Te ʼAho Fakamuli ʼo Te Maʼuli ʼo Sesu ʼi Te Kele

ʼE ko te fakaʼosi ʼaenī ʼo te Feliaono, ʼaho 14 ʼo te taʼu 33 ʼo totatou temi. Ko ʼihi tagata mo fafine ʼe nātou teuteu ʼavaifo tonatou kaumeʼa ʼofaina. Ko te tahi ia nātou, ko Nikotemo, neʼe ina ʼaumai he ʼu meʼa moʼo fakamagoni te sino ki te ʼavaifo. Neʼe foaki e te tahi tagata, ko Sosefo te ʼu kie maʼa moʼo kofukofuʼi te sino lavelavea ʼaia.

KO AI te hahaʼi ʼaia? Pea ko ai ʼaē ʼe nātou ʼavaifo? ʼE ʼi ai koa hona ʼuhiga kia tatou? Moʼo tali ki te ʼu fehuʼi ʼaia, ʼe ʼaoga ke tou vakaʼi pe koteā ʼaē neʼe hoko ʼi te kamata ʼo te ʼaho maʼuhiga ʼaia.

Felianima Afiafi, ʼAho 14 ʼo Nisani

ʼE mālamagia te māhina ʼi tona kua katoa pea ʼe hake māmālie ake ʼi te lagi ʼo Selusalemi. Kua gona ifo te kolo ʼi te fakaʼosi ʼaia ʼo he ʼaho neʼe feʼohoʼaki ai te hahaʼi ki ʼanatou gāue. ʼI te afiafi ʼaia ʼe magoni te ʼaele heʼe taʼo te ʼu akeno. Ei, ko te toko lauʼi afe hahaʼi ʼe nātou teuteuʼi he meʼa makehe​—te fakamanatu ʼo te Pāsikate ʼaē ʼe fai ʼi te taʼu fuli.

ʼE nofo ia Sesu Kilisito pea mo tana kau ʼapositolo e toko 12 ʼi te kogafale lahi kua teuteu ai te laupapa maʼa nātou. Koutou fagono ki te ʼu palalau ʼaē ʼe fai e Sesu. ʼE ina ʼui fēnei: “Nee au fakaamu mo toku loto katoa ke au kai te Pasikate aeni fakatahi mo koutou i mua o toku pasio.” (Luka 22:15) ʼE ʼiloʼi e Sesu ko tona ʼu fili ʼe nātou fakatuʼutuʼu ke nātou matehi ia ia. Kae ʼi muʼa ʼo te hoko ʼo te faʼahi ʼaia, ʼe hoko anai he meʼa maʼuhiga ʼi te afiafi ʼaia.

ʼI te ʼosi fai ʼo te Pāsikate, ʼe fakahā fēnei e Sesu: “Ko he tahi o koutou ka ina amanaki lavakiʼi au.” (Mateo 26⁠:21) ʼE lotomamahi ai te kau ʼapositolo. Ko ai ia ia ʼaē ka ina lavakiʼi ia Sesu? ʼI te hili ʼo tanatou fai palalau, ʼe ʼui e Sesu kia Sutasi Isikaliote: “Ko te mea e ke fai, fai mo vave o fai.” (Soane 13⁠:27) Ko Sutasi ʼaē ka ina lavakiʼi ia Sesu kae ʼe puli te faʼahi ʼaia ki te kau tisipulo. Koia ʼe mavae ʼi te temi ʼaia moʼo fakahoko tana fakatuʼutuʼu fakalialia ʼo ʼuhiga mo Sesu.

Ko He Toʼotoʼoga Makehe

Kae ʼi te temi nei ʼe fakatuʼu e Sesu te toʼotoʼoga foʼou​—ko te fakamanatu ʼo tona mate. ʼE toʼo e Sesu te pane pea ina fai te kole fakafetaʼi pea ina tofitofi te pane. ʼE ina fakatotonu fēnei: “Koutou too, pea koutou kai.” Pea ʼe ina toe ʼui age: “Ko te mea aeni e ko toku sino kua foaki o uhiga mo koutou.” ʼI tanatou ʼosi kai fuli te pane, ʼe ina toʼo te ipu vino kula pea mo fai te tapuaki. Pea ʼe ʼui e Sesu kia nātou: “Koutou ʼinu fuli ki ai” pea mo toe fakamahino age: “Ko te ipu aeni e ko te Talaga Foou i toku toto kua liligi ia o uhiga mo koutou.” ʼOsi ʼaia pea ʼe ina fakatotonu fēnei ki te toko 11 kau ʼapositolo agatonu: “Koutou fai te mea aeni mo oku fakamanatu.”​—Mateo 26:26-​28; Luka 22:19, 20; 1 Kolonito 11:24, 25.

ʼI te afiafi ʼaia ʼaki he agaʼofa ʼe teuteuʼi e Sesu tana kau ʼapositolo agatonu ki te meʼa ʼaē ka hoko, pea ʼe ina toe fakahā tana ʼofa lahi kia nātou. ʼE ina ʼui fēnei: “E mole he tahi e ina maù he ofa lahiʼage i te ofa o ia ae e ina momoli tona mauli ke matehi o uhiga mo ona kaumea. Ko oku kaumea ia koutou, kapau e koutou fai te mea e au fekau kia koutou.” (Soane 15:​13-15) Ei, ko te kau 11 ʼapositolo neʼe nātou fakahā ko nātou ʼe ko he ʼu kaumeʼa moʼoni he neʼe nātou nofo agatonu kia Sesu ʼi tana ʼu ʼahiʼahi.

ʼI te kua teitei māʼupō ʼe fai e Sesu he kole ʼe kei manatuʼi ʼi te temi nei, ʼosi ʼaia pea nātou hiva he ʼu fakavikiviki kia Sehova. Pea ʼi te mālamagia ʼo te māhina ʼaē kua katoa, ʼe nātou mavae ʼi te kolo ʼo nātou fakalaka ʼi te Liuʼa ʼo Setelone.​—Soane 17:1–18:1.

ʼI Te ’Ōloto ʼo Setesemane

Hili kiai he kiʼi temi nounou, pea haʼu ia Sesu pea mo tana kau ʼapositolo ki te ʼōloto ʼo Setesemane. ʼE tuku e Sesu te toko valu ʼo tana kau tisipulo ʼi te hūʼaga ʼo te ʼōloto kae ʼe ʼolo mo ia ia Petelo, mo Sake pea mo Soane ki te ʼu fuʼu oliveto. ʼE ʼui fēnei e Sesu ki te toko tolu ʼaia: “E mamahi lahi toku laumalie ki te mate; koutou nonofo i heni pea koutou alaʼala.”​—Maleko 14:33, 34.

Ko te ʼu ʼapositolo ʼaia ʼe toko tolu ʼe nātou talitali kae ʼe toe fakamamaʼo atu ia Sesu ʼi te ʼōloto ke ʼalu ʼo faikole. ʼE ina kole mamahi ki tana tāmai ʼo tagi pea mo kalaga fēnei: “Tamai, kapau e ke finegalo ki ai, ke fakalaka mamao te ipu aeni maia te au.” ʼE ko he toe kavega ʼaē ʼe hili ki te ʼu fugaʼuma ʼo Sesu. ʼE lotomamahi ʼi tana manatu ki te ʼu leakovi ʼaē ka fai e te ʼu fili ʼa Sehova, heʼe matehi anai tona ʼAlo ʼulu tokotahi ohage ko he tagata māmio kovi! Pea ʼe fakaloto mamahi age kia ia tana manatu ʼaē ʼe fakalainoaʼi anai tana Tāmai ʼofaina mo kapau ʼe mole ina lava kātakiʼi te ʼu ʼahiʼahi kovi ʼaia, ʼo faikole mamahi ai Sesu pea tūgaki ʼo liliu tona kakava ʼo toto mo hali ki te kele.​—Luka 22:42, 44.

Neʼe fakaʼosi e Sesu tana tolu faikole mo te ʼōmai ʼa te ʼu tagata mo te ʼu taume pea mo te ʼu mālama. Ko Sutasi Isikaliote totonu ʼaē ʼe muʼa age ia nātou pea ʼe ʼalu fakahagatonu kia Sesu. ʼE ina ʼui fēnei: “Alofa atu, Aliki!” pea ʼe fekita kia te ia. ʼE tali fēnei age e Sesu: “Sutasi, pe e ke kâkâi te Foha o te tagata aki he fekita!”​—Mateo 26: 49; Luka 22:47, 48; Soane 18:3.

Fokifā, kua mahino ki te kau ʼapositolo pe koteā ʼaē ʼe lolotoga hoko. ʼE puke tonatou ʼAliki pea mo kaumeʼa ʼofaina! Pea toʼo atu aipe e Petelo tana heletā pea ina tuʼusi ai te taliga ʼo te kaugana ʼo te pelepitelo lahi. Pea foimo kalaga fēnei age Sesu: “Taofi ai kua feauga.” Pea kapa age tona nima ʼo toe fakapipiki te taliga ʼo te kaugana pea mo ina fai te fakatotonu ʼaenī kia Petelo: “Ai tau heleta ki tona aiʼaga, koteuhi ko natou fuape e toʼo heleta e natou matepe anai i te heleta.” (Luka 22:50, 51; Mateo 26:52) Ko te kau ofisie pea mo te kau solia ʼe nātou puke ia Sesu pea mo haʼi ia ia. ʼI te hoha mo mataku ʼa te kau ʼapositolo, ʼe nātou līaki ai Sesu pea nātou feholaki ʼi te pōʼuli.​—Mateo 26:56; Soane 18:12.

Feliaono Uhu, ʼAho 14 ʼo Nisani

Kua hili te māʼupō pea ko te kamata pe ʼo te Feliaono. ʼUluaki ʼe ʼave ia Sesu ki te ʼapi ʼo te Pelepitelo Lahi ʼāfea ko Ana ʼaē ʼe lahi tona pule pea mo tona mālohi. ʼE fakafehuʼi ia ia e Ana pea ina fakatotonu ke ʼave ki te ʼapi ʼo te Pelepitelo Lahi ko Kaifa he kua fakatahi ai te Sanetualio.

Ko te kau takitaki lotu ʼe nātou faigaʼi ke nātou maʼu he ʼu hahaʼi moʼo fakamoʼoni ki te ʼu tukugakovi loi ʼaē neʼe nātou fai ʼo ʼuhiga mo Sesu. Kae ʼe mole ʼalutahi te ʼu meʼa ʼaē ʼe ʼui e te kau fakamoʼoni loi ʼaia. ʼE nofo fakalogologo ia Sesu ʼi te lolotoga ʼo te fakamāu ʼaia. Koia ʼe fakaʼaogaʼi e Kaifa te tahi faʼahiga fakafehuʼi pea ina fakatotonu fēnei kia Sesu: “E au kole atu, aki te Atua mauli, kapau ko koe Kilisito, te Alo o te Atua, tala mai kia matou.” ʼE mole feala ke fakafisi Sesu ki te faʼahi ʼaia, koia ʼe ina tali ai ʼaki he lototoʼa: “E ko au ia, e koutou mamata anai ki te afio a te Foha o te tagata i te toomatau o te Mafimafi pea mo tana haele ifo i te u ao o te lagi.”​—Mateo 26:63; Maleko 14:​60-62.

ʼE kalaga ia Kaifa: “Kua patapata ia, pe kei aoga mai kia tatou he tahiʼage u fakamooni!” ʼI te moʼi lakaga ʼaia ko ʼihi ʼe nātou fepataki pea mo ʼanuʼanuhi tona fofoga. Pea ko ʼihi ʼe nātou hoka ia ia pea mo tauveleʼi. (Mateo 26:65-​68; Maleko 14:63-​65) ʼI te hili ʼo te māfoatā ʼi te Feliaono, ʼe toe fakatahi ai te Sanetualio, heʼe lagi nātou loto ke hage ʼe faitotonu te fakamāu loi ʼaē neʼe nātou fai ʼi te ʼanapō. ʼAki he lototoʼa ʼe toe fakahā ai e Sesu ko ia te Kilisito, te ʼAlo ʼo te ʼAtua.​—Luka 22:66-​71.

Ki muli age, ko te kau pelepitelo pule pea mo te kau tagata ʼāfea ʼe nātou ʼave ia Sesu kia Posio Pilato, te kovana Loma ʼo Sutea. Pea nātou ʼui ʼe faigaʼi e Sesu ke agatuʼu te hahaʼi ki te puleʼaga heʼe ina tapuʼi te totogi ʼo te tukuhau kia Sesale pea ina “lau e ko ia totonu te Mesia, te Hau.” (Luka 23:2; fakatatau mo Maleko 12:17.) ʼI tana ʼosi fakafehuʼi ia Sesu, ʼe ʼui fēnei e Pilato: “E mole au mau he hala i te tagata-nei.” (Luka 23:4) ʼI te ʼiloʼi ʼa Pilato ko Sesu te Kalilea, ʼe ina ʼave ia ia kia Helote Atipasi, te pule ʼo Kalilea, ʼaē ʼe nofo ʼi Selusalemi ki te Pāsikate. Kae ʼe mole fia fakahoko te faitotonu e Helote. ʼE fia sio pe ia ki te fai milakulo ʼa Sesu. Mai tona ʼuhiga ʼaē ʼe mole fai e Sesu te meʼa ʼaē ʼe loto kiai, koia ʼe fakalainoaʼi ia ia e Helote pea mo tana kau solia pea nātou toe ʼave ia ia kia Pilato.

ʼE toe fai e Pilato te fehuʼi ʼaenī: “Pe kotea te kovi nee fai e te tagata-nei? E mole au mau he hala ia te ia e tuha mo te mate. E au taute anai ia pea e au fakaateainaʼage.” (Luka 23:22) Koia ʼe fakatotonu ke haha te tuʼa ʼa Sesu ʼaki te huipi neʼe faʼu ʼaki te lauʼi kiliʼi pipi pea ʼe fakatupu mamahi ʼaupito kia ia ʼi te haehae ʼo tona tuʼa. Pea ʼe ʼai e te kau solia te pale talatala ki tona ʼulu. ʼE nātou vāʼi ia ia pea mo taʼi tona ʼulu ʼaki te kaho fefeka, ʼo toe ʼāsili hū ai te ʼu talatala ʼo tona pale. Logope la te mamahi lahi pea mo tona tauveleʼi, ʼe nofo mālohi ia Sesu pea mo taupau tona ʼalikisia.

Ko Pilato​—ʼaē ʼe lagi manatu ʼe manavaʼofa anai te hahaʼi ʼi tanatou sio ki te ʼu lavea ʼo Sesu​—ʼe ina toe fakahā ia ia kia nātou. Pea ina ʼui fēnei: “Koʼeni ʼe ʼau ʼaumai ia ia ki tuʼa kia koutou, koteʼuhi ke koutou ʼiloʼi ʼe mole ʼau maʼu he hala ia te ia.” Kae neʼe kalaga fēnei te kau pelepitelo pule: “Haʼi ia ia ki he pou!” (Soane 19⁠:​4-6, NW) ʼI te kole mālohi ʼa te hahaʼi ia te faʼahi ʼaia, ʼe tali e Pilato ke haʼi ia Sesu ki he pou.

Te Mate Fakamamahi ʼa Sesu

ʼI te temi nei, ko te vaelua leva ʼaenī ʼo te uhu ʼo te Feliaono, ʼaho 14 ʼo Nisani; kua lagi vave fetapā. ʼE ʼave ia Sesu ki tuʼa ʼo Selusalemi ki te potu ʼaē ʼe higoa ko Kolokota. Pea tutuki ai e te kau solia ki te pou fakamamahi tona ʼu vaʼe pea mo tona ʼu nima, ʼaki te ʼu faʼo lalahi. ʼE mole feala ke maʼu he ʼu kupu moʼo fakamatala te fakamataku ʼo tona mamahi, heʼe ko te temi ʼaē ʼe fakatuʼu ai te pou, ʼe ʼāsili ava tona ʼu mataʼi lavea, ʼuhi ko te mamafa ʼo tona sino. ʼE fakatahitahi te hahaʼi tokolahi ʼo mamata kia Sesu pea mo te ʼu tagata kaihaʼa e lua ʼaē neʼe tutuki ʼi te tahi ʼu pou. Ko te tokolahi ia nātou ʼe nātou manukinuki kia Sesu ʼo ʼui maʼa nātou: “Nee ina fakamauli ihiʼage, pea e mole feala tana fakamauli iaʼia.” ʼO feiā mo te kau pelepitelo pule pea mo te ʼu tagata kaihaʼa e lua ʼe nātou vāʼi ia Sesu.​—Mateo 27:41-​44.

ʼE mole heʼeki faʼa fualoa te tautau ʼa Sesu ʼi te pou, pea fokifā ʼi te fetapā ʼe fakahoko e te ʼAtua te fakapōʼuli faikehe, ʼo pōʼuli ai te fenua ia hola e tolu.a Lagi ko te faʼahi ʼaia neʼe ina uga te tagata kaihaʼa ke ina fakatonutonuʼi te lua tagata kaihaʼa. Pea ʼi tana haga kia Sesu ʼe ina kole fēnei age: “Manatui au moka ke haeleʼage ki tou Puleaga.” ʼE ko he tui makehe ʼaia ʼi te vave hoko mai ʼo tana mate! Pea tali age e Sesu: “Mooni, e au tala atu kia te koe i te aho nei, e ke fakatahi anai mo au i te Palatiso.”​—Luka 23: 39-​43.

ʼI te hola tolu hoʼatā, ʼe logoʼi e Sesu kua ōvi mai tona mate. ʼO ina ʼui ai: “E au fia inu.” Pea kalaga leʼolahi: “E toku Atua, e toku Atua, kotea ae kua ke liaki ai au?” ʼE ina logoʼi ʼe kua toʼo e tana Tāmai te puipui ʼaē neʼe ina maʼu, ke feala he ʼahiʼahiʼi katoa ʼo tana agatonu, pea ʼe ina fakaʼaogaʼi te ʼu palalau ʼa Tavite. ʼE hiki ake e te tagata ki te gutu ʼo Sesu te eposi neʼe palapalaʼi ʼaki te vino kona. ʼI tana ʼinu te vino, ʼe ina ʼui fēnei: “Kua katoa te meafuape!” Pea ʼe kalaga, “Tamai, e au tuku atu ki ou nima toku laumalie.” Pea falele ai tona ʼulu pea mate.​—Soane 19:28-​30; Mateo 27:46; Luka 23:46; Pesalemo 22⁠:1.

Mai tona ʼuhiga ʼaē kua vave afiafi, koia ʼe fai fakavilivili ai te ʼu fakatuʼutuʼu ki te ʼavaifo ʼo Sesu ʼi muʼa ʼo te kamata ʼo te Sapato (ʼaho 15 ʼo Nisani) ʼi te tō ʼo te laʼā. Ko Sosefo ʼo Alimatea, ko te tagata neʼe ʼiloa tāfito ʼi te Sanetualio pea neʼe ko he tisipulo fakafūfū ʼa Sesu, ʼe fakagafua kia ia ke ina fai tona ʼavaifo. Ko Nikotemo ko te tahi tagata ʼo te Sanetualio, pea ʼe tui mo ia kia Sesu kae mole ina fakahā te faʼahi ʼaia, pea ʼe lagolago ki te ʼavaifo ʼaia ʼo ina foaki te mila pea mo te aloesi ʼaē ko tonā mamafa ko kilo e 33. ʼOsi ʼaia pea nā ʼai te sino ʼo Sesu ki te falemaka fakamanatu foʼou ʼe ōvi mai ki te faʼahi ʼaia.

Kua Toe Maʼuli!

ʼI te ʼAhotapu māfoatā ka kei pōʼuli, ko Malia Maketalena pea mo ʼihi fafine, ʼi tanatou kaku atu ki te falemaka, ʼe nātou fakatokagaʼi neʼe fakatekaʼi te foʼi maka mai te hūʼaga. ʼE lele ia Malia Maketalena ʼo tala age te meʼa ʼaia kia Petelo pea mo Soane. (Soane 20:1, 2) ʼI tana ʼosi ʼalu, ʼe hā ai te ʼaselo ki te tahi ʼu fafine ʼo ina ʼui fēnei age: “Aua taulua manavahe.” Pea ʼe ina fakatotonu age kia nāua: “Koulua fakavilivili o olo, koulua tala ki ana tisipulo kua tuuake mai te mate.”​—Mateo 28:​2-7.

ʼI tanā lolotoga feleleʼi, ʼe haʼu ia Sesu ʼo faka felāveʼi mai kia nāua pea mo ʼui age: “Olo-la o fakaha ki oku tehina.” (Mateo 28:​8-​10) Ki muli age, ʼe toe hā ia Sesu kia Malia Maketalena ʼaē neʼe tuʼu ōvi ki te falemaka ʼo tagi ai. ʼI te lahi ʼaupito ʼo tana fiafia, ʼe lele ʼo tala ki te kau tisipulo te meʼa taulekaleka ʼaia neʼe hoko. (Soane 20:11-​18) ʼI tona fakahagatonu, ʼi te ʼAhotapu pe ʼaia neʼe hā tuʼa nima ia Sesu ʼaē kua fakatuʼuake ki tana ʼu tisipulo kehekehe, pea neʼe mole kei feala ke nātou lotolotolua ʼe kua toe maʼuli!

ʼE Malave Kia Koutou Te Mate ʼa Sesu

ʼE malave feafeaʼi kia tatou te ʼu meʼa ʼaia neʼe hoko kua hili kiai taʼu e 1 966 ʼi tatatou ʼamanaki hū ki te 21 sēkulō? ʼE ʼui mai e te tagata neʼe sio mata kiai: “Nee fakaha fenei te ofa o te Atua kia tatou: nee ina fekaui mai tona Alo ulutokotahi ki te malama-nei, ke tou mauli aki iaʼia. Koeni ia te ofa: e mole ko tatou ae nee oʼofa ki te Atua, kae, ko ia ae nee ofa kia tatou pea nee ina fekaui mai tona Alo ke vikitima [“ko he sakilifisio faifakalelei,” NW] o uhiga mo te fakamolemole o atatou agahala.”​—1 Soane 4:​9, 10.

He koʼe ʼe feala ke kita ʼui ko te mate ʼa Sesu ʼe ko “he sakilifisio faifakalelei”? ʼE ko he meʼa faifakalelei heʼe ina faka fealagia ke felogoi te hahaʼi mo te ʼAtua. Ko te ʼuluaki tagata, ko Atama, neʼe agatuʼu ki te ʼAtua ʼo ina tuku fakaholo ai ki tona ʼu hōloga te agahala pea mo te mate. ʼI te tahi faʼahi, neʼe foaki e Sesu tona maʼuli moʼo totogi te agahala pea mo te mate ʼo te malamanei, pea neʼe ko he tafitoʼaga ki te fakamolemole pea mo te manavaʼofa ʼa te ʼAtua. (1 Timoteo 2:​5, 6) ʼI takotou tui ki te sakilifisio faifakalelei ʼa Sesu, ʼe feala ai ke faka ʼāteaina koutou mai te tautea ʼaē neʼe tuku atu kia koutou e Atama ʼi tana agahala. (Loma 5:​12; 6:​23) Tahi ʼaē meʼa, ʼe feala anai ke koutou felogoi mo tokotou Tāmai ʼofa ʼaē ʼe ʼi selo, ia Sehova ʼAtua. ʼE feala ke tou ʼui, ko te sakilifisio maʼuhiga ʼo Sesu ʼe ina foaki atu kia koutou te fealagia ʼaē ke koutou maʼuli ʼo heʼegata.​—Soane 3:​16; 17:3.

Ko te faʼahi ʼaia pea mo te tahi ʼu meʼa ʼe pipiki kiai ʼe fakamahino anai ʼi te Felianima afiafi, ʼaho 1 ʼo ʼApelili, ʼi te ʼu fale fono ʼe lauʼi afe ʼi te malamanei katoa, ʼaē ka fakatahitahi ai te toko lauʼi miliona hahaʼi moʼo fakamanatuʼi te mate ʼa Sesu Kilisito. ʼE fakaafe atu koutou ke koutou kau kiai. Koia, koutou fakalavelave ki te kau Fakamoʼoni ʼa Sehova ʼo tokotou kolo, pe kofea pea ko te hola fia ʼaē ka fai ai te fono ʼaia, pea ʼe nātou fiafia anai ʼi te tokoni atu kia koutou. Kapau ʼe koutou kau kiai pea ʼe tuputupu anai takotou loto fakafetaʼi ki te meʼa ʼaē neʼe fai e totatou ʼAtua ʼofa pea mo tona ʼAlo ʼofaina ʼi te ʼaho fakamuli ʼo tana maʼuli ʼi te kele.

[Nota ʼi te lalo pasina]

[Talanoa ʼo te pasina 7]

TE MATE ʼO SESU MO TONA FAKATUʼUAKE

NISANI, TE ʼU MEʼA TE TAGATA ʼAĒ ʼE

TAʼU 33 O.T.T. ʼAĒ NEʼE HOKO LAHI TOKOTAHI*

ʼAho 14, Te fai ʼo te Pāsikate; 113, pal. 2 ki te

Felianima afiafi ʼe fufulu e Sesu te ʼu 117, pal. 1

vaʼe ʼo tana kau ʼapositolo;

ʼe mavae ia Sutasi moʼo lavakiʼi

ia Sesu; ʼe fakatuʼutuʼu e Sesu

te Fakamanatu ʼo tana mate

(ʼe fai anai ʼi te taʼu ʼaenī ʼi

te Felianima, ʼaho 1 ʼo ʼApelili,

ʼi te ʼosi tō ʼo te laʼā); ʼe ina

fakaloto mālohiʼi tana kau ʼapositolo

pea mo teuteuʼi nātou ki tana mavae

Mai te māʼupō ʼI te hili ʼo te faikole 117 ki

ʼo aʼu ki te māfoatā pea mo te ʼu hiva fakavikiviki, te 120

ʼe ʼolo ia Sesu pea mo tana

kau ʼapositolo ki te ʼōloto

ʼo Setesemane; ʼe faikole ia Sesu

ʼaki te ʼu kalaga pea mo tagi mālohi;

ʼe haʼu ia Sutasi Isikaliote mo te hahaʼi

tokolahi pea ʼe ina lavakiʼi ia Sesu;

ʼe līaki ia Sesu e tana kau ʼapositolo

ʼi tona haʼi pea mo tona ʼave kia

Ana; ʼe ʼave ia Sesu ki te Pelepitelo

Lahi ko Kaifa ke fakamāuʼi e te

Sanetualio; ʼe fakatūʼa ke matehi;

ʼe gaohi koviʼi pea mo tauveleʼi;

ʼe fakafisi tuʼa tolu ia Petelo kia Sesu

Feliaono uhu ʼI te māfoatā, ʼe toe ʼave Sesu 121 ki

ki te Sanetualio; ʼe ʼave kia te 124

Pilato pea kia Helote; pea ʼe

fakaliliu kia Pilato; ʼe haha ia

Sesu, mo tauveleʼi pea mo tā;

ʼuhi ko te ʼu fakaneke ʼa te

hahaʼi, ʼe tuku age e Pilato

ia Sesu kia nātou ke nātou

haʼi ki te pou; ʼe ʼave ki

Kolokota ke mate ai ʼi te

fakaʼosi ʼo te uhu

Mai te fetapā ʼI muʼa ʼo te fetapā, ʼe haʼi 125, 126

ʼo aʼu ki te ia ia ki te pou; ʼe fakapōʼuli mai

vaelua ʼo te te fetapā ʼo aʼu ki te hola

hoʼatā tolu pea mate ai ia Sesu;

ʼe hoko ai te mafuike

fakamataku; neʼe mahae lua

te lito ʼo te fale lotu

ʼI te fakaʼosi ʼI muʼa ʼo te Sapato ʼe tuku 127, pal. 1-7

ʼo te hili hoʼatā te sino ʼo Sesu ʼi te falemaka

ʼi he ʼōloto

ʼAho 15, ʼE kamata te Sapato

Feliaono afiafi

Moeaki ʼE fakagafua e Pilato ke 127, pal.

leʼoleʼo te falemaka ʼa Sesu 8, 9

ʼAho 16, ʼI te kei hegihegi ʼe kua gaʼasi 127, pal. 10

ʼAhotapu te falemaka ʼa Sesu; ʼe hā ia ki te 129,

Sesu ʼaē kua fakatuʼuake ki pal. 10

(1) te kūtuga fafine neʼe kau

ki tana ʼu tisipulo pea neʼe

kau ai ia Salome, mo Soana,

mo Malia te faʼe ʼa Sake;

(2) pea ʼe hā kia Malia Maketalena;

(3) mo Keleopasi pea mo tona kaumeʼa;

(4) mo Simone-Petelo; (5) mo te kau

ʼapositolo pea mo te ʼu tisipulo ʼaē

neʼe fakatahitahi

[Kiʼi nota]

Ko te ʼu numelo ʼaē ʼe tuʼu ʼi henī ʼe ko te ʼu kapite ʼo te tohi Te tagata ʼaē ʼe lahi tokotahi ʼo te ʼu temi fuli. Kapau ʼe koutou fia maʼu he tahi ʼu vaega faka Tohi-Tapu ʼo ʼuhiga mo te fakaʼosi ʼo te minisitelio ʼa Sesu, koutou vakaʼi te tohi “Toute Écriture est inspirée de Dieu et utile,” ʼi te pasina 278. Neʼe tā te ʼu tohi ʼaia e te Watchtower Bible and Tract Society of New York, Inc.