“Neʼe ʼAu Tauhi Maʼu Te Tui”

NEʼE FAKAMATALA E TE ʼU KAUMEʼA ʼO BRUNELLA INCONDITI

“KO TE Moeaki neʼe ko he ʼaho loaloaga, pea ko he ʼaho neʼe hage ia neʼe ʼau tokotahi ʼosi. Neʼe ko ʼau tokotahi pe ʼi te koga fale, ohage kia ʼau neʼe mole kei ʼi ai he ʼamanaki. Neʼe hage ʼe ʼau haʼele ʼi he kulua. Neʼe maui mālie pe ia meʼa fuli, kae fokifā pe, neʼe ʼi ai te tahi neʼe ina tāʼi mai te matapā ʼi ʼoku muʼa, pea neʼe mole ʼi ai he tahi age ala moʼo hū ki tuʼa, logope la taku faiga.”

Ko he toe mamahi foki neʼe tāu ʼi te loto ʼo Brunella Inconditi ʼi tona taʼu 15. Ko te ʼaho maʼuhiga ʼaia ʼo tona maʼuli, ʼaē neʼe heʼeki faʼa fualoa, neʼe lolotoga fakalaka ia. ʼI te kamata mai ʼo te taʼu ʼaia ko tona ʼofa ʼaē kia Sehova pea mo te Tohi-Tapu neʼe ina uga ia ia ke ina foaki tona maʼuli kia Sehova. Koia ʼi te māhina ʼo Sūlio ʼo te taʼu 1990 neʼe tonu ke papitema ʼi te Fakatahi faka Tisitilike “Te Lea Maʼa” ʼa te kau Fakamoʼoni ʼa Sehova ʼi Montréal, ko he kolo ʼo te fenua ko Kanata. Kae, neʼe ʼamanaki felāveʼi leva Brunella mo te ʼahiʼahi ki tana tui ʼe fai hoholo anai ʼi te lolotoga ʼo tona maʼuli katoa.

Ko ʼaho pe e lua ʼi muʼa ʼo tana ʼamanaki fakamoʼoni ʼaē tana kua foaki tona maʼuli kia Sehova ʼaki te papitema ʼi te vai, neʼe fakahā age kia Brunella ʼe kau ia ʼi te mahaki ʼaē ko te leucémie. Ko te ʼu tōketā ʼo te Fale mahaki ʼa te kau tamaliki neʼe nātou loto ke kamata atu aipe ʼi te moʼi temi pe ʼaia tona faitoʼo, koia neʼe nofo ai leva Brunella ʼi te lopitali.

Neʼe Malave Tana ʼu Palalau Ki Te ʼu Tōketā

Neʼe mahino kia Brunella te taputapu ʼa te toto kia Sehova ʼAtua. (Levitike 17:11) Ko tana ʼu mātuʼa, ia Edmondo pea mo Nicoletta, neʼe nā fakatotonu age ki te kau tōketā ʼe mole feala ke fakaʼaogaʼi he foʼi huki toto moʼo faitoʼo ʼo tanā taʼahine. ʼE fakamanatuʼi mai e tana tāmai “Neʼe loto Brunella ke logoʼi e te ʼu tōketā te faʼahi ʼaia mai ia ia totonu logope la tana kei tamasiʼi. Neʼe ina ʼui age fakamalotoloto kia nātou ʼe mole loto ia ki he faʼahiga faitoʼo ʼe fakafeagai ki te fakatotonu ʼa te Tohi-Tapu ‘ke fakamamaʼo mai te toto.’ ”—Gāue 15:20.

ʼI te ʼaho 10 ʼo Sūlio ʼo te taʼu 1990, ko tōketā e tolu pea mo te assistante sociale neʼe felāveʼi mo te ʼu mātuʼa ʼa Brunella pea mo te ʼu minisi e lua ʼo te kokelekasio ʼa te kau Fakamoʼoni ʼa Sehova ʼo te koga meʼa pe ʼaia. Ko te ʼu sivisivi ʼaē neʼe fai, neʼe nātou fakamoʼoni ki te faʼahi ʼaē, ʼe kau Brunella ki te Leucémie Lymphoblastique. Neʼe fakamahino age e te kau tōketā tanatou fakatuʼutuʼu moʼo tauʼi ʼo te mahaki. Neʼe nātou fakaʼeteʼete ʼi tanatou fakahā age te faigataʼa ʼaupito ʼo te faitoʼo. ʼE kei manatuʼi e te tagata ʼāfea ʼo te kokelekasio “ko te aga ʼa Brunella mo tana faiga faimate ʼaē ke fakalogo ki te lao ʼa te ʼAtua neʼe malave ki te loto ʼa te ʼu tōketā pea mo te assistante sociale. Neʼe nātou punamaʼuli ʼi te ʼofa ʼaē neʼe fakahā e tana ʼu mātuʼa pea mo te lagolago ʼo tonatou ʼu kaumeʼa ʼo te kokelekasio faka Kilisitiano. Neʼe nātou toe leleiʼia pe foki ia tamatou lotomahino pea mo tamatou fakaʼapaʼapa ʼaē ki tonatou tuʼulaga.”

Neʼe fakatuʼutuʼu e te ʼu tōketā ke mole nātou fakaʼaogaʼi he ʼu foʼi huki toto. ʼE faitoʼo anai Brunella ʼaki te Chimiothérapie, kae ʼe mole mamahi anai ia ohage ko te agamāhani. Ko te meʼa ʼaia ʼe ina tāʼofi anai te mafola ʼo te kovi. ʼE fakamatala e Nicoletta “neʼe tokakaga te ʼu tōketā ki te ʼu meʼa ʼe ʼaoga kia Brunella ʼi te faʼahi fakasino, ki te ʼu meʼa ʼaē ʼi tona loto, pea mo te ʼu meʼa ʼaē neʼe ʼaoga ki ai ʼi te faʼahi fakalaumālie. ʼI tamatou kole age kia nātou ke nātou vakavakaʼi he tōketā ʼe kua māhani ʼi te mole fakaʼaogaʼi ʼo te toto mokā gāue ki te leucémie ʼa te kau tamaliki, neʼe nātou tali lelei.” Ko Brunella pea mo te kūtuga ʼo te lopitali neʼe nātou liliu ʼo feʼofanaki.

Ko Te ʼu Fakatuʼutuʼu ʼi Te Faʼahi Fakalaumālie

Logope la te fua lelei ʼo te ʼuluaki faitoʼo, ko te ʼahiʼahi ʼo Brunella neʼe hoki kamata age pe ia. ʼI te māhina ʼo Novepeli ʼo te taʼu 1990 neʼe ai te kiʼi siasiaʼa ʼo tona mahaki, koia neʼe mole fualoa pea papitema Brunella. ʼI tana fakasiosio ʼaē ki te ʼu kiʼi māhina kua hili atu, neʼe ʼui fakahagatonu e Brunella: “Neʼe mole ko he meʼa faigafua foki. ʼE ʼaoga ke koutou mālohi ʼaupito, pea ʼe tonu ke koutou loto falala. . . . Ko taku tui neʼe ʼahiʼahiʼi, kae neʼe ʼau haga nofo mālohi aipe, pea neʼe kei ʼau fakatuʼutuʼu aipe ke ʼau liliu ko he pionie katoa.”

ʼI te kamata mai ʼo te taʼu 1991, neʼe toe laga te mahaki ʼo Brunella. Neʼe kua meihiʼi mate pe ʼi tona leletakiʼi ʼaē ki te chimiothérapie, kae neʼe mātou punamaʼuli fuli pea mo fiafia ʼi tana toe mālohi age. ʼI te māhina ʼo ʼAukusito neʼe kua feala hana toʼo te selevisi pionie vaeluaʼi temi ʼo ʼuhiga mo te fai faka mafola. Neʼe toe lēsili tona mahaki, pea ʼi te māhina ʼo Novepeli ʼo te taʼu 1991 neʼe lahi te ʼu koga ʼo tona sino neʼe kua pikisia ia ʼi te kosea. Neʼe faitoʼo ai leva ia Brunella ʼaki te radiation thérapeutique e te tahi ʼu tōketā ʼo te tahi lopitali.

Māʼiape la te ʼu faigataʼa ʼaia, neʼe haga nofo mālohi aipe ia Brunella pea mo ina fai aipe tana ʼu fakatuʼutuʼu ʼi te faʼahi fakalaumālie. ʼI te temi ʼaē neʼe fakahā age ki ai ʼe kau ʼi te Leucémie, neʼe ʼui age ki ai ko ʼona māhina pe e ono neʼe kei toe ki tona maʼuli. ʼI te temi nei, kua teitei hili kiai te taʼu e tahi vaelua, neʼe kei lolotoga fai pe e Brunella tana ʼu fakatuʼutuʼu ki te ka haʼu. Neʼe ʼui e te tagata ʼāfea ʼo te kokelekasio ʼo ʼuhiga mo ia “neʼe mole ina faka ʼalunoa he temi ʼi tana faiga ʼaē ke ina fakahoko tana ʼu fakatuʼutuʼu. Ko te falala ʼa Brunella ki te palatiso ʼaē neʼe fakapapau e te ʼAtua neʼe lagolago ki ai lolotoga tona ʼahiʼahi. Neʼe tuputupu ʼi te agapoto faka Kilisitiano kae neʼe kei veliveli tona ʼu taʼu. Ko tana aga pea mo tona loto neʼe ko he faʼifaʼitaki lelei ki te kokelekasio pea neʼe malave ia ki te loto ʼo nātou fuli ʼaē neʼe feʼiloʼiʼaki mo ia, ʼo feiā mo te kūtuga ʼo te lopitali.” ʼE kei manatuʼi e tana faʼe: “Neʼe mole ʼi ai pe la he temi neʼe muhumuhu ai. Ka fehuʼi age e he tahi peʼe lelei pe, neʼe fēnei pe tana tali, ‘ ʼE lelei pe ia’ peʼe, ‘ ʼE siasiaʼa pe, kaeā koe?’ ”

Ko He Ka Haʼu ʼe Hoko Moʼoni Anai

Neʼe fakatuʼutuʼu e Brunella ke kau ki te Fakatahi Faka Tisitilike ʼa te kau Fakamoʼoni ʼa Sehova ʼi te māhina ʼo Sūlio ʼo te taʼu 1992 “Ko Te Kau Toʼo ʼo Te Mālama.” ʼI te temi ʼaē neʼe hoko ai te Fakatahi ʼaia, neʼe takoto Brunella ʼi lopitali, pea ko tona maʼuli neʼe lolotoga mavae ia mai ia ia. Logope la te faʼahi ʼaia, neʼe kau pe Brunella ki te Fakatahi ʼo heka ʼi te hekaʼaga ʼe ʼi ai tona ʼu foʼi teka, ʼaki te loto ʼaē ke sio ki te gaoʼi neʼe teuteuʼi, pea ko tona kupu tāfito e fēnei Tou Fai Te Meʼa ʼAē ʼe Totonu Kia Mata ʼa Sehova.

Neʼe toe liliu ki tona ʼapi, ki tona famili moʼo fakaʼosi ʼi ai te ʼu kiʼi ʼaho ʼaē neʼe kei toe ki tona maʼuli. ʼE ʼui e Nicoletta “Ki muli age, neʼe lahi age pe tana tokaga ʼaē kia nātou ʼaē, ʼi tana tokaga ʼaē kia ia totonu. Neʼe ina fakaloto mālohiʼi nātou ke nātou ako te Tohi-Tapu, ʼo ina ʼui age, ‘ ʼe tou fakatahi anai ʼi te palatiso.’ ”

Neʼe mate ia Brunella ʼi te ʼaho 27 ʼo Sūlio ʼo te taʼu 1992, ʼaki te ʼamanaki mālohi ʼaē, ʼe toe fakatuʼuake anai ki te maʼuli ʼi te palatiso ʼi te kele. Neʼe hoki kamata fakahoko age pe foki e ia tana ʼu fakatuʼutuʼu, kae neʼe ina fakatotonu ʼi tona loto ʼe ina toe hoko atu anai tana lele faka Kilisitiano ʼi tona fakatuʼuake. Ko kiʼi ʼaho pe ʼi muʼa ʼo tana mate, neʼe fai e Brunella te tohi ʼaenī, ʼaē neʼe lau ʼi tona ʼavaifo.

“Naʼi kāiga:

“ ʼE fakamālo atu ki takotou lava mai. ʼE ko he meʼa maʼuhiga ki toku famili takotou ʼi henī.

“Ki te hahaʼi ʼaē neʼe mātou feʼiloʼiʼaki lelei—neʼe tou faifaitahi ʼaupito. Neʼe lahi te ʼu temi neʼe mole faʼa lelei, kae neʼe toe ʼi ai pe foki mo te ʼu temi fakafiafia. Ko he ʼahiʼahi neʼe loaloaga pea mo faigataʼa, kae ki taku manatu neʼe ʼau mālo. Ohage ko tona tuʼu ʼi te Tohi-Tapu, ‘Neʼe ʼau tauʼi te tau matalelei, kua ʼau lavaʼi te lele, neʼe ʼau tauhi maʼu te tui.’—2 Timoteo 4:7.

“Neʼe toe lahi pe foki mo te ʼu meʼa ʼaē neʼe ʼau akoʼi, pea neʼe ʼau tuputupu ʼaupito, pea ko toku ʼu kaumeʼa pea mo nātou ʼaē neʼe nofo ʼi ʼoku tafa neʼe nātou mamata ki te fetogi ʼaia. ʼE ʼau fia fakamālo kia nātou fuli ʼaē neʼe nātou lagolago kia ʼau.

“Ko koutou ʼaē ʼe tui ki te tuʼu foʼou pea mo Sehova, ʼe koutou ʼiloʼi ʼe ʼi ai anai te fakatuʼuake ohage ko tona tala mai ia Soane 5:28, 29. Koia ke koutou mālohi ʼi te moʼoni, pea ʼe feala anai ke tou toe fesioʼaki.

“ ʼE ʼau fia fakamālo kia nātou fuli ʼaē ʼe nātou ʼiloʼi te meʼa ʼaē neʼe hoko kia ʼau. ʼE ʼau ʼofa mamahi kia koutou fuli pea mo ʼau ʼuma atu. ʼOfa atu kia koutou fuli.”

Neʼe mole tuku e Brunella tona ʼuhiga tamasiʼi peʼe ko tona mahaki ke ina fakaholomuli atu tana foaki ʼo tona maʼuli ʼaē ki te ʼAtua. Ko tana faʼifaʼitaki ʼi te tui pea mo tona lotomālohi ʼe ina uga te kau tūpulaga pea mo nātou ʼaē kua fotufotuʼa tagata ke nātou tekeʼi te ʼu meʼa fuli ʼaē ʼe feala ke nātou fakatupu tūkia kia nātou ʼi te lele ʼaē ki te maʼuli.—Hepeleo 12:1.