Ko Te Kau Fai Faka Mafola ʼo Te Puleʼaga ʼe Gāue Mālohi ʼi Te Kele Katoa

“ ʼE koutou liliu anai ko haku ʼu kau fakamoʼoni . . . ki te potu ʼaē ʼe mamaʼo ʼo te kele.” —Gāue 1:8.

1. Koteā te logo ʼaē neʼe ʼui e Sesu ki tana kau tisipulo ʼe faka mafola anai ia ʼaho nei?

MOʼO fakamatalatala te gāue ʼaē neʼe tupu ai te fekauʼi mai e Sehova ʼo tona ʼAlo ke haʼu ki te kele, neʼe ʼui fēnei e Sesu: “ ʼE tonu ke ʼau faka mafola te logo lelei ʼo te puleʼaga ʼo te ʼAtua.” (Luka 4:43) ʼI tana palalau ʼaē ki te gāue neʼe tonu ke fai e tana kau tisipulo ʼi te kele ʼi te temi ʼaē ʼe toe liliu mai ai mo tana pule faka hau, neʼe ʼui maʼa Sesu ʼo fēnei: “Pea ko te logo lelei ʼaenī ʼo te puleʼaga ʼe faka mafola anai ʼi te kele katoa, ko he meʼa fakamoʼoni ia ki te ʼu puleʼaga katoa; pea hoko mai ai leva te fakaʼosi.”—Mateo 24:14.

2. (a) He koʼe koa ʼe maʼuhiga ʼaupito ke fakahā ki te kaugamālie te logo ʼo te Puleʼaga? (b) Koteā te fehuʼi ʼe tonu anai ke tou fakakaukauʼi fuli?

² He koʼe koa ʼe maʼuhiga ʼaupito te logo ʼo te Puleʼaga ʼo te ʼAtua? He koʼe koa ʼe tonu ke fagonogono ʼaupito ia te Puleʼaga? Koteʼuhi, ko te Puleʼaga Faka Mesia ʼaē ka ina fakahoko te kami moʼo fakatonuhia te tuʼi pule faʼitaliha ʼa Sehova ʼo te ʼatulaulau. (1 Kolonito 15:24-28) ʼAki te meʼa ʼaia, ʼe fakahoko anai e Sehova tana fakamāu ki te ʼu faʼahiga meʼa ʼo te tuʼu Fakasatana ʼaenī pea mo ina fakahoko ai leva tana fakapapau ʼaē ke ina tapuakiʼi te ʼu famili fuli ʼo te kele. (Senesi 22:17, 18; Taniela 2:44) ʼAki tana foaki ʼaē ʼo he fakamoʼoni ʼo ʼuhiga mo te Puleʼaga, neʼe maʼu leva e Sehova ia nātou ʼaē neʼe ina fakanofo ke nātou kaugā hau mo tona ʼAlo. ʼAki te fagonogono ʼaē ʼo te Puleʼaga, ʼe lolotoga hoko nei te gāue fevaevae kehe ʼaki. (Mateo 25:31-33) ʼE loto ia Sehova ke ʼiloʼi tana fakatuʼutuʼu e te hahaʼi ʼo te ʼu ʼatu puleʼaga fuli. ʼE ina faka fealagia ke nātou fili te maʼuli ʼo nātou liliu ai ko ni ʼana ʼu hahaʼi fakalogo ʼi tona Puleʼaga. (Soane 3:16; Gāue 13:47) ʼE koutou kau katoa koa ki te faka mafola ʼo te Puleʼaga ʼaia?

Ko Te Fakatalitali Fakatomuʼa Ki Te Temi Fakaʼosi ʼo Te Kau Senitile

3. (a) Koia, koteā te talanoa neʼe fai e C. T. Russell ʼi tana ʼuluaki fagona ʼaē ʼo faʼufaʼu he kau kūtuga ako ʼo te Tohi-Tapu? (b) Koteā te meʼa neʼe mahino ki te kau ʼuluaki Ako ʼo te Tohi-Tapu ʼo ʼuhiga mo te tuʼulaga ʼaē ʼo te Puleʼaga ʼo te ʼAtua ʼi tonatou maʼuli?

³ ʼI te taʼu 1880, Ko Charles Taze Russell, te ʼuluaki tagata tā tohi ʼaia ʼo Te Tule Leʼo, neʼe fagona ʼi te potu fuli ʼo te potu tokelau-hahake ʼo te ʼAtu ʼu Fenua ʼo Amelika moʼo faʼufaʼu ʼo he kau kūtuga ako ʼo te Tohi-Tapu. Koia ʼaē, ko te akonaki ʼaē neʼe palalau kiai neʼe talanoa tāfito ki te faʼahi ʼaenī “Ko te ʼu meʼa ʼa te Puleʼaga ʼo te ʼAtua.” Ohage ko tona hā ʼi te ʼu ʼuluaki alatike ʼo Te Tule Leʼo, neʼe mahino ki te kau Ako ʼo te Tohi-Tapu (ʼaē ko te kau Fakamoʼoni ʼa Sehova ʼi te temi nei) kapau neʼe nātou loto ke tāu mo nātou tanatou kau ʼaē ki te Puleʼaga ʼo te ʼAtua, ʼe tonu anai ke nātou fakamuʼamuʼa te Puleʼaga mo tana ʼu meʼa, ʼaki hanatou fakaʼaogaʼi fakafiafia ʼo tonatou maʼuli, tanatou ʼu fealagia, pea mo tonatou ʼu koloā ʼo kaugana ki te Puleʼaga ʼaia. Ko meʼa fuli ʼi tonatou maʼuli neʼe tonu ke tuʼulaga lua. (Mateo 13:44-46) Ko tonatou maʼua ko te faka mafola ʼaē ʼo te logo lelei ʼo te Puleʼaga ʼo te ʼAtua ki niʼihi. (Isaia 61:1, 2) Neʼe lahi feafeaʼi tanatou fakahoko ʼo te faʼahi ʼaia ʼi muʼa ʼo te fakaʼosi ʼo te Temi ʼo te kau Senitile ʼi te taʼu 1914?

4. Neʼe feafeaʼi te lahi ʼo te tufa ʼaē e te kiʼi kūtuga Ako ʼo te Tohi-Tapu te ʼu tohi faka Tohi-Tapu ʼi muʼa ʼo te taʼu 1914?

⁴ Mai te taʼu 1870 ki te taʼu 1914, neʼe tokosiʼi pe te kau Ako ʼo te Tohi-Tapu. ʼI te taʼu 1914, neʼe ko te toko 5 100 neʼe kau fakamalotoloto ki te fai faka mafola ʼaē ʼi te ʼu ʼapi. Kae ʼe ko he fagonogono fakaofoofo ia! ʼI te taʼu 1881, hili pe taʼu e lua ki te tā ʼaē ʼo te ʼuluaki Tule Leʼo, neʼe nātou tufa te tohi ʼaē ko te meʼa kai ki te kau Kilisitiano popoto (Food for Thinking Christians) e pasina 162. ʼI te ʼu māhina siʼisiʼi pe, neʼe nātou tufa te ʼu tohi e 1 200 000. ʼI te ʼu taʼu e siʼisiʼi, ko te ʼu kiʼi faʼahiga pepa lotu lea kehekehe ʼe lauʼi miliona neʼe tufa ʼi te taʼu fuli.

5. Neʼe ko ai te hahaʼi feʼāveʼaki ʼo te evaselio, pea koteā te faʼahiga fakakaukau ʼaē neʼe ia nātou?

⁵ ʼI te kamataʼaga pe ʼo te taʼu 1881, ko ʼihi neʼe ko te ʼu hahaʼi feʼāveʼaki ʼo te evaselio. Neʼe ko te kau ʼuluaki fakafofoga ʼaia ʼi te temi muʼa ʼo te kau pionie ʼaē ia ʼaho nei (ko te kau fai faka mafola evaselio ʼi te temi fuli pe). Ko ʼihi ʼi te ʼu hahaʼi feʼāveʼaki ʼaia ʼo te evaselio, neʼe nātou haʼele lalo, peʼe heka lelue, ʼo nātou tahi faka mafola, teitei pe ʼi te ʼu potu fuli ʼo te fenua ʼaē neʼe nātou nonofo ai. Ko ʼihi neʼe nātou aʼu ki te ʼu fenua kehe pea neʼe ko nātou ʼaia ʼaē neʼe nātou ʼuluaki fakahā te logo lelei ki te ʼu fenua ohage ko Finilani, Barbados, pea mo Burma (ʼi te temi nei ko Myanmar). Neʼe nātou fakahā te faka mafola lahi faka misionea ohage pe ko Sesu pea mo tana kau ʼapositolo.—Luka 4:43; Loma 15:23-25.

6. (a) Neʼe feafeaʼi te mafola ʼo te moʼoni ʼo te Tohi-Tapu ʼaki te ʼatu ʼu folau ʼaē ʼa te Tēhina ko Russell? (b) Koteā te tahi meʼa neʼe fai moʼo faka mafola ʼo te logo lelei ʼi te ʼu fenua kehe ʼi te fakaʼosi ʼo te ʼu Temi ʼo te kau Senitile?

⁶ Neʼe lahi te ʼu folau ʼa te tēhina ko Russell moʼo faka mafola ʼo te moʼoni. Neʼe liuliuga tana ʼalu ʼaē ki Kanata; neʼe palalau ʼi te lea faka Panama, faka Samaika, pea mo te lea faka Kupa; neʼe tuʼa hogofulu-ma-lua tana folau ki Eulopa; pea mo feʼaluʼaki ʼi te kele ʼo faka mafola ia te evaselio. Neʼe ina toe fekauʼi foki ʼihi ʼu tagata moʼo lagiaki pea mo takitaki te faka mafola ʼaē ʼo te logo lelei ʼi te ʼu fenua kehe. Ko Adolf Weber neʼe fekauʼi ki Eulopa ʼi te vaelua ʼo te ʼu taʼu 1890, pea neʼe aʼu tana minisitelio mai Suisi ki Falani, ki Italia, ki Siamani, pea mo Pelesike. Ko E. J. Coward neʼe fekauʼi ki te ʼu faʼahi ʼo te Caribbean. Ko Robert Hollister neʼe hinoʼi ki te Potu Oliete ʼi te taʼu 1912. ʼI te koga meʼa ʼaia, ko te ʼu kiʼi pepa lotu makehe neʼe tā kia lea e hogofulu, pea ko te ʼu kiʼi pepa lotu ʼe lauʼi miliona neʼe tufa haʼele ʼi te potu fuli pe ʼo Initia, Siaina, Saponia, pea mo Kolea, e te hahaʼi totonu ʼo te ʼu fenua ʼaia. Ka na pau la neʼe koutou maʼuli ʼi te temi ʼaia, ko tokotou loto ʼe mole ina uga anai koa koutou ke koutou faiga fakamalotoloto ʼo fakahā te logo lelei ki te hahaʼi ʼo tokotou kolo pea mo ʼihi ake?

7. (a) Neʼe fakaʼaoga feafeaʼi te ʼu sulunale moʼo fai ʼo he fagonogono mālohi? (b) Neʼe koteā te “Photo-Drame de la création,” pea neʼe ko te tokofia ʼi te taʼu pe e tahi neʼe fagono kiai?

⁷ ʼI te kua fakaōvi mai ʼaē ʼo te Temi Fakaʼosi ʼo te kau Senitile, neʼe fakaʼaogaʼi te ʼu sulunale moʼo tā ʼo te ʼu akonaki faka Tohi-Tapu ʼaē neʼe fai e te Tēhina ko Russell. Neʼe mole ʼuluaki talanoa te ʼu sulunale ki te taʼu 1914 kae ki te fakatuʼutuʼu ʼaē ʼa te ʼAtua pea mo tona fakahoko ʼo te fakatuʼutuʼu ʼaia. Ko te ʼu sulunale e 2 000 ʼi te temi pe e tahi, neʼe aʼu ki te toko 15 000 000 kau lautohi, neʼe talanoa tuʼumaʼu ki te ʼu akonaki ʼaia. ʼI te kua fakaōvi mai ʼo te taʼu 1914, neʼe kamata fakaʼaogaʼi e te Sosiete ia te “Photo-Drame de la création.” ʼI te ʼu fakahāhā tuʼa fā ia hola e lua, ko te “Photo-Drame de la création” ʼaia neʼe talanoa ki te ʼu moʼoni ʼo te Tohi-Tapu mai te fakatupu ʼo te ʼu meʼa fuli ki te hū ʼaē kia taʼu e afe. ʼI te taʼu pe e tahi, ko te tānaki ʼo te hahaʼi fuli ʼaē neʼe fagono kiai neʼe fakalaka ʼi te toko hiva miliona hahaʼi ʼi te Potu Tokelau ʼo Amelika, Eulopa, Ositalalia, pea mo Niusila.

8. ʼI te taʼu 1914, ko te ʼu fenua e fia neʼe aʼu kiai te kau Ako ʼo te Tohi-Tapu mo te logo lelei?

⁸ ʼO mulimuli pe ki te ʼu fakamatala, ʼi te fakaʼaluʼalu ʼaē ki te fakaʼosi ʼo te taʼu 1914, ko te kau fai faka mafola evaselio fakamalotoloto ʼaia neʼe aʼu tanatou faka mafola ʼo te Puleʼaga ʼo te ʼAtua ki te ʼu fenua e 68.a Kae neʼe ko he kamakamata pe ʼaia!

Tou Fakahā ʼAki He Loto Fakamalotoloto Te Puleʼaga Kua Fakatuʼu

9. ʼI te ʼu fakatahi ʼaē ʼi Cedar Point, neʼe feafeaʼi te faka maʼuhigaʼi ʼo te Puleʼaga?

⁹ ʼI te temi ʼaē neʼe fakatahi ai te kau Ako ʼo te Tohi-Tapu ki Cedar Point, Ohio, ʼi te taʼu 1919, ko J. F. Rutherford, ʼaē neʼe ko te pelesita ʼo te Sosiete Watch Tower ʼi te temi ʼaia, neʼe ʼui fēnei: “Neʼe ko tomatou vokasio ia te fakahā ʼo te haʼu ʼo te Puleʼaga Faka Mesianike pea mo faka kolōlia pea ʼe kei tuʼumaʼu aipe.” ʼI te lua fakatahi ʼaē ʼi Cedar Point ʼi te taʼu 1922, neʼe fakahā fakalelei e te tēhina ko Rutherford te temi fakaʼosi ʼo te kau Senitile ʼi te taʼu 1914, neʼe toʼo e ‘te Hau ʼo te kolōlia tana pule mālohi pea neʼe kamata ʼafio ai ia.’ Ki muli age, neʼe ina fakahā fakalelei kia nātou ʼaē neʼe kau ki te fono, ʼaki tana ʼui ʼaenī: “ ʼE koutou faka tui koa ko te Hau ʼo te kolōlia kua kamata tana ʼafio? Koutou toe liliu ki te gāueʼaga, Ê koutou, ʼu foha ʼo te ʼAtua māʼoluga! . . . Koutou fakahā te logo ʼi te ʼu potu fuli pe. ʼE tonu ke ʼiloʼi e te malamanei ʼe ʼAtua ia Sehova pea ko Sesu Kilisito ko te Hau ʼo te ʼu hau pea ko te ʼAliki ʼo te ʼu ʼaliki. Ko te ʼaho ʼaenī ʼo te ʼu ʼaho fuli. Koutou fakatokagaʼi, te Hau ʼe ʼafio! Ko koutou tana ʼu hahaʼi lagolago.”

10, 11. Neʼe feafeaʼi te fakaʼaogaʼi fakalelei ʼo te ʼu lātio, pea mo te ʼu motokā fakatagi pea mo te ʼu fakaʼiloga neʼe nātou tau, ke maʼu e te hahaʼi te moʼoni ʼo te Puleʼaga?

¹⁰ Kua hili nei taʼu e 70 ki te ʼu fakatahi ʼaē neʼe fai ʼi Cedar Point—pea kua hili kiai taʼu e 80 ki te kua toe kamata fakafofoga e Sehova tona ʼuhiga tuʼi pule ʼaki te pule faka Mesia ʼo tona ʼAlo. Neʼe fakahoko feafeaʼi koa e te kau Fakamoʼoni ʼa Sehova te gāue ʼaē neʼe fakatuhatuha mai kia nātou ʼi te Folafola ʼa te ʼAtua? E feafeaʼi koa takotou kau takitokotahi ki te gāue ʼaia?

¹¹ ʼI te kamata ʼo te ʼu taʼu 1920, neʼe fakaʼaogaʼi ʼaupito te lātio ohage ko he meʼa gāue moʼo fakahā ʼo te logo ʼo te Puleʼaga. ʼI te lolotoga ʼo te ʼu taʼu 1930, ko te ʼu akonaki ʼo te fakatahi neʼe nātou faka maʼuhigaʼi te Puleʼaga ohage ko te falalaʼaga pe ʼaia ʼo te malamanei, neʼe fakahā ʼi te ʼu lātio kehekehe peʼe ʼi te ʼu lātio pe ʼaē ʼo te fenua pea mo te ʼu laini telefoni ʼaē ʼo te malamanei. Ko te ʼu motokā ʼaē neʼe ʼi ai tonatou ʼu meʼa moʼo palalau leʼolahi ai neʼe toe fakaʼaogaʼi moʼo fakahā ʼo te ʼu akonaki ʼo te Tohi-Tapu ʼi te ʼu koga meʼa ʼaē neʼe kaugamālie ai te hahaʼi. Pea ʼi te taʼu 1936, ʼi Glasgow, ʼi Scotland, ko ʼotatou ʼu tēhina neʼe nātou tau te ʼu lauʼi pepa neʼe hili ki ʼonatou ʼu fugaʼuma peʼe nātou kofuʼi ʼosi pe, ʼo nātou haʼele ʼi te ʼu koga meʼa ʼaē neʼe lahi ai te ʼu faifakatau pea mo te ʼu fale gāue, ʼo nātou fakahā te ʼu akonaki ki te kaugamālie. Ko te ʼu meʼa fuli ʼaia neʼe ko he ʼu puleʼaki lelei moʼo faka mafola ki te hahaʼi tokolahi ʼi te temi ʼaē neʼe mole heʼeki tou hahaʼi ai.

12. Ohage ko tona fakahā e te Tohi-Tapu, koteā te meʼa ʼe feala kia tatou takitokotahi ke tou fai moʼo fagonogono?

¹² ʼE moʼoni, ʼe fakahā fakalelei e te Tohi-Tapu ko te kau Kilisitiano, ko tonatou maʼua takitokotahi ko te fai faka mafola. ʼE mole feala pe ke tou tuku ki te ʼu nusipepa peʼe ko te ʼu lātio fuli ke nātou fai te gāue. Ko te toko lauʼi afe kau Kilisitiano agatonu—tagata, fafine, pea mo kau tūpulaga—neʼe nātou tali te fakamaʼua ʼaia. Ko tona fua, ko te faka mafola ʼaē ʼi te ʼu ʼapi kua liliu ia ko te fakaʼiloga ʼaia ʼo te kau Fakamoʼoni ʼa Sehova.—Gāue 5:42; 20:20.

Tou Aʼu Ki Te ʼu Potu Fuli ʼo Te Kele

13, 14. (a) He koʼe ko ʼihi kau Fakamoʼoni neʼe nātou ʼolo ki ʼihi ʼu kolo, pea mo ʼihi pe ʼu fenua, moʼo fai ʼo tanatou minisitelio? (b) ʼAki te ʼofa ʼaē ki te hahaʼi ʼo tona fenua, neʼe feafeaʼi te fakahā ʼo te logo lelei?

¹³ ʼI te ʼiloʼi ʼaē ko te logo ʼo te Puleʼaga ʼe tonu ke faka mafola ʼi te kele katoa, ko ʼihi kau Fakamoʼoni ʼa Sehova neʼe nātou vakavakaʼi fakalelei pe koteā he meʼa ʼe feala ke nātou fai takitokotahi ke nātou aʼu ki te ʼu koga meʼa ʼaē ʼe mamaʼo mo tonatou nofoʼaga.

¹⁴ Tokolahi te hahaʼi neʼe nātou ʼiloʼi te moʼoni ʼi tanatou kua ʼosi mavae mai te ʼu fenua ʼaē neʼe nātou tutupu ai. Logope la te tupuʼaga ʼaē neʼe feala ke nātou mavae mai ai moʼo maʼu ʼo he ʼu koloā fakamālama, kua nātou maʼu te meʼa ʼe maʼuhiga age ʼaupito, pea ko ʼihi ia nātou neʼe nātou logoʼi ʼe tonu ke nātou toe liliu ki te fenua peʼe ko te kolo ʼaē neʼe nātou tutupu ai moʼo vaevae te moʼoni. Koia, ʼi te kamata ʼo te sēkulō ʼaenī ko te faka mafola ʼo te logo lelei neʼe mafola ʼi Scandinavie, ʼi Heleni, ʼi Italia, ʼi te ʼu fenua ʼo te Potu Hahake ʼo te Eulopa, pea mo ʼihi pe ʼu faʼahi. Tatau aipe la mo te temi nei, ʼi te ʼu taʼu 1990, ko te logo ʼo te Puleʼaga ʼe kei faka mafola pe ʼaki te faʼahiga puleʼaki ʼaia.

15. ʼI te lolotoga ʼo te ʼu taʼu 1920 pea mo te ʼu taʼu 1930, koteā ʼaē neʼe fakahoko e ʼihi ʼo mulimuli pe ki te manatu ʼaē ʼe tuʼu ia Isaia 6:8?

¹⁵ Moʼo mulimuli ki te tokoni ʼa te Folafola ʼa te ʼAtua ʼi tonatou maʼuli, ko ʼihi neʼe nātou tali ke nātou ʼolo ki te ʼu koga meʼa neʼe mole heʼeki nātou maʼuʼuli ai. Ko W. R. Brown (neʼe higoaʼi māhani ko “Brown te Tohi-Tapu”) neʼe kau ia nātou ʼaia. ʼI te taʼu 1923, moʼo fakahā te gāue faka mafola ʼo te evaselio, neʼe mavae mai Trinidad ki te Potu Hihifo ʼo Afelika. ʼI te lolotoga ʼo te ʼu taʼu 1930, ko Frank pea mo Gray Smith, ko Robert Nisbet, pea mo David Norman neʼe nātou kau ia nātou ʼaē neʼe nātou ʼave te logo ʼo te Puleʼaga ki te Potu Hahake ʼo Afelika. Ko ʼihi neʼe nātou tokoni ki te gāueʼi ʼo te Potu Toga ʼo Amelika. ʼI te kamata ʼo te ʼu taʼu 1920, ko George Young, ko te tagata Kanata, neʼe kau ki te gāue ʼi Alasatine, ʼi Pelesile, ʼi Polivia, ʼi Chili, pea mo Pelu. Ko Juan Muñiz, ʼaē neʼe gāue ʼi Sepania, neʼe ina toe fakahoko atu tana fai faka mafola ʼi Alasatine, ʼi Chili, ʼi Paraguay, pea mo Uruguay. Ko nātou fuli ʼaia neʼe ia nātou te manatu ʼaē ʼe fakahā ia Isaia 6:8: “Koʼeni ʼau! Fekauʼi ʼau.”

16. Kofea ʼihi age ʼu faʼahi neʼe fai ai te fagonogono ʼi muʼa ʼo te ʼu temi tau ʼo mole gata ʼaki pe te ʼu koga meʼa ʼaē neʼe hahaʼi ai?

¹⁶ Ko te faka mafola ʼo te logo lelei neʼe toe aʼu pe foki ki te ʼu koga meʼa mamaʼo. Ko te ʼu vaka neʼe faʼu e te kau Fakamoʼoni neʼe ʼolo ʼo ʼaʼahi ki te ʼu ʼuafu fuli ʼo Newfoundland, ko te potu ʼo Norvège ʼaē kau ki te Arctic, mo te ʼu motu ʼo te Pasifika, pea mo te ʼu ʼuafu ʼo te Potu Toga-Hahake ʼo te Asia.

17. (a) ʼI te taʼu 1935, ko te ʼu fenua e fia neʼe aʼu kiai te gāue ʼa te kau Fakamoʼoni? (b) He koʼe ko te gāue neʼe mole heʼeki ʼosi ʼi te temi ʼaia?

¹⁷ Meʼa fakapuna’maʼuli, ʼi te taʼu 1935, neʼe maʼumaʼua te kau Fakamoʼoni ʼa Sehova ki te faka mafola ʼi te ʼu fenua e 115, pea kua nātou aʼu ki ʼihi age ʼu fenua e 34 ʼaki te ʼu ʼaʼahi ʼa te ʼu kūtuga fai faka mafola peʼe ʼaki te fakamomoli ʼo ni ʼu tohi faka Tohi-Tapu ʼi te fale fakahū tohi ʼi te meli. Kae, neʼe mole heʼeki ʼosi te gāue. ʼI te taʼu ʼaia neʼe avahi ai e Sehova tonatou ʼu mata ki tana fakatuʼutuʼu ʼaē ke fakamāʼopoʼopo “te hahaʼi tokolahi” ʼaē ka maʼuʼuli anai ʼi tona mālama foʼou. (Fakahā 7:9, 10, 14) Neʼe kei ʼi ai pe te toe faka mafola lahi neʼe tonu ke fai!

18. ʼI te gāue fagonogono ʼaē ʼo te Puleʼaga, neʼe koteā te gāue neʼe fakahoko e te Faleako ʼo Kalaate pea mo te Ako ki te Teuteu Faka Minisitelio?

¹⁸ Logope la te lolotoga hoko ʼaē ʼo te Lua Tau Faka Malamanei ʼi te kele pea mo te tapuʼi ʼaē ʼo te ʼu tohi pea mo te gāue ʼa te kau Fakamoʼoni ʼa Sehova ʼi te ʼu potu ʼo te kele, ko te Faleako faka Tohi-Tapu ʼo Kalaate ʼo te Sosiete Watchtower neʼe ina kamata teuteuʼi te kau misionea ke nātou kau mālohi ki te fagonogono ʼo te Puleʼaga ki ʼihi ʼatu ʼu fenua. ʼO kaku mai ki te ʼaho nei, ko te kau maʼu pepa ʼo Kalate neʼe nātou gāue ʼi te ʼu fenua e 200. Neʼe mole gata ʼaki pe hanatou tuku ʼo he ʼu tohi faka Tohi-Tapu pea mo nātou mavae kehe ai. Neʼe nātou toe fai mo te ʼu ako faka Tohi-Tapu, pea mo te ʼu kokelekasio pea mo akoʼi te hahaʼi ke nātou ʼamo he ʼu maʼua faka teokalatike. Ko te meʼa ʼe mole heʼeki faʼa fualoa, ko te kau tagata ʼāfea pea mo te kau faifekau faka minisitelio ʼaē neʼe nātou maʼu pepa mai te Ako ki te Teuteu Faka Minisitelio neʼe nātou toe tokoni pe foki ki te fakahoko ʼo ni ʼu faʼahi neʼe ʼaoga ki te gāue ʼaia ʼi te ʼu fenua e ono. Ko he fakatafito mālohi neʼe fai moʼo fakatalitali ki te tuputupu tuʼumaʼu ʼaē ʼo te hahaʼi ʼa Sehova.—Vakaʼi ia 2 Timoteo 2:2.

19. Neʼe feafeaʼi te tali ʼa te ʼu kaugana ʼa Sehova ki te fakaafe ʼaē ke nātou gāue ʼi te ʼu faʼahi ʼaē ʼe ʼaoga tāfito kiai te gāue?

¹⁹ Neʼe feala koa ki ʼihi age ke nātou tokakaga ki ni ʼu telituale neʼe mole heʼeki gāueʼi? ʼI te taʼu 1957, ʼi te ʼu fakatahi ʼa te ʼu fenua kehekehe, ko te ʼu hahaʼi takitokotahi pea mo te ʼu famili—kau Fakamoʼoni ʼa Sehova kua aga fakapotopoto—neʼe fakaloto mālohiʼi nātou ke nātou vakavakaʼi peʼe feala ke nātou mavae ki niʼihi age ʼu faʼahi neʼe lahi ai te gāue, ke nātou nonofo ai ʼo fai tanatou minisitelio. Neʼe hage te fakaafe ʼaia ko te fakaafe ʼaē neʼe fai e te ʼAtua ki te ʼapositolo ko Paulo, ʼaē neʼe sio ki te tagata ʼe kolekole age fēnei kia ia: “Fakalaka ʼi Masetonia pea tokoni mai kia mātou.” (Gāue 16:9, 10) Ko ʼihi neʼe nātou mavae ki ʼihi faʼahi ʼi te ʼu taʼu 1950, ʼo feiā mo ʼihi ki muli mai. Neʼe ko te kau Fakamoʼoni ʼe lauʼi afe neʼe ʼolo ki Ilelani pea mo Kolopī; ko te toko lauʼi teau neʼe mavae ki te tahi ʼu faʼahi. Ko te toko lauʼi hogofulu afe neʼe mavae ʼi tonatou ʼu kolo ki te ʼu faʼahi ʼaē neʼe ʼaoga tāfito kiai te gāue.—Pesalemo 110:3.

20. (a) Talu mai te taʼu 1935, koteā ʼaē neʼe hoko ʼo mulimuli pe ki te fakakikite ʼa Sesu ia Mateo 24:14? (b) ʼI te lolotoga ʼo te ʼu kiʼi taʼu ʼaenī kua hili, neʼe feafeaʼi te tuputupu fakavilivili ʼo te gāue?

²⁰ ʼAki te tapuaki ʼa Sehova ki tana hahaʼi, ko te faka mafola ʼo te Puleʼaga ʼe kei haʼele pe ki muʼa ʼi hona ʼaluʼaga fakatalakitupua. Talu mai te taʼu 1935 ko te hahaʼi ʼo te kau fai faka mafola neʼe teitei tuʼa valugofulu tona tuputupu, pea ko te fakafuafua ʼo te tuputupu ʼo te kau pionie neʼe ko te 60 ki te teau, ʼo fakalaka age ʼi te tuputupu ʼo te hahaʼi fai faka mafola. Ko te fakatuʼutuʼu ʼo te ʼu ako Tohi-Tapu ʼi te ʼu ʼapi neʼe fai ʼi te lolotoga ʼo te ʼu taʼu 1930. ʼI te temi nei ko te ʼu ako Tohi-Tapu e fā miliona vaelua ʼi te māhina. Talu mai te taʼu 1935, e teitei fakalaka ʼi te 15 miliona te ʼu hola ʼaē neʼe fai ki te gāue ʼo te faka mafola ʼo te Puleʼaga. Ko te faka mafola hoholo ʼo te logo lelei kua fai nei ʼi te ʼu fenua e 231. Kapau ko te ʼu telituale ʼaē ʼi Eulopa ʼo te Potu Hahake pea mo Afelika kua avahi ki te fai faka mafola ʼo te logo lelei, ko te ʼu fakatahi fakafenua neʼe ko he ʼu faka fealagia lelei ʼaia moʼo fakahā ki te hahaʼi ia te logo maʼuhiga ʼaē ʼo te Puleʼaga. Ohage ko te fakapapau ʼa Sehova kua fualoa, ia Isaia 60:22, ʼe mahino ia ʼe ina ‘fakahaʼele ki muʼa te faʼahi ʼaia mokā hoko tona temi.’ ʼE ko he toe pilivilesio kia tatou hatatou kau ki te gāue ʼaia!

Tou Aʼu Ki Te Hahaʼi Fuli ʼAki Te Logo Lelei

21, 22. Koteā te meʼa ʼaē ʼe feala ke kita fai takitokotahi ke kita liliu ai ko he kau Fakamoʼoni faiva ʼi he faʼahi pe e kita kaugana ai?

²¹ Neʼe mole heʼeki ʼui e te ʼAliki ko te gāue kua ʼosi. Ko te toko lauʼi afe ʼe kei foʼofoʼou mai ʼi te ako ʼo te tauhi moʼoni. Koia ko te fehuʼi ʼaenī ʼe malaga mai ai, ʼe tou lolotoga faiga fakamalotoloto koa ʼo fakaʼaogaʼi fakalelei totatou temi ʼaē neʼe tuku mai e Sehova moʼo fai ʼo te gāue ʼaia?—2 Petelo 3:15.

²² ʼE mole ko te hahaʼi fuli ʼaē ʼe feala ke ʼolo ki te ʼu telituale ʼaē ʼe tahitahiga tona gāueʼi. Kae ʼe koutou faigaʼi koa te ʼu fealagia ʼaē ʼe tuku atu kia koutou? ʼE koutou fagonogono koa ki tokotou ʼu kaugā gāue? ki te ʼu hahaʼi faiako pea mo tokotou ʼu kaugā ako? ʼE koutou fai koa ni ʼu fetogi ke ʼalutahi pea mo te ʼu ʼaluʼaga ʼo tokotou telituale? Ohage la, mo kapau e tokosiʼi te hahaʼi ʼe nonofo ʼi ʼonatou ʼu ʼapi ʼi te uhu, ko he faʼahi ia ʼe tupu ai hakotou fetogi ʼo hakotou fakatuʼutuʼu māhani, kua koutou fetogi koa takotou polokalama ke koutou ʼaʼahi te hahaʼi ʼi te afiafi? Kapau ko he ʼu fale ʼe mole faka fealagia ke koutou hū ki loto, ʼe koutou fagonogono koa ʼaki te telefoni peʼe ʼaki te faitohi? ʼE koutou tokakaga koa ki he tahi neʼe fia logo pea mo ina fakaʼui atu he ʼu ako ʼo te Tohi-Tapu? ʼE koutou fai katoa koa tokotou minisitelio?—Vakaʼi ia Gāue 20:21; 2 Timoteo 4:5.

23. ʼUhi he ko Sehova ʼe ina sioʼi te meʼa ʼaē ʼe tou lolotoga fai kia te ia, koteā ʼaē ʼe tonu anai ke ʼiloga ia tatou?

²³ ʼOfa pe ke tou fai fuli tatatou minisitelio ʼaki he aga ʼe tou fakahā fakalelei ai kia Sehova, ʼe tou leleiʼia ʼaupito te toe pilivilesio ʼaē ko tatou ko tana kau Fakamoʼoni ʼi te ʼu temi faigataʼa ʼaenī. ʼOfa pe ke tou maʼu te pilivilesio ʼaē ke tou sio mata mokā fakahoko anai e Sehova tana fakamāu ki te tuʼu fakahehema ʼāfea pea mo tana takitaki ʼaē te Pule faka kolōlia ʼa Sesu Kilisito ia taʼu e afe!

[Nota ʼi te lalo pasina]

Fakamanatu

◻ He koʼe ko te faka mafola ʼo te logo ʼo te Puleʼaga ʼe maʼuhiga ʼaupito?

◻ Neʼe feafeaʼi te lahi ʼo te faka mafola ʼo te logo lelei talu mai te taʼu 1914?

◻ Neʼe feafeaʼi te fai ʼo te fagonogono mālohi talu mai te fakatuʼu ʼo te Puleʼaga?

◻ Koteā te meʼa ʼe feala ke tou fai ʼo ʼuhiga mo tatatou kau ki te minisitelio ke lahi ʼaupito tona fua?

[Talanoa ʼo te ʼu pasina 16, 17]

KO TE KAU FAKAMOʼONI ʼA SEHOVA—Ko Te Kau Faka Mafola ʼo Te Puleʼaga ʼo Te ʼAtua

Neʼe fai te ʼu fakatahi e toko teau ʼi te malamanei ʼi te lolotoga ʼo te taʼu 1993 ki te taʼu 1994, neʼe fakahā te kua maʼu ʼo te tohi foʼou Les Témoins de Jéhovah: Prédicateurs du Royaume de Dieu. ʼE fakamatala ai pea mo fakamahino ai te hisitolia ʼa te kau Fakamoʼoni ʼa Sehova. Ko te ʼu pasina e 752 ʼo te tohi ʼaia, ʼe matalelei tona ʼu paki, pea ko paki ʼe lauʼi afe neʼe tānaki mai te ʼu fenua kehekehe e 96. ʼI te fakaʼosi ʼo te taʼu 1993 neʼe kua ʼosi tā ʼi te ʼu lea e 25 pea ʼe kei lolotoga fakaliliu nei ki niʼihi age ʼu lea.

He koʼe koa ʼe tautonu te tohi ʼaia? ʼI te ʼu taʼu pe ʼaenī, ko te hahaʼi ʼe lauʼi miliona ʼi te malamanei kua liliu ko te kau Fakamoʼoni ʼa Sehova. Ko nātou fuli ʼaia ʼe tonu anai ke nātou mahino lelei ki te hisitolia ʼo te kautahi ʼaē kua nātou fakatahi mai kiai. Pea tahi ʼaē, ko tanatou faka mafola pea mo tanatou tauhi neʼe tali e te ʼu faʼahiga fenua kehekehe ʼo te malamanei pea neʼe tali lelei e te kau tūpulaga mo te kau matuʼa mai ni ʼu ʼaluʼaga kehekehe ʼi te faʼahi ʼo te paʼaga feiā ki te faʼahi ʼo te ʼatamai. Koia, ʼi tanatou sisio ʼaē ki te ʼu meʼa ʼe lolotoga hoko ʼe lahi te ʼu fehuʼi ʼe fai e te hahaʼi ʼo ʼuhiga mo te kau Fakamoʼoni—ʼo mole gata ʼaki pe tanatou ʼu akonaki kae feiā ki tonatou kamataʼaga mai, tonatou hisitolia, tonatou kautahi, pea mo tanatou ʼu fakatuʼutuʼu. Neʼe kua ʼi ai pe ʼihi neʼe kua nātou fai te ʼu tohi ʼo ʼuhiga mo nātou, kae neʼe mole nātou fakapalatahi tuʼumaʼu. Kae, ʼe mole he tahi ia ʼaho nei, ʼe ina ʼiloʼi age te hisitolia ʼa te kau Fakamoʼoni ʼa Sehova ia nātou totonu pe. Ko nātou ʼaē neʼe nātou tā te tohi ʼaia neʼe nātou faiga ke nātou fakamatala te hisitolia ʼi hona ʼaluʼaga moʼoni pea mo fakahagatonu. ʼO mulimuli pe ki te faʼahiga fai ʼaia, neʼe nātou foaki he ʼu fakamoʼoni ʼe nātou faka fealagia te fakafuafua ʼaē ʼo te temi ʼe hoko ai te faʼahi maʼuhiga ʼo te fakaʼiloga ʼo te ʼafio ʼa Kilisito ʼaē ʼe talanoa kiai te tohi ʼo Mateo 24:14, pea neʼe fealagia te faʼahi ʼaia ʼaki pe te ʼu fakamatalatala ʼaē neʼe foaki ʼe nātou ʼaē neʼe kau fakamalotoloto ki te gāue ʼaē neʼe kua ʼosi fakakikite.

Neʼe vaheʼi te tohi kia koga tāfito e fitu:

Faʼahi 1: ʼE talanoa te faʼahi ʼaia ki te ʼu kamataʼaga ʼo te hisitolia ʼa te kau Fakamoʼoni ʼa Sehova. ʼE kau kiai te fakamatala nounou moʼo fakamahino tonatou hisitolia ia ʼaho nei mai te taʼu 1870 ki te taʼu 1992.

Faʼahi 2: Ko he toe fakasiosio lelei ʼo te tuputupu mamalie ʼo te ʼu akonaki ʼaē ʼe fakakeheʼi ai te kau Fakamoʼoni ʼa Sehova mai ʼihi ʼatu ʼu lotu.

Faʼahi 3: ʼE talanoa te koga ʼaia ʼo te tohi ki te hoholo mai ʼo te temi ʼo ʼuhiga mo te fakatuʼutuʼu ʼo tanatou kautahi. ʼE talanoa ki he ʼu meʼa maʼuhiga neʼe hoko ʼo ʼuhiga mo te ʼu fono ʼo tanatou ʼu kokelekasio pea mo tanatou ʼu fakatahi, ʼo toe feiā aipe ki tanatou faʼahiga laga ʼaē ʼo tanatou ʼu Fale ʼo te Puleʼaga, te ʼu Fale Fakatahi lalahi, pea mo te ʼu meʼa ʼaē ʼe nātou faka fealagia ia te tā ʼo te ʼu tohi ʼe fakatafito ki te Tohi-Tapu. ʼE ina fakahā te faiga fakamalotoloto ʼa te kau Fakamoʼoni ʼa Sehova moʼo faka mafola te Puleʼaga ʼo te ʼAtua pea mo te ʼofa ʼaē ʼe nātou fakahā ʼaki tanatou tahi tokaga fuli pe ki he tahi ʼi te ʼu temi faigataʼa.

Faʼahi 4: ʼE koutou maʼu ai anai te ʼu fakamatalatala fakaofoofo pe neʼe feafeaʼi te aʼu ʼo te faka mafola ʼo te Puleʼaga ʼa te ʼAtua ki te ʼu fenua pea mo te ʼu motu mamaʼo ʼo te kele. Koutou fakakaukauʼi age muʼa—ko te ʼu fenua e 43 neʼe fai ai te faka mafola ʼi te taʼu 1914, kae ʼi te taʼu 1992 ko te ʼu fenua e 229! Ko te ʼu meʼa neʼe hoko kia nātou ʼaē neʼe kau ki te faka mafola faka malamanei ʼaia, neʼe toe fakaloto mālohi pe foki.

Faʼahi 5: Neʼe fakamaʼua ki te fakahoko ʼo te toe gāue faka mafola ʼaia he ʼu fealagia ʼi te ʼatu ʼu fenua moʼo faka faigafua ia te tā ʼo te ʼu Tohi-Tapu feiā ki te ʼatu ʼu tohi faka Tohi-Tapu ʼi te ʼu lea e luageau tupu. ʼI te koga ʼaia, ʼe koutou akoʼi anai te faʼahi ʼaia ʼo tanatou gāue.

Faʼahi 6: Neʼe toe felāveʼi pe foki te kau Fakamoʼoni mo te ʼu ʼahiʼahi—ko ni ʼahiʼahi ʼuhi ko te heʼe haohaoa, ʼuhi ko te ʼu tēhina loi, pea ko niʼihi tupu mai ni ʼu fakataga mālohi. Neʼe kua fakakikite pe e te Folafola ʼa te ʼAtua ʼe tonu anai ke hoko he ʼu ʼaluʼaga feiā. (Luka 17:1; 2 Timoteo 3:12; 1 Petelo 4:12; 2 Petelo 2:1, 2) Ko te faʼahi ʼaia ʼo te tohi ʼe ina fakahā fakalelei te meʼa ʼaē neʼe hoko moʼoni pea neʼe feafeaʼi te haga ʼaē ʼa te tui ʼa te kau Fakamoʼoni ʼa Sehova ʼo tauʼi te faʼahi ʼaia.

Faʼahi 7: Moʼo fakaʼosi, ʼe talanoa te tohi ki te tupuʼaga ʼaē ʼo te ʼiloʼi papau e te kau Fakamoʼoni ʼa Sehova, ko te kautahi ʼaē ʼe nātou kau kiai ʼe takitaki moʼoni ia e te ʼAtua. ʼE toe talanoa foki ki te tupuʼaga ʼaē ʼo te maʼuhiga kia nātou ia te nofo ʼalaʼala ʼi te faʼahi ʼaē ʼo te kautahi pea mo te faʼahi takitokotahi.

ʼO mole gata ʼaki te meʼa ʼaē ʼi ʼoluga, ʼe maʼu ʼi te tohi matalelei ʼaia te ʼu pasina e 50 ʼe lahi te ʼu meʼa ʼe nātou fakamahino ʼaki te ʼu paki lanu kehekehe ʼe nātou fakahā mai te ʼu nofoʼaga feiā ai pe mo te ʼu filiale ʼaē ʼe lolotoga fakaʼaogaʼi nei e te kau Fakamoʼoni ʼa Sehova ʼo te malamanei.

Kapau neʼe mole heʼeki koutou fai te faʼahi ʼaia, ʼe fua manuʼia anai kia koutou ʼaki hakotou toʼo pea mo lau te tohi fakaofoofo ʼaia.

Ko Te ʼu Manatu ʼa ʼIhi ʼAē Neʼe Nātou Lau Te Tohi

Koteā te manatu ʼa nātou ʼaē neʼe kua nātou lau te tohi ʼaia? Koʼeni te ʼu kiʼi manatu:

“Neʼe hoki ʼosi age pe taku lau katoa ʼo te tohi fakaofoofo ʼaia, te talanoa maʼuli ʼo ʼuhiga mo te tohi Les Témoins de Jéhovah: Prédicateurs du Royaume de Dieu. ʼE gata pe ki he kautahi agatonu pea mo agavaivai neʼe pipiki ki te moʼoni neʼe feala ke palalau fakahagatonu, lototoʼa, pea mo faka malave loto feiā.”

“ ʼE hage pe ko tona lau ʼaē ʼi te tohi ʼo Gāue, ʼe agatonu pea moʼoni.”

“ ʼE ko he meʼa fakaofoofo te tohi foʼou ʼaia! . . . Ko he faʼahi maʼuhiga ia ʼo te hisitolia.”

ʼI tana ʼosi lau te vaelua ʼo te tohi, neʼe tohi fēnei e te tagata: “Neʼe ʼau punamaʼuli, ʼo ʼau ōfo, pea mo teitei tagi. . . . Hoki ʼau maʼu age nei te tohi ʼe fakalave loto.”

“ ʼE fiafia toku loto ʼi te temi fuli pe ʼi taku ʼiloʼi ʼaē ko te tohi ʼaia ʼe ina fakaloto mālohiʼi anai te tui ʼa te kau tūpulaga ʼo toe feiā aipe kia nātou ʼe foʼofoʼou mai ki te kautahi ia ʼaho nei.”

“Neʼe ʼau leleiʼia tuʼumaʼu pe te moʼoni, kae ʼaki te tohi ʼaia neʼe lahi age taku mahino, pea neʼe tokoni aipe kia te ʼau ke ʼau fakamoʼoni ko te laumālie maʼoniʼoni ʼo Sehova ʼe ia meʼa fuli.”

[Paki ʼo te pasina 18]

Tokolahi te hahaʼi neʼe nātou fagono ki te logo ʼo te Puleʼaga logope la te tokosiʼi ʼa te kau Fakamoʼoni