevolo. (Mateo 12:24) Ohage pe ko he meʼa neʼe kua fakakikite, ko te ʼu akonaki ʼa Satana ʼe loi, koteʼuhi ko Satana “ko te tāmai ʼo te loi.” (Soane 8:44) Koutou fakatokagaʼi pe neʼe feafeaʼi tana fakaʼaogaʼi fakalelei te loi moʼo fakahēhē tatatou ʼu ʼuluaki mātuʼa.
Kua Hā Te ʼu Akonaki ʼa Te Kau Temonio
4, 5. Koteā te loi ʼaē neʼe tala e Satana kia Eva, pea he koʼe koa neʼe ko he loi ia neʼe kovi ʼaupito ia?
4 Ko te ʼu meʼa neʼe hoko ʼe fakamatala ʼi te Tohi-Tapu ia Senesi 3:1-5. ʼAki tana fakaʼaogaʼi te gata, neʼe fakaōvi age ia Satana ki te fafine ko Eva ʼo fehuʼi age kia ia fēnei: “Neʼe ʼui atu moʼoni koa e te ʼAtua ʼe mole tonu ke koulua kai ki te ʼu ʼakau fuli ʼo te ʼōloto?” ʼE hage ia ʼe mole fakatupu tuʼutāmaki te fehuʼi, kae koutou toe vakaʼi age muʼa. “Neʼe ʼui atu moʼoni koa?” Neʼe hage ia ʼe punamaʼuli ia Satana, ohage pe ʼe ina ʼui fēnei, ‘He koʼe koa ʼe ʼui atu anai e te ʼAtua he meʼa feiā?’
5 ʼI tana mole ʼiloʼi he meʼa, neʼe ʼio age ia Eva. Neʼe ina ʼiloʼi lelei pe te akonaki fakaʼatua ʼo ʼuhiga mo te faʼahi ʼaia, te ʼui age ʼaē ʼa te ʼAtua kia Atama ʼe nā mamate anai mo kapau ʼe nā kai ki te fuʼu ʼakau ʼaē ʼo te mālama ki te meʼa ʼaē ʼe lelei pea mo te meʼa ʼaē ʼe kovi. (Senesi 2:16, 17) ʼE mahino ia ko te fehuʼi ʼa Satana neʼe ina haga ʼo lagaʼi tana fia mahino, koia ʼaē neʼe fakalogo ai leva te fafine ʼi te temi ʼaē neʼe ina ʼui age te meʼa ʼaenī: “ ʼI te temi leva ʼaia neʼe ʼui age e te gata ki te fafine: ‘ ʼE moʼoni ʼe mole koulua mamate anai.’ ” ʼE ko he toe palalau agakovi ia ke fai! Neʼe tukugakoviʼi e Satana ia Sehova, ia te ʼAtua ʼo te moʼoni, te ʼAtua ʼofa, te Tupuʼaga, ʼe ina kākāʼi tana ʼu fānau kelekele!—Pesalemo 31:5; 1 Soane 4:16; Fakahā 4:11.
6. Neʼe feafeaʼi te fakafihiʼi e Satana te agalelei pea mo te tuʼi pule ʼaē ʼa Sehova?
6 Kae ʼe mole gata ʼaki aipe te talanoa ʼa Satana. ʼE ina toe ʼui fēnei: “Heʼe ʼiloʼi e te ʼAtua, ko te ʼaho pe ʼaē ʼe koulua kai anai kiai, ʼe ʼaʼala moʼoni anai ai ʼo koulua ʼu mata pea ʼe koulua liliu moʼoni anai ohage ko te ʼAtua, ʼo ʼiloʼi te lelei pea mo te kovi.” ʼI te ʼui ʼa Satana, ko Sehova ʼAtua—ʼaē neʼe ina foaki ʼaupito te ʼu meʼa lelei peʼe meʼa ʼofa ki ʼatatou ʼu ʼuluaki mātuʼa—neʼe mole loto ia ke nā maʼu te meʼa taulekaleka. Ko te ʼAtua neʼe mole loto ia ke nā liliu ko ni ʼu ʼatua. ʼAki tana fasituʼu ʼaia, neʼe fakafihiʼi ai e Satana te agalelei ʼaē ʼa te ʼAtua. Neʼe ina toe fakaneke pe foki ki takita fakafīfīmālie pea mo takita meʼa noaʼi ʼaē ʼo te ʼu lao ʼa te ʼAtua, ʼaki tana ʼui ʼaē kapau ʼe nā fai te meʼa ʼaia ʼe fua manuʼia anai kia nāua. Kae, neʼe fakafihiʼi e Satana ia te tuʼi pule ʼaē ʼa te ʼAtua ki Tana ʼu meʼa ʼaē neʼe ina fakatupu, ʼaki tana ʼui ʼaē ko te ʼAtua ʼe mole tonu ke ina tuku he ʼu tuʼakoi ki te meʼa ʼaē neʼe fai e te tagata.
7. Ko ʼanafea ʼaē neʼe ʼuluaki logona ai te ʼu akonaki ʼa te kau temonio, pea ʼe toe feafeaʼi te hoko ʼo te ʼu meʼa ʼaia ia ʼaho nei?
7 ʼAki te ʼu palalau ʼaia ʼa Satana, neʼe kamata mafola ai leva te ʼu akonaki ʼaē ʼa te kau temonio. Ko te ʼu akonaki agakovi ʼaia kei nātou lagolago nei pe ki te ʼu fakatuʼutuʼu ʼe mole haʼu mai te ʼAtua. Ohage ko te meʼa ʼaē neʼe ina fai ʼi te ʼōloto ʼo Eteni, ʼi te temi nei kua fakatahi kiai ʼihi age ʼu laumālie fakafeagai, ʼe kei nātou fakafihiʼi pe te maʼua ʼaē ʼa te ʼAtua ke ina fai te ʼu lekula. ʼE ina fakafihiʼi tuʼumaʼu aipe te tuʼi pule ʼa Sehova pea mo faiga ke ina fakahalaʼi te hahaʼi ke nātou talagataʼa ki tanatou Tāmai ʼaē ʼe ʼi selo.—1 Soane 3:8, 10.
8. Koteā te meʼa ʼaē neʼe pulihiʼi e Atama pea mo Eva ʼi Eteni, pea neʼe hā feafeaʼi ko Sehova ia ʼaē neʼe moʼoni?
8 ʼI te ʼu ʼuluaki tokakovi ʼaia ʼi te tau ʼaē ʼa te akonaki fakaʼatua pea mo te ʼu akonaki ʼa te kau temonio, ko Atama pea mo Eva neʼe nā fai te tonu ʼe kovi pea neʼe nā pulihi ai tanā fakaʼamu ʼaē ki te maʼuli heʼegata. (Senesi 3:19) ʼI te hoholo pe ʼo te temi, pea mo te hifohifo mamalie pe ʼo tonā sino, neʼe mahino lelei ai leva kia nāua pe ko ai ʼaē neʼe loi pea ko ai ʼaē neʼe moʼoni ʼi Eteni. Kae, ia taʼu ʼe lauʼi teau ʼi muʼa ʼo tonā mamate, neʼe ko te ʼu ʼuluaki vikitima ʼaia ʼo te tau ʼaē ʼa te moʼoni pea mo te loi ʼuhi he kua tauteaʼi nāua e tonā Tupuʼaga ki te mate, ia ia ʼaē ko te Matapuna ʼo te maʼuli. Neʼe hoko te faʼahi ʼaia ʼi te temi ʼaē neʼe kua nā mamate ai ʼi te faʼahi fakalaumālie.—Pesalemo 36:9; vakaʼi ia Efesi 2:1.
Te Akonaki ʼa Te Kau Temonio Ia ʼAho Nei
9. Neʼe feafeaʼi te lava lelei ʼo te gāue ʼa te ʼu akonaki ʼa te kau temonio ʼi te lolotoga ʼo te ʼu sēkulō?
9 ʼO mulimuli ki te manatu ʼaē ʼi te tohi ʼo te Fakahā, ko te ʼapositolo ko Soane neʼe faka fealagia age kia ia ʼi he ʼaluʼaga faka milakulo ke sio ki te “ ʼaho ʼo te ʼAliki,” ʼaē neʼe kamata ʼi te taʼu 1914. (Fakahā 1:10) ʼI te temi ʼaia ko Satana pea mo tana kau temonio neʼe kapu mai te lagi ki te ʼu tafatafa ʼo te kele—ko te toe lavā ʼo te ʼaselo fakafihiʼi ʼaia ʼo totatou Tupuʼaga Lahi. ʼE mole kei logoʼi tona leʼo ʼi te lagi ʼo ʼuhiga mo tana haga ʼaē ʼo faka lākahalaʼi tuʼumaʼu pe te ʼu kaugana ʼa Sehova. (Fakahā 12:10) Kae koteā te meʼa neʼe fai e te ʼu akonaki ʼo te kau temonio ki te kele talu mai te meʼa neʼe hoko ʼi Eteni? ʼE ʼui e te fakamatala: “Neʼe lī foki ki lalo ia te talakone lahi, te gata olisinale, ia ia ʼaē ʼe ʼui ko Tevolo mo Satana, ia ia ʼaē ʼe ina kākāʼi te kele katoa.” (Fakahā 12:9) Ko te mālama katoa neʼe tuʼutāmakiʼia ʼi te ʼu loi ʼa Satana! ʼO mole tou punamaʼuli ki te higoaʼi ʼaē ʼo Satana “ko te pule ʼo te malamanei”!—Soane 12:31; 16:11.
10, 11. Ko te ʼu ʼaluʼaga fea ʼaē ʼe mālohi ai ia Satana pea mo tana kau temonio ia ʼaho nei?
10 Neʼe mahino koa kia Satana tona kua lavā ʼaē ʼi tona ʼosi lī ifo ʼaē mai te lagi? Kailoa ia! Kua ina fakatotonu ke ina fai he tau ki te akonaki fakaʼatua pea mo nātou ʼaē ʼe pipiki kiai. Hili ki tona lī ifo ʼaē mai te lagi, neʼe hoko atu pe e Satana tana tau: “Ko te talakone [Satana] neʼe ʼita kovi ki te fafine, pea neʼe ʼalu ʼo laga tau ki te toe ʼo tana hāko, ia nātou ʼaē ʼe nātou maʼuliʼi te ʼu folafola ʼa te ʼAtua pea mo te gāue ʼaē ko te fai fakamoʼoni ʼo ʼuhiga mo Sesu.”—Fakahā 12:17.
11 ʼO mole gata ʼaki pe tana tauʼi ʼaē ʼo te ʼu kaugana ʼa te ʼAtua, ʼe lolotoga fakafonu e Satana te malamanei ʼaki tana ʼu loi, heʼe faiga ke ina taupau maʼu te malamanei. ʼI tana tahi sio ki te ʼaho ʼo te ʼAliki, neʼe sio te ʼapositolo ko Soane ki te ʼu manu fekai e tolu neʼe nātou fakatātā ia Satana, ko tana kautahi faka politike ʼi te kele, pea mo te pule mālohi ʼo te kele ʼo totatou temi. Mai te ʼu gutu ʼo te ʼu manu ʼaia e tolu, neʼe haʼu mai ai te ʼu kelenui. Neʼe koteā ʼaē neʼe nātou fakatātā? ʼE fēnei te tohi ʼa Soane: “ ʼI tona fakahagatonu, ko te ʼu palalau ʼaia ʼe haʼu mai te kau temonio pea ʼe nātou fai te ʼu fakaʼiloga, pea mo ʼolo ki te ʼu hau ʼo te kele katoa, moʼo fakamāʼopoʼopo ia nātou ki te tau ʼo te ʼaho lahi ʼo te ʼAtua Māfimāfi.” (Fakahā 16:14) ʼE ʼiloga ia, ko te ʼu akonaki ʼa te kau temonio ʼe mālohi ʼaupito ʼi te kele. Ko Satana pea mo tana kau temonio ʼe nātou lolotoga tauʼi tuʼumaʼu pe te akonaki fakaʼatua, pea ʼe hoholo anai pe tanatou gāue ʼaia ʼo aʼu ki te temi ʼaē ka fakagata ai anai nātou e Sesu Kilisito, te Hau faka Mesia.—Fakahā 20:2.
Tou ʼIloʼi Te ʼu Akonaki ʼa Te Kau Temonio
12. (a) He koʼe koa ʼe fealagia te tekeʼi ʼaē ʼo te ʼu akonaki fakatemonio? (b) Neʼe faiga feafeaʼi koa ia Satana ke ina fakahoko tana ʼu fakatuʼutuʼu ki te ʼu kaugana ʼa te ʼAtua?
12 Ko te hahaʼi ʼaē ʼe manavasiʼi ki te ʼAtua ʼe feala koa ke nātou tekeʼi te ʼu akonaki ʼa te kau temonio? Ei, ʼe feala ke nātou tekeʼi, ʼuhi ko te ʼu tupuʼaga e lua. ʼUluaki, heʼe ko te akonaki fakaʼatua ʼe mālohi age ia; pea lua, neʼe fakahā e Sehova te ʼu faʼahiga fakatuʼutuʼu ʼaē ʼa Satana ke feala ai kia tatou ke tou tekeʼi ia ia. Ohage ko te ʼui ʼa te ʼapositolo ko Paulo, “ ʼe mole pulipuli kia tatou tana ʼu fakatuʼutuʼu.” (2 Kolonito 2:11) ʼE tou ʼiloʼi ko Satana ʼe ina fakaʼaogaʼi te fakataga ohage ko he meʼa moʼo fakahoko tana ʼu fakatuʼutuʼu. (2 Timoteo 3:12) Kae ʼi hona faʼahiga ʼaluʼaga fakakākā, ʼe faiga ia ke ina fakahalaʼi te ʼu ʼatamai pea mo te ʼu loto ʼo nātou ʼaē ʼe kaugana ki te ʼAtua. Neʼe ina fakahēhē ia Eva pea mo ina tuku te ʼu holi ʼe mole lelei ki tona loto. Kei ina faigaʼi aipe te meʼa ʼaia ia ʼaho nei. Neʼe tohi e Paulo ki te kau Kolonito ʼo fēnei: “ ʼE ʼau mataku, naʼa ʼi he faʼahiga ʼaluʼaga,—ohage ko te haga ʼa te gata ʼo fakahalaʼi ia Eva ʼaki tana kākā,—naʼa fakahehema tokotou ʼatamai pea mo fakamamaʼo ʼi te agatonu pea mo te nofo maʼa ʼaē ʼe tau mo Kilisito.” (2 Kolonito 11:3) Tou vakaʼi age pe neʼe feafeaʼi tana fakahehema te manatu ʼa te malamanei katoa.
13. Koteā te ʼu loi ʼaē neʼe fai e Satana ki te malamanei talu mai ia Eteni?
13 Kia Eva, neʼe tukugakoviʼi e Satana ko Sehova neʼe gutuloi pea mo ina ʼui ko te hahaʼi ʼe feala pe hanatou liliu ko he ʼu ʼatua mo kapau ʼe nātou talagataʼa ki tonatou Tupuʼaga. Ko te ʼaluʼaga agahala ʼo te malamanei ʼaē ia ʼaho nei, ʼe ina fakaʼasi lelei mai ko Satana, kae mole ko Sehova ʼaē neʼe gutuloi. Ko te hahaʼi ia ʼaho nei ʼe mole ko ni ʼu ʼatua ia! Kae, neʼe ina toe hilifaki atu ki te ʼuluaki loi ʼaia ʼihi age ʼu loi. Neʼe ina fakahū te manatu ʼaē ko te nefesi ʼo te tagata ʼe tuputupua, ʼe mole toe mate ia. ʼAki te faʼahi ʼaia neʼe ina foaki fakakākā ki te malamanei te fealagia ʼaē ke nātou liliu ko ni ʼu ʼatua ʼi he tahi age faʼahiga ʼaluʼaga. Pea, ʼo fakatafito ki te akonaki hala ʼaia, neʼe ina faka mafola te ʼu akonaki ʼo te ʼifeli, ʼo te pulekatolio, ʼo te ʼu meʼa fakatemonio, pea mo te tauhi ʼaē ki te ʼu kui. Ko te hahaʼi ʼe lauʼi teau miliona kei nātou popūla nei ki te ʼu loi ʼaia.—Teutalonome 18:9-13.
14, 15. Koteā te moʼoni ʼaē ʼo ʼuhiga mo te mate pea mo te fakaʼamu ʼaē ʼa te tagata ki te temi ka haʼu?
14 ʼIo, ko te meʼa ʼaē neʼe ʼui age e Sehova kia Atama neʼe ko te moʼoni pe ʼaia. Neʼe mate ia Atama ʼi te temi ʼaē neʼe agahala ai ki te ʼAtua. (Senesi 5:5) ʼI te temi ʼaē neʼe mate ai Atama pea mo tona hākoga, neʼe nātou liliu ai ko te ʼu nefesi mate, ʼe mole kei nātou ʼiloʼi nātou he meʼa. (Senesi 2:7; Tagata Tānaki 9:5, 10; Esekiele 18:4) ʼUhi ko te agahala neʼe maʼu mai ia Atama, ko te ʼu nefesi fuli ʼe mamate. (Loma 5:12) Kae ʼi te ʼōloto ʼo Eteni, neʼe fakapapau e Sehova ʼe haʼu anai te hāko ʼaē ka ina tauʼi anai ia te ʼu gāue ʼa te Tevolo. (Senesi 3:15) Ko te hāko ʼaia neʼe ko Sesu Kilisito, ko te ʼAlo ʼulu tokotahi ʼo te ʼAtua. Ko Sesu neʼe mate heʼe agahala, pea ko tona maʼuli ʼaē neʼe sakilifisioʼi neʼe liliu ia ko te totogi moʼo hāofaki ia te malamanei mai tona ʼaluʼaga mate. Ko nātou ʼaē ʼe fakalogo ʼo nātou haga tui kia Sesu, ʼe nātou maʼu te fealagia ʼaē ko te tali ia te maʼuli heʼegata ʼaē neʼe puli ia Atama.—Soane 3:36; Loma 6:23; 1 Timoteo 2:5, 6.
15 Ko te totogi e ko te falalaʼaga moʼoni ia ʼo te malamanei, kae ʼe mole ko he laumālie ia ʼe maʼuli mokā hili te mate. ʼE ko he akonaki fakaʼatua ia. Ko te moʼoni. ʼE ko he tahi ʼaenā fakahā taulekaleka ʼo te ʼofa pea mo te poto ʼo Sehova. (Soane 3:16) ʼE ko he loto fakafetaʼi ʼe tonu anai ke tou maʼu ʼi tatatou kua akoʼi te moʼoni ʼaia pea mo tatatou kua ʼāteaina mai te ʼu akonaki ʼa te kau temonio ʼo ʼuhiga mo te ʼu meʼa ʼaia!—Soane 8:32.
16. Koteā te ʼu fua neʼe hoko ki muli mai ʼi te falala pe ʼaē ʼa te tagata ki tona poto ʼo ia totonu pe?
16 ʼAki tana ʼu loi ʼaē ʼi te ʼōloto ʼo Eteni, neʼe fakaneke e Satana ia Atama mo Eva ke nā fia ʼāteaina mai te ʼAtua pea ke nā falala pe ki tonā poto fakatagata. Ia ʼaho nei, ʼe tou sio ki te ʼu fua ʼo tanā talagataʼa ʼaia ʼi he temi loaloaga, ʼaki te fakapō, te ʼu fihifihia faka ekonomike, te ʼu tau, pea mo te toe fakapalatahi ʼaē ʼe hoko ia ʼaho nei ʼi te mālama ʼaenī. ʼE mole fakapuna’maʼuli te ʼui ʼaenī ʼa te Tohi-Tapu: “Ko te poto ʼo te mālama ʼaenī ʼe mata vale ia, ia mata ʼo te ʼAtua”! (1 Kolonito 3:19) Kae, tokolahi ʼaki he manatu vale ʼe nātou fia maʼuli mamahi age nātou ʼi hanatou tokagaʼi te ʼu akonaki ʼaē ʼa Sehova. (Pesalemo 14:1-3; 107:17) Ko te kau Kilisitiano, ʼaē neʼe nātou tali te akonaki fakaʼatua, ʼe nātou tokakaga ke ʼaua naʼa nātou tō ki te faʼahiga hele ʼaia.
17. Koteā ʼaē neʼe fakaneke e Satana ʼaē neʼe “higoaʼi hala ko te ʼatamai mālama,” pea koteā tona ʼu fua?
17 Neʼe faitohi ia Paulo kia Timoteo, ʼo fēnei: “Ê Timoteo, taupau te meʼa ʼaē neʼe tuku ʼio koe, ʼo ke situʼa mai te ʼu akonaki gaʼasi ʼaē ʼe fakahala ki te meʼa ʼaē ʼe maʼoniʼoni, ʼo toe feiā aipe ki te ʼu meʼa fakafeagai ʼaē ʼe higoaʼi hala ‘ko te ʼatamai mālama.’ Ko ʼihi ʼi tanatou fia hā ʼaki te taʼi mālama ʼaia neʼe nātou hēhē mai te tui.” (1 Timoteo 6:20, 21) Ko te “ ʼatamai mālama” ʼaia ʼe ina toe fakatā te ʼu akonaki ʼa te kau temonio. ʼI te ʼu ʼaho ʼa Paulo, ʼe mahalo ia neʼe faka ʼuhiga ki te ʼu manatu faka ʼaposita ʼa ʼihi ʼi te kokelekasio ʼaē neʼe faka mafola ai. (2 Timoteo 2:16-18) Ki muli age, ko te meʼa ʼaē neʼe higoaʼi hala ko te ʼatamai mālama, ohage la ko te Gnosticisme (ko te ʼu ako fuli ʼo ʼuhiga mo te ʼu misitelio ʼo te ʼu lotu) pea mo te filosofia Keleka, neʼe nātou fakahehemaʼi te kokelekasio. ʼI te mālama ʼaenī, ko te mole tui ki te ʼAtua, ko te ʼu ako fuli ʼo ʼuhiga mo te ʼu misitelio ʼo te ʼu lotu, pea mo te evolisio, pea mo te ʼu talaga lalahi ʼo te Tohi-Tapu ʼe ko he ʼu faʼahiga faʼifaʼitaki ʼaia ʼo te meʼa ʼaē ʼe higoaʼi hala ko te ʼatamai mālama, heʼe ko te ʼu manatu ia ʼe mole haʼu mai te Tohi-Tapu, neʼe lagaʼi e te ʼu ʼaposita ʼo te temi nei. Ko te ʼu fua ʼo te ʼu meʼa fuli ʼaia ʼaē neʼe higoaʼi hala ko te ʼatamai mālama, neʼe ʼiloga ʼi te hifohifo ʼaē ʼo te aga ʼe tonu ke fai, ʼi te heʼe fakaʼapaʼapa ʼaē ʼe mafola ʼo ʼuhiga mo te pule, te heʼe agatonu, pea mo te manatu pe kia kita ʼaē ko he fakaʼiloga ia ʼo te ʼu faʼahiga meʼa ʼo te tuʼu ʼa Satana.
Tou Pipiki Maʼu Ki Te Akonaki Fakaʼatua
18. Ko ai ʼaē ia ʼaho nei ʼe ina kumi te akonaki fakaʼatua?
18 Logope la te haga ʼaē ʼa Satana ʼo fakafonu te kele ʼaki tana ʼu akonaki fakatemonio talu mai te temi ʼaē ʼi Eteni, neʼe ʼi ai tuʼumaʼu ʼihi neʼe nātou kumi te akonaki fakaʼatua. Kua lauʼi miliona te hahaʼi ʼaia ia ʼaho nei. ʼE kau kiai te toe ʼo te kau Kilisitiano fakanofo ʼaē ʼe nātou falala moʼoni ʼe nātou pule anai mo Sesu ʼi te Puleʼaga ʼi selo pea mo te hahaʼi tokolahi ʼaē haga tuputupu pe “ko te tahi ʼu ōvi” ʼaē ʼe nātou fakaʼamu ke nātou maʼu ia te koga fakakelekele ʼo te Puleʼaga ʼaia. (Mateo 25:34; Soane 10:16; Fakahā 7:3, 9) Ia ʼaho nei, ko te ʼu ōvi ko nātou ʼaia neʼe tānakiʼi fakatahi ʼi te toe kautahi faka malamanei ʼaē ʼe faka ʼuhiga kiai te ʼu palalau ʼaē ʼa Isaia: “Ko tou ʼu foha fuli ʼe liliu anai ko he ʼu hahaʼi neʼe akoʼi e Sehova, pea ko te tokalelei ʼo tou ʼu foha ʼe mahu anai ia.”—Isaia 54:13.
19. Koteā te faka ʼuhigaʼi ʼo te ʼui ʼaē, neʼe akoʼi tatou e Sehova?
19 Ko te faka ʼuhiga ʼaē ʼo te kupu, neʼe akoʼi e Sehova ʼe mole gata ʼaki pe foki te mahino ʼaē ki te akonaki moʼoni—ʼe maʼuhiga age ia. ʼE akoʼi mai e Sehova pe feafeaʼi te maʼuliʼi, te faka ʼuhigaʼi ʼaē ʼo te akonaki fakaʼatua ki totatou maʼuli takitokotahi. Ohage la, ʼe tou tekeʼi te manatu pe kia kita totonu, te aga heʼeʼaoga, pea mo te loto faʼitaliha, ʼaē ʼe mafola haʼele ʼi te mālama ʼaenī. ʼE tou fakamoʼoni ki te faʼahi ʼaē ko te mānumānu fakavale ʼaē ki te koloā ʼo te mālama ʼaenī ʼe ina taki ki te mate. (Sake 5:1-3) ʼAua naʼa galo ia tatou te akonaki fakaʼatua ʼaē neʼe talanoa kiai te ʼapositolo ko Soane: “ ʼAua naʼa koutou manako ki te malamanei peʼe ko te ʼu meʼa ʼaē ʼe ʼi te malamanei. Kapau ʼe ʼi ai he tahi ʼe manako ki te malamanei, ko te ʼofa ki te Tāmai ʼe mole ia ia”—1 Soane 2:15.
20, 21. (a) Koteā te meʼa ʼaē ʼe fakaʼaogaʼi e Satana ʼi tana ʼu faiga ʼaē ke kivi te tagata? (b) Koteā te ʼu tapuakina ʼe maʼu ʼe nātou ʼaē ʼe pipiki maʼu ki te akonaki fakaʼatua?
20 Ko te malave ʼaē ʼo te ʼu akonaki ʼa te kau temonio ki tana ʼu vikitima ʼe ʼiloga ʼi te ʼu palalau ʼaenī ʼa Paulo ki te kau Kolonito: “Ko [Satana] neʼe ina fakakiviʼi te ʼatamai ʼo te hahaʼi ʼaē ʼe mole tui, talia naʼa faka mālamagia nātou e te mālama gigila ʼo te logo lelei faka kolōlia ʼo ʼuhiga mo Kilisito, ʼaē ko ia ko te paki ʼo te ʼAtua.” (2 Kolonito 4:4) ʼE toe loto foki ia Satana ke ina kiviʼi feiā pe te kau Kilisitiano moʼoni. ʼI Eteni, neʼe ina fakaʼaogaʼi te gata moʼo fakahalaʼi te ʼu kaugana ʼa te ʼAtua. Ia ʼaho nei, ʼe ina fakaʼaogaʼi te ʼu ʼata ʼe aga fakamālohi pea mo heʼeʼaoga pea mo te ʼu polokalama ʼi te televisio. ʼE ina fakaʼaogaʼi tāfito te lātio, te ʼu tohi, pea mo te musika. Ko te mahafu mālohi ʼe ina maʼu ko te ʼu fakakaugā kovi. (Tāʼaga Lea 4:14; 28:7; 29:3) Ke ke mahino tuʼumaʼu ko te ʼu meʼa ʼaia—ko te ʼu fakahala pea mo te ʼu akonaki ʼa te kau temonio.
21 Koutou manatuʼi, ko te ʼu palalau ʼaē ʼa Satana ʼi Eteni neʼe ko te ʼu loi; neʼe hā lelei ia ko te ʼu palalau ʼa Sehova neʼe moʼoni. Talu mai te ʼu ʼuluaki ʼaho ʼaia, ko te faʼahi ʼaia neʼe hoholo atu aipe ʼo feiā tuʼumaʼu pe. Neʼe ʼiloga tuʼumaʼu pe ia ko Satana ʼaē neʼe loi, pea ko te akonaki fakaʼatua neʼe ʼiloga lelei ia ʼe moʼoni. (Loma 3:4) Kapau ʼe tou pipiki maʼu ki te Folafola ʼa te ʼAtua, ʼe tou nofo tuʼumaʼu anai pe ʼi te faʼahi mālo ʼo te tau ʼaē ʼe fai ʼi te moʼoni pea mo te loi. (2 Kolonito 10:4, 5) Tou faiga fakamalotoloto ke tou tekeʼi te ʼu akonaki fakatemonio fuli. ʼAki te faʼahiga fai ʼaia ʼe tou faʼa kātaki anai ʼo aʼu ki te temi ʼaē ka fakagata ai leva te tau ʼaē ʼa te moʼoni pea mo te loi. ʼE mālo anai pe te moʼoni ia. ʼE puli anai Satana ia, pea ko te akonaki fakaʼatua tokotahi pe ʼaē ka logoʼi anai ʼi te kele.—Isaia 11:9.
ʼE Feala Koa Hakotou Fakamatala?
◻ Ko ʼanafea ʼaē neʼe ʼuluaki logona ai te ʼu akonaki fakatemonio?
◻ Koteā te ʼu faʼahiga loi ʼaē neʼe fai e Satana pea mo tana kau temonio?
◻ Ko te ʼu faʼahi fea ʼaē ʼe gāue mālohi ai ia Satana ia ʼaho nei?
◻ Koteā ʼaē ʼe fakaʼaogaʼi e Satana moʼo faka mafola ki te ʼu akonaki ʼa te kau temonio?
◻ Koteā te ʼu tapuakina ʼe maʼu ʼe nātou ʼaē ʼe pipiki maʼu ki te akonaki fakaʼatua?
[Paki ʼo te pasina 9]
Ko te akonaki fakatemonio neʼe ʼuluaki logoʼi ʼi te ʼōloto ʼo Eteni
[Paki ʼo te pasina 10]
Ko te akonaki fakaʼatua ʼo ʼuhiga mo te totogi pea mo te Puleʼaga ʼe ko he falala pe ʼaia e tahi ki te malamanei