ʼE Lava Feafeaʼi Hakotou Maʼu Te Fiafia Moʼoni?
ʼI TE kamata, neʼe tonu ke maʼuli fiafia te tagata. ʼE lava feafeaʼi hatatou ʼui te meʼa ʼaia? Koutou vakaʼi te kamata ʼo te hisitolia ʼo te tagata.
Neʼe fakatupu e Sehova ʼAtua te ʼuluaki taumatuʼa, ʼo ina faka fealagia kia nāua ke nā fakafiafia. Neʼe nonofo ia Atama pea mo Eva ʼi te palatiso, ʼi te ʼōloto fakafiafia ʼaē ko Eteni. Neʼe foaki age kia nāua e te Tupuʼaga ia meʼa fuli ʼaē neʼe ʼaoga ki tonā maʼuli fakasino. ʼI te ʼōloto, neʼe ʼi ai “te ʼu faʼahiga fuʼu ʼakau kehekehe ʼaē neʼe matalelei ki te sio pea mo lelei ki te kai.” (Senesi 2:9) Ko Atama mo Eva neʼe nā maʼuʼuli lelei, mo mālolohi, pea mo matalelei—neʼe nā haohaoa pea mo fiafia moʼoni.
Kae neʼe koteā te tupuʼaga moʼoni ʼo tanā fiafia? Neʼe ko tonā nofoʼaga faka palatiso koa, pe ko tonā ʼuhiga haohaoa ʼi te faʼahi fakasino? ʼE mahino ia, ko te ʼu meʼa ʼofa ʼaia mai te ʼAtua neʼe fakatupu fiafia ki tonā maʼuli. Kae ko tonā fiafia neʼe mole fakalogo pe ia ki te ʼu meʼa fakasino ʼaia. Ko te palatiso ʼo Eteni neʼe mole ko he ʼōloto matalelei pe ia. Neʼe ko he sagatualio, ko he potu neʼe feala ke nā tauhi ai ki te ʼAtua. Neʼe feala ke nā fiafia ʼo talu ai, mo kapau neʼe nā felogoi lelei tuʼumaʼu mo te Tupuʼaga pea mo ʼoʼofa kia te ia. Ke feala hanā fiafia, neʼe tonu ʼuluaki ke nā leleiʼia te ʼu meʼa fakalaumālie.—Vakaʼi ia Mateo 5:3.
Ko Te Tokaga Ki Te ʼu Meʼa Fakalaumālie ʼe Ina Taki Ki Te Fiafia
ʼI te kamata, neʼe felogoi ia Atama pea mo te ʼAtua ʼi te faʼahi fakalaumālie. Neʼe nā feʼofaʼaki, ohage pe ko te felogoi ʼa he tāmai pea mo tona foha. (Luka 3:38) ʼI te ʼōloto ʼo Eteni, neʼe lelei ʼaupito te ʼaluʼaga ʼo Atama mo Eva, ʼo feala ai kia nāua ke nā tauhi ki te ʼAtua. ʼAki tonā lotolelei, mo tonā ʼofa pea mo tanā fakalogo kia Sehova, neʼe nā vikiʼi pea mo faka kolōliaʼi te ʼAtua, ʼo lahi age ʼi te fakavikiviki ʼa te tahi ʼu meʼa maʼuli fakakelekele. ʼAki tonā loto katoa, neʼe feala ai tanā vikiʼi te ʼAtua ʼuhi ko tona ʼu kalitate taulekaleka pea mo lagolago ki tana pule faʼitaliha. Neʼe toe feala foki ke nā maʼu tuʼumaʼu te ʼofa pea mo te tokaga ʼa Sehova.
Ko te faʼahiga felogoi ʼaia mo te Tupuʼaga pea mo te fakalogo ki tana ʼu lao neʼe ina fakatupu te fiafia moʼoni ʼo te ʼuluaki taumatuʼa ʼaia. (Luka 11:28) Neʼe mole tonu ke tau mo Atama pea mo Eva he ʼu ʼahiʼahi lolotoga ni ʼu taʼu, ke feala ai hanā maʼu te puleʼaki ki te fiafia moʼoni. Neʼe nā fiafia talu mai te temi ʼaē neʼe fakatupu ai ia nāua. Neʼe nā fiafia ʼuhi ko tanā felogoi lelei mo Sehova pea mo tanā fakalogo ki tana takitaki.
Kae neʼe fakagata tonā fiafia ʼi te temi pe ʼaē neʼe nā talagataʼa ai ki te ʼAtua. ʼI tanā fai te faʼahi ʼaia, neʼe nā fakatupu kovi ki tanā ʼu felogoi fakalaumālie mo Sehova. Neʼe mole kei nā kaumeʼa mo te ʼAtua. (Senesi 3:17-19) ʼE fakahā mai ʼi te Tohi-Tapu, talu mai te temi ʼaē neʼe kapu ai nāua mai te ʼōloto, neʼe fakagata ai e Sehova tana ʼu felogoi mo nāua. Neʼe mole kei nā haohaoa, pea neʼe puli ai mo te ʼamanaki ʼaē ke nā maʼuʼuli ʼo heʼegata, pea mo te fealagia ʼaē ke nā nonofo ʼi te ʼōloto. (Senesi 3:23) Kae ko te meʼa ʼaē neʼe kovi tāfito, mai tona ʼuhiga ʼaē neʼe mole kei nā felogoi mo te ʼAtua, neʼe puli ai te fealagia ʼaē ke nā fiafia.
ʼE Feala Ke Tou Filifili
Ia muʼa ʼo tonā mamate, neʼe foaki e Atama pea mo Eva ki tonā hōloga ia te ʼu agaaga fuli ʼo te tagata, mo te leʼo ʼo loto ʼaē ʼe maʼu e te tagata fuli pe, pea mo te fealagia ʼaē ke nātou leleiʼia te ʼu meʼa fakalaumālie. Neʼe mole fakamālaloʼi te famili fakatagata, ke nātou liliu ohage ko te ʼu manu. Ko tatou fuli, ʼe feala ke tou toe felogoi lelei mo te Tupuʼaga. (2 Kolonito 5:18) ʼAki tonatou fealagia fakakaukau, ʼe feala ki te hahaʼi fuli ke nātou fili peʼe nātou fia fakalogo peʼe kailoa ki te ʼAtua. Hili kiai ni ʼu sēkulō, neʼe fakahā lelei te faʼahi ʼaia ʼi te temi ʼaē neʼe faka fealagia ai e Sehova ki te puleʼaga foʼou ʼo Iselaele ke nātou filifili te maʼuli pe ko te mate. ʼAki tona tagata fakafofoga ko Moisese, neʼe ʼui fēnei e te ʼAtua: “ ʼI te ʼaho nei, ʼe ʼau tuku ki ʼou muʼa ia te maʼuli pea mo te meʼa ʼaē ʼe lelei, mo te mate pea mo te meʼa ʼaē ʼe kovi.”—Teutalonome 30:15-18.
Māʼiape la mo te temi ʼaenī, ʼi te kua hili kiai taʼu ʼe lauʼi afe ʼi te temi ʼaē neʼe puli ai te Palatiso, ʼe kei feala kia tatou fuli ke tou filifili te meʼa ʼaē ʼe lelei. ʼE tou maʼu he leʼo ʼo loto pea mo te fealagia ʼaē ke tou fakalogo ki te ʼu lao ʼa te ʼAtua. ʼE talanoa te Tohi-Tapu ki totatou “ ʼuhigaʼi tagata ʼaē ʼi loto.” (2 Kolonito 4:16; Loma 7:22) Ko te kupuʼi palalau ʼaia ʼe ina faka ʼuhiga ki te fealagia ʼaē ʼe tou maʼu fuli, ko te ʼulugaaga ʼa Sehova, pea ke tou maʼu tana faʼahiga manatu, pea ke tou leleiʼia te ʼu meʼa fakalaumālie.
Neʼe tohi e te ʼapositolo ko Paulo ʼo ʼuhiga mo tatatou fia fai te ʼu meʼa ʼaē ʼe lelei pea mo totatou leʼo ʼo loto, ʼo ina ʼui fēnei: “Pea ko te hahaʼi pagani ʼe mole nātou maʼu te lao, kae nātou fai māhani ia meʼa ʼo te lao, ʼe nātou liliu ko te lao kia nātou pe, logo la ʼe mole nātou maʼu te lao. ʼE nātou fakaʼiloʼilo te gāue ʼa te lao kua tohi ʼi ʼonatou loto; ʼe fakamoʼoni kiai ʼonatou loto pea ʼe fevakaʼiʼaki te ʼu manatu ʼo valoki, pe ʼe nātou hāofaki.”—Loma 2:14, 15.
Ko Te Poto Fakaʼatua Pea Mo Te Fakalogo Kia Te Ia ʼe Ko Te Puleʼaki ʼAia Ki Te Fiafia
ʼE feala pe ke kita ʼui, ‘Kapau ʼe tou maʼu fuli te fealagia ʼaē ke tou fia tauhi ki te ʼAtua, ʼo tou maʼu ai te fiafia moʼoni, he koʼe kua mafola ʼaupito te lotomamahi?’ Koteʼuhi ke feala hatatou maʼu te fiafia, ʼe tonu kia tatou takitokotahi ke tou tuputupu ʼi te faʼahi fakalaumālie. Logope neʼe faʼu te tagata ki te paki ʼo te ʼAtua, kae kua fakamamaʼo ʼi tona Tupuʼaga. (Efesi 4:17, 18) Koia, ʼe tonu kia tatou takitokotahi ke tou fai he ʼu fakatuʼutuʼu ke tou maʼu pea mo taupau he ʼu felogoi fakalaumālie mo te ʼAtua. Ko te faʼahiga felogoi ʼaia ʼe mole ko he meʼa ʼe tupu feiā.
Neʼe fakahā e Sesu te ʼu pelesepeto e lua ʼe maʼuhiga ki te tuputupu ʼo te maʼuli fakalaumālie. Ko te ʼuluaki ʼe ko te ʼatamai mālama totonu ʼo ʼuhiga mo te ʼAtua, pea ko te tahi pelesepeto ʼe ko te fakalogo ki tona finegalo. (Soane 17:3) ʼI tana fakaʼaogaʼi te ʼu palalau ʼaē neʼe fai e te ʼAtua, neʼe ʼui fēnei e Sesu: “ ʼE tohi fēnei: ‘Ko te tagata ʼe mole tonu ke maʼuli ʼaki pe te pane, kaʼe ʼaki te folafola fuli pe ʼaē ʼe haʼu mai te gutu ʼo Sehova.’ ” (Mateo 4:4) ʼI te tahi lakaga, neʼe ʼui fēnei e Sesu: “Ko taku meʼa kai ʼe ko taku fai te finegalo ʼo ia ʼaē neʼe ina fekauʼi ʼau pea mo ʼau fakaʼosi tana gāue.” (Soane 4:34) ʼE mole tonu ke tou mamahi lolotoga ni ʼu taʼu ke tou maʼu ai te fiafia. Ko te poto ʼaē ʼe tupu ʼaki te ʼu ʼahiʼahi ʼaia, ʼe mole ko he puleʼaki ke tou maʼu ai te fiafia. Kae ko te poto fakaʼatua pea mo te fakalogo ki totatou Tupuʼaga, ʼe ko he ʼu fealagia ʼaia ke tou maʼu ai te fiafia moʼoni ʼi totatou maʼuli.—Pesalemo 19:7, 8; Tagata Tānaki 12:13.
ʼE hā lelei mai ai, ʼe mole faigataʼa fau te maʼu ʼo te fiafia ʼaē ʼe tupu ai te poto fakaʼatua pea mo te leleiʼia tatou e te ʼAtua. (Gāue 17:26, 27) ʼE feala ki te hahaʼi fuli ke nātou maʼu te ʼatamai mālama ʼo ʼuhiga mo Sehova pea mo tana fakatuʼutuʼu. ʼE lahi tokotahi te tufa ʼo te Tohi-Tapu ʼi te malamanei katoa, he kua tā te ʼu tohi ʼe lauʼi miliale ʼi te ʼu lea kehekehe. Ko te Tohi-Tapu, ʼe feala ke tokoni kia koutou ke koutou liliu ko he kaumeʼa ʼo te ʼAtua pea mo koutou fiafia moʼoni, heʼe ʼui fēnei e te Tohi-Tapu, “manuʼia te hahaʼi ʼaē ko tonatou ʼAtua ʼe ko Sehova!”—Pesalemo 144:15.
[Talanoa ʼo te pasina 6]
Ko Te ʼu Meʼa ʼAē ʼe Tonu Ke Koutou Fai Ke Koutou Maʼu Te Fiafia
1. Koutou leleiʼia pea mo maʼuliʼi te ʼu meʼa fakalaumālie. Neʼe ʼui fēnei e Sesu: “Manuʼia ia nātou ʼaē ʼe nātou fagono ki te folafola ʼa te ʼAtua pea nātou taupau!”—Luka 11:28.
2. Koutou ʼiloʼi papau, ko takotou maʼu ia te ʼofa ʼo Sehova ʼe maʼuhiga age ʼi te paʼaga pea mo te ʼu koloā. Neʼe tohi fēnei e Paulo: “ ʼIo, ʼe ko he matapuna fakatupu maʼu koloā taulekaleka te lotu, kia ia ʼaē ʼe fakafiafia ʼi te meʼa ʼe ina maʼu. . . . Kapau ʼe tou maʼu meʼa kai mo mutuʼi meʼa, ʼe tou feʼauga ʼi te ʼu meʼa ʼaia.”—1 Timoteo 6:6-8.
3. Koutou faiga ke koutou akoʼi tokotou leʼo ʼo loto ʼaki te Tohi-Tapu pea ke koutou fai ʼo mulimuli pe kiai.—Loma 2:14, 15.
4. Koutou fakatotonu ke koutou fakalogo kia Sehova ʼAtua, ʼo faka fealagia ai kia koutou ke koutou kau ʼi tana hahaʼi. Neʼe tohi fēnei e Tavite ʼi te temi muʼa: “Manuʼia te hahaʼi ʼaē ko tonatou ʼAtua ʼe ko Sehova!”—Pesalemo 144:15.
[Paki ʼo te pasina 7]
“Manuʼia ia nātou ʼaē ʼe nātou ʼiloʼi tonatou masiva fakalaumālie.”—Mateo 5:3