Ko Te Fakamatala ʼa Te Kau Fai Faka Mafola
Ko Te Fagonogono ʼe ʼi Ai Tona ʼu Fua ʼi Fale Pea ʼi Te Faleako
KO TE maʼuli ʼo he Kilisitiano ʼe kau kiai te fai ʼo te meʼa ʼaē ʼe lelei ki niʼihi, kae tāfito ʼi tana fakahā kia nātou te logo lelei ʼo te Puleʼaga ʼo te ʼAtua. ʼE ʼui fēnei ia Tāʼaga Lea 3:27: “ ʼAua naʼa ke fakafisi te meʼa ʼaē ʼe lelei kia nātou ʼaē ʼe tonu ke ke foaki kiai, mo kapau ʼe maʼu e tou nima te fealagia ʼaē ke ina fai te meʼa ʼaia.” ʼI Alasatine ko te Fakamoʼoni ko tona taʼu tolu ʼaia ʼi te ʼu faleako lalahi, pea neʼe ina fia fakahā te logo lelei ʼo te Puleʼaga ki tona kaumeʼa ʼi te faleako. ʼI tana fai ʼo te faʼahi ʼaia, neʼe ina maʼu tona ʼu fua ʼe lahi ʼaupito.
ʼI te tahi ʼaho neʼe fakahā e te kiʼi Fakamoʼoni ʼaia ki tona kaumeʼa ʼe mole lelei te ʼu lotu fuli. ʼI te tali age ʼaē e te kiʼi tama neʼe heʼeki ina fai ia he meʼa ʼe kovi, neʼe ʼui fēnei age e te kiʼi Fakamoʼoni: “Kae ko koe ʼe mole ke fai he meʼa maʼa te ʼAtua.” Neʼe ko he meʼa neʼe fakakaukauʼi e te kiʼi tūpulaga. Ki muli age, neʼe fakamahino age e te kiʼi Fakamoʼoni ko te ʼu ʼaho ʼaenī ʼe ko te ʼu ʼaho fakamuli pea kapau e kita fia maʼu te ʼofa ʼo te ʼAtua, ʼe tonu ke kita maʼu te ʼatamai mālama ʼo te Tohi-Tapu pea mo kita maʼuliʼi. Neʼe tali lelei e tona kaumeʼa. Kae ʼe tali anai koa e tona famili ke ina ako te Tohi-Tapu? Moʼo faka fealagia ki tona kaumeʼa ke ina fakakaukauʼi te faʼahi ʼaia, neʼe ʼui age e te kiʼi Fakamoʼoni ke ina lau te tohi E Feala Keke Mauli O Heegata Ite Palatiso Ite Kele.
Pea ʼi te hoholo ʼo te temi neʼe ʼosi leva te ako ʼo tona kaumeʼa. Neʼe mole kei ina maʼu he logo ʼo ʼuhiga mo tona kaumeʼa ʼi te taʼu katoa. Pea fokifā pe ʼi te tahi ʼaho, neʼe tagi te telefoni, ko tona kaumeʼa neʼe ina fakahā age kia ia, kua mahino leva kia ia ko te ʼu fakakikite ʼa te Tohi-Tapu neʼe kua hoko moʼoni. Neʼe fai aipe te fakatuʼutuʼu e te Fakamoʼoni ke ina fai he ako faka Tohi-Tapu pea mo ia.
ʼI te temi ʼaē neʼe ʼalu ai ki te ʼapi ʼo tona kaumeʼa, neʼe ina fakatokagaʼi ko te ʼu mātuʼa ʼo tona kaumeʼa neʼe nā tuʼania ʼo ʼuhiga mo te meʼa ʼaē kua kau kiai tanā tama. ʼO feiā aipe mo te kiʼi tēhina veliveli ʼo tona kaumeʼa, neʼe manatu ia ʼe kua vale. Pea neʼe fakatuʼutuʼu e te ʼu mātuʼa ke kau tona kiʼi tēhina veliveli ki te ako ʼaia. Ki muli age, neʼe tagi te tūpulaga ʼaia, ʼo ina fakamatala ki tana ʼu mātuʼa ʼe mole vale tona taʼokete, ʼo ʼui ai e te faʼe, “Neʼe ko toku fihifihia e tahi, ʼi te temi nei, ko toku ʼu fihifihia e lua!”
Koia, ʼi te ako ʼaē neʼe hoa mai, neʼe kau te faʼe ki te ako ʼaia pea neʼe ina fakamoʼoni ai ko tana ʼu tama neʼe mole vavale. Ki muli age, neʼe fai te fakatuʼutuʼu ke ina ako pea mo tona hoa te Tohi-tapu. Mole tuai pea neʼe kau te kiʼi foʼi famili ʼaia ki te ʼu fono ʼo te kokelekasio ʼi te Fale ʼo te Puleʼaga. ʼO toe kau mo te ʼu kui ki te ako ʼo te Tohi-Tapu pea mo nā ʼolo ki te ʼu fono. Talu mai ai, ko te ʼuluaki tūpulaga kua papitema, kua ʼohoana, pea ko ia mo tona hoa ʼe ko he ʼu fai faka mafola ʼe gāue fakamalotoloto.
Pea tahi foki, ʼaki te fagonogono faigamālie ʼi te faleako, ko te Fakamoʼoni ʼaia neʼe tokoni ki tona tahi ʼu kaugā ako e lua, ʼo toe feiā aipe mo te faʼe pea mo te tokolua ʼo te tahi ʼi te ʼu tūpulaga ʼaia ʼo kamata te ʼu ako faka Tohi-Tapu. ʼO fakatahi fuli ʼaia, ko te toko 11 neʼe nātou ako te moʼoni ʼo te Tohi-Tapu, koteʼuhi neʼe fai e te tūpulaga ʼaia te meʼa ʼaē ʼe lelei ki tona ʼu kaugā ako. ʼE ko he meʼa fakafiafia foki! ʼE moʼoni, “Manuʼia te hahaʼi ʼaē ko tonatou ʼAtua ko Sehova!”—Pesalemo 144:15.