ʼE Tou Lava Tokoni Feafeaʼi Ki He Tamasiʼi “Maumau Koloā”?

“Tou fiafia, koteuhi . . . nee mate pea kua mauli.”—Luka 15:32.

1, 2. (a) E feafeaʼi te aga ʼa ʼihi kau tūpulaga ʼo ʼuhiga mo te moʼoni? (b) E feafeaʼi te loto ʼo te ʼu mātuʼa pea mo te fānau ʼi te ʼu ʼaluʼaga ʼaia?

“ ʼE ʼAU mavae ʼi te moʼoni!” ʼE fakapunamaʼuli ki te ʼu mātuʼa ʼaē ʼe nātou manavasiʼi ki te ʼAtua, tanatou logo ki he ʼu palalau feiā mai hanatou tamasiʼi, he neʼe nātou kinakina ʼi te taupau ʼo tanatou ʼu fānau ʼi te maʼuli faka Kilisitiano! Ko ʼihi kau tūpulaga ʼe nātou kamata “tafea” kae mole nātou fakahā fakahagatonu te ʼu meʼa ʼaē ʼe nātou loto kiai. (Hepeleo 2:1) Tokolahi ia nātou ʼaia ʼe nātou hage ko te foha maumau koloā ʼo te lea fakatātā ʼa Sesu, ʼaē neʼe mavae ʼi te loto fale ʼo tana tāmai, pea ʼalu ʼo pulihi te ʼu koloā ʼo tona tofiʼa ʼi te fenua mamaʼo.—Luka 15:11-16.

² Logola ʼe mole tokolahi te kau Fakamoʼoni ʼa Sehova ʼaē ʼe tau mo te fihifihia ʼaia, kae kia nātou ʼaē ʼe hoko kiai te faʼahi ʼaia, ʼe mole he fakaloto fīmālie ʼe feala ke ina pulihi katoa tonatou lotomamahi. Pea tou manatuʼi mo te lotomamahi ʼaē ʼe feala ke logoʼi e te tūpulaga ʼuigataʼa. ʼE lagi hoha tona leʼo ʼo loto. ʼI te lea fakatātā ʼa Sesu, ko te foha maumau koloā neʼe “toe mālama” ki muli age, ʼo fiafia ai tana tāmai. ʼE lava tokoni feafeaʼi te ʼu mātuʼa pea mo ʼihi ʼi te kokelekasio, ki te kau tūpulaga fakaʼaoʼaoganoa ke nātou “toe mālama”?—Luka 15:17, MN.

Te Tupuʼaga ʼo Te Mavae ʼa ʼIhi

3. Koteā te ʼu tupuʼaga ʼaē ʼe mavae ai ʼihi kau tūpulaga ʼi te kokelekasio?

³ ʼE ko te toko lauʼi teau afe kau tūpulaga ʼe nātou tauhi fakafiafia kia Sehova ʼi te kokelekasio. Kae he koʼe koa ʼe mavae ʼihi kau tūpulaga? ʼE lagi nātou manatu ʼe nātou hala ʼi te ʼu meʼa ʼaē ʼe foaki e te mālama. (2 Timoteo 4:10) Peʼe lagi nātou manatu ko te puipui ʼa Sehova ʼe fefeka fau. ʼE feala ke mamaʼo he tūpulaga mai te faga ōvi ʼa Sehova heʼe hoha tona leʼo ʼo loto, peʼe holi fau ki he taʼahine peʼe ki he tama, peʼe ina loto ke tali ia ia e tona ʼu kaumeʼa. ʼE mole lagi kei fia tauhi he tūpulaga kia Sehova, heʼe manatu ia neʼe malualoi tana ʼu mātuʼa peʼe ko he tahi Kilisitiano.

4. ʼI te agamāhani, koteā te tupuʼaga tāfito ʼaē ʼe hēʼia ai te kau tūpulaga?

⁴ ʼI te agamāhani, ko te agatuʼu ʼa he tamasiʼi ʼe ko te fakaʼiloga ʼaia ʼo he vaivaiʼaga fakalaumālie, pea ko he fakahā ʼaia ʼo te ʼu meʼa ʼo tona loto. (Tāʼaga Lea 15:13; Mateo 12:34) Tatau aipe peʼe koteā te tupuʼaga ʼo te hēʼia ʼa he tūpulaga, kae ʼi te agamāhani ko tona tupuʼaga tāfito he neʼe mole ina maʼu te “ ʼatamai mālama totonu ʼo te moʼoni.” (2 Timoteo 3:7, MN ) ʼE mole tonu ke tauhi he tūpulaga kia Sehova kae mole ʼalu ai tona loto, kae ʼe maʼuhiga ke maʼu e te kau tūpulaga he ʼu felogoi lelei mo Sehova. Koteā ʼaē ka tokoni kia nātou ke nātou fai te faʼahi ʼaia?

Koutou Fakaōvi Ki Te ʼAtua

5. Koteā ʼaē ʼe maʼuhiga ke feala ai ki he tūpulaga ke felogoi lelei mo te ʼAtua?

⁵ Neʼe tohi fēnei e te tisipulo ko Sakopo: “Koutou fakaovi ki te Atua pea e fakaovi atu anai kia koutou.” (Sakopo 4:8) Moʼo fai te faʼahi ʼaia, ʼe tonu ke kita tokoni ki he tūpulaga ke ina leleiʼia te Folafola ʼa te ʼAtua. (Pesalemo 34:8) ʼI te kamata ʼe ʼaoga anai ki ai “te huapipi”—te ʼu akonaki tāfito ʼa te Tohi-Tapu. Kae ʼi tana leleiʼia te Folafola ʼa te ʼAtua pea mo “te meakai fefeka”—te ʼu manatu loloto fakalaumālie—ʼe aʼu māmālie anai ki te ʼuhiga fakapotopoto fakalaumālie. (Hepeleo 5:11-14; Pesalemo 1:2) Ko te tūpulaga neʼe ina fakamoʼoni neʼe tokaga tāfito ia ki te ʼu meʼa ʼo te mālama, kae neʼe ina kamata leleiʼia te ʼu meʼa fakalaumālie. Koteā ʼaē neʼe tokoni ki ai ke ina fai te fetogi ʼaia? Neʼe mulimuli ki te fakaloto mālohiʼi ʼaē ke ina lau te Tohi-Tapu katoa, pea neʼe ina taupau ai tana polokalama ke ina lau tuʼumaʼu te Tohi-Tapu. Ei, ko te lau tuʼumaʼu ia te Folafola ʼa te ʼAtua ʼe ko he meʼa maʼuhiga ke tou felogoi lelei ai mo Sehova.

6, 7. ʼE lava tokoni feafeaʼi te ʼu mātuʼa ki tanatou ʼu fānau ke nātou manako ki te Folafola ʼa te ʼAtua?

⁶ ʼE ko he meʼa maʼuhiga te tokoni ʼa te ʼu mātuʼa ki tanatou ʼu fānau ke nātou manako ki te Folafola ʼa te ʼAtua! Logola tanatou ako faka famili ʼaē neʼe fai tuʼumaʼu, kae neʼe fakatahi te taʼahine mo te kau tūpulaga agatuʼu. ʼO ʼuhiga mo tanatou ako faka famili, ʼe ina ʼui fēnei: “Ka lagaʼi he ʼu fehuʼi e taku tāmai, pea neʼe ʼau lau pe ʼau te ʼu tali, kae mole ʼau sioʼi ia ia.” ʼE mole tonu pe ke vakaʼi he tohi ʼi te ako faka famili, kae ko te ʼu mātuʼa poto ʼe tonu ke nātou popoto ʼi te faiako. (2 Timoteo 4:2) Ke leleiʼia e he tūpulaga te ako, ʼe tonu ke talanoa ki he ʼu meʼa ʼe ina leleiʼia. He koʼe koa ʼe mole koutou fehuʼi age pe koteā tana manatu pea mo koutou tuku ke palalau? Koutou fakaloto mālohiʼi te tūpulaga ke ina maʼuliʼi te meʼa ʼaē neʼe ina ako.a

⁷ Tahi ʼaē meʼa, ʼe tonu ke fakafiafia te ʼu fai palalau faka Tohi-Tapu. Kapau ʼe feala, pea koutou fakaafe te fānau ke nātou faʼifaʼitakiʼi te ʼu hisitolia ʼaē ʼe fakamatala ʼi te Tohi-Tapu. Koutou tokoni kia nātou ke nātou fakakaukauʼi te ʼu koga meʼa pea mo te agaaga ʼo te fenua ʼaē neʼe hoko ai te ʼu hisitolia ʼaia. ʼE lagi ʼaoga anai kia koutou te ʼu mape. Ei, kapau ʼe koutou fakakaukau lelei, pea ʼe feala ke liliu te ako faka famili ko he meʼa fakafiafia pea mo kehekehe tona faʼahiga fai. ʼE toe maʼua foki ki te ʼu mātuʼa ke nātou vakaʼi tanatou felogoi ʼo nātou totonu mo Sehova. Kapau ʼe nātou fakaōvi kia Sehova, pea ʼe nātou lava tokoni anai ki tanatou ʼu fānau ke nātou fai feiā.—Teutalonome 6:5-7.

8. ʼE tokoni feafeaʼi te faikole ke fakaōvi he tahi ki te ʼAtua?

⁸ Ko te faikole ʼe toe tokoni mai ke tou fakaōvi ki te ʼAtua. Ko te kiʼi finemui neʼe lotohoha, he neʼe mole ina ʼiloʼi peʼe tonu ke ina filifili te maʼuli faka Kilisitiano, peʼe ko tana fakatahi mo tona ʼu kaumeʼa ʼaē neʼe mole lotu tahi mo ia. (Sakopo 4:4) Koteā ʼaē neʼe ina fai? Neʼe ina ʼui fēnei: “Neʼe ko taku ʼuluaki faikole moʼoni ʼaia kia Sehova ʼo ʼuhiga mo te ʼu meʼa ʼaē ʼi toku loto.” Neʼe ina ʼiloʼi neʼe tali ki tana faikole, he neʼe ina maʼu ki muli age ʼi te kokelekasio tona kaumeʼa neʼe feala ke falala ki ai. ʼI tana logoʼi ʼaē neʼe takitaki ia ia e Sehova, neʼe kamata felogoi ai mo te ʼAtua. ʼE feala ke tokoni te ʼu mātuʼa ki tanatou ʼu fānau mo kapau ʼe nātou hikihiki tanatou ʼu faikole. ʼI tanatou faikole faka famili, ʼe feala ke fakahā e te ʼu mātuʼa te ʼu meʼa ʼaē ʼi tonatou loto, ke logoʼi ai e te fānau te felogoi lelei ʼa te ʼu mātuʼa mo Sehova.

Koutou Faʼa Kātaki Kae ʼAua Naʼa Koutou Fakagafua Te Hala

9, 10. Koteā te faʼifaʼitaki ʼaē neʼe tuku e Sehova ʼi tana kātakiʼi fualoa te kau Iselaele ʼuigataʼa?

⁹ Ka kamata hēʼia he tūpulaga, pea ʼe faiga ke nofo tokotahi pea mo fakafeagai ki te faiga ʼo tana ʼu mātuʼa ke fai palalau mo ia ki he ʼu meʼa fakalaumālie. Koteā ʼaē ʼe feala ke fai e te ʼu mātuʼa ʼi te ʼaluʼaga faigataʼa ʼaia? Koutou tokagaʼi te meʼa ʼaē neʼe fai e Sehova ki Iselaele ʼo te temi muʼa. Neʼe ina faʼa kātakiʼi te kau Iselaele ʼaē neʼe “kia fefeka” lolotoga taʼu e 900, ʼi muʼa ʼo tana līaki nātou ʼi tanatou ʼuigataʼa. (Ekesote 34:9; 2 Fakamatala 36:17-21; Loma 10:21) Logola tanatou ‘ ʼahiʼahiʼi tuʼumaʼu ia ia,’ kae “neʼe manavaʼofa” Sehova kia nātou. “Tuʼa lahi neʼe ina lolomi ai tona ʼita, pea neʼe mole ina fakahoko tona ʼita katoa.” (Pesalemo 78:38-42) Neʼe mole lākahala te ʼAtua ʼi tana ʼu felogoi mo nātou. ʼE faʼifaʼitakiʼi e te ʼu mātuʼa ʼofa ia Sehova pea mo nātou faʼa kātaki mo kapau ʼe mole tali atu aipe e te tamasiʼi tanatou tokoni.

¹⁰ Ko he tahi ʼe ʼutaki fualoa peʼe faʼa kātaki, ʼe mole ko tona faka ʼuhiga ʼaia ʼo te “kātaki fualoa”; ko tona faka ʼuhiga ko he tahi ʼe mole ina līaki tana fakaʼamu ʼaē ke fakatokatoka mo ia ʼaē ʼe nā fetokakoviʼaki. Neʼe tuku e Sehova he faʼifaʼitaki ʼo ʼuhiga mo te kātaki fualoa. Neʼe ko ia ʼuluaki ʼaē neʼe ina fekauʼi “liuliuga” he ʼu tagata ʼave logo ki te kau Iselaele. Ko Sehova neʼe “manavaʼofa ki tana hahaʼi,” logola “tanatou fakalainoaʼi te kau ʼave logo ʼa te ʼAtua moʼoni, pea mo nātou meʼa noaʼi tana ʼu palalau.” (2 Fakamatala 36:15, 16) Neʼe ina pāuiʼi te kau Iselaele, ʼo ina ʼui fēnei: “Fakalelei siʼi ʼokotou loto, kae koutou tahi toe liliu mai tona ala ʼaē ʼe kovi.” (Selemia 25:4, 5) Kae neʼe mole maumauʼi e Sehova tana ʼu pelesepeto faitotonu. Neʼe ina fakatotonu ki te kau Iselaele ke nātou “toe liliu mai” ki te ʼAtua pea mo tana ʼu lekula.

11. ʼE lava feafeaʼi ki te ʼu mātuʼa ke nātou kātaki fualoa, kae mole nātou fakagafua te hala ʼa he tamasiʼi neʼe hēʼia?

¹¹ ʼE feala ke faʼifaʼitakiʼi e te ʼu mātuʼa ia Sehova ʼo ʼuhiga mo te tamasiʼi ʼaē ʼe hēʼia, ʼo nātou kātakiʼi fualoa kae mole nātou līaki. ʼE nātou ʼamanaki tuʼumaʼu, pea ʼe feala ai ke nātou taupau hanatou fai palalau mo ia, peʼe nātou toe fakatokatoka tanatou ʼu felogoi. Logola tanatou mulimuli ki te ʼu pelesepeto faitotonu, kae ʼe feala ke nātou pāuiʼi “liuliuga” ke toe liliu mai te tamasiʼi ki te ala ʼo te moʼoni.

Ka Fakamavae He Tamasiʼi

12. Koteā te maʼua ʼa te ʼu mātuʼa ki te tamasiʼi ʼaē kei maʼuli mo nāua, kae kua fakamavae ʼi te kokelekasio?

¹² E feafeaʼi mo kapau ko he tamasiʼi kei maʼuli mo tana ʼu mātuʼa ʼe ina fai hana agahala mamafa, pea ʼe fakamavae ʼi te kokelekasio he neʼe mole fakahemala? Mai tona ʼaluʼaga ʼaē ʼe kei maʼuli mo tana ʼu mātuʼa, ʼe ko tonā maʼua ke nā akoʼi pea mo fakatonutonuʼi ia ia ʼo mulimuli ki te Folafola ʼa te ʼAtua. ʼE lava fakahoko feafeaʼi te faʼahi ʼaia?—Tāʼaga Lea 6:20-22; 29:17.

13. ʼE lava malave feafeaʼi te ʼu mātuʼa ki te loto ʼo tanatou fānau ʼaē ʼe hēʼia?

¹³ ʼE lagi feala—pea ʼe lelei age anai—ke fai te ako pea mo te fakatonutonu ʼaia mokā nā ako tokotahi mo ia te Tohi-Tapu. Ko te tāmai peʼe ko te faʼe ʼe mole tonu anai ke ina fakamāuʼi te logogataʼa ʼa te tamasiʼi, kae ʼe faiga anai ke ina ʼiloʼi te meʼa ʼaē ʼi tona loto. Koteā tona mahaki ʼi te faʼahi fakalaumālie? (Tāʼaga Lea 20:5) ʼE feala koa ke malave takotou ʼu tokoni ki tona loto? Koteā te ʼu vaega faka Tohi-Tapu ʼaē ʼe feala ke fakaʼaogaʼi lelei? ʼE fakapapau fēnei mai e te ʼapositolo ko Paulo: “E mauli te folafola a te Atua, pea e gaue, e masilaʼage i te heleta mata lua fuape, e ulu o kaku ki te vaha o te loto mo te laumalie, ki te u hokoga-hui mo te u gakoi-hui, pea e ina fakamau te u fakakaukau mo te u manatu o te loto.” (Hepeleo 4:12) Ei, ʼe mole tonu pe ke ʼui e te ʼu mātuʼa ki tanatou fānau ke mole nātou toe fai te hala ʼaia. ʼE tonu ke nātou faiga ke nātou kamata faitoʼo pea mo tokaga tuʼumaʼu ki ai.

14. Koteā ʼaē ʼe tonu ke ʼuluaki fai e te tūpulaga ʼaē ʼe hēʼia ke feala hana toe felogoi mo Sehova, pea ʼe lava tokoni feafeaʼi te ʼu mātuʼa ki te tamasiʼi ʼo ʼuhiga mo te faʼahi ʼaia?

¹⁴ Ko te tūpulaga ʼaē ʼe hēʼia ʼe tonu ke ina toe maʼu he ʼu felogoi mo Sehova. Ko te ʼuluaki faʼahi ʼaē ʼe tonu ke ina fai ʼe ko te “fakahemala mo tafoki mai.” (Gaue 3:19; Isaia 55:6, 7) Moʼo tokoni ke fakahemala te tamasiʼi ʼaē ʼe maʼuli ʼi te loto fale, ʼe tonu ki te ʼu mātuʼa ke nā ‘loto lolomi ʼi te meʼa ʼaē ʼe kovi, ke nā ako ʼaki te agavaivai’ te tamasiʼi ʼaē ʼe mole heʼeki lotolelei. (2 Timoteo 2:24-26) ʼE tonu ke nā “fakatonutonuʼi” ia ia ohage ko tona fakahā ʼi te Tohi-Tapu. Ko te kupu “fakatonutonuʼi” ʼi te faka Keleka ʼe feala ke toe fakaliliu fēnei: “Ke foaki he fakamoʼoni moʼo fakalotoʼi.” (Apokalipesi 3:19; Soane 16:8) Koia, ko te fakatonutonuʼi ʼe faka ʼuhiga ki te fakahā ʼo he ʼu fakamoʼoni ʼe feʼauga moʼo fakalotoʼi te tamasiʼi, ke ina ʼiloʼi te kovi ʼo tana aga. ʼE moʼoni, ʼe mole faigafua te faʼahi ʼaia. ʼE feala ki te ʼu mātuʼa ke nā malave ki tona loto, ʼo nā fakaʼaogaʼi te ʼu faʼahi fuli ʼaē ʼe fakatafito ki te Tohi-Tapu moʼo fakalotoʼi tanā tamasiʼi. ʼE tonu ke nā tokoni kia ia ke mahino ʼe tonu ke “fehiʼa ki te meʼa ʼaē ʼe kovi, pea ke . . . manako ki te meʼa ʼaē ʼe lelei.” (Amosi 5:15) ʼE feala ke toe “tafoki mai, mai te mata kupega a te temonio.”

15. Koteā te ʼaoga ʼo te faikole moʼo tokoni ki he tahi neʼe hēʼia ke toe felogoi mo Sehova?

¹⁵ ʼE maʼuhiga te faikole, mo kapau ʼe kita fia felogoi mo Sehova. ʼE mahino ia, ʼe mole tonu ke kita “faikole” maʼa he tahi neʼe kau ki muʼa atu ʼi te kokelekasio, kae neʼe agahala pea ʼe mole fakahemala. (1 Soane 5:16, 17; Selemia 7:16-20; Hepeleo 10:26, 27) Kae ko te ʼu mātuʼa ʼe feala ke nātou kole kia Sehova ke ina foaki age kia nātou te poto moʼo fakatokatoka te ʼaluʼaga ʼaia. (Sakopo 1:5) Kapau ʼe fakahemala te tūpulaga ʼaē kua fakamavae, kae mole lava palalau “fakahagatonu ki te ʼAtua,” pea ʼe feala ki te ʼu mātuʼa ke nā faikole ki te ʼAtua, pea kapau ʼe sio ifo te ʼAtua ʼe feala ke ina fakamolemole te hala ʼa te tamasiʼi, pea ke ina fakahoko Tona finegalo. (1 Soane 3:21) Kapau ʼe logo te tūpulaga ki te ʼu faikole feiā, pea ʼe tokoni anai kia ia ke ina faka ʼuhiga ia Sehova ko he ʼAtua loto manavaʼofa.b—Ekesote 34:6, 7; Sakopo 5:16.

16. ʼE tou lava tokoni feafeaʼi ki te ʼu famili ʼo te tūpulaga ʼaē neʼe fakamavae?

¹⁶ Ka fakamavae he tūpulaga kua papitema, pea ʼe tonu ki te kokelekasio ke “aua te fakatahi” mo ia. (1 Kolonito 5:11; 2 Soane 10, 11) ʼE feala ke tokoni te faʼahi ʼaia ke “toe mālama,” pea ke toe liliu mai ki te faga ōvi ʼaē ʼe puipui e te ʼAtua. (Luka 15:17, MN ) Tatau aipe peʼe toe liliu mai peʼe kailoa, kae ʼe feala kia nātou ʼi te kokelekasio ke nātou fakaloto mālohi te famili ʼo te tūpulaga ʼaē kua fakamavae. Ko tatou fuli ʼe feala ke tou kumi te ʼu faigamālie moʼo fakahā te “agalelei” pea mo tou “manavaofa” kia nātou.—1 Petelo 3:8, 9.

Te Tokoni ʼAē ʼe Feala Ke Tou Foaki

17. Koteā ʼaē ʼe tonu ke manatuʼi e te kokelekasio mokā nātou faiga ke nātou tokoni ki he tūpulaga kua vaivai ʼi te faʼahi fakalaumālie?

¹⁷ E feafeaʼi ʼo ʼuhiga mo he tūpulaga ʼe mole fakamavae ʼi te kokelekasio kae kua liliu ʼo vaivai? Neʼe tohi fēnei e te ʼapositolo ko Paulo: “Kapau e mamahi he logoʼagasino, pea e mamahi fakatahi mo ia te u logoʼagasino katoa.” (1 Kolonito 12:26) ʼE feala ke tokoni ʼihi ki te tūpulaga ʼaia. ʼE mahino ia, ʼe tonu pe foki ke tokakaga koteʼuhi ko he tūpulaga kua vaivai ʼi te faʼahi fakalaumālie, ʼe feala ke ina fakaneke he tahi kau tūpulaga ki he aga ʼe kovi. (Kalate 5:7-9) ʼI te tahi kokelekasio, neʼe ʼi ai te ʼu hahaʼi kua fotutuʼa, neʼe nātou fia tokoni moʼoni ki te ʼu tūpulaga neʼe kua vaivavai ʼi te faʼahi fakalaumālie, pea neʼe nātou fakaafe ke nātou fakatahitahi moʼo fai mahōlō. Logola neʼe tali leleiʼi e te kau tūpulaga ʼaia te fakaafe, pea mo nātou fiafia ai, kae neʼe mole fua lelei tanatou fakakaugā ʼaia, heʼe ki muli age neʼe mole kei nātou fakatahi mo te kokelekasio. (1 Kolonito 15:33; Suta 22, 23) Ko te meʼa ʼaē ʼe feala ke tokoni ke toe lelei he tamasiʼi ʼi te faʼahi fakalaumālie, ʼe mole ko te ʼu fakatahitahi ʼaē ʼe mole maʼu ai te takitaki ʼa te ʼAtua, kae ko he fakatahitahi ʼe tokoni ai kia ia ke ina leleiʼia te ʼu meʼa fakalaumālie.c

18. ʼE tou lava faʼifaʼitakiʼi feafeaʼi te aga ʼa te tāmai ʼo te foha maumau koloā ʼi te lea fakatātā ʼa Sesu?

¹⁸ Ka toe liliu mai ki te Fale ʼo te Puleʼaga he tūpulaga neʼe mavae ʼi te kokelekasio peʼe kau ki he fakatahi, koutou fakakaukauʼi age muʼa peʼe feafeaʼi tona loto. ʼE mole tonu koa la ke tou fakahā kia ia te tali lelei ʼaē neʼe fai e te tāmai ʼo te foha maumau koloā ʼi te lea fakatātā ʼa Sesu? (Luka 15:18-20; 25-32) Ko te tūpulaga neʼe mavae ʼi te kokelekasio pea ki muli age neʼe kau ki te fakatahi faka tisitilike, neʼe ina ʼui fēnei: “Neʼe ʼau manatu ʼe mole tokaga anai he tahi ki te faʼahiga hahaʼi ohage ko ʼau, kae ko te ʼu tēhina mo te ʼu tuagaʼane neʼe nātou fakaōvi mai kia ʼau pea mo tali leleiʼi ʼau. Neʼe malave ʼaupito kia ʼau te faʼahi ʼaia.” Neʼe ina toe fai tana ako Tohi-Tapu pea neʼe papitema ki muli age.

ʼAua Naʼa Koutou Tuku

19, 20. He koʼe ʼe tonu ke tou taupau he manatu ʼe lelei ʼo ʼuhiga mo he tamasiʼi ʼe fakaʼaoʼaoganoa?

¹⁹ Ko te tokoni ki he tamasiʼi maumau koloā ke “toe mālama,” ʼe maʼua kiai he faʼa kātaki pea ʼe feala ke faigataʼa ki te ʼu mātuʼa pea mo ʼihi. Kae ʼaua naʼa koutou tuku. “E mole tuai te fakapapau a te Aliki o hage ko te lau a ihi e tuai. E kataki o uhiga mo koutou, e mole loto ia ke mate niʼihi, kae ke tafoki te tagata fuape o fakahemala.” (2 Petelo 3:9) ʼE tou maʼu te fakapapau ʼi te Tohi-Tapu, ʼe loto ia Sehova ke fakahemala te hahaʼi pea ke nātou maʼuʼuli. ʼI tona fakahagatonu, neʼe ko ia ʼaē neʼe ina ʼuluaki fakatuʼutuʼu ke fakatokatoka te hahaʼi mo ia. (2 Kolonito 5:18, 19) Neʼe feala ʼaki tana faʼa kātaki ke mālama te hahaʼi ʼe lauʼi miliona.—Isaia 2:2, 3.

²⁰ ʼE mole tonu ai koa la ke fakaʼaogaʼi e te ʼu mātuʼa te ʼu tokoni faka Tohi-Tapu, moʼo tokoni ki te tamasiʼi ʼaē ʼe fakaʼaoʼaoganoa ke toe mālama? Koutou faʼifaʼitakiʼi ia Sehova, koutou faʼa kātaki fualoa ʼo koutou fai te ʼu faʼahi ʼaē ka tokoni ki takotou tamasiʼi ke toe liliu kia Sehova. Koutou pipiki maʼu ki te ʼu pelesepeto ʼa te Tohi-Tapu, pea koutou faiga ke koutou fakahā te ʼu kalitate ʼo Sehova ohage ko te ʼofa, te faitotonu pea mo te poto, ʼo koutou faikole ke tokoni atu. Ohage pe ko te tokolahi ʼo te hahaʼi ʼaē neʼe lahi tanatou agatuʼu, neʼe nātou tali te fakaafe ʼofa ʼa Sehova ke nātou toe liliu mai, ʼe lagi feala anai ki takotou tama peʼe ko takotou taʼahine ke toe liliu mai ki te faga ōvi ʼaē ʼe puipui e te ʼAtua.—Luka 15:6, 7.

[Kiʼi nota]

ʼE Kei Koutou Manatuʼi Koa?

• Ka mavae te ʼu tūpulaga ʼi te kokelekasio, koteā tona lagi tupuʼaga tāfito?

• ʼE lava tokoni feafeaʼi ki he kau tūpulaga ke nātou felogoi mo Sehova?

• He koʼe ʼe tonu ki te ʼu mātuʼa ke nātou faʼa kātaki kae mole nātou fakagafua te hala mokā nātou tokoni ki he tamasiʼi ʼe fakaʼaoʼaoganoa?

• ʼE lava tokoni feafeaʼi te kokelekasio ki he tamasiʼi ʼe fakaʼaoʼaoganoa ke toe liliu mai?

[Paki ʼo te pasina 15]

ʼE maʼuhiga ke tou lau te Tohi-Tapu ke tou toe felogoi lelei ai mo Sehova

[Paki ʼo te pasina 15]

Ko te ʼu faikole fakamalotoloto ʼa te ʼu mātuʼa ʼe feala ke tokoni ki te fānau ke nātou logoʼi tanatou felogoi lelei mo Sehova

[Paki ʼo te pasina 17]

Tou tali lelei he tamasiʼi fakaʼaoʼaoganoa ʼi te temi ʼaē ʼe “toe mālama” ai

[Paki ʼo te pasina 18]

Koutou fai he ʼu fakatuʼutuʼu lelei moʼo tokoni ki takotou tamasiʼi ke toe liliu mai kia Sehova