ʼE Fua Lelei Koa Te Faikole?
ʼI HE temi pe, ʼe teitei pe ko te hahaʼi fuli ʼe nātou logoʼi te maʼua ʼaē ke nātou faikole. ʼI tona fakahagatonu, tokolahi ʼi te ʼu hahaʼi ʼo te ʼu faʼahiga lotu fuli ʼe nātou faikole fakamalotoloto. Ohage la, ko he Putisi ʼe ina lau tuʼa afe ʼi te ʼaho te faikole ʼaē “ ʼE ʼau tui kia Amida Buddha.”
ʼI te hoholo ʼo te ʼu fihifihia ʼi te malamanei, ʼe lelei ke tou fai te ʼu fehuʼi ʼaenī: Koteā te meʼa ʼaē ʼe loto kiai te hahaʼi mokā nātou faikole? ʼE ʼi ai koa he ʼu fua lelei ʼo te ʼu faikole fuli ʼaia?
He Koʼe ʼe Faikole Te Hahaʼi?
Tokolahi te hahaʼi ʼi te ʼu fenua ʼo te Potu Hahake ʼe nātou faikole ki tanatou ʼu kui pea mo te ʼu ʼatua ʼo Shinto peʼe ko Tao. ʼE nātou fai te ʼu faikole ʼaia ke lava lelei tanatou ʼu sivi ʼi te faleako, ke fua tonatou taʼukai, peʼe ke mole hoko he ʼu hoge. ʼI tanatou ʼu faiga, ʼe fakaʼamu e te kau Putisi ke nātou maʼu te faka mālamagia. Ko te kau Inituisi, ʼe nātou faikole ki tanatou ʼu ʼatua tagata pea mo fafine ʼaē ʼe nātou leleiʼia, ke nātou maʼu te poto, te maʼuli haohaoa, pea mo te puipui.
Ko ʼihi Katolika ʼe nātou fakaʼamu ke lelei te malamanei, pea ʼi tonatou maʼuli katoa, ʼe nātou liliu ko he kau monike peʼe ko he kau taupoʼou ʼi te ʼu monasetelio peʼe ko te ʼu fale taupoʼou, pea ʼe nātou faikole tuʼumaʼu ai. Ko te ʼu lauʼi miliona Katolika ʼe nātou faikole ke tapuakina nātou e Malia, ʼo nātou lau fakaʼatamai he ʼu faikole pea mo nātou fakaʼaogaʼi he lōsalio. ʼI te ʼu fenua ʼo Asia tokolahi te hahaʼi ʼe nātou fakaʼaogaʼi te ʼu meʼa takafuafua moʼo lau tanatou ʼu faikole. ʼE lau liuliuga e te kau Polotesita te faikole ʼo te Tāmai ʼe ʼi Selo, pea ʼi muʼa ʼo te kaugamālie, ʼe nātou fakahā ki te ʼAtua te ʼu meʼa ʼaē ʼi tonatou loto. Tokolahi te kau Sutea ʼe nātou folau mai mamaʼo ke nātou ʼolo ʼo faikole ʼi te Kaupā ʼo te Potu Uesite ʼo Selusalemi, heʼe nātou fakaʼamu ke toe fakatuʼu te fale lotu pea mo he temi foʼou ʼe maʼu ai anai te tapuakina pea mo te tokalelei.
Logola te faikole fakamalotoloto ʼa te lauʼi miliona hahaʼi, kae ʼe ʼāsili hoko ki te malamanei te ʼu fihifihia ohage ko te masiva, te toloke ʼa te hahaʼi, mo te mavetevete ʼa te ʼu famili, mo te fai fakapō, pea mo te tau. ʼE feala koa ke ʼui ʼe mole lelei te faʼahiga faikole ʼa te hahaʼi ʼaia? ʼE ʼi ai koa he tahi ʼe logo moʼoni ki te ʼu faikole?
ʼE Logoʼi Koa e He Tahi Te ʼu Faikole?
ʼE mole maʼu he ʼu fua lelei ʼo te faikole mokā ʼe mole he tahi ʼe logo kiai. Ka faikole he tahi, pea ʼe faka tui ʼe ʼi ai he laumālie fakapulipuli ʼe logo kia ia. Kae ko te ʼu faikole ʼe mole ko he ʼu palalau ʼe fai ʼaki pe totatou gutu. Tokolahi te hahaʼi ʼe nātou tui ʼe lava ʼiloʼi e he tahi te ʼu manatu ʼo ia ʼaē ʼe faikole. Ko ai?
Ko te hahaʼi ʼaē ʼe nātou fai te ʼu kumi, ʼe mole feala hanatou fakamahino peʼe lava feafeaʼi ki he ʼu kiʼi ivi e lauʼi miliona ke nātou faʼufaʼu te ʼu fakakaukau ʼaē ʼi totatou ʼuto. Kae ʼe mahino ia, ko Ia ʼaē neʼe ina faʼufaʼu te ʼuto ʼe feala ke ina ʼiloʼi te ʼu fakakaukau ʼaia. Ko totatou Tupuʼaga, ia Sehova ʼAtua, ʼe ko ia ʼaē ʼe ina fakahoko te faʼahi ʼaia. (Pesalemo 83:18; Apokalipesi 4:11) ʼE feala ke tou fai tatatou ʼu faikole kia te ia. Kae ʼe tokagaʼi koa e Sehova te ʼu faikole fuli ʼaia?
ʼE Logoʼi Koa Te ʼu Faikole Fuli?
Ko Tavite te Hau ʼo te Iselaele ʼāfea, neʼe ko te tagata neʼe faikole tuʼumaʼu. ʼI tana tohi te ʼu pesalemo ʼaki te takitaki ʼa te ʼAtua, neʼe hiva fēnei: “Ia koe ʼaē ʼe logo ki te ʼu faikole, ei, ko te hahaʼi kehekehe ʼe ʼōmai anai kia te koe.” (Pesalemo 65:2) ʼE mahino ia Sehova ki te ʼu faikole ʼa te hahaʼi ʼaē ʼe nātou fai age ʼi he ʼu lea ʼe lauʼi afe. Ko te mole feala ʼaē ki te ʼuto ʼo te tagata ke mahino ki he ʼu tuʼuga naunau, ʼe mole faka ʼuhiga leva ʼe mole tokagaʼi e te ʼAtua ia nātou fuli ʼaē ʼe faikole lelei age kia te ia.
Kae ko Sesu Kilisito—ʼaē neʼe ko te tahi tagata neʼe faikole tuʼumaʼu—neʼe ina fakahā ʼe mole tali e te ʼAtua te ʼu faikole fuli. Koutou fakatokagaʼi te meʼa ʼaē neʼe ʼui e Sesu ʼo ʼuhiga mo te aga ʼaē neʼe fai e te hahaʼi ʼo tona temi, ʼaē ko te lau fakaʼatamai pea mo liuliuga te ʼu faikole. ʼO mulimuli ki te meʼa ʼaē ʼe tuʼu ʼi te Tohi-Tapu Katolika Bible de Jérusalem, neʼe ina ʼui fēnei: “ ʼI takotou ʼu faikole, ʼaua naʼa koutou fai he ʼu tuʼuga palalau ohage ko tona fai e te kau pagani, koteʼuhi ʼi tanatou manatu, mokā lahi te ʼu palalau ʼe logoʼi anai.” (Mateo 6:7) ʼE mole tonu ke tou manatu ʼe fakalogo anai Sehova ki te ʼu faikole ʼaē ʼe mole tou fakahā fakahagatonu ai te ʼu meʼa ʼaē ʼi ʼotatou loto.
ʼI tana fakahā te tupuʼaga ʼo te mole fakalogo ʼa te ʼAtua ki ʼihi faikole, ʼe ʼui fēnei e te tāʼaga lea faka Tohi-Tapu: “Ko ʼaē ʼe ina fakahaga kehe tona taliga ke mole logo ki te lao—māʼia mo tana faikole ʼe ko he meʼa ʼe fehiʼaʼinaʼi.” (Tāʼaga Lea 28:9) ʼE ʼui fēnei e te tahi tāʼaga lea: “ ʼE mamaʼo Sehova ʼi te kau agakovi, kae ʼe fakalogo ki te faikole ʼa te kau agatonu.” (Tāʼaga Lea 15:29) ʼI te temi ʼaē neʼe agahala mamafa ai te kau takitaki ʼo Suta ʼi te temi muʼa, neʼe tala fēnei e Sehova: “Ka koutou folahi ʼokotou ʼalofi nima, pea ʼe ʼau ʼuʼufi ʼoku mata mai ia koutou. Logo aipe te lahi ʼo te ʼu kole ʼaē ʼe koutou fai, ʼe mole ʼau fakalogo; kua fonu tokotou ʼu nima ʼi te ligi toto.”—Isa. 1:1, 15.
Neʼe fakahā e te ʼapositolo ko Petelo te tahi meʼa ʼe feala ke fakafisi ai te ʼAtua ki te ʼu faikole. Neʼe ina tohi fēnei: “Ko koutou tagata ʼohoana, koutou haga nonofo mo [tokotou ʼu ʼohoana] ʼo mulimuli pe ki te ʼatamai mālama, ʼo faka maʼuhigaʼi nātou ohage ko he ipu ʼe vaivai age, te ipu fakafafine, heʼe feiā mo koutou, ʼe koutou maʼu mo nātou te tōfiga ʼo te ʼofa makehe ʼo te maʼuli, ke mole tāʼofi ai takotou ʼu faikole.” (1 Petelo 3:7, MN ) Ko te tagata ʼaē ʼe mole mulimuli ki te tokoni ʼaia ʼe mole logoʼi anai tana faikole e te ʼAtua.
ʼE hā lelei mai, ʼe ʼi ai te ʼu meʼa ʼe tonu ke tou mulimuli kiai mo kapau ʼe tou loto ke logoʼi e te ʼAtua tatatou ʼu faikole. Kae tokolahi te hahaʼi ʼaē ʼe faikole, ʼe mole nātou fia ʼiloʼi te ʼu meʼa ʼaē ʼe fakamaʼua mai e te ʼAtua. Ko tona tupuʼaga la ʼaia ʼo te mole liliu ʼo lelei te ʼaluʼaga ʼo te malamanei, logola ʼe tokolahi ia nātou ʼaē ʼe faikole fakamalotoloto.
Koteā ʼaē ʼe fakamaʼua mai e te ʼAtua ke feala ai hana logoʼi tatatou ʼu faikole? Ko te tali ki te fehuʼi ʼaia ʼe ʼi ai tona pikipikiga mo te tupuʼaga tāfito ʼo tatatou ʼu faikole. Ei, kapau ʼe tou fia ʼiloʼi peʼe ʼi ai he fua lelei ʼo tatatou ʼu faikole, pea ʼe tonu ke tou mahino ki tonatou tupuʼaga. He koʼe koa neʼe fakagafua mai e Sehova ke tou palalau age kia te ia?
[Haʼuʼaga ʼo te paki pasina 3]
G.P.O., Jerusalem