Tou Logo Tahi ʼi Te Ala ʼAē ʼe Ina Taki Ki Te Maʼuli
Kapau ʼe hoko atu te tuputupu ʼo te hahaʼi ʼi te malamanei, mole tuai pea aʼu anai ki te toko ono miliale. Logope la ʼe tou ʼōmai fuli mai te tagata e tahi, kae ʼe mole mahino ki te tokolahi ʼe nātou kau ki te foʼi famili pea ʼe ʼi ai tonatou maʼua ki te Tupuʼaga poto pea mo ʼofa. ʼE hā lelei te ʼaluʼaga fakaʼofaʼofa ʼaia ʼi te mole felogoi pea mo te fefehiʼaʼaki ʼa te ʼu puleʼaga, mo te hahaʼi ʼo te ʼu lanu kehekehe, pea mo te ʼu agaʼi fenua.
KA TOU fakasiosio te ʼaluʼaga ʼo te malamanei ʼi te temi ʼaenī, pea ʼe hage ʼe mole feala ke hoko he logo tahi faka malamanei. ʼE ʼui fēnei e te tohi The Columbia History of the World: “Ki te fehuʼi ʼaē peʼe lava feafeaʼi hatatou nonofo fakatahi, kua tou fakatokagaʼi ko te malamanei ʼaē ʼe tou lolotoga maʼuʼuli ai ʼe mole feala pe la hana fai he puleʼaki kiai, pea ʼe mole maʼu pe la he manatu foʼou e tahi ʼo ʼuhiga mo te faʼahi ʼaia.”
Kae ke logo tahi te malamanei, ʼe mole maʼua ke maʼu he manatu foʼou. Kua fakahā te puleʼaki ki te logo tahi ʼi te Tohi-Tapu. Ko te puleʼaki ʼaia ʼe ko te tauhi kia te Ia ʼaē neʼe ina fakatupu te kele pea mo te maʼuli. Ko te hahaʼi ʼa te ʼAtua, kua nātou maʼu te logo tahi ʼi tanatou ʼu manatu, mo tanatou ʼu fakatuʼutuʼu, pea mo tonatou faʼahiga maʼuli. ʼE nātou toko nima miliona vaelua tupu ʼi te ʼu fenua e 233, pea ʼe nātou logo tahi heʼe nātou tui, ko te ala ʼaē ʼe lelei tokotahi, ʼe ko te ala ʼa te ʼAtua ʼaē ʼe ina taki ki te maʼuli. Ohage ko te tagata fai pesalemo, ʼe nātou faikole fēnei: “Akoʼi mai kia ʼau tau ala, Ê Sehova. ʼE ʼau haʼele anai ʼi tou moʼoni. Fai ke tahi toku loto ke ʼau manavasiʼi ki tou huafa.”—Pesalemo 86:11.
Ko te logo tahi ʼaia ʼa te hahaʼi ʼi te tauhi moʼoni, neʼe kua fualoa tona tala fakakikite e te polofeta ko Isaia. Neʼe ina tohi fēnei: “Pea ʼe hoko moʼoni anai, ʼi te temi fakaʼosi ʼo te ʼu ʼaho, ko te moʼuga ʼo te fale ʼo Sehova ʼe fakatuʼu maʼu anai ʼi te tumutumu ʼo te ʼu moʼuga, pea ʼe mahino papau ia ʼe māʼoluga ake anai ia ʼi te ʼu moʼuga liliki; pea ko te ʼu fenua fuli ʼe nātou ʼōmai anai kiai. Pea ʼe mahino papau ia ʼe tokolahi anai te hahaʼi ʼe nātou ʼolo anai pea mo ʼui maʼa nātou: ‘Koutou ʼōmai ke tou hake ki te moʼuga ʼo Sehova, ki te fale ʼo te ʼAtua ʼo Sakopo; pea ʼe ina akoʼi mai anai kia tatou tona ʼu ala, pea ʼe tou haʼele anai ʼi tona ʼu ala foufou.’ ”—Isaia 2:2, 3.
ʼE makehe ʼaupito te logo tahi ʼa te kau Fakamoʼoni ʼa Sehova. ʼI te ʼu kokelekasio e 87 000 tupu ʼi te malamanei katoa, ʼe tatau te meʼa kai fakalaumālie ʼaē ʼe foaki kia nātou ʼi tanatou ʼu fono ʼaē ʼe fai ʼi te vāhaʼa fuli. (Mateo 24:45-47) Kae ʼo kamata mai te lotomalie ʼo te taʼu 1998 ʼo aʼu mai ki te kamata ʼo te taʼu 1999 ʼaenī, neʼe fakahā e te kau Fakamoʼoni ʼa Sehova tanatou logo tahi ʼi te tahi faʼahiga ʼaluʼaga—neʼe nātou fai ʼi te malamanei katoa tanatou ʼu Fakatahi ʼaho tolu ʼaē ko tona kupu tāfito “Ko Te Faʼahiga Maʼuli ʼAē ʼe Fakamaʼua Mai e Te ʼAtua.” ʼI te ʼu fenua e 13, neʼe kau ki te ʼu fakatahi ʼaia he ʼu tēhina mo tuagaʼane mai te ʼu fenua kehekehe, pea neʼe fakahigoaʼi ko te ʼu fakatahi faka malamanei. Ko te tahi ʼu fakatahi neʼe higoa ko te ʼu fakatahi faka tisitilike. Kae ʼi te ʼu fakatahi fuli ʼaia, neʼe tatau te lelei ʼo te polokalama fakalaumālie ʼaē neʼe fai.
Neʼe ko he meʼa fakafiafia hakita sio ki te ʼu tēhina mo tuagaʼane fiafia, mo teuteu lelei, neʼe nātou ʼolo ki te ʼu fakatahi ke akoʼi nātou e Sehova! Ko te tokolahi neʼe nātou manatu tahi mo te palalau ʼaē neʼe fai e te tuagaʼane neʼe kau ki te fakatahi faka malamanei ʼi Michigan, ʼi Amelika, he neʼe ina ʼui fēnei: “Neʼe mātou fiafia ʼaupito ʼi tamatou siosio ʼaē ki te fāʼufuaʼaki ʼa te ʼu tēhina mo tuagaʼane mai te malamanei katoa—mai te Lepupilika Tchèque, mo Barbade, mo Niselia, mo Hongrie, mo Pilitania, mo Holani, mo Etiopea, mo Kenia, pea mo te tahi ʼu fenua! Neʼe ko he meʼa taulekaleka tamatou sio ʼaē ki te logo tahi ʼa te ʼu tēhina, mo tanatou fetāgihi fakafiafia he neʼe nātou ʼoʼofa ki tonatou ʼAtua lahi ko Sehova.” ʼI te alatike ʼaē ka hoa mai, ʼe tou vakaʼi anai te polokalama ʼo te fakatahi ʼaē neʼe kau kiai te toko lauʼi miliona hahaʼi ʼi te kele katoa.
[Haʼuʼaga ʼo te paki pasina 3]
Mountain High Maps® Copyright © 1997 Digital Wisdom, Inc.