Te ʼu Fehuʼi ʼa Te Kau Lautohi

ʼE feala koa hatatou ʼui ko te ʼu kaugana ʼa te ʼAtua ia ʼaho nei, ʼaē ʼe nātou ʼamanaki ki te maʼuli ʼi te kele ʼe nātou maʼu tatau te koga ʼo te laumālie maʼoniʼoni ohage ko te kau Kilisitiano fakanofo?

ʼE mole foʼou te fehuʼi ʼaia. Neʼe kua ʼosi fai pe te fehuʼi ʼaia ʼi “Te ʼu Fehuʼi ʼa Te Kau Lautohi” ʼi Te Tule Leʼo (fakafalani) ʼo te ʼaho 1 ʼo Novepeli 1952. Talu mai ai, ko te tokolahi kua nātou liliu ko te ʼu Fakamoʼoni ʼa Sehova, koia ʼe feala ke tou toe vakaʼi te fehuʼi ʼaia pea mo vakaʼi pe koteā ʼaē neʼe talanoa kiai.

Tāfito, koʼeni te tali, ei, ʼe feala ki te ʼu tēhina mo te ʼu tuagaʼane agatonu ʼaē ʼe nātou kau ʼi te kalasi ʼo te tahi ʼu ōvi ke nātou maʼu tatau te laumālie maʼoniʼoni ʼo te ʼAtua ohage ko te kau Kilisitiano Fakanofo.​—Soane 10:16.

ʼE mahino papau ia, ʼe mole faka ʼuhiga leva ʼe tatau te gāue ʼa te laumālie ʼi te hahaʼi fuli. Koutou manatuʼi te ʼu kaugana agatonu ʼo te temi muʼa, ʼaē neʼe nātou maʼu moʼoni te laumālie ʼo te ʼAtua. ʼAki te mālohi ʼo te laumālie ʼaia, ko ʼihi ia nātou neʼe nātou matehi te ʼu manu fekai, neʼe nātou fakamālōlō te kau mahaki, ʼo nātou toe fakatuʼuake pe mo te kau mate. Pea neʼe ʼaoga kia nātou te laumālie ke nātou fai te ʼu tohi ʼo te Tohi-Tapu ʼaē ʼe haʼu mai te ʼAtua. (Kau Fakamāu 13:24, 25; 14:​5, 6; 1 Hau 17:17-24; 2 Hau 4:​17-37; 5:​1-14) Neʼe ʼui fēnei e Te Tule Leʼo: “Logope la neʼe mole nātou kau ʼi te kalasi ʼo te kau fakanofo, kae neʼe nātou fonu ʼi te laumālie maʼoniʼoni.”

Tahi ʼaē meʼa, koutou fakakaukauʼi muʼa ʼo ʼuhiga mo te ʼu tagata pea mo te ʼu fafine ʼo te ʼuluaki sēkulō ʼaē neʼe fakanofo nātou ʼaki te laumālie maʼoniʼoni, ʼo nātou liliu ai ko he ʼu foha fakalaumālie ʼo te ʼAtua ʼaki te ʼamanaki ʼaē ke nātou ʼolo ki selo. Ko nātou fuli ʼaia neʼe fakanofo, kae neʼe mole faka ʼuhiga leva neʼe tatau te gāue ʼo te laumālie ia nātou fuli ʼaia. Ko te faʼahi ʼaia ʼe hā lelei ia 1 Kolonito kapite 12. Neʼe palalau ai te ʼapositolo ko Paulo ki te ʼu meʼa ʼofa ʼo te laumālie. ʼE tou lau fēnei ʼi te vaega 8, 9 mo te 11: “Ki te tahi ʼe foaki e te laumālie he palalau ʼe poto, ki te tahi te palalau ʼo te ʼatamai mālama ʼo ʼalutahi pe mo te laumālie ʼaia, ki te tahi te tui ʼaki te laumālie pe ʼaia, ki te tahi te poto ʼo te fakamālōlō ʼaki te laumālie pe ʼaia e tahi. . . . Kae, ko te ʼu gāue fuli ʼaia ʼe fakahoko e te laumālie pe e tahi, ʼo tufaki faʼitaliha ki te hahaʼi takitokotahi.”

Tou fakatokagaʼi ʼi te temi ʼaia, neʼe mole ko te kau Kilisitiano fakanofo fuli ʼaē neʼe nātou maʼu te ʼu meʼa ʼofa ʼo te laumālie ke nātou fai he ʼu milakulo. Ia 1 Kolonito kapite 14, neʼe talanoa ia Paulo ʼo ʼuhiga mo he fono ʼo te kokelekasio neʼe kau ai te tahi neʼe ina maʼu te poto ʼi te lea, kae neʼe mole ʼi ai he tahi neʼe poto ʼi te fakaliliu. Logope la, ʼi te tahi temi ki muʼa atu, ko nātou takitokotahi neʼe kua fakanofo ʼaki te laumālie. ʼE feala koa ke ʼui ko te tēhina ʼaē neʼe ina maʼu te poto ʼo te lea, neʼe lahi age ia tana maʼu te koga ʼo te laumālie ia nātou ʼaē neʼe nonofo ai. Kailoa. Neʼe mole tukunoaʼi te kau fakanofo ʼaē, neʼe feala pe foki ke nātou mahino ki te Tohi-Tapu ohage ko te tēhina ʼaia pea mo toe tauʼi pe foki mo te ʼu fakafeagai. Neʼe gāue makehe te laumālie ʼi te tēhina ʼaē neʼe poto ʼi te lea. Kae, ko ia pea mo te ʼu tēhina ʼaē, neʼe tonu ia ke nātou nonofo ōvi kia Sehova pea mo nātou “haga fonu ʼi te laumālie,” ko te ʼui ʼaia ʼa Paulo.​—Efesi 5:18.

ʼO ʼuhiga mo te toe ʼo te kau fakanofo ʼo totatou temi, ʼe mahino papau ia, neʼe nātou maʼu te laumālie ʼo te ʼAtua. ʼI te tahi moʼi temi, ko te laumālie neʼe gāue ia kia nātou ʼi tona ʼaluʼaga makehe​—ʼi te temi ʼaē neʼe fakanofo ai nātou pea mo vavae nātou ko he ʼu foha fakalaumālie. Ki muli age, neʼe tonu ke nātou “haga fonu ʼi te laumālie,” ke tokoni kia nātou mokā nātou faigaʼi ke nātou mahino lelei ki te Tohi-Tapu, mokā nātou takitaki te gāue fai faka mafola, peʼe nātou tauʼi te ʼu ʼahiʼahi​—ʼi tonatou ʼuhiga takitokotahi peʼe ʼi te kautahi.

Ko nātou ʼaē ʼe kau ʼi te “tahi ʼu ōvi,” neʼe mole fakanofo ia nātou, kae ʼe nātou maʼu te laumālie maʼoniʼoni ʼi tona tahi ʼu faʼahi. Neʼe fakatokagaʼi fēnei e Te Tule Leʼo ʼo te ʼaho 1 ʼo Novepeli 1952:

“Ia ʼaho nei ko ‘te tahi ʼu ōvi’ ʼe tatau pe foki tanatou fakahoko ʼo te gāue fai faka mafola ohage pe ko te toe ʼo te kau fakanofo, ʼo toe tatau pe foki mo te ʼu faigataʼa ʼaē ʼe tau mo nātou, pea ʼe toe tatau pe foki mo tanatou fakahā te agatonu. ʼE nātou kakai ʼi te laupapa fakalaumālie e tahi, ʼo nātou kai te meʼa kai e tahi pea ʼe tatau te ʼu moʼoni ʼaē ʼe nātou folo. Mai tona ʼaluʼaga ʼaē ʼe nātou kau ʼi te kalasi fakakelekele, ʼaki tanatou ʼamanaki fakakelekele pea mo nātou tokakaga tāfito ki te ʼu meʼa fakakelekele, ʼo lahi age tanatou tokagaʼi te ʼu vaega ʼaē ʼe pipiki ki te ʼu ʼaluʼaga ʼo te kele ʼi te mālama foʼou; kae, ko te toe ʼo te kau fakanofo, ʼaē ʼaki te ʼamanaki ki te lagi pea mo nātou fia logo tāfito ki te ʼu meʼa ʼo te laumālie, ʼo feala ke nātou ako fakamalotoloto te ʼu faʼahi ʼaia ʼi te Folafola ʼa te ʼAtua. . . . Kae ko te meʼa ʼaē ʼe hā mai ai, ʼe tatau pe te ʼu moʼoni pea ʼe toe tatau pe mo te mahino ʼaē ʼe feala ke maʼu e te ʼu kalasi ʼaia e lua, pea ʼe fakalogo pe ki tanatou faiga ʼi te ako ke nātou mahino lelei ki te ʼu meʼa fakakelekele peʼe ki te ʼu meʼa ʼi selo. Ko te koga ʼo te laumālie ʼo te ʼAliki ʼe feala ke vaevae tatau ʼi te ʼu kalasi ʼaia e lua, pea ʼe toe foaki tatau age kia nātou te ʼatamai mālama pea mo te mahino ʼaki te ʼu fealagia tatau ke nātou mahino kiai.”