Kei Koutou Manatuʼi Koa?
Neʼe koutou leleiʼia koa takotou lau te ʼu Tule Leʼo fakamuli? Pea koutou vakaʼi peʼe koutou lava tali ki te ʼu fehuʼi ʼaenī:
• He koʼe ʼe feala ke tou tui papau ko te fakahoko ʼo te lea faka polofeta ʼo “te ʼu lagi foʼou pea mo te kele foʼou” ia Isaia 65:17-19, neʼe mole faka ʼuhiga pe ki te toe liliu ʼa te kau Sutea mai tanatou ʼaunofo?
Koteʼuhi ko te ʼu ʼapositolo ko Petelo pea mo Soane, ʼi tanā ʼu tohi ʼi te ʼuluaki sēkulō, neʼe nā talanoa ki tona fakahoko ʼi te ka haʼu, ʼaē ʼe kau kiai te ʼu tapuakina ʼaē ka hoko mai. (2 Petelo 3:13; Apokalipesi 21:1-4)—15/4, pasina 10-12.
• Koteā ʼaē ʼe lagi fakatafito kiai te ʼu fagana faka Keleka ʼo ʼuhiga mo te ʼu ʼatua tagata agamālohi?
Neʼe lagi ko he ʼu fagana neʼe fakamataleleiʼi pea ʼe lagi ko he ʼu fakamatala loi ʼo te ʼu meʼa ʼaē neʼe hoko ʼi muʼa ʼo te Tulivio, he neʼe kofuʼi e ʼihi kau ʼaselo te ʼu sinoʼi tagata pea neʼe nātou fai te ʼu agamālohi pea mo te ʼu aga heʼeʼaoga ʼi te kele. (Senesi 6:1, 2)—15/4, pasina 27.
• Koteā he ʼu tuʼutāmaki ʼo ʼuhiga mo te ʼu fai ʼohoana ʼe tokakaga anai kiai te kau Kilisitiano ʼaē kua fakapotopoto?
ʼE maʼuhiga ke mole logoaʼa fau te lafeti, heʼe feala ke lahi ai te ʼinu kava ʼa te hahaʼi, pea mo nātou fai he ʼu meʼe heʼeʼaoga ʼuhi ko te musika logoaʼa. Kapau ʼe mole ʼui ʼe feala ki te hahaʼi fuli ke nātou ʼolo ki te lafeti, pea ko nātou ʼaē neʼe mole fakaafe ʼe mole tonu ke nātou ʼolo kiai. ʼE tonu ke ʼiloʼi papau e te tagata ʼohoana ʼe nonofo anai te kau Kilisitiano ʼaē ʼe leʼoleʼo ʼo aʼu ki te fakaʼosi ʼo te lafeti ʼi he hola ʼe fakapotopoto.—1/5, pasina 19-22.
• Koteā ʼaē ʼe fia fakahā e te Pesalemo 128:3 ʼo ʼuhiga mo te ʼu foha ʼaē ʼe nātou hage ko “he ʼu huliʼi oliveto” ʼe nātou takatakai te laupapa ʼa te tagata?
ʼE tuputupu tuʼumaʼu te ʼu huli foʼou mai te tafitoʼi ʼakau ʼo te oliveto. Kapau mole kei lahi te ʼu fua ʼo te sinoʼi ʼakau, ʼuhi he kua matuʼa, pea ʼe feala ke liliu te ʼu huli ko he ʼu fuʼu ʼakau mālolohi ʼi ʼona tafa. ʼO toe feiā pe, ʼe feala ke fiafia te ʼu mātuʼa heʼe fakatupu e tanatou fānau he ʼu fua fakalaumālie pea mo nātou sio ʼe fia fakatahi kia nātou moʼo tauhi kia Sehova.—15/5, pasina 27.
• Koteā te ʼu lelei ʼaē ka maʼu e te fānau mo kapau ʼe fīmālie te ʼaluʼaga faka famili?
ʼE fakatuʼu ai te tafitoʼaga ʼaē ke nātou fakaʼapaʼapa ki te tuʼulaga pule, mo nātou leleiʼia anai te ʼu aga ʼaē ʼe tonu ke fai, pea ʼe nātou felogoi lelei anai mo te hahaʼi. Pea ʼe tuputupu ai te fakakaumeʼa ʼa te fānau mo Sehova.—1/6, pasina 18.
• ʼI te tahi fenua ʼi Asia, koteā ʼaē neʼe fai moʼo fakaloto mālohiʼi te manatu ʼaē ko te kau Kilisitiano fuli ʼe nātou tautēhina?
Neʼe fakaloto mālohiʼi te kokelekasio katoa ke ʼaua naʼa nātou fakatoʼo he higoa faka tuʼulaga ki ʼihi. Kae ʼe tonu ke faka ʼuhiga ia nātou fuli ko he fale tautēhina.—15/6, pasina 21, 22.
• ʼE tali koa e te kau Fakamoʼoni ʼa Sehova te ʼu faitoʼo ʼaē ʼe maʼu ai te toto?
ʼE mātou tui ko te fakatotonu ʼa te Tohi-Tapu ʼaē ‘ke tou fakamamaʼo mai te toto,’ ʼe toe faka ʼuhiga ki te ʼu foʼi huki toto ʼaē ʼe fai ʼaki te toto katoa peʼe ko he ʼu koga ʼo te toto (te plasma, te ʼu globules rouges, te ʼu globules blancs, pea mo te ʼu plaquettes). (Gaue 15:28, 29) ʼO ʼuhiga mo te ʼu kiʼi koga veliveli ʼo te ʼu koga tāfito ʼo te toto, ʼe tahi fai e te ʼu Kilisitiano he tonu kiai, ʼo nātou manatuʼi te meʼa ʼaē ʼe ʼui e te Tohi-Tapu pea mo tanatou ʼu felogoi mo te ʼAtua.—15/6, pasina 29-31.
• ʼE feala moʼoni koa ke tou maʼu he loto tokalelei ia ʼaho nei?
Ei. ʼAki te Tohi-Tapu, ʼe takitaki e Sesu Kilisito te hahaʼi ʼi te ala ʼo te tauhi maʼa, pea ʼe nātou maʼu te tokalelei ʼaē ʼe fakamatala ia Isaia 32:18. Tahi ʼaē meʼa, ko nātou ʼaē ʼe nātou maʼu te tokalelei ʼaia ʼe nātou ʼamanaki ke nātou maʼu te tokalelei heʼegata ʼi te kele, mokā hoko anai ia Pesalemo 37:11, 29.—1/7, pasina 7.
• Koteā te ʼu gāue ʼaē neʼe fai e George Young ʼi te hisitolia faka teokalatike ʼo totatou temi?
ʼO kamata mai te taʼu 1917, neʼe ina ʼave te mālama ʼo te logo lelei ʼo te Puleʼaga ki te ʼu fenua kehekehe. Neʼe aʼu tona minisitelio ki Kanata, mo te ʼu motu ʼo Caraïbes ki Pelesile pea mo te tahi ʼu fenua ʼo Amelika ʼi te Potu Saute ʼo aʼu ki Amelika ʼo te lotomalie, ki Sepania, ki Potukalia, pea ki te Lusia ʼāfea pea ki Amelika.—1/7, pasina 22-27.
• Koteā te faka ʼuhiga ʼo te ʼui ʼaē ia 1 Kolonito 15:29, ko ʼihi neʼe “natou tali te papitema o uhiga mo te kaiga mate”?
Ko tona faka ʼuhiga, ka fakanofo te kau Kilisitiano ʼaki te laumālie maʼoniʼoni, pea ʼe nātou kamata ai honatou maʼuli ʼe iku anai ki tonatou mate pea mo tonatou fakatuʼuake ki te maʼuli ʼi selo.—15/7, pasina 17.
• Koteā ʼaē neʼe fai e te ʼapositolo ko Paulo lolotoga te ʼu taʼu ʼaē neʼe fakalogologo ai?
Neʼe lagi tokoni ki te fakatuʼu peʼe ko te fakaloto mālohi ʼo te ʼu kokelekasio ʼi Silia pea mo Silisia. Neʼe lagi hoko lolotoga te lakaga ʼaia te ʼatu tuʼutāmaki ʼaē ʼe talanoa kiai ia 2 Kolonito 11:23-27, ʼo hā ʼaki mai ko Paulo neʼe gāue mālohi ʼi tona minisitelio.—15/7, pasina 26, 27.
• Koteā ʼaē ʼe lava tokoni mai kia tatou ke tou fakapotopoto ʼi tatatou ʼu fakaʼamu?
Tou manatuʼi ʼe lotomahino Sehova. Ko te faikole ʼaē kia te ia ʼe lava tokoni mai kia tatou ke tou fakafuafua lelei tatatou ʼu fakakaukau, pea ʼe hā ai tatatou fia mālalo. Ko te tahi meʼa ʼe tokoni anai kia tatou, ʼe ko tatatou fai palalau mo hotatou kaumeʼa kua fotufotuʼa ke ina fakahā mai tana manatu.—1/8, pasina 29, 30.