ʼE Koutou Loto Fakafetaʼi Koa?
ʼI te ʼapi ʼa te kau misionea ʼi te potu hihifo ʼo afelika, neʼe ʼi ai te kuli ʼe higoa ko teddy. Ka ʼavage e he tahi he moʼi pipi kia teddy, pea neʼe ina folo atu aipe, ka mole ina gau pe la. Neʼe velahia ʼi te laʼā, pea neʼe talitali ke ʼavage hana tahi moʼi pipi. ʼI tana ʼosi kai te moʼi pipi, neʼe maliu pea ʼalu ai leva.
Neʼe mole he temi neʼe fakafetaʼi ai ia teddy ki te meʼa ʼaē neʼe foaki age kiai. Neʼe mole fakamaʼua age e he tahi ke ina fai te faʼahi ʼaia, he neʼe ko te kuli pe ia.
KO TE loto fakafetaʼi, ʼi te agamāhani ʼe mole ko he meʼa ʼe tou fakamaʼua ki te ʼu manu, kae ʼe ko he kalitate ʼe tou fakaʼamu ke fakahā e te hahaʼi. Kae ʼe tahitahiga tona maʼu. Tokolahi te hahaʼi ʼe nātou toʼo te ʼu meʼa ʼaē ʼe ʼaoga ki tonatou maʼuli pea mo nātou kumi tuʼumaʼu pe te ʼu meʼa ʼaia. Kae ʼe mole tou punamaʼuli ki te faʼahi ʼaia. Neʼe fakakikite e te Tohi-Tapu, ʼe maʼuli galo anai te hahaʼi ʼi te ʼu ʼaho fakamuli.—2 Timoteo 3:1, 2.
Kae ʼe mole feiā te aga ʼa te ʼu kaugana ʼa te ʼAtua. ʼE nātou fakalogo ki te tokoni ʼaenī neʼe fai e te ʼapositolo ko Paulo ki te kāiga lotu: “Koutou mauli i te fakafetai.”—Kolose 3:15.
Ko Sehova ʼe Loto Fakafetaʼi
ʼE tuku mai e Sehova ʼAtua he faʼifaʼitaki lelei ʼaupito ʼo ʼuhiga mo te loto fakafetaʼi. Koutou fakatokagaʼi pe koteā tana manatu ʼo ʼuhiga mo tana ʼu kaugana agatonu. ʼAki te takitaki ʼo te laumālie, neʼe tohi fēnei e Paulo ki te kau Kilisitiano Hepeleo: “E mole agakovi te Atua pea e mole ina galoi tautou gaue mo toutou ofa nee koutou fakaha o uhiga mo tona Huafa, i tautou tauhi te kaigalotu pea e kei koutou fai aipe.”—Hepeleo 6:10.
Neʼe fakahā e Sehova tana loto fakafetaʼi ki tana ʼu kaugana agatonu ʼe tokolahi. Neʼe ina tapuakina ia Apalahamo ʼo ina fakatuputupu tona hōloga, pea neʼe nātou liliu ‘ohage ko te ʼu fetuʼu ʼo te lagi pea ohage ko te ʼu fisiʼi ʼone ʼo te matatai.’ (Senesi 22:17) Moʼo fakafetaʼi ki te agatonu ʼa Sopo ʼi tona ʼahiʼahiʼi, neʼe mole gata ʼaki pe te toe foaki e Sehova kia Sopo tona ʼu koloā, kae neʼe ina foaki “ ʼo liuga lua.” (Sopo 42:10) Ko te ʼu felogoi ʼa Sehova pea mo te hahaʼi lolotoga te hisitolia ʼo te tagata, neʼe nātou fakamoʼoni ki te ʼu palalau ʼaenī: “Koteʼuhi ko Sehova, ko tona ʼu mata ʼe taka ʼi te kele katoa, ke ina fakahā tona mālohi kia nātou ʼaē ʼe katoa tonatou loto kia te ia.”—2 Fakamatala 16:9.
Ko te loto fakafetaʼi ʼa te ʼAtua pea mo tana fia fakapale ia nātou ʼaē ʼe nātou fai tona finegalo, ʼe ko he ʼu faʼahi tāfito ʼaia ʼo tona ʼulugaaga. ʼE maʼuhiga ʼaupito te faʼahi ʼaia ki te tui faka Kilisitiano. Neʼe tohi fēnei e Paulo: “E mole feala ki he tahi ke lelei ki te Atua, kapau e mole ina maù te tui, he ko ae e laka ki te Atua, e maua ke tui, . . . pea e ina fakapale natou e natou kumi iaʼia.”—Hepeleo 11:6.
Kanapaula neʼe aga fefeka ia Sehova kia tatou, ʼe mahino ia ʼe ina tauteaʼi fuli anai tatou. Kua fualoa ki muʼa atu, neʼe fakahā e te tagata fai pesalemo ia te faʼahi ʼaia: “Kanapaula neʼe ke fakasiosio te ʼu lākahala, Ê Sah, Ê Sehova, ko ai koa ʼaē ʼe feala anai ke tuʼu?” (Pesalemo 130:3) ʼE mole maʼuli galo ia Sehova pea ʼe mole ina valoki te hahaʼi. ʼE ʼofa kia nātou ʼaē ʼe nātou tauhi kia te ia pea ʼe ina maʼu te loto fakafetaʼi.
Ko Sesu—Ko He Tahi Neʼe Ina Maʼu Te Loto Fakafetaʼi
Neʼe lelei ʼaupito te maʼuliʼi e Sesu ia te ʼu kalitate ʼo tana Tāmai ʼaē ʼi selo, koia neʼe loto fakafetaʼi mo ia ki te ʼu gāue ʼaē neʼe fakahoko e te hahaʼi ʼaki tanatou tui. Tou vakaʼi te meʼa ʼaē neʼe hoko ʼi te fale lotu ʼi Selusalemi: “Pea i te tagaki ake ona fofoga, nee mamata Sesu ki te tuku e te hahai maukoloa anatou meaofa ki te tanakiʼaga koloa. Pea nee mamata ki he finetaka masiva nee ina tuku ki ai tana kii fala-lua. Pea nee folafola maʼana: ‘Mooni, e au tala atu kia koutou, e lahiʼage te mea nee tuku e te finetaka masiva aeni ia natou fuli. Koteuhi nee natou li te toe o onatou koloa ki te u molaga, kae kia te ia, mai tona masiva, nee ina li te mea nee ina mau, tona mauliʼaga katoa.’ ”—Luka 21:1-4.
ʼE moʼoni, kapau ʼe tou fakasiosio te falā ʼaia, neʼe veliveli mokā fakatatau ki te ʼu meʼa ʼofa ʼa te hahaʼi maʼu koloā. Ko te hahaʼi ʼaē neʼe ʼi te fale lotu, neʼe mole lagi nātou tokagaʼi pe la te finetaka ʼaia. Kae neʼe tokagaʼi ia ia e Sesu. Neʼe mahino ki tona ʼu faigataʼaʼia. Neʼe sio Sesu kia ia pea neʼe loto fakafetaʼi ki ai.
Koʼeni te tahi fakamatala ʼo te fafine maʼu koloā, ko Malia. ʼI te takoto ʼa Sesu ʼi te temi kai, neʼe ina huaʼi te lolo magoni ʼe totogi kovi ki te ʼu vaʼe pea mo te ʼulu ʼo Sesu. Neʼe valokiʼi e ʼihi tana fai te aga ʼaia, ʼo nātou ʼui, neʼe feala ke fakatau te moʼi lolo ʼaia pea mo vaevae te falā ki te kau masiva. Neʼe koteā te tali ʼa Sesu? Neʼe ina ʼui fēnei: “Koutou haganoa ki ai. Kotea te tupuaga o tautou fakakinakinaʼi ia. E ko he gaue lelei kua ina fai mai kia te au. Mooni, e au tala atu kia koutou, he faahipe i te malama-nei katoa e fakaha ai te Evaselio, pea e talanoaʼi anai te mea nee fai e te fafine-nei, mo ona fakamanatu.”—Maleko 14:3-6, 9; Soane 12:3.
Neʼe mole valokiʼi e Sesu peʼe meo ʼo ʼuhiga mo te fakaʼaogaʼi ʼo te lolo magoni ʼaia. Neʼe fakafetaʼi ki te fakahā ʼaia ʼa Malia tana ʼofa pea mo tana tui. ʼE fakamatala mai e te Tohi-Tapu ia te faʼahi ʼaia moʼo fakamanatuʼi mai tana gāue lelei ʼaia. ʼE hā mai ʼi te ʼu fakamatala ʼaia, ko Sesu neʼe ko he tagata neʼe loto fakafetaʼi moʼoni.
Kapau ko koutou ko te kaugana ʼa te ʼAtua, pea ʼe feala hakotou ʼiloʼi papau, ʼe fakafetaʼi ia Sehova pea mo Sesu Kilisito ki takotou faiga ʼaē ke koutou lagolago ki te tauhi maʼa. ʼI tatatou ʼiloʼi ia te faʼahi ʼaia, ʼe tou fia faʼifaʼitakiʼi ia nāua ʼo tou fakahā mo tatou te loto fakafetaʼi.
ʼE Mole Loto Fakafetaʼi Ia Satana
ʼI te temi nei, tou vakaʼi te faʼifaʼitaki ʼo ia ʼaē neʼe mole loto fakafetaʼi—ko Satana te Tevolo. ʼI tana mole loto fakafetaʼi, neʼe kamata fakatuʼutuʼu e Satana te agatuʼu lahi ki te ʼAtua.
Neʼe mole fakafeauga ia Satana ki te ʼu meʼa ʼaē neʼe ina maʼu, pea neʼe ina fakakaukauʼi tuʼumaʼu pe te faʼahi ʼaia, ʼo tupu ai tana uga te hahaʼi ke nātou manatu tahi mo ia. Koutou vakaʼi te ʼu meʼa ʼaē neʼe hoko ʼi te ʼōloto ʼo Eteni. Neʼe fakatupu e Sehova te ʼuluaki taumatuʼa, ʼo ina tuku nāua ʼi he palatiso, pea neʼe ina ʼui fēnei kia nāua: “Ko te ʼu fuʼu ʼakau fuli ʼo te ʼōloto ʼe feala anai [hakoulua] kai kiai ʼo aʼu ki [takoulua] mākona.” Kae neʼe ʼi ai tonā tuʼakoi, he neʼe ʼui fēnei e te ʼAtua: “Kae ki te fuʼu ʼakau ʼo te mālama ki te meʼa ʼaē ʼe lelei pea mo te meʼa ʼaē ʼe kovi, ʼe mole tonu anai ke [koulua] kai kiai, heʼe ko te ʼaho ʼaē ka [koulua] kai anai kiai, ʼe [koulua] mate moʼoni anai.”—Senesi 2:16, 17.
Kae mole tuai, pea fakafihiʼi e Satana te ʼuhiga pule ʼa Sehova, ke mole toe falala te hahaʼi kia te ia. ʼUluaki, neʼe loto e Satana ke puli te loto fakafetaʼi ʼa Eva kia Sehova, pea ke agatuʼu kia ia, ohage pe ko ia. Neʼe kole fēnei age e Satana: “ ʼE moʼoni koa la neʼe ʼui atu e te ʼAtua ke ʼaua naʼa koulua kai ki te ʼakau fuli pe ʼo te ʼōloto?” (Senesi 3:1) Neʼe fia ʼui ai e Satana, ʼe ʼi ai te meʼa maʼuhiga ʼe fufū e te ʼAtua kia Eva, ko he meʼa ʼe feala anai ke ava ai ʼona mata pea ke liliu ai ʼo tatau mo te ʼAtua. Neʼe mole loto fakafetaʼi ia Eva ki te ʼu tapuakina lahi ʼaē neʼe kua foaki age e te ʼAtua kia ia, kae neʼe kamata holi ia ki te meʼa ʼaē neʼe tapuʼi age.—Senesi 3:5, 6.
Kua tou ʼiloʼi lelei te ʼu fua kovi ʼaē neʼe tupu mai ai. Logope la neʼe fakahigoaʼi ko Eva “koteʼuhi neʼe liliu ko te faʼe ʼo te hahaʼi maʼuli fuli pe,” kae neʼe kua liliu ʼi te tahi faʼahi, ko te faʼe ʼa te hahaʼi mate fuli. Kua maʼu e te hahaʼi fuli te agahala ʼa Atama ʼaē ʼe tupu mai ai te mate.—Senesi 3:20; Loma 5:12.
Tou Faʼifaʼitakiʼi Te ʼAtua Pea Mo Kilisito
Koutou fakatokagaʼi te kehekehe ʼa Satana pea mo Sesu. ʼE ʼui e te Tohi-Tapu ʼo ʼuhiga mo Satana, ʼe ko “te Fakahalahala o otatou tehina, iaʼia ae nee ina fakahalai natou, po mo aho, ia mua o totatou Atua.” (Apokalipesi 12:10) Kae ko Sesu, “e ina mafai te haofaki i te temi fuape ia natou e fakaovi ki te Atua aki iaʼia, koteuhi e mauli tuumau o hufaki natou.”—Hepeleo 7:25.
Ko Satana ʼe ina fakahalaʼi te ʼu kaugana ʼa te ʼAtua. Ko Sesu ʼe ina leleiʼia nātou pea mo hūfaki nātou. ʼI tanatou faʼifaʼitakiʼi ia Kilisito, ʼe tonu ke faiga te kau Kilisitiano ke nātou tokagaʼi tāfito tonatou ʼu kalitate, ʼo nātou feʼofaʼaki pea mo fefakaʼapaʼapaʼaki. Kapau ʼe nātou fai te faʼahi ʼaia, pea ʼe nātou fakahā anai tanatou loto fakafetaʼi kia ia ʼaē ʼe ina tuku mai te faʼifaʼitaki lelei ʼaupito ʼo ʼuhiga mo te loto fakafetaʼi, ia Sehova ʼAtua.—1 Kolonito 11:1.
[Paki ʼo te pasina 17]
Neʼe loto fakafetaʼi ia Sesu ki te gāue lelei ʼaē neʼe fai e Malia