Te ʼu Fehuʼi ʼa Te Kau Lautohi

Ko te ‘fakamakehe’ ʼaē ʼe talanoa kiai ia 2 Tesalonika 3:​14 ʼe ko he fakatuʼutuʼu koa ʼa te kokelekasio, peʼe ko he meʼa ʼe fai e te kau Kilisitiano takitokotahi ʼi tanatou mole toe fakatahi mo nātou ʼaē ʼe talagataʼa?

ʼE hā lelei ʼi te ʼu meʼa ʼaē neʼe tohi e te ʼapositolo ko Paulo ki te kau Tesalonika, ʼe ko te kau tagata ʼāfea ʼo te kokelekasio ʼaē ʼe nātou ‘fakamakehe’ he tahi. Kae ʼe lagolago kiai te kau Kilisitiano takitokotahi, ke ʼi ai hona ʼu fua lelei ʼi te faʼahi fakalaumālie. ʼE tou mahino katoa anai ki te faʼahi ʼaia mo kapau ʼe tou vakaʼi pe koʼe neʼe fai e Paulo te tokoni ʼaia.

Neʼe kau ia Paulo ki te fakatuʼu ʼo te kokelekasio ʼi Tesalonika, he neʼe tokoni ki he ʼu tagata pea mo ni ʼu fafine ke nātou liliu ko he hahaʼi tui. (Gaue 17:​1-4) Ki muli age, neʼe faitohi mai Kolonito moʼo vikiʼi pea mo fakaloto mālohiʼi nātou. Neʼe toe foaki e Paulo te ʼu tokoni ʼaē neʼe ʼaoga kia nātou. Neʼe ina fakaloto mālohiʼi nātou ke nātou ‘mauli tokalelei mo natou tahi tokaga ki anatou gaue pea mo gaue i onatou nima.’ Ko ʼihi neʼe mole nātou fai te faʼahi ʼaia, koia neʼe toe ʼui fēnei ai e Paulo: “Pea e matou kolekole atu kia koutou, u tehina, koutou fakatotonu natou e mauli maveuveu, koutou fakalotomalohiʼi natou kua lotovaivai, koutou poupouki natou e vaivai.” ʼE hā mai, neʼe ʼi ai ʼihi neʼe “mauli maveuveu”a pea neʼe tonu ke tokoniʼi nātou.​—1 Tesalonika 1:​2-​10; 4:​11; 5:​14.

Hili kiai ni ʼu māhina, pea fai e Paulo tana lua tohi ki te kau Tesalonika, ʼo ina tohi ai te tahi ʼu fakamatala ʼo ʼuhiga mo te ʼi henī ʼa Kilisito. Neʼe fai e Paulo te tahi ʼu tokoni ʼo ʼuhiga mo nātou ʼaē neʼe fakatupu maveuveu pea ‘neʼe mole fai hanatou gāue kae neʼe nātou palalau ki he ʼu meʼa ʼe mole nātou kau kiai.’ Ko tanatou aga neʼe fakafeagai ki te faʼifaʼitaki ʼa Paulo ʼaē neʼe gāue kinakina, pea mo tana tokoni ʼaē ke tahi gāue ki tona maʼuli. (2 Tesalonika 3:​7-​12, MN) Neʼe fakahā e Paulo te ʼu fakatuʼutuʼu ʼaē neʼe tonu ke fai. Ko te ʼu fakatuʼutuʼu ʼaia ʼe fai ʼi te ʼosi tokoniʼi e te ʼu tagata ʼāfea ia nātou ʼaē ʼe maʼuli maveuveu. Neʼe tohi fēnei e Paulo:

“Pea e matou fakatotonu atu kia koutou, u tehina, . . . koutou fakamamao mai te tehina fuape e mauli maveuveu pea e mole mulimuli ki te talatisio nee koutou tali maià matou. Pea kia koutou, u tehina, aua naa koutou fiu i te gaue lelei. Kapau e i ai he tahi e mole fakalogo ki tamatou akonaki i te tohi aeni, koutou fakamakehe te tagata aia, aua naa koutou fakatahi mo ia, ke ufiufi ai; aua leva naa koutou gaohi ia o hage ko he fili, kae koutou fakatokaga ki ai o hage ko he tehina.”​—2 Tesalonika 3:​6, 13-​15.

Koia, ko te ʼu fakatuʼutuʼu ʼaia neʼe kau kiai te fakamamaʼo mai ia nātou ʼaē ʼe maʼuli maveuveu, mo te fakamakeheʼi ʼo nātou, pea mo te mole kei fakakaugā mo nātou, kae kei maʼua ke tou tokaga kia nātou ohage ko he ʼu tēhina. Koteā te ʼu faʼahiga ʼaluʼaga ʼaē neʼe tonu ai ke fai e te kokelekasio te ʼu fakatuʼutuʼu ʼaia? Moʼo mahino ki te faʼahi ʼaia, tou vakaʼi ia ʼaluʼaga e tolu ʼaē neʼe mole fia talanoa kiai ia Paulo.

1. ʼE tou ʼiloʼi ko te kau Kilisitiano ʼe mole nātou haohaoa pea ʼe nātou lākahala ʼi ʼihi temi. Kae ko te ʼofa ʼe ko te fakaʼiloga ʼaia ʼo te kau Kilisitiano moʼoni, pea ʼe ina uga tatou ke tou lotomahino pea mo tou fakamolemole te ʼu hala ʼaē ʼe fai e ʼihi. Ohage la, ʼe feala pe ke ʼita kovi he Kilisitiano ohage ko Palenapasi pea mo Paulo. (Gaue 15:36-​40) Peʼe lagi kita fai anai he ʼu palalau fefeka heʼe kita gaʼegaʼe. ʼI te ʼu ʼaluʼaga ʼaia, kapau ʼe tou fakahā te ʼofa pea mo tou maʼuliʼi te ʼu tokoni faka Tohi-Tapu, pea ʼe feala ke tou galoʼi te hala ʼaia, pea ke tou haga maʼuli fakatahi, pea mo gāue mo te Kilisitiano ʼaia. (Mateo 5:​23-​25; 6:​14; 7:​1-5; 1 Petelo 4:8) ʼE hā lelei mai ai, neʼe mole ko te taʼi hala ʼaia ʼaē neʼe talanoa kiai ia Paulo ʼi te tohi ʼo 2 Tesalonika.

2. Neʼe mole talanoa ia Paulo ki te Kilisitiano ʼaē ʼe ina fakatotonu ʼi tona loto faʼitaliha ke ʼaua naʼa fakatahi mo he tahi heʼe mole lelei tana aga​—ohage la, ko he tahi ʼe manako fau ki te ʼu fakafiafia peʼe ki te ʼu koloā. Peʼe lagi faka tuʼakoi anai e te ʼu mātuʼa te fakatahi ʼa tanatou fānau mo te kau tūpulaga ʼaē ʼe talagataʼa ki ʼanatou mātuʼa, peʼe nātou agamālohi ʼi tanatou ʼu gaoʼi, peʼe mole nātou fakaʼapaʼapa ki te Lotu Faka Kilisitiano. Ko te ʼu fakatuʼutuʼu ʼaia ʼe ko he ʼu tonu ʼe feala ke kita fai ʼo mulimuli kia Tāʼaga Lea 13:20: “Ko ʼaē ʼe haʼele mo te kau popoto ʼe liliu anai ia ʼo poto, kae ko ʼaē ʼe fakatahi mo te kau vale, ʼe fua kovi anai kia ia.”​—Vakaʼi ia 1 Kolonito 15:33.

3. Ko te tahi faʼahi ʼaē ʼe kovi ʼosi ʼaē neʼe talanoa kiai ia Paulo ʼi tana tohi ki te kau Kolonito, ʼe ko nātou ʼaē ʼe nātou maʼuliʼi te agahala kae mole nātou fakahemala. Ko nātou ʼaia neʼe tonu ke fakamavae ʼi te kokelekasio. Ko te tagata “agakovi” neʼe tonu ke tuku kia nima ʼa Satana, ʼi hona ʼaluʼaga fakatā. ʼOsi ʼaia, pea neʼe mole tonu ke fakatahi te kau Kilisitiano agatonu mo te kau agakovi ʼaia; pea ko te ʼapositolo ko Soane neʼe ina fakaloto mālohiʼi te kau Kilisitiano ke ʼaua naʼa nātou fakaʼalofa kia nātou. (1 Kolonito 5:​1-​13; 2 Soane 9-​11) Kae ko te fakatuʼutuʼu ʼaia ʼe mole pipiki ia ki te tokoni ʼaē ʼe fai ia 2 Tesalonika 3:​14.

Ko nātou ʼaē ʼe ʼui ia 2 Tesalonika ʼe “mauli maveuveu” ʼe mole faka ʼuhiga ki te ʼu ʼaluʼaga e tolu ʼaē ʼe fakahā ʼi ʼoluga. Neʼe tohi e Paulo, ko nātou ʼaia ʼe ko he ʼu ‘tehina,’ pea ʼe tonu ke fakaloto mālohiʼi nātou pea mo gaohi fakaleleiʼi nātou. Koia, ko te fihifihia ʼo ʼuhiga mo te ʼu tēhina ʼaē neʼe “mauli maveuveu” neʼe mole faka ʼuhiga ki he kiʼi fihi noa pe ʼa he ʼu Kilisitiano, pea neʼe mole faka ʼuhiga ki he fihifihia maʼuhiga neʼe maʼua ai ki te kau tagata ʼāfea ke nātou fakamavae he tahi, ohage ko tona fai e Paulo kia ia ʼaē neʼe fai feʼauʼaki ʼi Kolonito. Ko nātou ʼaē neʼe “mauli maveuveu” neʼe mole nātou agahala mamafa, ohage ko te tagata ʼaē neʼe fakamavae ʼi Kolonito.

Ko nātou ʼaē neʼe “mauli maveuveu” ʼi Tesalonika, neʼe nātou fakamamaʼo ʼi te moʼoni faka Kilisitiano. Neʼe mole nātou gāue, he neʼe lagi nātou manatu kua vave liliu mai ia Kilisito, pe neʼe lagi nātou piko. Tahi ʼaē meʼa, neʼe nātou fakatupu maveuveu he neʼe ‘nātou fia ʼiloʼi he ʼu meʼa ʼe mole nātou kau kiai.’ Lagi neʼe tonu ke tokoniʼi liuliuga nātou e te kau tagata ʼāfea, ʼo mulimuli ki te tokoni ʼaē neʼe fai age e Paulo ʼi tana ʼuluaki tohi pea mo te tahi ʼu tokoni faka Tohi-Tapu. (Tāʼaga Lea 6:​6-​11; 10:​4, 5; 12:11, 24; 24:30-​34) Kae neʼe nātou haga fai he ʼu aga neʼe fua kovi ki te kokelekasio, pea neʼe feala ke pikisia ai ʼihi Kilisitiano. Koia neʼe mole fakahā ai e Paulo te ʼu higoa ʼo nātou ʼaia, kae neʼe ina fai he ʼu fakatokaga ki te kokelekasio fuli ʼo ʼuhiga mo tonatou maʼuli maveuveu, pea neʼe ina fakahā tanatou faihala.

Neʼe ina toe fakahā foki ki te kokelekasio, ʼe lelei ki te kau Kilisitiano takitokotahi ke nātou “fakamakehe” ia nātou ʼaia ʼe maʼuli maveuveu. Ko tona faka ʼuhiga, ʼe nātou tahi fakamakehe anai ia nātou ʼaē ʼe tatau tanatou aga pea mo te aga ʼaē neʼe ʼui age e Paulo ke nātou nofo tokaga kiai. Neʼe ʼui e Paulo ke nātou “fakamamao mai te tehina fuape e mauli maveuveu.” ʼE mahino ia, ʼe mole faka ʼuhiga leva neʼe tonu ke kita līaki katoa tokita tēhina, he neʼe tonu ke nātou “fakatokaga ki ai o hage ko he tehina.” Neʼe feala ke hoko tanatou ʼu felogoi faka Kilisitiano ʼi te ʼu fono ʼo te kokelekasio pea mo te fai faka mafola. Neʼe nātou fakaʼamu ai ke tali e tonatou tēhina tona tokoniʼi pea ke maliu mai tana ʼu aga fakatupu maveuveu.

Koteā tona faka ʼuhiga ʼo te ʼui ʼaē ke nātou “fakamamao” ia te ia? ʼE mahino ia, ʼe faka ʼuhiga ki tanatou mole kei fakatahi mo ia. (Vakaʼi ia Kalate 2:​12.) Ko tanatou mole kei fakaafe ia ia pea mo fakafiafia fakatahi mo ia, neʼe ko he fakahā ʼaia kia ia ko te hahaʼi ʼaē ʼe nātou mulimuli ki te ʼu pelesepeto ʼa Sehova neʼe mole nātou leleiʼia tana aga. Tatau aipe pe neʼe ufiufi pea mo fetogi tana aga, kae ko te faʼahi ʼaia ʼe tokoni anai ki ʼihi ke ʼaua naʼa nātou faʼifaʼitakiʼi tana aga. Tahi ʼaē, ʼe feala anai ki te kau Kilisitiano takitokotahi ke nātou fakakaukauʼi te aga ʼaē ʼe lelei ke kita fai. Neʼe fai e Paulo te tokoni ʼaenī kia nātou: “Pea kia koutou, u tehina, aua naa koutou fiu i te gaue lelei.”​—2 Tesalonika 3:​13.

ʼE hā lelei mai, ko te tokoni ʼaia ʼa te ʼapositolo ʼe mole ko he takuʼaki ke tou fakalainoaʼi peʼe valokiʼi totatou ʼu tēhina ʼaē neʼe agahala kae mole ko he agahala mamafa. Kae ko te fakatuʼutuʼu ʼo te tokoni ʼaia, ke tou tokoni kia ia ʼaē ʼe ina haga fai he ʼu aga ʼe fakafeagai ki te Lotu Faka Kilisitiano.

Neʼe mole tohi e Paulo he ʼatu ʼu lekula kehekehe moʼo faka faigataʼa tana tokoni. Kae ʼe hā lelei mai, ʼe ko te kau tagata ʼāfea ʼaē ʼe tonu muʼa ke nātou fakatonutonuʼi pea mo tokoni ki he tahi ʼe maʼuli maveuveu. Kapau neʼe mole he fua ʼo tanatou tokoni kae hoko atu pe e te Kilisitiano ʼaia tana aga fakatupu maveuveu ʼo feala ke pikisia ai ʼihi, pea ʼe lagi fakatotonu anai e te kau tagata ʼāfea ke nātou fakatokagaʼi te kokelekasio ʼo ʼuhiga mo te Kilisitiano ʼaia. ʼE feala ke nātou fai he akonaki moʼo fakahā pe koʼe ʼe tonu ke tekeʼi te taʼi aga fakatupu maveuveu ʼaia. ʼE mole nātou fakahā anai he ʼu higoa, kae ʼe tokoni anai tanatou fakatokaga ke puipui te kokelekasio, heʼe faka tuʼakoi anai e ʼihi tanatou felogoi mo nātou ʼaē ʼe nātou fai te taʼi aga fakatupu maveuveu ʼaia.

ʼAki te temi, ʼofa pe ke ufiufi ia ia ʼaē ʼe maʼuli maveuveu pea ke fetogi tana aga. ʼI te sio ʼa te ʼu tagata ʼāfea pea mo ʼihi ʼo te kokelekasio, kua fetogi tana aga, lagi ʼe nātou tuku anai tanatou faka tuʼakoi tanatou felogoi mo te tēhina ʼaia.

Ko tona fakanounou ʼaenī: Ko te kau tagata ʼāfea ʼo te kokelekasio ʼe nātou ʼuluaki fai muʼa he ʼu tokoni kia ia ʼaē ʼe maʼuli maveuveu. Kapau ʼe mole mahino kia ia te kovi ʼo tana aga pea ʼe hoko atu pe tana fai te aga ʼaia, pea ʼe lagi fakatokagaʼi anai e te kau tagata ʼāfea te kokelekasio ʼaki he akonaki ʼe ina fakahā lelei te manatu ʼa te Tohi-Tapu​—ohage la kapau ʼe fia ʼohoana he tēhina peʼe ko he tuagaʼane mo he tahi ʼe mole Kilisitiano, pe ko te tahi aga ʼe mole tau mo feʼauga mo te kau Kilisitiano. (1 Kolonito 7:​39; 2 Kolonito 6:​14) ʼI te kua fakatokagaʼi ʼo te kokelekasio, ʼe tahi fakatotonu anai e te kau Kilisitiano ke nātou faka tuʼakoi tanatou fakatahi mo nātou ʼaē ʼe hā lelei ʼe nātou fia fai te ʼu aga fakatupu maveuveu, kae kei nātou kau pe ʼi te kokelekasio.

[Nota ʼi te lalo pasina]

[Paki ʼo te pasina 31]

ʼE tokoniʼi e te ʼu tagata ʼāfea ia nātou ʼaē ʼe maʼuli maveuveu kae kei nātou faka ʼuhigaʼi nātou ko honatou ʼu tēhina ʼi te tui