Te ʼu Fehuʼi ʼa Te Kau Lautohi

“Te Tule Leʼo” ʼo te ʼaho 1 ʼo Novepeli 1995, neʼe ina faka maʼuhigaʼi te ʼu palalau ʼa Sesu ʼo ʼuhiga mo “te taʼiake ʼaia,” ohage ko tona tuʼu ia Mateo 24⁠:34. Ko tona faka ʼuhiga koa ʼe mole kei tou ʼiloʼi papau pe neʼe fakatuʼu te Puleʼaga ʼo te ʼAtua ʼi selo ʼi te taʼu 1914?

Ko te fakamatala ʼaē neʼe fai ʼi Te Tule Leʼo ʼaia, neʼe mole ina fetogi he meʼa ʼi te akonaki tāfito ʼo ʼuhiga mo te taʼu 1914. Neʼe fakamahino mai e Sesu te fakaʼiloga ʼo tana ʼi henī ʼi tona ʼuhiga hau ʼo te Puleʼaga. ʼE lahi te ʼu fakamoʼoni ʼaē ʼe hā ʼaki ai kua lolotoga fakahoko te fakaʼiloga ʼaia talu mai te taʼu 1914. Ko te ʼu tau, te ʼu hoge, te ʼu mahaki, te ʼu mafuike pea mo te tahi ʼu fakamoʼoni ʼe nātou fakahā mai kua kamata gāue ia Sesu ʼi tona ʼuhiga Hau ʼo te Puleʼaga ʼo te ʼAtua talu mai te taʼu 1914. ʼE hā ʼaki mai ai, talu mai te taʼu ʼaia kua tou maʼuʼuli ʼi te fakaʼosi ʼo te tuʼu ʼo te ʼu faʼahiga meʼa ʼaenī.

Kae koteā ʼaē neʼe fakamālamaʼi e Te Tule Leʼo ʼaia? Ko te puani tāfito neʼe ko te faka ʼuhiga ʼo te kupu “taʼiake” ʼaē neʼe fakaʼaogaʼi e Sesu ia Mateo 24⁠:34. ʼE ʼui fēnei ʼi te vaega ʼaia: “ ʼE ʼau tala moʼoni atu kia koutou: Kailoa, ko te taʼiake ʼaia ʼe mole ʼosi anai ia ka heʼeki hoko te ʼu meʼa fuli ʼaia.” Koteā te faka ʼuhiga ʼo te kupu “taʼiake” ʼaē neʼe fakaʼaogaʼi e Sesu, ki tona temi pea mo totatou temi?

ʼE lahi te ʼu vaega faka Tohi-Tapu ʼe nātou fakamoʼoni neʼe mole fakaʼaogaʼi e Sesu te kupu “taʼiake” ki he kiʼi kūtuga, ohage ko te kau takitaki Sutea peʼe ko tana kau tisipulo agatonu. Kae neʼe ina fakaʼaogaʼi te kupu “taʼiake” moʼo tauteaʼi te kaugamālie ʼo te kau Sutea ʼaē neʼe nātou fakafisi kia ia. Kae meʼa fakafiafia foki, neʼe feala ki te hahaʼi takitokotahi ke nātou fai te meʼa ʼaē neʼe uga e te ʼapositolo ko Petelo ke nātou fai ʼi te ʼaho ʼo te Penikosite, ke nātou fakahemala pea mo nātou “feholaki mai te taʼiake pikopiko ʼaenī.”​—Gāue 2:​40.

ʼE mahino ia, ʼi tana ʼu palalau ʼaia, neʼe mole talanoa ia Petelo ki he ʼu hahaʼi ʼe tatau fuli tonatou taʼu, peʼe faka ʼuhiga ki te loaloaga ʼo he temi, pea neʼe mole ina fakapipiki te “taʼiake” ki he temi totonu. Neʼe mole ina ʼui neʼe tonu ke feholaki mai te hahaʼi mai te taʼiake ʼaē neʼe tupu ʼi te taʼu ʼaē neʼe tupu ai ia Sesu, peʼe ko te taʼiake ʼaē neʼe tupu ʼi te taʼu 29 ʼo totatou temi. Neʼe palalau ia Petelo ʼo ʼuhiga mo te kau Sutea heʼe tui ʼo te temi ʼaia​—ko ʼihi neʼe lagi kei nātou tūpulaga, ko ʼihi neʼe kua matutuʼa​—pea neʼe nātou ʼiloʼi te ʼu akonaki ʼa Sesu, neʼe nātou sisio pea mo nātou logo ki tana ʼu milakulo, kae neʼe mole nātou tali ko ia te Mesia.

ʼE mahino ia, neʼe mālama feiā ia Petelo ki te fakaʼaogaʼi ʼaē e Sesu te kupu “taʼiake,” ʼi te temi ʼaē neʼe nonofo tahi ai mo Sesu pea mo te tahi ʼu ʼapositolo e toko tolu ʼi te Moʼuga ʼo Oliveto. ʼO mulimuli ki te lea faka polofeta ʼa Sesu, ko te kau Sutea ʼo te temi ʼaia​—ʼi tona ʼuhiga moʼoni, te hahaʼi ʼo te temi ʼo Sesu—​neʼe ʼamanaki ke hoko kia nātou peʼe ke nātou logo ki te ʼu tau, te ʼu mafuike, te ʼu hoge, pea mo te tahi ʼu meʼa neʼe fakamoʼoni ai neʼe kua fakaōvi mai te fakaʼosi ʼo te tuʼu faka Sutea. ʼI tona fakahagatonu, neʼe mole puli te taʼiake ʼaia ka heʼeki hoko te fakaʼosi ʼi te taʼu 70 ʼo totatou temi.​—Mateo 24:​3-​14, 34.

ʼE tonu ke tou ʼui fakahagatonu, ki muʼa atu neʼe mole tou mahino ki te ʼu palalau ʼaia ʼa Sesu ʼaki tona faka ʼuhiga ʼaenī. ʼE ko he agamāhani ki te tagata agahala tana fia ʼiloʼi te temi totonu ʼaē ka hoko ai anai te fakaʼosi. Koutou manatuʼi, māʼia mo te kau ʼapositolo neʼe nātou fia maʼu he ʼu fakamahino totonu ʼi tanatou fehuʼi fēnei age: “ ʼAliki, ʼe ko te temi koa ʼaenī ka ke toe fakatuʼu ai te puleʼaga maʼa Iselaele?”​—Gāue 1:6.

ʼAki he fakamalotoloto feiā, neʼe faiga e te kau kaugana ʼa te ʼAtua ʼo totatou temi ke nātou fakaʼaogaʼi te meʼa ʼaē neʼe ʼui e Sesu ʼo ʼuhiga mo te “taʼiake” moʼo fai he ʼu fakamahino ʼo ʼuhiga mo he temi totonu, ʼo nātou lau talu mai te taʼu 1914. Ohage la, neʼe nātou manatu ko te taʼiake neʼe feala ke loaloaga ʼo taʼu 70 peʼe taʼu 80, pea neʼe tonu ke lalahi ake te hahaʼi ʼo te taʼu ʼaia ke feala hanatou mahino ki te faka ʼuhiga ʼo te ʼuluaki tau faka malamanei pea mo te tahi ʼu meʼa neʼe hoko; pea ʼaki te faʼahi ʼaia, ʼe feala leva ke tou lau peʼe kei tuai peʼe kua ōvi mai te temi ʼo te fakaʼosi.

Tatau aipe pe neʼe fakamalotoloto te fakakaukau ʼaia, kae neʼe ʼalutahi koa mo te tokoni ʼaē neʼe fai e Sesu ki muli age? Neʼe ʼui fēnei e Sesu: “Pea ki te ʼaho ʼaia mo te hola ʼaia, ʼe mole he tahi ʼe ina ʼiloʼi, pe ko te kau ʼaselo ʼo te lagi pe ko te ʼAlo, kaʼe gata pe ki te Tāmai. . . . Ke koutou nofo fakaonoono, heʼe mole koutou ʼiloʼi pe ko te ʼaho fea ʼaē ʼe haʼu ai tokotou ʼAliki.”​—Mateo 24:36-​42.

Koia ko te ʼu fakamahino foʼou ʼo Te Tule Leʼo ʼo ʼuhiga mo “te taʼiake ʼaia,” neʼe mole ina fetogi tatatou mahino ʼo ʼuhiga mo te meʼa ʼaē neʼe hoko ʼi te taʼu 1914. Kae neʼe nātou foaki mai kia tatou he fakamahino ʼe lelei age ki te fakaʼaogaʼi e Sesu te kupu “taʼiake,” ʼo tokoni mai kia tatou ke tou mahino ʼaē ko tana fakaʼaogaʼi te kupu “taʼiake,” ʼe mole ko he tafitoʼaga ʼaia, ke tou lau te ʼu taʼu ʼo kamata mai te taʼu 1914 pea mo lau peʼe kua ōvi mai te fakaʼosi.