Koutou Fiafia Mo Te ʼAtua Fiafia

“Ki te toe, u tehina, koutou nofo i te fiafia, . . . pea e afio anai ia koutou te ofa mo te tokalelei o te Atua.”—2 Kolonito 13:11.

1, 2. (a) He koʼe ʼe mole fiafia te tokolahi ʼi tonatou maʼuli? (b) Koteā te fiafia, pea ʼe tou lava maʼu feafeaʼi te fiafia?

ʼI TE ʼu temi fakamataku ʼaenī, ko te tokolahi ʼo te hahaʼi ʼe mole kei nātou fiafia. Ka hoko he tuʼutāmaki kia nātou peʼe ki he tahi ʼe nātou ʼoʼofa ai, ʼe lagi nātou hage ko Sopo ʼi te temi muʼa, ʼaē neʼe ina ʼui fēnei: “Ko te tagata, ʼaē neʼe tupu mai te fafine, ʼe nounou tona maʼuli pea ʼe fonu ʼi te lotohoha.” (Sopo 14:1) ʼE mole hāo te kau Kilisitiano mai te ʼu hoha ʼo te ʼu “temi faigataa” ʼaenī, pea ʼe mole tou punamaʼuli ʼi ʼihi temi mokā lotovaivai te ʼu kaugana agatonu ʼa Sehova.—2 Timoteo 3:1.

² Kae ʼe feala ke fiafia te kau Kilisitiano, logola tanatou tauʼi te ʼu ʼahiʼahi. (Gaue 5:40, 41) Ke tou mahino peʼe lava feafeaʼi te faʼahi ʼaia, tou ʼuluaki vakaʼi muʼa te faka ʼuhiga ʼo te fiafia. Neʼe fakamahino ko te fiafia ʼe ko he “meʼa ʼe kita logoʼi ʼi tokita loto tupu mai te meʼa lelei ʼaē ʼe kita maʼu peʼe ko takita atalitali ki he meʼa lelei.”a Koia, ʼe feala ke tou fiafia mo kapau ʼe tou toʼo he temi moʼo vakaʼi te ʼu tapuakina ʼaē ʼe tou maʼu ʼi te temi nei, pea mo tou metitasio ki te ʼu fiafia ʼaē ka tou maʼu ʼi te mālama foʼou ʼa te ʼAtua.

3. He koʼe ʼe feala ke tou ʼui ʼe maʼu e te hahaʼi fuli he ʼu tupuʼaga ke nātou fiafia ai?

³ ʼE tonu ke tou loto fakafetaʼi fuli heʼe tou maʼu te ʼu tapuakina. Mole lagi kei gāue he pule famili. ʼE mahino ia ʼe loto tuʼania. ʼE ina fia taupau lelei tona famili. Kae kapau ʼe kei mālohi pea mo hāo mai te mahaki, pea ʼe feala ke loto fakafetaʼi ki te faʼahi ʼaia. Kapau ʼe ina maʼu hana gāue, pea ʼe feala anai ke gāue kinakina. ʼI te tahi faʼahi, ʼe lagi ʼi ai he tuagaʼane ʼe tau mo he mahaki ʼe vaivai ai. Kae ʼe feala ke fakafetaʼi ki te tokoni age ʼo tona ʼu kaumeʼa pea mo tona famili, ke lototoʼa moʼo kātakiʼi tona mahaki. Pea ko te kau Kilisitiano moʼoni fuli, tatau aipe pe koteā tonatou ʼu ʼaluʼaga, kae ʼe feala ke nātou fiafia ʼi te pilivilesio ʼaē ke nātou ʼiloʼi ia Sehova, “te ʼAtua fiafia,” pea mo Sesu Kilisito, “te ʼAliki ʼaē ʼe fiafia pea mo tokotahi.” (1 Timoteo 1:11; 6:15, MN ) Ei, ko Sehova ʼAtua pea mo Sesu Kilisito ʼe nā fiafia ʼaupito. Neʼe nā taupau tanā fiafia logola te kua fetogi ʼaupito ʼo te ʼaluʼaga ʼo te kele mo te fakatuʼutuʼu ʼaē neʼe fai e Sehova ʼi te kamata. ʼE lahi te ʼu meʼa ʼaē ʼe tou ako mai tanā faʼifaʼitaki, ʼo ʼuhiga mo te taupau ʼo tatatou fiafia.

Neʼe Mole Puli ʼi He Temi Tanā Fiafia

4, 5. (a) Neʼe feafeaʼi te aga ʼa Sehova ʼi te temi ʼaē neʼe talagataʼa ai te ʼuluaki taumatuʼa? (b) Neʼe fakahā feafeaʼi e Sehova ʼe falala ki te hahaʼi?

⁴ ʼI te ʼōloto ʼo Eteni, neʼe maʼu e Atama mo Eva he maʼuli ʼe lelei pea mo he ʼu ʼatamai haohaoa. Neʼe ʼi ai tana gāue lelei ke nā fai pea neʼe lelei te koga meʼa ʼaē neʼe tonu ke nā gāueʼi. Ko te meʼa ʼaē neʼe lelei tāfito, he neʼe nā maʼu te pilivilesio ke nā fai palalau tuʼumaʼu mo Sehova. Neʼe ko te fakatuʼutuʼu ʼa te ʼAtua ke nā maʼu he ka haʼu fakafiafia. Kae neʼe mole feʼaugaʼia e tatatou ʼu ʼuluaki mātuʼa te ʼu meʼa ʼofa lelei ʼaia; neʼe nā kaihaʼa te fuaʼi ʼakau ʼaē neʼe tapuʼi ʼo “te fuʼu ʼakau ʼo te mālama ki te lelei pea mo te kovi.” Ko te talagataʼa ʼaia ʼe ko te tupuʼaga tāfito ʼo te lotomamahi fuli ʼo tatou tonā hōloga ia ʼaho nei.—Senesi 2:15-17; 3:6; Loma 5:12.

⁵ Kae neʼe mole fakagafua e Sehova ke puli tana fiafia ʼuhi ko te maʼuli galo ʼaia ʼa Atama mo Eva. Neʼe falala ʼaupito ko ʼihi ʼi tonā hōloga ʼe nātou tauhi anai kia te ia ʼaki tonatou loto katoa. Neʼe falala ʼaupito heʼe ʼi muʼa ʼo te fānauʼi e Atama mo Eva tanā ʼuluaki tamasiʼi, neʼe kua ina tala tana fakatuʼutuʼu ʼaē ke ina toe totogi ia nātou ʼaē ka fakalogo ʼi tonā hōloga! (Senesi 1:31; 3:15) ʼI te ʼu sēkulō ʼaē neʼe hoa kiai, tokolahi te hahaʼi neʼe nātou muliʼi te aga ʼa Atama mo Eva, kae neʼe mole līaki nātou e Sehova ʼuhi ko te mafola ʼaia ʼo te talagataʼa. Kailoa ia, kae neʼe ina tokagaʼi tāfito te ʼu tagata pea mo te ʼu fafine ʼaē neʼe nātou ‘fakafiafia tona loto,’ te hahaʼi ʼaē neʼe nātou faiga moʼoni ke nātou fakafiafia ia ia he neʼe nātou ʼofa kia te ia.—Tāʼaga Lea 27:11; Hepeleo 6:10.

6, 7. Koteā ʼaē neʼe tokoni kia Sesu ke ina taupau tana fiafia?

⁶ E feafeaʼi ʼo ʼuhiga mo Sesu—neʼe ina lava taupau feafeaʼi tana fiafia? ʼI tona ʼuhiga laumālie mālohi ʼi selo, neʼe feala kia Sesu ke sio ifo ki te ʼu gāue ʼa te hahaʼi tagata pea mo fafine ʼaē ʼi te kele. Neʼe hā lelei tonatou ʼu vaivaiʼaga, kae neʼe ʼofa Sesu kia nātou. (Tāʼaga Lea 8:31) Ki muli age, ʼi tana haʼu ki te kele pea mo tana “nofo” mo te hahaʼi, neʼe mole fetogi tana manatu ʼo ʼuhiga mo nātou. (Soane 1:14) Neʼe lava taupau feafeaʼi e te ʼAlo haohaoa ʼo te ʼAtua he manatu lelei ʼo ʼuhiga mo te hahaʼi agahala?

⁷ ʼUluaki, neʼe mole fefeka fau tana manatu ʼo ʼuhiga mo ia totonu pea mo te hahaʼi. Neʼe mahino kia te ia ʼe mole ina fakatafoki anai te malamanei katoa. (Mateo 10:32-39) Koia neʼe fiafia ai tatau aipe peʼe ko he tokotahi ʼaē neʼe ina tali lelei te logo ʼo te Puleʼaga. Logola neʼe mole lelei ʼi ʼihi temi te aga pea mo te manatu ʼa tana ʼu tisipulo, kae neʼe ʼiloʼi e Sesu, ʼi tonatou ʼu loto, neʼe nātou fia fai te finegalo ʼo te ʼAtua, pea ko te tupuʼaga la ʼaia ʼo tana ʼofa kia nātou. (Luka 9:46; 22:24, 28-32, 60-62) Tahi ʼaē meʼa maʼuhiga, ʼi tana faikole ki tana Tāmai ʼi selo, neʼe ʼui fakanounou e Sesu te lelei ʼo te aga ʼo tana kau tisipulo, ʼo ʼui maʼana: “Kua natou taupau tau folafola.”—Soane 17:6.

8. Fakahā mai he ʼu faʼahi ʼe feala ke tou faʼifaʼitakiʼi ai ia Sehova pea mo Sesu moʼo taupau totatou fiafia.

⁸ ʼE mahino papau ia ʼe fua lelei anai kia tatou fuli mo kapau e tou fakakaukauʼi fakalelei te faʼifaʼitaki ʼaē neʼe tuku mai e Sehova ʼAtua pea mo Kilisito Sesu ʼi te faʼahi ʼaia. ʼE feala koa ke tou faʼifaʼitakiʼi lahi age ia Sehova, ʼo lagi mole tou tuʼania fau mokā mole hoko te ʼu meʼa ohage ko te meʼa ʼaē neʼe tou fakaʼamu kiai? ʼE feala koa ke hikihiki tatatou mulimuli fakalelei te ʼu tafuga vaʼe ʼo Sesu, ʼo tou taupau he manatu ʼe lelei ʼo ʼuhiga mo te ʼu meʼa ʼaē ʼe hoko kia tatou ʼi te temi nei, pea ke ʼaua naʼa tou aga fefeka fau mo tatou pea mo ʼihi? Tou vakaʼi peʼe tou lava maʼuliʼi feafeaʼi ni ʼihi ʼi te ʼu pelesepeto ʼaia ʼi te gāue ʼaē ʼe ʼofa lahi kiai te kau Kilisitiano ʼo te potu fuli pe, ʼaē ko te minisitelio.

Tou Taupau He Manatu ʼe Lelei ʼo ʼUhiga Mo Te Minisitelio

9. Neʼe toe maʼu feafeaʼi e Selemia tona fiafia, pea ʼe tokoni feafeaʼi mai kia tatou tana faʼifaʼitaki?

⁹ ʼE loto e Sehova ke tou fiafia ʼi tana gāue. ʼE mole tonu ke fakalogo tatatou fiafia ki te fua ʼaē ʼe tou maʼu ʼi tatatou gāue. (Luka 10:17, 20) Lolotoga ni ʼu taʼu neʼe faka mafola te polofeta ko Selemia ʼi he telituale neʼe mole hona fua. Neʼe mole kei fiafia he neʼe ina tokagaʼi tāfito te mole tali lelei ʼa te hahaʼi te logo ʼaē neʼe ina tala. (Selemia 20:8) Kae ʼi tana metitasio ki te matalelei ʼo te logo, neʼe ina toe maʼu ai tana fiafia. Neʼe ʼui fēnei e Selemia kia Sehova: “Neʼe maʼu tau ʼu folafola, pea neʼe ʼau kai; pea neʼe liliu tau folafola ko taku fakafiafia pea mo te fiafia ʼo toku loto; he neʼe pāui tou huafa kia ʼau, Ê Sehova.” (Selemia 15:16) Ei, neʼe fiafia ia Selemia ʼi tona pilivilesio ʼaē ke ina faka mafola te folafola ʼa te ʼAtua pea ʼe toe feiā mo tatou.

10. ʼE tou lava taupau feafeaʼi totatou fiafia ʼi te minisitelio, tatau aipe peʼe mole he fua ʼi totatou telituale ʼi te temi nei?

¹⁰ Tatau aipe peʼe fakafisi te tokolahi ki te logo lelei, kae ʼe lahi te ʼu tupuʼaga ke tou fiafia ai mokā tou kau ki te minisitelio. Koutou manatuʼi neʼe falala moʼoni ia Sehova ʼe ʼi ai anai ʼihi hahaʼi ʼe nātou fia tauhi kia te ia. Ohage ko Sehova, ʼe tonu ke tou falala tuʼumaʼu ʼe ʼi ai ʼihi hahaʼi ʼe nātou mālama anai ki te fakafihi ʼo te pule ʼi te ʼatulaulau pea mo nātou tali te logo ʼo te Puleʼaga. ʼE tonu ke tou manatuʼi ʼe fetogi te ʼu ʼaluʼaga ʼo te hahaʼi. Ka hoko fakapunamaʼuli ki ʼihi he mate peʼe ko he fihifihia, pea māʼiape la mo he tahi ʼe manatu pe kia ia ʼe lagi kamata fakakaukau lelei anai ki te faka ʼuhiga ʼo te maʼuli. ʼE koutou tokoni anai koa kia ia ʼi te temi ʼaē ka ina ‘ ʼiloʼi [ai] tona masiva fakalaumālie’? (Mateo 5:3) Koia ʼe lagi fia logo anai he tahi ʼi tokotou telituale ki te logo lelei mokā koutou toe liliu age ʼo fai faka mafola!

11, 12. Koteā ʼaē neʼe hoko ʼi te kolo, pea koteā tona ʼaoga kia tatou?

¹¹ ʼE feala ke fetogi mo te hahaʼi ʼo tatatou telituale. Ohage ko te faʼifaʼitaki ʼaenī. ʼI te kiʼi kolo veliveli, neʼe maʼuʼuli ai te hahaʼi neʼe nātou felogoi lelei, neʼe ko te ʼu taumatuʼa mo tanatou ʼu fānau. ʼI te faka mafola ʼa te kau Fakamoʼoni ʼa Sehova, neʼe fai ʼi te ʼu matapā fuli te tali ʼaenī, “ ʼE mole mātou fia fai kiai!” Ka fia logo moʼoni he tahi ki te logo ʼo te Puleʼaga, pea neʼe foimo fakaloto vaivaiʼi e tona ʼu vāhaʼa fale ke mole toe fai palalau mo te kau Fakamoʼoni. ʼE mahino ia neʼe faigataʼa te fai faka mafola ʼi te telituale ʼaia. Kae neʼe haga fai aipe e te kau Fakamoʼoni tanatou fai faka mafola. Pea koteā ʼaē neʼe hoko?

¹² ʼAki te temi, neʼe lahilahi ake te ʼu tamaliki ʼo te kolo ʼaia, ʼo nātou ʼohoana, pea mo tahi maʼu tona ʼapi. ʼI tanatou mahino ʼaē ʼe mole nātou maʼu te fiafia moʼoni ʼi tanatou faʼahiga maʼuli ʼaia, ko ʼihi ʼi te hahaʼi ʼaia neʼe nātou kamata kumi te moʼoni. Neʼe nātou maʼu te moʼoni ʼi tanatou tali lelei te logo lelei ʼaē neʼe faka mafola e te kau Fakamoʼoni. Koia neʼe hili kiai ni ʼu taʼu, pea neʼe kamata tuputupu te kiʼi kokelekasio. Koutou fakakaukauʼi age muʼa te fiafia ʼa te ʼu kaugā fagona ʼo te Puleʼaga ʼaē neʼe mole nātou līaki te gāue! Tou fakaʼamu ke tou fiafia mo tatou ʼi tatatou kātaki ʼo vaevae te logo faka kolōlia ʼo te Puleʼaga!

ʼE Lagolago Anai Kia Koutou Te ʼu Kaugā Gāue ʼi Te Tui

13. Ko ai ʼaē ʼe feala ke tou haga ki ai mokā tou lotovaivai?

¹³ Ka lahi te ʼu fakaneke peʼe ka hoko he tuʼutāmaki ʼi tokotou maʼuli, pea ʼe koutou lava kumi kifea te fakaloto fīmālie? Ko te ʼu lauʼi miliona kaugana ʼa Sehova ʼaē kua papitema, ʼe nātou ʼuluaki faikole kia Sehova, pea nātou kumi tokoni leva ki tonatou ʼu tēhina mo tuagaʼane Kilisitiano. ʼI tana kei maʼuli ʼi te kele, neʼe maʼuhiga kia Sesu te lagolago ʼo tana ʼu tisipulo. ʼI te po ʼi muʼa ʼo tana mate, neʼe ina ʼui ʼo ʼuhiga mo nātou ʼe ko “koutou ae nee nonofo mo au i oku temi ahiahiʼi.” (Luka 22:28) ʼE moʼoni, neʼe agahala tana ʼu tisipulo, kae ko tanatou nofo agatonu neʼe ko he fakaloto fīmālie ki te ʼAlo ʼo te ʼAtua. Mo tatou ʼe feala ke tou maʼu te mālohi mai tatatou ʼu kaugā atolasio.

14, 15. Koteā ʼaē neʼe tokoni ki te taumatuʼa ke nā kātakiʼi te mate ʼo tanā tama, pea koteā tona ʼaoga kia koutou ia te meʼa ʼaē neʼe hoko kia nāua?

¹⁴ Neʼe ʼiloʼi e te taumatuʼa Kilisitiano ko Michel pea mo Diane te maʼuhiga ʼaupito ʼo te tokoni ʼo tonā ʼu tēhina pea mo tuagaʼane. Ko tonā foha taʼu 20 ko Jonathan, neʼe mālohi pea mo gāue lelei, kae neʼe maʼu e te kau tōketā te kosea ʼi tona ʼuto. Neʼe faiga ʼaupito te kau tōketā ke nātou hāofaki ia ia, kae neʼe ʼāsili kovi te ʼaluʼaga ʼo Jonathan ʼo aʼu ki tona mate ʼi te tahi po. Neʼe lotomamahi ʼaupito ia Michel pea mo Diane. Neʼe nā ʼiloʼi neʼe kua vave ʼosi te Fono Gāue, ʼaē neʼe fai ʼi te po ʼaia. Koia neʼe ʼaoga ʼaupito kia nāua he fakaloto fīmālie, ʼo nā kole ai ki te tagata ʼāfea ʼaē neʼe nofo mo nāua ke nātou kaugā ʼolo ki te Fale ʼo te Puleʼaga. Neʼe nātou tau atu ʼi te temi pe ʼaē neʼe tala ifo ai ki te kokelekasio te mate ʼo Jonathan. Hili te fono, neʼe ʼōmai ki te taumatuʼa ʼaē neʼe fetāgihi, tonā ʼu tēhina mo tuagaʼane ʼo fāʼufua kia nāua pea mo fai age he ʼu palalau fakaloto fīmālie. ʼE manatuʼi fēnei e Diane: “Neʼe ma lotomamahi ʼaupito ʼi tamā tau atu ki te fale fono, kae ko he toe fakaloto fīmālie lahi ʼaē neʼe foaki mai e te ʼu tēhina—he neʼe nātou fakaloto mālohiʼi māua! Logola neʼe mole feala ke nātou pulihi tomā mamahi, kae neʼe nātou tokoni lahi mai ʼi tomā loto mamahi!”—Loma 1:11, 12; 1 Kolonito 12:21-26.

¹⁵ ʼAki te mate ʼaia neʼe fakaōvi lahi ai ia Michel pea mo Diane ki tonā ʼu tēhina. Neʼe toe mālohi age mo tonā vāhaʼa faka taumatuʼa. ʼE ʼui fēnei e Michel: “Neʼe mahino ai kia ʼau ʼe tonu ke toe lahi age toku ʼofa ki toku ʼohoana. ʼI te ʼu temi ʼaē ʼe ma lotovaivai ai, ʼe ma fepalalauʼaki ʼo ʼuhiga mo te moʼoni ʼo te Tohi-Tapu pea mo te lagolago ʼa Sehova kia māua.” ʼE toe ʼui fēnei e Diane: “ ʼI te temi nei, ʼe maʼuhiga ʼaupito age kia māua te ʼamanaki ki te Puleʼaga.”

16. He koʼe ʼe maʼuhiga ke tou fakahā ki totatou ʼu tēhina te ʼu meʼa ʼaē ʼi totatou loto?

¹⁶ Ei, ko totatou ʼu tēhina mo tuagaʼane Kilisitiano ʼe feala ke nātou “fakafimalie” tatou ʼi te ʼu temi faigataʼa ʼo te maʼuli pea mo tokoni mai ke tou taupau totatou fiafia. (Kolose 4:11) ʼE moʼoni, ʼe mole feala ke nātou ʼiloʼi tatatou ʼu manatu. Koia, ka ʼaoga kia tatou he tokoni, pea ʼe lelei ke tou fakahā kia nātou tatatou ʼu manatu. ʼE feala ke tou fakahā ai ʼe tou leleiʼia te fakaloto fīmālie ʼaē ʼe feala ke foaki mai e totatou ʼu tēhina, ʼo tou faka ʼuhiga ʼe haʼu mai ia Sehova.—Tāʼaga Lea 12:25; 17:17.

Koutou Fakasiosio Tokotou Kokelekasio

17. Koteā te ʼu faigataʼaʼia ʼe tau mo te faʼe ʼe ina taupau tokotahi tana fānau, pea ʼe tou faka ʼuhiga feafeaʼi te hahaʼi ʼaē ʼe tatau tonatou ʼaluʼaga mo te faʼe ʼaia?

¹⁷ Kapau ʼe koutou fakasiosio fakalelei tokotou ʼu tēhina ʼi te tui, pea ʼe koutou ʼofa lahi anai kia nātou pea mo koutou fiafia ʼi te fakatahi mo nātou. Koutou fakasiosio tokotou kokelekasio. Koteā ʼaē ʼe koutou sio ai? ʼE ʼi ai koa he faʼe ʼe faiga mālohi moʼo taupau tokotahi tana fānau ʼi te ala ʼo te moʼoni? Neʼe koutou toʼo koa he temi ke koutou fakakaukauʼi te faʼifaʼitaki lelei ʼaē ʼe ina tuku mai? Koutou fakakaukauʼi age muʼa te ʼu fihifihia ʼaē ʼe ina kātakiʼi. Ko Jeanine, ʼe ina taupau tokotahi tana fānau, ʼe ina fakahā mai ni ʼihi ʼo te ʼu fihifihia ʼaia: tana nofo tokotahi, te ʼu fakaneke ʼa te ʼu hahaʼi tagata ʼi te gāue ke ina fai he ʼu felāveʼi fakasino, tona faigataʼaʼia ʼi te faʼahi ʼo te falā. Kae ʼe ina ʼui ko te fihifihia ʼaē ʼe lahi ʼaupito, ʼe ko te taupau ʼo tana fānau, te ʼiloʼi ʼo te ʼu meʼa ʼaē ʼi tonatou loto, heʼe mole nātou tatau fuli. ʼE fakahā e Jeanine te tahi faigataʼaʼia: “ ʼE feala ke faigataʼa te tekeʼi ʼo takita fia faka ʼuhiga ʼo tatatou tama ko te pule ʼo te loto fale heʼe kua puli tokita ʼohoana. ʼE ʼi ai taku taʼahine, pea ʼe ʼau fia fakamatala age kia ia toku ʼu fihifihia, kae ʼe mamafa fau kia ia.” Ohage ko te lauʼi afe ʼu mātuʼa ʼaē ʼe manavasiʼi ki te ʼAtua pea mo taupau tokotahi tanatou fānau, ʼe gāue ia Jeanine ʼi te ʼaho katoa pea mo tokaga ki tona loto fale. ʼE ina toe ako te Tohi-Tapu mo tana fānau, mo akoako nātou ki te minisitelio, pea ʼe ina ʼave nātou ki te ʼu fono. (Efeso 6:4) ʼE fiafia lahi ia Sehova ʼi tana sio ifo ʼi te ʼaho fuli ki te ʼu faiga ʼa te famili ʼaia ke nātou nonofo agatonu! ʼE mole fiafia koa la totatou loto ʼi tatatou fakatahi mo he ʼu hahaʼi feiā? ʼE mahino ia.

18, 19. Koutou tuku mai he ʼu faʼifaʼitaki ʼe feala ke loloto age tatatou ʼofa kia nātou ʼo te kokelekasio?

¹⁸ Koutou toe fakasiosio tokotou kokelekasio. ʼE lagi koutou sio ai ki te ʼu fafine mo he ʼu tagata vitua ʼe “mole puli ia ʼi he ʼaho” ʼi te ʼu fono. (Luka 2:37, MN ) ʼI ʼihi temi ʼe nātou logoʼi koa tanatou nonofo tokotahi? ʼE mahino ia. ʼE lahi tanatou manatu ki tonatou ʼohoana! Kae ʼe nātou gāue lahi ʼi te tauhi kia Sehova pea mo nātou tokaga ki ʼihi. Ko tanatou aga fakapotopoto pea mo lelei ʼe hilifaki ki te fiafia ʼo te kokelekasio! Neʼe ʼui fēnei e te tuagaʼane neʼe kau ki te minisitelio temi katoa ia taʼu e 30 tupu: “Ko toku fiafia lahi neʼe ko taku sio ki te ʼu tuagaʼane pea mo tēhina kua matutuʼa neʼe hoko kia nātou he ʼu tuʼuga ʼahiʼahi, kae ʼe kei nātou tauhi agatonu kia Sehova!” Ei, ko te kau Kilisitiano ʼaē kua matutuʼa ʼi totatou kokelekasio ʼe ko he fakaloto mālohi lahi ki te kau tūpulaga.

¹⁹ E feafeaʼi ʼo ʼuhiga mo te hahaʼi foʼou ʼaē ko tanatou hoki kamata fakatahi mo te kokelekasio? ʼE mole tou lotomālohi koa la mokā nātou fakahā tanatou tui ʼi te ʼu fono? Koutou fakakaukauʼi age muʼa tanatou tuputupu talu mai tanatou kamata ako te Tohi-Tapu. ʼE fiafia moʼoni Sehova ia nātou. ʼE tou fiafia koa mo tatou? ʼE tou fakahā koa kia nātou totatou fiafia pea mo tou fakamālo ki tanatou ʼu faiga?

20. He koʼe ʼe feala ke tou ʼui ko nātou fuli ʼi te kokelekasio ʼe nātou maʼuhiga ʼaupito ʼi te kokelekasio?

²⁰ Kua koutou ʼohoana koa, peʼe koutou selipatea, peʼe koutou taupau tokotahi takotou fānau? ʼE koutou hala koa mo tāmai peʼe mo faʼe, peʼe koutou fafine vitua? Kua fualoa koa takotou fakatahi mo te kokelekasio peʼe ko takotou hoki kamata ʼaē? Koutou ʼiloʼi papau ko takotou faʼifaʼitaki agatonu ʼe ina fakaloto mālohi ia tatou fuli. Pea ka koutou hiva fakatahi te katiko ʼo te Puleʼaga, peʼe koutou fai hakotou tali peʼe koutou fai hakotou akonaki ʼi te Ako ʼo te Minisitelio Faka Teokalatike, ʼe toe lahi ai tatatou fiafia. Ko te meʼa ʼaē ʼe maʼuhiga tāfito, heʼe fiafia ai te loto ʼo Sehova.

21. Koteā ʼaē ʼe tonu ke tou fai, kae koteā te ʼu fehuʼi ʼaē ʼe lagaʼi?

²¹ Ei, māʼia ʼi te ʼu temi faigataʼa ʼaenī, ʼe feala ke tou fiafia ʼi tatatou tauhi ki totatou ʼAtua fiafia. ʼE tou maʼu he ʼu tupuʼaga lahi ke tou tali ki te fakaloto mālohi ʼaenī ʼa Paulo: “Koutou nofo i te fiafia, . . . pea e afio anai ia koutou te ofa mo te tokalelei o te Atua.” (2 Kolonito 13:11) Kae e feafeaʼi mo kapau ʼe hoko mai kia tatou he tuʼutāmaki fakakelekele, he ʼu fakataga, peʼe ko he ʼu faigataʼaʼia ʼi te faʼahi ʼo te paʼaga? ʼE feala koa ke tou taupau totatou fiafia ʼi te ʼu ʼaluʼaga ʼaia? Koutou tali e koutou totonu kiai ʼi takotou vakaʼi te alatike ʼaē ʼe hoa mai.

[Kiʼi nota]

ʼE Feala Koa Hakotou Tali?

• Koteā te fiafia?

• ʼE tokoni feafeaʼi mai kia tatou he manatu ʼe lelei ke tou taupau totatou fiafia?

• Koteā ʼaē ʼe feala ke tokoni mai ke tou maʼu he manatu ʼe lelei ʼo ʼuhiga mo te telituale ʼo totatou kokelekasio?

• Koteā te ʼu faʼahi ʼaē ʼe tonu ai ke maʼuhiga kia koutou tokotou ʼu tēhina pea mo tuagaʼane ʼi tokotou kokelekasio?

[Paki ʼo te pasina 10]

ʼE feala ke fetogi te hahaʼi ʼo totatou telituale

[Paki ʼo te pasina 12]

Koteā te ʼu faigataʼaʼia ʼaē ʼe tonu ke tauʼi e nātou ʼi tokotou kokelekasio?