Tou Faʼifaʼitakiʼi Sehova Moʼo Akoʼi Tatatou Fānau

“ ʼE mole akonakiʼi koa la e te ʼu mātuʼa fuli tanatou ʼu fānau?”—Hepeleo 12:7, Comtemporary English Version.

1, 2. He koʼe ʼe faigataʼa ki te ʼu mātuʼa ia ʼaho nei ke nātou pusiaki tanatou ʼu fānau?

KO TE sivi neʼe fai ʼi Saponia mole heʼeki faʼa fualoa, neʼe fakahā ai ko te teitei vaelua ʼo te hahaʼi lalahi ʼaē neʼe fakafehuʼi, neʼe nātou manatu kua siʼisiʼi ʼaupito te felogoi ʼa te ʼu mātuʼa mo tanatou ʼu fānau, pea ʼe fakapelepeleʼi fau e te ʼu mātuʼa tanatou ʼu fānau. ʼI te tahi sivi neʼe fai ʼi te fenua ʼaia, ko te teitei vahe e tahi ʼi te fā ʼo te hahaʼi, neʼe nātou fakamoʼoni ʼe mole nātou ʼiloʼi peʼe tonu ke nātou gaohi feafeaʼi tanatou ʼu fānau. ʼE mole gata pe te faʼahi ʼaia ʼi te Potu Esite. Neʼe ʼui fēnei ʼi te sulunale The Toronto Star: “Tokolahi te ʼu mātuʼa ʼi Kanata neʼe nātou fakamoʼoni ʼe mole nātou ʼiloʼi lelei, peʼe feafeaʼi hanatou liliu ko he ʼu mātuʼa fakapotopoto.” ʼI te ʼu fenua fuli pe, ʼe faigataʼa ki te ʼu mātuʼa te pusiaki ʼo tanatou ʼu fānau.

² He koʼe ʼe faigataʼa ki te ʼu mātuʼa te pusiaki ʼo tanatou ʼu fānau? Ko tona tupuʼaga tāfito, heʼe tou maʼuʼuli “i te u aho fakamuli,” pea kua hoko mai mo “he u temi faigataa.” (2 Timoteo 3:1) Tahi ʼaē meʼa, ʼe ʼui e te Tohi-Tapu “ko te holi ʼo te loto ʼo te tagata ʼe kovi ia talu mai tana kei veliveli.” (Senesi 8:21) Pea ʼe ko te kau tūpulaga ʼaē ʼe ʼohofiʼi tāfito e Satana, ohage ko “he laione e gugulu,” ʼe ina kumi ke ina kākāʼi ia nātou ʼaē ʼe mole heʼeki fakapotopoto. (1 Petelo 5:8) ʼE mahino ia ʼe lahi te ʼu fihifihia ʼe tau mo te ʼu mātuʼa Kilisitiano, mokā nātou fakatuʼutuʼu ke nātou pusiaki tanatou ʼu fānau ʼi “te akonaki pea mo te manatu ʼa Sehova.” (Efeso 6:4, MN ) ʼE lava tokoni feafeaʼi koa te ʼu mātuʼa ki tanatou ʼu fānau, ke nātou lalahi ake ʼo liliu ko he kau atolasio ʼa Sehova aga fakapotopoto, ʼo feala ke nātou ʼiloʼi te kehekehe ʼo “te lelei pea mo te kovi”?—Hepeleo 5:14.

3. He koʼe ʼe maʼuhiga te ako pea mo te takitaki ʼa te ʼu mātuʼa moʼo taupau lelei tanatou ʼu fānau?

³ Neʼe tokagaʼi e te Hau poto ko Salomone te faʼahi ʼaenī: “ ʼE nonoʼo te agavale ʼi te loto ʼo te tama.” (Tāʼaga Lea 13:1; 22:15) Ke pulihi ʼi tonatou loto te agavale, ʼe ʼaoga ki te kau tūpulaga ke akonakiʼi nātou e tanatou ʼu mātuʼa, ʼaki te ʼofa. Kae ʼe mole faʼa tali tuʼumaʼu e te kau tūpulaga mokā akonakiʼi nātou. ʼI te agamāhani ʼe nātou ʼiʼita mokā tokoniʼi nātou, tatau aipe peʼe ko ai ʼaē ʼe ina fai age te tokoni ʼaia. Koia ʼe tonu ke ʼiloʼi e te ʼu mātuʼa te “ako [ʼo] te tama ki te ala ʼaē ʼe ʼaoga kia ia.” (Tāʼaga Lea 22:6) Ka tali e te fānau te fakatonutonu, pea ʼe feala ke faka ʼuhiga te faʼahi ʼaia ko te maʼuli kia nātou. (Tāʼaga Lea 4:13) ʼE maʼuhiga ʼaupito ke ʼiloʼi e te ʼu mātuʼa te faka ʼuhiga ʼo te akoʼi ʼo tanatou ʼu tamaliki!

Te Faka ʼUhiga ʼo Te Fakatonutonu

4. Koteā te faka ʼuhiga tāfito ʼo te kupu “fakatonutonu” ohage ko tona fakaʼaogaʼi ʼi te Tohi-Tapu?

⁴ Ko ʼihi mātuʼa ʼe mole nātou akonakiʼi tanatou ʼu fānau naʼa ʼui ʼe nātou gaohi koviʼi tanatou ʼu fānau—ʼi te faʼahi fakasino, ʼi tanatou ʼu palalau peʼe ʼi tonatou loto. ʼE mole tonu ke tou maʼu te ʼu tuʼania ʼaia. Ko te kupu “fakatonutonu” ohage ko tona fakaʼaogaʼi ʼi te Tohi-Tapu, ʼe mole faka ʼuhiga ia ki he aga fefeka peʼe ki te agakovi. Ko te kupu “fakatonutonu” ʼi te faka Keleka, ʼe pipiki tāfito ia ki te ako, mo te akonakiʼi, pea ʼi ʼihi temi, ki te fakatūʼa ʼaē ʼe fai ʼaki te ʼofa.

5. He koʼe ʼe ʼaoga ke tou tokagaʼi te aga ʼa Sehova mo tana hahaʼi?

⁵ ʼI tana fakahoko te fakatonutonu, ʼe tuku mai e Sehova ʼAtua he faʼifaʼitaki haohaoa. ʼI tana fakatatau ia Sehova ki he tāmai, neʼe tohi fēnei e te ʼapositolo ko Paulo: “ ʼE mole akonakiʼi koa la e te ʼu mātuʼa fuli tanatou ʼu fānau? . . . ʼE akonakiʼi tatou e tatatou ʼu tāmai ʼi he temi nounou, pea ʼe nātou fai te faʼahi ʼaia heʼe ʼi tanatou manatu ʼe lelei. Kae ʼe akonakiʼi tatou e te ʼAtua ke fua lelei kia tatou, heʼe ina loto ke tou maʼoniʼoni.” (Hepeleo 12:7-10, Comtemporary English Version) Ei, ʼe fakatonutonuʼi e Sehova tana hahaʼi ke feala hanatou liliu ʼo maʼoniʼoni, peʼe ke nātou maʼa. ʼE mahino ia, ʼe lahi te ʼu faʼahi ʼe feala ke tou ako ʼo ʼuhiga mo te fakatonutonuʼi ʼo te fānau, mo kapau ʼe tou tokagaʼi pe neʼe feafeaʼi te akoʼi e Sehova ʼo tana hahaʼi.—Teutalonome 32:4; Mateo 7:11; Efeso 5:1.

Te Mālohi ʼo Te ʼOfa

6. He koʼe ʼe feala ke faigataʼa ki te ʼu mātuʼa hanatou faʼifaʼitakiʼi te ʼofa ʼo Sehova?

⁶ ʼE ʼui e te ʼapositolo ko Soane: “Ko te ʼAtua ʼe ʼofa.” Koia, ko te ako ʼaē ʼe foaki e Sehova ʼe ina fai tuʼumaʼu ʼaki te ʼofa. (1 Soane 4:8, MN; Tāʼaga Lea 3:11, 12) Ko tona faka ʼuhiga koa, ʼe faigafua ki te ʼu mātuʼa ʼaē ʼe ʼoʼofa ki tanatou ʼu fānau hanatou faʼifaʼitakiʼi ia Sehova ʼi te faʼahi ʼaia? ʼE mole moʼoni tuʼumaʼu te manatu ʼaia. Ko te ʼofa ʼo te ʼAtua ʼe fakatafito ki te ʼu pelesepeto. Pea ʼe fakahā lelei e te tagata sivi ʼo te ʼu Tohi Faka Keleka Faka Kilisitiano, ko te faʼahiga ʼofa ʼaia ‘ ʼe mole maʼu tuʼumaʼu ʼi te loto ʼo he tahi.’ ʼE mole hoko mulimuli te ʼAtua ki te ʼu meʼa ʼaē ʼi tona loto. Kae ʼe ina vakaʼi tuʼumaʼu te meʼa ʼaē ʼe lelei ki tana hahaʼi.—Isaia 30:20; 48:17.

7, 8. (a) ʼI tana ʼu felogoi mo tana hahaʼi, koteā te faʼifaʼitaki ʼaē neʼe tuku mai e Sehova ʼo ʼuhiga mo te ʼofa ʼaē ʼe fakatafito ki he ʼu pelesepeto? (b) ʼE lava faʼifaʼitakiʼi feafeaʼi e te ʼu mātuʼa ia Sehova, moʼo tokoni ki tanatou ʼu fānau ke nātou lava mulimuli ki te ʼu pelesepeto ʼa te Tohi-Tapu?

⁷ Koutou tokagaʼi te ʼofa ʼaē neʼe fakahā e Sehova ʼi tana ʼu felogoi mo te kau Iselaele. Neʼe fakaʼaogaʼi e Moisese te fakatatau matalelei, moʼo fakamatala te ʼofa ʼo Sehova ki te puleʼaga ʼo Iselaele ʼaē neʼe hoki faʼufaʼu. ʼE tou lau fēnei: “Ohage pe ko he akuila ʼe ina uga tona ʼu ʼuhi, mo lele ʼi ʼoluga ʼo tona ʼu ʼuhi, mo folahi tona ʼu kapakau, ʼo tali ake nātou, mo fua nātou ʼi tona ʼu kapakau, ko Sehova tokotahi neʼe ina taki [ia Sakopo].” (Teutalonome 32:9, 11, 12) Moʼo akoʼi tona ʼu ʼuhi ke nātou lele, ko te faʼe akuila ʼe ina “uga tona ʼu ʼuhi,” ʼo tā tona ʼu kapakau moʼo uga nātou ke nātou lele. ʼI te agamāhani neʼe fakatuʼu te fātaʼi ʼi te fuga moʼuga, koia ka tō ifo he ʼuhi mai te fātaʼi ʼaia, pea ko te faʼe neʼe “lele ʼi ʼoluga” ʼo tona ʼuhi. Ka hage ʼe fakaōvi te ʼuhi ki te kele, pea ko te faʼe ʼe lele ifo ʼo tuʼu ʼi lalo, ʼo ina tali ake “ ʼi tona ʼu kapakau.” ʼAki te ʼofa, neʼe toe feiā te fua e Sehova ia te puleʼaga foʼou ʼo Iselaele. Neʼe ina foaki ki te hahaʼi te Lao ʼa Moisese. (Pesalemo 78:5-7) Neʼe leʼoleʼo lelei e te ʼAtua ia te puleʼaga, ʼo feala ai ke ina hāofaki tana hahaʼi ʼi te ʼu temi faigataʼaʼia.

⁸ ʼE lava faʼifaʼitaki feafeaʼi e te ʼu mātuʼa Kilisitiano te ʼofa ʼo Sehova? ʼUluaki, ʼe tonu ke nātou akoʼi ki tanatou ʼu fānau te ʼu pelesepeto pea mo te ʼu lekula ʼaē ʼe maʼu ʼi te Folafola ʼa te ʼAtua. (Teutalonome 6:4-9) ʼE fai te faʼahi ʼaia ʼaki te fakatuʼutuʼu ʼaē ke tokoni ki te tūpulaga ke ina fai he ʼu tonu ʼe ʼalutahi mo te ʼu pelesepeto ʼo te Tohi-Tapu. Ka nātou fai te faʼahi ʼaia, pea ʼe hage ʼe leʼoleʼo e te ʼu mātuʼa ʼofa tanatou ʼu fānau, ʼo nātou vakaʼi peʼe maʼuliʼi feafeaʼi e tanatou ʼu fānau te ʼu pelesepeto ʼaē neʼe akoʼi age kia nātou. ʼI te lahilahi ake ʼa te ʼu fānau pea mo te tuku māmālie age ʼo tonatou faʼifaʼitaliha, ʼe feala ki te ʼu mātuʼa loto tokaga ke nātou ‘feleleʼi ifo’ ʼo ‘fua tanatou ʼu fānau ʼi tonatou kapakau’ mokā hoko he tuʼutāmaki. Koteā te faʼahiga tuʼutāmaki ʼe feala ke hoko?

9. Koteā te tuʼutāmaki ʼaē ʼe tonu ke tokakaga tāfito kiai te ʼu mātuʼa ʼofa? Koutou tuku mai he faʼifaʼitaki.

⁹ Neʼe fakatokagaʼi e Sehova ʼAtua ki te kau Iselaele te ʼu fua kovi ʼo te ʼu fakakaugā kovi. (Faka au 25:1-18; Esitalasi 10:10-14) ʼE toe fakatupu tuʼutāmaki ʼi te temi nei te fakatahi mo he ʼu hahaʼi ʼe kovi. (1 Kolonito 15:33) ʼE tonu ke faʼifaʼitakiʼi e te ʼu mātuʼa ia Sehova ʼo ʼuhiga mo te faʼahi ʼaia. Ko te taʼahine taʼu 15 ko Lisa, neʼe ina leleiʼia te tama neʼe mole mulimuli ki te ʼu lekula fakalaumālie pea mo te aga ʼaē ʼe tonu ke fai, ʼaē neʼe maʼu e te famili ʼa Lisa. ʼE fakamatala fēnei e Lisa: “Neʼe tokagaʼi vave e taku ʼu mātuʼa te fetogi ʼo taku aga pea neʼe nā loto tuʼania. ʼI ʼihi temi neʼe nā akonakiʼi ʼau, pea ʼi ʼihi temi neʼe nā fakaloto mālohiʼi ʼau.” Neʼe nā heheka mo Lisa ʼo nā fakalogo fakalelei ki tana ʼu fakamatala, pea neʼe nā tokoni kia ia ke ina tauʼi te fihifihia ʼaē neʼe mole faʼa mahino lelei ki ai—ʼaē ko tana loto ke tali ia ia e tona ʼu kaumeʼa.a

Koutou Fai Palalau Tuʼumaʼu Mo Takotou ʼu Fānau

10. Ko te faʼahi fea ʼaē neʼe tuku ai e Sehova he faʼifaʼitaki lelei ʼi tana fai palalau mo te kau Iselaele?

¹⁰ Ke lava lelei te akoʼi ʼo tanatou ʼu fānau, ʼe tonu ke faigaʼi e te ʼu mātuʼa ke nātou fai palalau tuʼumaʼu mo tanatou ʼu fānau. Ko Sehova, logola tana ʼiloʼi katoa te ʼu meʼa ʼaē ʼi totatou loto, kae ʼe ina fakaloto mālohiʼi tatou ke tou palalau mo ia. (1 Fakamatala 28:9) ʼI tana ʼosi foaki ki te kau Iselaele te Lao, neʼe hinoʼi e Sehova te kau Levite ke nātou akoʼi nātou, pea neʼe ina fekauʼi te kau polofeta ke nātou palalau kia nātou pea mo fakatonutonuʼi ia nātou. Neʼe ina toe fakahā mo tana lotolelei ʼaē ke fagono ki tanatou ʼu faikole.—2 Fakamatala 17:7-9; Pesalemo 65:2; Isaia 1:1-3, 18-20; Selemia 25:4; Kalate 3:22-24.

11. (a) ʼE lava feafeaʼi ki te ʼu mātuʼa hanatou fai palalau lelei mo tanatou ʼu fānau? (b) He koʼe ʼe maʼuhiga ki te ʼu mātuʼa ke nātou fakalogo lelei mokā nātou fai palalau mo tanatou ʼu fānau?

¹¹ ʼE lava faʼifaʼitakiʼi feafeaʼi e te ʼu mātuʼa ia Sehova mokā nātou fai palalau mo tanatou ʼu fānau? ʼUluaki pea ʼe maʼuhiga ʼaupito, ʼe tonu ke nātou fakaʼaogaʼi he temi ke nātou fakatahi ai mo nātou. ʼE toe ʼaoga foki ki te ʼu mātuʼa ke mole nātou fai he ʼu palalau ʼe fakatupu lainoa, ohage la ko te ʼui fēnei: “ ʼAia pe? Neʼe ʼau ʼui koa ʼau ko he meʼa maʼuhiga”; “ ʼE ko he agavale ʼaē neʼe ke fai”; “Neʼe tonu pe ia ke hoko feiā, he kei ke tamasiʼi.” (Tāʼaga Lea 12:18) Moʼo fakaloto mālohiʼi te fānau ke nātou fakahā te ʼu meʼa ʼi tonatou loto, ʼe tonu ke faigaʼi e te ʼu mātuʼa popoto ke nātou fakalogo fakalelei. Ko te ʼu mātuʼa ʼaē ʼe mole nātou tokagaʼi tanatou ʼu fānau ʼi tanatou kei liliki, ʼe mole tokagaʼi anai nātou e tanatou ʼu fānau mokā lalahi ake. Neʼe lotolelei tuʼumaʼu ia Sehova ke ina fakalogo tana hahaʼi. Neʼe ina fakalogo tuʼumaʼu ia nātou ʼaē neʼe faikole kia te ia ʼaki he loto agavaivai.—Pesalemo 91:15; Selemia 29:12; Luka 11:9-13.

12. Koteā te ʼu kalitate ʼe tonu ke maʼu e te ʼu mātuʼa ke faigafua ai ki te ʼu fānau hanatou fai palalau mo nātou?

¹² Koutou toe fakatokagaʼi mo ʼihi faʼahi ʼo te ʼulugaaga ʼo te ʼAtua, neʼe faigafua ai maʼa tana hahaʼi ke nātou fakaōvi kia te ia. Ohage la ko te Hau ʼo Iselaele ko Tavite, neʼe ina fai te agahala mamafa, he neʼe tono mo Pati-Sepa. ʼI tona ʼuhiga agahala, neʼe fai e Tavite te tahi ʼu agahala mamafa ʼi tona maʼuli. Kae ʼi te temi fuli pe, neʼe fakaōvi kia Sehova pea mo ina kole ke fakamolemole age pea ke fakatonutonuʼi ia ia. ʼE mahino papau ia, ko te lotoʼofa pea mo te manavaʼofa ʼo te ʼAtua neʼe ina faka faigafua kia Tavite ke ina kumi ia Sehova. (Pesalemo 103:8) Kapau ʼe nātou fakahā te ʼu kalitate ʼaia ʼo te ʼAtua ohage la ko te lotoʼofa pea mo te manavaʼofa, pea ʼe faka faigafua ai anai e te ʼu mātuʼa te fai palalau, māʼia mo te temi ʼaē ʼe hala ai te fānau.—Pesalemo 103:13; Malakia 3:17.

Koutou Aga Fakapotopoto

13. Koteā ʼaē ʼe faka ʼuhiga kiai te aga fakapotopoto?

¹³ Ka fakalogo e te ʼu mātuʼa tanatou ʼu fānau, pea ʼe tonu ke nātou fakapotopoto pea mo fakahā “te poto mai oluga.” (Sakopo 3:17) Neʼe tohi fēnei e te ʼapositolo ko Paulo: “Ke ʼiloʼi takotou aga fakapotopoto e te hahaʼi fuli pe.” (Filipe 4:5, MN ) Koteā te faka ʼuhiga ʼo te aga fakapotopoto? Ko te kupu “fakapotopoto” ʼi te faka Keleka ʼe faka ʼuhiga ki te “mole fakakinauʼi ke muliʼi fakalelei te lao katoa.” Logola ʼe tonu ki te ʼu mātuʼa ke nātou taupau maʼu te ʼu lekula ʼo te aga ʼaē ʼe tonu ke fai pea mo te ʼu lekula fakalaumālie, kae ʼe lava feafeaʼi hanatou aga fakapotopoto?

14. Neʼe fakahā feafeaʼi e Sehova tana aga fakapotopoto kia Lote?

¹⁴ Neʼe tuku e Sehova he faʼifaʼitaki lelei ʼaupito ʼo te aga fakapotopoto. (Pesalemo 10:17) ʼI tana uga ia Lote pea mo tona famili ke mavae ʼi te kolo ʼo Sotoma ʼaē ka fakaʼauha, ko Lote neʼe “tuai.” Ki muli age, ʼi te kole age e te ʼaselo ʼa Sehova ke hola ki te koga meʼa moʼugaʼia, neʼe ʼui fēnei e Lote: “ ʼE mole feala ke ʼau hola ki te potu moʼugaʼia . . . Kae fakalelei siʼou loto, ko te kolo ʼaenī [ko Soale] ʼe tuʼu ōvi mai ke ʼau hola kiai pea ʼe ko he meʼa veliveli. Fakalelei siʼou loto kae ʼe feala koa ke ʼau hola kiai—ʼe mole ko he meʼa veliveli koa la?” Neʼe koteā ʼaē neʼe fai e Sehova? Neʼe ina ʼui fēnei: “Koʼeni ʼe ʼau fakaʼapaʼapa atu kia te koe ʼo ʼuhiga mo te faʼahi ʼaia, heʼe mole ʼau fakaʼauha anai te kolo ʼaē neʼe ke palalau kiai.” (Senesi 19:16-21, 30) Neʼe tali lelei e Sehova te kole ʼa Lote. Ei, ʼe tonu ke mulimuli te ʼu mātuʼa ki te ʼu lekula ʼaē neʼe fakatuʼu e Sehova ʼAtua ʼi tana Folafola, te Tohi-Tapu. Kae ʼe lagi feala ke nātou tali te ʼu meʼa ʼaē ʼe loto kiai he tūpulaga mo kapau ʼe mole ko he ʼu meʼa ʼe maumauʼi ai te ʼu pelesepeto ʼo te Tohi-Tapu.

15, 16. Koteā ʼaē ʼe feala ke ako e te ʼu mātuʼa ʼi te lea fakatātā ʼaē ʼe tuʼu ia Isaia 28:24, 25?

¹⁵ Ko te aga fakapotopoto ʼe pipiki kiai te teuteuʼi ʼo te loto ʼo te ʼu fānau ke feala hanatou tali te tokoni. ʼI hona ʼaluʼaga fakatātā, neʼe fakatatau e Isaia ia Sehova ki he tagata gāue kele, pea neʼe ina ʼui fēnei: “ ʼE ko te ʼaho katoa koa ʼaē ʼe laga kele ai te tagata gāue kele moʼo to te pulapula, pea mo fakamaʼa pea mo fuli te kele? ʼE mole ko te temi koa la ʼaē kua ina fakatokatoka ai te kele, ʼaē ʼe ina tūtū ai te kumino ʼuli pea mo laku te kumino? ʼE mole tonu koa la ke ina to te fulumeto, te mile pea mo te olose ʼi te potu ʼaē kua teuteu kiai, pea mo te epote ʼi tona potu taupotu?”—Isaia 28:24, 25.

¹⁶ Ko Sehova ʼe “laga kele. . . moʼo to te pulapula” pea ʼe ina “fakamaʼa pea mo fuli te kele.” ʼE ina teuteuʼi ai te loto ʼo tana hahaʼi ʼi muʼa ʼo tana akonakiʼi nātou. Ka nātou akonakiʼi tanatou ʼu fānau, pea ʼe lava ‘gāueʼi’ feafeaʼi e te ʼu mātuʼa te loto ʼo tanatou ʼu fānau? Neʼe faʼifaʼitakiʼi e te tāmai ia Sehova ʼi tana akonakiʼi tona foha neʼe taʼu fā. Neʼe tā e tona kiʼi foha te kiʼi tama ʼe nā vāhaʼa fale, pea ʼaki he loto faʼa kātaki, neʼe fakalogo muʼa te tāmai ki te fakamatala ʼo tona foha. Pea neʼe ‘gāueʼi’ e te tāmai te loto ʼo tona foha, ʼo ina fakamatala age te hisitolia ʼo te kiʼi tama neʼe gaohi koviʼi e te tahi kiʼi tama agakovi. ʼI tana fakalogo ki te hisitolia, neʼe ʼui ai e tona foha ʼe tonu ke fakatūʼa ia ia ʼaē ʼe agakovi. Ko te ‘gāueʼi’ ʼaia e te tāmai ia te loto ʼo tona foha, neʼe ina teuteuʼi ai ke mahino gafua kia ia, ko tana gaohi koviʼi te kiʼi tama ʼo te vāhaʼa fale neʼe hage ko te tama agakovi pea neʼe mole lelei tana aga.—2 Samuele 12:1-14.

17. Koteā te ako ʼaē ʼe tou maʼu ia Isaia 28:26-29 ʼo ʼuhiga mo te akonakiʼi ʼo te fānau e te ʼu mātuʼa?

¹⁷ Ki muli age neʼe fakatatau e Isaia te fakatonutonuʼi ʼa Sehova ki te tahi gāue kele—te fuli kele. Moʼo fuli te kele, ʼe fakaʼaogaʼi e te tagata gāue kele he ʼu meʼa gāue kehekehe, ʼo mulimuli ki te pulapula ʼaē neʼe to ai. ʼE fakaʼaogaʼi te kauʼi ʼakau ki te kumino ʼuli pea mo te kumino, kae ʼe fakaʼaogaʼi te meʼa toho peʼe ko he kiʼi saliote moʼo to te pulapula ʼaē ʼe mātolu age. Kae ʼe mole ina gāueʼi fau anai te ʼu fulumeto naʼa makafaʼafaʼa. ʼO toe feiā pe, ka loto e Sehova ke ina toʼo he meʼa ʼe kovi ʼi tana hahaʼi, pea ʼe ina akonakiʼi ʼo mulimuli pe ki te ʼu meʼa ʼaē ʼe ʼaoga ki ai pea mo te ʼu ʼaluʼaga. ʼE mole agakovi pea mo aga fefeka. (Isaia 28:26-29) Ko ʼihi fānau ʼe nātou fakalogo mokā sioʼi nātou e tanatou ʼu mātuʼa, ʼo gata ai. Ko ʼihi ʼe maʼua ke tokoniʼi liuliuga, kae ko ʼihi ʼe tonu ke mālohi age tonatou akonakiʼi ke feala hanatou fakalogo. Ko te ʼu mātuʼa ʼaē ʼe aga fakapotopoto ʼe nātou akonakiʼi anai tanatou ʼu fānau ʼo mulimuli ki te ʼu meʼa ʼaē ʼe ʼaoga kia nātou takitokotahi.

Ko He ʼu Fai Palalau Faka Famili ʼe Fakafiafia

18. ʼE lava maʼu feafeaʼi e te ʼu mātuʼa he temi moʼo fai tuʼumaʼu te ako Tohi-Tapu faka famili?

¹⁸ Ko te meʼa lelei ʼe feala ke koutou fai moʼo akoʼi takotou fānau, ʼe ko te fai tuʼumaʼu ʼo te ako Tohi-Tapu faka famili pea mo he fai palalau ki te Tohi-Tapu ʼi te ʼaho fuli. ʼE fua lelei te ako faka famili mo kapau ʼe fai tuʼumaʼu. Kapau ʼe ko te ako ʼaia ʼe mole mulimuli ki he polokalama peʼe hoko fai feiā pe, pea ʼe lagi tahitahiga anai tona fai. Koia ʼe tonu ki te ʼu mātuʼa ke nātou ‘totogi te temi’ ki te ako. (Efeso 5:15-17) ʼE feala ke faigataʼa te fili ʼo te hola ʼaē ʼe lelei anai ki te famili katoa. Ko te tāmai neʼe ina tokagaʼi ʼi te lahilahi ake ʼo tana fānau pea ʼuhi ko te kehekehe ʼo tanatou ʼu polokalama, neʼe faigataʼa te fakatahi ʼo te famili katoa. Kae neʼe fakatahi tuʼumaʼu te famili ʼi te ʼu afiafi ʼaē neʼe fai ai te ʼu fono ʼo te kokelekasio. Koia neʼe fakatuʼutuʼu ai e te tāmai ke fai te ako faka famili ʼi he afiafi ʼo te ʼu afiafi fono ʼaia. Neʼe haʼele lelei te fakatuʼutuʼu ʼaia. Ko te ʼu fānau fuli ʼi te temi nei ko te ʼu kaugana ʼa Sehova kua papitema.

19. ʼE lava faʼifaʼitakiʼi feafeaʼi e te ʼu mātuʼa ia Sehova mokā nātou fai te ako faka famili?

¹⁹ Kae ʼi te lolotoga ako ʼo he tohi faka Tohi-Tapu, ʼe tonu ke mahino lelei ki te fānau te ako ʼaia. Neʼe akoʼi e Sehova te kau Iselaele ʼaē neʼe toe liliu ki tonatou fenua, ʼo ina fakaʼaogaʼi te kau pelepitelo, ʼaē neʼe nātou ‘fakamatalatala pea mo fakahā te ʼuhiga’ ʼo te Lao, pea mo nātou “fakamahinohino te meʼa ʼaē neʼe nātou lau.” (Nehemia 8:8) Ko te tāmai neʼe fua lelei tana tokoni ki tana fānau e toko fitu ke nātou ʼoʼofa kia Sehova, heʼe ʼi muʼa ʼo te fai ʼo te ako faka famili, neʼe ʼalu tuʼumaʼu ki tona kogafale ʼo teuteuʼi pea mo kumi te puani ʼo te ako ʼaē ka ʼaoga ki tana fānau takitokotahi. Neʼe ina fai ke leleiʼia e tana fānau te ako. ʼE fakamatala fēnei e te tahi ʼo tana ʼu tama kua lahi: “Neʼe fakafiafia tuʼumaʼu te ako. Kapau neʼe mātou ʼaka fitipolo ʼi tomatou tuʼa fale, pea pāui mātou ki te ako faka famili, neʼe mātou tuku atu aipe tamatou foʼi fiti kae mātou feleleʼi ki fale ki te ako. Neʼe mātou fiafia lahi ʼi te ʼu afiafi ʼaia.”

20. Koteā te fihifihia ʼaē ka tou vakaʼi anai, ʼe feala ke hoko ʼi te akoʼi ʼo te fānau?

²⁰ Neʼe tala fēnei e te tagata fai pesalemo: “Koʼeni ko te ʼu foha ʼe ko he tofiʼa mai ia Sehova; ko te fua ʼo te fatu ʼe ko he fakapale.” (Pesalemo 127:3) ʼE tonu ke tou fakaʼaogaʼi totatou temi pea mo he ʼu faiga moʼo akoʼi tatatou ʼu fānau, pea ko te faʼahi ʼaia ʼe feala ke faka ʼuhiga ko te maʼuli heʼegata ki tatatou kau tūpulaga. ʼE ko he fakapale lahi anai! Koia, ʼofa pe ke tou faʼifaʼitakiʼi lahi ia Sehova mokā tou akoʼi tatatou ʼu fānau. Logola ʼe maʼua ki te ʼu mātuʼa ke nātou “ako [te fānau] ke nātou maʼu te akonaki pea mo te manatu ʼa Sehova,” kae ʼe mole feala ke tou ʼui papau ʼe fua lelei anai. (Efeso 6:4, MN ) Tatau aipe peʼe tou tokakaga fakalelei, kae ʼe feala ke liliu he tamasiʼi ʼo agatuʼu pea mole kei fia tauhi kia Sehova. Koteā ʼaē ʼe tonu ke tou fai ʼi te faʼahi ʼaia? ʼE tou palalau anai kiai ʼi te alatike ka hoa mai.

[Kiʼi nota]

Koteā Takotou Tali?

• ʼE lava faʼifaʼitakiʼi feafeaʼi e te ʼu mātuʼa te ʼofa ʼo Sehova ʼaē ʼe fakamatala ia Teutalonome 32:11, 12?

• Koteā ʼaē neʼe koutou ako ʼi te faʼahiga felogoi ʼa Sehova mo te kau Iselaele?

• Koteā ʼaē ʼe tou ako mai te tali e Sehova ia te kole ʼa Lote?

• Ia Isaia 28:24-29, koteā te ako neʼe koutou tāʼofi ai ʼo ʼuhiga mo te akonakiʼi ʼo te fānau?

[Paki ʼo te pasina 8, 9]

Neʼe fakatatau e Moisese te akonakiʼi e Sehova ʼo tana hahaʼi ki te tokaga ʼa te akuila ki tona ʼu ʼuhi

[Paki ʼo te pasina 10]

ʼE tonu ke fakaʼaogaʼi e te ʼu mātuʼa he temi maʼa tanatou ʼu fānau

[Paki ʼo te pasina 12]

“Neʼe mātou fiafia lahi ʼi te ʼu afiafi ʼaia”