Ko Te ʼu Faʼifaʼitaki Lelei—ʼE ʼi Ai Koa Hona ʼu Fua Kia Koutou?

“NEE koutou liliu ai ko he faifaitaki ki te hahai tui katoa i Masetonia mo Akaia.” Neʼe tohi e te ʼapositolo ko Paulo te ʼu palalau ʼaenī ki te kau Kilisitiano agatonu ʼo Tesalonika. Neʼe lelei ʼaupito te faʼifaʼitaki ʼaē neʼe nātou tuku ki te hahaʼi tui. Kae neʼe mulimuli te kau Tesalonika ki te faʼifaʼitaki lelei ʼaē neʼe tuku age e Paulo pea mo tona ʼu kaugā gāue. Neʼe ʼui fēnei e Paulo: “Nee mole gata’pe mo te lea o te fakaha o tamatou evaselio kia koutou, kae nee fai aki te malohi, mo te Laumalie-Maonioni pea mo te loto pau. Pea e koutou iloi, te faahiga tagata nee matou kau ai i te lotolotoga o koutou o uhiga mo koutou. Pea mo koutou, nee matou liliu ko outou faifaitakiʼaga.”​—⁠1 Tesalonika 1⁠:​5-7.

ʼE moʼoni, ko te maʼuli ʼa Paulo neʼe mole gata ʼaki pe tana ʼu faiakonaki. Ko tona maʼuli neʼe ko he akonaki​—⁠neʼe ko he faʼifaʼitaki ʼi te tui, mo te loto faʼa kātaki, pea mo te maʼuli faka sakilifisio. ʼAki te ʼu meʼa ʼaia, neʼe uga ai e Paulo pea mo tana ʼu kaugā gāue te kau Tesalonika, ke nātou tali te moʼoni logope la tanatou “tali mamahi.” Kae neʼe mole ko Paulo pe pea mo ʼona kaugā gāue agatonu ʼaē neʼe nātou tuku age he faʼifaʼitaki lelei ki te ʼu hahaʼi tui ʼaia. He neʼe ʼi ai foki mo te fakaloto mālohi ʼo nātou ʼaē neʼe nātou kātakiʼi te ʼu mamahi. Neʼe faitohi fēnei ia Paulo ki te kau Tesalonika: “Kua koutou liliu, ʼu tēhina, ko he ʼu faʼifaʼitaki ʼo te ʼu kokelekasio ʼa te ʼAtua ʼaē ʼe tuʼu ʼi Sutea, ʼo fakatahi mo Kilisito Sesu, heʼe toe feiā mo koutou, kua koutou kamata tali mamahi mai takotou ʼu hahaʼi, ohage pe ko tanatou tali mamahi mai te hahaʼi Sutea.”​—⁠1 Tesalonika 2⁠:​14, MN.

Ko Kilisito Sesu​—⁠Te Faʼifaʼitaki Tāfito

Logope la ko Paulo neʼe ina tuku he faʼifaʼitaki lelei ke mulimuli kiai te hahaʼi, kae neʼe mole galo kia ia te fakahā ʼe ko Sesu te faʼifaʼitaki tāfito ʼaē ʼe tonu ke muliʼi e te kau Kilisitiano. (1 Tesalonika 1⁠:⁠6) Neʼe ko Kilisito pea ʼe ko Kilisito tatatou Faʼifaʼitaki tāfito. Neʼe tohi fēnei e te ʼapositolo ko Petelo: “Ko te [ala] ʼaia ʼaē neʼe pāui koutou kiai, koteʼuhi neʼe mamahi foki ia Kilisito maʼa koutou, ʼo ina tuku atu kia koutou he faʼifaʼitaki ke koutou mulimuli lelei ki tona ʼu tafuga vaʼe.”​—⁠1 Petelo 2⁠:​21, MN.

Kae neʼe mate ia Sesu ʼi tona ʼuhiga tagata, kua hili kiai taʼu e 2 000. ʼI temi nei ʼe ko he laumālie ʼe maʼuli tuputupua, “e afio i te malama e mole kakusia.” Pea ʼi tona ʼuhiga ʼaia, ʼe “heeki mamata he tagata [ki ai], pea e mole feala te sio” ki ai. (1 Timoteo 6⁠:16) Kapau koia ʼaia, pea ʼe feafeaʼi anai hatatou faʼifaʼitakiʼi ia ia? Moʼo fai te faʼahi ʼaia, ʼe feala ke tou ako te ʼu Evaselio e fā ʼaē ʼe nātou fakamatala tona maʼuli, heʼe fakahā lelei mai e te ʼu Evaselio ʼaia pe neʼe feafeaʼi tona ʼulugaaga, mo tona maʼuli ʼi te kele, pea mo tana faʼahiga “manatu.” (Filipe 2⁠:​5-8) ʼE feala hatatou mahino lelei kia ia, mo kapau ʼe tou ako fakalelei te tohi Te tagata ʼaē ʼe lahi tokotahi ʼo te ʼu temi fuli, ʼaē ʼe fakamatala katoa ai te maʼuli ʼa Sesu lolotoga te temi ʼaē neʼe nofo ai ʼi te kele.a

Neʼe malave ʼaupito ki te ʼapositolo ko Paulo te maʼuli faka sakilifisio ʼo Sesu. Neʼe ina ʼui fēnei ki te kau Kilisitiano ʼo Kolonito: “Kae kia ʼau, ʼaki he lotolelei, ʼe ʼau foaki katoa anai, pea ʼe ʼau fakaʼaogaʼi katoa anai maʼa tokotou ʼu nefesi.” (2 Kolonito 12⁠:​15, MN) ʼI aga faka Kilisitiano leva! ʼI tatatou mamata ki te faʼifaʼitaki haohaoa ʼa Kilisito, ʼe toe uga ai tatou ke tou faʼifaʼitakiʼi ia ia ʼi totatou maʼuli.

Ohage la, neʼe akoʼi mai e Sesu kia tatou ke tou falala ki te ʼAtua, ʼe ina tapuakina anai tatou ʼi te faʼahi fakasino. Kae ʼe mole gata ai. ʼI te ʼaho fuli, neʼe ina fakahā tana tui ki te faʼahi ʼaia pea mo tana falala kia Sehova. Neʼe ina ʼui fēnei: “E mau luo te u lenato pea mo te u fatai o te u manulele o te lagi. Kae mole mau e te Foha o te tagata he faahi ke hili ki ai tona ulu.” (Mateo 6⁠:25; 8⁠:20) ʼE koutou fakakaukau koa pea mo gāue tāfito ki te ʼu koloā fakamālama? Peʼe hā koa ʼi tokotou maʼuli ʼe koutou fakamuʼamuʼa te Puleʼaga ʼa te ʼAtua? Pea ʼe koutou faka ʼuhiga feafeaʼi te tauhi kia Sehova? ʼE hage koa ko tatatou Faʼifaʼitakiʼaga ko Sesu? ʼE fakahā mai e te Tohi-Tapu neʼe mole faka mafola pe e Sesu te faʼafai, kae neʼe lahi te ʼu lakaga neʼe ina fakahā ai te faʼafai mālohi. (Soane 2⁠:​14-17) Tahi ʼaē meʼa, neʼe tuku mai e Sesu he faʼifaʼitaki lelei ʼo ʼuhiga mo te ʼofa! Ei, neʼe ina sakilifisio tona maʼuli maʼa tana kau tisipulo! (Soane 15⁠:13) ʼE koutou faʼifaʼitakiʼi koa ia Sesu ʼo koutou ʼofa ki takotou ʼu tēhina Kilisitiano? Peʼe koutou tuku koa ki te ʼu vaivaiʼaga ʼa ʼihi ke nātou tāʼofi takotou ʼofa kia nātou?

ʼI te agamāhani, ʼe tōtō anai tatatou faiga ʼaē ke tou muliʼi mālohi te faʼifaʼitaki ʼa Kilisito. Kae ʼe fiafia Sehova ʼi tatatou ʼu faiga ʼaē ke tou “kofu[ʼi] te Aliki ko Sesu Kilisito.”​—⁠Loma 13⁠:⁠14.

“Ko He ʼu Faʼifaʼitakiʼaga Ki Te Faga Ōvi”

ʼE ʼi ai koa he ʼu hahaʼi ʼi te kokelekasio ʼe feala ke nātou tuku mai he faʼifaʼitaki kia tatou? Ei! Ko nātou tāfito ʼaē ʼe tonu ke nātou tuku he faʼifaʼitaki lelei, ʼe ko te ʼu tēhina ʼaē ʼe maʼu pilivilesio ʼi te kokelekasio. Neʼe ʼui e Paulo kia Tito, ʼaē neʼe gāue ʼi te ʼu kokelekasio ʼo Kelete pea neʼe ina fakanofo te kau tagata taupau feʼoloʼaki, ko te ʼu tagata ʼāfea fuli ʼe mole tonu ke “tukugakoviʼi nātou.” (Tito 1⁠:​5, 6, MN) Neʼe toe fai te tokoni ʼaia e te ʼapositolo ko Petelo ki te kau “tagata ʼāfea” ke nātou liliu ko he ʼu “faʼifaʼitakiʼaga ki te faga ōvi.” (1 Petelo 5⁠:​1-3, MN) Kae e feafeaʼi ki te kau tagata faifekau faka minisitelio? ʼE tonu mo nātou ke nātou liliu ko he ʼu tagata “e natou fai lelei te gaue.”​—⁠1 Timoteo 3⁠:⁠13.

Kae ʼe mole fakamaʼua leva ki te kau tagata ʼāfea peʼe ko te kau tagata faifekau faka minisitelio, ke nātou lelei ʼaupito ʼi te ʼu faʼahi fuli ʼo te minisitelio faka Kilisitiano. Neʼe ʼui fēnei e Paulo ki te kau Kilisitiano ʼo Loma: “E kehekehe te u mea ofa e tou mau o faipe ki te [“ ʼofa makehe ʼaē,” MN] nee foaki mai kia tatou.” (Loma 12⁠:⁠6) Ko ʼihi tēhina ʼe nātou faiva ʼi he ʼu ʼaluʼaga kehekehe. ʼE mole fakapotopoto anai hatatou fakamaʼua ki te ʼu tagata ʼāfea ke haohaoa tanatou ʼu gāue pea mo tanatou ʼu palalau. ʼE ʼui e te Tohi-Tapu ia Sakopo 3⁠:​2, MN: “ ʼE lahi te ʼu lakaga ʼe tou tūkia ai. Kapau ʼe mole tūkia he tahi ʼi tana ʼu palalau, ʼe ko he tagata haohaoa ia, pea ʼe feala hana lolomi ia tona sino katoa.” Logope la tonatou ʼuhiga agahala, kae ohage ko Timoteo, ʼe feala ki te kau tagata ʼāfea ke nātou “liliu ko [he ʼu faʼifaʼitakiʼaga] ki te hahai tui i te [palalau], i te aga, i te ofa, i te tui, mo te agamaʼa.” (1 Timoteo 4⁠:12) Kapau ʼe fai feiā e te kau tagata ʼāfea, pea ko te faga ōvi ʼe mulimuli lelei anai ki te tokoni ʼaē ʼe tuʼu ia Hepeleo 13⁠:​7, MN: “Koutou manatuʼi ia nātou ʼaē ʼe nātou takitaki koutou, . . . pea ʼi takotou tokagaʼi te ikuʼaga ʼo tanatou aga, koutou faʼifaʼitaki ki tanatou tui.”

Te Tahi ʼu Faʼifaʼitaki ʼo Te Temi ʼAenī

ʼI te ʼu hogofulu taʼu kua hili, ko te tokolahi neʼe nātou tuku he ʼu faʼifaʼitaki lelei. E feafeaʼi ki te maʼuli faka sakilifisio ʼa te toko lauʼi afe kau misionea ʼaē neʼe nātou “liaki te api, pe ko te u tehina, te u tuagaane, te u fanau, te u kele,” moʼo fakahoko te maʼua faka Kilisitiano ʼi te ʼu fenua matāpule? (Mateo 19⁠:29) Tou toe talanoa foki ʼo ʼuhiga mo te ʼu tagata taupau feʼoloʼaki pea mo ʼonatou ʼohoana, te hahaʼi tagata pea mo fafine ʼaē ʼe gāue ʼi te ʼu pilō ʼo te Sosiete Watch Tower, pea mo te ʼu pionie ʼo te ʼu kokelekasio. ʼE feala koa ki te ʼu faʼifaʼitaki ʼaia ke nātou uga ihi? ʼE manatuʼi e te tēhina Asia, te gāue ʼa te misionea ʼo te valu kalasi ʼo te Faleako Tohi-Tapu ʼo Kalaate. Neʼe ina ʼui ko te tēhina agatonu ʼaia neʼe “ina tali lelei ke ina kātakiʼi te ʼu namu pea mo te vevela. . . . Ko te meʼa ʼaē neʼe fakaofoofo tāfito, neʼe ko tana poto ʼi te fai faka mafola ʼi te lea faka Siaina pea mo faka Malais, logope la neʼe ko te tagata Pilitania.” Neʼe koteā te fua ʼo te faʼifaʼitaki lelei ʼaia? Neʼe ʼui e te tēhina: “Ko tana loto mālū pea mo tana loto falala, neʼe ina uga ʼau ke ʼau liliu ko he misionea mokā ʼau lahi anai.” Pea neʼe liliu moʼoni te tēhina ʼaia ko he misionea.

ʼE feala hakotou maʼu ʼi te ʼu Index des publications de la Société Watch Tower, te lisi ʼo te ʼu hisitolia ʼo te ʼu hahaʼi ʼaē neʼe tā ʼi te ʼu nusipepa Te Tule Leʼo pea mo te Réveillez-vous ! ʼE fakamatala mai ʼi te ʼu hisitolia ʼaia te maʼuli ʼa te ʼu hahaʼi neʼe nātou tuku tanatou ʼu gāue pea mo tanatou ʼu fakatuʼutuʼu fakamālama, mo kātakiʼi tonatou ʼu vaivaiʼaga, mo fai he ʼu fetogi mālohi ʼi tonatou maʼuli, mo taupau tuʼumaʼu tanatou agatonu logope la te ʼu fakataga, pea neʼe nātou faʼafai, mo faʼa kātaki, mo nofo agatonu, mo agavaivai pea mo maʼu te loto faka sakilifisio. Neʼe tohi fēnei e te fafine neʼe ina lau te ʼu hisitolia ʼaia: “ ʼE nātou fakaliliu ʼau ko he Kilisitiano agavaivai pea mo loto fakafetaʼi, pea ʼe nātou tokoni mai ke ʼaua naʼa lahi fau taku manatu kia ʼau.”

Tahi ʼaē meʼa, koutou manatuʼi te ʼu faʼifaʼitaki lelei ʼi tokotou kokelekasio: te ʼu pule famili ʼaē ʼe nātou faiga tuʼumaʼu ke nātou foaki te meʼa ʼaē ʼe ʼaoga ʼi te faʼahi fakalaumālie pea mo fakasino ki tonatou famili; te ʼu tuagaʼane​—⁠mo te ʼu faʼe ʼaē ʼe nātou taupau tokotahi tanatou ʼu fānau​—⁠ʼaē ʼe nātou tau mo te kavega mamafa ko te akoʼi ʼo tanatou ʼu tamaliki, kae ʼe nātou fakahoko mālohi te gāue fai faka mafola ʼi te minisitelio; ʼo feiā mo nātou ʼaē kua matutuʼa peʼe mahahaki kae ʼe nātou agatonu tuʼumaʼu logope la tanatou ʼāsili vaivai pea mo tanatou gaʼegaʼe. ʼE mole malave koa la kia koutou te ʼu faʼifaʼitaki ʼaia?

ʼE moʼoni, ʼe lahi te ʼu faʼifaʼitaki kovi ʼi te malamanei. (2 Timoteo 3⁠:13) Kae koutou fakatokagaʼi te fakaloto mālohi ʼaē neʼe fai e Paulo ki te kau Kilisitiano ʼo Suta. ʼI tana ʼosi talanoa ki te faʼifaʼitaki lelei ʼo te ʼu hahaʼi tagata pea mo fafine ʼo te temi ʼāfea, neʼe fai age kia nātou e te ʼapositolo ko Paulo te fakaloto mālohi ʼaenī: “Koia, ʼuhi heʼe takatakai tatou e te ʼao lahi ʼo te kau fakamoʼoni . . . tou faʼa kātaki ʼo feleleʼi ʼi te lele ʼaē kua tuku mai kia tatou, ʼo tou sioʼi tuʼumaʼu ia Sesu, te Fakafofoga tāfito pea mo haohaoa ʼo totatou tui.” (Hepeleo 12⁠:​1, 2, MN) Tahi ʼaē meʼa, ko te kau Kilisitiano ʼo te temi ʼaenī ʼe takatakai nātou e te ‘ao lahi’ ʼo te ʼu faʼifaʼitaki lelei​—⁠ʼo te temi ʼāfea pea mo temi nei. ʼE koutou maʼu koa he ʼu fua lelei mai ai? ʼE feala anai mo kapau ʼe koutou loto moʼoni ke “[mole koutou] faʼifaʼitakiʼi te meʼa ʼaē ʼe kovi, kae [ke koutou] faʼifaʼitaki te meʼa ʼaē ʼe lelei.”​—⁠3 Soane 11, MN.

[Kiʼi nota]

[Paki ʼo te pasina 20]

ʼE mole ko he aga fakapotopoto ke tou fakamaʼua ki te kau tagata ʼāfea peʼe ko te kau tagata faifekau faka minisitelio, ke nātou lelei ʼaupito ʼi te ʼu faʼahi fuli ʼo te minisitelio faka Kilisitiano

[Paki ʼo te pasina 21]

Ko te kau tagata ʼāfea ʼe ko te “ ʼu faʼifaʼitakiʼaga ki te faga ōvi”