Ko Te Kau Faka Mafola ʼo Te Puleʼaga ʼe Nātou Fakamatala

Te ʼu Gāue Lelei ʼe Nātou Faka Kolōliaʼi Ia Sehova

ʼI TANA Akonaki ʼi te Moʼuga, neʼe ʼui e Sesu ki tana kau Tisipulo: “Ke toe feiā pe te mū ʼo tokotou mālama ʼi muʼa ʼo te hahaʼi, koteʼuhi ke nātou mamata ki ʼakoutou gāue lelei pea nātou faka kolōlia ai ki takotou Tāmai ʼaē ʼe ʼi selo.” (Mateo 5:​16) ʼO toe feiā aipe, ko te kau Kilisitiano moʼoni ia ʼaho nei ʼe nātou kau ki te ʼu “gāue lelei” e nātou faka kolōliaʼi ia Sehova.

Koteā koa te ʼu gāue lelei ʼaia? ʼE kau kiai te faka mafola ʼo te logo lelei, kae ko tatatou aga ʼe ko he tahi ʼaia meʼa maʼuhiga ʼo te ʼu gāue lelei. ʼI te agamāhani ko tatatou aga ʼaē ʼe lelei ʼe tupu ai te fia ʼōmai ʼa te hahaʼi ki te kokelekasio faka Kilisitiano. Ko te ʼu fakamatala ʼaē ka hoa mai ʼe hā lelei ai pe neʼe feafeaʼi te haga ʼa te kau Fakamoʼoni ʼa Sehova ʼi Malitinike ʼo ‘fakamū tonatou mālama ʼi muʼa ʼo te hahaʼi.’

◻ Lolotoga tanatou kau ki te gāue fai faka mafola, neʼe ʼaʼahi e te fafine Fakamoʼoni ʼa Sehova te fafine Katolika. Lolotoga te ʼu taʼu e 25 neʼe nofo te fafine ʼaia mo he tagata ka mole nā ʼohoana. Neʼe ina ʼiloʼi te ʼu akonaki ʼa te kau Fakamoʼoni ʼa Sehova, koteʼuhi ia taʼu e fitu ki muʼa atu, neʼe ʼavage te tohi E Feala Keke Mauli O Heegata Ite Palatiso Ite Kele.a Neʼe ina ʼui age ki te fafine Fakamoʼoni: “ ʼE lahi fau te ʼu lotu. ʼE mole ʼau ʼiloʼi pe ko te lotu fea ʼaē ʼe tonu ke ʼau tui kiai ʼi te ʼu lotu ʼaia.” Neʼe fakamahino age e te fafine Fakamoʼoni ko te moʼoni ʼe feala pe ke maʼu ʼi te Tohi-Tapu, pea moʼo maʼu ʼo te moʼoni ʼaia, ʼe tonu ke ina ako fakalelei te Tohi-Tapu pea mo faikole ki te ʼAtua ke ina tuku age kia ia tona laumālie pea mo tana takitaki.

Lolotoga he temi, logope la tana leleiʼia te ako ʼo te Tohi-Tapu, neʼe fakafisi te fafine ki te ʼu fakaafe ʼaē neʼe fai age kia ia ʼo ʼuhiga mo te ʼu fono faka Kilisitiano ʼi te Fale ʼo te Puleʼaga ʼa te kau Fakamoʼoni ʼa Sehova. Koteā tona tupuʼaga? Neʼe lahi ʼaupito tona umiuminoa. Kae, ʼi tona ʼosi fakaafe ʼaē ki te ʼAho Fakamanatu ʼo te mate ʼo Kilisito, neʼe mole kei umiuminoa ia pea neʼe ʼalu ai ki te fakaafe ʼaia.

Neʼe lave mālohi ki tona loto te feʼofaʼofaniʼaki ʼa te hahaʼi ʼi te ʼu fono ʼi te Fale ʼo te Puleʼaga. Neʼe mole heʼeki sio ia ki he feʼofaʼofani moʼoni feiā ʼi tona ʼēkelesia! ʼI te hili ʼo te fono ʼaia neʼe kamata ʼalu ai ki te ʼu fono fuli ʼaē neʼe fai e te kau Fakamoʼoni ʼo te kolo, ʼo mole tuai pea ʼohoana ia mo te tagata ʼaē neʼe nā nonofo. Kua liliu ia ʼi te temi nei ko he tahi kua papitema ʼo te kokelekasio.

◻ Ko te ʼu gāue lelei ʼa te tahi fafine Fakamoʼoni neʼe maʼu ai te ʼu fua lelei. Neʼe maʼu tuʼulaga ia ʼi te matani gāue. Neʼe kau ki te matani gāue ʼaia te tagata mai te motu ʼo te La Réunion, pea neʼe kamata manukinukiʼi te tagata ʼaia e ʼihi ʼi te kau gāue, koteʼuhi ʼe leka. Neʼe liliu ia ko he tahi ʼe nātou manukinukiʼi. Kae, neʼe agalelei tuʼumaʼu te fafine Fakamoʼoni pea mo aga fakaʼapaʼapa ki te tagata ʼaia. Mole faʼa fualoa pea neʼe fehuʼi age e te tagata ki te fafine pe koʼe ʼe kehe ʼaupito tana aga.

Neʼe fakamahino age e te fafine Fakamoʼoni ko tana aga fakaʼapaʼapa ʼe ko te ikuʼaga ʼaia ʼo te ʼu lekula ʼo te Tohi-Tapu ʼaē neʼe ina ako mo te kau Fakamoʼoni ʼa Sehova. Neʼe ina toe fakahā age foki ki te tagata te meʼa ʼaē ʼe ʼui e te Tohi-Tapu ʼo ʼuhiga mo te ʼu fakatuʼutuʼu ʼa te ʼAtua, pea mo te ʼamanaki ʼo ʼuhiga mo te mālama foʼou. Neʼe tali e te tagata ke fai hana ako Tohi-Tapu, ʼo kamata kau ai ki te ʼu fono faka Kilisitiano, pea neʼe ʼohoana mo te fafine ʼaē ʼe nofo mo ia.

Ki muli age neʼe toe liliu ia ki te La Réunion. ʼI te temi muʼa, neʼe ʼi ai tona ʼu fihifihia mo tona ʼu kāiga, tāfito mo te famili ʼo tona ʼohoana. Kae ʼi te temi nei neʼe kua punamaʼuli ʼaupito tona ʼu famili pea mo te famili ʼo tona ʼohoana ʼi tana aga matamatalelei ʼi te faʼahi faka Kilisitiano. Neʼe papitema te tagata pea ʼi te temi nei ʼe ko te tagata faifekau faka minisitelio. Tokolahi ʼi te famili, ʼo kau ai mo tona ʼohoana pea mo tona ʼu ʼofafine e lua, ʼe nātou gāue ʼi te kokelekasio faka Kilisitiano ko te ʼu kaugā fai faka mafola ʼo te logo lelei ʼo te Puleʼaga ʼo te ʼAtua.

[Nota ʼi te lalo pasina]