‘Koutou Hāofaki Koutou Mo Nātou ʼe Fakalogo Atu’
“Tokaga kia koe pea mo tau faiʼakonaki. . . . Koteuhi i tau fai aia, e ke haofaki anai ia koe, ia koe pea mo natou e fakalogo kia te koe.”—1 Timoteo 4:16.
1, 2. Koteā ʼaē ʼe ina uga te kau Kilisitiano moʼoni ke nātou hoko atu tanatou gāue ʼaē ko te hāofaki ʼo te hahaʼi?
ʼI TE kiʼi kolo mamaʼo ʼo te potu noleto ʼo Tailani, ko te taumatuʼa Fakamoʼoni ʼa Sehova neʼe hoki nā ako te lea ʼo te telepi ʼe tuʼu ʼi te moʼuga, ʼe nā faiga ke nā palalau ki te hahaʼi ʼo te kiʼi kolo ʼaia. Neʼe kamata ako e te taumatuʼa te lea Lahu, moʼo fakahā kia nātou te logo lelei ʼo te Puleʼaga ʼo te ʼAtua.
2 Neʼe fakamahino fēnei e te tagata: “ ʼE faigataʼa tamā fakamatala tomā fiafia pea mo tomā loto fīmālie ʼi tamā gāue ʼi te lotolotoiga ʼo te hahaʼi lelei ʼaia. ʼE ma logoʼi ʼe ma kau moʼoni ki te fakahoko ʼo Apokalipesi 14:6, 7, ʼi tamā fakahā te logo lelei ‘ki te puleʼaga fuli pe, mo te telepi fuli pe pea mo te lea fuli pe.’ ʼE tokosiʼi te ʼu fenua ʼaē ʼe mole heʼeki hū kiai te logo lelei, pea ʼe kau kiai te kiʼi kolo ʼaia. ʼE lahi tamā ʼu ako Tohi-Tapu ʼe mole feala ke ma fai.” ʼE mahino ia, ko te taumatuʼa ʼaia ʼe nā fia hāofaki ia nāua pea mo nātou ʼaē ʼe fakalogo age kia nāua. ʼI totatou ʼuhiga Kilisitiano, ʼe mole tou fakaʼamu fuli koa la ke tou fai te faʼahi ʼaia?
“Tokaga Kia Koe Pea Mo Tau Faiʼakonaki”
3. Moʼo hāofaki te hahaʼi, koteā ʼaē ʼe tonu ke tou ʼuluaki fai?
3 Neʼe fai e te ʼapositolo ko Paulo te tokoni ʼaenī kia Timoteo, “tokaga kia koe pea mo tau faiʼakonaki,” pea ʼe ʼaoga te tokoni ʼaia ki te kau Kilisitiano fuli pe. (1 Timoteo 4:16) ʼE moʼoni, moʼo tokoni ki te hahaʼi ke nātou hāofaki ia nātou, ʼe tonu ke tou ʼuluaki tokaga muʼa kia tatou. ʼO feafeaʼi? ʼUluaki ʼe tonu ke tou nofo tokaga ʼo ʼuhiga mo te temi ʼaē ʼe tou maʼuʼuli ai. Neʼe fakahā e Sesu te fakaʼiloga ʼaē ke ʼiloʼi ai e tana kau tisipulo te temi “fakaosi o te malama-nei.” Kae neʼe toe ʼui e Sesu, ʼe mole tou ʼiloʼi anai te ʼaho tonu ʼo te fakaʼosi. (Mateo 24:3, 36) ʼE tonu ke tou tali feafeaʼi te faʼahi ʼaia?
4. (a) ʼE tonu ke tou fakaʼaogaʼi feafeaʼi te temi ʼaē ʼe kei toe ki te mālama ʼaenī? (b) Koteā te manatu ʼaē ʼe tonu ke tou tekeʼi?
4 ʼE tonu ke tou feʼekeʼaki takitokotahi, ‘ ʼE ʼau fakaʼaogaʼi koa te temi ʼaē ʼe kei toe ki te mālama ʼaenī, moʼo hāofaki ʼoʼoku pea mo te hahaʼi ʼaē ʼe fakalogo mai kia ʼau? Peʼe ʼau manatu koa, “Mai tona ʼuhiga ʼaē ʼe mole tou ʼiloʼi te ʼaho tonu ʼo te fakaʼosi, ʼe mole hona ʼaoga ke ʼau tuʼania kiai”?’ Ko te taʼi manatu ʼaia ʼe fakatupu tuʼutāmaki anai kia tatou. ʼE mole ʼalutahi mo te fakaloto mālohi ʼaenī ʼa Sesu: “Koutou nofo teuteu, koteuhi e haele mai te Foha o te tagata i te hola e mole koutou manatu ki ai.” (Mateo 24:44) ʼE mahino papau ia, ʼe mole tonu ʼi te temi ʼaenī ke puli ai tatatou fiafia ʼi te tauhi kia Sehova, peʼe tou kumi ke fakafimālieʼi tatou e te mālama ʼaenī.—Luka 21:34-36.
5. Koteā te ʼu faʼifaʼitaki ʼaē neʼe tuku mai e te kau Fakamoʼoni ʼa Sehova ʼi muʼa ʼo te temi ʼo Kilisito?
5 Ko te tahi meʼa ʼaē ʼe feala ke tou fai moʼo fakahā ʼe tou tokaga kia tatou totonu, ko tatatou nofo agatonu mo faʼa kātaki ʼi totatou ʼuhiga Kilisitiano. Ko te ʼu kaugana ʼa te ʼAtua ʼo te temi ʼāfea, neʼe nātou faʼa kātaki, tatau aipe pe neʼe nātou tui kua vave faka ʼāteaina nātou peʼe kailoa. ʼI tana ʼosi palalau ki te kau fakamoʼoni ʼo te temi muʼa ʼo Kilisito ohage ko Apele, mo Enoke, mo Noe, mo Apalahamo pea mo Sala, neʼe fakatokagaʼi fēnei e Paulo: “Nee heeki natou tali te u fakapapau, nee natou sio mamao ki ai, mo fai ki ai tanatou fakaʼalofa pea nee natou fakamooni ko natou ko he hahai matapule, pea ko he hahai e fakalaka i te kelekele.” Neʼe mole nātou mulimuli ki tonatou ʼu holi ke nātou maʼuli fīfīmālie, pea neʼe mole nātou fai te ʼu meʼa heʼeʼaoga ʼaē neʼe fakaneke ke nātou fai, kae neʼe nātou fakaʼamu ki ‘te fakahoko ʼo te ʼu fakapapau.’—Hepeleo 11:13; 12:1.
6. Ko tanatou manatu ʼo ʼuhiga mo te hāofaki, neʼe malave feafeaʼi ki te maʼuli ʼo te kau ʼuluaki Kilisitiano?
6 Neʼe ʼui e te kau ʼuluaki Kilisitiano ʼe nātou hage ko he ʼu “matapule” ʼi te mālama ʼaenī. (1 Petelo 2:11) Logope la neʼe nātou hāo ʼi te fakaʼauha ʼaē neʼe hoko ki Selusalemi ʼi te taʼu 70 ʼo totatou temi, ko te kau Kilisitiano moʼoni neʼe mole nātou fakagata tanatou fai faka mafola peʼe nātou toe liliu ki te faʼahiga maʼuli ʼa te mālama. Neʼe nātou ʼiloʼi, ʼe hāofaki anai ia nātou ʼaē ʼe nofo agatonu. ʼI tona fakahagatonu, ʼi te taʼu 98 ʼo totatou temi, neʼe tohi fēnei e te ʼapositolo ko Soane: “E fakamole te malama-nei mo tana u holi; kae kia ia ae e ina fai te finegalo o te Atua e mauli o talu ai.”—1 Soane 2:17, 28.
7. E feafeaʼi te faʼa kātaki ʼa te kau Fakamoʼoni ʼa Sehova ʼo totatou temi?
7 ʼI totatou temi, ʼe faʼa kātaki te kau Fakamoʼoni ʼa Sehova ʼi te gāue faka Kilisitiano, logola ʼe hoko kia nātou te ʼu fakataga ʼe kovi ʼaupito. Neʼe ʼalunoa koa tanatou faʼa kātaki? Kailoa he neʼe tala fakapapau age e Sesu kia nātou: “Kae ko ae e kataki anai ki te gataʼaga, e mauli anai,” tatau aipe pe ko te gataʼaga ʼo te mālama ʼāfea ʼaenī pe ko tokita mate. ʼI te fakatuʼuake, ʼe manatuʼi anai e Sehova tana kau kaugana agatonu fuli ʼaē kua mamate pea ʼe ina fakapale anai nātou.—Mateo 24:13; Hepeleo 6:10.
8. ʼE tou lava fakahā feafeaʼi tatatou fakafetaʼi ki te faʼa kātaki ʼa te kau Kilisitiano ʼo te temi ʼāfea?
8 Tahi ʼaē meʼa, ʼe tou fiafia he ko te kau Kilisitiano agatonu ʼo te temi muʼa neʼe mole nātou tuʼaniaʼi pe ke hāofaki tonatou maʼuli. ʼE mahino ia, ko tatou ʼaē kua tou ako pe koteā te Puleʼaga ʼo te ʼAtua, ʼe tou loto fakafetaʼi kia nātou ʼuhi ko tanatou ʼu faiga pea mo tanatou faʼa kātaki moʼo fakahoko te gāue ʼaē neʼe tuku age e Sesu: “Koutou olo o fakahoko he u tisipulo i te atu puleaga. . . . Koutou fakaʼako natou ki te taupau o meafuape nee au fakatotonu kia koutou.” (Mateo 28:19, 20) ʼI tatatou kei maʼu te faigamālie ʼaia, ʼe feala ke tou fakahā tatatou fakafetaʼi, ʼo tou faka mafola ki te hahaʼi ʼaē ʼe mole heʼeki nātou fagono ki te logo lelei. Koia ko te fai faka mafola ʼe ko te ʼuluaki fakatuʼutuʼu ʼaia moʼo fai ʼo ni ʼu tisipulo.
‘Tokaga Ki Tau Fai Akonaki’
9. Kapau ʼe lelei tatatou manatu, pea ʼe lava tokoni feafeaʼi mai ke tou kamata he ʼu ako Tohi-Tapu?
9 Ko tatatou gāue ʼe mole gata pe ki te fai faka mafola, kae ʼe toe kau kiai mo te faiakonaki. Neʼe fekauʼi tatou e Sesu ke tou akoʼi te hahaʼi ke nātou mulimuli ki te ʼu meʼa fuli pe ʼaē neʼe ina fakatotonu mai. ʼE moʼoni, ʼi ʼihi telituale, ko te tokosiʼi ʼe nātou fia ako pe ko ai ia Sehova. Kae kapau ʼe mole lelei tatatou manatu ʼo ʼuhiga mo te telituale, pea ʼe faigataʼa anai tatatou kamata he ʼu ako Tohi-Tapu. Ko Yvette, te tuagaʼane pionie neʼe gāue ʼi te telituale ʼaē neʼe ʼui e ʼihi neʼe mole hona fua, neʼe ina tokagaʼi neʼe kamata te ʼu ako Tohi-Tapu e te hahaʼi ʼaē neʼe ʼōmai ʼo ʼaʼahi te telituale ʼaia ka mole ʼi ai hanatou ʼu manatu fakapalatahi. Neʼe fetogi e Yvette tana manatu, pea neʼe ina toe maʼu mo ia te ʼu hahaʼi neʼe nātou fia ako te Tohi-Tapu.
10. Koteā te gāue tāfito ʼaē ʼe tou fai mokā tou ako te Tohi-Tapu ki te hahaʼi?
10 Ko ʼihi Kilisitiano, ʼe nātou fakameʼameʼa ʼi te kole ki te hahaʼi peʼe nātou fia ako te Tohi-Tapu, heʼe nātou manatu ʼe mole nātou poto ʼi te fai ako. ʼE moʼoni ʼe ʼi ai totatou ʼu fealagia kehekehe. Kae ʼe mole tonu ke lahi feafeaʼi totatou poto ke tou faiva ʼi te akoʼi ki te hahaʼi te Folafola ʼa te ʼAtua. Ko te logo maʼa ʼo te Tohi-Tapu ʼe mālohi, pea neʼe ʼui e Sesu ko nātou ʼaē ʼe hage ko ni ʼu ōvi ʼe nātou ʼiloʼi te leʼo ʼo te Tagata Tauhi Ōvi moʼoni mokā nātou logo kiai. Koia ko tatatou gāue ʼe ko te ʼave ʼo te logo ʼo te Tagata Tauhi Ōvi Lelei, ko Sesu, ʼo tou fai fakalelei ʼo mulimuli ki totatou ʼu fealagia.—Soane 10:4, 14.
11. Koteā ʼaē ʼe feala ke koutou fai ke fua takotou tokoni ki he tahi ʼe ina ako te Tohi-Tapu?
11 ʼE tou lava ʼave feafeaʼi te logo ʼo Sesu ke ʼi ai hona fua? ʼUluaki, koutou vakaʼi lelei te meʼa ʼaē ʼe ʼui e te Tohi-Tapu ʼo ʼuhiga mo te meʼa ʼe koutou fia palalau kiai. ʼE tonu ke koutou mahino kiai ʼi muʼa ʼo hakotou akoʼi ki te hahaʼi. Tahi ʼaē meʼa, koutou faiga ke fai te ako ʼi he ʼaluʼaga fakaloto māfana pea mo fakakaumeʼa. Ko te kau ako, ʼo kau kiai ia nātou liliki, ʼe faigafua age tanatou ako mokā nātou loto fīmālie pea mo kapau ʼe fakaʼapaʼapaʼi nātou e tonatou tagata faiako pea mo agalelei kia nātou.—Tāʼaga Lea 16:21.
12. Koteā ʼaē ʼe feala ke koutou fai ke koutou ʼiloʼi papau ai peʼe mahino lelei ia ia ʼaē ʼe ako ki te ʼu meʼa ʼaē ʼe koutou akoʼi age?
12 ʼI tokotou ʼuhiga faiako, ʼe mole koutou fia fakahā pe te ʼu meʼa ʼaē ʼe tonu ke tali fakaʼatamai atu e ia ʼaē ʼe ako. Koutou tokoni kia ia ke mahino ki te ʼu meʼa ʼaē ʼe ina ako. Ko tona poto, mo te ʼu meʼa ʼaē neʼe hoko kia ia pea mo tana mālama ki te Tohi-Tapu, ʼe malave anai ki tana mahino ki te ʼu meʼa ʼaē ʼe koutou ʼui age. Koia ʼe feala ke koutou fai te fehuʼi ʼaenī, ‘ ʼE mahino koa ki te faka ʼuhiga ʼo te vaega ʼaē ʼe tuʼu ʼi te koga tohi ʼaē ʼe ma ako?’ ʼE feala ke koutou ʼiloʼi tana manatu, mo kapau ʼe koutou fai age he ʼu fehuʼi ʼe mole ina tali pe anai, ‘ei’ peʼe ‘kailoa,’ kae ʼe tonu anai ke ina fakamahino atu pe koʼe ʼe ina tali feiā. (Luka 9:18-20) ʼI te tahi faʼahi, ko ʼihi ako ʼe nātou tuʼania te lagaʼi ʼo he ʼu fehuʼi kia ia ʼaē ʼe ina fai tanatou ako. Pea ʼe hoko atu te ako ka mole nātou mahino lelei ki te meʼa ʼaē ʼe akoʼi age. Koutou fakaloto mālohiʼi ia ia ʼaē ʼe ako ke ina fai hana ʼu fehuʼi, pea ke ina fakahā atu mokā mole mahino lelei ki he puani.—Maleko 4:10; 9:32, 33.
13. ʼE koutou lava tokoni feafeaʼi kia ia ʼaē ʼe ako ke liliu ko he tahi ʼe faiako?
13 Ko te fakatuʼutuʼu maʼuhiga ʼo te ako Tohi-Tapu, ʼe ko te akoʼi ʼo he tahi ke liliu ko he faiako. (Kalate 6:6) Moʼo fakahoko te fakatuʼutuʼu ʼaia, ʼe lelei hakotou toe vakaʼi te ako pea mo kole age ke ina fakamahino atu he puani ʼaki he ʼu palalau faigafua, ohage ʼe ina fakamahino ki he tahi ʼe hoki logo kiai. Ki muli age, mokā feala anai ke kau ki te minisitelio, ʼe koutou lava fakaafe anai ia ia ke koutou gāue fakatahi ʼi te fai faka mafola. ʼE lagi faigafua age anai kia ia takotou gāue fakatahi, pea ʼaki te temi ʼe māhani anai pea ʼe ʼāsili falala anai ʼo aʼu ki tana lava ʼalu ʼo fai faka mafola tokotahi.
Koutou Tokoni Ki ʼAē e Ako Ke Kaumeʼa Mo Sehova
14. Koteā takotou ʼuluaki fakatuʼutuʼu ʼi tokotou ʼuhiga faiako, pea koteā ʼaē ka tokoni anai ki te fakaiku ʼo te faʼahi ʼaia?
14 Ko te ʼuluaki fakatuʼutuʼu ʼa te kau Kilisitiano fuli, ʼe ko tanatou tokoni kia ia ʼaē ʼe ako ke kaumeʼa mo Sehova. ʼE lava anai takotou fakatuʼutuʼu ʼaia ʼaki takotou ʼu palalau pea mo takotou faʼifaʼitaki. Ko totatou faʼifaʼitaki ʼe malave ʼaupito ki te loto ʼo te kau ako. ʼE moʼoni ʼe maʼuhiga age te ʼu gāue ʼi te ʼu palalau, tāfito la mokā tonu ke kita akoʼi kia ia ke ina maʼu te ʼu kalitate lelei pea ke faʼafai. Kapau ʼe sio ko takotou ʼu palalau pea mo takotou ʼu gāue ʼe tupu mai he ʼu felogoi lelei mo Sehova, pea ko te faʼahi ʼaia ʼe ina uga anai ia ia ke ina maʼu te taʼi felogoi ʼaia mo Sehova.
15. (a) He koʼe ʼe maʼuhiga ki te kau ako ke lelei te manatu ʼaē ʼe ina uga nātou ke nātou tauhi kia Sehova? (b) ʼE koutou lava tokoni feafeaʼi kia ia ʼaē ʼe ako ke haga tuputupu ʼi te faʼahi fakalaumālie?
15 ʼE koutou loto ke tauhi ia ia ʼaē ʼe koutou ako kia Sehova heʼe ʼofa kia te ia, kae mole ʼuhi pe ko hana fia hāo ʼi Halamaketone. Kapau ʼe koutou tokoni age kia ia ke ina maʼu te taʼi manatu lelei ʼaia, pea ʼe hage anai ʼe koutou laga ia ia ʼaki he ʼu meʼa ʼe vela gataʼa ʼo hāo anai ʼi te ʼu ʼahiʼahi ʼaē ka hoko ki tana tui. (1 Kolonito 3:10-15) Kae kapau ʼe mole lelei te manatu ʼaē ʼe ina uga ia ia, ohage ko hana faʼifaʼitakiʼi fakavale ia koutou pe ko he tahi kehe, pea ʼe mole feala anai ke ina tauʼi te ʼu fakaneke kovi, pea ʼe mole ina maʼu anai te lototoʼa ʼaē ʼe ʼaoga moʼo fai ʼo te meʼa ʼaē ʼe tonu. Koutou manatuʼi, ʼe mole koutou fai anai tana ako ʼo talu ai. Kapau ʼe kei maʼu hokotou faigamālie, pea koutou fakaloto mālohiʼi ia ia ke fakaōvi kia Sehova ʼo ina lau te Tohi-Tapu ʼi te ʼaho fuli pea mo fakakaukauʼi. Kapau ʼe ina fai te faʼahi ʼaia, pea ʼi te ʼosi katoa ʼo tana ako mo koutou, ʼe ina haga ako anai te “faʼifaʼitaki ʼo te ʼu folafola ʼo te maʼuli” mai te Tohi-Tapu, pea mo te ʼu tohi faka Tohi-Tapu.—2 Timoteo 1:13, MN.
16. E koutou lava ako feafeaʼi kia ia ʼaē ʼe ako ke faikole fakamalotoloto?
16 ʼE toe feala foki ke koutou tokoni kia ia ke fakaōvi kia Sehova ʼo koutou akoʼi age ke faikole fakamalotoloto. ʼE koutou lava fai feafeaʼi te faʼahi ʼaia? ʼE lagi feala ke koutou fakahā kia ia te faikole faʼifaʼitaki ʼa Sesu, pea mo te ʼu tuʼuga faikole fakamalotoloto ʼaē ʼe tuʼu ʼi te Tohi-Tapu ohage ko te ʼu faikole ʼo te ʼu pesalemo. (Pesalemo 17, 86, 143; Mateo 6:9, 10) Tahi ʼaē meʼa, ʼi tanatou logo ki takotou ʼu faikole ʼi te kamata pea mo te fakaʼosi ʼo te ako, ʼe logoʼi anai e ia ʼaē ʼe koutou ako ʼe koutou ʼofa kia Sehova. Koia ko takotou ʼu faikole ʼe tonu ke hā tuʼumaʼu ai takotou fakamalotoloto, pea mo takotou aga fakahagatonu, pea mo takotou aga fakapotopoto ʼi te faʼahi fakalaumālie pea mo te meʼa ʼaē ʼe koutou logoʼi ʼi tokotou loto.
Koutou Faiga Ke Hāofaki Takotou Fānau
17. ʼE lava tokoni feafeaʼi te ʼu mātuʼa ki tanatou fānau ke nātou nonofo ʼi te ala ʼo te hāofaki?
17 ʼE mahino papau ia, ʼe tou fia hāofaki tatatou fānau. Ko te tokolahi ʼo te ʼu fānau ʼo te ʼu mātuʼa Kilisitiano ʼe nātou fakamalotoloto pea mo “malohi i te tui.” Kae ko ʼihi ʼe mole tauaka te moʼoni ʼi tonatou loto. (1 Petelo 5:9; Efeso 3:17; Kolose 2:7) Ko te tokolahi ʼo te kau tūpulaga ʼaia, ka nātou lahilahi ake, pea ʼe nātou mavae ʼi te ala faka Kilisitiano. Kapau ʼe koutou maʼu fānau, pea koteā ʼaē ʼe feala ke koutou fai ke mole hoko te faʼahi ʼaia ki takotou fānau? ʼUluaki koutou gāueʼi tokotou ʼaluʼaga faka famili ke fīmālie. Kapau ʼe lelei te maʼuli faka famili, pea ʼe nātou fakaʼapaʼapaʼi anai te tuʼulaga pule, mo nātou leleiʼia anai te ʼu aga ʼaē ʼe tonu ke fai, pea ʼe nātou felogoi lelei anai mo te hahaʼi. (Hepeleo 12:9) Koia ʼe mālohi ai te ʼu felogoi ʼa te famili, pea ʼe tuputupu ai te fakakaumeʼa ʼa te fānau mo Sehova. (Pesalemo 22:10) Ko te ʼu famili ʼaē ʼe mālohi ʼe nātou gāue fakatahi, ʼo logo tahi—tatau aipe peʼe feala ke fakaʼaogaʼi e te ʼu mātuʼa te temi ʼaia maʼa nātou. Kapau ʼe koutou fai feiā, pea ʼe koutou lava akoʼi ai ki takotou fānau ke nātou fai he ʼu tonu ʼe lelei ʼi tonatou maʼuli. ʼU mātuʼa, ko te meʼa ʼaē ʼe ʼaoga ʼaupito ki takotou fānau ʼe mole ko te ʼu meʼa fakasino, kae ko koutou—tokotou temi, mo tokotou mālohi pea mo tokotou ʼofa. ʼE koutou foaki koa te ʼu meʼa ʼaia ki takotou fānau?
18. Koteā te ʼu fehuʼi ʼaē ʼe tonu ki te ʼu mātuʼa ke nātou tokoni age ai ki tanatou ʼu fānau ke nātou maʼu honatou ʼu tali?
18 ʼE mole tonu ke manatu te ʼu mātuʼa Kilisitiano, ʼe liliu anai mo tanatou fānau ko he kau Kilisitiano. ʼE ʼui fēnei e Daniel, te tagata ʼāfea ʼe ʼi ai tana fānau e toko nima: “Ko te ʼu mātuʼa ʼe tonu ke nātou toʼo he temi moʼo tokoni ki tanatou fānau ke nātou pulihi tanatou ʼu lotolotolua ʼaē ʼe tupu mai te faleako pe ko te tahi ʼu potu. ʼAki he aga lolomi ʼe feala ke nātou tokoni ki tanatou fānau ke nātou tali ki te ʼu fehuʼi ʼaenī: ‘ ʼE tou maʼuʼuli moʼoni koa ʼi te temi fakaʼosi? ʼE ko he lotu moʼoni koa e tahi? He koʼe ʼe mole lelei haku fakakaugā mo hoku kaugā ako logola ʼe mole agakovi? ʼE kovi moʼoni koa te ʼu felāveʼi fakasino ʼi muʼa ʼo te ʼohoana?’ ” ʼU mātuʼa, ʼe koutou lava falala ʼe tapuakina anai e Sehova takotou ʼu faiga, heʼe ina loto mo ia ke fiafia takotou fānau.
19. He koʼe ʼe lelei age mo kapau ko te ʼu mātuʼa ʼaē ʼe nātou fai te ako ʼo tanatou ʼu fānau?
19 Ko ʼihi mātuʼa ʼe nātou manatu ʼe mole nātou popoto ʼi te fai ʼo te ako ʼo tanatou fānau. Kae ʼe mole tonu ke koutou manatu feiā, heʼe mole he tahi ʼe lelei age ia koutou moʼo fai tanatou ako. (Efeso 6:4) Kapau ʼe koutou fai tanatou ako pea ʼe feala anai ke koutou ʼiloʼi lelei pe koteā ʼaē ʼe ʼi tonatou loto pea mo tonatou ʼatamai. Ko te ʼu meʼa ʼaē ʼe nātou ʼui ʼe haʼu moʼoni koa mai tonatou loto peʼe kailoa? ʼE nātou tui moʼoni koa ki te ʼu meʼa ʼaē ʼe nātou ako? ʼE moʼoni koa ia Sehova kia nātou? ʼE hoki koutou ʼiloʼi anai te ʼu tali ki te ʼu fehuʼi ʼaia mo kapau ʼe koutou fai te ako ʼo takotou fānau.—2 Timoteo 1:5.
20. Koteā ʼaē ʼe lava fai e te ʼu mātuʼa ke fakafiafia pea mo ʼaoga te ako faka famili?
20 Kapau kua koutou kamata fai takotou ako faka famili, pea ʼe lava feafeaʼi hakotou mulimuli tuʼumaʼu kiai? ʼE ʼui fēnei e Joseph, ʼe tagata ʼāfea pea ʼe ʼi ai tona foha veliveli pea mo tona ʼofafine: “Ohage ko te ʼu ako Tohi-Tapu fuli, ko te ako faka famili ʼe tonu ke fai fakafiafia pea ke fia fai kiai ia nātou fuli ʼo te famili. Moʼo fakahoko ʼo te faʼahi ʼaia ʼi tomatou famili, ʼe mole feala ke mātou fai tuʼumaʼu ʼi te hola e tahi. ʼE feala ke hola katoa tamatou ako, kae ʼi ʼihi temi ʼe mātou fai ia minuta pe e hogofulu. Ko te meʼa ʼaē ʼe maʼuhiga tāfito ki tamā fānau ʼi te vāhaʼa, ʼe ko te gaoʼi ʼo te ʼu hisitolia ʼo te tohi Recueil d’histoires bibliques.a Ko te malave loloto ʼo te ʼu hisitolia ʼaia ki tonā loto pea mo tanā mahino kiai, ʼe maʼuhiga ake ia ʼi te lahi ʼo te ʼu palakalafe ʼaē ʼe feala ke mātou ako.”
21. Ko te temi fea ʼaē ʼe feala ai ki te ʼu mātuʼa ke nātou akoʼi tanatou ʼu fānau?
21 ʼE mahino ia, ko te akoʼi ʼo takotou ʼu fānau ʼe mole gata pe ki te ʼu temi ʼaē ʼe fai ai tanatou ako. (Teutalonome 6:5-7) Ko te Fakamoʼoni ʼo Tailani ʼaē neʼe tou talanoa ki ai ʼi te kamata, ʼe ina ʼui fēnei: “ ʼE ʼau manatuʼi lelei taku ʼalu lelue mo taku Tāmai ʼi te fai faka mafola, ki te ʼu potu taupotu ʼo te telituale ʼo tomatou kokelekasio. ʼE ʼau ʼiloʼi papau ko te ʼu meʼa ʼaē neʼe tokoni mai ke mātou kau ki te minisitelio ʼi te temi katoa, ʼe ko te faʼifaʼitaki lelei ʼo tamatou ʼu mātuʼa pea mo tanā akoʼi mātou ʼi te ʼu ʼaluʼaga fuli pe. Pea neʼe mātou taupau te ʼu meʼa ʼaē neʼe nā akoʼi mai, heʼe kei ʼau gāue pe ʼi te potu taupotu ʼo te kele!”
22. Koteā anai tona ʼu fua ʼo takotou ‘tokaga kia koutou pea mo takotou fai akonaki’?
22 Kua vave hoko mai te temi ʼaē ka haʼu ai Sesu, ʼi tona temi totonu, ʼo fakahoko ki te mālama ʼaenī te fakamāu ʼa te ʼAtua. Ko te meʼa maʼuhiga ʼaia ʼe ʼiloʼi anai ʼi te ʼatulaulau katoa, kae ko te kau kaugana agatonu ʼa Sehova ʼe nātou haga tauhi anai kia te ia ʼaki te loto falala ki te hāofaki heʼegata. ʼE koutou ʼamanaki koa ʼe koutou kau anai ia nātou ʼaia, ʼo feiā pe mo takotou ʼu fānau pea mo takotou kau ako Tohi-Tapu? Koutou manatuʼi: “Tokaga kia koe pea mo tau faiʼakonaki, kataki i ai. Koteuhi i tau fai aia, e ke haofaki anai ia koe, ia koe pea mo natou e fakalogo kia te koe.”—1 Timoteo 4:16.
[Nota ʼi te lalo pasina]
a Neʼe tā e te Watchtower Bible and Tract Society of New York, Inc.
ʼE Koutou Lava Fakamahino Koa?
• ʼE tonu ke feafeaʼi tatatou manatu, ʼi tatatou mole ʼiloʼi te temi totonu ʼo te fakamāu ʼa te ʼAtua?
• Koteā te ʼu meʼa ʼaē ʼe feala ke tou fai ke tou ‘tokaga ki tatatou faiakonaki’?
• ʼE koutou lava tokoni feafeaʼi ki he kau ako ke fakakaumeʼa mo Sehova?
• He koʼe ʼe maʼuhiga ke fakatuʼutuʼu e te ʼu mātuʼa he temi moʼo akoʼi ai tanatou fānau?
[Paki ʼo te pasina 15]
ʼE lelei age anai te ako mo kapau ʼe fai ʼaki he loto māfana pea mo he aga fakakaumeʼa
[Paki ʼo te pasina 18]
ʼE fakafiafia anai te ʼu ako Tohi-Tapu mo kapau ʼe fai ai he ʼu gaoʼi ʼo te ʼu hisitolia faka Tohi-Tapu, ohage ko te fakamāuʼi e Salomone te ʼu fafine paomutu e lua