‘ ʼE ʼAoga Ke Tou Maʼu He Hahaʼi Agatonu’

KUA tahitahiga te agatonu ʼa te hahaʼi ʼi te mālama ʼo te temi ʼaenī. Kae, ʼe ko he maʼua tāfito ʼaia ki te kau Kilisitiano. Neʼe tohi fēnei e Paulo: “ ʼE mātou fia agatonu ia meʼa fuli pe.” (Hepeleo 13:18) Ko te meʼa ʼaia ʼaē neʼe fai e Wilma, ko te Fakamoʼoni ʼa Sehova ʼi Faenza, ʼi Italia.

ʼE fakamatala fēnei e te nusipepa Il Resto del Carlino, ʼi te temi ʼaē neʼe ina maʼu te kato ʼe lahi ai te falā ʼi tuʼa ʼo te fale koloā, neʼe “mole tuai” tana fakaliliu ki te kau polisi, ke feala hanatou fakaliliu kia ia ʼaē ʼaʼana te kato falā ʼaia.

ʼI te logo ʼa te pule kolo ki te faʼahi ʼaia, neʼe ina foimo fakamomoli te moʼi pepa, neʼe ina fai ai te ʼu fakamālo fakanounou kia Wilma. Neʼe ina tohi fēnei “ ʼI te higoa ʼo te Kolo, ʼe ʼau fakamālo atu mo toku loto katoa ʼo ʼuhiga mo tau aga lelei. Ko totatou kolo ko Faenza ʼe ʼaoga kiai he hahaʼi agalelei pea mo agatonu.”

Peʼe ʼiloa te ʼu meʼa lelei ʼaē neʼe tou fai peʼe kailoa, kae ʼe tonu ke tou faiga ke tou agatonu tuʼumaʼu. ʼE fakaloto mālohiʼi tatou e te Tohi-Tapu, ke “tou faiga ke tou agatonu ia mata ʼo te ʼAtua kae ke tou toe agatonu foki ia mata ʼo te tagata.”​—2 Kolonito 8:​21, La Bible de Jérusalem.