Neʼe Nātou Fai Te Finegalo ʼo Sehova

Ko Te ʼAʼahi Neʼe Tupu Ai Te ʼu Fakapale Lahi

KO TE folau mai Sepa ki Selusalemi neʼe fakatupu gaʼegaʼe ʼaupito ki te fineʼaliki. Neʼe māhani ʼi te nofo ʼi he toe ʼapi matalelei ʼaupito. Kae ʼi te lakaga nei, kua tonu ke heka ʼi te kamelo ʼe haʼele totoho ʼo fakalaka ʼi te toafa vevela ʼaupito e kilometa 2 400. Neʼe fakafuafua ko te folau ʼaia neʼe fai ia ʼaho e 75, pea ʼe mole lau ai te toe liliu mai!a

He koʼe neʼe mavae te fineʼaliki maʼu koloā ʼaia ʼi tona ʼapi matalelei ʼi Sepa, moʼo fakahoko te folau faigataʼa ʼaia?

Neʼe Ina Maʼu He ʼu Logo Makehe

Ko te fineʼaliki ʼo Sepa neʼe haʼu ki Selusalemi ʼi tana ʼosi “logo ki te talanoa ʼaē neʼe fai kia Salomone ʼo ʼuhiga mo te huafa ʼo Sehova.” (1 Hau 10:1) ʼE mole fakahā fakahagatonu mai pe koteā te logo ʼaē neʼe maʼu e te fineʼaliki. Kae ʼe tou ʼiloʼi, neʼe tapuakinaʼi e Sehova ia Salomone ʼo ina foaki age te poto, mo te koloā, pea mo te fakaʼapaʼapa. (2 Fakamatala 1:​11, 12) Neʼe mālama feafeaʼi te fineʼaliki ki te faʼahi ʼaia? Mai tona ʼuhiga ʼaē ko Sepa neʼe ko te kolo neʼe fai tāfito ai te faifakatau, koia neʼe lagi maʼu logo ʼo ʼuhiga mo Salomone ʼaki te hahaʼi faifakatau ʼaē neʼe ʼōmai ki tona fenua. Neʼe lagi ʼolo ʼihi ia nātou ki Ofile, ko he fenua neʼe lahi ʼaupito ai te faifakatau ʼa Salomone.​—1 Hau 9:​26-​28.

Ko te fineʼaliki neʼe tau mai ki Selusalemi “mo he hahaʼi folau kaugamālie, pea mo he ʼu kamelo neʼe nātou ʼamo te lolo magoni mo te toe aulo lahi pea mo te ʼu maka maʼugataʼa.” (1 Hau 10:2a) ʼE ʼui e ʼihi, neʼe ʼi ai te kau solia ʼi te “hahaʼi folau kaugamālie” ʼaia. ʼE mole tou punamaʼuli ki te faʼahi ʼaia, he ko te fineʼaliki ʼaia neʼe ko te pule mālohi pea neʼe folau mo te ʼu koloā neʼe totogi kovi ʼaupito.b

Kae koutou fakatokagaʼi, neʼe logo te fineʼaliki ʼaia ki te logona ʼa Salomone “ ʼo ʼuhiga mo te huafa ʼo Sehova.” Koia, neʼe mole folau pe ke ina foaki age tona ʼu koloā. ʼE hā mai, neʼe folau tāfito te fineʼaliki ke logo ki te poto ʼa Salomone​—pea lagi ke ina ako he ʼu meʼa ʼo ʼuhiga mo tana ʼAtua, ia Sehova. Mai tona ʼuhiga ʼaē neʼe kau ʼi te hōloga ʼa Semi peʼe ʼa Kami ʼaē neʼe nā tauhi kia Sehova, koia neʼe lagi ina fia ʼiloʼi he ʼu meʼa ʼo ʼuhiga mo te lotu ʼo tana ʼu kui.

ʼE Ina Fai He ʼu Fehuʼi Faigataʼa, Pea ʼe Fai Age He ʼu Tali Lelei

ʼI tana felāveʼi mo Salomone, neʼe kamata fai age ki ai e te fineʼaliki he ʼu “fehuʼi faigataʼa.” (1 Hau 10:1) Ko te kupu faka Hepeleo ʼaē ʼe fakaʼaogaʼi ʼi henī ʼe feala ke fakaliliu ʼaki te kupu “fakamatala.” ʼE mole faka ʼuhiga leva neʼe fai palalau te fineʼaliki pea mo Salomone ki he ʼu faʼahi ʼe mole hona ʼaoga. ʼE feala ke tou fakatokagaʼi ia Pesalemo 49:4, ko te kupu faka Hepeleo ʼaia ʼe fakaʼaogaʼi moʼo talanoa ki te ʼu faʼahi maʼuhiga ohage ko te agahala, mo te mate, pea mo te totogi ʼo te hahaʼi. Koia ʼe hā mai, neʼe fai palalau te fineʼaliki ʼo Sepa pea mo Salomone ʼo ʼuhiga mo he ʼu faʼahi maʼuhiga ke ina ʼiloʼi te lahi ʼo tana poto. ʼE ʼui mai e te Tohi-Tapu, neʼe ina “kamata fakahā kia ia te ʼu meʼa fuli ʼaē neʼe logoʼi e tona loto.” Pea ko Salomone, “neʼe ina fakahā age ki ai tana ʼu fihifihia fuli. Pea neʼe mole he fihifihia neʼe ū ki te hau ʼo mole feala hana fakahā age ki ai.”​—1 Hau 10:​2b, 3.

Neʼe ōfo ʼaupito te fineʼaliki ʼo Sepa ʼi tana sio ki te poto ʼa Salomone pea mo te maʼuli lelei ʼo tona puleʼaga, pea “neʼe puli tona laumālie ia te ia.” (1 Hau 10:​4, 5) ʼE ʼui e ʼihi ʼo ʼuhiga mo te ʼu palalau ʼaia, ko tona faka ʼuhiga neʼe “mole kei mānava.” ʼE ʼui e te tahi tagata sivi Tohi-Tapu, neʼe pogia te fineʼaliki! Tatau aipe peʼe moʼoni, kae neʼe ōfo ʼaupito te fineʼaliki ʼi te ʼu meʼa ʼaē neʼe logo pea mo sio kiai. Neʼe ina lau te manuʼia ʼa te hahaʼi kaugana ʼa Salomone heʼe feala ke nātou logo ki te poto ʼo te hau, pea neʼe ina tapuakiʼi ia Sehova ʼuhi ko tana fakanofo hau ia Salomone. ʼOsi ʼaia, pea neʼe ina foaki ki te hau he ʼu meʼa ʼofa ʼe totogi kovi, pea neʼe fakafuafua te totogi pe ʼo te aulo, ʼe ko te 40 miliona tola. Ko Salomone, neʼe ina fai mo ia he ʼu meʼa ʼofa, pea neʼe ina foaki ki te fineʼaliki “te ʼu meʼa fuli ʼaē neʼe fiafia ai, pea mo te ʼu meʼa fuli ʼaē neʼe fia fai kiai.”c​—1 Hau 10:​6-​13.

Tona ʼAoga Kia Tatou

Neʼe fakaʼaogaʼi e Sesu te hisitolia ʼo te fineʼaliki ʼo Sepa moʼo fakatonutonuʼi te kau sekelipa pea mo te kau Faliseo. Neʼe ina ʼui age kia nātou: “I te fakamau, e aʼala fakatahi ake anai te finealiki o te Saute mo te taitupu aeni, pea e ina tautea anai ia; koteuhi nee haù ia mai te u tuakoi o te kelekele o fakalogo te poto o Salomone, kae e i heni he mea e lahiʼage ia Salomone.” (Mateo 12:42) Ei, neʼe fakahā e te fineʼaliki ʼo Sepa tana leleiʼia te poto fakaʼatua. Kapau neʼe lava folau ia kilometa e 2 400 ke logo kia Salomone, koia neʼe feala ki te kau sekelipa pea mo te kau Faliseo ke nātou fakalogo fakalelei kia Sesu ʼaē neʼe maʼuli ʼi ʼonatou tafa.

Ko tatou ia ʼaho nei, ʼe feala ke tou fakahā tatatou loto fakafetaʼi ki te Salomone Lahi, ia Sesu Kilisito. ʼO feafeaʼi? ʼO tou fakalogo ki tana fakatotonu ʼaē ke tou “fakahoko he u tisipulo i te atu puleaga.” (Mateo 28:19) Ko te tahi meʼa ʼaē ʼe feala ke tou fai, ko te metitasioʼi te faʼifaʼitaki ʼo Sesu pea mo tana manatu, pea ke tou mulimuli kiai.​—Filipe 2:5; Hepeleo 12:​2, 3.

ʼE moʼoni, ʼe tonu anai ke tou faiga mālohi ke tou faʼifaʼitakiʼi te Salomone Lahi. Pea ʼe lahi te ʼu fakapale ʼaē ka tou maʼu ai. Ei, ʼe fakapapauʼi mai e Sehova ki tana hahaʼi, kapau ʼe nātou maʼu te loto faka sakilifisio, pea ʼe ina ‘avahi anai kia nātou te ʼu matapā ʼo selo pea mo huaʼi kia nātou he tapuakina ʼo aʼu ki te mole toe ʼi ai ʼo he hoge.’​—Malakia 3:​10.

[Nota ʼi te lalo pasina]