Ke ʼAua Naʼa Lahi Fau Takotou Hoha

“AUA tautou hoha o uhiga mo apogipogi, he hoha anai te apogipogi kia te ia totonu; e feauga’pe te aho takitahi mo ona kinakina.” (Mateo 6:​34) ʼE mahino papau ia ko te tokoni ʼaia ʼaē neʼe foaki e Sesu Kilisito, ʼe ʼaoga kia tatou fuli ʼaē ʼe tou maʼuʼuli ʼi te temi nei ʼi he sosiete ʼe maʼumaʼua lahi ai te hahaʼi pea mo nātou lotohoha.

Kae ʼe feala moʼoni koa ke ʼaua naʼa tou hoha ki ʼatatou ʼu fihifihia, mo te ʼu tonu ʼaē ka tou fai, mo tatatou ʼu gāue, pea mo tatatou ʼu maʼua? Ko hahaʼi ʼe lauʼi miliona ʼe nātou maʼuli hoha, mo maʼuli tuʼania, pea mo mamahi ʼaupito. Ko te tupuʼaga la ʼaia ʼo tanatou fakaʼaogaʼi lahi ʼo tanatou paʼaga moʼo totogi ʼaki he ʼu faitoʼo ke feala hanatou fīmālie ai.

Te Faʼahi ʼAē ʼe Mole Tonu Ke Tou Fakalaka Ai

ʼE tonu ke tou fakatuʼutuʼu pea mo fakaʼaluʼalu lelei tatatou ʼu maʼua, mo te ʼu gāue, mo te ʼu tonu ʼaē ka tou fai, pea mo te ʼu fihifihia​—peʼe nātou maʼuhiga peʼe kailoa. ʼE fakaloto mālohiʼi tatou e te Tohi-Tapu, ʼi muʼa ʼo hatatou kamata he gāue, ke tou “nofo ifo muà o vakai tona totogi.” (Luka 14:28-​30) ʼE kau kiai tatatou fakasiosio lelei te ʼu meʼa ʼaē ʼe feala ke tou fai, mo vakaʼi tona ʼu fua ki ʼamuli, pea mo fakafuafua te temi, mo te mālohi, pea mo te paʼaga ʼaē ka tou fakaʼaogaʼi kiai.

Logope la ʼe tonu ke tou vakavakaʼi fakalelei te ʼu meʼa ʼaē ʼe feala ke hoko, kae ʼe mole feala pea ʼe mole hona ʼaoga hatatou fakakaukauʼi te ʼu meʼa fuli ʼaē ʼe feala ke hoko. Ohage la, moʼo puipui tokotou famili, ʼe lagi koutou vakaʼi anai te ʼu meʼa ʼaē ʼe feala ke koutou fai mokā vela tokotou ʼapi. ʼE feala ke koutou toʼo he ʼu meʼa ʼe tatagi mokā kohu pea mo he ʼu meʼa tāmateʼi afi. ʼE feala ke koutou fai he paki ʼo te ʼu holaʼaga kehekehe ʼo tokotou ʼapi. Kae koteā te kehekehe ʼo takotou fai he ʼu fakatuʼutuʼu lelei pea mo ʼaoga pea mo takotou hoha fau kae mole hona ʼaoga? ʼE hoha he tahi mokā kamata tuʼania fau, heʼe manatu ki he ʼu tuʼuga meʼa ʼe feala ke hoko, pea ʼe lahi te ʼu meʼa ʼaē ʼe ina fakakaukauʼi kae ʼe mole ko he ʼu meʼa moʼoni. ʼI te lahi fau ʼo takotou tuʼania ʼe feala ke tupu ʼaki ai hakotou lotovaivai, heʼe koutou manatu neʼe galo he meʼa, pe neʼe mole feʼauga te ʼu meʼa ʼaē neʼe koutou fai moʼo puipui tokotou famili. Ko takotou ʼita ʼaia kia koutou ʼe feala ke liliu ko he kavega ki takotou fakakaukau, pea ʼe mole koutou mamoe ai.

Ko Moisese Ia Muʼa ʼo Falaone

Neʼe faigataʼa kia Moisese, te polofeta ʼa Sehova, ke ina fakahoko te fekau ʼaē neʼe fakatotonu age e te ʼAtua. ʼUluaki, neʼe tonu ke ʼalu Moisese kia muʼa ʼo te kau Iselaelite ʼo fakamahino age neʼe fili ia ia e Sehova ke ina fakamavae nātou mai Esipito. Pea neʼe tonu ke ʼalu Moisese kia muʼa ʼo Falaone ʼo kole age ke ina tuku age te kau Iselaelite ke ʼolo. Moʼo fakaʼosi, neʼe tonu ke taki e Moisese te lauʼi miliona hahaʼi kaugamālie ʼaia ʼi te toafa ʼo aʼu ki te fenua neʼe nofoʼi e te hahaʼi agakovi. (Ekesote 3:​1-​10) Neʼe feala ke mataku Moisese ʼi te ʼu meʼa fuli ʼaia, kae neʼe hoha fau koa ʼo ʼuhiga mo te ʼu maʼua ʼaia?

ʼE mahino ia neʼe tuʼania Moisese ʼo ʼuhiga mo te ʼu faʼahi ʼaia. Neʼe ina fehuʼi fēnei kia Sehova: “Kapau ʼe ʼau ʼalu ʼi te temi nei ki te ʼu foha ʼo Iselaele pea mo ʼau ʼui age fēnei, ‘Ko te ʼAtua ʼo takotou ʼu kui ʼaē ʼe ina fekauʼi mai ʼau kia koutou,’ pea mo nātou ʼui mai, ‘Ko ai tona huafa?’ pea koteā anai taku tali kia nātou?” Pea neʼe tali age Sehova kia ia. (Ekesote 3:​13, 14) Neʼe toe tuʼania Moisese ki te meʼa ʼaē ka hoko mo kapau neʼe mole faka tui Falaone kia ia. Pea toe tali e Sehova ki te polofeta. ʼO ʼuhiga mo te fihifihia fakaʼosi​—neʼe tala fakahagatonu e Moisese neʼe mole “ko he tagata ʼe palalau gafua.” Neʼe fakatokatoka feafeaʼi te fihifihia ʼaia? Neʼe fekauʼi e Sehova ia Alone ke ina fakahoko kia Falaone te ʼu palalau ʼo Moisese.​—Ekesote 4:​1-5, 10-​16.

ʼI tana kua ʼosi maʼu te ʼu tali ki tana ʼu fehuʼi pea mo falala ki te ʼAtua, neʼe fakahoko e Moisese te ʼu meʼa ʼaē neʼe fakatotonu age e Sehova. Neʼe mole fakamamahiʼi e Moisese ia ia totonu ʼaki he ʼu manatu fakamataku ʼo ʼuhiga mo te ʼu meʼa neʼe feala ke hoko ia muʼa ʼo Falaone, kae neʼe ina “fai ʼo mulimuli pe kiai.” (Ekesote 7:6) Kanapaula neʼe hoha fau, ʼe mahino ia neʼe feala ai ke vaivai tana tui pea mo tona lototoʼa ʼaē neʼe ʼaoga kia ia moʼo fakahoko tana gāue.

Ko te manatu lelei ʼaē neʼe maʼu e Moisese moʼo fakahoko tana gāue, ʼe ko he faʼifaʼitaki ʼaia ʼo te meʼa ʼaē neʼe higoaʼi e Paulo ko te “manatu fakatokatoka, NW.” (2 Timoteo 1:7; Tito 2:​2-6) Kanapaula neʼe mole maʼu e Moisese te manatu fakatokatoka, kanaʼauala neʼe faigafua hana hoha fau ki te fakahoko ʼo tana gāue, pea ʼe mahalo ia neʼe lagi fakafisi anai kiai.

Koutou Puleʼi Takotou ʼu Fakakaukau

ʼE koutou tali feafeaʼi mokā hoko ʼi tokotou maʼuli he ʼu ʼahiʼahi ʼo takotou tui pea mo he ʼu faigataʼaʼia? ʼE koutou hoha fau koa ʼuhi pe ko takotou manatu ʼaē ki te ʼu faigataʼaʼia ʼaē ka koutou tauʼi? Peʼe koutou manatu fakapotopoto koa? Ohage ko tona ʼui e ʼihi, ‘ ʼAua takotou fakalaka ʼi te ʼalesō ka heʼeki koutou aʼu kiai.’ Kae ʼe mole lagi ʼaoga anai ke koutou fakalaka ʼi te ʼalesō heʼe mole ʼi ai he ʼalesō! Koia he koʼe ʼe koutou hoha ki he meʼa ʼe mole lagi hoko anai? ʼE ʼui fēnei e te Tohi-Tapu: “Ko te hoha ʼaē ʼe ʼi te loto ʼo te tagata, koʼena te meʼa ʼaē ka ina fakafalele tona loto.” (Tāʼaga Lea 12:25) Ko te meʼa ʼaē ʼe tautau hoko ʼe ko te fakatuai ʼa he tahi te fai ʼo he tonu, ʼo aʼu ki te temi ʼaē kua tauhala ai.

Ko te meʼa ʼaē ʼe kovi tāfito ʼe ko te mamahi ʼi te faʼahi fakalaumālie ʼaē ʼe feala ke tupu ʼaki he hoha fau. Neʼe fakahā e Sesu Kilisito ko te manako ki “te folafola ʼo te Puleaga” ʼe feala ke tataʼo ʼaki te mālohi fakahala ʼo te ʼu koloā pea mo “te hoha o te sekulo.” (Mateo 13:19, 22) Ohage pe ko te lava tāʼofi e te ʼu vao talatala te homo ake pea mo te fua ʼa te pulapula, ʼe toe feiā pe mo kapau ʼe mole tou lolomi totatou lotohoha, ʼe feala ke ina tāʼofi tatatou tuputupu ʼi te faʼahi fakalaumālie pea mole tou maʼu ai he ʼu fua moʼo vikiʼi ʼo te ʼAtua. Ko ʼihi neʼe mole nātou foaki tonatou maʼuli kia Sehova, he neʼe nātou fakamamahiʼi ia nātou totonu pea mo nātou hoha fau. Neʼe nātou hoha ki te meʼa ʼaē ka hoko mo kapau ʼe mole nātou fakahoko tanatou fakapapau ʼaia?

Neʼe ʼui mai e te ʼapositolo ko Paulo, ʼi tatatou tau fakalaumālie, ʼe tonu ke tou faiga ke tou “puke fakapopula te fakakaukau fuape o taki ke fakalogo kia Kilisito.” (2 Kolonito 10:5) Ko Satana te Tevolo, totatou fili lahi, ʼe fiafia anai ʼi tana fakaʼaogaʼi tatatou hoha ʼaia moʼo fakavaivaiʼi tatou ʼi te faʼahi fakasino, mo te ʼu meʼa ʼaē ʼe tou logoʼi ʼi totatou loto pea mo te faʼahi fakalaumālie. ʼE faiva ʼi te fakatō ki te hele ia ia ʼaē ʼe mole nofo tokaga, ʼo ina fakaʼaogaʼi te lotolotolua. Koia neʼe toe fakatokaga e Paulo ki te kau Kilisitiano ke ʼaua naʼa nātou “tuku he faigamalie ki te temonio.” (Efeso 4:​27) ʼI tona ʼuhiga “atua o te malama-nei,” kua lavaʼi e Satana te “fakakivi . . . te ʼu fakakaukau a te hahai e mole tui.” (2 Kolonito 4:4) ʼOfa pe ke mole tou tuku ke ina puleʼi tatatou fakakaukau!

ʼE Feala Ke Koutou Maʼu He Tokoni

Ka tau he tamasiʼi mo hona fihifihia, pea ʼe feala ke ʼalu ʼo kumi tokoni ki tana tāmai ʼaē ʼe ʼofa kia ia pea mo maʼu ai he fakaloto fīmālie. ʼO toe feiā pe, ʼe feala ke tou fakaōvi kia Sehova, totatou Tāmai ʼaē ʼi selo, pea mo tou fakahā age kia te ia tatatou ʼu fihifihia. ʼI tona fakahagatonu, ʼe fakaafe tatou e Sehova ke tou tuku age kia te ia tatatou ʼu kavega pea mo tatatou lotohoha. (Pesalemo 55:22) Ohage pe ko te mole kei hoha ʼa he tamasiʼi ʼo ʼuhiga mo tana ʼu fihifihia, heʼe kua fakafimālieʼi tona loto e tana tāmai, ʼe toe feiā mo tatou, ʼe tonu ke tou tuku tatatou ʼu kavega kia Sehova pea mo tou fakahā kia te ia tatatou ʼu fihifihia.​—Sakopo 1:6.

ʼE tonu ke feafeaʼi tatatou tuku tatatou ʼu kavega kia Sehova? ʼE tali fēnei ia Filipe 4:​6, 7: “Aua naa koutou tuania i he mea, kae i te meafuape aki te faikole mo te lauga fakatahi mo te u fakafetai, koutou fakaha ki te Atua autou u kole. Pea ko te tokalelei o te Atua aia e fakalaka i te atamai fuape, e ina malui anai outou loto mo autou fakakaukau ia Kilisito Sesu.” Ei, moʼo tali ki ʼatatou ʼu faikole ʼaē ʼe tou fai tuʼumaʼu pea mo ʼatatou ʼu lauga, ʼe feala ke foaki mai e Sehova te tokalelei ʼo totatou loto, ʼaē ka ina puipui tatatou fakakaukau ke mole hoha ki he ʼu meʼa ʼe mole hona ʼaoga.​—Selemia 17:​7, 8; Mateo 6:​25-​34.

Kae ke feala hatatou mulimuli ki tatatou ʼu faikole, ʼe mole tonu ke tou nofo tokotahi pea mo tou faʼu hatatou ʼu manatu takitokotahi. (Tāʼaga Lea 18:1) Kae ʼe lelei age hatatou vakaʼi te ʼu pelesepeto pea mo te ʼu tokoni ʼo te Tohi-Tapu ʼo ʼuhiga mo tatatou fihifihia, ke mole tou falala ai ki te meʼa ʼaē kua tou mahino kiai. (Tāʼaga Lea 3:​5, 6) Ko te kau tūpulaga ʼo feiā mo nātou matutuʼa, ʼe feala ke nātou kumi ʼi te Tohi-Tapu pea mo te ʼu tohi ʼo te Sosiete he ʼu manatu ʼo ʼuhiga mo he ʼu puleʼaki ʼe tonu ke nātou fai pea mo te faʼahiga fakatokatoka ʼo tanatou ʼu fihifihia. Tahi ʼaē meʼa, ʼi te kokelekasio, ʼe lahi te ʼu tapuakina ʼe tou maʼu ʼaki te kau tagata ʼāfea ʼaē kua māhani pea mo te tahi kau Kilisitiano fakapotopoto, ʼe feala ke tou fai palalau tuʼumaʼu mo nātou. (Tāʼaga Lea 11:14; 15:22) Ko nātou ʼaē ʼe mole tau mo te fihifihia ʼaia kae nātou maʼu te manatu ʼa te ʼAtua, ʼe feala ke tokoni mai kia tatou ke kehe age tatatou faʼahiga sio ki tatatou ʼu fihifihia. Pea logope la ʼe mole nātou fai anai he puleʼaki maʼa tatou, kae ʼe feala ke nātou fakaloto mālohiʼi ʼaupito tatou pea mo lagolago kia tatou.

Tou “Atalitali Ki Te ʼAtua”

ʼE tou manatu tahi fuli anai ki te ʼui ʼaē ʼe feʼauga tatatou hoha ki te ʼu fihifihia ʼaē ʼe tau mo tatou ʼi te ʼaho fuli, pea ʼe mole tou hilifaki anai kiai he tahi ʼu tuʼania. Kapau ʼe tou hoha fau ʼo ʼuhiga mo te ʼu meʼa ʼaē ʼe feala ke hoko, ʼo tou mataku pea mo tuʼania ai, pea ʼe lelei ke tou faikole kia Sehova pea mo tou tagi kia te ia. Tou lau tana Folafola pea mo tou kumi ʼi tana kautahi te tokoni, mo te poto, pea mo te fakatokatoka. ʼE tou mahino ai anai, ʼi te ʼu ʼaluʼaga fuli pe, ʼe feala ke tou maʼu ai he tokoni moʼona tauʼi.

ʼI tona lotomamahi pea mo lotohoha, neʼe hiva fēnei te tagata fai pesalemo: “He koʼe ʼe ke lotomamahi, Ê toku nefesi, pea he koʼe ʼe ke hoha ia te ʼau? Atalitali ki te ʼAtua, heʼe ʼau toe vikiʼi anai ia ia: ʼe ko ia toku hāofaki lahi pea mo toku ʼAtua.” (Pesalemo 42:11) ʼE tonu ke tou manatu feiā mo tatou.

Ei, tou fakakaukau te ʼu meʼa ʼaē ʼe feala ke hoko moʼoni, pea tou tuku kia Sehova te ʼu meʼa ʼaē mole heʼeki hoko. “Koutou huaki autou hoha fuape kia te ia koteuhi e tokaga ia kia koutou.”​—1 Petelo 5:⁠7.

[Paki ʼo te pasina 23]

Ohage ko Tavite, ʼe koutou tuku koa takotou kavega mo takotou ʼu tuʼania kia Sehova?