ʼU Mātuʼa, Koteā Te Faʼifaʼitaki ʼAē ʼe Koutou Tuku Ki Takotou Fānau?
“Koia, koutou liliu ko te faifaitaki o te Atua, ke tuha mo he u fanau ofaina.”—Efeso 5:1, 2.
1. Koteā te ʼu fakatotonu ʼaē neʼe foaki e Sehova ki te ʼuluaki taumatuʼa?
KO SEHOVA ʼe ko te Tupuʼaga ʼo te famili. Mai tona ʼuhiga ʼaē neʼe ina fakatupu te ʼuluaki famili pea mo foaki ki te ʼuluaki taumatuʼa te fealagia ʼaē ke nā fanaunau, koia ʼe feala ai ke tou ʼui neʼe ina fakatupu te ʼu famili fuli. (Efeso 3:14, 15) Neʼe ina tuku kia Atama mo Eva te ʼu fakatotonu tāfito ʼo ʼuhiga mo tonā ʼu maʼua, kae neʼe toe foaki age foki kia nāua te fealagia ʼaē ke nā loto faʼitaliha moʼo fakahoko te ʼu maʼua ʼaia. (Senesi 1:28-30; 2:6, 15-22) ʼI te ʼosi agahala ʼa Atama mo Eva, neʼe liliu ʼo faigataʼa te ʼaluʼaga ʼo te maʼuli ʼo te ʼu famili. Kae ʼi tona ʼofa, neʼe foaki e Sehova he takitaki lelei moʼo tokoni ki tana ʼu kaugana ke nātou tauʼi te ʼu faigataʼaʼia.
2. (a) Koteā te fakatuʼutuʼu ʼaē neʼe fai e Sehova moʼo lagolago ki tana tokoni ʼaē neʼe tohi pea mo te akonaki ʼaē neʼe tala gutu? (b) Koteā te fehuʼi ʼaē ʼe tonu ke fai e te ʼu mātuʼa?
2 ʼI tona ʼuhiga Faiako Lahi, ko Sehova neʼe mole ina foaki mai pe he ʼu fakatotonu neʼe tohi ʼo ʼuhiga mo te ʼu meʼa ʼaē ʼe tonu ke tou fai pea mo te meʼa ʼaē ʼe tonu ke tou tekeʼi. ʼI te temi ʼāfea, neʼe ina hilifaki ki te ʼu fakatotonu ʼaē neʼe tohi, te ʼu fakatotonu ʼaē neʼe tala gutu e te kau pelepitelo, mo te kau polofeta pea mo te ʼu pule famili. Ko ai ʼaē ʼe ina toe fakaʼaogaʼi moʼo tala gutu te akonaki ʼaia ʼi totatou temi? Ko te kau tagata ʼāfea pea mo te ʼu mātuʼa. Kapau ʼe ke tāmai pea mo faʼe, ʼe ke fakahoko koa tou maʼua ʼo akoʼi te ʼu ala ʼa Sehova ki tou famili?—Tāʼaga Lea 6:20-23.
3. Koteā te ako ʼaē ʼe feala ke tāʼofi e te ʼu pule famili mai te faʼahiga ako ʼa Sehova?
3 ʼE tonu ke fai feafeaʼi te akonaki ʼaia ki te famili? ʼE tuku mai e Sehova he faʼifaʼitaki lelei. ʼE ina fakahā lelei mai te meʼa ʼaē ʼe lelei pea mo te meʼa ʼaē ʼe kovi, pea ʼe ina fai liuliuga te faʼahi ʼaia. (Ekesote 20:4, 5; Teutalonome 4:23, 24; 5:8, 9; 6:14, 15; Sosue 24:19, 20) ʼE ina fakaʼaogaʼi he ʼu fehuʼi ʼe nātou uga tatou ke tou fakakaukau. (Sopo 38:4, 8, 31) ʼE ina uga pea mo gāueʼi totatou loto ʼaki te ʼu lea fakatātā pea mo he ʼu faʼifaʼitaki neʼe hoko moʼoni. (Senesi 15:5; Taniela 3:1-29) ʼU mātuʼa, ka koutou akoʼi takotou fānau, ʼe koutou faiga koa ke koutou faʼifaʼitakiʼi ia Sehova?
4. Koteā te meʼa ʼaē ʼe tou ako mai ia Sehova ʼo ʼuhiga mo te akonaki, pea he koʼe ʼe maʼuhiga te faʼahi ʼaia?
4 ʼE mole fakahuahua ia Sehova ʼo ʼuhiga mo te meʼa ʼaē ʼe faitotonu, kae ʼe mahino ki te ʼu fua ʼo te heʼe haohaoa. Koia ʼi muʼa ʼo tana fakahoko tana ʼu tautea, ʼe ina akoʼi te hahaʼi heʼe haohaoa ʼo fai liuliuga kia nātou tana ʼu fakatokaga pea mo tana ʼu fakamanatu. (Senesi 19:15, 16; Selemia 7:23-26) Ka ina akonakiʼi he tahi, pea ʼe ina fai fakapotopoto, kae mole aga fefeka fau. (Pesalemo 103:10, 11; Isaia 28:26-29) Kapau ʼe tou akonakiʼi feiā tatatou ʼu fānau, pea ʼe ko he fakamoʼoni ʼaia ʼe tou ʼiloʼi ia Sehova, pea ʼe faigafua anai ki tatatou fānau ke nātou ʼiloʼi mo nātou ia ia.—Selemia 22:16; 1 Soane 4:8.
5. Koteā te meʼa ʼaē ʼe feala ke tāʼofi e te ʼu mātuʼa ʼo ʼuhiga mo te faʼahiga fagono ʼa Sehova?
5 ʼI meʼa taulekaleka foki, heʼe ko Sehova tatatou Tāmai ʼofa ʼaē ʼi selo ʼe fagono mai kia tatou. ʼE mole ina fai pe he ʼu fakatotonu. ʼE ina fakaloto mālohiʼi tatou ke tou fakahā katoa kia te ia te ʼu meʼa ʼaē ʼi totatou loto. (Pesalemo 62:8) Kapau ʼe mole totonu te meʼa ʼaē ʼe tou fakahā kia ia, pea ʼe mole kalaga leʼolahi anai mai selo moʼo fakatonutonuʼi tatou. ʼAki he loto faʼa kātaki, ʼe ina akoʼi tatou. Koia ʼe tau mo feʼauga ke tou fakalogo ki te tokoni ʼa te ʼapositolo ko Paulo: “Koutou liliu ko te faifaitaki o te Atua, ke tuha mo he u fanau ofaina”! (Efeso 4:31–5:1) ʼE ko he faʼifaʼitaki lelei ʼaia ʼe tuku e Sehova ki te ʼu mātuʼa ʼaē ʼe nātou faiga ke nātou akoʼi tanatou ʼu fānau! ʼE malave ki totatou loto te faʼifaʼitaki ʼaia pea ʼe ina uga tatou ke tou haʼele ʼi tona ala ʼaē ʼe ina taki ki te maʼuli.
ʼE Malave Te Faʼifaʼitaki ʼo Te ʼu Mātuʼa
6. ʼE malave feafeaʼi ki te ʼu fānau te aga pea mo te faʼifaʼitaki ʼo tanatou ʼu mātuʼa?
6 ʼO hilifaki ki te akonaki ʼaē ʼe tala gutu, ʼe malave mālohi kia nātou liliki te faʼifaʼitaki ʼaē ʼe nātou sio kiai. Tatau aipe peʼe leleiʼia te faʼahi ʼaia e te ʼu mātuʼa peʼe kailoa, kae ʼe faʼifaʼitakiʼi anai nātou e tanatou fānau. ʼE lagi fiafia anai te ʼu mātuʼa, peʼe nātou ʼiʼita mokā nātou logo ki tanatou fānau ʼe nātou fai te ʼu palalau ʼaē neʼe nātou fai. Kapau ʼe fakahā e te ʼu mātuʼa ʼi tanatou aga pea mo tanatou faʼahiga manatu tanatou leleiʼia te ʼu meʼa fakalaumālie, ʼe fua lelei anai ki tanatou ʼu fānau.—Tāʼaga Lea 20:7.
7. Koteā te faʼifaʼitaki ʼaē neʼe tuku e Sefeteo ki tona ʼofafine, pea neʼe koteā tona fua?
7 ʼE fakahā mai e te Tohi-Tapu te ʼu fua lelei ʼo te faʼifaʼitaki ʼa te ʼu mātuʼa. Ko Sefeteo, neʼe ko he tāmai pea neʼe fakaʼaogaʼi ia ia e Sehova moʼo takitaki Iselaele ke nātou mālo ʼi tanatou tau mo te kau Amonite. ʼE fakahā mai e te tali ʼaē neʼe fai e Sefeteo ki te hau Amonite, neʼe ina lau tuʼumaʼu te hisitolia ʼo ʼuhiga mo te felogoi ʼa Sehova pea mo Iselaele. Neʼe faigafua kia ia tana fakamatala te hisitolia ʼaia pea neʼe ina fakahā tana tui mālohi kia Sehova. ʼE mahino ia, ko tana faʼifaʼitaki ʼaia neʼe tokoni ki tona ʼofafine ke ina maʼu te tui mālohi pea mo te loto faka sakilifisio ʼaē neʼe ina fakahā ʼi tana tauhi taupoʼou kia Sehova ʼi tona maʼuli katoa.—Kau Fakamāu 11:14-27, 34-40; vakaʼi mo Sosue 1:8.
8. (a) Koteā te faʼifaʼitaki lelei ʼaē neʼe tuku e te ʼu mātuʼa ʼa Samuele? (b) Neʼe koteā tona fua kia Samuele?
8 Ko Samuele neʼe ko he faʼifaʼitaki lelei ʼi tana kei tamasiʼi, pea ʼi tona maʼuli katoa neʼe nofo agatonu ki te ʼAtua ʼi tana gāue faka polofeta. ʼE koutou loto koa ke hoko kia ia takotou ʼu fānau? Koutou vakaʼi te faʼifaʼitaki ʼaē neʼe tuku mai e Elekana pea mo Ana, te ʼu mātuʼa ʼa Samuele. Logope la neʼe mole fīmālie katoa te ʼaluʼaga ʼo tonā ʼapi kae neʼe nā ʼolo tuʼumaʼu ki Silo ke nā atolasio ai ki te ʼAtua he neʼe tuʼu ai te tapenakulo taputapu. (1 Samuele 1:3-8, 21) Koutou fakatokagaʼi te lotomamahi ʼaupito ʼo Ana ʼi tana faikole. (1 Samuele 1:9-13) Neʼe maʼuhiga ʼaupito kia nāua tanā fakahoko te ʼu fakapapau ʼaē neʼe nā fai ki te ʼAtua. (1 Samuele 1:22-28) ʼE mahino papau ia, ko tanā faʼifaʼitaki lelei neʼe tokoni kia Samuele ke ina maʼu te ʼu kalitate ʼaia, pea ke ina fai te meʼa ʼaē ʼe lelei ʼi tona maʼuli katoa—logola ko te hahaʼi ʼi ʼona tafa neʼe nātou ʼui ʼe nātou tauhi kia Sehova, kae neʼe nātou meʼa noaʼi te ʼu ala ʼa te ʼAtua. ʼAki te temi, neʼe fakanofo e Sehova ia Samuele ko Tana polofeta.—1 Samuele 2:11, 12; 3:1-21.
9. (a) Koteā te fakaloto mālohi ʼaē neʼe fai kia Timoteo ʼi tona loto fale pea neʼe fua lelei kia ia? (b) Neʼe liliu ʼo feafeaʼi ia Timoteo ʼi tana lahi ake?
9 ʼE koutou loto koa ke hoko takotou tama kia Timoteo ʼaē neʼe kaugā gāue mo te ʼapositolo ko Paulo ʼi tana kei tūpulaga? Neʼe mole Kilisitiano te tāmai ʼa Timoteo, kae ko tana faʼe pea mo tana kui fafine neʼe nā tuku kia ia he faʼifaʼitaki lelei he neʼe nā leleiʼia te ʼu meʼa fakalaumālie. ʼE mahino ia, neʼe ko he tafitoʼaga lelei ʼaia ki te maʼuli faka Kilisitiano ʼa Timoteo. ʼE ʼui ko tana faʼe ko Eunise pea mo tana kui fafine ko Loisa, neʼe nā “tui mooni.” Neʼe mole nā malualoi; neʼe nā maʼuliʼi moʼoni te ʼu meʼa ʼaē neʼe nā tui kiai pea neʼe nā akoʼi te tūpulaga ko Timoteo ke mulimuli ki tana faʼifaʼitaki. Neʼe fakahā e Timoteo neʼe feala ki te hahaʼi ke nātou falala kia ia pea neʼe lototokaga moʼoni ke maʼuli fīmālie te hahaʼi.—2 Timoteo 1:5; Filipe 2:20-22.
10. (a) Koteā te ʼu faʼifaʼitaki kovi ʼo tuʼa ʼaē ʼe feala ke nātou fakaneke tatatou ʼu fānau? (b) Koteā te meʼa ʼaē ʼe tonu ke tou fai mokā hā te ʼu meʼa kovi ʼaia ʼi te ʼu palalau peʼe ʼi te aga ʼo tatatou ʼu fānau?
10 Kae ʼe mole gata pe ki te ʼu faʼifaʼitaki ʼi te loto fale ʼaē ʼe malave ki tatatou fānau. ʼE toe malave kia nātou te aga ʼa te kau tamaliki ʼaē ʼe nātou ako tahi, mo te ʼu hahaʼi faiako ʼaē ʼe tonu ke nātou gāueʼi te ʼatamai ʼo te tamaliki, mo te hahaʼi ʼaē ʼe nātou manatu ʼe tonu ke kita fakalogo ki te ʼu agaʼi fenua ʼo tokita telepi peʼe ko tokita lanu, mo te hahaʼi faigaoʼi logona ʼaē ʼe vikiʼi te ʼu meʼa ʼaē ʼe nātou fai, pea mo te aga ʼo te ʼu hahaʼi ʼo te puleʼaga ʼaē ʼe talanoa ki ai te ʼu sulunale. Tahi ʼaē meʼa, ko tamaliki ʼe toko lauʼi miliona ʼe tau mo te agamālohi ʼo te tau. Koia ʼe tonu koa ke tou punamaʼuli mokā hā te ʼu aga ʼaia ʼi te ʼu palalau peʼe ko te aga ʼa tatatou fānau? Koteā te meʼa ʼaē ʼe tou fai mokā nātou fai te ʼu faʼahi ʼaia? ʼE tou fakatokatoka koa te fihifihia ʼaia ʼo tou munaʼi peʼe tou pupulaʼi nātou? ʼE mole lelei age koa la ke tou fai te fehuʼi ʼaenī kia tatou, ‘ ʼE ʼi ai koa he faʼahiga aga ʼa te ʼAtua, ʼe feala ke tokoni mai kia tatou ke tou fakatokatoka te faʼahi ʼaia?’—Vakaʼi ia Loma 2:4.
11. Mokā faihala te ʼu mātuʼa, ʼe feala ke malave feafeaʼi ki tanatou fānau?
11 ʼE mahino papau ia, ʼi ʼihi temi ʼe mole lava fakatokatoka anai e te ʼu mātuʼa heʼe haohaoa he ʼu faigataʼaʼia, pea ʼe nātou fai anai he ʼu hala. Ka sio anai te fānau ki te ʼu faʼahi ʼaia, ʼe tonu anai koa ke mole kei nātou fakaʼapaʼapa ki tanatou ʼu mātuʼa? ʼE feala ke hoko te faʼahi ʼaia tāfito mokā faiga te ʼu mātuʼa ke nātou ʼuʼufi tanatou ʼu hala ʼo nātou fakaʼaogaʼi tonatou tuʼulaga moʼo fakakinauʼi tanatou ʼu fānau. Kae ʼe feala ke kehe tona ikuʼaga mo kapau ʼe agavaivai te ʼu mātuʼa pea mo nātou ʼui fakahagatonu neʼe nātou faihala. Kapau ʼe nātou fai te faʼahi ʼaia, pea ʼe nātou tuku anai he faʼifaʼitaki lelei ki tanatou fānau ke nātou mulimuli kiai.—Sakopo 4:6.
Te ʼu Meʼa ʼAē ʼe Feala Ke Tou Akoʼi ʼAki Tatatou Faʼifaʼitaki
12, 13. (a) Koteā te faʼahi ʼaē ʼe tonu ke ako e te ʼu fānau ʼo ʼuhiga mo te ʼofa, pea ʼe lava feafeaʼi ke akoʼi fakalelei te faʼahi ʼaia kia nātou? (b) He koʼe ʼe maʼuhiga ke akoʼi te ʼofa ki te ʼu fānau?
12 ʼE lahi te ʼu ako maʼuhiga ʼe feala ke tāʼofi lelei e tanatou fānau, mo kapau ʼe ʼalutahi te ʼu palalau ʼaē ʼe fai e te ʼu mātuʼa pea mo tanatou aga. Koʼeni he ʼu meʼa ʼe tonu ke nātou ako.
13 Te Fakahā ʼo te ʼofa moʼoni: Ko te meʼa maʼuhiga tāfito ʼaē ʼe tonu ke akoʼi e te ʼu mātuʼa pea mo nātou fakahā, ʼe ko te ʼofa. “E tou ofa, koteuhi nee uluaki ofa [te ʼAtua] kia tatou.” (1 Soane 4:19) ʼE ko ia te Matapuna pea mo te faʼifaʼitaki haohaoa ʼo te ʼofa. Ko te ʼofa a·gaʹpe ʼaia ʼe fakatafito ki te ʼu pelesepeto pea ʼe tuʼa 100 tona fakaʼaogaʼi ʼi te Tohi-Tapu. ʼE ko te kalitate ʼaē ʼe ina fakaʼiloga ʼaki te kau Kilisitiano moʼoni. (Soane 13:35) ʼE tonu ke tou fakahā te ʼofa ʼaia ki te ʼAtua pea mo Sesu Kilisito, pea ke tou feʼofani mo te hahaʼi—māʼiape la mo te hahaʼi ʼaē ʼe mole tou leleiʼia. (Mateo 5:44, 45; 1 Soane 5:3) Kapau ʼe tou maʼu te ʼofa ʼaia ʼi totatou loto pea mo hā lelei ʼi totatou maʼuli, pea ʼe hoki feala ai ke tou akoʼi te faʼahi ʼaia ki tatatou ʼu fānau. Ko te ʼu gāue ʼe maʼuhiga age ʼi te ʼu palalau. ʼI te famili, ko te ʼu fānau ʼe tonu ke nātou sio pea mo logoʼi te ʼofa pea mo te tahi ʼu kalitate ʼaē ʼe pipiki kiai. Kapau ʼe mole maʼu te ʼu meʼa ʼaia ʼi te famili pea ʼe mole tuputupu lelei anai te ʼu fānau ʼi te faʼahi fakasino, mo te faʼahi fakaʼatamai pea mo te faʼahi ʼo tonatou loto. Tahi ʼaē meʼa, ʼe tonu ki te fānau ke nātou sio ki te ʼofa moʼoni ʼaē ʼe tou fakahā ki te tahi ʼu Kilisitiano ʼi tuʼa ʼo te famili.—Loma 12:10; 1 Petelo 3:8.
14. (a) ʼE lava akoʼi feafeaʼi te fānau ke nātou faiva ʼi tanatou gāue? (b) ʼE lava feafeaʼi hakotou fai te faʼahi ʼaia ʼi tokotou famili?
14 Te ako ʼo he gāue: Ko te gāue ʼe ko he meʼa maʼuhiga ʼaupito ʼo te maʼuli. Ke feala ki he tahi ke fakaʼapaʼapa kia ia totonu, ʼe tonu ke ako ke faiva ʼi he gāue. (Tagata Tānaki 2:24; 2 Tesalonika 3:10) Kapau ʼe fakatotonu ki he tamasiʼi ke ina fai he gāue kae mole poto ʼi te gāue ʼaia, pea ki muli age ʼe munaʼi ia ia he neʼe mole lelei tana gāue, ʼe mahino ia ʼe mole ina fia ako anai ke ina fai he gāue lelei. Kae kapau ʼe ako gāue te ʼu fānau mo tanatou ʼu mātuʼa, pea ʼe lagi faigafua anai tanatou ako gāue pea ʼe nātou fiafia ai anai. Kapau ʼe tuku e te ʼu mātuʼa he faʼifaʼitaki lelei pea mo fai he ʼu fakamahino lelei, pea ʼe poto anai te fānau ʼi te fakahoko ʼo he gāue, pea tahi ʼaē ʼe feala anai ke nātou fakatokatoka tonatou ʼu faigataʼaʼia, ke nātou kātaki ʼo aʼu ki te ʼosi ʼo te gāue, ke nātou poto ʼi te fakakaukau pea ke nātou fai he ʼu tonu. ʼAki te faʼahiga ako ʼaia, ʼe mahino anai kia nātou, ʼe toe gāue mo Sehova pea mo poto gāue, pea ʼe faʼifaʼitakiʼi e Sesu tana Tāmai. (Senesi 1:31; Tāʼaga Lea 8:27-31; Soane 5:17) Kapau ko he famili ʼe gāue kele peʼe ʼi ai hanatou matani gāue, pea ʼe feala ke nātou gāue fakatahi fuli. Peʼe lagi feala ke akoʼi e te faʼe tana tama peʼe ko tana taʼahine ke poto ʼi te fai kuka peʼe poto ʼi te fakamaʼa mokā nātou ʼosi kakai. Ko te tāmai ʼaē ʼe gāue mamaʼo ʼi te ʼapi, ʼe lagi feala ke ina fakatuʼutuʼu he ʼu gāue ke ina fai fakatahi mo tana ʼu fānau ʼi fale. ʼE ko he meʼa lelei mo kapau ʼe manatuʼi e te ʼu mātuʼa ʼe mole feʼauga ke nātou tuku ki tanatou ʼu fānau he ʼu gāue, kae ʼe toe ʼaoga foki ke nātou akoʼi nātou ke fua lelei ki tonatou ka haʼu!
15. ʼE lava feafeaʼi ke akoʼi ki te ʼu fānau ke nātou tui? Koutou fakahā he faʼifaʼitaki.
15 Te taupau ʼo te tui mokā hoko mai he ʼu faigataʼaʼia: Ko te tui ʼe ko te tahi meʼa maʼuhiga ʼaupito ʼo totatou maʼuli. ʼE feala ke ʼiloʼi e te ʼu fānau pe koteā te ʼuhiga ʼo te tui, mo kapau ʼi tanatou ako faka famili, ʼe nātou palalau mo tanatou ʼu mātuʼa ʼo ʼuhiga mo te faʼahi ʼaia. Tahi ʼaē meʼa, ʼe feala ke nātou mahino ki te ʼu meʼa ʼaē ka nātou fakatupu te tui ʼi tonatou loto. Kae ʼi tanatou sio ki te tui mālohi ʼo tanatou ʼu mātuʼa mokā nātou tau mo te ʼu ʼahiʼahi kovi, pea ʼe malave te faʼahi ʼaia ki tonatou loto ʼi tonatou maʼuli katoa. Ko te fafine ako Tohi-Tapu ʼo Panama neʼe ʼui age ki ai e tona ʼohoana, ʼe ina kapu anai ia ia mo kapau ʼe mole ina tuku tana tauhi kia Sehova. Kae neʼe haʼele mo tana ʼu fānau liliki ʼe toko fā ia kilometa e 16, pea neʼe nātou ʼolo kā ia kilometa e 30 ʼo aʼu ki te Fale ʼo Te Puleʼaga. Ko tana faʼifaʼitaki ʼaia neʼe ina fakaloto mālohiʼi te toko 20 ʼo tona famili ke nātou tali te moʼoni.
Koutou Tuku He Faʼifaʼitaki ʼo Koutou Lau Te Tohi-Tapu ʼi Te ʼAho Fuli
16. He koʼe ʼe uga te ʼu famili ke nātou lau te Tohi-Tapu ʼi te ʼaho fuli?
16 Ko te lau ʼo te Tohi-Tapu ʼi te ʼaho fuli, ʼe ko he meʼa lelei ke fai māhani e he famili, heʼe fua lelei anai ki te ʼu mātuʼa pea ʼe ko he faʼifaʼitaki lelei ki te ʼu fānau. Kapau ʼe feala, pea koutou lau he koga Tohi-Tapu ʼi te ʼaho fuli. ʼE mole faʼa maʼuhiga pe ko pasina ʼe fia ʼaē ʼe kita lau. Kae ʼe maʼuhiga tāfito ke kita fai tuʼumaʼu pea mo fai fakalelei. Kia nātou liliki, ko te lau ʼo te Tohi-Tapu ʼe feala ke fai ʼaki te fakatagi ʼo te ʼu foʼi fime ʼo te Recueil d’histoires bibliques mo kapau ʼe maʼu ʼi takotou lea. Kapau ʼe tou lau te Tohi-Tapu ʼi te ʼaho fuli pea ʼe feala anai ke tou faka maʼuhigaʼi te ʼu manatu ʼa te ʼAtua. Pea kapau ʼe ko te ʼu famili katoa ʼaē ʼe nātou lau fakatahi te Tohi-Tapu, ʼe tokoni anai te faʼahi ʼaia ke haʼele te ʼu famili katoa ʼi te ʼu ala ʼa Sehova. ʼI te kiʼi gaoʼi ʼU Famili—Koutou Fakamāmāhani ʼi Te Lau ʼo Te Tohi-Tapu ʼi Te ʼAho Fuli ʼaē neʼe fai ʼi te fakatahi “Te Faʼahiga Maʼuli ʼAē ʼe Fakamaʼua Mai e Te ʼAtua,” neʼe fakaloto mālohiʼi ai tatou ke tou fai māhani te faʼahi ʼaia.—Pesalemo 1:1-3.
17. Ko te lau pea mo te ako fakaʼatamai ʼo he ʼu vaega Tohi-Tapu maʼuhiga, ʼe tokoni feafeaʼi anai ki te ʼu famili ke nātou maʼuliʼi te tokoni ʼo Efeso 6:4?
17 Ko te lau faka famili ʼo te Tohi-Tapu ʼe ʼalutahi mo te meʼa ʼaē neʼe tohi fēnei e te ʼapositolo ko Paulo ki te kau Kilisitiano ʼo Efeso: “Pea u tamai, aua tautou fakatupu ita ki autou fanau, kae koutou fakaʼako natou ki te fakalogo mo te u fakatokaga i te malama o te Aliki.” (Efeso 6:4) Koteā tona faka ʼuhiga? Ko te “malama o te Aliki” ko tona faka ʼuhiga “ke kita ʼai he ʼu manatu ki loto”; koia ʼe uga te ʼu tāmai Kilisitiano ke nātou ʼai te manatu ʼa Sehova ʼAtua ki te loto ʼo tanatou ʼu fānau, ke nātou ʼiloʼi ai pe koteā te ʼu manatu ʼa te ʼAtua. Moʼo tokoni kia nātou ʼo ʼuhiga mo te faʼahi ʼaia, ʼe tonu ki te ʼu mātuʼa ke nātou fakaloto mālohiʼi tanatou ʼu fānau ke nātou ako fakaʼatamai te ʼu vaega Tohi-Tapu. ʼE nātou fakaʼamu ai ke takitaki tanatou ʼu fānau e te ʼu manatu ʼa Sehova, pea ke hā ʼi tanatou ʼu holi pea mo tanatou aga te ʼu lekula fakaʼatua, tatau aipe peʼe nātou fakatahi mo tanatou ʼu mātuʼa peʼe kailoa. Ko te Tohi-Tapu ʼe ko te tafitoʼaga ʼo te faʼahiga manatu ʼaia.—Teutalonome 6:6, 7.
18. Ka tou lau te Tohi-Tapu, koteā ʼaē ʼe ʼaoga kia tatou (a) ke lava hatatou mahino lelei kiai? (b) ke fua lelei kia tatou tana ʼu tokoni? (c) ke tou fai te meʼa ʼaē ʼe ina fakahā mai ʼo ʼuhiga mo te fakatuʼutuʼu ʼa Sehova? (d) ke fua lelei kia tatou te ʼu fakamatala ʼo ʼuhiga mo te ʼu aga ʼa te hahaʼi pea mo te ʼu meʼa ʼaē ʼe nātou fai?
18 ʼE mahino papau ia, kapau ʼe tou loto ke fetogi e te Tohi-Tapu totatou maʼuli, pea ʼe tonu ke tou mahino ki te ʼu meʼa ʼaē ʼe talanoa kiai. Ki te tokolahi, ʼe lagi faka ʼuhiga anai ke nātou lau liuliuga he ʼu koga ʼo te Tohi-Tapu. ʼE lagi ʼaoga anai ke tou vakaʼi te tikisionalio peʼe ko te tohi Étude perspicace des Écritures ke tou mahino lelei ai ki he ʼu faʼahiga palalau. Kapau ko te vaega Tohi-Tapu ʼe talanoa ki he ʼu tokoni peʼe ko he fakatotonu, pea koutou toʼo he temi moʼo palalau ʼo ʼuhiga mo te ʼu ʼaluʼaga ʼo totatou temi ʼaē ʼe feala ke fakaʼaogaʼi kiai. ʼE feala ai leva ke koutou fai te fehuʼi ʼaenī, ‘Koteā anai tona ʼu fua kia tatou mo kapau ʼe tou maʼuliʼi te ʼu tokoni ʼaia?’ (Isaia 48:17, 18) Kapau ʼe talanoa te koga Tohi-Tapu ki te fakatuʼutuʼu ʼa Sehova, pea koutou fai te fehuʼi ʼaenī, ‘ ʼE lava feafeaʼi ki te faʼahi ʼaia ke malave ki totatou maʼuli?’ Lagi ʼe koutou lau he koga Tohi-Tapu ʼe talanoa ai ki te ʼu aga ʼa te hahaʼi pea mo te ʼu meʼa ʼaē ʼe nātou fai. Koteā te ʼu fakaneke ʼaē neʼe fai kia nātou? Neʼe nātou tauʼi feafeaʼi te ʼu faʼahi ʼaia? Koteā tona ʼaoga kia tatou? Koutou toʼo he temi ke koutou palalau ki te faka ʼuhiga ʼo te fakamatala ʼaia ki totatou maʼuli ia ʼaho nei.—Loma 15:4; 1 Kolonito 10:11.
19. Kapau ʼe tou faʼifaʼitakiʼi te ʼAtua, pea koteā te meʼa ʼaē ʼe tou tuku anai ki tatatou ʼu fānau?
19 ʼE lelei te faʼahiga fai ʼaia moʼo fakahū te ʼu manatu ʼa te ʼAtua ki totatou loto pea mo totatou ʼatamai! Kapau ʼe tou fai te faʼahi ʼaia pea ʼe feala anai ke tou liliu ko he kau “faifaitaki o te Atua, ke tuha mo he u fanau ofaina.” (Efeso 5:1) Pea ʼe tou tuku anai ki tatatou ʼu fānau he faʼifaʼitaki ʼe tau mo feʼauga ke nātou mulimuli kiai.
Kei Koutou Manatuʼi Koa?
◻ ʼE lava feafeaʼi ke fua lelei ki te ʼu mātuʼa te faʼifaʼitaki ʼa Sehova?
◻ He koʼe koa ʼe tonu ki te ʼu mātuʼa ke mole gata pe ki tanatou fai he akonaki ʼe tala gutu, kae ke nātou tuku foki he faʼifaʼitaki lelei ki tanatou fānau?
◻ Koteā te ʼu ako lelei ʼaē ʼe maʼu e te ʼu fānau mokā tuku e te ʼu mātuʼa he faʼifaʼitaki lelei?
◻ ʼE lava maʼu feafeaʼi e te ʼu famili he ʼu fua lelei mokā nātou lau fakatahi te Tohi-Tapu?
[Paki ʼo te pasina 10]
ʼE lahi te ʼu famili ʼe nātou leleiʼia tanatou lau fakatahi te Tohi-Tapu ʼi te ʼaho fuli