He Koʼe Ko Te Kau Fakamoʼoni—ʼE Tatuʼu Mai Pe?

‘ ʼI HENĪ ʼe nātou ʼi aipe! Kae neʼe nātou ʼi henī ʼi te ʼu vāhaʼa pe ʼaenī kua hili atu!’ Ko tau tali koa ʼaia mokā ʼe ʼalu atu he tahi ʼi te kau Fakamoʼoni ʼa Sehova ki tou ʼapi? Ia ʼaho nei ko te toko miliona hahaʼi ʼaē ʼe ʼaʼahi tuʼumaʼu e te kau Fakamoʼoni ʼa Sehova. Lagi ʼe feala pe ke fēnei takotou manatu, He koʼe koa ʼe nātou tatuʼu mai kae ʼe nātou ʼiloʼi lelei pe, tokolahi kua ʼi ai tanatou lotu pea mole nātou fia fagono ki tanatou logo? ʼE ʼaoga ke maʼu he tali ki te fehuʼi ʼaia.

Ko Te Maʼua ʼi Muʼa ʼo Te ʼAtua

Koʼeni te meʼa neʼe ako e te kau Fakamoʼoni ʼa Sehova ʼi te ʼu tohi ʼo te Tohi-Tapu, talu mai te 1914, taʼu ʼaē neʼe kamata ai te ʼUluaki Tau Faka Malamanei, ko te ʼu meʼa ʼaē neʼe hoko neʼe nātou fakahoko te ʼu lea faka polofeta ʼo te Tohi-Tapu ʼo ʼuhiga mo te fakaʼosi ʼo te ʼu faʼahiga meʼa ʼo te tuʼu ʼaenī pea mo te fakahoko mai ʼo te pule ʼo te Puleʼaga ʼo te ʼAtua ki te kele. Ko he sēkulō ʼe teitei fonu pe ʼi te agamālohi, te liligi toto, pea ko te loto fehiʼa ʼe hage kua ʼāsili age tana fakamamaʼo te hahaʼi mai he puleʼaki faka politike ki tonatou ʼu faigataʼaʼia. Ko te ʼu tau pea mo te fai fakapō ʼaē ʼe nātou fakamamahiʼi tuʼumaʼu pe te tagata ʼe ko he ʼu fakamoʼoni ʼaia ko te takitaki ʼa te tagata neʼe mole ina lava fetogi te loto, te ʼatamai pea mo te agaaga ʼa te hahaʼi. Ko te ʼu fihi kua ʼāfea kei fakatupu kovi tuʼumaʼu pe ki te felogoi ʼa te ʼu fenua kehekehe, pea mo te ʼu lotu. ʼE ko he faʼahi ia ʼe hoko moʼoni ʼi te ʼu potu taupotu ohage la ko Afekanisita, Initia, te Lotomalie ʼo te Potu Hahake, te Potu Toga ʼo Afelika, te Potu Tokelau ʼo Ilelani, pea mo te Iukoselavia ʼāfea. Koia, koteā ʼapē te puleʼaki e tahi ʼaē ʼe tologa?

Koteā ʼAē ʼe Ina Uga Te Kau Fakamoʼoni?

ʼE ʼiloʼi e te kau Fakamoʼoni ʼa Sehova ko te puleʼaki pe ʼaē ʼa te ʼAtua—tona Puleʼaga ʼaē ʼe taki e Kilisito Sesu—ko te puleʼaki tologa pe ʼaia e tahi. Neʼe toe kole e Sesu ʼi te faikole ʼaē neʼe ina foaki ko he faʼifaʼitakiʼaga, ʼo fēnei: “Koia ʼe tonu ke koutou faikole fēnei: ‘Ko tamatou Tāmai ʼe ʼi selo, ke tāpuhā tou huafa! Ke hoko mai tou puleʼaga. Ke fai tou finegalo ʼi te kele, ohage ko selo!’ ” ʼE faka tui te kau Fakamoʼoni ko te faikole ʼaia ʼe ko he kole fakamalotoloto ki te ʼAtua ke tokaga mai ki te ʼu meʼa ʼo te malamanei.—Mateo 6:9, 10.

Pea he koʼe koa ʼe fia ʼolo tuʼumaʼu te kau Fakamoʼoni ʼa Sehova ki te ʼu ʼapi ʼo te hahaʼi ʼo fakahā te logo ʼaia? ʼUhi ko te ʼu fakatotonu e lua neʼe faka maʼuhigaʼi e Sesu: “ ‘ ʼE tonu ke ke ʼofa kia Sehova, tou ʼAtua, ʼaki tou loto katoa, pea mo tou nefesi katoa, pea mo tou laumālie katoa.’ Koʼena te folafola ʼaē ʼe lahi tokotahi pea mo ʼuluaki. Pea koʼeni te lua ʼaē ʼe tatau mo ia: ‘ ʼE tonu ke ke ʼofa ki tou kāiga ohage pe ko koe totonu.’ ”—Mateo 22:37-39.

ʼE loto te kau Fakamoʼoni ke tapuaki nātou e te ʼAtua, pea ʼi tanatou ʼofa ʼaē ki tonatou ʼu kāiga, ʼe nātou toe loto pe foki ke tapuaki mo nātou ʼaia. Koia, ʼo mulimuli pe ki te faʼifaʼitaki ʼa Sesu, ʼe nātou logoʼi ʼi ʼonatou ʼu loto ʼe uga nātou ʼaki te ʼofa ʼe mole fakakākā ke nātou ʼolo ʼo ʼaʼahi tonatou ʼu kāiga. ʼE nātou fakaʼamu pe ke nātou foaki kia nātou ʼaia he fealagia ke nātou ʼiloʼi te meʼa ʼaē neʼe fakapapau e “te ʼAtua fiafia” ki te hahaʼi fakalogo ʼi he kele ka fakamaʼa.—1 Timoteo 1:11; 2 Petelo 3:13.

Ko te misionea Kilisitiano ko Paulo neʼe tui ki te ʼu fakapapau ʼa te ʼAtua pea ko te tupuʼaga la ʼaia ʼo tana tohi te manatu ʼaenī: “Paulo, kaugana ʼa te ʼAtua pea mo ʼapositolo ʼa Sesu Kilisito ʼo mulimuli ki te tui ʼa te kau fakanofo ʼa te ʼAtua pea mo te mālama totonu ʼo te moʼoni ʼaē ʼe felogoi tahi mo te aga faka lotu, ʼo ʼuhiga mo te ʼamanaki ʼo te maʼuli heʼegata, ko te ʼAtua ʼe mole lava ke loi, neʼe ina fakapapau kua fualoa kiai.” Ei, ko te ʼAtua “ ʼe mole lava ke loi,” neʼe ina “fakapapau” te maʼuli heʼegata kia nātou ʼaē ʼe nātou kumi ia ia pea mo tauhi kia ia ʼaki te agavaivai.—Tito 1:1, 2; Sofonia 2:3.

ʼE Totogi Koa Te Kau Fakamoʼoni?

ʼE ʼui e ʼihi, ʼe totogi te kau Fakamoʼoni ke nātou fai tanatou minisitelio. ʼE mole ko he moʼoni ia! ʼE nātou fakaʼaogaʼi fakamalotoloto te ʼu palalau ʼaenī ʼa Paulo ki te kokelekasio ʼo Kolonito: “ ʼE mole mātou hage ko te hahaʼi fuli, ʼe nātou fakatotogi te folafola ʼa te ʼAtua, kae ʼaki te faiga fakamalotoloto, ei, ohage ko he kau fakafofoga ʼa te ʼAtua, ʼe mātou palalau ʼi lalo ʼo te ʼu mata ʼa te ʼAtua, ʼo kaugā gāue mo Kilisito.”—2 Kolonito 2:17.

Ko ʼihi kau takitaki lotu ʼe nātou faka mafola ke totogi nātou, peʼe ko he totogi ki he ʼu gāue faka lotu peʼe ʼaki hanatou laupisiʼi ni ʼu matani gāue ʼi tanatou ʼu akonaki ʼaē ʼi te televisio. ʼE lahi te ʼu lotu ko te kau takitaki ʼe totogi nātou.

Kae ki te kau Fakamoʼoni ʼe mole ʼi ai he kau takitaki lotu ʼe totogi, pea tatau aipe mo tanatou ʼu tohi faka Tohi-Tapu ʼe nātou tautau tuku fakaʼofa ki te hahaʼi ʼaē ʼe nātou kumi fakamalotoloto te moʼoni, logope la ko te tokolahi ia nātou ʼaia ʼe nātou toe fai mo te tahi ʼu meʼa ʼofa ʼaki tonatou loto katoa. Ko te ʼu meʼa ʼofa ʼaia ʼe fakaʼaogaʼi moʼo lagolago te gāue faka mafola ʼaē ʼi te malamanei. Ohage pe ko te tokoni ʼaenī ʼa Sesu: “Neʼe koutou maʼu noa, koutou foaki noa,” ko te kau Fakamoʼoni ʼa Sehova ʼaki tonatou loto katoa ʼe nātou fakaʼaogaʼi tonatou ʼu fealagia, tonatou temi pea mo tonatou mālohi ki te tauhi ʼaē ki te ʼAtua, ʼaki te ʼu hola ʼe lauʼi miliona ʼe nātou fai ʼi te taʼu fuli. Koia, ʼe nātou ako te hahaʼi ʼaē ʼe fia fagono ki te logo ʼaki tanatou ʼolo ʼaē ʼi te ʼu ʼapi pea mo te ʼu ako faka Tohi-Tapu ʼaē ʼe nātou fai ʼi te ʼu loto fale ʼo te hahaʼi.—Mateo 10:8; 28:19, 20; Gāue 20:19, 20.

ʼE ʼiloga ʼaki mai ai ko te kau Fakamoʼoni ʼa Sehova ʼe mole ko te paʼaga ʼaē ʼe ina uga nātou, ʼo toe feiā aipe mo tanatou ʼu kokelekasio, peʼe ko te Sosiete Watch Tower. ʼE mole he tahi ʼe totogi ʼi tana ʼalu ʼaē ʼo faka mafola ʼi te ʼu ʼapi. Kae e feafeaʼi te lagolago ʼo te gāue ʼi te faʼahi ʼo te paʼaga? ʼAki pe te ʼu meʼa ʼofa ʼa te hahaʼi ʼo te malamanei katoa ʼaē ʼe nātou leleiʼia te gāue. ʼE mole fai he tānaki falā.

Te Malave ʼo Tanatou Fagonogono

Ko te minisitelio pea mo te fagonogono faigamālie ʼa te kau Fakamoʼoni ʼi te ʼu ʼapi ʼe ʼiloa e te hahaʼi? Ko te fakamoʼoni ʼaē ʼi te ʼu tala logo ʼe ko he tali lelei pe ʼaia ki te fehuʼi. Neʼe talanoa ʼi te ʼu polokalama ʼo te televisio pea mo te ʼu ʼata ki te kau Fakamoʼoni ʼa Sehova mokā ʼe tukituki he tahi ʼi he matapā. Neʼe toe talanoa mo te ʼu bandes dessinées ki te kau Fakamoʼoni. ʼI te ʼiloa ʼo tanatou gāue fakamalotoloto, ko te hahaʼi ʼaē ʼe nātou fai paki fakahuahua ʼi te malamanei katoa neʼe nātou tohi te ʼu talanoa ʼo ʼuhiga mo te kau Fakamoʼoni ʼa Sehova. Ko te ʼu talanoa ʼaia ʼe feala ke hage ʼe fakakokolo, kae ʼe nātou fakatafito tuʼumaʼu pe ki te ʼu meʼa ʼe moʼoni—ʼe ʼiloa te kau Fakamoʼoni ʼi tanatou tatuʼu ʼaē ʼo faka mafola ʼi te ʼu ʼapi.—Gāue 20:20.

ʼE mole heʼeki faʼa fualoa ko te bande dessinée neʼe ina paki te tagata ʼe kake ʼi te moʼuga moʼo vakaʼi te “gouru.” Neʼe ina ʼui fēnei: “Palalau mai ki te ʼu meʼa taulekaleka ka hoko!” Neʼe koteā te tali ʼa te “gouru”? “Fakalogologo mai . . . ʼE ʼi ai anai te ʼu hoge, te ʼu taʼi mahaki, pea mo te ʼu mafuike. ʼE liliu anai te laʼā ʼo fakapōʼuli, pea liliu anai te māhina ʼo toto.” Pea ʼui age ʼe ia ʼaē ʼe fai fehuʼi: “ ʼE mole ʼi ai koa he logo lelei?” Pea tali fēnei age e te “gouru”: “Ko te ʼAtua ʼe ina holoholoʼi anai te ʼu loʼimata fuli . . . pea ko te mate ʼe puli anai ia, ʼe mole toe ʼi ai anai he mamahi!” Pea toe fehuʼi age e te tagata ki te “gouru”: “Koteā ʼaē ʼe ke ʼiloʼi ai te ʼu meʼa ʼaia?” Koteā tana tali? “ ʼE mole ʼi ai he tahi ʼe hāo mai te kau Fakamoʼoni ʼa Sehova!” ʼE ʼiloga mai, lagi mo te tagata fai paki neʼe kua ʼaʼahi pe e te kau Fakamoʼoni!

Ko te meʼa ʼaē ʼe maʼuhiga ʼi te ʼu bandes dessinées ʼaia pea mo ʼihi ake, ʼe ina fakahā aipe te fai tuʼumaʼu ʼo te ʼu ʼaʼahi e te kau Fakamoʼoni, pea mo te ʼalutahi ʼo tanatou logo. Ko tona fakanounou, ko te tagata fai bande dessinée neʼe ina fakahā te faʼahi tāfito ʼo tanatou fagonogono ʼi te ʼu ʼapi pea neʼe talanoa ki te ʼu vaega ʼo te Tohi-Tapu.—Vakaʼi ia Mateo 24:7, 29; Fakahā 21:3, 4.

Ko te fakafisi ʼaē ʼa te tokolahi ki tanatou logo ʼe mole ko he faʼahi ʼe ina fakatupu lotovaivai ki te kau Fakamoʼoni peʼe ina fakasiʼisiʼi tanatou ʼu faiga fakamalotoloto. Neʼe fakatokagaʼi e te ʼapositolo ko Petelo, ʼo fēnei: “ ʼI te ʼu ʼaho fakaʼosi ʼe ʼōmai anai te kau vāvā pea mo tanatou manuki, ʼo haʼele ʼo mulimuli pe ki te ʼu holi ʼo nātou pea mo ʼui maʼa nātou: ‘ ʼE ʼifea koa tana ʼafio ʼaē neʼe lau? Heʼe talu mai te ʼaho ʼaē neʼe momoe ai tatatou ʼu tāmai ʼi te mate mo te feiā aipe ʼo te ʼu meʼa fuli ohage pe ko te kamataʼaga ʼo tonatou fakatupu.’ ” Logope la te meʼa ʼaia, ko te kau Fakamoʼoni ʼaki te ʼofa ʼe nātou haga ʼaʼahi aipe tonatou ʼu tatau pea ʼe hoholo atu pe anai tanatou fai ʼo te gāue ʼaia ʼo aʼu ki te temi ʼaē ka haga ai te ʼAtua ʼo fakaʼauha te ʼu faʼahiga meʼa ʼo te tuʼu fakahehema ʼaenī.—2 Petelo 3:3, 4.

Neʼe ʼui e Sesu ʼi te ʼu ʼaho fakamuli, ʼe tonu anai ke ʼuluaki faka mafola te logo lelei. Koteā tona tupuʼaga? ʼO feafeaʼi? Koutou lau te ʼu alatike e lua ʼaē ka hoa mai.—Maleko 13:10.

[Paki ʼo te pasina 9]

ʼE mole maʼu ʼi te kau Fakamoʼoni ʼa Sehova he kau takitaki lotu ʼe totogi—ko nātou fuli ko te kau minisi ʼe nātou gāue ʼaki tonatou loto katoa