Ko Te Kau Faka Mafola ʼo Te Puleʼaga ʼe Nātou Fakamatala
Ko Te Fai Faka Mafola ʼi Te Temi Faigataʼa
NEʼE fakakikite e te ʼapositolo ko Paulo “ ʼi te ʼu ʼaho fakamuli ʼe ʼi ai anai te ʼu temi maʼuhiga ʼaupito mo faigataʼa.” (2 Timoteo 3:1) ʼE moʼoni te ʼu palalau ʼaia neʼe fai! Ko te hahaʼi ʼo El Salvador ʼi Amelika Latina neʼe fualoa tanatou tau mo te ʼu ʼaluʼaga kovi ʼaia. Lolotoga te ʼu tau e hogofulu tupu, neʼe hoko ʼi te fenua ʼaia te tau sivile, ʼo iku ai mo te masiva pea mo te mamate ʼo te lauʼi afe hahaʼi. Kua ʼosi te tau ʼaia ʼi te temi nei, kae ʼe kei hoko pe nei ia te masiva. Neʼe fakamataku te fai fakapō ʼi te hili ʼo te tau. Neʼe ʼui fēnei e te tagata ʼe palalau ʼi te televisio: “Ko te agamālohi pea mo te kaihaʼa ʼe ko te ʼu meʼa ʼaia ʼe hoko ʼi te ʼaho fuli ʼi te temi nei.”
Ko te ʼu kau Fakamoʼoni ʼa Sehova neʼe nātou felāveʼi mo te fai fakapō mālohi ʼaia. Neʼe maumauʼi e te ʼu tagata kaihaʼa te ʼu Fale ʼo te Puleʼaga ʼo nātou fehūfi ki loto, pea neʼe nātou kaihaʼa te ʼu mikolo. Neʼe tuʼa lahi te hū ʼa he kūtuga ʼe faʼufaʼu e he kau tūpulaga mo tanatou ʼu fana ʼo nātou hū fakamālohi ki te ʼu Fale ʼo te Puleʼaga, lolotoga te fai ʼo te ʼu fono ʼa te kau Kilisitiano ʼo nātou kaihaʼa te falā, te ʼu ʼuasi, pea mo ʼihi ʼu meʼa maʼuhiga ʼa nātou fuli ʼaē ʼe kau ki te fono. Lolotoga tanatou ʼolo ki tanatou ʼu gāue ʼi te ʼaho fuli, tokolahi te ʼu kau Fakamoʼoni neʼe matehi e te ʼu tagata kaihaʼa.
Logope la te ʼu faigataʼa ʼaia, neʼe haga gāue mālohi aipe te kau Fakamoʼoni ʼa Sehova ʼi El Salvador moʼo faka mafola ʼo te logo lelei. ʼE nātou fai te faʼahi ʼaia ʼo mulimuli ki te fakatotonu faka Tohi-Tapu ʼaenī: “ ʼE tonu muʼa ke ʼuluaki faka mafola te logo lelei ʼi te ʼu puleʼaga fuli.” (Maleko 13:10) ʼE kei lahi ʼaupito te hahaʼi ʼi te fenua ʼaia ʼe nātou holi ki te ʼamanaki ʼo te Puleʼaga ʼaē ʼe foaki mai e te Tohi-Tapu, pea ʼe faiga te kau Fakamoʼoni ke nātou maʼu ia nātou fuli ʼaia. Ko te fagonogono ʼi te temi fuli ʼe ko he koga lelei ʼaia moʼo fai ʼo te faka mafola.
Lolotoga te nofo ʼa te tagata Fakamoʼoni ʼi te lopitali ʼo fai tona ʼu faitoʼo, neʼe ina fakaʼaogaʼi te ʼu faigamālie fuli moʼo fakahā ʼo te ʼu fakapapau ʼa te ʼAtua ki te temi ka haʼu ki niʼihi hahaʼi ʼe mahahaki, ohage ko tona tuʼu ʼi te Tohi-Tapu. ʼAki te lotomamahi neʼe ʼui age fēnei e te tahi neʼe kovi ʼaupito tona mahaki: “Kua vave pe nei toku mate!” Kae ko te palalau lotomamahi ʼa te tagata ʼaia neʼe mole lotovaivai ai te tagata Fakamoʼoni ʼo ʼuhiga mo te fakahā ʼo te logo lelei ʼo te Puleʼaga ʼo te ʼAtua. Koia, neʼe ina lau leʼolahi age ki te tagata ia te tohi E Feala Keke Mauli O Heegata Ite Palatiso Ite Kele, ʼaē neʼe tā e te kau Fakamoʼoni ʼa Sehova. Hili kiai he ʼu ʼaho, pea mavae te tagata Fakamoʼoni ʼi te lopitali, ʼo ina manatuʼi ʼaki te lotomamahi te tagata ʼaia kua fakalogologo pe ki tona mate.
Hili kiai taʼu e fā pea neʼe toe ʼave te tagata Fakamoʼoni ʼo faitoʼo ʼi te tahi lopitali. Lolotoga tana nofo ʼi te lopitali, neʼe fakaōvi age te tagata ki ai pea ina ʼui age: “Kei ke manatuʼi ʼau?” Neʼe ko te tagata ʼaē neʼe felāveʼi mo ia, ia taʼu e fā ki muʼa atu, te tagata ʼaē neʼe ʼui kua mate! ʼI meʼa fakafiafia te fāʼufua age ʼa te tagata ki ai pea mo ʼui maʼana: “ ʼI te temi ʼaenī kua ʼau liliu foki ko te tagata Fakamoʼoni ʼa Sehova!” Neʼe ʼiloʼi e te tagata ʼaia te ʼamanaki ʼa te Tohi-Tapu ʼo ʼuhiga mo te temi ka haʼu, pea ina ako te Tohi-Tapu mo te kau Fakamoʼoni ʼa Sehova, pea ina foaki tona maʼuli kia Sehova. ʼO mole gata pe ʼi tana liliu ko te tagata Fakamoʼoni ʼa Sehova, kae neʼe kau ia ki te minisitelio fai faka mafola ʼi te temi fuli, ʼo gāue ko he pionie katoa ia taʼu e lua.
ʼI te faʼahi ʼaenī, ko te ʼu fua ʼo te moʼoni ʼaē neʼe to ʼi te fagonogono faigamālie neʼe uga ai te loto ʼo he tahi ke ina tali te moʼoni. Ko te pilivilesio ʼaē ko te tokoni ki te hahaʼi ke nātou maʼu te mālama ʼo te moʼoni ʼe fakamaʼua ki te kau Kilisitiano moʼoni ke nātou haga gāue faka mafola logope la te ʼu “temi maʼuhiga ʼaupito mo faigataʼa” ʼaenī.