Tatatou Kamata Haʼele Mo Te ʼAtua
“Koutou fakaōvi ki te ʼAtua pea ʼe fakaōvi atu anai kia koutou.”—Sake 4:8.
1, 2. He koʼe koa ʼe feala hatatou ʼui ʼe ko he pilivilesio lahi tatatou tauhi kia Sehova?
NEʼE maʼuli mamahi te tagata ʼi te fale pilisoni lolotoga ni ʼu taʼu. Pea neʼe fakatotonu age ke ʼalu kia muʼa ʼo te pule ʼo te fenua. Neʼe fetogi vave tona ʼaluʼaga. Fokifā pe pea liliu te tagata pilisoni ʼaia ko te kaugana ʼo te hau ʼaē neʼe mālohi tokotahi ʼi te mālama ʼo te temi ʼaia. Neʼe tuku age ki te tagata ʼaia ʼaē neʼe pilisoni ki muʼa atu te ʼu gāue lahi, pea neʼe faka maʼuhigaʼi ia ia. ʼI te temi nei, ko Sosefo—te tagata ʼaē neʼe seiniʼi ʼona vaʼe ki muʼa atu—neʼe haʼele fakatahi mo te hau!—Senesi 41:14, 39-43; Pesalemo 105:17, 18.
2 Ia ʼaho nei, ʼe maʼu e te hahaʼi te fealagia ʼaē ke nātou tauhi ki he tahi ʼe lahi age ʼi te Falaone ʼo Esipito. Ko te Māʼoluga ʼo te ʼatulaulau ʼe ina fakaafe te hahaʼi fuli ke nātou tauhi kia te ia. ʼE ko he pilivilesio makehe ʼaia hatatou felogoi mo Sehova, te ʼAtua māfimāfi! ʼI te Tohi-Tapu, ʼe fakapipiki ki te ʼAtua te pule fakaʼaliʼaliki, mo te taulekaleka, pea mo te tokalelei. (Esekiele 1:26-28; Fakahā 4:1-3) ʼE hā tona ʼofa ʼi tana ʼu aga fuli. (1 Soane 4:8) ʼE mole loi. (Faka au 23:19) Pea ʼe mole he temi ʼe fakatupu lotomamahi ai e Sehova te hahaʼi ʼaē ʼe nātou tauhi agatonu kia te ia. (Pesalemo 18:25) Kapau ʼe tou mulimuli ki tana ʼu fakatotonu faitotonu, pea ʼe feala anai ke tou maʼuli fiafia, pea ke ʼi ai he ʼuhiga ʼo totatou maʼuli pea mo hatatou ʼamanaki ki te maʼuli heʼegata. (Soane 17:3) ʼE mole he tagata pule ʼe feala ke ina foaki mai te ʼu tapuakina pea mo te ʼu pilivilesio ʼaia.
3. Koteā te faka ʼuhiga ʼo te ʼui ʼaē ‘neʼe haʼele ia Noe mo te ʼAtua moʼoni’?
3 Kua fualoa ki muʼa atu, neʼe fakatotonu e te pateliaka ko Noe ke mulimuli ki te finegalo ʼo te ʼAtua pea mo tana fakatuʼutuʼu. ʼO ʼuhiga mo ia, ʼe ʼui fēnei e te Tohi-Tapu: “Ko Noe neʼe ko te tagata faitotonu. Neʼe heʼe mele ʼi te lotolotoiga ʼo te ʼu hahaʼi ʼo tona temi. Neʼe haʼele ia Noe mo te ʼAtua moʼoni.” (Senesi 6:9) ʼE mahino ia, neʼe mole haʼele moʼoni ia Noe mo Sehova, mai tona ʼuhiga ʼaē ʼe “mole heʼeki ʼi ai he tagata kua sio ki te ʼAtua.” (Soane 1:18) Kae neʼe haʼele ia Noe mo te ʼAtua ʼi tona ʼuhiga ʼaē, neʼe mulimuli ki te ʼu meʼa fuli ʼaē neʼe fakatotonu age e te ʼAtua. Mai tona ʼuhiga ʼaē neʼe foaki e Noe tona maʼuli moʼo fakahoko te finegalo ʼo Sehova, koia neʼe fakaōvi ai ki te ʼAtua Māfimāfi pea neʼe nā felogoi lelei. Ohage ko Noe, ko te toko lauʼi miliona hahaʼi ʼi te temi nei ʼe nātou ‘haʼele mo te ʼAtua’ heʼe nātou mulimuli ki te takitaki pea mo te tokoni ʼa Sehova. ʼE lava feafeaʼi ki he tahi ke ina kamata te taʼi faʼahiga maʼuli ʼaia?
ʼE Maʼuhiga Tāfito Te ʼAtamai Mālama Totonu
4. ʼE akoʼi feafeaʼi e Sehova tana hahaʼi?
4 Ke feala hatatou haʼele mo Sehova, ʼe tonu muʼa ke tou ʼiloʼi ia ia. Neʼe fakakikite fēnei e te polofeta ko Isaia: “ ʼE hoko moʼoni anai, ʼi te temi fakaʼosi ʼo te ʼu ʼaho, ko te moʼuga ʼo te fale ʼo Sehova ʼe tuʼu mālohi anai ʼi te ʼu fuga moʼuga, pea ʼe māʼoluga age anai ʼi te ʼu kiʼi moʼuga; pea ʼe tonu anai ke ʼōmai kiai te ʼu fenua fuli. Pea ʼe mahino papau ia ko te tokolahi ʼo te hahaʼi ʼe nātou ʼolo anai pea mo ʼui maʼa nātou: ‘Koutou ʼōmai pea ke tou hake ki te moʼuga ʼo Sehova, ki te fale ʼo te ʼAtua ʼo Sakopo; pea ʼe ina akoʼi anai kia tatou tona ʼu ala, pea ʼe tou haʼele anai ʼi tona ʼu ala foufou.’ Heʼe haʼu anai mai Sione te lao, pea mai Selusalemi te folafola ʼa Sehova.” (Isaia 2:2, 3) Ei, ʼe feala ke tou falala ʼe akoʼi anai e Sehova ia nātou fuli ʼaē ʼe faiga ke nātou haʼele ʼi tona ʼu ala. Neʼe tuku mai e Sehova tana Folafola, te Tohi-Tapu, pea ʼe tokoni mai ke tou mahino kiai, ohage la, ʼaki tana “tagata kaugana agatonu mo poto.” (Mateo 24:45-47) ʼE fakaʼaogaʼi e Sehova te ‘tagata kaugana agatonu’ moʼo foaki mai te takitaki fakalaumālie ʼaki te ʼu tohi faka Tohi-Tapu, mo te ʼu fono, pea mo te fakatuʼutuʼu ʼo te ʼu ako Tohi-Tapu ʼaē ʼe fai ʼi te ʼu ʼapi. Tahi ʼaē meʼa, ʼaki tona laumālie maʼoniʼoni ʼe tokoni te ʼAtua ki tana hahaʼi ke nātou mahino ki tana Folafola.—1 Kolonito 2:10-16.
5. He koʼe koa ʼe maʼuhiga te moʼoni faka Tohi-Tapu?
5 Logope la ʼe mole tou totogi te moʼoni faka Tohi-Tapu, kae ʼe ko he meʼa maʼuhiga. ʼI tatatou ako te Folafola ʼa te ʼAtua, ʼe tou ʼiloʼi ai te ʼAtua totonu—tona huafa, mo tona ʼulugaaga, mo tana fakatuʼutuʼu pea mo tana aga ki te hahaʼi. Tahi ʼaē meʼa ʼe ina faka ʼāteaina tatou mai te fakapōʼuli, heʼe tou maʼu ai te ʼu tali ki te ʼu fehuʼi tāfito ʼo ʼuhiga mo te maʼuli: He koʼe koa ʼe tou ʼi te kele? He koʼe koa ʼe fakagafua e te ʼAtua te mamahi? Koteā anai te ka haʼu? He koʼe koa ʼe tou liliu ʼo matutuʼa pea mo tou mamate? ʼE hoko atu koa te maʼuli ʼi te hili ʼo te mate? Tahi ʼaē meʼa, ʼe tou ako ai pe koteā te finegalo ʼo te ʼAtua ʼo ʼuhiga mo tatou, ko tona faka ʼuhiga, ʼe tou ako ke tou ʼiloʼi peʼe tonu ke tou haʼele feafeaʼi ke ina leleiʼia tatou. ʼI tatatou ako, ʼe tou fakatokagaʼi ai ʼe fakapotopoto te ʼu meʼa ʼaē ʼe ina fakamaʼua mai ke tou fai, pea kapau ʼe tou mulimuli kiai pea ʼe tou maʼu ai te ʼu fua lelei. Kanapaula neʼe mole akoʼi mai e te ʼAtua te ʼu meʼa ʼaia, kanaʼauala neʼe mole tou lava mahino kiai.
6. Koteā te faʼahiga haʼele ʼaē ʼe feala ke tou maʼu ʼaki te ʼatamai mālama totonu ʼo te Tohi-Tapu?
6 Ko te moʼoni faka Tohi-Tapu ʼe mālohi pea ʼe ina uga tatou ke tou fetogi totatou maʼuli. (Hepeleo 4:12) ʼI muʼa ʼo tatatou maʼu te ʼatamai mālama ʼo ʼuhiga mo te Tohi-Tapu, neʼe tou haʼele “ ʼo mulimuli ki te tuʼu ʼo te ʼu faʼahiga meʼa ʼaenī.” (Efesi 2:2) Kae ko te ʼatamai mālama totonu ʼo te Folafola ʼa te ʼAtua, ʼe ina foaki mai he takitaki ʼe ina fetogi tatatou faʼahiga haʼele ke feala ai hatatou “haʼele ʼi he ʼaluʼaga ʼe tau mo feʼauga mo Sehova ke ina leleiʼia ʼaupito tatou.” (Kolose 1:10) ʼI meʼa fakafiafia hatatou kamata haʼele mo Sehova, ia Ia ʼaē ʼe taulekaleka tokotahi ʼi te ʼatulaulau!—Luka 11:28.
Ko Meʼa Maʼuhiga e Lua—Te Foaki ʼo Tokita Maʼuli Pea Mo Te Papitema
7. ʼI tatatou ako te Folafola ʼa te ʼAtua, koteā te moʼoni ʼaē ʼe hā lelei ʼo ʼuhiga mo te takitaki ʼa te tagata?
7 Ka tuputupu tatatou mahino ki te Tohi-Tapu, pea ʼe tou kamata vakaʼi te fakaʼaluʼalu ʼo te malamanei pea mo totatou maʼuli ʼaki te mālama fakalaumālie ʼo te Folafola ʼa te ʼAtua. Pea ʼe hā lelei ai te moʼoni maʼuhiga. ʼE ko te meʼa ʼaē neʼe fakahā e te polofeta ko Selemia kua fualoa ki muʼa atu, ʼi tana ʼui fēnei: “ ʼE ʼau ʼiloʼi lelei pe, Ê Sehova, ko te tagata ʼaē neʼe toʼo mai te kele ʼe mole ʼa ia tona ala. ʼE mole ʼa te tagata ʼaē ʼe haʼele te takitaki ʼo tana haʼele.” (Selemia 10:23) Ko te takitaki ʼa te ʼAtua ʼe ʼaoga ki te hahaʼi—ei kia tatou fuli.
8. (a) Koteā ʼaē ʼe ina uga te hahaʼi ke nātou foaki tonatou maʼuli ki te ʼAtua? (b) Koteā te faka ʼuhiga ʼo te foaki ʼo tokita maʼuli ki te ʼAtua?
8 Kapau ʼe tou mahino ki te faʼahi maʼuhiga ʼaia, pea ʼe ina uga anai tatou ke tou kumi te takitaki ʼa Sehova. Pea ko te ʼofa ki te ʼAtua ʼe ina toe uga anai tatou ke tou foaki totatou maʼuli kia te ia. Moʼo foaki totatou maʼuli ki te ʼAtua ʼe tonu ke tou fakaōvi kia ia ʼi te faikole, pea mo tou fakapapau age ʼe tou fakaʼaogaʼi anai totatou maʼuli ki tana tauhi pea ʼe tou haʼele agatonu anai ʼi tona ʼu ala. ʼI tatatou fai te faʼahi ʼaia, ʼe tou mulimuli ai ki te faʼifaʼitaki ʼa Sesu, ʼaē neʼe haʼu kia Sehova ʼaki he lotomālohi ke ina fai te finegalo ʼo te ʼAtua.—Hepeleo 10:7.
9. He koʼe koa ʼe foaki e te hahaʼi tonatou maʼuli kia Sehova?
9 ʼE mole he tahi ʼe fakakinauʼi e Sehova ʼAtua peʼe ina fakamaʼua ki ai ke ina foaki age tona maʼuli kia te ia. (Vakaʼi ia 2 Kolonito 9:7.) Tahi ʼaē meʼa, ʼe mole tali e te ʼAtua ke kita foaki tokita maʼuli kia te Ia ʼuhi pe he ko he meʼa ʼe kita logoʼi ʼi tokita loto kae mole tologa. ʼI muʼa ʼo takita papitema, kua tonu ke kita liliu ko he tisipulo pea ʼe maʼua ke kita faiga mālohi ke kita maʼu te ʼatamai mālama. (Mateo 28:19, 20) Neʼe kole mamahi e Paulo kia nātou ʼaē neʼe kua papitema ke ‘nātou momoli ʼonatou sino ko he sakilifisio maʼuli, mo maʼoniʼoni, pea mo lelei ki te ʼAtua ohage ko he tauhi taputapu ʼaki tonatou ʼatamai.’ (Loma 12:1) ʼO toe feiā pe, ʼe kita fakaʼaogaʼi tokita ʼatamai moʼo foaki tokita maʼuli kia Sehova ʼAtua. ʼI takita ʼosi ako pe koteā tona faka ʼuhiga pea mo ʼosi fakakaukauʼi lelei te faʼahi ʼaia, ʼe kita foaki ai leva tokita maʼuli ki te ʼAtua ʼaki he lotolelei pea mo he loto fiafia.—Pesalemo 110:3.
10. Koteā te pikipikiga ʼo te foaki ʼo tokita maʼuli ki te ʼAtua pea mo te papitema?
10 ʼI tatatou ʼosi fakaōvi ki te ʼAtua ʼi te faikole moʼo fakahā kia ia totatou lotomālohi ʼaē ke tou haʼele ʼi tona ʼu ala, ʼe tou fai anai te lua faʼahi ʼaē ʼe tonu ke tou fai. ʼE tou fakahā anai kua tou foaki totatou maʼuli ki te ʼAtua ʼo tou papitema ʼi te vai. ʼE ko he fakahā ʼaia ia muʼa ʼo te kaugamālie, kua kita fakapapau ke kita fakahoko te finegalo ʼo te ʼAtua. ʼI te kamata ʼo tona minisitelio ʼi te kele, neʼe papitemaʼi e Soane Patita ia Sesu, pea ʼe ko he faʼifaʼitaki lelei ʼaia kia tatou. (Mateo 3:13-17) Ki muli age, neʼe fakatotonu e Sesu ki tana kau tisipulo ke nātou fai ni ʼu tisipulo pea mo papitemaʼi nātou. Koia, ko te foaki ʼo tokita maʼuli pea mo te papitema ʼe ko te ʼu meʼa tāfito ʼaia e lua ʼaē ʼe tonu ke fai e ia ʼaē ʼe fia haʼele mo Sehova.
11, 12. (a) He koʼe koa ʼe feala ke tou fakatatau te papitema mo te fai ʼohoana? (b) Koteā te tatau ʼo totatou felogoi mo Sehova pea mo te vāhaʼa ʼo he tagata mo he fafine?
11 Ko te liliu ʼa he tahi ko he tisipulo ʼa Sesu Kilisito kua ina foaki tona maʼuli ki te ʼAtua pea kua papitema, ʼe tatau mo te ʼohoana. ʼE lahi te ʼu fenua, ko te ʼohoana ʼe ko te ikuʼaga ʼaia ʼo he ʼu meʼa kehekehe neʼe tonu muʼa ke fai. ʼUluaki neʼe felāveʼi te tama pea mo te taʼahine ʼo nā feʼiloʼi leleiʼaki, pea nā femanakoʼaki. ʼOsi ʼaia pea nā fakapapau ke nā ʼohoana. Pea ko te fai ʼohoana ʼe ko te fakahā ʼaia ki te kaugamālie te meʼa ʼaē neʼe nā fakatuʼutuʼu ʼāteaina pe—ke nā ʼohoana pea nā nonofo faka taumatuʼa. ʼE ko te fai ʼohoana ʼaē ʼe ina fakahā ki te hahaʼi ʼe ʼi ai tanā ʼu felogoi makehe. ʼE ko te ʼaho ʼaia ʼaē ʼe kamata ai tanā nonofo ʼohoana. ʼO toe feiā pe, ko te papitema ʼe ko te kamata ʼo te maʼuli pea mo te haʼele ʼa he tahi mo Sehova.
12 Koʼeni te tahi faʼifaʼitaki. ʼI tanā ʼosi ʼohoana, ʼe toe mālohi age te feʼofaʼofani ʼa te fafine pea mo te tagata. Ke feala ke toe mālohi ake tanā felogoi, ʼe tonu kia nāua ke nā fakamālohiʼi tonā vāhaʼa faka taumatuʼa. Logope la ʼe mole tou ʼohoana mo te ʼAtua, kae ʼi tatatou ʼosi papitema ʼe tonu ke tou faiga fakamalotoloto ke tou taupau tatatou ʼu felogoi mālohi mo Sehova. ʼE ina vakaʼi te ʼu meʼa ʼaē ʼe tou fai pea ʼe ina leleiʼia tatatou ʼu faiga ʼaē ke tou fai tona finegalo, pea ʼe fakaōvi mai kia tatou. Neʼe tohi e te tisipulo ko Sake: “Koutou fakaōvi ki te ʼAtua, pea ʼe fakaōvi atu anai kia koutou.”—Sake 4:8.
Tou Haʼele ʼi Te ʼu Tafuga ʼo Sesu
13. ʼI tatatou haʼele mo te ʼAtua, koteā te faʼifaʼitaki ʼaē ʼe tonu ke tou mulimuli kiai?
13 Ke feala hatatou haʼele mo Sehova, ʼe tonu ke tou mulimuli fakalelei ki te faʼifaʼitaki ʼaē neʼe tuku mai e Sesu Kilisito. Neʼe tohi fēnei e te ʼapositolo ko Petelo: “Neʼe pāui koutou ki te ala ʼaia, koteʼuhi neʼe mamahi ia Kilisito maʼa koutou, ʼo ina tuku atu he faʼifaʼitaki ke koutou mulimuli lelei ki tona ʼu tafuga.” (1 Petelo 2:21) Mai tona ʼuhiga ʼaē neʼe haohaoa ia Sesu kae tou heʼe haohaoa tatou, koia ʼe mole tou lava mulimuli katoa ki tona faʼifaʼitaki. Kae ʼe loto e Sehova ke tou fai ia meʼa fuli ʼaē ʼe feala ke tou fai. Tou vakaʼi te ʼu agaaga e nima ʼo te maʼuli pea mo te minisitelio ʼo Sesu ʼaē ʼe tonu ke faʼifaʼitakiʼi fakamalotoloto e te ʼu Kilisitiano ʼaē kua foaki tonatou maʼuli ki te ʼAtua.
14. Koteā te tahi meʼa ʼaē ʼe tonu ke tou fai ʼi tatatou mālama ki te Folafola ʼa te ʼAtua?
14 Neʼe maʼu e Sesu te ʼatamai mālama totonu pea mo katoa ʼo ʼuhiga mo te Folafola ʼa te ʼAtua. ʼI te lolotoga ʼo tona minisitelio, neʼe tau fakaʼaogaʼi e Sesu te Tauhi ʼĀfea. (Luka 4:4, 8) ʼE mahino ia, ko te kau takitaki lotu agakovi ʼo te temi ʼaia, neʼe nātou toe fakaʼaogaʼi foki mo nātou te ʼu Tohi ʼaia. (Mateo 22:23, 24) Kae neʼe kehekehe ia Sesu mo nātou he neʼe mahino ki te faka ʼuhiga moʼoni ʼo te Tauhi ʼĀfea pea neʼe ina maʼuliʼi. Neʼe mole gata ʼaki pe tana ʼiloʼi te Lao, kae neʼe mahino ki tona ʼuhiga moʼoni. ʼI tatatou mulimuli ki te faʼifaʼitaki ʼo Kilisito, ʼe tonu ke tou faiga foki mo tatou ke tou mahino ki te Folafola ʼa te ʼAtua, ke tou mahino ai ki tona ʼuhiga moʼoni. Kapau ʼe tou fai te faʼahi ʼaia, pea ʼe feala ke tou liliu ko he ʼu hahaʼi gāue ʼe tali e te ʼAtua, pea ʼe feala anai kia tatou ke tou ‘fakaʼaogaʼi lelei te folafola ʼo te moʼoni.’—2 Timoteo 2:15.
15. Koteā te faʼifaʼitaki ʼaē neʼe tuku mai e Sesu ʼi tana palalau ʼo ʼuhiga mo te ʼAtua?
15 Neʼe palalau ia Kilisito Sesu ki te hahaʼi ʼo ʼuhiga mo tana Tāmai ʼaē ʼi selo. Neʼe mole taupau e Sesu tona ʼatamai mālama ʼo ʼuhiga mo te Tohi-Tapu maʼa ia totonu. Māʼiape la mo tona ʼu fili neʼe nātou fakahigoaʼi ia ia ko te “Faiako,” koteʼuhi ʼi te potu fuli pe ʼaē neʼe ʼalu kiai neʼe palalau ʼo ʼuhiga mo Sehova pea mo tana ʼu fakatuʼutuʼu. (Mateo 12:38) Neʼe fai faka mafola ia Sesu ʼi te fale lotu, mo te ʼu sinakoka, mo te ʼu kolo pea mo te tuvao. (Maleko 1:39; Luka 8:1; Soane 18:20) Neʼe ina akoʼi te hahaʼi ʼaki he loto manavaʼofa pea mo he agalelei, pea neʼe ʼofa kia nātou ʼaē neʼe tokoni ki ai. (Mateo 4:23) Ko nātou ʼaē ʼe nātou mulimuli ki te faʼifaʼitaki ʼa Sesu, ʼe lahi te ʼu potu ʼaē ʼe nātou maʼu ai te hahaʼi pea ʼe lahi tanatou ʼu faʼahiga fai moʼo akoʼi kia nātou pe ko ai ia Sehova ʼAtua pea mo tana ʼu fakatuʼutuʼu taulekaleka.
16. Neʼe felogoi feafeaʼi ia Sesu mo te hahaʼi ʼaē neʼe atolasio kia Sehova?
16 Neʼe ʼofa ia Sesu ki te hahaʼi ʼaē neʼe atolasio kia Sehova. ʼI te tahi lakaga, ʼi te lolotoga palalau ʼa Sesu ki te hahaʼi tokolahi, neʼe haʼu tana faʼe pea mo tona ʼu tēhina ke nātou palalau kia ia. ʼE fakamatala fēnei e te Tohi-Tapu: “Ko he tahi neʼe ina ʼui kia te ia: ‘Koʼeni tau faʼe pea mo ʼou tēhina ʼe tutuʼu ʼi tuʼa pea ʼe nātou faiga ke nātou palalau kia te koe.’ Neʼe ina tali ʼo ʼui maʼana kia ia ʼaē neʼe ina fakahā age te meʼa ʼaia: ‘Ko ai taku faʼe, pea ko ai ʼoku tēhina?’ Pea ʼi tana folahi tona nima ki ʼana tisipulo, neʼe ʼui maʼana: ‘Koʼeni taku faʼe pea mo ʼoku tēhina! He ko ʼaē ʼe ina fai te finegalo ʼo taku Tāmai ʼaē ʼe ʼi selo, ʼe ko ia ia ʼaia ko toku tēhina, pe ko toku tuagaʼane, pe ko taku faʼe.’ ” (Mateo 12:47-50) ʼE mole faka ʼuhiga leva neʼe līaki e Sesu tona famili, heʼe ko te ʼu meʼa ʼaē neʼe hoko ki muli age ʼe nātou fakahā mai neʼe ʼofa kia nātou. (Soane 19:25-27) Kae ko te fakamatala ʼaia ʼe ina fakahā lelei mai te ʼofa ʼa Sesu ki te hahaʼi tui. ʼO toe feiā pe ia ʼaho nei, ko nātou ʼaē ʼe nātou haʼele mo te ʼAtua ʼe nātou faiga ke nātou fakatahi mo te kau kaugana ʼa Sehova pea ke tuputupu tanatou ʼofa kia nātou.—1 Petelo 4:8.
17. Neʼe koteā te manatu ʼa Sesu ʼo ʼuhiga mo te fai ʼo te finegalo ʼo tana Tāmai, pea ʼe tonu ke malave feafeaʼi te faʼahi ʼaia kia tatou?
17 ʼI tana fai te finegalo ʼo te ʼAtua, neʼe fakahā e Sesu tona ʼofa ki tana Tāmai ʼaē ʼi selo. Neʼe fakalogo ia Sesu kia Sehova ia meʼa fuli. Neʼe ina ʼui fēnei: “Ko taku meʼa kai ko te fai ʼo te finegalo ʼo ia ʼaē neʼe ina fekauʼi mai ʼau, pea mo ʼau fakaʼosi tana gāue.” (Soane 4:34) Neʼe toe ʼui fēnei e Kilisito: ‘ ʼE ʼau fai tuʼumaʼu te ʼu meʼa ʼaē ʼe leleiʼia [e te ʼAtua].’ (Soane 8:29) Neʼe ʼofa ia Sesu ki tana Tāmai ʼaē ʼi selo pea “neʼe talagafua ʼo aʼu ki te mate, ʼio, ki te mate ʼi te pou fakamamahi.” (Filipe 2:8) Tahi ʼaē meʼa, ko Sehova neʼe ina tapuakina ia Sesu ʼo ina faka maʼuhigaʼi ia ia pea mo hikihiki ia ia ki te lua tuʼulaga. (Filipe 2:9-11) Ohage ko Sesu, ʼe tou fakahā tatatou ʼofa ki te ʼAtua ʼi tatatou maʼuliʼi tana ʼu fakatotonu pea mo tou fai tona finegalo.—1 Soane 5:3.
18. Koteā te faʼifaʼitaki ʼaē neʼe tuku mai e Sesu ʼo ʼuhiga mo te faikole?
18 Neʼe faikole tuʼumaʼu ia Sesu. Neʼe faikole ʼi tana papitema. (Luka 3:21) ʼI muʼa ʼo tana filifili tana kau ʼapositolo ʼe toko 12, neʼe lolotoga faikole po katoa. (Luka 6:12-13) Neʼe akoʼi e Sesu ki tana kau tisipulo peʼe tonu ke feafeaʼi tanatou ʼu faikole. (Luka 11:1-4) ʼI te po ʼi muʼa ʼo tana mate, ko ia pea mo tana kau tisipulo neʼe nātou faikole fakatahi pea neʼe ina hūfaki nātou. (Soane 17:1-26) Ko te faikole neʼe ko he meʼa maʼuhiga ʼi te maʼuli ʼo Sesu, pea ʼe tonu ke feiā ʼi totatou maʼuli heʼe ko tatou ko tana ʼu tisipulo. ʼE ko he pilivilesio lahi te fealagia ʼaē ke tou palalau mo te Tuʼi ʼAliki ʼo te ʼAtulaulau! Tahi ʼaē meʼa, ʼe tali e Sehova ki te ʼu faikole, ohage ko tona fakahā mai e Soane: “Pea ko te falala ʼaenī ʼe tou maʼu ia te ia: tatau aipe pe koteā he meʼa ʼe tou kole ʼe ʼalutahi mo tona finegalo ʼe fagono ia kia tatou. Tahi ʼaē meʼa, kapau ʼe tou ʼiloʼi ʼe fagono ia ki te meʼa ʼaē ʼe tou kole age, pea ʼe tou ʼiloʼi ai ʼe tou maʼu anai te ʼu meʼa ʼaē ʼe tou kole, he neʼe tou kole age kia te ia te ʼu meʼa ʼaia.”—1 Soane 5:14, 15.
19. (a) Koteā te ʼu kalitate ʼo Sesu ʼaē ʼe tonu ke tou faʼifaʼitakiʼi? (b) Koteā te ʼu fua lelei ʼaē ʼe feala ke tou maʼu ʼi tatatou vakaʼi te maʼuli ʼo Sesu pea mo tona minisitelio?
19 ʼE lahi te ʼu meʼa ʼaē ʼe feala ke tou ako ʼi tatatou vakaʼi te maʼuli ʼo Sesu ʼi te kele pea mo tona minisitelio. Koutou fakakaukauʼi age muʼa tona ʼu kalitate: te ʼofa, te manavaʼofa, te agalelei, te mālohi, te aga fakapotopoto, te agavaivai, te lototoʼa pea mo te loto fia foaki. Kapau ʼe lahi te ʼu meʼa ʼaē ʼe tou ako ʼo ʼuhiga mo Sesu, pea ʼe lahi anai tatatou holi ke tou mulimuli ki tona faʼifaʼitaki. Tahi ʼaē meʼa, ko te ʼatamai mālama ʼo ʼuhiga mo Sesu ʼe ina fakaōvi tatou kia Sehova he neʼe faʼifaʼitakiʼi lelei e Sesu tana Tāmai ʼaē ʼi selo. Neʼe felogoi lelei ia Sesu mo Sehova, ʼo feala ai tana ʼui fēnei: “Ko ʼaē kua sio kia te ʼau, kua sio ia ki te Tāmai.”—Soane 14:9.
Koutou Falala ʼe Lagolago Anai Te ʼAtua Kia Koutou
20. ʼE feala feafeaʼi hatatou loto falala ʼi tatatou haʼele mo Sehova?
20 Ka akoako ia nātou liliki ke nātou haʼele, ʼe nātou tūkia tuʼumaʼu. E feafeaʼi tanatou ako ʼaē ke nātou popoto ʼi te haʼele? ʼE nātou faiga tuʼumaʼu pea mo nātou haga kātaki aipe. Ko nātou ʼaē ʼe haʼele mo Sehova ʼe nātou faiga ke nātou loto falala ʼi tanatou haʼele ke mole nātou tūkia. ʼO toe feiā aipe, ʼe maʼua ke nātou faiga tuʼumaʼu pea mo haga kātaki aipe. Neʼe fakatokagaʼi e Paulo ʼe maʼuhiga ke kita faʼa kātaki ʼi takita haʼele mo te ʼAtua he neʼe ina tohi fēnei: “ ʼU tēhina, ʼe mātou kole atu pea mo fakaloto mālohiʼi koutou ʼi te ʼAliki Sesu, ohage ko tamatou akoʼi atu kia koutou peʼe tonu ke feafeaʼi takotou haʼele mo te ʼAtua ke ina leleiʼia koutou, ohage pe ko te meʼa ʼaē ʼe koutou fai, ke koutou haga fai te meʼa ʼaia pea ke toe laka age.”—1 Tesalonika 4:1.
21. ʼI tatatou haʼele mo Sehova, koteā te ʼu tapuakina ʼaē ʼe feala ke tou maʼu ai?
21 Kapau kua tou foaki totatou maʼuli katoa ki te ʼAtua, pea ʼe tokoni mai anai ke tou haga haʼele mo ia. (Isaia 40:29-31) ʼE mole feala ke foaki mai e te malamanei he meʼa ʼe lelei age ʼi te ʼu tapuakina ʼaē ʼe foaki e te ʼAtua kia nātou ʼaē ʼe haʼele ʼi tona ʼu ala. ʼE ko ‘Ia ʼaē ʼe ina akoʼi tatou ke ʼaoga kia tatou, ia Ia ʼaē ʼe ina taki tatou ʼi te ala ʼaē ʼe tonu ke tou haʼele ai. Pea kapau ʼe tou tokagaʼi fakalelei tana ʼu fakatotonu, pea ko tatatou fīmālie ʼe hage anai ia ko te liuʼa, pea ko totatou faitotonu ʼe hage anai ia ko te ʼu peau ʼo te tai.’ (Isaia 48:17, 18) ʼI tatatou tali te fakaafe ʼaē ke tou haʼele mo te ʼAtua pea mo tou fai fakahagatonu te faʼahi ʼaia, pea ʼe feala anai ke tou tokalelei mo ia ʼo talu ai.
ʼE Feafeaʼi Anai Hakotou Tali?
◻ He koʼe koa ʼe ko he pilivilesio tatatou haʼele mo te ʼAtua moʼoni?
◻ He koʼe koa ko te ako, mo te foaki ʼo tokita maʼuli pea mo te papitema ʼe ko te ʼu ʼuluaki meʼa ʼaē ʼe kita fai ʼi takita haʼele mo Sehova?
◻ ʼE lava feafeaʼi hatatou mulimuli ki te ʼu tafuga ʼo Sesu?
◻ ʼE tou ʼiloʼi feafeaʼi ʼe lagolago anai ia Sehova kia tatou mo kapau ʼe tou haʼele mo ia?
[Paki ʼo te pasina 13]
Ko te ako, mo te foaki ʼo tokita maʼuli ki te ʼAtua, pea mo te papitema ʼe ko te ʼu ʼuluaki meʼa ʼaē ʼe tonu ke kita fai mo kapau ʼe kita fia haʼele mo te ʼAtua