Neʼe Nātou Fai Te Finegalo ʼo Te ʼAtua
Ko Moisese Pea Mo Alone Ko Te ʼu Fai Faka Mafola Lototoʼa ʼo Te Folafola ʼa Te ʼAtua
KOUTOU fakakaukauʼi te meʼa ʼaenī: ko Moisese, ʼi tona taʼu 80 pea mo tona tēhina, ko Alone, ʼe nā tutuʼu ia muʼa ʼo te tagata ʼaē ʼe mālohi tokotahi ʼi te kele—te Falaone ʼo Esipito. Maʼa te kau Esipito, ʼe mole gata pe tanatou tui ʼaē ko ia ko he fakafofoga ʼo te ʼu ʼatua, kae neʼe nātou tui pe foki ko ia totonu ʼe ko he ʼatua. Neʼe ʼui ko ia ʼaē neʼe ulusino kiai ia Horus, te ʼatua ʼaē ko tona ʼulu ko te faucon, ko te manulele. ʼO fakatahi ia Horus pea mo Isis pea mo Osiris, neʼe nātou faʼufaʼu te tahitolu tāfito ʼaia ʼo te ʼu ʼatua tagata pea mo te ʼu ʼatua fafine ʼo Esipito.
Ko he tahi neʼe fakaōvi kia Falaone neʼe feala ke ina fakatokagaʼi te ʼulu fakamataku ʼo te gata, ko te cobra, ʼaē neʼe tuʼu ʼi te lotomalie ʼo tona pale faka hau. ʼE lau ko te gata ʼaia neʼe feala ke ina fakakakaha te afi pea mo ina fakaʼauha te ʼu fili ʼo Falaone. ʼI te temi leva ʼaia, kua tutuʼu ia Moisese pea mo Alone ia muʼa ʼo te hau ʼatua ʼaia moʼo fai age kia ia he kole neʼe mole heʼeki fai e he tahi ʼi muʼa atu—ke ina fakamavae te kau Iselaelite ʼaē neʼe fakapōpulaʼi, ke nātou fai he lafeti maʼa tonatou ʼAtua, ia Sehova.—Ekesote 5:1.
Neʼe kua fakahā fakatomuʼa e Sehova ʼe loto fefeka anai ia Falaone. Koia, neʼe mole punamaʼuli ia Moisese pea mo Alone ki te tali fēnei age e Falaone kia nāua: “Ko ai ia Sehova ke ʼau fakalogo ki tona leʼo ʼo fakamavae ia Iselaele? ʼE mole ʼau ʼiloʼi ia Sehova pea tahi ʼaē meʼa, ʼe mole ʼau fakamavae anai ia Iselaele.” (Ekesote 4:21; 5:2) Koia, neʼe ko te kamataʼaga ʼaia ʼo he toe fakafifihi lahi. Lolotoga tanatou toe felāveʼi, neʼe fakahā e Moisese pea mo Alone te fakamoʼoni lelei kia Falaone, ko nāua ʼe nā fakafofoga te ʼAtua moʼoni pea mo mālohi.
ʼE Hoko Te Milakulo
Ohage ko tona fakatotonu e Sehova, neʼe fakahoko e Alone te milakulo neʼe ina fakamoʼoni ai ki te māfimāfi ʼo Sehova ʼi te ʼu ʼatua ʼo Esipito. Neʼe ina lī tona tokotoko kia muʼa ʼo Falaone, pea neʼe liliu ʼi te temi pe ʼaia ko te toe gata! ʼI te mataku ʼa Falaone ki te milakulo ʼaia neʼe hoko, neʼe ina pāui tana kau pelepitelo gaohi meʼa fakamana.a ʼAki te tokoni ʼo te ʼu mālohi fakatemonio, neʼe lava fakahoko e te ʼu tagata ʼaia ʼaki tonatou ʼu tokotoko te milakulo ʼaē neʼe fakahoko e Alone mo Moisese.
Neʼe fiafia ia Falaone pea mo tana kau pelepitelo, kae neʼe mole fualoa tonatou fiafia. Koutou fakakaukauʼi muʼa tanatou punamaʼuli ʼi te temi ʼaē neʼe folo takitahi ai e te gata ʼo Alone tanatou ʼu gata! Ko nātou fuli ʼaē neʼe nātou sisio ki te meʼa ʼaē neʼe hoko, neʼe feala ke nātou mahino ʼe mole he mālohi ʼo te ʼu ʼatua ʼo Esipito ki te ʼAtua moʼoni, ia Sehova.—Ekesote 7:8-13.
Kae, ʼi te hili ʼo te faʼahi ʼaia, neʼe hoko atu aipe te loto fefeka ʼo Falaone. Neʼe hoki ʼosi te fakatō e te ʼAtua ia te ʼu tautea e hogofulu ki Esipito, pea neʼe ʼui ai leva e Falaone kia Moisese pea mo Alone: “Koulua tutuʼu ake, ʼo koulua mavae ʼi te lotolotoiga ʼo taku hahaʼi, ia koulua pea mo te ʼu foha ʼaē ʼo Iselaele, pea ke koutou ʼolo, ʼo tauhi kia Sehova, ohage ko te meʼa ʼaē kua koulua ʼui mai.”—Ekesote 12:31.
Ko He Ako Kia Tatou
Koteā ʼaē neʼe faka fealagia ai kia Moisese pea mo Alone ke nā fakaōvi ki te Falaone mālohi ʼo Esipito? ʼUluaki, neʼe fakahā e Moisese ʼe mole feala ke ina fakahoko te faʼahi ʼaia, ʼo ina ʼui ʼe ‘mole faigafua tana palalau pea ʼe ʼalelo vale.’ Logope neʼe fakamoʼoni age e Sehova ʼe tokoni anai kia ia, neʼe ina kolekole age ʼo ina ʼui fēnei: “Fakalelei age, kae ke ke fekauʼi ʼaki te nima ʼo ia ʼaē ka ke fekauʼi anai.” Ko tona faka ʼuhiga neʼe kole e Moisese kia Sehova ke ina fekauʼi he tahi kehe. (Ekesote 4:10, 13) Kae, neʼe fakaʼaogaʼi e Sehova ia Moisese ʼaē ʼe agamālū, ʼo ina foaki kia ia te poto pea mo te mālohi ʼaē neʼe ʼaoga ki ai ke ina fakahoko tona maʼua.—Faka au 12:3.
Ia ʼaho nei, ko te kau kaugana ʼa Sehova ʼAtua pea mo Sesu Kilisito, ʼe nātou fakahoko te fakatotonu ʼaē ke “fai ni ʼu tisipulo ʼi te hahaʼi ʼo te ʼu fenua fuli pe.” (Mateo 28:19, 20) Moʼo fakahoko te fekau ʼaia, ʼe tonu ke tou fakaʼaogaʼi lelei totatou ʼatamai mālama ʼo te Tohi-Tapu pea mo te ʼu fealagia kehekehe ʼaē ʼe tou maʼu. (1 Timoteo 4:13-16) ʼAua naʼa tou tokagaʼi te ʼu faʼahi ʼaē ʼe tou tōtō ai, kae tou tali ʼaki te falala te ʼu maʼua fuli ʼaē neʼe foaki mai e te ʼAtua. ʼE feala ke ina fakaliliu tatou ke tou popoto pea mo tou mālolohi moʼo fai ia tona finegalo.—2 Kolonito 3:5, 6; Filipe 4:13.
Mai tona ʼuhiga ʼaē neʼe tonu ke tauʼi e Moisese te ʼu fakafeagai fakatagata pea mo fakatemonio, ʼe mahino papau ia neʼe ʼaoga kia ia he tokoni makehe. Koia, neʼe fakamoʼoni fēnei age e Sehova ki ai: “Koʼeni neʼe ʼau fakaliliu koe ko he ʼAtua kia Falaone.” (Ekesote 7:1) Ei, neʼe maʼu e Moisese te tokoni pea mo te mālohi fakaʼatua. ʼAki te laumālie ʼo Sehova, neʼe mole mataku ia Moisese kia Falaone peʼe ki te ʼu kautau ʼa Falaone.
Mo tatou foki, ʼe tonu ke tou falala ki te laumālie maʼoniʼoni ʼo Sehova, peʼe ko tona mālohi gāue, moʼo fakahoko totatou minisitelio. (Soane 14:26; 15:26, 27) ʼAki te tokoni ʼa te ʼAtua ʼe feala ke tou toe ʼui te ʼu palalau ʼa Tavite, ʼaē neʼe hiva fēnei: “Neʼe ʼau tuku taku falala ki te ʼAtua. ʼE mole ʼau mataku anai. Koteā ʼaē ʼe feala ke fai mai e te tagata ʼaē ʼe toʼo mai te kele?”—Pesalemo 56:11.
ʼI tona manavaʼofa, neʼe mole tuku e Sehova ia Moisese ke ina fai tokotahi tona maʼua. Kae, neʼe ʼui fēnei e te ʼAtua: “Ko Alone, tou tēhina, ʼe liliu anai ko tau polofeta. Ko koe, ʼe ke palalau anai ki te ʼu meʼa fuli ʼaē ka ʼau fakatotonu atu, pea ko Alone tou tēhina, ʼe palalau anai kia Falaone.” (Ekesote 7:1, 2) ʼI ʼofa leva ʼo Sehova ʼi tana tokagaʼi te ʼu tuʼakoi ʼo te ʼu fealagia ʼo Moisese!
ʼE foaki mai e te ʼAtua kia tatou he ʼu hahaʼi Kilisitiano ʼe feala ke tou fakakaugā mo nātou, heʼe nātou tali ke nātou liliu ko ni kau Fakamoʼoni ʼa Sehova, Ia ia ʼaē ʼe Lahi Tokotahi. (1 Petelo 5:9) Logope te ʼu fihifihia ʼaē ʼe feala ke tau mo tatou, tou liliu ohage ko Moisese pea mo Alone, ko ni ʼu kaugā fai faka mafola lototoʼa ʼo te folafola ʼa te ʼAtua.
[Nota ʼi te lalo pasina]
a Ko te kupu faka Hepeleo ʼaē ʼe fakaliliu ʼaki te ʼu kupu “kau pelepitelo gaohi meʼa fakamana,” ʼe faka ʼuhiga ki he kau faifakalauʼakau, neʼe nātou lau neʼe nātou maʼu te ʼu mālohi makehe ʼe laka age ia ʼi te mālohi ʼo te kau temonio. Neʼe tui te hahaʼi neʼe feala hanatou pāui ki te kau temonio ke nātou fakalogo kia nātou pea neʼe mole mālolohi age te kau temonio ʼi te kau tagata faifakalauʼakau ʼaia.
[Paki ʼo te pasina 25]
Neʼe fakafofoga e Moisese pea mo Alone ia Sehova ʼaki he lototoʼa ia muʼa ʼo Falaone