ʼE Hāo Anai Koa Takotou Gāue ʼi Te Afi?

“Ke vakaʼi e te tagata takitokotahi peʼe feafeaʼi tana fakatuʼu [ki te fakatafito].”​—1 Kolonito 3:​10.

1. Koteā te fakaʼamu ʼa te kau Kilisitiano agatonu ʼo ʼuhiga mo nātou ʼaē ka liliu anai ko he ʼu tisipulo?

KO HE taumatuʼa Kilisitiano ʼe nā sioʼi tanā kiʼi toe ʼaē neʼe hoki tupu. Ko te kaugā fai faka mafola ʼe ina sioʼi ia ia ʼaē ʼe ina fai tana ako, pea ʼe hā ʼi tona fofoga, tana holi mālohi ʼaē ke ina ʼiloʼi te moʼoni. Ko te tagata ʼāfea ʼe ina fai tana akonaki pea ʼe sio ʼi te fale fono ki he tahi ʼe foʼofoʼou mai ʼi te kokelekasio ʼe ina vakaʼi fakalelei te ʼu vaega faka Tohi-Tapu fuli. Ko te ʼu kaugana agatonu ʼaia ʼa Sehova ʼe nātou loto fiafia ʼaupito ʼi tanatou sio ki te ʼu hahaʼi ʼaia. Kae ʼe nātou feʼekeʼaki fuli ʼi tonatou loto, ‘ ʼE ʼofa anai koa te Kilisitiano ʼaia kia Sehova​—pea mo nofo agatonu kia te ia?’ ʼE mahino papau ia, ʼe mole ko te kau Kilisitiano fuli ʼaē ʼe nonofo agatonu, heʼe ko he meʼa ʼe tonu ke kita faiga mālohi kiai.

2. Neʼe fakamanatuʼi feafeaʼi e Paulo ki te kau Kilisitiano Hepeleo te maʼuhiga ʼo te faiakonaki, pea koteā te meʼa ʼaē ʼe tonu ke tou vakaʼi takitokotahi ʼo ʼuhiga mo te faʼahi ʼaia?

² Ko te ʼapositolo ko Paulo ʼaē neʼe faiva ʼi te faiakonaki, neʼe ina fakahā te maʼuhiga ʼo te gāue ʼaē ko te akoʼi pea mo te fai ʼo he ʼu tisipulo ʼi tana tohi fēnei: “Talu mai fualoa neʼe tonu ke koutou faiakonaki.” (Hepeleo 5:​12) Neʼe tuputupu māmālie ʼi te faʼahi fakalaumālie te kau Kilisitiano ʼaē neʼe faitohi ki ai, logola kua fualoa tanatou nonofo ʼi te moʼoni. Neʼe mole heʼeki feala ke nātou akoʼi te hahaʼi, kae neʼe tonu ke fakamanatuʼi age kia nātou te ʼu meʼa tāfito ʼo te moʼoni. Ia ʼaho nei, ʼe lelei ʼi ʼihi temi ke tou tahi vakavakaʼi peʼe feafeaʼi tatatou faiakonaki, ke tou ʼiloʼi ai peʼe lava feafeaʼi hatatou tuputupu ʼi te faʼahi ʼaia. ʼE feala ke hāofaki ai ni ʼu hahaʼi. Koteā ʼaē ʼe feala ke tou fai?

3. (a) Neʼe fakatatau kiteā e Paulo te fai ʼo he ʼu tisipulo faka Kilisitiano? (b) ʼI totatou ʼuhiga hahaʼi laga fale faka Kilisitiano, koteā te pilivilesio lahi ʼaē ʼe tou maʼu?

³ ʼI tana tahi lea fakatātā, neʼe fakatatau e Paulo te fai ʼo he ʼu tisipulo ki he laga fale. Neʼe ina kamata ʼaki te ʼu palalau ʼaenī: “Ko māua ko te ʼu kaugā gāue ʼa te ʼAtua. Ko koutou ko te gāueʼaga ʼa te ʼAtua ʼaē ʼe gāueʼi, te fale ʼo te ʼAtua.” (1 Kolonito 3:​9) Koia ʼe tou kau ki te gāue ʼaē ko te lagalaga ʼo te hahaʼi; ʼe tou tokoni kia nātou ke nātou liliu ko he ʼu tisipulo ʼa Kilisito. ʼE tou fai te faʼahi ʼaia ʼi totatou ʼuhiga kaugā gāue ʼo Ia ʼaē “neʼe ina laga te meʼa fuli pe.” (Hepeleo 3:4) ʼI pilivilesio lahi leva! Tou vakaʼi peʼe lava tokoni feafeaʼi kia tatou te tokoni ʼaē neʼe fai e Paulo ki te kau Kolonito, ke toe lahi age tatatou faiva ʼi te gāue faka mafola. ʼE tou vakaʼi tāfito anai tatatou “fakapotopoto ʼi te faiakonaki.”​—2 Timoteo 4:⁠2.

Tou Fakatuʼu He Fakatafito Lelei

4. (a) Neʼe koteā te maʼua ʼa Paulo ʼi te gāue faka Kilisitiano? (b) He koʼe ʼe feala ke tou ʼui, ko Sesu pea mo nātou ʼaē neʼe fakalogo ki ai neʼe nātou ʼiloʼi te maʼuhiga ʼo he ʼu fakatafito ʼe lelei?

⁴ Kapau ʼe kita loto ke mālohi tokita fale pea mo tologa, pea ʼe tonu ke mālohi te fakatuʼu ʼo tona ʼu fakatafito. Koia, neʼe tohi fēnei e Paulo: “ ʼO fai pe ki te ʼofa makehe ʼo te ʼAtua ʼaē neʼe foaki mai kia te ʼau, ohage ko he tagata takitaki gāue poto, neʼe ʼau fakatuʼu te fakatafito.” (1 Kolonito 3:​10) ʼI te tahi lea fakatātā feiā, neʼe talanoa ia Sesu Kilisito ki he ʼapi neʼe mole holo ʼi te afā koteʼuhi ko te tagata ʼaē neʼe ina laga te ʼapi ʼaia neʼe ina filifili he fakatafito mālohi. (Luka 6:​47-​49) Neʼe ʼiloʼi e Sesu ia meʼa fuli ʼo ʼuhiga mo te maʼuhiga ʼo te ʼu fakatafito. Neʼe gāue fakatahi mo Sehova ʼi te temi ʼaē neʼe ina fakatupu ai te kele.a (Tāʼaga Lea 8:​29-​31) Ko te hahaʼi ʼaē neʼe nātou fakalogo kia Sesu, neʼe nātou mahino mo nātou ki te maʼuhiga ʼaē ke lelei te ʼu fakatafito. Neʼe gata pe ki te ʼu ʼapi ʼaē neʼe lelei tonatou ʼu fakatafito, ʼaē neʼe lava tuʼu mālohi mokā hoko he ʼu lōmaki pea mo he ʼu mafuike ʼi Palesitina. Kae koteā te fakatafito ʼaē neʼe talanoa kiai ia Paulo?

5. Ko ai te fakatafito ʼo te kokelekasio faka Kilisitiano, pea neʼe fakakikite feafeaʼi te faʼahi ʼaia?

⁵ Neʼe tohi fēnei e Paulo: “ ʼE mole he tagata ʼe feala ke ina fakatuʼu he tahi fakatafito ʼi te fakatafito ʼaē kua ʼosi fakatuʼu, ʼaē ko Sesu Kilisito.” (1 Kolonito 3:​11) Neʼe mole ko te ʼuluaki tala ʼaia ko Sesu ʼe ko he fakatafito. ʼI tona fakahagatonu, neʼe fakakikite fēnei ia Isaia 28:16: “Koʼeni te meʼa ʼaē neʼe ʼui e te Tuʼi ʼAliki ko Sehova: ‘Koʼeni ʼe ʼau hili he maka ʼi Sione ko he fakatafito, ko he maka kua ʼahiʼahiʼi, ko te maka tāfito ʼo he fakatafito lelei.’ ” Kua fakatuʼutuʼu talu mai fualoa e Sehova ke liliu tona ʼAlo ko te fakatafito ʼo te kokelekasio faka Kilisitiano.​—Pesalemo 118:22; Efesi 2:​19-​22; 1 Petelo 2:​4-6.

6. Neʼe fakatuʼu feafeaʼi e Paulo he fakatafito lelei maʼa te kau Kilisitiano ʼo Kolonito?

⁶ Koteā koa te fakatafito ʼa te kau Kilisitiano takitokotahi? Ohage ko tona ʼui e Paulo, ʼe mole he tahi age fakatafito ʼa te hahaʼi Kilisitiano ʼi te fakatafito ʼaē ʼe tuku mai e te Folafola ʼa te ʼAtua​—ia Sesu Kilisito. ʼE mahino ia, neʼe fakatuʼu e Paulo te fakatafito ʼaia. ʼI Kolonito, ʼaē neʼe maʼuhiga ʼaupito ai te filosofia, neʼe mole faiga e Paulo ke ina fakalotoʼi te hahaʼi ʼaki he poto fakatagata. Kae neʼe faka mafola e Paulo ia “Kilisito ʼaē neʼe haʼi ki te pou,” kae neʼe faka ʼuhigaʼi e te ʼu puleʼaga tana logo ʼaia ʼe “ko he meʼa fakavale.” (1 Kolonito 1:​23) Neʼe tala e Paulo, ko Sesu ʼe ko te tagata ʼaē ʼe maʼuhiga tāfito ʼi te ʼu fakatuʼutuʼu ʼa Sehova.​—2 Kolonito 1:​20; Kolose 2:​2, 3.

7. Koteā ʼaē ʼe tou ako ʼo ʼuhiga mo Paulo ʼi tana ʼui ʼaē ko ia “ko he tagata takitaki gāue poto”?

⁷ ʼE fakatokagaʼi mai e Paulo, neʼe faiakonaki “ohage ko he tagata takitaki gāue poto.” Neʼe mole laupisi ʼi tana fai te ʼu palalau ʼaia. Kae neʼe ko hana fakamoʼoni pe ki te fealagia taulekaleka ʼaē neʼe foaki age e Sehova kia ia​—ke ina fakatuʼutuʼu peʼe ina takitaki te gāue. (1 Kolonito 12:⁠28) ʼE moʼoni, ʼe mole tou maʼu ia ʼaho nei te ʼu fealagia faka milakulo ʼaē neʼe foaki ki te kau Kilisitiano ʼo te ʼuluaki sēkulō. Tahi ʼaē, ʼe lagi tou manatu ʼe mole tou faʼa poto ʼi te faiakonaki. Kae ʼe tou poto ʼi te faʼahi ʼaia. Koutou fakakaukauʼi age muʼa te faʼahi ʼaenī: ʼE foaki mai e Sehova tona laumālie maʼoniʼoni moʼo tokoni kia tatou. (Vakaʼi ia Luka 12:11, 12.) Tahi ʼaē meʼa, ʼe tou maʼu te ʼofa ʼa Sehova pea mo te ʼatamai mālama ʼo ʼuhiga mo te ʼu akonaki tāfito ʼo tana Folafola. Ko te ʼu meʼa ʼaia ʼe ko he ʼu meʼa ʼofa taulekaleka ʼe feala ke tou fakaʼaogaʼi moʼo akoʼi te hahaʼi. Tou faiga ke tou fakaʼaogaʼi te ʼu meʼa ʼaia moʼo fakatuʼu ʼaki he ʼu fakatafito lelei.

8. ʼE lava feafeaʼi hatatou akoʼi te hahaʼi ke nātou fakaʼaogaʼi ia Kilisito ko hanatou fakatafito?

⁸ Ka tou ʼui ʼe ko Kilisito tatatou fakatafito, pea ʼe mole tou ʼui ko ia ko he kiʼi toe meamea ʼe takoto ʼi he kaiʼaga manu, peʼe ko he tahi ʼe kau ki he Tahitolu pea ʼe tatau mo Sehova. Kailoa, heʼe ko te ʼu akonaki ʼaia ʼe mole tuʼu ʼi te Tohi-Tapu, kae ʼe ko te fakatafito ʼa te kau Kilisitiano loi. Kae ʼe tou ʼui ko Kilisito ʼe ko te tagata ʼaē ʼe lahi tokotahi ʼi te ʼu temi fuli pe, pea neʼe ina foaki tona maʼuli haohaoa maʼa tatou, pea ʼi te temi nei, kua fakanofo ia ia e Sehova ke Hau ʼi selo. (Loma 5:8; Fakahā 11:15) Tahi ʼaē meʼa, ʼe tou uga te hahaʼi ʼaē ʼe nātou ako te Tohi-Tapu ke nātou haʼele ʼo mulimuli ki te ʼu tafuga vaʼe ʼa Sesu pea mo nātou faʼifaʼitakiʼi tona ʼu kalitate. (1 Petelo 2:​21) ʼE tou fakaʼamu ke malave moʼoni ki tonatou loto tanatou sio ʼaē ki te fakamalotoloto ʼa Sesu ʼi te minisitelio, mo tona finegaloʼofa ki te kau masiva pea mo nātou ʼaē ʼe maʼuʼuli taʼomia, mo tona manavaʼofa ki te kau agahala ʼaē neʼe lotomamahi ʼuhi ko tonatou agahala, pea mo tana lototoʼa ʼaupito ʼi te ʼu ʼahiʼahi. Ei, ko Sesu ʼe ko he fakatafito lelei ʼaupito. Kae koteā ʼaē ʼe tonu ke tou hilifaki kiai?

Tou Laga ʼAki He ʼu Meʼa Gāue Lelei

9. Logope la ko te gāue tāfito ʼa Paulo neʼe ko te fai ʼo he fakatafito, kae neʼe tokaga feafeaʼi kia nātou ʼaē neʼe nātou tali te moʼoni ʼaē neʼe ina akoʼi age kia nātou?

⁹ Neʼe tohi fēnei e Paulo: “Koia kapau ʼe fakatuʼu e he tahi ki te fakatafito ʼaia te aulo, te siliva, te ʼu maka maʼugataʼa, te ʼakau, te vao moamoa, te mohuku, pea ko te gāue ʼa te tagata takitokotahi ʼe hā anai ia, heʼe fakahā anai te gāue ʼaia e te ʼaho, koteʼuhi ʼe hā anai ia ʼaki te afi; pea ʼe ko te afi totonu ʼaia ʼe ina fakahā mai anai peʼe koteā te faʼahiga gāue ʼa te tagata takitokotahi.” (1 Kolonito 3:​12, 13) Koteā te faka ʼuhiga ʼo te ʼu palalau ʼaia ʼa Paulo? Koutou fakatokagaʼi te ʼaluʼaga ʼo Paulo. Ko tana gāue tāfito neʼe ko te fakatuʼu ʼo he ʼu fakatafito. ʼI tana ʼu folau faka misionea, neʼe feʼaluʼaki ʼi te ʼu kolo, ʼo faka mafola ai ki te tokolahi ʼaē neʼe mole heʼeki nātou logo ki he talanoa ʼo ʼuhiga mo Kilisito. (Loma 15:20) ʼI te tali ʼa te hahaʼi ia te moʼoni ʼaē neʼe ina fakahā, neʼe fakatuʼu ai he ʼu kokelekasio. Neʼe tokaga fakalelei ia Paulo ki te kau agatonu ʼaia. (2 Kolonito 11:28, 29) Kae moʼo fakahoko tana gāue, neʼe maʼua ke ina hoko atu tana ʼu folau. Koia, ʼi tana ʼosi fakatuʼu he fakatafito ʼi Kolonito lolotoga māhina e 18, neʼe mavae ke ʼalu ʼo fai faka mafola ʼi te tahi ʼu kolo. Kae neʼe kei holi mālohi ke ina ʼiloʼi pe neʼe feafeaʼi te hoko atu e te ʼu tēhina ia te gāue ʼaē neʼe ina fai ai.​—Gāue 18:​8-​11; 1 Kolonito 3:⁠6.

10, 11. (a) Neʼe fakahā feafeaʼi e Paulo te kehekehe ʼo te ʼu meʼa gāue ʼaē ʼe fakaʼaogaʼi ki te laga ʼo he fale? (b) Koteā te ʼu faʼahiga meʼa gāue ʼaē neʼe maʼu ʼi Kolonito? (c) Koteā te ʼu fale ʼaē ʼe feala ke vela gataʼa, pea koteā te ʼaoga ʼo te faʼahi ʼaia ki te kau Kilisitiano ʼaē ʼe nātou fai he ʼu tisipulo?

¹⁰ ʼE hā mai, neʼe mole lelei te gāue ʼaē neʼe fai e ʼihi ʼi tanatou laga ki te fakatafito ʼaē neʼe tuku e Paulo ʼi Kolonito. Moʼo fakamahino kia nātou te fihifihia ʼaia, ʼe fakahā e Paulo te kehekehe ʼo te ʼu faʼahiga meʼa gāue e lua: te aulo, mo te siliva, pea mo te ʼu maka maʼugataʼa; pea ʼi te tahi faʼahi, te ʼakau, mo te vao moamoa, pea mo te mohuku. Ko he fale ʼe feala ke laga ʼaki he ʼu meʼa gāue lelei, mo tologa, pea mo vela gataʼa; peʼe feala ke laga fakavilivili ʼaki he ʼu meʼa gāue ʼe faka temi pe pea mo ulo gafua. ʼE mahino ia, ko te kolo lahi ʼo Kolonito neʼe maʼu ai te ʼu faʼahiga faʼu fale ʼaia e lua. Neʼe ʼi ai te ʼu fale lotu lalahi neʼe fai ʼaki te ʼu foʼi maka lalahi, pea neʼe lagi ʼaofi peʼe teuteuʼi ʼaki te aulo pea mo te siliva.b Ko te ʼu fale mālohi ʼaia neʼe lagi matamatalelei age ʼi te ʼu kiʼi fale lau ʼaē neʼe laga ʼi ʼona tafa, pea mo te ʼu kiʼi fale fakatau ʼo te lapalasi fakatauʼaga meʼa ʼaē neʼe faʼu papa pea mo ʼaofi ʼaki te mohuku.

¹¹ Koteā ʼaē ʼe feala ke hoko ki te ʼu fale ʼaia mokā vela? Ko te meʼa ʼaē neʼe feala ke hoko ʼi te temi ʼo Paulo ʼe tatau ʼosi mo te meʼa ʼaē ʼe feala ke hoko ʼi te temi ʼaenī. ʼI tona fakahagatonu, ko te kolo ʼo Kolonito neʼe ʼohofiʼi pea mo tutu katoa e te Senelale Loma ko Mummius ʼi te taʼu 146 ʼi muʼa ʼo totatou temi. ʼE mahino ia, neʼe lahi ai te maumau ʼo te ʼu fale papa, pe ko te ʼu fale ʼaē neʼe faʼu ʼaki te mohuku, pe ko te vao moamoa. Kae e feafeaʼi ʼo ʼuhiga mo te ʼu fale mālohi ʼaē neʼe faʼu maka pea neʼe teuteuʼi ʼaki te aulo pea mo te siliva? ʼE mahino papau ia, neʼe haohaoa pe te ʼu fale ʼaia. Ko te kau ako ʼa Paulo ʼi Kolonito, neʼe lagi nātou fakalaka ia tafa ʼo te ʼu fale ʼaia ʼi te ʼaho fuli​—ko te ʼu fale lalahi ʼaia ʼaē neʼe hāo ʼi te ʼu tuʼutāmaki lalahi ʼaē neʼe maumau ai te ʼu kiʼi fale ʼaē neʼe mole mālohi. Koia, neʼe lelei ʼaupito te faʼifaʼitaki ʼaē neʼe fakaʼaogaʼi e Paulo! Ka tou akoʼi te hahaʼi, pea ʼe tonu ke tou manatuʼi, ko tatou ko he kau laga fale. ʼE tou fia fakaʼaogaʼi he ʼu meʼa gāue ʼe lelei ʼaupito pea mo tologa. Kapau ʼe tou fai te faʼahi ʼaia, pea ʼe tologa anai te gāue ʼaē neʼe fai. Koteā koa te ʼu meʼa gāue ʼaia ʼaē ʼe tologa, pea he koʼe ʼe maʼuhiga ʼaupito ke tou fakaʼaogaʼi?

ʼE Hāo Anai Koa Takotou Gāue ʼi Te Afi?

12. He koʼe neʼe mole lelei te gāue ʼaē neʼe fakahoko e te kau Kilisitiano ʼo Kolonito?

¹² ʼE hā lelei mai, neʼe mahino kia Paulo ko te gāue ʼa ʼihi kau Kilisitiano ʼi Kolonito neʼe mole lelei. Koteā te meʼa ʼaē neʼe hoko? Ohage ko tona fakahā e te ʼu kapite ʼi muʼa atu, neʼe hoko te ʼu maveuveu ʼi te kokelekasio, pea neʼe nātou faka maʼuhigaʼi he ʼu tagata logope la neʼe feala ke fakatupu kovi ki te logo tahi ʼo te kokelekasio. Neʼe ʼui e ʼihi, “ ʼE ʼau kau mo Paulo,” kae ʼui e ʼihi, “ ʼE ʼau kau mo Apolose.” ʼE hā lelei mai, ko ʼihi neʼe fialahi ʼuhi ko tanatou poto. Koia neʼe tupu ʼaki ai hanatou ʼu manatu fakatagata, mo tanatou ʼu aga fakavale ʼi te faʼahi fakalaumālie, pea mo hanatou “femahekaʼaki pea mo [hanatou] fefihiʼaki.” (1 Kolonito 1:​12; 3:​1-4, 18) Ko te ʼu manatu ʼaia neʼe lagi hā ʼi te ʼu akonaki ʼaē neʼe fai ʼi te kokelekasio pea mo tanatou fai faka mafola. Neʼe tupu ai he gāue fai faka mafola neʼe mole lelei, ohage ko te laga ʼo he fale ʼaki he ʼu meʼa gāue ʼe mole lelei. ʼE mole hāo anai te gāue ʼaia ʼi te “afi.” Koteā koa te afi ʼaē neʼe talanoa kiai ia Paulo?

13. Koteā te faka ʼuhiga ʼo te afi ʼi te lea fakatātā ʼa Paulo, pea koteā te meʼa ʼaē ʼe tonu ke mahino kiai te kau Kilisitiano fuli?

¹³ ʼI totatou maʼuli, ʼe ʼi ai te faʼahiga afi ʼe tonu ke tou tauʼi fuli​—ʼe ko te ʼu ʼahiʼahiʼi ʼo tatatou tui. (Soane 15:20; Sake 1:​2, 3) Neʼe tonu ke mahino ki te kau Kilisitiano ʼo Kolonito, pea ʼe tonu ke toe mahino foki kia tatou ʼi te temi ʼaenī, ʼe ʼahiʼahiʼi moʼoni anai ia nātou fuli ʼaē ʼe tou akoʼi age kia nātou te moʼoni. Kapau ʼe mole lelei tatatou fai ʼo te ako, pea ʼe feala ke hoko ai he ʼu tuʼutāmaki. Neʼe fai e Paulo te fakatokaga ʼaenī: “Kapau ko te gāue ʼa he tahi neʼe ina laga kiai, ʼe tuʼu maʼu, pea ʼe ina maʼu anai he fakapale; kapau ko te gāue ʼa he tahi ʼe vela, pea ʼe puli anai kia ia; kae ko ia totonu ʼe hāo anai ia, ohage ko he tahi neʼe fakalaka ʼi te afi.”c​—1 Kolonito 3:​14, 15.

14. (a) ʼE lava “puli” feafeaʼi te ʼu meʼa ʼa te kau Kilisitiano ʼaē ʼe nātou fai he ʼu tisipulo, kae ʼe lava feafeaʼi hanatou hāo ʼi te afi? (b) Koteā te meʼa ʼaē ʼe feala ke tou fai ke ʼaua naʼa puli hatatou meʼa?

¹⁴ ʼE ko he ʼu palalau maʼuhiga ʼaia! ʼE feala ke fakatupu lotomamahi kia tatou te gāue kinakina ʼaē neʼe tou fai moʼo tokoni ki he tahi ke liliu ko he tisipulo, pea higa te tisipulo ʼaia ki te agahala peʼe fakatagaʼi ia ia, pea mavae ʼi te moʼoni. ʼE fakamoʼoni ia Paulo ki te faʼahi ʼaia ʼi tana ʼui ʼaē ʼe puli hatatou meʼa maʼuhiga mokā hoko he ʼu meʼa feiā. ʼI te faigataʼa ʼo te ʼaluʼaga ʼaia, ʼe feala ke tou ʼui ʼe hāofaki tatou ʼi tatatou “fakalaka ʼi te afi”​—ohage ko he tagata neʼe puli ʼana meʼa fuli ʼi te afi kae hāo ia. Kae koteā te meʼa ʼaē ʼe feala ke tou fai ke ʼaua naʼa puli hatatou meʼa? Tou laga ʼaki he ʼu meʼa gāue ʼe tologa! Kapau ʼe tou akoʼi te moʼoni ki te hahaʼi ke malave ki tonatou loto, ʼo tou uga nātou ke nātou faka maʼuhigaʼi te ʼu kalitate faka Kilisitiano ohage ko te poto, mo te fakasiosio poto, mo te manavasiʼi ʼaē kia Sehova, mo te tui moʼoni, pea ʼe feala ke tou ʼui ʼe tou laga ʼaki he ʼu meʼa gāue ʼe tologa pea mo vela gataʼa. (Pesalemo 19:​9, 10; Tāʼaga Lea 3:​13-​15; 1 Petelo 1:​6, 7) Ko nātou ʼaē ʼe nātou maʼu te ʼu kalitate ʼaia ʼe nātou haga fai anai te finegalo ʼa te ʼAtua; kua nātou maʼu te ʼamanaki ʼaē ke nātou maʼuli ʼo heʼegata. (1 Soane 2:​17) Kae ʼe lava feafeaʼi hatatou fakaʼaogaʼi te faʼifaʼitaki ʼaē ʼe tuku mai e Paulo? Tou vakaʼi he ʼu faʼifaʼitaki.

15. Koteā ʼaē ʼe feala ke tou fai ke lelei ai tatatou gāue ʼaē ko te akoʼi ʼo te hahaʼi?

¹⁵ Ka tou ako mo te hahaʼi, pea ʼe tonu ke tou faka maʼuhigaʼi tāfito ia Sehova ʼAtua ka mole ko te tagata. ʼE mole tou fakatuʼutuʼu ke nātou manatu, ʼe ko tatou ʼaē ʼe poto. ʼE tou loto ke nātou kumi tokoni kia Sehova, mo tana Folafola, pea mo tana kautahi. Moʼo fai te faʼahi ʼaia, ʼe mole tou tali anai ki tanatou ʼu fehuʼi ʼaki tatatou ʼu manatu ʼa tatou totonu. Kae ʼe tou akoʼi anai kia nātou peʼe feafeaʼi te maʼu ʼo he ʼu tali, ʼo tou fakaʼaogaʼi te Tohi-Tapu pea mo te ʼu tohi ʼaē neʼe foaki mai e “te tagata kaugana agatonu mo poto.” (Mateo 24:​45-​47) Tahi ʼaē meʼa, ʼe tou faiga anai ke ʼaua naʼa tou puipui fau ia nātou ʼaē ʼe tou fai hanatou ako Tohi-Tapu. ʼE mole tou ʼita anai mo kapau ʼe ʼi ai ʼihi ʼe fia fai palalau mo nātou, kae ʼe tou fakaloto mālohiʼi anai nātou ke nātou “faka fālahi” tanatou ʼofa ki ʼihi, ʼo nātou feʼiloʼiʼaki mo te tokolahi ʼi te kokelekasio.​—2 Kolonito 6:​12, 13.

16. ʼE lava laga feafeaʼi te kau tagata ʼāfea ʼaki he ʼu meʼa gāue ʼe vela gataʼa?

¹⁶ ʼE toe ʼaoga foki te kau tagata ʼāfea ki te lagalaga ʼo te ʼu tisipulo foʼou. Ka nātou faiakonaki ki te kokelekasio, ʼe nātou faiga anai ke nātou laga ʼaki he ʼu meʼa gāue ʼe vela gataʼa. Ko tanatou ʼu fealagia ʼi te faiakonaki, mo tanatou poto, pea mo tonatou ʼulugaaga ʼe feala ke kehekehe ʼaupito, kae ʼe mole nātou fakaʼaogaʼi te ʼu kehekehe ʼaia moʼo uga te hahaʼi ke nātou mulimuli ia nātou. (Vakaʼi ia Gāue 20:​29, 30.) ʼE mole tou ʼiloʼi papau pe koʼe neʼe ʼui e ʼihi ʼi Kolonito, “ ʼE ʼau kau mo Paulo” pea “ ʼE ʼau kau mo Apolose.” Kae ʼe feala hatatou ʼui papau, ko te ʼu tagata ʼāfea agatonu ʼaia e lua neʼe mole nā loto ke fai te taʼi manatu fakatupu maveuveu ʼaia. Neʼe mole leleiʼia e Paulo te ʼu fakavikiviki ʼaia; kae neʼe fakafeagai mālohi kiai. (1 Kolonito 3:​5-7) ʼO toe feiā aipe ia ʼaho nei, ʼe manatuʼi e te kau tagata ʼāfea ʼe nātou fafaga “te faga ōvi ʼa te ʼAtua.” (1 Petelo 5:⁠2) Ko te faga ōvi ʼaia ʼe mole ʼa he tagata. Koia ʼe fakafeagai mālohi te kau tagata ʼāfea kia ia ʼaē ʼe ina fia puleʼi te faga ōvi peʼe ko te kolesi ʼa te kau tagata ʼāfea. Ka gāue te kau tagata ʼāfea agavaivai ʼaki te holi ʼaē ke nātou tauhi te kokelekasio, mo nātou fakalave te moʼoni ki te loto ʼa te hahaʼi, pea mo tokoni ki te faga ōvi ke nātou tauhi kia Sehova ʼaki tonatou loto katoa, pea ʼe nātou laga ʼaki he ʼu meʼa gāue ʼe vela gataʼa.

17. Koteā ʼaē ʼe fakaʼamu kiai e te ʼu mātuʼa Kilisitiano ʼi tanatou lagalaga tanatou fānau ʼaki he ʼu meʼa gāue ʼe vela gataʼa?

¹⁷ ʼE toe maʼuhiga foki te faʼahi ʼaia ki te ʼu mātuʼa Kilisitiano. ʼE nātou fakaʼamu mālohi ke maʼuʼuli tanatou fānau ʼo heʼegata! Ko te tupuʼaga la ʼaia ʼo tanatou gāue kinakina moʼo “akoʼi” te ʼu pelesepeto ʼo te Folafola ʼa te ʼAtua ki tanatou fānau. (Teutalonome 6:​6, 7) ʼE nātou loto ke ʼiloʼi e tanatou fānau ia te moʼoni, pea ke ʼaua naʼa nātou manatu ʼe ko he tuʼuga lekula peʼe ko he tuʼuga akonaki ʼe tonu ke nātou ako, kae ʼaki te moʼoni ʼe feala ke nātou maʼuli fiafia ai, pea mo nātou maʼu ai he ʼu tapuakina. (1 Timoteo 1:​11) Ke feala hanatou lagalaga tanatou fānau ke nātou liliu ko he ʼu tisipulo agatonu ʼa Kilisito, ʼe loto e te ʼu mātuʼa agaʼofa ke nātou fakaʼaogaʼi he ʼu meʼa gāue ʼe vela gataʼa. ʼE nātou gāue fakatahi mo tanatou fānau ʼaki he loto faʼa kātaki, ʼo tokoni kia nātou ke nātou tekeʼi te ʼu aga ʼaē ʼe fehiʼa kiai ia Sehova, pea ke nātou gāueʼi te ʼu kalitate ʼaē ʼe ina leleiʼia.​—Kalate 5:​22, 23.

Ko Ai ʼAē ʼe Hala?

18. Ka līaki e he tisipulo te moʼoni, he koʼe ʼe mole feala hatatou ʼui ʼe ko te hala ʼa ia ʼaē neʼe ina fai tana ako?

¹⁸ ʼI tatatou ʼosi vakaʼi te ʼu manatu ʼaia, ʼe tonu ke tou lagaʼi ai te fehuʼi maʼuhiga. Kapau ko he tahi neʼe tou tokoni fakamalotoloto ki ai ʼe mavae ʼi te moʼoni, ʼe faka ʼuhiga koa neʼe mole lelei tatatou fai te ako​—pe neʼe tou laga ʼaki he ʼu meʼa gāue neʼe mole lelei? Kailoa, ʼe mole feiā tuʼumaʼu. Ko te ʼu palalau ʼaē neʼe fai e Paulo ʼe ko he fakamanatu kia tatou, ko te fai ʼo he ʼu tisipulo ʼe ko he maʼua maʼuhiga. ʼE tou loto ke tou fai ia meʼa fuli moʼo fakahoko he gāue lelei. Kae ʼe mole ʼui mai e te Tohi-Tapu, ʼe ko tatou pe ʼaē ʼe hala kapau ko nātou ʼaē neʼe tou tokoni ki ai ʼe nātou mavae ʼi te moʼoni. ʼE ʼi ai te tahi ʼu faʼahi ʼe pipiki ki tatatou lagalaga te ʼu tisipulo. Ohage la, koutou fakatokagaʼi te meʼa ʼaē ʼe ʼui e Paulo ʼo ʼuhiga mo te tagata faiako ʼaē neʼe mole lelei tana gāue: “ ʼE puli anai kia ia, kae ko ia totonu ʼe hāo anai ia.” (1 Kolonito 3:​15) Kapau ʼe hāo te tagata faiako ʼaia, kae “vela” ʼi te ʼahiʼahi ʼo te afi te ʼuhiga Kilisitiano ʼo ia ʼaē neʼe ina akoʼi, pea ko ai ʼaē ʼe hala? ʼE mahino papau ia kia Sehova, ʼe ko ia ʼaē ʼe ako ʼaē ʼe tonu ke ina vakaʼi peʼe fia nofo agatonu peʼe kailoa.

19. Koteā ʼaē ka tou vakaʼi anai ʼi te alatike ʼaē ka hoa mai?

¹⁹ Ko totatou ʼu maʼua takitokotahi ʼe maʼuhiga ʼaupito kia tatou, heʼe malave ki totatou maʼuli takitokotahi. Kae koteā te manatu ʼa te Tohi-Tapu ʼo ʼuhiga mo te faʼahi ʼaia? ʼE tou vakaʼi anai te faʼahi ʼaia ʼi te alatike ʼaē ka hoa mai.

[Nota ʼi te lalo pasina]

ʼE Koutou Tali Feafeaʼi Anai?

◻ Koteā te “fakatafito” maʼa te kau Kilisitiano moʼoni, pea e feafeaʼi tona fai?

◻ Koteā ʼaē ʼe tou ako mai te ʼu faʼahiga meʼa gāue kehekehe ʼaē ʼe fakaʼaogaʼi ki he laga fale?

◻ Koteā te faka ʼuhiga ʼo te afi, pea ʼe feala ke “puli” feafeaʼi te ʼu meʼa ʼa ʼihi?

◻ ʼE lava laga feafeaʼi e te ʼu faiako Tohi-Tapu, mo te ʼu tagata ʼāfea, pea mo te ʼu mātuʼa ʼaki he ʼu meʼa gāue ʼe vela gataʼa?

[Paki ʼo te pasina 9]

ʼE lahi te ʼu kolo ʼāfea neʼe maʼu ai he ʼu fale mālohi neʼe faʼu maka, pea neʼe fetafaiʼaki mo te ʼu kiʼi fale maumau gafua