Te ʼu Fehuʼi ʼa Te Kau Lautohi
Neʼe fakapalatahi koa te ʼAtua ʼi tana ʼuluaki filifili moʼo faʼu te kolesi pule, he ʼu tagata ʼe nātou lanu tahi pea mai te fenua e tahi—heʼe neʼe nātou Sutea fuli?
Kailoa. Ko nātou fuli ʼaē neʼe ʼuluaki pāui e Sesu ko tana ʼu tisipulo neʼe ko te kau Sutea. Koia, ʼi te Penikosite ʼo te taʼu 33 ʼo totatou temi, neʼe ko te kau Sutea pea mo te kau poloselite Sutea neʼe ʼuluaki fakanofo ʼaki te laumālie ʼo feala ai ke nātou pule mo Kilisito ʼi te lagi. Neʼe kau, ki muli age, te kau Samalitana pea mo te kau Senitile mole heʼeki silikosisio ʼaē neʼe tafoki. Ko te ʼuhiga la ʼaia ʼaē neʼe faʼufaʼu e te kau Sutea te kolesi pule ʼi te temi ʼaia, “te kau ʼapositolo mo te kau tagata ʼāfea ʼi Selusalemi,” ohage ko tona ʼui ia Gāue 15:2. Neʼe ko te ʼu tagata ʼaia neʼe nātou maʼu te ʼatamai mālama totonu ʼo te Tohi-Tapu pea mo ni ʼu taʼu ʼi te tauhi, pea neʼe lahi te temi moʼo fakatuputupu ʼo tonatou ʼuhiga tagata ʼāfea faka Kilisitiano ʼaē kua māhani.—Fakatatau mo Loma 3:1, 2.
ʼI te temi ʼaē neʼe fakatahi ai te kolesi pule, ʼaē ʼe fakamatala ia Gāue kapite 15, tokolahi ʼi te ʼu Senitile neʼe liliu ko te kau Kilisitiano. Neʼe kau kiai mo te kau Afelika, mo te hahaʼi mai Eulopa, pea mo te ʼu hahaʼi mai te tahi ʼu fenua. Pea tahi ʼaē, ʼe mole he talanoa ʼe ina ʼui neʼe tali he Senitile ʼi te kolesi pule moʼo fakaliliu te lotu faka Kilisitiano ko he meʼa fakafiafia maʼa nātou ʼaē neʼe mole Sutea. Ko te ʼu Kilisitiano Senitile foʼou ʼaē neʼe tafoki neʼe nātou liliu ʼo tatau mo nātou ʼi te “Iselaele ʼo te ʼAtua,” neʼe tonu ke nātou fakaʼapaʼapa ki te kua maʼu katoa pea mo te kua māhani ʼa te kau Kilisitiano Sutea, ohage ko te kau ʼapositolo ʼaē neʼe kau ki te kolesi pule ʼi te temi ʼaia. (Kalate 6:16) Koutou tokagaʼi ia Gāue 1:21, 22 peʼe neʼe feafeaʼi te faka ʼuhiga lahi ʼo te kua maʼu ʼo te poto.—Hepeleo 2:3; 2 Petelo 1:18; 1 Soane 1:1-3.
Lolotoga te ʼu sēkulō, neʼe makehe aipe te aga ʼa te ʼAtua ki te puleʼaga ʼo Iselaele, ʼaē neʼe filifili mai ai e Sesu tana ʼu ʼapositolo. Neʼe mole ko he hala pe ko he heʼe faitotonu te mole ʼōmai ʼa te ʼu ʼapositolo mai te Potu Toga ʼo Amelika, peʼe mai Afelika, peʼe mai te Oliete-Taupotu. ʼI tona temi, ʼe maʼu anai e te ʼu tagata mo te ʼu fafine ʼo te ʼu potu ʼaia te fealagia ʼaē ke nātou maʼu he ʼu pilivilesio ʼe lahi age ia ʼi te ʼuhiga ʼapositolo ʼi te kele, peʼe ʼi te kau ʼaē ki te kolesi pule ʼo te ʼuluaki sēkulō, pe ko he maʼu ʼo he faʼahiga tuʼulaga ʼi te lotolotoiga ʼo te hahaʼi ʼo te ʼAtua ia ʼaho nei.—Kalate 3:27-29.
Neʼe uga e te ʼapositolo ke ina tala fēnei: “Ko te ʼAtua ʼe mole fakapulepule, kae ʼi te fenua fuli pe ko te tagata ʼaē ʼe manavasiʼi kia te ia pea mo maʼuli ʼi te faitotonu ʼe ina leleiʼia.” (Gāue 10:34, 35) Ei, ko te ʼu lelei ʼo te totogi ʼo Kilisito ʼe tau mo te hahaʼi fuli, ʼe mole fakapalatahi. Pea ko te hahaʼi mai te ʼu telepi fuli, mo te ʼu lea fuli, mo te ʼu fenua fuli ʼe nātou kau anai ki te Puleʼaga ʼi selo pea ʼe maʼuʼuli anai te toe hahaʼi tokolahi ʼo heʼegata ʼi te kele.
ʼE liliu te tokolahi ʼo mole nātou leleiʼia te ʼu lanu, mo te ʼu lea, pe mo te ʼu fenua. ʼE fakamatala lelei te faʼahi ʼaia ʼi te meʼa ʼaē ʼe tou lau ia Gāue 6:1 ʼo ʼuhiga mo te meʼa ʼaē neʼe hoko ʼuhi ko te muhumuhu ʼa te kau Kilisitiano ʼo te lea faka Keleka pea mo te ʼu Kilisitiano ʼo te lea faka Hepeleo. Neʼe feala ke tou tuputupu ʼaki te ʼu faʼahiga manatu ʼaia pe neʼe tou taupau te manatu ʼe mole lelei ʼo ʼuhiga mo te ʼu lea, te ʼu lanu, te ʼu fenua, pe ko te ʼuhiga tagata. ʼI te ʼaluʼaga ʼaē ʼe feala ke hoko he faʼahi feiā, ʼe tonu ke tou fakaʼaoga he ʼu faiga ke mulimuli totatou ʼu manatu pea mo totatou ʼu aga ki te manatu ʼa te ʼAtua, ʼaē ko te ʼu tagata fuli ʼe tatau ʼi tona muʼa, ʼo mole ina fakatokagaʼi totatou ʼuhigaʼi tagata ʼaē ʼe hā ki tuʼa. ʼI te ʼu maʼua ʼaē neʼe tuku e Sehova ki te ʼu tagata ʼāfea pea mo te ʼu tagata taupau faka minisitelio, neʼe mole talanoa ia ki he lanu pe ki he fenua. Kailoa, neʼe fakatafito tona sio ki te ʼu poto fakalaumālie ʼo nātou ʼaē ʼe feala ke nātou maʼu te tuʼulaga ʼaia. ʼE moʼoni te faʼahi ʼaia maʼa te ʼu tagata ʼāfea ʼo te kokelekasio, maʼa te ʼu taupau feʼaluʼaki, pea mo nātou ʼaē ʼe gāue ʼi te ʼu pilō ia ʼaho nei, ohage pe ko tona moʼoni ʼo ʼuhiga mo te kolesi pule ʼo te ʼuluaki sēkulō.