Tou Maʼuʼuli ʼAki Te Tui Ki Te ʼu Fakapapau ʼa Te ʼAtua
“Ko ʼau ko te ʼAtua pea ʼe mole he tahi age ʼAtua, pe ko he tahi ʼe tatau mo ʼau; ia Ia ʼaē ʼe ina fakahā te fakaʼosi talu mai te kamataʼaga, pea talu mai te temi kua hili te ʼu meʼa ʼe mole heʼeki hoko.”—Isaia 46:9, 10.
1, 2. Koteā te ʼu manatu kehekehe ʼa te hahaʼi ʼo ʼuhiga mo te tokaga ʼa te ʼAtua ki te ʼu meʼa ʼo te kele?
ʼE TOKAGA feafeaʼi te ʼAtua ki te ʼu meʼa ʼo te malamanei? ʼE kehekehe te manatu ʼa te hahaʼi ʼo ʼuhiga mo te faʼahi ʼaia. ʼE manatu ʼihi, ʼe mole fia ʼiloʼi e te ʼAtua te ʼu meʼa ʼaē ʼe hoko kia tatou. ʼI tanatou manatu, neʼe fakatupu e te ʼAtua ia meʼa fuli, pea ʼe mole kei fia tokoni kia tatou peʼe mole kei feala hana fai te faʼahi ʼaia. ʼO mulimuli ki te manatu ʼaia, ʼe hage te ʼAtua ko he tāmai ʼe ina fakaheka tona foha ki he lelue, ʼo ina puke maʼu, pea ina humuki ia ia ke ʼalu ʼi tona lelue. ʼOsi ʼaia, pea ʼalu te tāmai, kae ina tuku tokotahi tona foha. ʼE feala pe ke tō ʼi tona lelue, peʼe kailoa, kae ʼe mole fakalogo te faʼahi ʼaia ki tana tāmai.
2 ʼI te manatu ʼa ʼihi, ʼe takitaki e te ʼAtua te ʼu faʼahi fuli ʼo totatou maʼuli, pea ʼe pipiki fakahagatonu ki te ʼu meʼa fuli ʼaē ʼe hoko ʼi te ʼu meʼa ʼaē neʼe ina fakatupu. Kae kapau koia ʼaia, pea ʼe feala ke tou manatu ai, ʼe fakatupu e te ʼAtua te ʼu meʼa lelei fuli ʼaē ʼe hoko, pea mo ina toe fakatupu foki mo te ʼu fakapō pea mo te ʼu meʼa fakaʼofaʼofa ʼaē ʼe maʼuli mamahi ai te malamanei. Kapau ʼe tou ʼiloʼi te moʼoni ʼo ʼuhiga mo te ʼu faʼahiga fai ʼa te ʼAtua, pea ʼe tou ʼiloʼi ai anai peʼe feafeaʼi tana faʼahiga felogoi mo tatou. Tahi ʼaē, ʼe fakamālohiʼi anai tatatou tui ʼo ʼuhiga mo tana fakahoko moʼoni ia tana ʼu fakapapau.—Hepeleo 11:1.
3. (a) Koteā ʼaē ʼe tou ʼiloʼi ai, ko Sehova ʼe ko he ʼAtua ʼe ina fai he ʼu fakatuʼutuʼu? (b) He koʼe ʼe ʼui ʼo ʼuhiga mo Sehova, ʼe ina ‘fakatupu,’ peʼe ina faʼufaʼu tana fakatuʼutuʼu?
3 Moʼo tali ki te fehuʼi ʼaē peʼe tokaga te ʼAtua ki te ʼu meʼa ʼo te malamanei, ʼe maʼuhiga ke tou ʼiloʼi ko Sehova ʼe ko he ʼAtua ʼe ʼi ai tana ʼu fakatuʼutuʼu. ʼE hā lelei te faʼahi ʼaia ʼi tona huafa totonu. Ko te huafa ʼo “Sehova” ko tona faka ʼuhiga ʼaenī “ ʼE Ina Fakahoko.” ʼAki te temi, ʼe fakahoko anai e Sehova tana ʼu fakapapau fuli. Koia, ʼe ʼui ʼo ʼuhiga mo Sehova, ʼe ina ‘fakatupu’ pea mo ina ‘faʼufaʼu’ tana fakatuʼutuʼu ʼo ʼuhiga mo te ʼu meʼa ʼaē ka ina fai ʼi te ka haʼu. (2 Hau 19:25; Isaia 46:11) Ko te ʼu kupu ʼaia ʼe toʼo mai te kupu faka Hepeleo ya·tsar’, ʼaē ʼe pipiki ki te kupu “tagata faʼu ipu.” (Selemia 18:4) Ohage ko te tagata faʼu ipu faiva ʼaē ʼe feala ke ina gāueʼi he moʼi kele ke liliu ko he ipu matalelei, ʼo toe feiā pe ʼe feala ke takitaki e Sehova te ʼu meʼa ʼaē ʼe hoko moʼo fakahoko tona finegalo.—Efeso 1:11.
4. Neʼe teuteuʼi feafeaʼi e te ʼAtua te kele ke nofoʼi e te tagata?
4 Ohage la, neʼe fakatuʼutuʼu e Sehova ʼo ʼuhiga mo te kele, ke matalelei ʼaupito pea ke nofoʼi e te hahaʼi haohaoa pea mo talagafua. (Isaia 45:18) ʼI muʼa ʼo tana fakatupu te ʼuluaki tagata pea mo te ʼuluaki fafine, neʼe teuteuʼi e Sehova he nofoʼaga maʼa nāua. ʼE fakamatala mai e te ʼu ʼuluaki kapite ʼo te tohi ʼo Senesi, pe neʼe vaheʼi feafeaʼi e Sehova ia te ʼaho pea mo te pōʼuli, te kele pea mo te tai. ʼOsi ʼaia, pea ina fakatupu te ʼu vao ʼakau pea mo te ʼu manu. Ko te teuteuʼi ʼaia ʼo te kele ke nofoʼi e te tagata neʼe fai lolotoga taʼu ʼe lauʼi afe, pea neʼe lava lelei te gāue ʼaia. Neʼe kamata ai te maʼuli ʼa te ʼuluaki tagata pea mo te ʼuluaki fafine ʼi Eteni, ko he palatiso taulekaleka neʼe maʼu ai ia meʼa fuli ke nā maʼuli fiafia ai. (Senesi 1:31) Koia neʼe tokaga ia Sehova totonu ki te ʼu meʼa ʼo te kele, ʼo ina takitaki tana ʼu gāue moʼo fakahoko tana fakatuʼutuʼu taulekaleka. Ko te liliu ʼo kaugamālie ʼo te famili fakatagata, neʼe ina fetogi koa tana tokaga ki te ʼu meʼa ʼaē ʼe hoko ʼi te kele?
ʼE Faka Tuʼakoi e Sehova Tana ʼu Felogoi Mo Te Hahaʼi
5, 6. He koʼe ʼe faka tuʼakoi e te ʼAtua tana ʼu felogoi mo te tagata?
5 Ko Sehova ʼe mole ina takitaki pea mo puleʼi te ʼu gāue fuli ʼa te tagata, logope la ʼe feala ke ina fai ia te faʼahi ʼaia. ʼE ʼi ai tona ʼu tupuʼaga. ʼUluaki, neʼe fakatupu te tagata ki te paki ʼo te ʼAtua, pea neʼe foaki kia ia te loto faʼitaliha, ke feala hana filifili te meʼa ʼaē ʼe loto kiai. ʼE mole fakakinauʼi tatou e Sehova ke tou fai te meʼa ʼaē ʼe ina kole mai. (Teutalonome 30:19, 20; Sosue 24:15) Logope la ʼe tou tuʼu maʼua ki te ʼAtua ʼo ʼuhiga mo tatatou ʼu aga, kae ʼe ina tuku mai te fealagia ʼaē ke tou takitaki totatou maʼuli.—Loma 14:12; Hepeleo 4:13.
6 Ko te tahi tupuʼaga ʼo te mole takitaki e te ʼAtua ia meʼa fuli ʼaē ʼe hoko, heʼe ʼi ai te fehuʼi maʼuhiga neʼe lagaʼi e Satana ʼi Eteni. Neʼe fakafihiʼi e Satana te ʼuhiga pule ʼa te ʼAtua. Neʼe ina kākāʼi ia Eva ʼe maʼuli ʼāteaina anai mai te ʼAtua, pea neʼe tui ia Eva ki te faʼahi ʼaia ʼo feiā mo tona ʼohoana ko Atama. (Senesi 3:1-6) Moʼo tali ki te ʼaluʼaga ʼaia, neʼe tuku e te ʼAtua ki te tagata ke ina takitaki totonu tona maʼuli lolotoga he temi, moʼo fakamoʼoni ai pe neʼe tonu peʼe kailoa te fakafifihi ʼa Satana. Koia la ʼaē, ʼe mole feala ai ke tukugakoviʼi te ʼAtua ʼo ʼuhiga mo te ʼu meʼa kovi ʼaē ʼe fai e te hahaʼi ia ʼaho nei. Neʼe tohi fēnei e Moisese ʼo ʼuhiga mo te hahaʼi talagataʼa: “Neʼe nātou fai te ʼu meʼa kovi ʼaupito; ʼe mole ko hana ia fānau [ʼa te ʼAtua], ʼe nātou mele.”—Teutalonome 32:5.
7. Koteā te fakatuʼutuʼu ʼa Sehova ʼo ʼuhiga mo te kele pea mo te hahaʼi?
7 Logola tana tuku ki te tagata te loto faʼitaliha pea mo te fealagia ʼaē ke ina ʼahiʼahi te ʼu faʼahiga pule kehekehe, kae neʼe mole faka ʼuhiga leva neʼe mole kei tokagaʼi e te ʼAtua te ʼu meʼa ʼaē neʼe hoko ʼi te kele, ʼo mole kei feala hatatou falala ʼe ina fakahoko anai tana ʼu fakapapau. Logope la neʼe talagataʼa ia Atama pea mo Eva ki te ʼuhiga pule ʼa te ʼAtua, kae neʼe mole fetogi e Sehova tana fakatuʼutuʼu ʼofa ʼo ʼuhiga mo te kele pea mo te malamanei. (Luka 23:42, 43) ʼE fakamatala mai e te Tohi-Tapu mai te tohi ʼo Senesi ʼo aʼu ki te Apokalipesi, pe neʼe feafeaʼi te gāue ʼa Sehova moʼo fakahoko tana fakatuʼutuʼu ʼaia.
ʼE Gāue Te ʼAtua Moʼo Fakahoko Tona Finegalo
8. Koteā ʼaē neʼe tonu ke hoko ki te kau Iselaelite ʼi tanatou ʼolo ki te Kele ʼo te Fakapapau?
8 ʼE hā lelei te fia gāue ʼa te ʼAtua moʼo fakahoko tana fakatuʼutuʼu, ʼi tana ʼu felogoi mo te puleʼaga ʼo Iselaele. Ohage la, neʼe fakapapau e Sehova kia Moisese, ʼe ina faka ʼāteaina anai te kau Iselaelite mai Esipito pea ʼe ina taki anai nātou ki te Kele ʼo te Fakapapau, ko he fenua neʼe tafe ai te huʼa pipi pea mo te meli. (Ekesote 3:8) Neʼe ko he toe logo maʼuhiga pea mo fakaloto fīmālie. ʼE faka ʼāteaina anai te kau Iselaelite ʼaē neʼe teitei toko tolu miliona, mai te puleʼaga agamālohi ʼaē neʼe mole ina tali tuʼa tahi ke nātou mavae. (Ekesote 3:19) Ko te fenua ʼaē ka taki nātou kiai, neʼe nofoʼi e te ʼu puleʼaga mālolohi ʼe fakafeagai ʼaupito anai ki te ʼōmai ʼa te kau Iselaelite. (Teutalonome 7:1) ʼI te vaha ʼo te ʼu fenua ʼaia e lua, neʼe ʼi ai te toafa neʼe hoge meʼa kai ai te kau Iselaelite pea mo hoge vai. ʼI te ʼu ʼaluʼaga ʼaia, neʼe fakahā ai e Sehova tona māfimāfi pea mo tona ʼuhiga ʼAtua.—Levitike 25:38.
9, 10. (a) He koʼe neʼe feala ke ʼui e Sosue, ʼe feala hakita falala ki te ʼu fakapapau ʼa te ʼAtua? (b) He koʼe ʼe maʼuhiga ke tou falala, ʼe feala ke fakapale e te ʼAtua ia nātou ʼaē ʼe agatonu?
9 Neʼe fakamavae e te ʼAtua te kau Iselaelite mai Esipito ʼaki te ʼu gāue fakaofoofo. ʼUluaki, neʼe ina fakahoko ki te puleʼaga ʼo Esipito te ʼu tautea fakamataku e hogofulu. ʼOsi ʼaia, pea neʼe ina avahi te Tai Kula, ʼo feholaki ai te kau Iselaelite kae mamate ai te kau solia Esipito ʼaē neʼe nātou tuli nātou. (Pesalemo 78:12, 13, 43-51) Ki muli age, neʼe ina taupau te kau Iselaelite lolotoga taʼu e 40 ʼi te toafa, ʼo ina fafaga nātou ʼaki te mana, mo ina foaki age he moʼi vai, pea mo ina fai ke ʼaua naʼa popo tonatou ʼu mutuʼi meʼa pea ke ʼaua naʼa fufula ʼonatou vaʼe. (Teutalonome 8:3, 4) ʼI te ʼosi hū ʼa te kau Iselaelite ki te Kele ʼo te Fakapapau, neʼe takitaki nātou e Sehova ke nātou mālo ʼi tonatou ʼu fili. Ko Sosue neʼe tui mālohi ki te ʼu fakapapau ʼa Sehova, pea neʼe sio mata ki te ʼu meʼa fuli ʼaia. Koia, neʼe feala ai tana ʼui ki te kau matuʼa ʼo tona temi: “ ʼE koutou ʼiloʼi papau ʼaki tokotou loto katoa pea mo tokotou nefesi katoa, neʼe mole hala he folafola ʼo te ʼu folafola lelei fuli ʼaē neʼe ʼui atu e Sehova, tokotou ʼAtua. Neʼe hoko fuli ia maʼa koutou.”—Sosue 23:14.
10 Ohage ko Sosue, ʼe falala mālohi te kau Kilisitiano ia ʼaho nei, ʼe fia lagolago te ʼAtua kia nātou ʼaē ʼe nātou tauhi kia te ia, pea ʼe feala ke ina fai te faʼahi ʼaia maʼa nātou. Ko te falala ʼaia ʼe maʼuhiga ki tatatou tui. Neʼe tohi fēnei e te ʼapositolo ko Paulo: “E mole feala ki he tahi ke lelei ki te Atua, kapau e mole ina maù te tui, he ko ae e laka ki te Atua, e maua ke tui . . . e ina fakapale natou e natou kumi iaʼia.”—Hepeleo 11:6.
ʼE ʼIloʼi e Te ʼAtua Te Ka Haʼu
11. Koteā te ʼu fealagia ʼaē ʼe maʼu e te ʼAtua moʼo fakahoko tana ʼu fakapapau?
11 Neʼe tou vakaʼi, logope la ʼe tuku e Sehova te loto faʼitaliha ki te tagata pea mo te fealagia ʼaē ke ina puleʼi te malamanei, kae ʼe ina maʼu te mālohi pea mo te holi ʼaē ke ina fakahoko tana fakatuʼutuʼu. Kae ʼe ʼi ai te tahi faʼahi ʼaē ʼe tou ʼiloʼi ai, ʼe hoko moʼoni anai te ʼu fakapapau ʼa te ʼAtua. Ko Sehova ʼe feala hana ʼiloʼi fakatomuʼa te ka haʼu. (Isaia 42:9) ʼAki tana polofeta, neʼe ʼui fēnei e te ʼAtua: “Koutou manatuʼi te ʼu ʼuluaki meʼa ʼo te ʼu temi ki muʼa atu, ʼe ko ʼau ko te ʼAtua pea ʼe mole he tahi age ʼAtua, pe ko he tahi ʼe tatau mo ʼau; ia Ia ʼaē ʼe ina fakahā te fakaʼosi talu mai te kamataʼaga, pea talu mai te temi kua hili te ʼu meʼa ʼe mole heʼeki hoko; ia Ia ʼaē ʼe ina ʼui: ‘ ʼE tuʼu anai taku tokoni, pea ko meʼa fuli ʼe ʼau fiafia ai, ʼe ʼau fai anai.’ ” (Isaia 46:9, 10) Ko te tagata gāue kele faiva ʼe ina ʼiloʼi pe ko te temi fea pea mo te potu fea ʼaē ʼe tonu ke to ai te pulapula, kae ʼe mole feala hana ʼiloʼi papau peʼe fua lelei anai tana gāue. Kae ko “te Hau o te u sekulo,” ʼe ina maʼu te ʼatamai mālama ke feala hana ʼiloʼi fakatomuʼa te temi pea mo te potu ʼaē ke ina fai ai hana gāue moʼo fakahoko tana fakatuʼutuʼu.—1 Timoteo 1:17.
12. Neʼe feafeaʼi te sio fakatomuʼa ʼa Sehova ʼi te temi ʼo Noe?
12 Tou vakaʼi pe neʼe feafeaʼi te sio fakatomuʼa ʼa te ʼAtua ʼi te temi ʼo Noe. ʼUhi ko te kua mafola ʼaupito ʼo te agakovi ʼi te kele, neʼe fakatotonu e te ʼAtua ke ina fakaʼauha te hahaʼi talagataʼa ʼaia. Neʼe ina fakakatofa he temi ki te fakaʼauha ʼaia, pea neʼe tonu ke hoko hili kiai taʼu e 120. (Senesi 6:3) ʼI tana fakakatofa te temi ʼaia, neʼe mole manatu pe Sehova ki te fakaʼauha ʼo te kau agakovi, he ko te meʼa ʼaia neʼe feala ke ina fakahoko ʼi he temi pe. Kae ʼi tana kaletalio, neʼe toe fakatuʼutuʼu foki e Sehova ke ina hāofaki te kau faitotonu. (Vakaʼi ia Senesi 5:29.) ʼI tona poto, neʼe ʼiloʼi e te ʼAtua pe ko te lakaga fea ʼaē neʼe tonu ai ke ina hinoʼi he tahi moʼo fakahoko tana fakatuʼutuʼu. Neʼe ina fakahā kia Noe te ʼu meʼa ʼaē neʼe tonu ke ina ʼiloʼi. Neʼe tonu ke faʼu e Noe he aleka “ki te haofaki o tona lotofale,” pea ʼe fakaʼauha anai te kau agakovi ʼi te tulivio.—Hepeleo 11:7; Senesi 6:13, 14, 18, 19.
Ko He Toe Gāue Maʼuhiga
13, 14. He koʼe neʼe faigataʼa te faʼu ʼo te aleka?
13 Tou vakaʼi te gāue ʼaia ʼaki te sio ʼa Noe. Ko Noe neʼe ko he tagata lotu, koia neʼe ina ʼiloʼi ʼe feala ke fakaʼauha e Sehova te kau agakovi. Kae ʼi muʼa ʼo te fakahoko ʼo te meʼa ʼaia, neʼe tonu ke ina fai he gāue—ko he gāue neʼe maʼuhiga ai ke kita tui. Ko te faʼu ʼo te aleka neʼe ko he toe gāue lahi. Neʼe kua fakatuʼutuʼu e te ʼAtua tona lahi. ʼE loa age anai te aleka ʼi ʼihi malaʼe faigaoʼi ʼo te temi ʼaenī, pea ko tona māʼoluga ʼe hage anai ko he falefata ʼe laufata nima. (Senesi 6:15) Neʼe tokosiʼi te kau gāue pea neʼe mole nātou faiva ʼi te gāue ʼaia. Neʼe mole maʼu te ʼu meʼa gāue ʼaē ʼe tou maʼu ia ʼaho nei. Tahi ʼaē meʼa, mai tona ʼuhiga ʼaē neʼe mole feala ke ʼiloʼi fakatomuʼa e Noe te ka haʼu ohage ko Sehova, koia neʼe mole feala ai hana ʼiloʼi peʼe hoko anai he ʼu ʼaluʼaga ʼe tokoni anai ki tana gāue peʼe tāʼofi anai. Neʼe lagi lahi te ʼu fehuʼi ʼaē neʼe fai e Noe. ʼE feafeaʼi anai hana tānaki te ʼu meʼa gāue? ʼE feafeaʼi anai hana tānaki te ʼu manu? Koteā anai tanatou meʼa kai pea ʼe tonu ke lahi feafeaʼi? Ko te temi fea koa ʼaē ka hoko ai te Tulivio?
14 Tahi ʼaē meʼa, neʼe agakovi ʼaupito te hahaʼi. Neʼe kua fonu te kele ʼi te agamālohi, ʼuhi ko te kau Nefilime mālolohi ʼaē neʼe tupu mai te ʼohoana ʼa te ʼu ʼaselo pea mo he ʼu fafine. (Senesi 6:1-4, 13) Tahi ʼaē, ko te faʼu ʼo te aleka neʼe mole ko he gāue neʼe feala ke fai fakafūfū. Neʼe feʼekeʼaki te hahaʼi pe koteā ʼapē te meʼa neʼe fai e Noe, pea neʼe ina fakahā age kia nātou tona ʼuhiga. (2 Petelo 2:5) Neʼe feala koa hana falala, ʼe tali anai e te hahaʼi ia te faʼahi ʼaia? Kailoa! ʼI te ʼu taʼu ki muʼa atu, neʼe kalagaʼi e te tagata agatonu ko Enoke, ʼe fakaʼauha anai te kau agakovi. Neʼe mole leleiʼia e te hahaʼi tana logo ʼaia, pea neʼe “toʼo ia ia” e te ʼAtua, ʼo ina fakagata tona maʼuli, ke ʼaua naʼa matehi ia ia e tona ʼu fili. (Senesi 5:24; Hepeleo 11:5; Suta 14, 15) Ko Noe, neʼe tonu mo ia ke ina kalagaʼi te logo neʼe mole leleiʼia e te hahaʼi, pea neʼe toe maʼua foki ke ina faʼu he aleka. Ko te faʼu ʼo te aleka, neʼe ina fakamanatuʼi ki te hahaʼi te agatonu ʼa Noe.
15. He koʼe neʼe falala ia Noe, ʼe ina lavaʼi anai te gāue ʼaē neʼe hinoʼi age ki ai?
15 Neʼe ʼiloʼi e Noe, neʼe tapuakiʼi e te ʼAtua Māfimāfi tana gāue pea mo lagolago kiai. Neʼe mole ko Sehova koa la ʼaē neʼe ina hinoʼi ia ia ki te gāue ʼaia? Neʼe fakapapau age e Sehova kia Noe pea mo tona famili, ʼe nātou hū anai ki he aleka kua faʼu katoa pea ʼe hāofaki anai nātou ʼi te Tulivio. Neʼe toe fakamālohiʼi e te ʼAtua tana fakapapau ʼaia ʼaki he fuakava. (Senesi 6:18, 19) Neʼe lagi mahino kia Noe, neʼe kua ʼiloʼi fakatomuʼa e Sehova peʼe feafeaʼi anai te gāue, pea neʼe ina fakafuafua te ʼu meʼa fuli ʼaē ka hoko ʼi muʼa ʼo tana fakatotonu age te gāue ʼaia. Tahi ʼaē meʼa, neʼe ʼiloʼi e Noe ʼe feala ke tokoni age ia Sehova kia ia ʼi he temi pe neʼe fihifihia ai. Koia, ko te tui ʼa Noe neʼe ina uga ia ia ke gāue. Ohage ko Apalahamo ʼaē neʼe kau ʼi tona hōloga, “nee tui pau [e Noe] e mafimafi te Atua o fakahoko mo te mea nee fuakava ki ai.”—Loma 4:21.
16. ʼI te lakalaka ki muʼa ʼo te faʼu ʼo te aleka, neʼe ʼāsili mālohi feafeaʼi te tui ʼa Noe?
16 ʼI te fakalaka ʼo te ʼu taʼu pea mo te faʼu ʼo te aleka, neʼe ʼāsili mālohi ai te tui ʼa Noe. Neʼe fakatokatoka fuli te ʼu fihifihia ʼo ʼuhiga mo te faʼahiga faʼu ʼo te aleka. Neʼe ina lava tauʼi te ʼu fakafeagai, pea neʼe mole he meʼa neʼe feala ke ina fakagata tana gāue. Neʼe sio mata te famili ʼo Noe neʼe lagolago ia Sehova kia nātou pea mo ina puipui nātou. ʼI te gāue fakamalotoloto ʼa Noe, ‘ko te ahiahi o tana tui nee fua mai ai te kataki.’ (Sakopo 1:2-4) ʼAki te temi, neʼe fakaʼosi te faʼu ʼo te aleka, pea tō ifo te Tulivio ki te kele, pea neʼe hāo ia Noe pea mo tona famili. Neʼe sio ia Noe ki te fakahoko ʼo te ʼu fakapapau ʼa te ʼAtua, ohage pe ko te meʼa ʼaē neʼe hoko kia Sosue ki muli age. Ei, neʼe fakapale te tui ʼa Noe.
ʼE Lagolago Sehova Ki Tatatou Gāue
17. Koteā te ʼu ʼaluʼaga ʼaē ʼe tatau ai totatou temi pea mo te temi ʼo Noe?
17 Neʼe fakakikite e Sesu, ko totatou temi ʼe hage anai ko te temi ʼo Noe. Kua toe fakatuʼutuʼu e Sehova ke ina fakaʼauha te kau agakovi pea kua ina fakakatofa te temi ʼaē ka ina fakahoko ai te faʼahi ʼaia. (Mateo 24:36-39) Neʼe ina toe fai foki mo he ʼu fakatuʼutuʼu moʼo hāofaki te kau faitotonu. Neʼe tonu kia Noe ke ina faʼu he aleka, pea ko te hahaʼi kaugana ʼa Sehova ia ʼaho nei, ʼe tonu ke nātou kalagaʼi te ʼu fakatuʼutuʼu ʼa Sehova, mo akoʼi tana Folafola ki te hahaʼi, pea mo fai he ʼu tisipulo.—Mateo 28:19.
18, 19. ʼE tou ʼiloʼi feafeaʼi, ʼe lagolago Sehova ki te faka mafola ʼo te logo lelei?
18 Kanapaula neʼe mole lagolago Sehova kia Noe pea mo tokoni ki ai, kanaʼauala neʼe mole faʼu e Noe te aleka. (Vakaʼi ia Pesalemo 127:1.) ʼO toe feiā aipe, kapau ʼe mole lagolago Sehova ki te kau Kilisitiano, pea ʼe mole feala ke tologa te lotu ʼaia, pea ke fakahahaʼi. Neʼe fakamoʼoni kiai ia Kamaliele, ko te Faliseo ʼiloa pea mo faiako ʼo te Lao. ʼI te temi ʼaē neʼe fia fakafeagai ai te Sanetualio Sutea ki te kau ʼapositolo, neʼe ina fai te fakatokaga ʼaenī kia nātou: “Koutou fakatafatafa mai te u tagata aeni pea koutou tukuʼage natou, koteuhi kapau e ko he tonu pe ko he gaue mai te tagata, e alunoa anai. Kae, kapau e mai te Atua, e mole feala anai tautou maumaui natou.”—Gaue 5:38, 39.
19 Ko te lava lelei ʼo te gāue fai faka mafola ʼi te ʼuluaki sēkulō pea mo te temi ʼaenī, ʼe ko he fakamoʼoni ʼaia ʼe mole ko he gāue fakatagata, kae ko te gāue fakaʼatua. ʼE fakahā mai anai ʼi te alatike ʼaē ka hoa mai, te ʼu faʼahiga ʼaluʼaga ʼaē neʼe tokoni ki te gāue ʼaia ke lava lelei ʼi te malamanei katoa.
ʼAua Naʼa Tou Fiu!
20. Ko ai ʼaē ʼe nātou lagolago kia tatou mokā tou faka mafola te logo lelei?
20 Logope la ʼe tou maʼuʼuli ʼi “he u temi faigataa,” kae ʼe tou tui papau ʼe tokagaʼi e Sehova te ʼu meʼa ʼaē ʼe hoko kia tatou. ʼE tokoni pea mo lagolago ki tana hahaʼi ʼi tanatou faiga ʼaē ke nātou fakakatoa te tala ʼo te logo lelei naʼa hoko mai te temi ʼaē neʼe fakakatofa ai e te ʼAtua ke ina fakaʼauha te mālama agakovi ʼaenī. (2 Timoteo 3:1; Mateo 24:14) ʼE fakaafe tatou e Sehova ke tou “kauga gaue” mo ia. (1 Kolonito 3:9) Tahi ʼaē, ʼe tou ʼiloʼi papau ʼe kau Kilisito Sesu ʼi te gāue ʼaia, pea ʼe feala hatatou falala ki te lagolago pea mo te takitaki ʼo tatou e te kau ʼaselo.—Mateo 28:20; Apokalipesi 14:6.
21. Ko te falala fea ʼaē ʼe tonu ke tou taupau maʼu?
21 Neʼe hāofaki ia Noe pea mo tona famili ʼi te tulivio, he neʼe nātou tui ki te ʼu fakapapau ʼa Sehova. Ko nātou ʼaē ʼe feiā tanatou tui ia ʼaho nei, ʼe hāofaki anai nātou ʼi te “ahiahi lahi.” (Apokalipesi 7:14) ʼE tou maʼuʼuli nei ʼi he ʼu temi maʼuhiga. ʼE lahi te ʼu meʼa fakaofoofo ka ʼamanaki hoko! Mole tuai, pea fakatuʼu anai e te ʼAtua he lagi pea mo he kele foʼou ʼe maʼu ai anai te faitotonu. (2 Petelo 3:13) ʼAua naʼa puli ʼi he temi takotou falala ʼaē, ʼe feala ke fakahoko e Sehova te ʼu meʼa fuli ʼaē ʼe ina ʼui mai.—Loma 4:21.
Ko He ʼu Puani Ke Manatuʼi
◻ He koʼe ʼe mole takitaki e Sehova te ʼu gāue fuli ʼa te tagata?
◻ ʼE hā feafeaʼi ʼi te felogoi ʼa Sehova pea mo te kau Iselaelite, ʼe feala ke ina fakahoko tana fakatuʼutuʼu?
◻ ʼI te temi ʼo Noe, neʼe hā feafeaʼi te sio fakatomuʼa ʼa Sehova?
◻ Koteā te falala ʼaē ʼe tonu ke tou maʼu ʼo ʼuhiga mo te ʼu fakapapau ʼa te ʼAtua?