ʼE Takitaki e Kilisito Tana Kokelekasio
“Koʼeni, ʼe ʼau nofo mo koutou ʼi te ʼaho fuli pe, ʼo kaku ki te fakaʼosi ʼo te tuʼu ʼo te ʼu faʼahiga meʼa ʼaenī.”—Mateo 28:20, MN.
1, 2. (a) ʼI tana ʼosi fakatotonu ʼaē ke fai he ʼu tisipulo, koteā ʼaē neʼe fakapapauʼi age e Sesu ki tana kau tisipulo ʼi tona ʼosi fakatuʼuake? (b) Neʼe takitaki feafeaʼi e Sesu te ʼuluaki kokelekasio faka Kilisitiano?
ʼI MUʼA ʼo tana hake ki selo, ko totatou Takitaki ko Sesu Kilisito, neʼe ʼasi ki tana ʼu tisipulo ʼi tona ʼosi fakatuʼuake pea mo ʼui maʼana: “Kua tuku mai kia te ʼau te pule katoa, ʼi te lagi pea mo te kele. Koutou ʼolo pea ke koutou fai ni ʼu tisipulo ʼi te hahaʼi ʼo te ʼu fenua fuli pe, ʼo papitemaʼi ia nātou ʼi te huafa ʼo te Tāmai pea mo te ʼAlo pea mo te laumālie maʼoniʼoni, ʼo koutou ako ia nātou ke nātou mulimuli ki te ʼu meʼa fuli pe ʼaē neʼe ʼau fakatotonu atu kia koutou. Pea koʼeni, ʼe ʼau nofo mo koutou ʼi te ʼaho fuli pe, ʼo kaku ki te fakaʼosi ʼo te tuʼu ʼo te ʼu faʼahiga meʼa ʼaenī.”—Mateo 23:10; 28:18-20, MN.
2 Neʼe mole tuku age pe e Sesu ki tana kau tisipulo te gāue ʼaē ka hāofaki ai te hahaʼi, ʼi tanatou fai ʼo he ʼu tisipulo, kae neʼe ina toe fakapapauʼi age ʼe nofo anai mo nātou. Ko te hisitolia ʼo te kau ʼuluaki Kilisitiano, ʼaē ʼe fakamatala ʼi te Tohi-Tapu ʼi te tohi ʼo Gaue, ʼe ina fakahā lelei mai neʼe tuku age e Kilisito te pule kia nātou moʼo takitaki ia te kokelekasio ʼaē neʼe hoki fakatuʼu age. Neʼe ina fekauʼi age te “tokoni” ʼaē neʼe ina fakapapauʼi age—ia te laumālie maʼoniʼoni—moʼo fakamālohiʼi ia tana kau tisipulo pea mo takitaki tanatou ʼu faiga. (Soane 16:7, MN; Gaue 2:4, 33; 13:2-4; 16:6-10) Ko Sesu, ʼi tona ʼosi fakatuʼuake, neʼe ina fakaʼaogaʼi te kau ʼaselo moʼo lagolago ki tana kau tisipulo. (Gaue 5:19; 8:26; 10:3-8, 22; 12:7-11; 27:23, 24; 1 Petelo 3:22) Tahi ʼaē meʼa, ko totatou Pule neʼe ina takitaki te kokelekasio ʼo ina fakanofo te ʼu tagata faʼafai moʼo gāue ko he kolesi pule.—Gaue 1:20, 24-26; 6:1-6; 8:5, 14-17.
3. Koteā te ʼu fehuʼi ka tou talanoa anai kiai ʼi te alatike?
3 E feafeaʼi ki totatou temi, “te fakaʼosi ʼo te tuʼu ʼo te ʼu faʼahiga meʼa ʼaenī”? ʼE takitaki feafeaʼi e Sesu Kilisito ia te kokelekasio ia ʼaho nei? Pea ʼe tou lava fakahā feafeaʼi ʼe tou tali te takitaki ʼaia?
ʼE ʼi Ai Te Kaugana Agatonu ʼa Te Pule
4. (a) Ko ai “te kaugana agatonu mo fakapotopoto”? (b) Koteā te gāue ʼaē neʼe tuku age e te Pule ke tokaga kiai te kaugana?
4 ʼI tana foaki te fakakikite ʼo ʼuhiga mo te fakaʼiloga ʼo tana ʼi henī, neʼe ʼui fēnei e Sesu: “Ko ai foki te kaugana agatonu mo fakapotopoto nee tuhiʼi e te [“pule,” MN ] ke ina foaki i tona temi te meakai ki [“tana hahaʼi faifekau,” MN ]. Manuia te kaugana alâ, i te tauʼage o tona Aliki, e ina mau anai e lolotoga gaue. Mooni, e au tala atu kia koutou, e ina filifili anai ke pule ki ona koloa fuape.” (Mateo 24:45-47) Ko te “pule” ʼe ko totatou Takitaki, ia Sesu Kilisito, pea neʼe ina fakanofo ia “te kaugana agatonu mo fakapotopoto”—ko te kolesi ʼo te kau Kilisitiano fakanofo ʼi te kele—moʼo tokaga ki tana ʼu meʼa ʼaē ʼi te kele.
5, 6. (a) ʼI te meʼa neʼe hā ki te ʼapositolo ko Soane, koteā ʼaē ʼe fakatātā e “te u tuʼulaga malama e fitu” pea mo “te u fetuʼu e fitu”? (b) He koʼe ʼe ʼui ʼe nofo “te u fetuʼu e fitu” ʼi te nima mataʼu ʼo Sesu?
5 ʼE fakahā ʼi te tohi ʼo Apokalipesi ko te kaugana agatonu mo poto ʼe takitaki e Sesu Kilisito. ʼI te meʼa ʼaē neʼe hā ʼi “te aho o te Aliki,” neʼe sio ia te ʼapositolo ko Soane ki te ʼu “tuʼulaga malama e fitu, pea i te lotomalie o te u tuʼulaga malama nee tuʼu ai he tahi e hage ko he Foha o te tagata” pea “nee ina toʼo i tona nima matau fetuʼu e fitu.” ʼI tana fakamahinohino ia te meʼa neʼe hā kia Soane, neʼe ʼui fēnei e Sesu: “Ko te misitelio aeni o te u fetuʼu e fitu nee ke mamata i toku nima matau mo te u tuʼulaga malama aulo e fitu. Ko te u fetuu e fitu, e ko te u aselo o te u Ekelesia e fitu, pea ko te u tuʼulaga malama e fitu e ko te u Ekelesia e fitu.”—Apokalipesi 1:1, 10-20.
6 ʼE fakatātā e “te u tuʼulaga malama e fitu” te ʼu kokelekasio moʼoni fuli ʼaē ʼe maʼu ʼi “te aho o te Aliki,” ʼaē neʼe kamata ʼi te 1914. Kae e feafeaʼi ki “te u fetuʼu e fitu”? ʼI tona ʼuluaki fakamahino, ʼe nātou fakatātā te kau tagata taupau ʼaē neʼe fakanofo e te laumālie maʼoniʼoni moʼo tokaga ki te ʼu kokelekasio ʼi te ʼuluaki sēkulō.a Neʼe nofo te kau tagata taupau ʼi te nima mataʼu ʼo Sesu—heʼe ina puleʼi pea mo takitaki ia nātou. Ei, neʼe takitaki e Kilisito Sesu ia te kalasi ʼo te tagata kaugana ʼaia. Kae ʼi te temi nei kua tokosiʼi te kau taupau fakanofo ʼaia. E feafeaʼi te takitaki e Kilisito ia te ʼu kokelekasio e toko 93 000 ʼa te kau Fakamoʼoni ʼa Sehova ʼo te malamanei?
7. (a) ʼE fakaʼaogaʼi feafeaʼi e Sesu te Kolesi Pule moʼo takitaki te ʼu kokelekasio ʼi te kele katoa? (b) He koʼe ʼe tou lava ʼui neʼe fakanofo e te laumālie maʼoniʼoni ia te ʼu tagata taupau?
7 Ohage ko te ʼuluaki sēkulō, ʼe ʼi ai te kiʼi kūtuga ko te ʼu tagata faʼafai ʼi te ʼu tagata taupau fakanofo, ʼe nātou faʼufaʼu te Kolesi Pule, pea ʼe nātou fakafofoga ia te tagata kaugana agatonu mo poto. ʼE fakaʼaogaʼi e totatou Takitaki ia te Kolesi Pule ʼaia moʼo fakanofo te ʼu tagata faʼafai ke nātou tagata ʼāfea ʼi tonatou kokelekasio—peʼe ko he kau fakanofo peʼe kailoa. ʼI te ʼaluʼaga ʼaia, ko te laumālie maʼoniʼoni ʼaē neʼe foaki e Sehova ke fakaʼaogaʼi e Sesu, ʼe ʼi ai tona ʼaoga maʼuhiga ʼi te faʼahi ʼaia. (Gaue 2:32, 33) ʼUluaki, ʼe tonu ke fakahoko e te ʼu tagata taupau ʼaia te ʼu lekula ʼaē ʼe fakamaʼua kia nātou ʼi te Folafola ʼa te ʼAtua, he neʼe tohi ʼaki te laumālie maʼoniʼoni. (1 Timoteo 3:1-7; Tito 1:5-9; 2 Petelo 1:20, 21) ʼAki te faikole pea mo te takitaki ʼa te laumālie maʼoniʼoni, ʼe hinoʼi ai pea mo fakanofo ai te ʼu tagata ʼāfea. Pea tahi ʼaē, ʼe fakahā e te ʼu tagata fakanofo ʼaia ʼe nātou maʼu te ʼu fua ʼo te laumālie ʼaia. (Kalate 5:22, 23) Koia ko te tokoni ʼaenī ʼa Paulo ʼe faka ʼuhiga tatau ki te kau tagata ʼāfea fuli, pe neʼe fakanofo peʼe kailoa: “Koutou tokaga kia koutou mo te fagaovi katoa, kua fakanofo koutou e te Laumalie-Maonioni, ko he kau [“tagata taupau,” MN ].” (Gaue 20:28) Ko te ʼu tagata ʼaia neʼe fakanofo, ʼe takitaki nātou e te Kolesi Pule pea ʼe nātou takitaki fakalelei te kokelekasio. ʼAki te faʼahi ʼaia, ʼe nofo ia Kilisito mo tatou ʼi te temi nei pea ʼe ina takitaki te kokelekasio.
8. ʼE fakaʼaogaʼi feafeaʼi e Kilisito ia te kau ʼaselo moʼo takitaki tana kau tisipulo?
8 ʼE toe fakaʼaoga foki e Sesu te kau ʼaselo moʼo takitaki tana kau tisipulo ia ʼaho nei. ʼI te lea fakatātā ʼo te fulumeto pea mo te vao kovi, ko te taʼukai ʼe fai anai ʼi “te fakaʼosi ʼo te tuʼu ʼo te ʼu faʼahiga meʼa ʼaenī.” Ko ai ʼaē ka fakaʼaogaʼi e te Pule moʼo fai te taʼukai? Neʼe ʼui fēnei e Kilisito: “Ko te kau tanaki taukai e ko te kau aselo.” Pea ina toe ʼui fēnei: “E fekauʼi mai anai e te Foha o te tagata tana kau aselo pea e natou tanaki anai ki tuà mai tona Puleaga, ia meafuape nee fakatupu agahala pea mo natou ae nee natou fakahoko te agahala.” (Mateo 13:37-41) Ohage pe ko te ʼaselo ʼaē neʼe ina takitaki ia Filipo ke ina maʼu te enuke Etiopea, ʼe lahi te ʼu fakamoʼoni ʼi te temi nei ʼe fakaʼaogaʼi e Kilisito tana kau ʼaselo moʼo takitaki ia te gāue ʼa te kau Kilisitiano moʼoni ke nātou maʼu te hahaʼi ʼaē ʼe fia logo.—Gaue 8:26, 27; Apokalipesi 14:6.
9. (a) Koteā ʼaē ʼe fakaʼaogaʼi e Kilisito ia ʼaho nei moʼo takitaki ia te kokelekasio faka Kilisitiano? (b) Koteā te fehuʼi ʼe tonu ke tou vakaʼi mo kapau ʼe tou fia maʼu te fua lelei ʼo te takitaki ʼa Kilisito?
9 ʼE fakaloto fīmālie heʼe kita ʼiloʼi ʼe takitaki e Sesu Kilisito ia tana ʼu tisipulo ʼaki te Kolesi Pule, mo te laumālie maʼoniʼoni pea mo te kau ʼaselo. Tatau aipe peʼe tonu ki ʼihi kau Fakamoʼoni ʼa Sehova ke nātou mamaʼo faka temi mo te Kolesi Pule, ʼuhi ko te ʼu fakataga peʼe ko he tahi age tupuʼaga, kae ko Kilisito ʼe ina takitaki anai nātou ʼaki te laumālie maʼoniʼoni pea mo te kau ʼaselo. Kae ʼe hoki fua lelei tana takitaki kia tatou, mo kapau ʼe tou tali te takitaki ʼaia. ʼE tou lava fakahā feafeaʼi ʼe tou tali ia te takitaki ʼa Kilisito?
“Koutou Talagafua . . . Pea Mo Fakalogo”
10. ʼE tou lava fakahā feafeaʼi ʼe tou fakaʼapaʼapa ki te kau tagata ʼāfea ʼaē neʼe fakanofo ʼi te kokelekasio?
10 Neʼe foaki e totatou Pule ki te ʼu kokelekasio “he ʼu meʼa ʼofa ko he ʼu tagata”—“ ʼihi ko te kau fagonogono ʼo te evaselio, ʼihi ko te kau tauhi ōvi pea mo te kau faiako.” (Efeso 4:8, 11, 12, MN ) ʼE hā lelei ʼi tatatou aga pea mo tatatou ʼu gāue peʼe tou tali ke takitaki tatou e Kilisito. ʼE tau mo feʼauga ke tou ‘fakahā he loto fakafetaʼi’ ki te ʼu tagata faʼafai ʼaia neʼe foaki mai e Kilisito. (Kolose 3:15) ʼE tau mo feʼauga ke tou fakaʼapaʼapa kia nātou. Neʼe tohi fēnei e te ʼapositolo ko Paulo: “Ke ʼiloʼi ʼe tau mo he fakaʼapaʼapa lahi ia te kau tagata ʼāfea ʼaē ʼe nātou takitaki lelei.” (1 Timoteo 5:17, MN ) ʼE tou lava fakahā feafeaʼi ia tatatou fakafetaʼi pea mo totatou ʼofa ki te ʼu tagata matutuʼa—te ʼu tagata ʼāfea, peʼe ko te ʼu tagata taupau—ʼi te kokelekasio? ʼE tali fēnei e Paulo: “Koutou talagafua ki outou takitaki pea mo fakalogo kia natou.” (Hepeleo 13:17) Ei, ʼe tonu ke tou talagafua pea mo fakalogo kia nātou, pea mo mulimuli ki te ʼu meʼa ʼaē ʼe nātou fakatotonu mai.
11. He koʼe ko te fakaʼapaʼapa ki te kau tagata ʼāfea ʼe ko he maʼuliʼi ʼo totatou papitema?
11 Ko totatou Takitaki ʼe haohaoa. Ko te ʼu tagata ʼaē neʼe ina foaki ko he ʼu meʼa ʼofa, ʼe mole nātou haohaoa. ʼE feala ke nātou lākahala ʼi ʼihi temi. Kae ʼe maʼuhiga ke tou nofo agatonu ki te fakatuʼutuʼu ʼa Kilisito. Ei, kapau ʼe tou mulimuli ki te meʼa ʼaē neʼe tou fakapapau kiai ʼi tokita papitema, pea ʼe tonu ke tou fakalogo ki te tēhina takitaki ʼaē neʼe fakanofo e te laumālie ʼi te kokelekasio pea mo mulimuli fakalelei ki ai. Ko totatou papitema ‘ ʼi te huafa ʼo te laumālie maʼoniʼoni’ ʼe ko he fakahā ʼi te kaugamālie ʼe tou fakamoʼoni ki te laumālie maʼoniʼoni pea mo tona tuʼulaga ʼi te ʼu fakatuʼutuʼu ʼa Sehova. (Mateo 28:19) ʼAki totatou papitema neʼe tou fakahā ai ʼe tou kaugā gāue mo te laumālie, pea ʼe mole tou fia fai he meʼa moʼo tāʼofi ia tana gāue ʼi te lotolotoiga ʼo te ʼu tisipulo ʼa Kilisito. ʼE maʼuhiga te gāue ʼa te laumālie maʼoniʼoni ʼi te hinoʼi pea mo te fakanofo ʼo te kau tagata ʼāfea, koia ʼe lava koa ke tou agatonu ki tatatou fakapapau mo kapau ʼe mole tou lagolago ki te kau tagata ʼāfea ʼaē neʼe fakanofo ʼi te kokelekasio?
12. Koteā te ʼu faʼifaʼitaki neʼe talanoa kiai ia Suta ʼo ʼuhiga mo te mole fakaʼapaʼapa ki te pule, pea koteā te ako ʼe tou maʼu mai ai?
12 ʼE tuʼu ʼi te Tohi-Tapu te ʼu faʼifaʼitaki moʼo akoʼi tatou ke tou mahino ki te maʼuhiga ʼo te talagafua pea mo te fakalogo. ʼO ʼuhiga mo nātou ʼaē neʼe palalau kovi ki te ʼu tagata ʼaē neʼe fakanofo ʼi te kokelekasio, neʼe fakahā e te tisipulo ko Suta te ʼu fakatokaga e tolu, ʼo ʼui maʼana: “Malaʼia kia nātou, koteʼuhi neʼe nātou muliʼi te ala ʼo Kaino, neʼe nātou higa ʼi te kākā ʼa Palaame ʼuhi ko he totogi, pea neʼe fakaʼauha nātou ʼuhi ko te agatuʼu ʼa Kolea.” (Suta 11, MN ) Neʼe mole tokagaʼi e Kaino te tokoni ʼofa ʼa Sehova pea neʼe mulimuli ki tona loto ʼo ina fakapogi tona tēhina. (Senesi 4:4-8) Logola te ʼu fakatokaga liuliuga ʼaē neʼe fai age ki ai, kae neʼe faiga aipe e Palaame ke faitutuku ki te hahaʼi ʼa te ʼAtua, ke ina maʼu hona totogi. (Faka au 22:5-28, 32-34; Teutalonome 23:5) Neʼe lelei te gāue ʼa Kolea ʼi te hahaʼi ʼo Iselaele, kae neʼe mole feʼauga kia ia te ʼu gāue ʼaia. Neʼe ina lagaʼi he agatuʼu ki te kaugana ʼa te ʼAtua, te tagata agavaivai ʼaupito ko Moisese. (Faka au 12:3; 16:1-3, 32, 33) Neʼe tō te malaʼia kia Kaino, mo Palaame, pea mo Kolea. Ko te ʼu faʼifaʼitaki ʼaia ʼe nātou akoʼi mai ʼe tonu ke tou fakalogo ki te ʼu tokoni ʼa te ʼu tagata takitaki ʼaē ʼe fakaʼaogaʼi e Sehova pea mo tou fakaʼapaʼapa kia nātou!
13. Koteā te ʼu tapuakina ʼaē neʼe fakakikite e te polofeta ko Isaia ʼo ʼuhiga mo nātou ʼaē ʼe nātou fakalogo ki te ʼu tagata ʼāfea?
13 Ko ai ʼaē ʼe mole ina fia maʼu te ʼu lelei ʼo te fakatuʼutuʼu lahi ʼo ʼuhiga mo te ʼu tagata taupau ʼaē ʼe fai e totatou Tagata Takitaki ʼi te kokelekasio faka Kilisitiano? Neʼe fakakikite e Isaia tana ʼu tapuakina, ʼo ʼui maʼana: “Koʼeni! ʼE pule anai he hau ki te faitotonu; pea ki te kau tama ʼaliki, ʼe nātou pule anai ohage ko he ʼu tama ʼaliki ki te faitotonu. Pea ʼe tonu anai ke nātou tahi liliu ko he nonoʼaga mokā matagi pea ko he holaʼaga mokā afā, ohage ko he ʼu kiʼi vaitafe ʼi he potu moamoa, ohage ko te malumalu ʼo he mata maka ʼi he kele kakā.” (Isaia 32:1, 2) Ko te ʼu tagata ʼāfea takitokotahi ʼe tonu ke liliu ko he “nonoʼaga” moʼo puipui pea mo hāofaki. Tatau aipe mo kapau ko te fakalogo ki te takitaki ʼe faigataʼa kia tatou, kae ke tou tokaga ʼo faikole ke tou talagafua pea mo fakalogo ki te pule ʼaē neʼe fakanofo e te ʼAtua ʼi te kokelekasio.
E Feafeaʼi Te Fakalogo ʼa Te Kau Tagata ʼĀfea Ki Te Takitaki ʼa Kilisito
14, 15. Kia nātou ʼaē ʼe nātou takitaki ʼi te kokelekasio, ʼe nātou fakahā feafeaʼi ʼe nātou fakalogo ki te takitaki ʼa Kilisito?
14 Ko te kau Kilisitiano fuli—tāfito ia te kau tagata ʼāfea—ʼe tonu ke nātou mulimuli ki te takitaki ʼa Kilisito. ʼE maʼu e te kau tagata taupau, peʼe ko te kau tagata ʼāfea, te faʼahiga pule ʼi te kokelekasio. Kae ʼe mole nātou faiga ke nātou ‘puleʼi te tui ʼo tonatou ʼu kaugā fagona,’ ʼo nātou fia puleʼi tonatou maʼuli. (2 Kolonito 1:24) ʼE mulimuli te kau tagata ʼāfea ki te ʼu palalau ʼaenī ʼa Sesu: “ ʼE koutou ʼiloʼi ko te ʼu pule ʼo te ʼu puleʼaga ʼe nātou pule faka hau kia nātou pea ko te kau lalahi ʼe nātou fai kia nātou te pule mālohi. Kaʼe mole feiā ʼi te lotolotoiga ʼo koutou.” (Mateo 20:25-27, MN ) Ka fai e te kau tagata ʼāfea tonatou ʼu maʼua, pea ʼe nātou faiga fakamalotoloto ke nātou tauhi te kokelekasio.
15 ʼE fakaloto mālohiʼi fēnei ia te kau Kilisitiano: “Koutou manatui outou takitaki, . . . koutou vakai ki te fua o onatou mauli, koutou faifaitaki tanatou tui.” (Hepeleo 13:7) ʼE mole faʼifaʼitakiʼi e te kau Kilisitiano te kau tagata ʼāfea ʼuhi ko he ʼu tagata takitaki. He neʼe ʼui fēnei e Sesu: “Ko [tokotou] takitaki e tahi ko Kilisito.” (Mateo 23:10) Ko te tui ʼa te kau tagata ʼāfea ʼaē ʼe tonu ke faʼifaʼitakiʼi, koteʼuhi ʼe nātou faʼifaʼitakiʼi tonatou Takitaki moʼoni ko Kilisito. (1 Kolonito 11:1) Koutou fakatokagaʼi te ʼu ʼaluʼaga ʼe faiga ai e te kau tagata ʼāfea ke nātou hage ko Kilisito ʼi tonatou ʼu vāhaʼa mo te kokelekasio.
16. Logola te pule ʼaē neʼe ina maʼu, kae neʼe feafeaʼi te aga ʼa Sesu ki tana kau tisipulo?
16 Logola neʼe māʼoluga age Sesu ʼi te ʼu tagata agahala ʼi te ʼu faʼahi fuli pea mo maʼu te pule makehe mai tana Tāmai, kae neʼe agavaivai ʼi tana ʼu felogoi mo tana ʼu tisipulo. ʼI tana ʼu faiakonaki, neʼe mole ina akoʼi age ki te hahaʼi he ʼu meʼa ʼe faigataʼa fau. Neʼe fakahā e Sesu tona ʼofa pea mo tona manavaʼofa ki tana ʼu tisipulo, ʼo ina tokagaʼi te ʼu meʼa ʼaē ʼe ʼaoga ki te hahaʼi. (Mateo 15:32; 26:40, 41; Maleko 6:31) Neʼe mole ina fakamaʼua he ʼu meʼa faigataʼa ki tana ʼu tisipulo, pea mo tuku he ʼu kavega mamafa kia nātou. (Soane 16:12) Ko Sesu neʼe “agamalu mo agavaivai.” Koia ʼe mole fakapunamaʼuli ai, te tokolahi ʼo te hahaʼi ʼaē neʼe nātou maʼu te fīmālie ia te ia.—Mateo 11:28-30.
17. Ohage ko Kilisito, ʼe tonu ke fakahā feafeaʼi te agavaivai ʼa te kau tagata ʼāfea ʼi tanatou ʼu felogoi mo te kokelekasio?
17 Kapau ko Kilisito ia te Takitaki neʼe agavaivai, pea e feafeaʼi age la kia nātou ʼaē ʼe nātou takitaki ʼi te kokelekasio! Ei, ʼe nātou tokaga naʼa nātou puleʼi fakafefeka ia nātou ʼaē neʼe tuku age ke nātou taupau kiai. Pea ʼe mole nātou “ ʼōmai [ki te hahaʼi] ʼaki te faiva lea mo te poto” moʼo fia hā. (1 Kolonito 2:1, 2, MN ) Kae ʼe nātou faiga ke faigafua pea mo fakamalotoloto tanatou ʼu palalau ki te ʼu moʼoni faka Tohi-Tapu. Tahi ʼaē meʼa, ʼe faiga te kau tagata ʼāfea ke nātou fakapotopoto ʼi te ʼu meʼa ʼaē ʼe nātou fakatuʼutuʼu ki ʼihi pea mo tokagaʼi te ʼu meʼa ʼaē ʼe ʼaoga kia nātou. (Filipe 4:5) ʼE nātou ʼiloʼi ko te hahaʼi fuli ʼe ʼi ai tonatou ʼu tuʼakoi, koia ʼe nātou tokagaʼi te ʼu vaivaiʼaga ʼaia moʼo tokoni ki tonatou ʼu tēhina. (1 Petelo 4:8) Pea ko te kau tagata ʼāfea ʼaē ʼe nātou agavaivai pea mo agamālū ʼe mole ko he ʼu fakaloto fīmālie moʼoni koa? Ei.
18. Koteā te ako ʼe maʼu e te kau tagata ʼāfea mai te tokaga ʼa Sesu ki te tamaliki?
18 Neʼe faigafua ki te hahaʼi fuli hanatou ʼolo kia Sesu, māʼia mo nātou ʼaē neʼe mole faʼa maʼuhiga. Koutou fakatokagaʼi tana tali ʼi te temi neʼe pupulaʼi ai e tana ʼu tisipulo te hahaʼi ʼaē neʼe nātou “ ʼaumai kia te ia te ʼu kiʼi tamaliki.” Neʼe ʼui fēnei e Sesu: “Koutou tukunoaʼi te ʼu kiʼi tamaliki ke ʼōmai kia te ʼau, pea ʼaua naʼa koutou faigaʼi ke koutou tāʼofi ia nātou. . . . Pea neʼe ina toʼo te ʼu tamaliki ʼi ʼona nima pea ina tapuakina ia nātou, ʼo ina hilifaki ʼona nima kia nātou.” (Maleko 10:13-16, MN ) Neʼe lotoʼofa pea mo agalelei ia Sesu, pea neʼe fia ʼōmai te hahaʼi kia te ia. Neʼe mole matataku te hahaʼi ʼi te ʼōmai kia Sesu. Māʼia la mo te tamaliki neʼe nātou leleiʼia ia ia. ʼE tonu ke toe feiā mo te kau tagata ʼāfea, mokā nātou fakahā te ʼofa pea mo te agalelei ki te hahaʼi—tatau aipe mo te tamaliki—ʼe faigafua anai hanatou fakaōvi mai kia nātou.
19. Koteā tona faka ʼuhiga ke kita maʼu “te manatu a Kilisito,” pea koteā te ʼu meʼa ʼaē ʼe fakamaʼua kiai?
19 ʼE faigafua anai te faʼifaʼitakiʼi e te kau tagata ʼāfea ia Kilisito mo kapau ʼe nātou ʼiloʼi lelei ia ia. Neʼe fehuʼi fēnei e Paulo: “Ko ai ae kua ina iloi te manatu a te Aliki, pe ko ai ae e ina tokoniʼi anai iaʼia?” Pea ina toe ʼui fēnei: “Kae kia matou, e matou mau te manatu a Kilisito.” (1 Kolonito 2:16) Ke tou maʼu te manatu ʼa Kilisito ʼe tonu ke tou ʼiloʼi tana manatu pea mo te ʼu agaaga fuli ʼo tona ʼulugaaga, ke tou ʼiloʼi ai pe koteā anai te meʼa ka ina fai ʼi he faʼahiga ʼaluʼaga. Koutou fakakaukauʼi age muʼa mo kapau ʼe koutou ʼiloʼi lelei tokotou Takitaki! Ei, ʼe tonu ke tou lau fakalelei te ʼu Evaselio pea mo fafaga tuʼumaʼu totatou ʼatamai ʼaki te maʼuli ʼo Sesu pea mo tana faʼifaʼitaki. Kapau ʼe muliʼi e te kau tagata ʼāfea ia te takitaki ʼa Kilisito, pea ʼe fia faʼifaʼitakiʼi anai e te kokelekasio ia tanatou tui. Pea ʼe fiafia anai te kau tagata ʼāfea heʼe nātou sisio ki ʼihi ʼi te kokelekasio ʼe nātou mulimuliʼi fakafiafia te ʼu ala ʼo te Tagata Takitaki.
Koutou Haga Mulimuli ʼi Te Takitaki ʼa Kilisito
20, 21. ʼI tatatou kua ōvi ki te mālama foʼou ʼaē neʼe fakapapauʼi mai, koteā te meʼa ʼaē ʼe tonu ke tou fai?
20 ʼE maʼuhiga ke tou fakalogo fuli ki te takitaki ʼa Kilisito. ʼI tatatou kua fakaōvi ki te fakaʼosi ʼo te tuʼu ʼaenī, ʼe tatau totatou temi mo te temi ʼaē neʼe nonofo ai te kau Iselaele ʼi te Mafa ʼo Moape ʼi te taʼu 1473 ʼi muʼa ʼo totatou temi. Neʼe kua nātou ōvi ki te Kele ʼo Te Fakapapau, pea ʼaki ia te polofeta ko Moisese, neʼe ʼui fēnei e te ʼAtua: “Ko koe [Sosue] ʼe ke taki anai te hahaʼi ki te fenua ʼaē neʼe fakapapauʼi e Sehova ʼe ina foaki anai ki tanatou ʼu kui.” (Teutalonome 31:7, 8) Ko Sosue ʼaē neʼe fili ke ina takitaki te hahaʼi. Neʼe tonu ke fakalogo te kau Iselaele ki te takitaki ʼa Sosue ke feala hanatou hū ki te Kele ʼo Te Fakapapau.
21 ʼE ʼui fēnei mai e te Tohi-Tapu: “Ko [tokotou] takitaki e tahi ko Kilisito.” ʼE ko Kilisito pe anai ʼaē ka ina taki tatou ki te mālama foʼou ʼaē neʼe fakapapauʼi mai, ʼaē ka maʼu ai te faitotonu. (2 Petelo 3:13) Koia tou fakatotonu ke tou fakalogo ki tana takitaki ʼi te ʼu koga fuli ʼo totatou maʼuli.
[Kiʼi nota]
a Ko te ʼu “fetuʼu” ʼe mole nātou fakatātā he kau ʼaselo moʼoni. ʼE mahino ia ʼe mole fakaʼaogaʼi anai e Sesu he tagata ke faitohi ki he ʼu laumālie fakapulipuli. Koia ko te ʼu “fetuʼu” ʼe nātou fakatātā te ʼu tagata taupau, peʼe ko te ʼu tagata ʼāfea ʼi te ʼu kokelekasio, ʼaē ʼe faka ʼuhiga e Sesu ohage ko he ʼu tagata ʼave logo. Pea ʼi te Tohi-Tapu ko te mataʼi numelo fitu ʼe faka ʼuhiga ki te meʼa ʼaē kua katoa ʼi te ʼu fakatuʼutuʼu ʼa te ʼAtua.
Kei Koutou Manatuʼi Koa?
• Neʼe taki feafeaʼi e Kilisito te ʼuluaki kokelekasio?
• ʼE takitaki feafeaʼi e Kilisito tana kokelekasio ia ʼaho nei?
• He koʼe ʼe tonu ke tou fakalogo kia nātou ʼaē ʼe nātou takitaki te kokelekasio?
• ʼE lava fakahā feafeaʼi e te ʼu tagata ʼāfea ʼe ko Kilisito tonatou Takitaki?
[Paki ʼo te pasina 15]
ʼE takitaki e Kilisito tana kokelekasio pea ʼe nonofo te ʼu tagata taupau ʼi tona nima mataʼu
[Paki ʼo te pasina 16]
“Koutou talagafua ki outou takitaki pea mo fakalogo kia natou”
[Paki ʼo te pasina 18]
Neʼe agalelei ia Sesu pea neʼe faigafua ia te fakaōvi kia te ia. ʼE faiga te kau tagata ʼāfea ke nātou hage ko ia