Tou Maʼu He Loto ʼe Leleiʼia e Sehova
“Fakatupu ia te ʼau he loto maʼa, Ê ʼAtua, pea ke ke ʼai ia te ʼau he laumālie foʼou, ʼe mālohi.”—Pesalemo 51:10.
1, 2. He koʼe ʼe tonu ke tou tokaga ki totatou loto?
NEʼE ko te tagata lahi pea mo talavou. ʼI tana sio ki ai, neʼe punamaʼuli ʼaupito te polofeta ko Samuele, pea neʼe manatu ai ʼe ko te foha lahi ʼaia ʼo Sese ʼaē neʼe fili e te ʼAtua ke ina fetogi te hau ko Saulo. Kae neʼe ʼui fēnei e Sehova: “ ʼAua naʼa ke tokagaʼi te agaaga [ʼo te tama ʼaia] pea mo tona lahi, he kua ʼau līaki ia ia. . . . Heʼe sio te tagata ki te meʼa ʼaē ʼe hā ki te ʼu mata; kae ko Sehova, ʼe sio ki te ʼuhiga ʼo te loto.” Ki muli age, neʼe fili e Sehova te foha muli ʼo Sese, ko Tavite—ko “he tagata ʼe leleiʼia e tona loto.”—1 Samuele 13:14; 16:7.
2 ʼE lava ʼiloʼi e te ʼAtua te loto ʼo te tagata, ohage ko tana fakahā lelei ki muli age: “Ko ʼau Sehova, ʼe ʼau vakavakaʼi te loto, ʼe ʼau sivisivi te ʼu ifiifi, ei, moʼo foaki ki te tagata takitokotahi ʼo mulimuli ki tona ʼu ala, ʼo mulimuli ki te fua ʼo tana ʼu aga.” (Selemia 17:10) Ei, “ko Sehova ʼe ko ia ʼaē ʼe ina sivisivi te ʼu loto.” (Tāʼaga Lea 17:3) Kae koteā ʼaē ʼe sivisivi e Sehova ʼi te loto ʼo te tagata? Pea koteā ʼaē ʼe feala ke tou fai ke tou maʼu he loto ʼe ina leleiʼia?
“Te ʼUhigaʼi Tagata Fufū ʼAē ʼo Te Loto”
3, 4. Koteā te ʼuluaki faka ʼuhiga ʼo te kupu “loto” ʼaē ʼe fakaʼaogaʼi ʼi te Tohi-Tapu? Koutou tuku mai he ʼu faʼifaʼitaki.
3 Ko te kupu “loto” ʼe hā tuʼa afe ʼi te Tohi-Tapu. ʼE fakaʼaogaʼi tāfito ʼi hona ʼaluʼaga fakatātā. Ohage la, neʼe ʼui fēnei e Sehova ki te polofeta ko Moisese: “Tala ki te ʼu foha ʼo Iselaele, ke nātou toʼo maʼaku he meʼa ʼofa: ʼI te ʼu tagata fuli ʼaē ʼe uga nātou e tonatou loto ʼe koutou toʼo anai mai ia nātou taku meʼa ʼofa.” Pea ko te kau foaki meʼa ʼofa, “neʼe nātou ʼōmai ai, ia nātou fuli ʼaē neʼe uga e ʼonatou loto.” (Ekesote 25:2; 35:21) ʼE hā lelei mai, ko te loto fakatātā ʼe ina uga he tahi—pea ʼe ko te mālohi ʼaē ia tatou ʼe ina uga ke tou fai he meʼa. ʼE toe hā te ʼuhiga ʼo totatou loto ʼi te ʼu meʼa ʼaē ʼe tou logoʼi, mo tatatou ʼu holi pea mo te ʼu meʼa ʼaē ʼe tou ʼofa ai. ʼE feala ke fonu te loto ʼi te ʼita peʼe ko te mataku, ke lotomamahi peʼe fiafia. (Pesalemo 27:3; 39:3; Soane 16:22; Loma 9:2) ʼE feala ke fialahi peʼe agavaivai, ke ʼofa peʼe fehiʼa.—Tāʼaga Lea 16:5; Mateo 11:29; 1 Petelo 1:22.
4 ʼO toe feiā, ko te “loto” ʼe tau fakapipiki ki te ʼu meʼa ʼaē ʼe ina uga he tahi pea mo te ʼu meʼa ʼe ina logoʼi, kae ko te “laumalie” ʼe pipiki tāfito ia ki te ʼatamai. ʼE ko te faka ʼuhiga ʼaia ʼo te ʼu kupu ʼaia mokā fakaʼaogaʼi fakatahi ʼi he vaega Tohi-Tapu. (Mateo 22:37; Filipe 4:7) Kae ʼe mole fakakeheʼi tuʼumaʼu te loto pea mo te laumālie. Ohage la, neʼe uga fēnei e Moisese ia te kau Iselaele: “ ʼE tonu ke ke fakamanatuʼi ki tou loto [“ ʼE tonu ke ke manatuʼi ʼi tou ʼatamai,” nota ʼi te lalo pasina] ko Sehova ʼe ko te ʼAtua moʼoni.” (Teutalonome 4:39) Ki te kau sekelipa ʼaē neʼe nātou fonofono moʼo fakafeagai kia ia, neʼe ʼui fēnei e Sesu: “He koʼe ʼe koutou mahalohalo kovi ʼi ʼokotou loto?” (Mateo 9:4, MN ) Ko te ʼu kupu “mālama,” “ ʼatamai,” pea mo te “fakakaukau” ʼe toe feala pe ke faka ʼuhiga ki te loto. (1 Hau 3:12; Tāʼaga Lea 15:14; Maleko 2:6) Koia ko te loto, ʼe feala ke toe pipiki kiai totatou ʼatamai—tatatou ʼu manatu peʼe ko tatatou mālama ki he meʼa.
5. Koteā te faka ʼuhiga ʼo te loto fakatātā?
5 Ohage ko tona ʼui e te tohi, ʼe faka ʼuhiga te loto “ki te koga tāfito ʼo te ʼu potu fuli ʼo te maʼuli, pea ʼe ina fakatātā te meʼa ʼaē ʼi te loto ʼo te tagata ʼaē ʼe ʼiloga ʼi te ʼu faʼahi kehekehe fuli ʼo tana ʼu gāue, ʼo te ʼu meʼa ʼaē ʼe holi kiai, ʼo te ʼu meʼa ʼaē ʼi tona loto, tana ʼu manatu, te ʼu meʼa ʼaē ʼe fakaʼamu kiai, ʼaē ʼe moemisi kiai, tona poto, tona ʼatamai, tona faiva, te ʼu meʼa ʼaē ʼe tui kiai pea mo te ʼu meʼa ʼaē ʼe fakakaukau kiai, te ʼu meʼa ʼaē ʼe ina tāʼofi ʼi tona ʼatamai pea mo te meʼa ʼaē ʼe ina ʼiloʼi.” ʼE ina fakatātā totatou ʼuhiga moʼoni ʼaē ʼi loto, “te ʼuhigaʼi tagata fufū ʼaē ʼo te loto.” (1 Petelo 3:4) ʼE ko te faʼahi ʼaia ʼaē ʼe sioʼi pea mo sivisivi e Sehova. Koia neʼe feala ke faikole fēnei ai ia Tavite: “Fakatupu ia te ʼau he loto maʼa, Ê ʼAtua, pea ke ke ʼai ia te ʼau he laumālie foʼou, ʼe mālohi.” (Pesalemo 51:10) ʼE tou lava maʼu feafeaʼi he loto ʼe maʼa?
“Ke Tokagaʼi e Tokotou Loto” Te Folafola ʼa Te ʼAtua
6. Koteā te fakaloto mālohi neʼe foaki e Moisese ki Iselaele ʼi tanatou nonofo ʼi te Mafa ʼo Moape?
6 ʼI tana fakatotonu ʼaē ki te ʼu foha ʼo Iselaele ke nātou fakatahitahi ʼi te Mafa ʼo Moape ʼi muʼa ʼo tanatou hū ki te Kele ʼo Te Fakapapau, neʼe ʼui fēnei e Moisese: “Ke tokagaʼi e tokotou loto te ʼu folafola fuli ʼaē neʼe ʼau fakatokagaʼi atu kia koutou ʼi te ʼaho nei, ke koutou fakatotonu age ki tokotou ʼu foha ke nātou tokakaga ʼo maʼuliʼi te ʼu folafola fuli ʼo te lao ʼaia.” (Teutalonome 32:46) Neʼe tonu ki te kau Iselaele ke nātou “tokagaʼi lelei.” (Knox) Ke feala hanatou akoʼi te ʼu fakatotonu ʼa te ʼAtua ki tanatou ʼu fānau, neʼe tonu kia nātou totonu ke nātou ʼiloʼi lelei te ʼu fakatonutonu ʼaia.—Teutalonome 6:6-8.
7. Koteā te faka ʼuhiga ke ‘tokagaʼi e totatou loto’ ia te Folafola ʼa te ʼAtua?
7 Ke tou maʼu he loto ʼe maʼa, ʼe tonu ke tou maʼu te ʼatamai mālama totonu ʼo ʼuhiga mo te finegalo pea mo te ʼu fakatuʼutuʼu ʼa te ʼAtua. Ko te matapuna pe e tahi ʼo te ʼatamai mālama ʼaia, ʼe ko te Folafola ʼa te ʼAtua. (2 Timoteo 3:16, 17) Kae ko te mahino ki te ʼatamai mālama ʼaia ʼe mole feʼauga moʼo tokoni kia tatou ke tou maʼu he loto ʼe leleiʼia e Sehova. Ke hū te ʼatamai mālama ʼaia ki totatou ʼuhiga moʼoni ʼo loto, ʼe tonu ke tou ‘gāueʼi totatou loto’ ke ina tali, peʼe “ke hū ki [totatou] loto” te ʼu meʼa ʼaē ʼe tou ako. (Teutalonome 32:46, An American Translation) ʼE hoko feafeaʼi te faʼahi ʼaia? ʼE fakamahino fēnei e te tagata fai pesalemo: “Neʼe ʼau manatuʼi te ʼu ʼaho ki muʼa atu; neʼe ʼau metitasio ki tau ʼu gāue fuli; ʼaki he lotolelei neʼe ʼau fia tokagaʼi tuʼumaʼu te ʼu gāue ʼo tou ʼu nima.”—Pesalemo 143:5.
8. Ka tou ako, pea koteā te ʼu fehuʼi ʼe feala ke tou fai?
8 ʼE tonu mo tatou ke tou metitasio ʼaki he loto fakafetaʼi ki te ʼu gāue ʼa Sehova. Ka tou lau te Tohi-Tapu peʼe ko te ʼu tohi faka Tohi-Tapu, pea ʼe tonu ke tou fai te ʼu fehuʼi ʼaenī: ‘Koteā ʼaē ʼe ʼau akoʼi ai ʼo ʼuhiga mo Sehova? Koteā te ʼu kalitate ʼo Sehova ʼaē ʼe fakahā mai ʼi henī? Koteā ʼaē ʼe ʼau akoʼi ai ʼo ʼuhiga mo te ʼu meʼa ʼaē ʼe leleiʼia e Sehova pea mo te ʼu meʼa ʼaē ʼe mole ina leleiʼia? Koteā te ʼu meʼa ʼe feala ke hoko mo kapau ʼe ʼau fai te aga ʼaē ʼe leleiʼia e Sehova pea mo kapau ʼe ʼau fai te aga ʼaē ʼe fehiʼa kiai? Koteā te pikipikiga ʼo te manatu ʼaenī pea mo te ʼu meʼa ʼaē kua ʼau ʼiloʼi?’
9. He koʼe ʼe maʼuhiga te ako takitokotahi pea mo te metitasio?
9 ʼE fakamahino e Lisa,a ʼaē ʼe taʼu tolugofulu-ma-lua, pe neʼe feafeaʼi tana mahino ki te maʼuhiga ʼo te ako pea mo te metitasio: “ ʼI taku ʼosi papitema ʼi te taʼu 1994, neʼe lahi taku gāue ʼi te moʼoni lolotoga taʼu e lua. Neʼe ʼau kau ki te ʼu fono fuli, neʼe ʼau fai faka mafola hola e 30 peʼe 40 ʼi te māhina fuli, pea neʼe ʼau fakatahitahi mo te kau Kilisitiano. Kae neʼe ʼau kamata hēʼia. Neʼe ʼau kamata tōtō māmālie ʼo aʼu ki taku maumauʼi te lao ʼa te ʼAtua. Kae neʼe ʼau toe mālama, pea neʼe ʼau fakatotonu ke ʼau fakamaʼa toku maʼuli. Neʼe ʼau fiafia lahi ʼi te tali e Sehova toku loto fakahemala pea ke ʼau toe liliu mai! Neʼe ʼau tau feʼekeʼaki fēnei: ‘He koʼe neʼe ʼau hēʼia feiā?’ Ko taku tali tuʼumaʼu kiai, ko taku mole fai ʼo haku ako pea mo metitasio lelei. Neʼe mole malave te moʼoni ʼo te Tohi-Tapu ki toku loto. Talu mai ai, ko taku ako tokotahi pea mo taku metitasio kua maʼuhiga tuʼumaʼu ki toku maʼuli.” ʼI tatatou tuputupu ʼi tatatou ʼatamai mālama ʼo ʼuhiga mo Sehova, mo tona ʼAlo, pea mo tana Folafola, ʼe maʼua ke tou fakaʼaogaʼi he temi moʼo metitasio!
10. He koʼe ʼe maʼuhiga ke tou fakaʼaogaʼi he temi ki te ako takitokotahi pea mo te metitasio?
10 ʼI te mālama maʼumaʼua ʼaenī, ʼe faigataʼa te maʼu ʼo he temi ki te ako pea mo te metitasio. Kae ia ʼaho nei ʼe ʼamanaki hū te kau Kilisitiano ki te Kele ʼo Te Fakapapau ʼe taulekaleka—te mālama foʼou faitotonu ʼa te ʼAtua. (2 Petelo 3:13) Kua vave hoko mai te ʼu meʼa fakatalakitupua, ohage ko te maumauʼi ʼo “Papiloni Lahi” pea mo te ʼohofi e “Koke ʼo Makoke” te hahaʼi ʼa Sehova. (Apokalipesi 17:1, 2, 5, 15-17, MN; Esekiele 38:1-4; 14-16; 39:2) Ko te ʼu meʼa ʼaē ʼe ʼamanaki hoko mai ʼe nātou ʼahiʼahiʼi ai totatou ʼofa ʼaē kia Sehova. ʼE maʼuhiga ke tou totogi te temi faigamālie, pea ke tokagaʼi e totatou loto te Folafola ʼa te ʼAtua!—Efeso 5:15, 16.
‘Teuteuʼi Tokotou Loto Moʼo Vakaʼi Te Folafola ʼa Te ʼAtua’
11. ʼE tatau feafeaʼi totatou loto mo he kele?
11 Ko te loto ʼe feala ke fakatatau ki te kele ʼaē ʼe lava to ai te pulapula ʼo te moʼoni. (Mateo 13:18-23) ʼI te agamāhani ʼe gāueʼi te kele ke feala ke tuputupu lelei te meʼa ʼaē neʼe to kiai. ʼO toe feiā, ko te loto ʼe tonu ke teuteuʼi ke faigafua age tana tali te Folafola ʼa te ʼAtua. Ko Esitalasi te pelepitelo “neʼe [ina] teuteuʼi . . . tona loto moʼo vakavakaʼi te lao ʼa Sehova, pea ke ina maʼuliʼi.” (Esitalasi 7:10) ʼE tou lava teuteuʼi feafeaʼi totatou loto?
12. Koteā ʼaē ka tokoni anai ke tou teuteuʼi totatou loto ki te ako?
12 Ko te faikole ʼe ina teuteuʼi lelei totatou loto mokā tou vakaʼi te Folafola ʼa te ʼAtua. Ko te ʼu fono faka Kilisitiano ʼa te kau atolasio moʼoni ʼe kamata pea mo fakaʼosi ʼaki he faikole. ʼE lelei ke tou kamata tatatou ako Tohi-Tapu takitokotahi ʼaki he faikole fakamalotoloto, pea ke tou aga fakaʼapaʼapa lolotoga ʼo tatatou ako!
13. Ke tou maʼu he loto ʼe leleiʼia e Sehova, koteā ʼaē ʼe tonu ke tou fai?
13 ʼE tonu ke tou teuteuʼi totatou loto ke ina līaki te ʼu manatu neʼe tou maʼu ʼi te temi muʼa. Neʼe mole fia fai e te kau takitaki lotu ʼo te temi ʼo Sesu te faʼahi ʼaia. (Mateo 13:15) Kae ko Malia, faʼe ʼa Sesu, neʼe metitasio “i tona loto” ki te ʼu moʼoni ʼaē neʼe logo kiai. (Luka 2:19, 51) Neʼe liliu ko he tisipulo agatonu ʼa Sesu. Ko Litia ʼo Tiatile neʼe fakalogo kia Paulo, pea “nee fakaʼava e te Aliki tona loto ke fakalogo.” Neʼe toe liliu mo ia ko he tisipulo ʼa Sesu. (Gaue 16:14, 15) ʼOfa pe ke mole tou pipiki mālohi ki tatatou ʼu manatu takitokotahi, peʼe tou leleiʼia he ʼu akonaki faka lotu. Kae tou tuku ke “ ʼiloʼi ʼe moʼoni te ʼAtua, kae ʼiloʼi ʼe loi te tagata fuli pe.”—Loma 3:4, MN.
14. ʼE tou lava teuteuʼi feafeaʼi totatou loto ke fakalogo ʼi te ʼu fono faka Kilisitiano?
14 ʼE maʼuhiga tāfito ke tou teuteuʼi totatou loto ke fakalogo ʼi te ʼu fono. ʼE feala ke fakaleluʼi tatatou fakalogo e te ʼu temi fakafiafia, ʼo mole kei tou tokagaʼi te manatu ʼaē ʼe talanoa mai kiai. ʼE mole ʼaoga anai kia tatou te ʼu manatu ʼaia, mo kapau ʼe tou hoha ki te ʼu meʼa ʼaē neʼe hoko ʼi te ʼaho peʼe tou hoha ki te ʼapogipogi. ʼE tonu ke tou fakatotonu mālohi ke tou fakalogo pea mo ako mo kapau ʼe tou loto ke ʼaoga kia tatou te ʼu akonaki. ʼE lahi te ʼu lelei ʼe feala ke tou maʼu mo kapau ʼe tou lotomālohi ke tou mahino ki te ʼu vaega ʼaē ʼe fakahā mai pea mo tonatou fakamahino!—Nehemia 8:5-8, 12.
15. ʼE tokoni feafeaʼi mai te agavaivai ke faigafua te akoʼi ʼo tatou?
15 Ohage pe ko te liliu ʼo te kele ʼo lelei ʼaki te fakagakokele, ʼo toe feiā pe, ko te maʼu ʼo te agavaivai, mo te fia kai ʼi te faʼahi fakalaumālie, mo te tui, mo te manavasiʼi, pea mo te ʼofa ʼo te ʼAtua ʼe feala ke lelei ai totatou loto. Ko te agavaivai ʼe ina fakamalū te loto, ʼo tokoni mai ke faigafua tatatou ako. Neʼe ʼui fēnei e Sehova ki te Hau Sutea ko Sosiasi: “Koteʼuhi neʼe malū tou loto ʼo ke agavaivai ʼuhi ko Sehova, ʼi tau logo ki taku palalau . . . pea neʼe ke kamata tagi ʼi ʼoku muʼa, pea ko ʼau, neʼe ʼau logo kiai.” (2 Hau 22:19) Neʼe agavaivai pea mo tali gafua te loto ʼo Sosiasi. ʼUhi ko tanatou agavaivai, neʼe feala ai ki te kau tisipulo ʼa Sesu ʼaē neʼe “ko he u tagata kaifenua nee mole ako,” ke nātou mahino pea mo maʼuliʼi te ʼu moʼoni fakalaumālie ʼaē neʼe mole feala ke mahino kiai “te kau poto mo te kau atamai.” (Gaue 4:13; Luka 10:21) ʼOfa pe ke tou “fakamālaloʼi ifo ia tatou ia muʼa ʼo totatou ʼAtua” ʼo tou faiga ke tou maʼu he loto ʼe leleiʼia e Sehova.—Esitalasi 8:21.
16. He koʼe ʼe ʼaoga ke tou faiga lahi ke tou fia kai ki te meʼa kai fakalaumālie?
16 Neʼe ʼui fēnei e Sesu: “Manuʼia ia nātou ʼaē ʼe nātou ʼiloʼi tonatou masiva fakalaumālie.” (Mateo 5:3, MN ) Logola ʼe tou maʼu te holi ki te ʼu meʼa fakalaumālie, kae ko te ʼu faigataʼaʼia ʼo te mālama agakovi ʼaenī peʼe ko ni ʼihi aga ohage ko te piko, ʼe feala ke mole tou tokagaʼi ai te ʼu meʼa ʼaē ʼe ʼaoga kia tatou. (Mateo 4:4) ʼE tonu ke tou fakatuputupu he fia kai ki te meʼa kai fakalaumālie. Tatau aipe peʼe ʼi te kamata ʼe mole tou leleiʼia te lau ʼo te Tohi-Tapu pea mo te ako takitokotahi, kae ʼaki te faʼa kātaki, ʼe tou sio anai ko te ʼatamai mālama ‘ ʼe leleiʼia anai e totatou nefesi,’ pea ʼe tou loto anai ke foimo hoko mai te temi ako.—Tāʼaga Lea 2:10, 11.
17. (a) He koʼe ʼe tāu mo Sehova ke tou falala katoa kia te ia? (b) ʼE tou lava maʼu feafeaʼi te falala ki te ʼAtua?
17 Neʼe fakatotonu fēnei e te Hau ko Salomone: “Falala kia Sehova ʼaki tou loto katoa pea ʼaua naʼa ke falala ki tou ʼatamai totonu.” (Tāʼaga Lea 3:5) Ko te loto ʼaē ʼe falala kia Sehova ʼe ina ʼiloʼi ko te ʼu meʼa fuape ʼaē ʼe Ina kole mai peʼe ina fakatotonu mai ʼi tana Folafola, ʼe faitotonu tuʼumaʼu. (Isaia 48:17) ʼE mahino papau ia, ʼe tāu mo Sehova ke tou falala katoa kia te ia. ʼE ina lava fakahoko ia meʼa fuli pe ʼaē neʼe ina fakatuʼutuʼu ke ina fai. (Isaia 40:26, 29) ʼE moʼoni, ʼe faka ʼuhiga tona huafa “ ʼE Ina Fakahoko,” koia ʼaē ʼe mālohi ai tatatou falala ki tana lava fakahoko ʼo tana ʼu fakapapau! “ ʼE faitotonu ʼi tona ʼu ala fuli pea ʼe agatonu ʼi tana ʼu gāue fuli.” (Pesalemo 145:17) ʼE mahino ia, ke feala hatatou falala kia te ia, ʼe tonu ke tou “ ʼahiʼahi pea mo . . . vakaʼi ko Sehova ʼe lelei,” ʼo tou maʼuliʼi te ʼu meʼa ʼaē ʼe tou ako mai te Tohi-Tapu pea mo fakakaukauʼi tona ʼu fua lelei.—Pesalemo 34:8.
18. ʼE tokoni feafeaʼi mai ia te manavasiʼi fakaʼatua ke tou tali te takitaki ʼa te ʼAtua?
18 ʼE fakahā e Salomone te tahi kalitate ʼe ina fakagafua ai ki totatou loto ke ina tali te takitaki ʼa te ʼAtua. ʼE ina ʼui fēnei: “Manavasiʼi kia Sehova pea mo lītuʼa mai te kovi.” (Tāʼaga Lea 3:7) Neʼe ʼui e Sehova ʼo ʼuhiga mo te Iselaele ʼāfea: “Kanapaula neʼe nātou gāueʼi ʼonatou loto ke nātou manavasiʼi kia te ʼau pea mo nātou taupau tuʼumaʼu taku ʼu fakatotonu fuli, ke fua lelei ai kia nātou pea mo ʼonatou ʼu foha ki he ʼu temi ʼe heʼegata.” (Teutalonome 5:29) Ei, ko nātou ʼaē ʼe manavasiʼi ki te ʼAtua ʼe nātou fakalogo kia te ia. ʼE feala kia Sehova “ke ina fakahā tona mālohi kia nātou ʼaē ʼe katoa tonatou loto kia te ia” pea mo ina tauteaʼi nātou ʼaē ʼe talagataʼa kia te ia. (2 Fakamatala 16:9) ʼOfa pe ke takitaki tatou e te manavasiʼi ki te ʼAtua ʼi tatatou ʼu gāue fuli, mo tatatou ʼu manatu pea mo te ʼu meʼa ʼi totatou loto.
‘Koutou ʼOfa Kia Sehova ʼAki Tokotou Loto Katoa’
19. He koʼe ʼe maʼuhiga te ʼofa ke tali gafua ai e totatou loto te takitaki ʼa Sehova?
19 ʼO lahi age ʼi te tahi ʼu kalitate, ko te ʼofa ʼe ina fakaliliu moʼoni totatou loto ke ina tali gafua te takitaki ʼa Sehova. Kapau ʼe fonu te loto ʼo he tahi ʼi te ʼofa ki te ʼAtua, pea ʼe ina fia ako mālohi ai te ʼu meʼa ʼaē ʼe leleiʼia e te ʼAtua pea mo te ʼu meʼa ʼaē ʼe fehiʼa kiai. (1 Soane 5:3) Neʼe ʼui fēnei e Sesu: “ ʼE tonu ke ke ʼofa kia Sehova, tou ʼAtua, ʼaki tou loto katoa, pea mo tou nefesi katoa, pea mo tou laumālie katoa.” (Mateo 22:37, MN ) ʼOfa pe ke loloto totatou ʼofa ki te ʼAtua, ke liliu ko he agamāhani hatatou fakakaukauʼi tona lotoʼofa, mo tou palalau tuʼumaʼu kia te ia ohage ko hotatou kaumeʼa lelei, pea mo palalau fakamalotoloto ʼo ʼuhiga mo ia ki te hahaʼi.
20. ʼE tou lava maʼu feafeaʼi he loto ʼe leleiʼia e Sehova?
20 Tou manatuʼi: Ke tou maʼu he loto ʼe leleiʼia e Sehova, ʼe tonu ke tou tuku ia te Folafola ʼa te ʼAtua ke malave ki totatou ʼuhiga ʼaē ʼi loto, te tagata ʼaē ʼe fufū ʼo te loto. ʼE tonu ke tou fai he ako takitokotahi ʼo te Tohi-Tapu pea mo metitasio. ʼE tonu ke fai te ʼu faʼahi lelei ʼaia ʼaki he loto kua teuteuʼi—ko he loto kua puli ai te ʼu manatu ʼo te temi ki muʼa atu, ʼe fonu ʼaki he ʼu kalitate ʼe feala ai ke akoʼi tatou! Ei, ʼaki te tokoni ʼa Sehova, ʼe feala ke tou maʼu he loto ʼe leleiʼia e te ʼAtua. Kae koteā ʼaē ʼe feala ke tou fai moʼo hāofaki totatou loto?
[Kiʼi nota]
a Neʼe fetogi te higoa.
ʼE Koutou Tali Feafeaʼi Anai
• Koteā te loto fakatātā ʼaē ʼe sivisivi e Sehova?
• ʼE lava feafeaʼi ke ‘tokagaʼi e totatou loto’ te Folafola ʼa te ʼAtua?
• ʼE tonu ke tou teuteuʼi feafeaʼi totatou loto moʼo ako te Folafola ʼa te ʼAtua?
• ʼI takotou ʼosi vakaʼi te alatike ʼaenī, koteā ʼaē kua koutou lotomālohi ke koutou fai?
[Paki ʼo te pasina 17]
Neʼe leleiʼia e Tavite te metitasio ki te ʼu meʼa fakalaumālie. Kaeā koutou?
[Paki ʼo te pasina 18]
Koutou teuteuʼi tokotou loto ʼi muʼa ʼo takotou ako te Folafola ʼa te ʼAtua