ʼU Tagata ʼĀfea—Koutou Akoʼi ʼIhi Ke Nātou Fakahoko Te ʼu Maʼua

ʼI TE ʼu kokelekasio ʼa te kau Fakamoʼoni ʼa Sehova ʼi te malamanei katoa, ʼe ʼaoga lahi he ʼu tagata ki te gāue taupau. ʼE ko tupuʼaga tāfito e tolu ʼo te tuputupu ʼaia.

ʼUluaki, ʼe lolotoga fakahoko e Sehova tana fakapapau ʼaē neʼe ina ʼui ai “ko te tokosiʼi ʼe liliu anai ko te lauʼi afe.” (Isaia 60:22) ʼAki tona ʼofa makehe, ko te teitei tahi miliona kau tisipulo foʼou neʼe papitema ʼo liliu ko he kau Fakamoʼoni ʼa Sehova ʼi te ʼu taʼu ʼaenī e tolu kua hili. ʼE ʼaoga he ʼu tagata ʼe feala hakita falala ki ai, moʼo tokoni ki te hahaʼi foʼou ʼaia kua papitema, ke nātou aʼu ki te fakapotopoto faka Kilisitiano.—Hepeleo 6:1.

Lua, ko ʼihi neʼe tagata ʼāfea lolotoga ni ʼu taʼu kae ʼuhi ko tanatou kua matutuʼa peʼe mahamahaki, kua siʼisiʼi te ʼu gāue ʼaē ʼe nātou fakahoko ʼi te kokelekasio.

Tolu, ko ʼihi tagata ʼāfea faʼafai ʼe nātou kau ʼi te temi nei ki te ʼu Komite Faka Felogoi Mo Te Lopitali, peʼe ko te ʼu Komite Laga Fale Fakakolo, peʼe ko te ʼu Komite ʼo Te ʼu Fale ʼo te ʼu Fakatahi. ʼI ʼihi faʼahi, neʼe tonu ke nātou aga fakapotopoto ʼo nātou tuku ʼihi ʼo te ʼu maʼua ʼaē neʼe nātou maʼu ʼi tonatou kokelekasio.

Koteā ʼaē ʼe feala ke fai ke maʼu he tahi ʼu tagata ʼe nātou lavaʼi te gāue ʼaia? Ko te puleʼaki ki te faʼahi ʼaia ko te akoʼi ʼo ʼihi tagata. ʼE fakaloto mālohiʼi e te Tohi-Tapu te ʼu tēhina taupau ke nātou akoʼi he ʼu “tagata agatonu, ke liliu mo nātou ʼo popoto moʼo akoʼi ʼo ʼihi.” (2 Timoteo 2:2, MN ) Ohage ko tona ʼui e te tikisionalio, ko te kupu “akoʼi” ko tona faka ʼuhiga ko te “akoʼi he tahi ke tāu mo ia, ke mālama kiai, pea mo poto.” Tou vakaʼi peʼe lava akoʼi feafeaʼi e te kau tagata ʼāfea te tahi ʼu tagata ʼe feala hanatou fakahoko te ʼu maʼua ʼaia.

Koutou Mulimuli Ki Te Faʼifaʼitaki ʼa Sehova

ʼE mahino ia ko Sesu Kilisito neʼe ‘tāu pea mo ia, neʼe mālama, pea mo poto’ moʼo fai ʼo te gāue, pea ʼe mole tou punamaʼuli kiai. Neʼe akoʼi totonu ia ia e Sehova ʼAtua. Koteā te ʼu faʼahi ʼaē neʼe fua lelei ai te polokalama ako ʼaia? Neʼe talanoa Sesu kia faʼahi e tolu, ohage ko tona tuʼu ia Soane 5:20: “[1] E ofa te Tamai ki te Alo pea [2] e ina fakaha kia te ia te meafuape e ina fai; e ina fakahaʼage anai [3] he u gaue lalahiʼage.” Kapau ʼe tou vakavakaʼi te ʼu puani takitahi ʼaia, pea ʼe tou maʼu anai he ʼu manatu ʼaoga moʼo akoʼi ʼihi tagata.

Koutou tokagaʼi neʼe ʼuluaki ʼui fēnei e Sesu: “E ofa te Tamai ki te Alo.” Talu mai te kamataʼaga, neʼe feʼofani lahi ia Sehova pea mo tona ʼAlo. ʼE fakahā ia Tāʼaga Lea 8:30 pe neʼe feafeaʼi te felogoi ʼaia: “Neʼe ʼau [Sesu] liliu ai ʼi ʼona tafa [Sehova ʼAtua] ko he tufuga faiva pea neʼe ʼau liliu ko he tahi neʼe ʼofa tāfito ki ai ʼi te ʼaho mo te ʼaho, ʼo ʼau fiafia ʼi ʼona muʼa ʼi te temi fuli pe.” Neʼe ʼiloʼi papau e Sesu ko Sehova neʼe “ ʼofa tāfito” kia te ia. Pea neʼe mole fufū e Sesu tana fiafia ʼi tana gāue ia tafa ʼo tana Tāmai. ʼE ko he meʼa lelei mokā felogoi lelei te kau tagata ʼāfea pea mo nātou ʼaē ʼe nātou akoʼi pea ʼe mole nātou femalualoiʼaki!

Ko te lua puani ʼaē neʼe talanoa kiai Sesu ʼe ko te Tāmai “e ina fakaha kia te ia te meafuape e ina fai.” ʼE fakamoʼoni e te ʼu palalau ʼaia te meʼa ʼaē ʼe ʼui ia Tāʼaga Lea 8:30, ʼaē ko Sesu neʼe “[ia] tafa” ʼo Sehova ʼi te fakatupu ʼo te ʼatulaulau. (Senesi 1:26) ʼE feala ke mulimuli te kau tagata ʼāfea ki te faʼifaʼitaki lelei ʼaia, ʼo nātou gāue fakatahi mo te ʼu tagata faifekau faka minisitelio, ʼo fakahā kia nātou peʼe feafeaʼi te fakahoko lelei ʼo tonatou ʼu maʼua. Kae ʼe mole gata pe ki te ʼu tagata faifekau faka minisitelio foʼou ʼaē ʼe ʼaoga ki ai he tokoni ke nātou tuputupu. E feafeaʼi ki te ʼu tēhina agatonu ʼaē neʼe nātou faiga lolotoga ni ʼu taʼu ke nātou fakahoko he ʼu maʼua ʼi te kokelekasio, kae mole heʼeki fili nātou? (1 Timoteo 3:1) ʼE tonu ke foaki e te kau tagata ʼāfea te tokoni ʼaē ʼe ʼaoga kia nātou aia, ke feala hanatou ʼiloʼi te ʼu faʼahi ʼaē ʼe tonu ke nātou faiga ke hikihiki.

Ohage la, ko he tagata faifekau faka minisitelio ʼe lagi feala hakita falala ki ai, mo tautonu tuʼumaʼu, pea ʼe ina fakahoko lelei tona ʼu maʼua. ʼE lagi ko he tahi ʼe faiako lelei. ʼE lahi te ʼu faʼahi ʼe lagi gāue lelei ai ʼi te kokelekasio. Kae ʼe mole lagi mahino kia ia ʼe fefeka tana ʼu felogoi mo te tahi kau Kilisitiano. Ko te ʼu tagata ʼāfea ʼe nātou fakahā te “agamalu o te poto.” (Sakopo 3:13) ʼE mole agalelei anai koa la te tagata ʼāfea, ʼo palalau age ki te tagata faifekau faka minisitelio ʼaia, ʼo fakahā fakahagatonu age ki ai te aga ʼaia, mo foaki he ʼu faʼifaʼitaki ʼe ʼalutahi mo te faʼahi ʼaia, pea mo foaki he ʼu tokoni ke ina fetogi tana aga ʼaia? Kapau ʼe tokaga te tagata ʼāfea ke ina ‘faka konakonaʼi tana tokoni ʼaki te māsima,’ pea ʼe mahino ia ʼe tali lelei anai tana ʼu tokoni ʼaia. (Kolose 4:6) ʼE mahino ia, ʼe tokoni anai te tagata faifekau faka minisitelio ke fiafia te tagata ʼāfea ʼi tana gāue ʼaia, ʼo fakalogo pea mo tali ia te ʼu tokoni fuli ʼaē ʼe foaki age.—Pesalemo 141:5.

ʼI ʼihi kokelekasio, ʼe foaki e te kau tagata ʼāfea te ako ʼe ʼaoga ke tuputupu ai te kau tagata faifekau faka minisitelio. Ohage la, ʼi tanatou ʼaʼahi te kau mahaki peʼe ko te kau matutuʼa, ʼe nātou kaugā ʼolo mo te kau tagata faifekau faka minisitelio kua feala hanatou fai ia te ʼu faʼahi ʼaia. ʼE feala ke fakamāmāhani ai te ʼu tagata faifekau faka minisitelio ki te gāue tauhi ōvi. ʼE moʼoni, ʼe lahi te ʼu meʼa ʼe feala ke fai e he tagata faifekau faka minisitelio ke tuputupu ʼi te faʼahi fakalaumālie.—Vakaʼi te talanoa ʼaē ʼe tuʼu ʼi lalo, ko tona kupu tāfito “Te ʼu Meʼa ʼAē ʼe Lava Fai e Te ʼu Tagata Faifekau Faka Minisitelio.”

Ko te tolu puani ʼaē neʼe lelei ai te akoʼi ʼo Sesu, he neʼe akoʼi ia ia e Sehova ʼaki te manatu ʼaē ki te ka haʼu. Neʼe ʼui e Sesu ko te Tāmai ʼe ina fakahā anai ki te ʼAlo “he u gaue lalahiʼage.” Ko te ʼu meʼa ʼaē neʼe hoko kia Sesu ʼi tana ʼi te kele neʼe ina faka fealagia kia ia ke ina maʼu he ʼu kalitate ʼe ʼaoga anai kia te ia moʼo fakahoko te ʼu gāue ʼaē ka ina fai ʼi te ka haʼu. (Hepeleo 4:15; 5:8, 9) Ohage la, ʼe ko he maʼua mamafa ʼaē ka foaki kia Sesu—ke ina fakatuʼuake pea mo fakamāuʼi te lauʼi miliale hahaʼi ʼaē kua mamate!—Soane 5:21, 22.

Ka nātou akoʼi te ʼu tagata faifekau faka minisitelio, pea ʼe tonu ki te kau tagata ʼāfea ke nātou manatu ʼi te temi nei ki te ʼu meʼa ʼaē ka ʼaoga anai ʼi te ka haʼu. Logola ʼe kua hage kua feʼauga te ʼu tagata ʼāfea pea mo te ʼu tagata faifekau faka minisitelio moʼo fakahoko te ʼu maʼua ʼi te temi nei, kae ʼe tatau anai koa mokā fakatuʼu he kokelekasio foʼou? ʼE feafeaʼi anai mo kapau ʼe fakatuʼu he tahi ʼu kokelekasio? ʼI te ʼu taʼu e tolu kua hili, neʼe ko kokelekasio foʼou e 6 000 ʼi te malamanei katoa. ʼE ʼaoga lahi ai he ʼu tagata ʼāfea pea mo he ʼu tagata faifekau faka minisitelio ke nātou gāue ʼi te ʼu kokelekasio foʼou ʼaia!

Tagata ʼāfea, ʼe koutou faʼifaʼitakiʼi koa ia Sehova ʼo koutou felogoi lelei mo te ʼu tagata ʼaē ʼe koutou akoʼi? ʼE koutou fakahā koa kia nātou peʼe feafeaʼi te fakahoko ʼo tanatou gāue? ʼE koutou manatu koa ki te ʼu meʼa ʼaē ka ʼaoga ʼi te ka haʼu? Kapau ʼe koutou mulimuli ki te faʼifaʼitaki ʼa Sehova ʼi tana akoʼi ia Sesu, pea ʼe fua lelei anai ki te tokolahi.

ʼAua Naʼa Koutou Tuʼania ʼi Te Foaki ʼo He ʼu Maʼua

Ko te ʼu tagata ʼāfea ʼaē kua māhani ʼi te tokaga ki he ʼu faʼahi maʼuhiga, ʼe lagi mole nātou fia tuku age he ʼu maʼua ki ʼihi. Neʼe lagi nātou faiga ke nātou fai te faʼahi ʼaia ʼi te temi muʼa, kae neʼe mole hona fua. Koia neʼe nātou manatu ai leva, ‘Kapau ʼe koutou loto ke fai fakalelei he gāue, koutou fai e koutou totonu.’ Kae ʼe ʼalutahi koa te manatu ʼaia mo te finegalo ʼo Sehova, ohage ko tona fakahā ʼi te Tohi-Tapu, ke akoʼi e te ʼu tagata ʼaē kua māhani ia nātou ʼaē ʼe mole heʼeki māhani?—2 Timoteo 2:2.

Neʼe lotomamahi ia te ʼapositolo ko Paulo ʼi te temi ʼaē neʼe līaki ai e Soane Maleko tana gāue ʼi Pamefilia pea toe liliu ki tona fenua. (Gaue 15:38, 39) Kae neʼe mole lotovaivai ai Paulo ʼo ina tuku tana akoʼi te tahi ʼu tēhina. Neʼe ina fili te tahi tēhina tūpulaga, ko Timoteo, pea ina akoʼi kia ia te gāue misionea.a (Gaue 16:1-3) ʼI Pelea, neʼe hoko te fakafeagai mālohi ki te kau misionea ʼo mole kei feala kia Paulo ke nofo ai. Koia, neʼe ina tuku ai ia Silasi, te tēhina kua fakapotopoto pea mo Timoteo, ke nā tokaga ki te kokelekasio foʼou ʼaia. (Gaue 17:13-15) ʼE mahino ia neʼe lahi te ʼu meʼa neʼe akoʼi e Silasi kia Timoteo. Ki muli age, ʼi te kua lava fakahoko e Timoteo te tahi ʼu maʼua, neʼe fekauʼi ia ia e Paulo ki Tesalonika moʼo fakaloto mālohiʼi te kokelekasio ʼaē neʼe tuʼu ai.—1 Tesalonika 3:1-3.

Neʼe mole fefeka te felogoi ʼa Paulo pea mo Timoteo. Neʼe nā feʼofaniʼaki lahi. ʼI tana faitohi ki te kokelekasio ʼo Kolonito, neʼe ʼui e Paulo ʼo ʼuhiga mo Timoteo, ʼaē neʼe ina fakatuʼutuʼu ke ina fekauʼi kiai, ʼe ko tana “fanau ofaina mo agatonu i te Aliki.” Neʼe ina toe ʼui fēnei: “ ʼE ina [ia Timoteo] fakamanatu anai kia koutou taku ʼu faʼahiga fai ʼo ʼuhiga mo Kilisito Sesu.” (1 Kolonito 4:17, MN ) Neʼe tali e Timoteo ke akoʼi ia ia e Paulo, ʼo poto ai ʼi te fakahoko ʼo tana ʼu gāue. Neʼe tokolahi te ʼu tēhina tūpulaga neʼe liliu ko he ʼu tagata faifekau faka minisitelio, mo tagata ʼāfea, peʼe taupau feʼaluʼaki he neʼe akoʼi nātou e te ʼu tagata kua māhani pea neʼe nātou tokakaga fakalelei kia nātou, ohage ko tona fai e Paulo kia Timoteo.

ʼU Tagata ʼĀfea, Koutou Akoʼi ʼIhi!

ʼE hoko moʼoni ʼi te temi nei te lea faka polofeta ʼo Isaia 60:22. ʼE fakaliliu e Sehova “te tokosiʼi . . . ko te lauʼi afe.” Ke feala ki te puleʼaga ʼaia ke nofo “mālohi,” ʼe tonu ke fakatuʼutuʼu lelei. ʼU tagata ʼāfea, he koʼe koa ʼe mole koutou vakavakaʼi he tahi ʼu ʼaluʼaga ʼe feala ke koutou akoʼi ai te ʼu tēhina? Koutou tokaga ke ʼiloʼi lelei e te ʼu tagata faifekau faka minisitelio takitokotahi te ʼu fetogi ʼaē ʼe ʼaoga ke nātou fai moʼo tuputupu. Pea ko koutou ʼu tēhina kua papitema, koutou fakaʼaogaʼi lelei te tokaga ʼaē ʼe fai kia koutou. Koutou fakaʼaogaʼi te ʼu faigamālie ʼaē ka tokoni kia koutou ke koutou popoto, mo ʼatamai, pea mo māhani. ʼE mahino ia ʼe tapuakina anai e Sehova te polokalama tokoni ʼofa ʼaia.—Isaia 61:5.

[Kiʼi nota]

[Talanoa ʼo te pasina 30]

Te ʼu Meʼa ʼAē ʼe Lava Fai e Te ʼu Tagata Faifekau Faka Minisitelio

Logola ʼe tonu ke akoʼi e te ʼu tagata ʼāfea te ʼu tagata faifekau faka minisitelio, kae ʼe lahi te ʼu meʼa ʼe feala ke fai e te ʼu tagata faifekau faka minisitelio moʼo tuputupu ʼi te faʼahi fakalaumālie.

—Ko te ʼu tagata faifekau faka minisitelio ʼe tonu ke nātou faʼa gāue pea ʼe feala ke kita falala kia nātou moʼo fakahoko tonatou ʼu maʼua. ʼE tonu ke nātou maʼu he ʼu agamāhani lelei ʼi te ako. ʼE fakalogo tāfito te tuputupu ki te ako pea mo te maʼuliʼi ʼo te ʼu meʼa ʼaē neʼe ako.

—Ka teuteu he tagata faifekau faka minisitelio ke ina fai he akonaki ʼi te fono, pea ʼe kole tokoni anai ki he tagata ʼāfea ʼo ʼuhiga mo te faʼahi ʼaia.

—ʼE lava kole e he tagata faifekau faka minisitelio ki he tagata ʼāfea ke ina sivi fakalelei peʼe feafeaʼi tana fai te akonaki pea mo ina foaki he ʼu tokoni ke tuputupu ai.

ʼE tonu ki te ʼu tagata faifekau faka minisitelio ke nātou kumi, mo tali pea mo maʼuliʼi te ʼu tokoni ʼa te ʼu tagata ʼāfea, pea ko tanatou tuputupu ʼe “ha lelei [anai] ki te hahai fuape.”—1 Timoteo 4:15.