Ko Sehova ʼe Ko Te ʼAtua ʼe Kātaki Fualoa

“Sehova, ʼAtua agaʼofa pea mo manavaʼofa, tuai ʼi te ʼita pea mo mohu ʼi te lotoʼofa.”—Ekesote 34:6.

1, 2. (a) Ko ai ʼi te temi muʼa neʼe fakahā ki ai te kātaki fualoa ʼa Sehova? (b) Koteā te faka ʼuhiga ʼo te kupu “kātaki fualoa”?

KO TE hahaʼi ʼo te temi ʼo Noe, pea mo te kau Iselaele ʼaē neʼe fakalaka ʼi te toafa mo Moisese, pea mo te kau Sutea ʼi te temi ʼo Sesu—ko nātou fuli ʼaia neʼe kehekehe tonatou ʼu ʼaluʼaga. Kae neʼe fakahā aipe e Sehova kia nātou fuli ʼaia tana kātaki fualoa. Ko ʼihi neʼe hāofaki tonatou maʼuli ʼuhi ko te kalitate ʼaia, pea ko te kātaki fualoa ʼa Sehova ʼe ina lava hāofaki mo tatou.

² Koteā te kātaki fualoa? Ko ʼanafea ʼaē neʼe fakahā ai e Sehova te kalitate ʼaia, pea koteā tona tupuʼaga? ʼE faka ʼuhiga te “kātaki fualoa” ohage ko he “vilitute moʼo kātakiʼi he mamahi peʼe ko he meʼa kovi, pea ʼe falala ʼe maui mālie anai he tokakovi.” ʼE fakatuʼutuʼu te kalitate ʼaia ke hoko he meʼa lelei kia ia ʼaē ʼe ina fakatupu te kovi. Kae ʼaua leva naʼa faka ʼuhiga ʼe ina leleiʼia te meʼa ʼaē ʼe kovi, heʼe ka kua hoko te meʼa ʼaē neʼe fakatuʼutuʼu kiai, pea ʼe ʼosi ai leva mo te faʼa kātaki.

3. Neʼe koteā te fakatuʼutuʼu ʼo te kātaki fualoa ʼa Sehova, pea koteā tona ʼu tuʼakoi?

³ Logola ʼe lava kātaki fualoa te tagata, kae ko Sehova ʼe ko te faʼifaʼitakiʼaga māʼoluga ʼo te kalitate ʼaia. Talu mai fualoa ko te agahala neʼe ina maumauʼi te felogoi ʼa Sehova mo te malamanei, kae neʼe fakahā e totatou Tupuʼaga te kātaki fualoa pea mo ina foaki te fakatuʼutuʼu ki te hahaʼi fakahemala, ke feala hanatou hikihiki tanatou felogoi pea mo ia.(2 Petelo 3:9; 1 Soane 4:10) Kae kapau kua hoko te meʼa ʼaē neʼe fakatuʼutuʼu kiai te kātaki fualoa ʼa te ʼAtua, pea ʼe fakafeagai anai kia nātou ʼaē ʼe nātou fai te ʼu meʼa ʼaē ʼe kovi, ʼo ina fakaʼauha te tuʼu agakovi ʼaenī.—2 Petelo 3:7.

ʼE ʼAlutahi Mo Te ʼu Kalitate Tāfito ʼa Te ʼAtua

4. (a) ʼE fakaliliu feafeaʼi ʼi te ʼu Tohi Faka Hepeleo te kupu kātaki fualoa? (Vakaʼi te kiʼi nota ʼi te lalo pasina.) (b) Neʼe koteā te palalau ʼa te polofeta ko Naume ʼo ʼuhiga mo Sehova, pea koteā ʼaē ʼe hā ʼaki ai ʼo ʼuhiga mo te kātaki fualoa ʼa Sehova?

⁴ ʼI te ʼu Tohi Faka Hepeleo, ko te kupu kātaki fualoa ʼe fakaliliu ʼaki te ʼu kupu faka Hepeleo e lua, pea ko tona faka ʼuhiga “ko te loa ʼo te ʼu poga ihu” pea ʼi te Traduction du monde nouveau ʼe fakaliliu fēnei “tuai ʼi te ʼita.”a ʼI tana palalau ʼo ʼuhiga mo te kātaki fualoa ʼa te ʼAtua, neʼe ʼui fēnei e te polofeta ko Naume: “ ʼE tuai ia Sehova ʼi te ʼita pea ʼe lahi ʼaupito tona mālohi, kae ʼe tauteaʼi e Sehova ia te agahala.” (Naume 1:3) Kae ʼe mole faka ʼuhiga leva te kātaki fualoa ʼa Sehova ohage ko he vaivaiʼaga pea mo ʼui ʼe mole he faka tuʼakoi kiai. Ko te ʼui ʼaē ko te ʼAtua māfimāfi ʼe tuai ʼi te ʼita pea mo lahi ʼi te mālohi, ʼe hā ʼaki ai ko tana kātaki fualoa ʼe ko te fua ʼaia ʼo he loto lolomi heʼe ʼi ai tana fakatuʼutuʼu. ʼE ina maʼu te mālohi moʼo fakatūʼa, kae ʼe mole ina fai he tautea fakavilivili koteʼuhi ʼe ina faka fealagia kia ia ʼaē ʼe agakovi ke fetogi. (Esekiele 18:31, 32) Koia ko te kātaki fualoa ʼa Sehova, ʼe ina fakahā ai tona ʼofa pea mo tona poto ʼi tana fakaʼaogaʼi lelei tona mālohi.

5. E feafeaʼi te ʼalutahi ʼo te kātaki fualoa ʼa Sehova pea mo tana faitotonu?

⁵ ʼE toe ʼalutahi te kātaki fualoa ʼa Sehova mo tana faitotonu pea mo tana agatonu. Neʼe ina fakahā kia Moisese ko ia ko te “ ʼAtua agaʼofa pea mo manavaʼofa, tuai ʼi te ʼita [“kātaki fualoa,” King James Version] pea mo mohu ʼi te lotoʼofa pea mo te moʼoni.” (Ekesote 34:6) Hili kiai ni ʼu taʼu, neʼe hiva fakavikiviki ia Moisese kia Sehova, ʼo ina ʼui fēnei: “Ko tona ʼu ala fuli ʼe faitotonu. ʼAtua ʼo te agatonu, ʼaē ʼe mole ia te ia te heʼe faitotonu; ʼe faitotonu pea mo totonu ia.” (Teutalonome 32:4) Ei, ko te agaʼofa ʼa Sehova, mo tana kātaki fualoa pea mo tana faitotonu ʼe nātou ʼalutahi fuli.

Ko Te Kātaki Fualoa ʼa Sehova ʼi Muʼa ʼo Te Tulivio

6. Koteā te fakamoʼoni lahi ʼaē neʼe hā ai te kātaki fualoa ʼa Sehova ki te hōloga ʼo Atama mo Eva?

⁶ Ko te agatuʼu ʼa Atama mo Eva neʼe ina maumauʼi tanā felogoi lelei mo tonā Tupuʼaga ʼofa ko Sehova. (Senesi 3:8-13, 23, 24) Neʼe fua kovi tanā aga ʼaia ki tonā hōloga, he neʼe agahala pea mo mamate ai. (Loma 5:17-19) Logola te agahala ʼaia ʼa te ʼuluaki taumatuʼa, kae neʼe faka fealagia e Sehova ke nā fanaunau. Ki muli age, neʼe ʼofa te ʼAtua ʼo ina foaki te puleʼaki ke feala ai ki te hōloga ʼo Atama mo Eva ke nātou fakatokatoka mo ia. (Soane 3:16, 36) Neʼe fakamahino fēnei e te ʼapositolo ko Paulo: “E fakamooni mai e te Atua tona ofa kia tatou i te temi aeni: nee puluhia Kilisito o uhiga mo tatou, i te temi nee kei tou agahala ai. Koia, i te lakaga nei kua fakatonuhia tatou aki tona taataa, e leleiʼage he fakahao anai tatou aki iaʼia mai te hauhau. Koteuhi, kapau ko tatou ko te u fili o te Atua, nee fakatokatoka tatou mo ia aki te puluhia o tona Alo, pea e leleiʼage, i te fakatokatoka o tatou mo ia, e fakamauli anai tatou aki tona mauli.”—Loma 5:8-10.

7. Neʼe fakahā feafeaʼi e Sehova tana kātaki fualoa ʼi muʼa ʼo te Tulivio, pea he koʼe neʼe lākatonu te fakaʼauha ʼo te taʼiake ʼaia?

⁷ Neʼe fakahā e Sehova tana kātaki fualoa ʼi te temi ʼo Noe. Lolotoga he sēkulō ʼi muʼa ʼo te Tulivio, “neʼe sio te ʼAtua ki te kele pea koʼeni neʼe kua fakalialia, he neʼe kua fakalialia te aga ʼa te hahaʼi fuape ʼi te kele.” (Senesi 6:12) Kae neʼe faka tuʼakoi e Sehova tana kātakiʼi fualoa ia te hahaʼi, he neʼe ina ʼui fēnei: “Ko toku laumālie ʼe mole feiā anai tana aga ki te tagata ʼo talu ai, heʼe toe kakano foki. Koia, ko tona ʼu ʼaho ʼe aʼu anai kia taʼu e teau ʼuafulu.” (Senesi 6:3) ʼI te ʼu taʼu ʼaia e 120, neʼe feala ai ki te tagata agatonu ko Noe ke ina maʼu hona famili—pea neʼe fakahā age e te ʼAtua tana fakatuʼutuʼu—ke ina faʼu te aleka pea mo faka mafola ki te hahaʼi ʼo tona temi, heʼe hoko mai anai te Tulivio. Neʼe tohi fēnei e te ʼapositolo ko Petelo: “I te temi nee tatali ai te kataki [ko te kalitate ʼe pipiki ki te kātaki fualoa] a te Atua ia aho o Noe, nee ina fau te Aleka pea nee lavaki natou nee heka ai, ko te toko valu, nee fakamauli i te vai.” (1 Petelo 3:20) Pea neʼe mole hū te hahaʼi ki te aleka koteʼuhi “neʼe mole nātou fakatokagaʼi” te faka mafola ʼa Noe. (Mateo 24:38, 39, MN ) ʼI tana lolotoga faʼu te aleka, lagi ko Noe neʼe ko te “tagata faka mafola faitotonu” lolotoga ni ʼu taʼu, koia neʼe ko he temi faigamālie ʼaia neʼe tuku e Sehova ki te hahaʼi ʼo te temi ʼo Noe ke nātou fakahemala mai tanatou ʼu agamālohi pea mo nātou tafoki ʼo tauhi kia te Ia. (2 Petelo 2:5, MN; Hepeleo 11:7) Koia neʼe lākatonu te fakaʼauha ʼaē neʼe ʼamanaki hoko ki te taʼiake agakovi ʼaia.

Ko He Faʼifaʼitaki ʼi Tana Kātakiʼi Fualoa Ia Iselaele

8. Neʼe feafeaʼi te kātakiʼi fualoa e Sehova ia te puleʼaga ʼo Iselaele?

⁸ Neʼe laka age ia taʼu e 120, te kātakiʼi fualoa e Sehova ia Iselaele. ʼI te ʼu taʼu e 1 500 tupu ʼo tonatou hisitolia ʼi tonatou ʼuhiga hahaʼi ʼa te ʼAtua, neʼe lahi te ʼu temi neʼe ʼahiʼahiʼi ai e te kau Iselaele te kātaki fualoa ʼa te ʼAtua. Hili pe te ʼu kiʼi vāhaʼa ʼi tonatou ʼosi hāofaki mai Esipito, neʼe nātou higa ki te tauhi tamapua, ʼaē neʼe ko he agatuʼu ki tonatou Hāofakiʼaga. (Ekesote 32:4; Pesalemo 106:21) ʼI te hoholo ʼo te temi, neʼe meo te kau Iselaele ʼo ʼuhiga mo te meʼa kai faka milakulo ʼaē neʼe foaki age e Sehova ʼi te toafa, mo muhumuhu ʼo ʼuhiga mo Moisese pea mo Alone, ʼo nātou fakafeagai ai kia Sehova, pea mo fai folonikasio mo te hahaʼi pagani pea mo tauhi kia Paale. (Faka au 11:4-6; 14:2-4; 21:5; 25:1-3; 1 Kolonito 10:6-11) Koia neʼe matatonu ai ke fakaʼauha e Sehova tana hahaʼi, kae neʼe ina kātakiʼi fualoa tanatou agatuʼu ʼaia.—Faka au 14:11-21.

9. Neʼe fakahā feafeaʼi e Sehova ʼe ko he ʼAtua ʼe kātaki fualoa ʼi te temi ʼo te kau tuʼi fakamāu pea mo te temi ʼo te ʼu hau?

⁹ ʼI te temi ʼo te kau tuʼi fakamāu, neʼe liuliuga te higa ʼo te kau Iselaele ki te tauhi tamapua. Koteʼuhi ka nātou fai te faʼahi ʼaia, pea neʼe tuku nātou e Sehova ki tonatou ʼu fili. Kae ka nātou fakahemala pea mo kole tokoni ki ai, pea neʼe ina kātakiʼi fualoa nātou pea mo foaki te kau tuʼi fakamāu moʼo hāofaki ʼo nātou. (Kau Fakamāu 2:17, 18) ʼI te temi ʼo te ʼu hau, neʼe tahitahiga te ʼu hau neʼe nātou pipiki katoa kia Sehova. Heʼe māʼiape la mo te temi ʼo te ʼu hau agatonu, neʼe fai māhani e te hahaʼi te tauhi maʼa pea mo te tauhi hala. ʼI te temi ʼaē neʼe fekauʼi ai e Sehova te kau polofeta moʼo fakahā tanatou aga heʼe agatonu ʼaia, neʼe fia fakalogo age te hahaʼi ki te kau pelepitelo aga fakakākā pea mo te kau polofeta loi. (Selemia 5:31; 25:4-7) Koia neʼe fakatagaʼi ai e te kau Iselaele te kau polofeta agatonu ʼa Sehova pea mo nātou matematehi ʼihi polofeta. (2 Fakamatala 24:20, 21; Gaue 7:51, 52) Kae neʼe fakahā aipe e Sehova tana kātaki fualoa.—2 Fakamatala 36:15.

ʼE Mole Puli Te Kātaki Fualoa ʼa Sehova

10. Ko te temi fea ʼaē neʼe gata ai te kātaki fualoa ʼa Sehova?

¹⁰ Kae ʼe hā mai ʼi te hisitolia ʼe ʼi ai te tuʼakoi ʼo te kātaki fualoa ʼa te ʼAtua. ʼI te 740 ʼi muʼa ʼo totatou temi, neʼe ina fakagafua ke fakaʼauha e te kau Asilia te ʼu telepi e hogofulu ʼo te puleʼaga ʼo Iselaele pea mo faka ʼaunofo nātou. (2 Hau 17:5, 6) Pea ʼi te fakaʼosi ʼo te sēkulō ʼaē neʼe hoa mai kiai, neʼe ina fakagafua ke ʼohofiʼi e te kau Papiloni te ʼu telepi e lua ʼo te puleʼaga ʼo Suta pea mo fakaʼauha ia Selusalemi mo tona fale lotu.—2 Fakamatala 36:16-19.

11. Neʼe fakahā feafeaʼi e Sehova tana kātaki fualoa logola tana fakahoko ʼo tana fakamāu?

¹¹ Māʼia mo te temi ʼaē neʼe fakahoko ai e Sehova tana fakamāu ki Iselaele pea mo Suta, kae neʼe mole puli tana kātaki fualoa. ʼAki tana polofeta ko Selemia, neʼe fakakikite e Sehova ʼe toe liliu anai tana hahaʼi ki tonatou fenua, he neʼe ina ʼui fēnei: “ ʼO mulimuli pe ki te kua katoa ʼo te ʼu taʼu e fitugofulu ʼi Papiloni, ʼe ʼau maliu atu anai kia koutou, pea ʼe ʼau fakahoko moʼoni anai taku folafola lelei ʼo ʼuhiga mo koutou, ʼo ʼau toe taki mai koutou ki te fenua nei. ʼE ʼau tuku anai ke koutou maʼu ʼau . . . ʼE ʼau fakamāʼopoʼopo anai takotou kūtuga popūla pea ʼe ʼau fakatahitahi anai koutou mai te ʼu puleʼaga fuli pea mai te ʼu potu fuli ʼaē neʼe ʼau fakamavetevete ai koutou.”—Selemia 29:10, 14.

12. He koʼe ko te liliu ʼa te tokosiʼi ʼo te kau Sutea ki Suta neʼe ko he takitaki ʼaia ʼa te ʼAtua ʼo ʼuhiga mo te haʼu ʼa te Mesia?

¹² Ko te tokosiʼi ʼo te kau Sutea ʼaunofo neʼe toe liliu ki Suta ʼo toe hoko atu te tauhi kia Sehova ʼi te fale lotu ʼaē neʼe toe laga ʼi Selusalemi. ʼI te fakahoko ʼo te ʼu fakatuʼutuʼu ʼa Sehova, neʼe liliu te hahaʼi ʼaia ko te “hahau mai ia Sehova,” ʼo nātou foaki te fakamokomoko pea mo te manuʼia. Neʼe nātou toe lototoʼa pea mo mālolohi ohage “ko he laione ʼi te ʼu manu fekai ʼo te tuvao.” (Mikea 5:7, 8) Ko te meʼa ʼaia, lagi neʼe hoko ʼi te temi ʼo te kau Makape, ʼi te takitaki ʼo te kau Sutea e te famili ʼo te kau Makape ke nātou kapu tonatou ʼu fili mai te Kele ʼo Te Fakapapau, pea mo te toe fakatapu ʼo te fale lotu ʼaē neʼe moamoagaʼi. Koia, neʼe puipui te fenua mo te fale lotu ke feala ki te toega ʼo te hahaʼi agatonu ʼaia ke nātou tali leleiʼi te ʼAlo ʼo te ʼAtua mokā haʼu anai ʼi tona ʼuhiga Mesia.—Taniela 9:25; Luka 1:13-17, 67-79; 3:15, 21, 22.

13. Māʼiape la mo te matehi ʼo tona ʼAlo e te kau Sutea, kae neʼe kātakiʼi fualoa feafeaʼi nātou e Sehova?

¹³ Māʼiape la mo te matehi ʼo tona ʼAlo e te kau Sutea kae neʼe kātaki fualoa aipe e Sehova ia nātou ia taʼu e tolu vaelua, ʼo ina faka fealagia ai ke nātou liliu ko te hāko fakalaumālie ʼo Apalahamo. (Taniela 9:27)b ʼI muʼa pea mo te hili ʼo te taʼu 36 ʼo totatou temi, neʼe tali e ʼihi Sutea te pāui ʼaia, koia neʼe ʼui ai e Paulo ki muli age “kua mau he Toega o faipe ki te filifili a te [“ ʼofa makehe,” MN ].”—Loma 11:5.

14. (a) ʼI te taʼu 36 ʼo totatou temi, ko ai ʼaē neʼe foaki ki ai te pilivilesio ke kau ki te hāko fakalaumālie ʼo Apalahamo? (b) Neʼe fakahā feafeaʼi e Paulo tana loto fakafetaʼi ki te filifili ʼaē e Sehova te hahaʼi ki te Iselaele fakalaumālie?

¹⁴ ʼI te taʼu 36 ʼo totatou temi, ko te hoki foaki ʼaē ʼo te pilivilesio kia nātou ʼe mole Sutea pea ʼe mole poloselite ke nātou kau ki te hāko fakalaumālie ʼo Apalahamo. Ko ia ʼaē neʼe ina tali lelei, neʼe ina maʼu te ʼofa makehe pea mo te kātaki ʼa Sehova. (Kalate 3:26-29; Efeso 2:4-7) ʼI tana loto fakafetaʼi lahi ki te poto pea mo te fakatuʼutuʼu ʼaē neʼe pipiki ki te kātaki fualoa mo manavaʼofa ʼa Sehova he neʼe ina faka fealagia ai ke tānaki katoa te Iselaele fakalaumālie, neʼe ʼui fēnei ai e Paulo: “Siʼi loloto ʼo te koloaʼia pea mo te poto pea mo te ʼatamai mālama ʼo te ʼAtua! Ko ʼana fakamāu ʼe mole feala hona sivisivi pea mole feala ke maʼu tona ʼu ala!”—Loma 11:25, 26, 33, MN; Kalate 6:15, 16.

ʼE Kātaki Fualoa ʼUhi Ko Tona Huafa

15. Koteā te tupuʼaga tāfito ʼo te kātaki fualoa ʼa te ʼAtua, pea koteā te fehuʼi ʼaē neʼe fakamaʼua kiai he temi moʼo fakatokatoka?

¹⁵ He koʼe ʼe kātaki fualoa ia Sehova? ʼUluaki ʼe ina fai moʼo fakavikiviki tona huafa taputapu pea mo faka lākatonuʼi tona pule faʼitaliha. (1 Samuele 12:20-22) Ko te fehuʼi ʼaē neʼe lagaʼi e Satana ʼo ʼuhiga mo te faʼahiga fakaʼaogaʼi e Sehova ʼo Tona pule faʼitaliha neʼe ʼaoga kiai he temi moʼo fakatokatoka lelei ʼi muʼa ʼo te ʼu meʼa fuli ʼaē neʼe ina fakatupu. (Sopo 1:9-11; 42:2, 5, 6) Koia, ʼi te temi ʼaē neʼe gaohi koviʼi ai tana hahaʼi ʼi Esipito, neʼe ʼui fēnei e Sehova kia Falaone: “Koʼeni te tupuʼaga tāfito ʼo taku tuku ia koe ke ke maʼuli: ke ke sio ki toku mālohi pea ke kalagaʼi toku huafa ʼi te kele katoa.”—Ekesote 9:16.

16. (a) Neʼe faka fealagia feafeaʼi e te kātaki fualoa ʼa Sehova ke teuteuʼi he hahaʼi ki tona huafa? (b) ʼE feafeaʼi anai te tāpuhā ʼo te huafa ʼo Sehova pea mo faka lākatonuʼi tona pule faʼitaliha?

¹⁶ Ko te ʼu palalau ʼaē neʼe fai e Sehova kia Falaone, neʼe toe fakaʼaogaʼi e Paulo ʼi te temi ʼaē neʼe ina fakamahino ai te gāue ʼa te kātaki fualoa ʼa te ʼAtua ʼi te faka kolōlia ʼo Tona huafa taputapu. Pea neʼe tohi fēnei e Paulo: “Koia kapau ko te ʼAtua, logola tana fia fakahā ʼo tona hāūhāū pea mo fakaʼilo tona mālohi, neʼe ina kātakiʼi fualoa te ʼu ipu ʼo te hāūhāū ʼaē kua tonu ke maumauʼi, ke feala hana fakahā te koloaʼia ʼo tona kolōlia ki te ʼu ipu ʼo te manavaʼofa ʼaē neʼe ina teuteuʼi fakatomuʼa ki te kolōlia, ia tatou ʼaē neʼe ina pāui mai te kau Sutea, pea mo nātou foki ʼo te ʼu puleʼaga, koteā tatatou tonu kiai? Ohage pe ko tona toe ʼui ia Osea: ‘Ko nātou ʼaenī neʼe mole ko haku hahaʼi, ʼe ʼau fakahigoaʼi anai nātou “ko taku hahaʼi.” ’ ” (Loma 9:17, 22-25, MN ) ʼUhi he ko Sehova neʼe kātaki fualoa, koia neʼe ina lava toʼo ai ʼi te ʼu puleʼaga “he hahai ki tona huafa.” (Gaue 15:14) ʼI te takitaki ʼo tonatou Pule ko Sesu Kilisito, ko te “kau maʼoniʼoni” ʼaia ʼe ko te ʼu kaugā hau ʼo te Puleʼaga ʼaē ka fakaʼaogaʼi anai e Sehova moʼo tāpuhā ʼo Tona huafa lahi pea mo faka lākatonuʼi ʼo Tona pule faʼitaliha.—Taniela 2:44; 7:13, 14, 27; Apokalipesi 4:9-11; 5:9, 10.

ʼE Maʼu Te Hāofaki ʼi Te Kātaki Fualoa ʼa Sehova

17, 18. (a) Ko te ʼaluʼaga fea ʼaē ʼe feala ai ke tou meʼa noaʼi te kātaki fualoa ʼa Sehova? (b) ʼE fakaloto mālohiʼi feafeaʼi tatou ke tou sio ki te kātaki fualoa ʼa Sehova?

¹⁷ Talu mai te agahala olisinale ʼo te malamanei ʼo aʼu mai ki te temi nei, neʼe fakahā aipe e Sehova ko ia ko te ʼAtua ʼe kātaki fualoa. Ko tana kātaki fualoa ʼi muʼa ʼo te Tulivio neʼe ina faka fealagia ke fai he fakatokaga pea mo faʼu te aleka ke hāofaki ai nātou. Kae neʼe ʼi ai te tuʼakoi ʼo tana kātaki, pea neʼe hoko mai leva te Tulivio. Tatau aipe mo te temi nei, ʼe fakahā e Sehova te kātaki fualoa, pea kua loaloaga ʼosi tona faʼa kātaki. Kae ʼaua naʼa tou lotovaivai, heʼe hage leva ʼe tou meʼa noaʼi te kātaki fualoa ʼa te ʼAtua. Neʼe fehuʼi fēnei e Paulo: “Pe e ke fehia ki te koloa o tona manavaofa, mo tana faa tali mo te kataki, i tau mole iloi, pea e taki koe e te manavaofa o te Atua ki te fakahemala?”—Loma 2:4.

¹⁸ ʼE mole he tahi ia tatou, ʼe ina lava ʼiloʼi katoa pe ko temi e fia ʼe ʼaoga ai kia tatou te kātaki fualoa ʼa te ʼAtua moʼo ʼiloʼi papau peʼe hāofaki anai tatou. ʼE tokoniʼi fēnei tatou e Paulo “[ke tou] haga gāue ki [totatou] maʼuli ʼaki te manavasiʼi pea mo te tuʼania.” (Filipe 2:12, MN ) Neʼe faitohi fēnei e te ʼapositolo ko Petelo ki tona kaugā fagona Kilisitiano: “Ko Sehova ʼe mole tuai ʼo ʼuhiga mo tana fakapapau, ohage ko te faka ʼuhiga e ʼihi ia te tuai, kae ʼe faʼa kātaki kia koutou heʼe mole ina loto ke fakaʼauha he tahi kae ʼe loto ia ke aʼu te hahaʼi fuli ki te fakahemala.”—2 Petelo 3:9, MN.

19. He koʼe ʼe ʼaoga kia tatou te kātaki fualoa ʼa Sehova?

¹⁹ Koia, ʼaua naʼa tou hoha ʼo ʼuhiga mo te faʼahiga fakatokatoka e Sehova ʼo te ʼu fihifihia. Kae tou mulimuli ki te tokoni ʼaenī ʼa Petelo pea mo tou “faka ʼuhiga te kātaki fualoa ʼo totatou ʼAliki ko he hāofaki.” Ko ai ʼaē ka hāofaki? Ko tatou pea mo te tokolahi ʼaē ʼe tonu ke nātou fagono ki te “logo lelei . . . ʼo te puleʼaga.” (2 Petelo 3:15, MN; Mateo 24:14, MN ) ʼE tokoni anai kia tatou te faʼahi ʼaia ke tou leleiʼia te manavaʼofa lahi ʼo te kātaki fualoa ʼa Sehova pea mo uga tatou ke tou kātakiʼi fualoa te hahaʼi.

[Kiʼi nota]

ʼE Feala Koa Hakotou Fakamahino?

• ʼI te Tohi-Tapu, koteā te faka ʼuhiga ʼo te kupu te “kātaki fualoa”?

• Neʼe fakahā feafeaʼi e Sehova tana kātaki fualoa ʼi muʼa ʼo te Tulivio, ʼi te ʼosi ʼo te ʼaunofo ʼi Papiloni, pea mo te ʼuluaki sēkulō ʼo totatou temi?

• Koteā te ʼu tupuʼaga tāfito ʼo te kātaki fualoa ʼa Sehova?

• ʼE tonu ke tou faka ʼuhiga feafeaʼi te kātaki fualoa ʼa Sehova?

[Paki ʼo te pasina 9]

Ko te kātaki fualoa ʼa Sehova neʼe ina faka fealagia ai he faigamālie ki te hahaʼi ke nātou fakahemala

[Paki ʼo te pasina 10]

ʼI te ʼosi tō ʼo Papiloni, neʼe fakahā e Sehova tana kātaki fualoa ki te kau Sutea

[Paki ʼo te pasina 11]

ʼI te ʼuluaki sēkulō, neʼe maʼu e te kau Sutea pea mo nātou ʼe mole Sutea te kātaki fualoa ʼa Sehova

[Paki ʼo te pasina 12]

ʼE fakaʼaogaʼi lelei e te kau Kilisitiano ia ʼaho nei te kātaki fualoa ʼa Sehova