Te ʼu Fehuʼi ʼa Te Kau Lautohi

ʼI te temi nei, ʼe maʼu feafeaʼi e te “tahi ʼu ōvi” te ʼu tapuakina ʼo te gāue faka pelepitelo lahi ʼa Sesu Kilisito, ʼaē ʼe talanoa kiai ia Hepeleo 4:15, 16?

Logope neʼe faka ʼuhiga tāfito te tuʼulaga ʼo Sesu ʼi tona ʼuhiga Pelepitelo Lahi kia nātou ʼaē ka fakatahi anai mo ia ʼi te lagi, kae ʼi te temi nei, ko te kau Kilisitiano ʼaē ʼe nātou ʼamanaki ke nātou maʼuʼuli ʼi te kele, ʼe toe maʼu mo nātou te ʼu lelei ʼo te gāue faka pelepitelo ʼa Sesu.

Mai ia Atama, neʼe maʼu e te kau tagata te kavega ʼo te agahala. ʼE tou mamahi ʼuhi ko tatatou ʼuhiga heʼe haohaoa, ohage ko te kau Iselaelite. Neʼe tokoni kia nātou te ʼu pelepitelo lalahi pea mo te ʼu pelepitelo, ʼo nātou fai te ʼu sakilifisio maʼa tanatou ʼu agahala pea mo te ʼu agahala ʼo te hahaʼi. ʼAki te temi, neʼe fakanofo leva ia Sesu ko he pelepitelo “ ʼi te agaaga ʼo Melekiseteke.” ʼI tona ʼosi fakatuʼuake, neʼe ʼalu ia Sesu kia muʼa ʼo Sehova, ʼo ina momoli age te maʼuhiga ʼo tona sakilifisio fakatagata haohaoa.—Pesalemo 110:1, 4.

Koteā tona faka ʼuhiga kia tatou ʼi te temi nei? ʼI tana tohi ʼaē ki te kau Hepeleo, neʼe talanoa ia Paulo ʼo ʼuhiga mo te gāue ʼo Sesu ʼi tona ʼuhiga Pelepitelo Lahi. ʼE tou lau fēnei ia Hepeleo 5:1: “Koteʼuhi, ko te ʼu pelepitelo lalahi fuli, ʼaē neʼe fili mai te hahaʼi, ʼe fakanofo maʼa te hahaʼi ki te ʼu meʼa ʼaē ʼe faka ʼuhiga ki te ʼAtua, ke feala hanatou momoli he ʼu meʼa ʼofa pea mo he ʼu sakilifisio maʼa te ʼu agahala.” Koia, ʼi te ʼu vaega 5 pea mo te 6, neʼe fakahā e Paulo kua liliu ia Sesu ko he pelepitelo lahi, ʼo feala ai ke ina tuku mai he ʼu tapuakina maʼa tatou.

ʼO feafeaʼi? Neʼe tohi fēnei e Paulo: “Logope tona ʼuhiga ʼAlo, neʼe ina akoʼi te talagafua ʼaki te ʼu mamahi ʼaē neʼe ina ʼutaki; pea ʼi te hili ʼaē ʼo tana fakaliliu ʼo haohaoa, neʼe liliu ia ko te tafitoʼaga ʼo te hāofaki heʼegata kia nātou fuli ʼaē ʼe talagafua kia te ia.” (Hepeleo 5:8, 9) ʼUluaki, ʼaki te vaega ʼaenī, ʼe tonu ke tou fakakaukauʼi peʼe lava feafeaʼi anai hatatou maʼu te ʼu tapuakina ʼi te mālama foʼou, ʼi te temi ʼaē ka pulihi anai te ʼuhiga agahala ʼo nātou ʼaē ʼe agatonu ki te ʼAtua pea mo Sesu, pea mo nātou maʼu te maʼuli heʼegata. Ko he ʼamanaki moʼoni, ʼaē ʼe fakatafito ki te sakilifisio maʼuhiga ʼo Sesu pea mo tana gāue ʼi tona ʼuhiga Pelepitelo Lahi.

Kae, ʼi tona ʼuhiga moʼoni, ʼi te temi nei, ʼe feala hatatou maʼu te ʼu tapuakina mai tona tuʼulaga faka Pelepitelo Lahi. Koutou fakatokagaʼi te meʼa ʼaē ʼe ʼui ia Hepeleo 4:15, 16: “ ʼE ʼi ai tatatou pelepitelo lahi, ʼe mole ko he tahi ia ʼe hala mo manavaʼofa ki ʼotatou ʼu vaivaiʼaga, kae ʼe ko he tahi ia neʼe ʼahiʼahiʼi ʼi te faʼahi fuli pe ohage pe ko tatou, ka mole hana agahala. Koia tou fakaōvi ʼaki te fakahagatonu ki te ʼafioʼaga ʼo te ʼofa makehe, ke tou maʼu ai te manavaʼofa, mo tou maʼu te ʼofa makehe, ke tokoni kia tatou ʼi te temi faigamālie.” Ko te temi fea ʼaē ʼe ʼaoga ai “te temi faigamālie” ʼaia? ʼE ʼaoga te temi ʼaia, mokā tou kumi te manavaʼofa pea mo te ʼofa. ʼI te temi nei, ʼe ʼaoga kia tatou fuli te faʼahi ʼaia ʼuhi ko totatou ʼuhiga heʼe haohaoa.

ʼE fakatokagaʼi ia Hepeleo 4:15, 16 te faʼahi ʼo ʼuhiga mo Sesu—ʼaē kua pelepitelo ʼi te temi nei ʼi te lagi—neʼe tagata mo ia, koia ʼe feala ai ke manavaʼofa. Ke manavaʼofa kia ai? Kia tatou. ʼI te temi fea? ʼI te temi nei. ʼI tana kei maʼuli ʼi te kele, neʼe ʼiloʼi e Sesu te ʼu mamahi ʼaē ʼe ʼiloʼi e te tagata. ʼI te tahi temi, ko Sesu neʼe fia kai pea neʼe fia ʼinu. Pea logope tona ʼuhiga haohaoa, neʼe gaʼegaʼe. ʼE ko he meʼa fakaloto fīmālie kia tatou. Koteā tona tupuʼaga? Koteʼuhi, kapau neʼe ʼiloʼi e Sesu te lotovaivai, pea ʼe mahino ki te ʼu meʼa ʼaē ʼe tou logoʼi ʼi totatou loto. Koutou manatuʼi foki, neʼe tonu ke kātakiʼi e Sesu te ʼu kē ʼa te kau ʼapositolo ʼuhi ko tonatou femahekaʼaki. (Maleko 9:33-37; Luka 22:24) Ei, neʼe lotomamahi ia Sesu. ʼE mole tonu koa la ke tou falala ʼe mahino kia tatou ʼi te ʼu temi ʼaē ʼe tou lotomamahi ai, pea mo lotovaivai ai? ʼE mahino papau ia.

ʼI te temi ʼaē ʼe koutou lotovaivai ai, koteā ʼaē ʼe feala ke koutou fai? Neʼe ʼui koa e Paulo ʼe tonu ke koutou talitali, ke tokoni atu ia Sesu, takotou Pelepitelo Lahi, ʼi te mālama foʼou, ke liliu takotou ʼatamai pea mo takotou sino ʼo haohaoa? Kailoa. Neʼe ʼui e Paulo: ‘ ʼE tou maʼu te manavaʼofa pea mo te ʼofa makehe, moʼo tokoni ʼi te temi faigamālie,’ pea ʼe kau ki ai mo te temi nei. Pea tahi foki, ʼi te temi ʼaē neʼe kei maʼuli ai Sesu ʼi te kele, neʼe ina ʼiloʼi pe koteā te ʼu mamahi, mo te ʼu faigataʼaʼia ʼo te maʼuli, “neʼe ʼahiʼahiʼi ʼi te faʼahi fuli pe ohage pe ko tatou.” Koia, ka hoko kia tatou he ʼu meʼa feiā, pea ʼe feala ke tokoni mai kia tatou, heʼe mahino ia ki totatou ʼu faigataʼaʼia. ʼE mole uga koa la tatou e te faʼahi ʼaia ke tou fakaōvi age kia te ia?

Koutou tokagaʼi te vaega 16. ʼE ʼui e Paulo ʼe fakagafua kia tatou—te kau fakanofo pea mo te tahi ʼu ōvi—ke tou palalau faʼifaʼitaliha ki te ʼAtua. (Soane 10:16) Neʼe mole faka ʼuhiga e te ʼapositolo, ʼi totatou ʼu faikole, ke tou kole pe te ʼu meʼa ʼaē ʼe tou loto kiai, ʼaki te ʼita, pea mo he ʼu meʼa ʼe mole ko he ʼu meʼa fakaʼapaʼapa. Kae, ʼaki te sakilifisio ʼo Sesu pea mo tona tuʼulaga faka Pelepitelo Lahi, ʼe feala ke tou fakaōvi ki te ʼAtua logope la totatou ʼuhiga tagata agahala.

Ko te tahi tapuakina ʼe feala ke tou maʼu ʼi te temi nei mai te ʼu gāue ʼo totatou Pelepitelo Lahi, ia Sesu Kilisito, ʼe faka ʼuhiga ki te fakamolemole ʼo totatou ʼu agahala, peʼe ko totatou ʼu hala. ʼE mole tou ʼamanaki anai, ʼi te temi ʼaenī ke tuku mai e Sesu te ʼu lelei fuli ʼo tona sakilifisio. Tatau aipe pe ina fai te faʼahi ʼaia, kae ʼe heʼeki feala anai ke tou maʼu te maʼuli heʼegata. Kei koutou manatuʼi koa la te faʼifaʼitaki ʼaē ia Luka 5:18-26, ʼo ʼuhiga mo te tagata palalisia, ʼaē neʼe tuku ifo tona palepale mai te ava ʼi te ʼato ʼo te fuga fale? Neʼe ʼui age e Sesu kia ia: “Tagata, kua fakamolemole tau ʼu agahala.” Neʼe mole talanoa ia ʼi henī ki he faʼahiga agahala neʼe ina fakatupu te palalisia ʼo te tagata ʼaia. ʼE mahino ia, neʼe faka ʼuhiga ki te ʼuhiga agahala ʼo te tagata, ʼaē neʼe ina maʼu mai tona ʼaluʼaga heʼe haohaoa, ʼaē ʼe tupu ai tona ʼu mamahi.

ʼAki te sakilifisio ʼaē neʼe ina foaki, neʼe feala kia Sesu ke ina toʼo te ʼu agahala ʼo te hahaʼi, ohage ko te tao moʼo Asasele ʼaē neʼe ina toʼo te ʼu agahala ʼo Iselaele ʼi te ʼAho ʼo te ʼu Faifakalelei. (Levitike 16:7-10) Kae, ko te tagata palalisia neʼe kei nofo pe ia ʼi tona ʼuhiga tagata. Neʼe kei agahala pe ia, pea ʼaki te temi neʼe mate, ohage ko te kau agahala. (Loma 5:12; 6:23) Ko te meʼa ʼaē neʼe ʼui age e Sesu, neʼe mole faka ʼuhiga ia ʼe maʼu anai e te tagata te maʼuli heʼegata ʼi te temi pe ʼaia. Kae ko te tagata neʼe tapuakiʼi ʼaki he faʼahiga fakamolemole ʼi te temi ʼaia.

Tou fakakaukauʼi ʼi te temi nei tatatou faʼahi. ʼI totatou ʼuhiga heʼe haohaoa, ʼe tou agahala ʼi te ʼaho fuli. (Sake 3:2) Koteā ʼaē ʼe feala ke tou fai ʼo ʼuhiga mo te faʼahi ʼaia? ʼI te lagi, ʼe ʼi ai totatou Pelepitelo Lahi ʼe manavaʼofa pea ʼe feala ʼaki ia ia ke tou fakaōvi kia Sehova ʼi te faikole. Ei, ohage ko tona tohi e Paulo, ko tatou fuli ʼe feala ke tou “fakaōvi ʼaki te fakahagatonu ki te ʼafioʼaga [ʼo te ʼAtua] ʼo te ʼofa makehe, ke tou maʼu ai te manavaʼofa, pea ke tou maʼu te ʼofa makehe, ke tokoni kia tatou ʼi te temi faigamālie.” Koia, ʼe mahino papau ia, ko nātou fuli ʼaē ʼe nātou kau ki te tahi ʼu ōvi, ʼe nātou maʼu ni ʼu tapuakina lahi, ʼo kau kiai mo he leʼo ʼo loto ʼe maʼa, mai te ʼu gāue ʼo te Pelepitelo Lahi ko Kilisito.

ʼE feala, ki te kau Kilisitiano fuli ʼaē ʼe ʼamanaki ke maʼuʼuli ʼi te kele, ke nātou fakatalitali ke nātou maʼu te ʼu tapuakina lahi ʼi te mālama foʼou ʼaē kua ōvi mai. Koia, ʼe tuku mai anai e totatou Pelepitelo Lahi ʼaē ʼi te lagi te ʼu tapuakina fuli ʼo tona sakilifisio, ʼo iku ai ki te fakamolemole katoa ʼo tatatou ʼu agahala. ʼE ina toe folahi foki anai mo te ʼu tapuakina lahi ake ʼo ina fakamālōlō te ʼu hahaʼi ʼi te faʼahi fakasino pea mo te faʼahi fakalaumālie. Pea ʼe faka mafola anai e Sesu ke lahi te akoʼi te hahaʼi ʼo te ʼAtua ʼi te kele, ohage ko te ʼu pelepitelo ʼo Iselaele ʼaē neʼe fakamaʼua ʼaupito kia nātou ke nātou akoʼi te Lao ki te hahaʼi. (Levitike 10:8-11; Teutalonome 24:8; 33:8, 10) Koia, ʼi tatatou maʼu, ʼi te temi nei, te ʼu tapuakina mai te ʼu gāue faka pelepitelo lahi ʼa Sesu, ʼe tou talitali ki ni ʼu tapuakina ʼe lahi age.