ʼE Nātou Fiafia ʼi He Mālama ʼe Mole Fiafia
NEʼE kamata fēnei e te sulunale The New York Times ʼo te ʼaho 26 ʼo Sanualio 1995: “Kapau ʼe tou vakaʼi te ʼaluʼaga ʼo te malamanei ʼi te sēkulō ʼaenī, ʼe tou fakatokagaʼi ai ko te sēkulō ʼaenī ʼo Satana. Neʼe mole ʼi ai ki muʼa atu he ʼu hahaʼi neʼe nātou fakahā he fia fai pea mo he holi mālohi ki te tāmateʼi ʼo he ʼu lauʼi miliona hahaʼi ʼuhi ko tonatou lanu, tanatou lotu peʼe ko tonatou ʼu tuʼulaga ʼi te sosiete.”
Ko te tuʼa 50 fakamanatu ʼo te faka ʼāteaina ʼo nātou ʼaē neʼe nofo pilisoni ʼi te ʼu lotoʼā fakamate fakamamahi ʼo te kau Nasi, ʼaē neʼe tupu ai te tohi e te ʼu sulunale ohage ko te sulunale ʼaē ʼi ʼoluga, te taʼi palalau ʼaia. Kae, ko te taʼi fai fakapō ʼaia, ʼe kei hoko pe ʼi te ʼu potu fenua ʼo Afelika pea mo te Potu Hahake ʼo Eulopa.
Ko te tāmateʼi ʼo te hahaʼi Sutea, te molehi ʼo he faʼahiga lanu, te ʼu fetāmateʼiʼaki ʼo te ʼu telepi—tatau aipe pe koteā te ʼu faʼahiga higoa ʼaē neʼe fakaʼaogaʼi ki te ʼu meʼa ʼaia—ʼe nātou fakatupu lotomamahi ʼaupito. Kae, ʼi te lotolotoiga ʼo te ʼu taʼi aga fakalialia ʼaia, ʼe ʼi ai te ʼu leʼo mālohi ʼe hake fakafiafia. Ohage la, tou vakaʼi te meʼa ʼaē neʼe hoko ʼi Siamani ʼi te taʼu 1930.
ʼI ʼApelili 1935, neʼe fakamavae e Itilele te kau Fakamoʼoni ʼa Sehova ʼi te ʼu faʼahiga gāue ki te puleʼaga, pea mo te faʼahi faka politike nasi. Neʼe toe puke foki te kau Fakamoʼoni, mo faka pilisoniʼi nātou, pea mo ʼave nātou ki te ʼu lotoʼā fakamamahi ʼuhi ko tanatou mole kau ki te tau. (Soane 17:16) ʼI te fakaʼosi ʼo te māhina ko ʼAukusito ʼo te taʼu 1936, neʼe lahi ʼaupito te kau Fakamoʼoni ʼa Sehova ʼaē neʼe ʼave ʼo pilisoniʼi. Ko te ʼu lauʼi afe ia nātou ʼaē neʼe ʼave ki te ʼu lotoʼā fakamamahi, pea neʼe tokolahi ia nātou neʼe nonofo ʼi ai ʼo aʼu ki te taʼu 1945, mo kapau neʼe kei maʼuʼuli. Kae, neʼe tali feafeaʼi e te kau Fakamoʼoni ʼa Sehova te gaohi koviʼi ʼaē ʼo nātou ʼi te ʼu lotoʼā ʼaia? ʼI meʼa fakapunamaʼuli foki, neʼe nātou fiafia nātou logope la te mole fiafia ʼo te hahaʼi ʼaē neʼe nātou nonofo tahi ʼi te ʼu lotoʼā fakamamahi.
“Ko Te ʼu Maka Mālohi ʼi Te Pela”
Ko te fafine fai hisitolia pilitania, ko Christine King, neʼe ina fakafehuʼi te fafine Katolika neʼe nofo ʼi te ʼu lotoʼā fakamamahi. Neʼe ʼui fēnei e King: “Neʼe ina fai te palalau ʼe mole feala haku galoʼi. Neʼe ina fakamatalatala lelei te maʼuli fakamataku ʼaē neʼe tau mo ia, pea mo te ʼu ʼaluʼaga fakalialia ʼaē neʼe maʼuli ai ʼi te lotoʼā fakamamahi. Pea neʼe ina ʼui neʼe feʼiloʼiʼaki mo te kau Fakamoʼoni, pea ko te ʼu Fakamoʼoni ʼaia neʼe ko te ʼu maka mālohi ʼi te pela. Neʼe ko nātou ʼaē neʼe tutuʼu mālohi ʼi te pelapela ʼaia. Neʼe ina ʼui neʼe ko nātou pe ʼaē neʼe mole ʼanuʼanuhi e te kau tagata leʼo, mokā nātou fakalaka ʼi ʼonatou tafa. Pea neʼe mole nātou fehiʼa ki te maʼuli ʼi te ʼu lotoʼā fakamamahi, kae neʼe nātou tali ʼaki te ʼofa pea mo te ʼamanaki, pea mo tanatou ʼiloʼi ʼaē neʼe ʼi ai te tupuʼaga ʼo tanatou nonofo ʼi te ʼu lotoʼā fakamamahi.”
Koteā ʼaē neʼe tokoni ai ki te kau Fakamoʼoni ʼa Sehova ke nātou hage ko ‘he ʼu maka mālohi ʼi te pela’? Ko tanatou tui mālohi kia Sehova ʼAtua pea mo tona ʼAlo, ia Sesu Kilisito. Koia, neʼe mole lava te ʼu faiga ʼa Itilele ke ina fakaloto vaivaiʼi tonatou ʼofa pea mo tanatou fiafia faka Kilisitiano.
Tou fakalogo muʼa ki te toko lua neʼe maʼuʼuli ʼi te ʼu lotoʼā fakamataku ʼe nā toe manatuʼi tanā mālo ʼi te ʼahiʼahiʼi ʼo tana tui, kua hili nei kiai taʼu e nimagofulu. ʼE ʼui fēnei e te tahi tuagaʼane: “Neʼe ʼau fiafia ʼaupito ʼi taku ʼiloʼi ʼaē neʼe ʼau maʼu te pilivilesio maʼuhiga, ʼaē ko te fakahā toku ʼofa pea mo taku fakafetaʼi kia Sehova ʼi te ʼu ʼaluʼaga faigataʼa ʼaupito ʼaē neʼe hoko kia ʼau. Neʼe mole he tahi neʼe ina fakamālohiʼi ʼau ke ʼau fai te faʼahi ʼaia! Kae ko nātou ʼaē neʼe nātou fakamālohiʼi mātou neʼe ko tomatou ʼu fili, ʼaē neʼe nātou faiga, ʼaki tanatou fakamatakuʼi mātou, ke lahi age tamatou fakalogo kia Itilele ia Sehova—kae neʼe mole hona fua! ʼE ʼau fiafia ʼi te temi nei, kae neʼe ʼau toe fiafia pe foki māʼia mo taku nofo ʼi te fale pilisoni, koteʼuhi neʼe maʼa toku leʼo ʼo loto.”—Ko te fakamatala ʼa Maria Hombach, kua taʼu 94.
ʼE fakamatala fēnei e te tahi Fakamoʼoni: “ ʼE ʼau toe manatuʼi ʼaki he loto fakafetaʼi pea mo fiafia, te ʼu ʼaho ʼaē neʼe ʼau nofo pilisoni ai. Ko te ʼu taʼu ʼaē neʼe pule ai Itilele, neʼe faigataʼa te maʼuli ʼi te ʼu fale pilisoni pea ʼi te ʼu lotoʼā fakamataku, neʼe lahi te ʼu ʼahiʼahiʼi ʼaē neʼe hoko ai kia mātou. Kae ʼe mole ʼau fia galoʼi te ʼu ʼaho ʼaia, koteʼuhi neʼe ʼau ako ai te falala katoa ʼaē kia Sehova.”—Ko te fakamatala ʼo Johannes Neubacher, kua taʼu 91.
“Te falala katoa ʼaē kia Sehova”—koʼena te kalavi ʼo te fiafia ʼaē neʼe maʼu e te kau Fakamoʼoni ʼa Sehova. Koia, ʼe nātou fiafia, logope ʼe nātou maʼuʼuli ʼi he mālama ʼe mole fiafia ai te hahaʼi. Neʼe hā tanatou fiafia ʼi te Fakatahi faka Tisitilike, ʼaē neʼe fēnei tona kupu tāfito “Tou Vikiviki Fakafiafia Ki Te ʼAtua,” ʼaē neʼe fai ʼi te ʼu māhina pe ʼaenī kua hili. Tou toe vakaʼi fakanounou te ʼu fakatahi fakafiafia ʼaia.
[Paki ʼo te pasina 4]
Ko Maria Hombach