ʼE Tekeʼi Feafeaʼi Te ʼu Manatu ʼAē ʼe Mole Lelei
● Neʼe meo fēnei ia Asafe: “ ʼIo, neʼe vaʼiganoa pe taku fakamaʼa toku loto pea mo taku fanofanoʼi ʼoku ʼu nima ʼi te heʼe agahala. Neʼe tauteaʼi ʼau ʼi te ʼaho katoa, pea ʼi te uhu fuli ʼe fakatonutonuʼi ʼau.”—Pesalemo 73:13, 14.
● Neʼe goʼegoʼe fēnei ia Paluke: “Malaʼia kia te ʼau, he neʼe hilifaki mai e Sehova te lotomamahi ki toku mamahi! Kua ʼau piko ʼi te goʼegoʼe, pea neʼe mole ʼau maʼu he koga meʼa ke ʼau mālōlō ai.”—Selemia 45:3.
● Neʼe lotomamahi fēnei ia Naomi: “Neʼe fakaloto mamahi ʼaupito te ʼu meʼa ʼaē neʼe fai e te Māfimāfi kia te ʼau. Neʼe lahi taku ʼu meʼa ʼi taku ʼalu, pea neʼe fakaliliu mai ʼau e Sehova mole kei ʼi ai haku meʼa. He koʼe ʼe koutou fakahigoa anai ʼau ko Naomi, kae ko Sehova ʼaē neʼe ina fakalainoaʼi ʼau pea ko te Māfimāfi ʼaē neʼe ina tuku mai te malaʼia?”—Lute 1:20, 21.
ʼE TAPUKE te ʼu faʼifaʼitaki ʼi te Tohi-Tapu ʼo te kau atolasio agatonu ʼa Sehova, neʼe tonu ʼi ʼihi temi ke nātou tekeʼi tanatou ʼu lotovaivai. ʼI ʼihi temi ʼe tou lotovaivai feiā ʼuhi ko totatou ʼuhiga agahala. Ko ʼihi ia tatou ʼe feala ke lahi ʼaupito tanatou lotovaivai pea ʼe lagi fakaʼofaʼofa, he neʼe lahi te ʼu fihifihia.
Kae ʼe feala ke tuʼutāmaki ai takotou ʼu felogoi mo ʼihi ʼo feiā mo Sehova, mo kapau ʼe mole koutou lolomi te ʼu taʼi manatu kovi ʼaia. ʼE fakamoʼoni te tuagaʼane ki te faʼahi ʼaia he neʼe lahi ʼaupito tana meo: “Neʼe lahi te ʼu fakaafe neʼe mole ʼau ʼalu kiai, koteʼuhi ʼi taku manatu neʼe mole tāu mo ʼau ke ʼau fakakaugā mo nātou ʼo te kokelekasio.” ʼE fakaʼofaʼofa te maʼuli ʼo he tahi mo kapau ʼe ina maʼu te taʼi manatu ʼaia! Koteā te meʼa ʼaē ʼe koutou lava fai moʼo tekeʼi te ʼu manatu ʼaia?
Koutou Fakaōvi Kia Sehova
Ia Pesalemo 73, neʼe tohi fakahagatonu e Asafe tana ʼu lotolotolua. Neʼe maheka, ʼi tana fakatatau tona maʼuli pea mo te maʼuli fīmālie ʼaē ʼa te kau agakovi. Neʼe ina fakatokagaʼi ʼe hage ʼe mole fakatūʼa ia te hahaʼi aga heʼe lotu ʼaē ʼe fialahi pea mo agamālohi. Pea neʼe fakahā e Asafe ʼe hage ʼe mole he ʼaoga ʼo tana maʼuli agatonu.—Pesalemo 73:3-9, 13, 14.
ʼE koutou hage koa ko Asafe ʼaē neʼe ina sioʼi te hage ʼaē ʼe maʼuli fīmālie te kau agakovi ʼaē neʼe nātou fakahā tanatou ʼu aga ʼe kovi? Neʼe tekeʼi feafeaʼi e Asafe tana ʼu manatu kovi ʼaia? ʼE ina hoko atu fēnei: “Neʼe ʼau fakakaukau ke ʼau mahino ki te faʼahi ʼaia; neʼe ko he meʼa fakatupu hoha kia te ʼau, ʼo aʼu ki te ʼaho ʼaē neʼe ʼau hū ai ki te sagatualio māʼoluga ʼo te ʼAtua. Neʼe ʼau fia ʼiloʼi tonatou ka haʼu.” (Pesalemo 73:16, 17) ʼAki te faikole ʼaē kia Sehova neʼe maʼu e Asafe te ʼu manatu lelei. ʼO ʼuhiga mo te ʼu kupuʼi palalau ʼaē neʼe fakaʼaogaʼi e te ʼapositolo ko Paulo, neʼe pulihi e Asafe “te tagata fakakakano” ʼo ina fetogi ʼaki tona ʼuhiga “tagata fakalaumālie.” ʼI tana kua lelei ʼi te faʼahi fakalaumālie, neʼe mahino ai kia Asafe ko Sehova ʼe fehiʼa ki te agakovi pea ʼi tona lakaga tonu ʼe ina tautea anai te kau agakovi.—1 Kolonito 2:14, 15.
ʼE maʼuhiga ke koutou tuku te Tohi-Tapu ke tokoni atu ke feala hakotou sio ki te ʼaluʼaga moʼoni ʼo te maʼuli! ʼE fakamanatuʼi mai e Sehova ʼe ina ʼiloʼi pe koteā ʼaē ʼe fai e te hahaʼi agakovi. ʼE ʼui fēnei e te Tohi-Tapu: “ ʼAua naʼa koutou faihala: ʼe mole feala ke kākāʼi te ʼAtua. ʼIo, ko te meʼa ʼaē ʼe to e te tagata, ʼe ko te meʼa pe ʼaia ʼaē ka ina utu anai . . . ʼAua naʼa tou fiu ʼi te fai ʼo te meʼa ʼaē ʼe lelei.” (Kalate 6:7-9, MN ) ʼE tuku anai e Sehova te kau agakovi “ki he kele ʼe mahekeheke”; ʼe ina “fakaʼauha” anai ia nātou. (Pesalemo 73:18) ʼE mālo tuʼumaʼu anai te faitotonu ʼa te ʼAtua.
Ko te ʼu meʼa fakalaumālie ʼaē ʼe foaki tuʼumaʼu mai e Sehova, pea mo te ʼu fakakaugā lelei mo te hahaʼi ʼa te ʼAtua, ʼe tokoni atu anai ke koutou fakamālohiʼi takotou tui pea mo koutou tekeʼi te lotovaivai peʼe ko he tahi ʼu manatu kovi. (Hepeleo 10:25) Koutou fakaōvi ki te ʼAtua ohage ko Asafe, pea ʼe koutou sio ai anai ki tana lagolago ʼofa. ʼE toe ʼui fēnei e Asafe: “ ʼE ʼau nofo tuʼumaʼu mo koe, neʼe ke puke toku nima mataʼu. ʼE ke taki anai ʼau ʼaki tau tokoni, pea ʼe ke taki anai ʼau ki te kolōlia.” (Pesalemo 73:23, 24) Neʼe mahino ki te Kilisitiano neʼe gaohi koviʼi ʼi tana kei veliveli, ʼe fakapotopoto te ʼu palalau ʼaia. ʼE ina ʼui fēnei: “Ko taku fakatahi tuʼumaʼu mo te kokelekasio, neʼe ina fakahā mai te tahi agaaga ʼo te maʼuli. Ko te kau tagata ʼāfea ʼe nātou lotoʼofa, ʼe mole ko he ʼu polisi kae ko te kau tagata tauhi ōvi.” Ei, ʼe maʼuhiga te gāue ʼa te kau tagata ʼāfea manavaʼofa moʼo fakafimālieʼi ia nātou ʼaē ʼe lotovaivai.—Isaia 32:1, 2; 1 Tesalonika 2:7, 8.
Koutou Tali Te Tokoni ʼa Sehova
Ko Paluke, te sikalaipe ʼa te polofeta ko Selemia, neʼe meo ʼuhi ko te faigataʼa ʼo te gāue ʼaē neʼe tuku age ke ina fai. Kae neʼe fakahā lelei age e Sehova kia Paluke pe koteā te ʼuhiga moʼoni ʼo tana meo. “ ‘Ko koe, ʼe ke haga kumi te ʼu meʼa lalahi maʼa koe. ʼAua naʼa ke haga kumi. Heʼe koʼeni ʼe ʼau fakahoko anai he tuʼutāmaki ki te tagata fuape,’ ko te tala ʼaia ʼa Sehova, ‘pea ʼe ʼau hāofaki anai tou nefesi ʼi te ʼu potu fuli ʼaē ka ke ʼalu kiai.’ ”—Selemia 45:2-5.
Neʼe fakamahino fakahagatonu e Sehova, ʼe tupu te meo ʼa Paluke he neʼe ina kumi te ʼu meʼa ʼe ʼaoga pe kia ia totonu. Koia neʼe mole lava ke fiafia ai ia Paluke ʼi te gāue ʼaē neʼe tuku age e te ʼAtua, koteʼuhi ʼi te temi ʼaia neʼe ina kumi te ʼu meʼa lalahi maʼa ia totonu. ʼE lagi koutou lava maʼu he puleʼaki lelei ki te lotovaivai, ʼe ko te tekeʼi ʼo te ʼu meʼa ʼaē ʼe nātou lava fakahalaʼi koutou, pea mo koutou maʼu te ʼatamai tokalelei ʼaē ʼe haʼu mai te fakafeauga fakaʼatua.—Filipe 4:6, 7.
Ko te lotomamahi ʼo Naomi neʼe mole ina tāʼofi ia ia ʼi Moape ʼi te ʼosi mate ʼo tona ʼohoana pea mo tana ʼu tama e lua. Kae neʼe ʼi ai pe te kiʼi temi neʼe lotovaivai ai ʼo ʼuhiga mo ia totonu pea mo te ʼu ʼohoana ʼaē ʼo tana ʼu tama. Neʼe ʼui fēnei age e Naomi kia nāua ʼi tana fekauʼi ʼaē ke nā ʼolo ki tonā fenua: “ ʼE ʼau mamahi maʼa koulua, heʼe ko te nima ʼo Sehova kua fakafeagai mai kia te ʼau.” ʼI tana tau ʼaē ki Petelehemi, neʼe ina toe ʼui fēnei: “ ʼAua naʼa koutou fakahigoa ʼau ko Naomi [“Toku fiafiaʼaga”]. Koutou fakahigoa ʼau ko Mala [“Lotomamahi”], he neʼe fakaloto mamahi ʼaupito te ʼu meʼa ʼaē neʼe fai e te Māfimāfi kia te ʼau.”—Lute 1:13, 20.
Kae neʼe mole fakamamaʼo ia Naomi mai ia Sehova pea mo tana hahaʼi moʼo fai tana putu. Neʼe ina logoʼi ʼi Moape “kua tokaga ia Sehova ki tana hahaʼi ʼo ina foaki age te pane kia nātou.” (Lute 1:6) Neʼe mahino kia ia, ko te nofoʼaga lelei maʼa ia ʼe ko tana nofo mo te hahaʼi ʼa Sehova. Pea neʼe liliu Naomi ki Suta mo Lute, te ʼohoana ʼo tana tahi tama ʼaē kua mate, pea neʼe ina fakahā fakapotopoto age kia Lute peʼe koteā te aga ʼaē ʼe tonu ke ina fai ki tonā kāiga ko Poase, te tagata ʼaē ka ina totogi ia ia.
ʼO toe feiā ia ʼaho nei, ko te kau Kilisitiano agatonu ʼaē kua mamate tonatou ʼu ʼohoana, ʼe nātou maʼumaʼua ʼi te ʼu gāue ʼa te kokelekasio ke feala hanatou tauʼi tonatou lotomamahi. ʼE nātou hage ko Naomi, ʼo nātou haga fai te ʼu gāue fakalaumālie, ohage ko te lau ʼo te Tohi-Tapu ʼi te ʼaho fuli.
Te ʼu Fua Lelei Mokā Maʼuliʼi Te Poto Fakaʼatua
ʼE fakahā lelei mai e te ʼu fakamatala faka Tohi-Tapu ʼaia peʼe feafeaʼi ki he tahi hana tekeʼi tona lotovaivai. ʼI te sagatualio ʼo Sehova neʼe maʼu ai e Asafe te tokoni pea neʼe loto faʼa kātaki ʼo fakatalitali kia Sehova. Neʼe tali lelei e Paluke ia te tokoni pea neʼe ina tekeʼi te mānumānu koloā. ʼI te lotolotoiga ʼo te hahaʼi ʼa Sehova neʼe gāue mālohi ia Naomi, ʼo tokoni ki te kiʼi fafine ko Lute ki tana ʼu pilivilesio ʼi te tauhi ʼo te ʼAtua moʼoni.—1 Kolonito 4:7; Kalate 5:26; 6:4.
Kapau ʼe koutou manatuʼi tuʼumaʼu te ʼu tapuakina ʼaē neʼe foaki e Sehova ki tana hahaʼi, pea mo ʼihi hahaʼi takitokotahi, ʼe koutou lava tekeʼi anai te lotovaivai pea mo te tahi ʼu manatu ʼe mole lelei. Ki te faʼahi ʼaia, koutou metitasioʼi te ʼofa lahi ʼo Sehova ʼi tana foaki mai te totogi maʼa tatou. Koutou ʼoʼofa moʼoni ki te famili fakatautehina. Koutou manatuʼi tuʼumaʼu ia te mālama foʼou ʼaē ʼe fakapapauʼi mai e te ʼAtua ki te ka haʼu. ʼE lagi koutou tali anai ohage ko Asafe: “Kia te ʼau, ʼe ko he meʼa lelei haku fakaōvi ki te ʼAtua. Neʼe ʼau kumi toku holaʼaga ki te Tuʼi ʼAliki ko Sehova, moʼo kalagaʼi tau ʼu gāue fuli.”—Pesalemo 73:28.