ʼE Tonu Koa Ke Tou Faikole Kia Sesu?

KO ʼIHI hahaʼi ʼe nātou manatu ʼe tau mo feʼauga te faikole kia Sesu. ʼI Siamani tokolahi te hahaʼi neʼe akoʼi age kia nātou kae kei nātou liliki ke nātou fakatahiʼi ʼonatou nima pea mo fakafetaʼi kia Sesu.

ʼI te fakamatala ʼa te Tohi-Tapu, ʼe moʼoni ʼe maʼu e Sesu he tuʼulaga māʼoluga ʼaupito ʼi selo. Kae, ʼe faka ʼuhiga ʼaki koa ʼe tonu ke tou faikole ki ai? E lagi koutou kau ia nātou ʼaē, ʼi tonatou ʼoʼofa ʼaē kia Sesu, ʼe nātou fai te ʼu kole kia te ia, kae koteā koa te manatu ʼa Sesu ki te ʼu taʼi faikole ʼaia?

ʼUluaki, he koʼe koa ko te ʼu taʼi fehuʼi ʼaia ʼe malaga? Koteʼuhi ʼe ʼui e te Tohi-Tapu ko Sehova ʼAtua ʼe “ko ia ʼaē ʼe fagono ki te ʼu faikole.” Koia ʼaē ʼe mole fakapuna’maʼuli ki te ʼu kaugana ʼa te ʼAtua ʼo te temi ʼāfea, ohage ko te kau Iselaelite, hanatou faikole pe ki te Māfimāfi.—Pesalemo 5:1, 2; 65:2.

Kua fetogi koa te ʼu meʼa ʼi te haʼu ʼa Sesu, te ʼAlo ʼo te ʼAtua, ki te kele moʼo hāofaki te malamanei mai te agahala pea mo te mate? Kailoa, ʼe kei ʼalu aipe te ʼu faikole kia Sehova. ʼI te temi ʼaē neʼe nofo ai ia Sesu ʼi te kele, neʼe tuʼa lahi tana faikole ki tana Tāmai ʼe ʼi selo, pea neʼe ina akoʼi ʼihi ke nātou fai feiā. Koutou manatuʼi te faikole faʼifaʼitaki, ʼaē ʼe tau fakahigoaʼi ko te faikole ʼo te ʼAliki peʼe ko tatatou Tāmai ʼe ʼi selo, ʼaē ʼe kau ki te ʼu faikole ʼiloa lelei ʼi te malamanei. Neʼe mole akoʼi mai e Sesu ke tou faikole age ki ai; neʼe ina tuku mai te motele ʼaenī: “Ko tamatou Tāmai ʼe ʼi selo, ke tāpuhā tou huafa!”—Mateo 6:6, 9; 26:39, 42.

ʼI te temi nei tou fakasiosio te faʼahi ʼaia ʼaki hatatou vakaʼi te faka ʼuhiga tonu ʼo te faikole.

Koteā Te Faikole?

Ko te faikole fuli ʼe ko he faʼahiga tauhi. ʼE fakamoʼoni e te tohi (The World Book Encyclopedia) ki te faʼahi ʼaia, ʼaki tana ʼui ʼaē: “Ko te faikole ʼe ko he faʼahiga tauhi ʼe feala ai ki he tahi ke ina momoli he aga faka lotu, mo he fakafetaʼi, mo he kofesio, peʼe ko he kolekole ki te ʼAtua.”

ʼI te tahi lakaga neʼe ʼui fēnei e Sesu: “ ʼE tohi fēnei: ‘Ko Sehova tou ʼAtua ʼaē ʼe maʼua ke ke atolasio ki ai, pea ʼe ko ia tokotahi pe ʼe maʼua ke ke tauhi ki ai ʼaki he tauhi tapu.’ ” Neʼe pipiki ia Sesu ki te moʼoni tāfito ʼaē ko te tauhi—ʼaē ʼe kau foki kiai te ʼu faikole—neʼe tonu ke fai ki tana Tāmai tokotahi pe, ia Sehova ʼAtua.—Luka 4:8; 6:12.

Ko Te Fakamoʼoni Kia Sesu ʼi ʼAtatou ʼu Faikole

Neʼe mate ia Sesu ko he sakilifisio faitotogi maʼa te malamanei, pea neʼe fakatuʼuake e te ʼAtua, pea neʼe hiki ki he tuʼulaga māʼoluga. Ohage ko te meʼa kua koutou mahino kiai, ko te ʼu meʼa fuli ʼaia neʼe nātou ʼaumai he fetogi ʼo ʼuhiga mo te ʼu faikole ʼaē ʼe tali. ʼO feafeaʼi?

ʼE fakamatalatala e te ʼapositolo ko Paulo te mafuliʼaga lahi ʼe fakahoko e te tuʼulaga ʼa Sesu ki te faikole ʼi te meʼa ʼaenī ʼe hoa mai: “Ko te tupuʼaga la ʼaē ʼo tona hikihiki ʼaē e te ʼAtua ki he tuʼulaga māʼoluga pea mo ina foaki fakalelei age te higoa ʼaē ʼe māʼoluga age ʼi te higoa fuli pe, koteʼuhi ke tuʼutuli fuli pe ʼi te huafa ʼo Sesu ia nātou ʼe ʼi te lagi, pea mo nātou ʼe ʼi te kele, pea mo nātou ʼe ʼi te lalo kele, pea ke fakahā e te ʼalelo fuli pe ko Sesu Kilisito ʼe ʼAliki ki te kolōlia ʼo te ʼAtua te Tāmai.”—Filipe 2:9-11.

ʼE faka ʼuhiga koa e te ʼu palalau “ke tuʼutuli fuli pe ʼi te huafa ʼo Sesu” ʼe tonu ke tou faikole ki ai? Kailoa. Ko te palalau faka Keleka ʼaē ʼe fakaʼaogaʼi ʼi henī “ ʼe faka ʼuhiga ko te higoa ʼaia ʼe fakatahi kiai ia nātou ʼaē ʼe tuʼutuli, ʼaia ko nātou fuli ʼaē neʼe fakatahiʼi (πᾶν γόνυ) ʼe atolasio. Ko te higoa ʼaē neʼe foaki kia Sesu ʼe ina uga te hahaʼi fuli ki he tauhi ʼi te logo tahi.” (A Grammar of the Idiom of the New Testament, ko he tohi neʼe fai e G. B. Winer) ʼI tona fakahagatonu, ke tali he faikole, ʼe tonu ke fakahā “ ʼi te huafa ʼo Sesu,” kae, ia meʼa fuli, ʼe fai aipe kia Sehova ʼAtua pea mo ʼaoga ki tona faka kolōliaʼi. ʼUhi ko te potu ʼaia, ʼe ʼui ai e Paulo: “ ʼI te meʼa fuli pe, ʼaki te faikole pea mo te ʼu kole mamahi ʼaki te fakafetaʼi, koutou fakahā ki te ʼAtua takotou ʼu kole.”—Filipe 4:6.

Ohage pe ko he ala foufou ʼe ina taki ki he tauʼaga, ʼo toe feiā aipe ko Sesu ko te “ala” ʼaē ʼe ina taki ki te ʼAtua te Māfimāfi. Neʼe akoʼi e Sesu ki ʼana ʼu ʼapositolo: “Ko ʼau ko te ala, pea mo te moʼoni, pea mo te maʼuli. ʼE mole he tahi ʼe haʼu ki te Tāmai ʼi tuʼa ia te ʼau.” (Soane 14:6) Koia, ʼe tonu ai ke tou fai ʼatatou ʼu faikole ki te ʼAtua ʼaki ia Sesu ka mole faka hake kia Sesu totonu.a

ʼE feala ke ʼui e ʼihi, ‘kae, ʼe mole koa la fakamatala e te Tohi-Tapu ko te tisipulo ko Etieni pea mo te ʼapositolo ko Soane neʼe nā palalau kia Sesu ʼi selo?’ ʼE moʼoni. Kae, ko te ʼu meʼa ʼaia neʼe hoko neʼe mole fakapipiki mai kiai he ʼu faikole, koteʼuhi neʼe sisio ia Etieni pea mo Soane kia Sesu ʼi he meʼa neʼe hā pea neʼe nā palalau fakahagatonu age ki ai. (Gāue 7:56, 59; Fakahā 1:17-19; 22:20) Koutou manatuʼi, ʼe māʼiape la mo te palalau ʼaē ki te ʼAtua ʼe mole faka ʼuhiga ʼaki ai ko he faikole. Ko Atama pea mo Eva neʼe nā palalau ki te ʼAtua, ʼo fai age ki ai he ʼu fai fakalelei ki tanā agahala mamafa, ʼi te temi ʼaē neʼe Ina fakamāuʼi ai ia nāua ʼo mulimuli ki tanā agahala ʼi Eteni. Ko tanā palalau age ki ai ʼi te lakaga ʼaia neʼe mole ko he faikole ia. (Senesi 3:8-19) Koia, ʼe mole tonu te ʼui ʼaē ko te palalau ʼa Etieni pea mo Soane kia Sesu ko he fakamoʼoni ʼaia ʼe tonu ia ke tou faikole ki ai.

E Feafeaʼi Te ‘Fetapā’ Ki Te Huafa ʼa Sesu?

ʼE kei koutou lotolotolua koa, ʼo koutou manatu aipe ʼe tau mo feʼauga te faikole ʼaē kia Sesu? Neʼe fēnei te faitohi ʼa te fafine ʼohoana ki te filiale ʼo te Sosiete Watch Tower: “Ko he meʼa fakaʼofaʼofa foki, ʼe mole heʼeki ʼau tui papau neʼe mole faikole te ʼu ʼuluaki Kilisitiano kia Sesu.” Neʼe manatu ia ki te ʼu palalau ʼa Paulo ia 1 Kolonito 1:2, ʼaē neʼe ina ʼui ai “ko nātou fuli ʼi te potu fuli pe ʼe nātou fetapā ki te huafa ʼo totatou ʼAliki, ko Sesu Kilisito.” Kae, ʼe tonu ke tou fakatokaga ʼi te lea ʼuluaki, ko te kupuʼi palalau “fetapā” ʼe feala ke faka ʼuhiga ki he ʼu meʼa ʼi tuʼa atu ʼi te faikole.

Neʼe feafeaʼi te ‘fetapā’ ki te huafa ʼo Kilisito ʼi te potu fuli pe? Ko te tahi potu neʼe ko te fakamoʼoni fakahagatonu ʼa te kau tisipulo kia ia ohage ko te Mesia pea ko he “Fakamaʼuli ʼo te malamanei,” ʼo nātou fai te ʼu gāue faka milakulo ʼi tona huafa. (1 Soane 4:14; Gāue 3:6; 19:5) Koia, ʼe tala ai e te tohi (The Interpreter’s Bible) ko te palalau ʼaē “ko te fetapā ki te huafa ʼo totatou ʼAliki . . . ʼe faka ʼuhiga ko te fakahā tona ʼuhiga ʼaliki kae mole ko te faikole ia ki ai.”

Ko te tali ʼaē ia Kilisito pea mo te haga tui ʼaē ki tona taʼataʼa ʼaē neʼe ina liligi, ʼaē ʼe ina faka fealagia te fakamolemole ʼo te ʼu agahala, ʼe toe faka ʼuhiga foki ko he “fetapā ki te huafa ʼo totatou ʼAliki, ko Sesu Kilisito.” (Fakatatau ia Gāue 10:43 pea mo te 22:16.) Pea ʼe tou ʼui fakahagatonu te huafa ʼo Sesu ʼi he temi pe ʼe tou faikole ai ki te ʼAtua ʼaki ia ia. Koia, logo aipe te fakahā mai ʼaē ʼe feala hatatou fetapā ki te huafa ʼa Sesu, ʼe mole fakahā mai ia e te Tohi-Tapu ʼe tonu ke tou faikole ki ai.—Efesi 5:20; Kolose 3:17.

Te Meʼa ʼAē ʼe Feala Ke Fai e Sesu Maʼa Tatou

Neʼe fakapapau lelei e Sesu ki tana ʼu tisipulo: “Kapau ʼe koutou kole he meʼa ʼaki toku huafa, ʼE ʼau foaki atu anai.” ʼE fakamaʼua koa e te potu ʼaia he faikole age ki ai? Kailoa. Ko te kole ia ʼo he meʼa ʼe fai ia kia Sehova ʼAtua—kae ʼaki te huafa ʼo Sesu. (Soane 14:13, 14; 15:16) ʼE tou kole ki te ʼAtua ke fakaʼaogaʼi e Tona ʼAlo, ia Sesu, tona mālohi ʼaupito pea mo tona pule maʼa tatou.

ʼE felogoi feafeaʼi koa ia Sesu mo tana kau tisipulo moʼoni ʼi te temi nei? ʼE feala ke fakaʼaogaʼi te fakamatalatala ʼa Paulo ʼo ʼuhiga mo te kokelekasio ʼo te kau Kilisitiano fakanofo ohage ko he fakatā. Neʼe ina fakatatau te kokelekasio ki he sino pea ko Sesu Kilisito ko te ʼulu. ʼE foaki e te “ ʼulu” ki te ʼu koga ʼo te sino fakalaumālie te ʼu meʼa ʼe ʼaoga kia nātou ʼaki te “ ʼu hokoʼaga hui pea mo te ʼu ʼua,” peʼe ʼaki he ʼu fakatuʼutuʼu moʼo foaki ki tona kokelekasio te meʼa kai pea mo te takitaki fakalaumālie. (Kolose 2:19) ʼO toe feiā aipe, ʼe fakaʼaogaʼi e Sesu ʼi te temi nei “te ʼu meʼa ʼofa fakatagata,” peʼe ko he ʼu tagata kua māhani ʼi te faʼahi fakalaumālie, ke nātou taki te kokelekasio, peʼe akonakiʼi mokā ʼe ʼaoga. ʼE mole he fakatuʼutuʼu kia nātou ʼo te kokelekasio ke nātou felogoi fakahagatonu mo Sesu peʼe nātou faikole kia te ia, kae ʼe mahino ia ʼe tonu ia—ʼio, ʼe tonu ia kia nātou—ke nātou faikole ki te tāmai ʼa Sesu, ia Sehova ʼAtua.—Efesi 4:8-12.

E Feafeaʼi Takotou Fakaʼapaʼapa Kia Sesu?

ʼO ʼuhiga mo te hāofaki ʼo te tagata, ʼe ko he tuʼulaga maʼuhiga ia ʼe maʼu e Sesu! Neʼe ʼui fēnei e te ʼapositolo ko Petelo: “ ʼE mole ʼi ai he fakamaʼuli ʼi he tahi atu, heʼe mole ʼi te lalo lagi he tahi higoa neʼe tuku ki te hahaʼi, ʼe tonu ke tou maʼuʼuli ai.” (Gāue 4:12) ʼE koutou mahino koa ki te maʼuhiga ʼo te huafa ʼo Sesu?

ʼI tatatou mole faikole ʼaē kia Sesu totonu, ʼe mole tou fakatō laloʼi ai tona tuʼulaga. Kailoa, ko Sesu ʼe faka maʼuhigaʼi mokā tou faikole ʼaki tona huafa. Pea ohage pe ko he fānau ʼe nātou faka maʼuhigaʼi ʼonatou ʼu mātuʼa ʼaki tanatou talagafua, ʼe tou faka maʼuhigaʼi ia Sesu Kilisito ʼaki tatatou fakalogo ʼaē ki tana ʼu fakatotonu, kae tāfito te folafola foʼou ʼaē ko te feʼofaʼofaniʼaki.—Soane 5:23; 13:34.

Te ʼu Faikole ʼAē ʼe Tali

ʼE koutou fia momoli koa he ʼu faikole ʼe tali? Koia, koutou fai kia Sehova ʼAtua, pea koutou fai ʼaki te huafa ʼo tona ʼAlo, ko Sesu. Koutou ako te finegalo ʼa te ʼAtua, pea ke ʼiloga ʼi ʼakotou ʼu faikole te mahino ʼaia. (1 Soane 3:21, 22; 5:14) Koutou maʼu he mālohi ʼi te ʼu palalau ʼo te Pesalemo 66:20: “Ke tapuakina te ʼAtua, ʼaē neʼe mole ina lītuʼa ki taku faikole, peʼe ko tona lotoʼofa ia te ʼau.”

Ohage ko te meʼa neʼe kua tou vakaʼi, ko te ʼu faikole ʼe ko he faʼahiga tauhi ʼe fai ki te ʼAtua Māfimāfi tokotahi pe. ʼAki tatatou fai ʼatatou ʼu faikole fuli kia Sehova ʼAtua, ʼe tou fakahā ai ʼe tou tali fakamalotoloto ki te takitaki ʼa Sesu ke faikole fēnei: “Ko tamatou Tāmai ʼe ʼi selo.”—Mateo 6:9.

[Nota ʼi te lalo pasina]