ʼE Koutou Lava ʼUtakiʼi Te Nofo Tokotahi

KO AI ʼaē ʼe ina lava ʼui neʼe mole heʼeki ina ʼiloʼi te mamahi ʼo te nofo tokotahi? ʼE lahi te ʼu faʼahi ʼe tou lava logoʼi ai tatatou nofo tokotahi. Kae ʼe logoʼi tāfito te nofo tokotahi e te hahaʼi fafine ʼaē ʼe mole heʼeki ʼohoana, peʼe ko te hahaʼi fafine vitua peʼe kua mavete mo tonatou ʼohoana.

Ohage la, ʼe fakamatala fēnei e Frances, ko he taʼahine Kilisitiano: “ ʼAki te temi neʼe kua ʼau taʼu 23, pea neʼe kua ʼohoana toku ʼu kaumeʼa fuli, kae neʼe kei toe pe ia ʼau tokotahi.”a ʼE feala ki he tahi ke ina logoʼi tana nofo tokotahi ʼi te fakalaka ʼo te ʼu taʼu pea mo te mole kei ʼi ai he tahi ke nā ʼohoana. ʼE fakamoʼoni fēnei mai e Sandra ʼaē kua taʼu 40 tupu, “neʼe mole ʼau fakatuʼutuʼu ke ʼau nofo selipatea, pea ʼe kei ʼau fia ʼohoana mo kapau ʼe ʼi ai he faigamālie.” ʼE ʼui fēnei e Angela, ʼaē kua taʼu 50: “Neʼe mole ʼau fia nofo selipatea, kae ʼe feiā te maʼuli. Neʼe tokosiʼi te ʼu tuagaʼane selipatea ʼi te koga meʼa ʼaē neʼe ʼau gāue pionie makehe ai.”

Ko te meʼa ʼaē ʼe lelei, heʼe tokolahi te hahaʼi fafine ʼe nātou filifili ke ʼaua naʼa nātou ʼohoana koteʼuhi ʼe nātou fia mulimuli fakalelei ki te tokoni ʼa Sehova ke nātou ʼohoana “ ʼi te ʼAliki pe.” (1 Kolonito 7⁠:​39, MN ) Ko ʼihi ʼe nātou tali lelei te nofo selipatea, kae maʼa ʼihi ʼe haʼu pe te temi mo tanatou holi mālohi ke nātou ʼohoana pea mo maʼu fānau. ʼE fakamoʼoni fēnei e Sandra: “Ko te fihifihia ʼaē ʼe tau tuʼumaʼu mo ʼau, ʼi toku loto, ko te mole maʼu ʼo hoku ʼohoana.”

ʼE feala ke lēsili age takita logoʼi te nofo tokotahi ʼuhi ko he tahi ʼu faʼahiga meʼa ohage ko te taupau ʼo te ʼu mātuʼa ʼaē kua matutuʼa. ʼE ʼui fēnei e Sandra: “Mai tona ʼaluʼaga ʼaē ʼe kei ʼau selipatea, maʼa toku famili ʼe mata tonu age ke ʼau tokaga ki tamatou ʼu mātuʼa ʼaē kua matutuʼa. Lolotoga taʼu e 20 neʼe ʼau ʼamo te maʼua mamafa ʼaia, logola neʼe mātou toko ono fānau. Neʼe lagi feala pe ke faigafua age toku maʼuli mo kanapaula neʼe ʼi ai hoku ʼohoana, ke ina tokagaʼi te ʼu meʼa ʼaē ʼe ʼau loto kiai.”

ʼE talanoa ia Frances ki te tahi meʼa ʼe ina fakamamafa tana nofo tokotahi. ʼE ina fakamatala fēnei: “ ʼI ʼihi temi ʼe fehuʼi fakahagatonu mai e te hahaʼi, ‘He koʼe koa ʼe mole heʼeki ke ʼohoana?’ ʼAki te taʼi palalau ʼaia ʼe hage ia ʼe tupu taku nofo selipatea heʼe ko taku hala. Teitei pe ʼi te ʼu fai ʼohoana fuli ʼe ʼau kau ai, ʼe fai mai e he tahi te fehuʼi fakatupu tuʼania ʼaenī, ‘Ko ʼāfea koa ʼaē ka ke ʼohoana ai?’ Pea ʼe ʼau kamata fakakaukau fēnei, ‘Kapau ʼe mole tokagaʼi ʼau e te ʼu tuagaʼane fakalaumālie, pea ʼe lagi mole ʼau maʼu te ʼu kalitate faka Kilisitiano ʼaē ʼe tāu mo te potu ʼaia, peʼe lagi mole fia fai he tahi kia ʼau.’ ”

ʼE lava feafeaʼi ki he tahi ke ina lava ʼutakiʼi tana nofo tokotahi? Kapau ʼe ʼi ai he faʼahiga meʼa ʼe lava fai e niʼihi, koteā la hanatou faʼahiga tokoni?

Koutou Falala Kia Sehova

Neʼe hiva fēnei te tagata fai pesalemo: “Tuku tau kavega kia Sehova totonu, pea ko ia totonu ʼe lagolago anai kia te koe. ʼE mole ina fakagafua anai ke tūkia ia ia ʼaē ʼe faitotonu.” (Pesalemo 55⁠:22) Ko te kupu “kavega” ʼi te Faka Hepeleo ʼe faka ʼuhiga ki he “vaega,” pea ʼe feala pe ke faka ʼuhiga ki te ʼu tuʼania ʼaē ʼe tau mo tatou ʼuhi ko totatou maʼuli. ʼE mole ʼi ai he tahi ʼe mahino lelei age ia Sehova ki tatatou ʼu kavega ʼaia, pea ʼe ina lava foaki mai te mālohi ke tou tauʼi te ʼu fihifihia ʼaia. Ko te meʼa ʼaē neʼe tokoni kia Angela ke ina ʼutakiʼi tana nofo tokotahi, neʼe ko tana falala kia Sehova ʼAtua. ʼI tana palalau ki tana gāue temi katoa, ʼe ina fakamatala fēnei: “ ʼI te temi ʼaē neʼe ʼau kamata pionie ai, ko toku hoa mo ʼau neʼe ma nonofo mamaʼo ʼi te kokelekasio. Neʼe ma ako ia te falala katoa kia Sehova, pea ko te maʼuli fakalogo ʼaia ʼaē neʼe tokoni mai kia ʼau ʼi toku maʼuli katoa. Kapau ʼe ʼi ai haku ʼu manatu kovi, pea ʼe ʼau palalau kia Sehova pea ʼe tokoni mai. Ko te Pesalemo 23 neʼe ko he fakaloto fīmālie tuʼumaʼu kia ʼau, pea ʼe ʼau lau liuliuga.”

Neʼe ʼi ai te kavega mamafa neʼe tonu ke ʼamo e te ʼapositolo ko Paulo. Tuʼa tolu, neʼe ‘faikole ki te ʼAliki ke toʼo te tala ʼi tona kakano.’ Neʼe mole ʼi ai he tokoni faka milakulo neʼe fai kia Paulo, kae neʼe fakapapau age ʼe lagolago anai kia ia te ʼofa makehe ʼa te ʼAtua. (2 Kolonito 12⁠:​7-9) Neʼe toe ʼiloʼi pe foki e Paulo ia te maʼuli faka feʼauga. Neʼe ina tohi fēnei ki muli age: “Ia meʼa fuli pea mo te ʼu ʼaluʼaga fuli, neʼe ʼau ako te meʼa fakalilo ʼaē ko te mākona ʼo feiā aipe mo te pakupaku, te meʼa fakalilo ʼaē ko te maʼuli ʼi te mahu ohage pe ko te maʼuli ʼi te faigataʼaʼia. ʼE ʼau maʼu te mālohi kia meʼa fuli, ʼuhi ko ia ʼaē ʼe ina foaki mai te mālohi.”​—Filipe 4⁠:​12, 13, MN.

E feafeaʼi hakita lava maʼu te mālohi ʼa te ʼAtua mokā kita lotovaivai peʼe kita logoʼi takita nofo tokotahi? Neʼe tohi fēnei e Paulo: “ ʼAua naʼa koutou tuʼania ki he meʼa, kae ʼi te faʼahi fuli, ʼaki te faikole pea mo te ʼu kole mamahi ʼaki te fakafetaʼi, koutou fakahā ki te ʼAtua takotou ʼu kole; pea ko te tokalelei ʼa te ʼAtua, ʼaē ʼe māʼoluga ake ʼi te ʼu manatu fuli, ʼe ina taupau anai tokotou ʼu loto pea mo tokotou ʼu ʼatamai ʼaki ia Kilisito Sesu.” (Filipe 4⁠:​6, 7, MN ) Neʼe maʼuliʼi e Sandra ia te tokoni ʼaia. ʼE ina fakamahino fēnei: “ ʼI taku nofo selipatea, ʼe lahi toku temi maʼa ʼaku. ʼE lahi toku faigamālie ke ʼau faikole ai kia Sehova. ʼE ʼau logoʼi ʼe ʼau ōvi ʼaupito kia te ia, pea ʼe ʼau lava palalau faʼifaʼitaliha age ki ai ʼo ʼuhiga mo toku ʼu fihifihia mo toku ʼu fiafia.” Pea ʼe ʼui fēnei e Frances: “ ʼE ʼau tauʼi tuʼumaʼu taku ʼu manatu ʼaē ʼe kovi. Kae ko he tokoni lahi kia ʼau te fakahā fakahagatonu kia Sehova ia te ʼu meʼa ʼi toku loto. ʼE ʼau tui papau ʼe tokaga ia Sehova ki he faʼahiga meʼa pe ʼe feala ke malave ki toku maʼuli fakalaumālie pea mo te ʼu meʼa ʼi toku loto.”​—1 Timoteo 5⁠:⁠5.

“Koutou Kātaki ʼo Feʼamoʼaki Takotou ʼu Kavega”

ʼI te fale tautēhina faka Kilisitiano, ʼe mole tonu ke tou ʼamo tokotahi tatatou ʼu kavega. Neʼe fai e te ʼapositolo ko Paulo te tokoni ʼaenī: “Koutou kātaki ʼo feʼamoʼaki takotou ʼu kavega, pea ke koutou fakahoko feiā te lao ʼa Kilisito.” (Kalate 6⁠:​2, MN ) ʼAki totatou ʼu tēhina faka Kilisitiano, ʼe tou lava maʼu ai “he palalau lelei” mo fakaloto mālohi, ʼe ina lava fakamaʼamaʼa tatatou nofo tokotahi.​—Tāʼaga Lea 12⁠:⁠25.

Koutou fakatokagaʼi mo te meʼa ʼaē ʼe ʼui e te Tohi-Tapu ʼo ʼuhiga mo te ʼofafine ʼo Sefeteo, te tuʼi fakamāu ʼo Iselaele. ʼI muʼa ʼo tana mālo ʼi te kau Amonite, neʼe fakapapau e Sefeteo ʼe ina foaki anai kia Sehova ia ia ʼaē ʼe ʼuluaki haʼu mai tona loto fale ʼo fakafetaʼi kia te ia. Pea ko tona ʼofafine ʼaē neʼe ʼuluaki hū mai ki tuʼa. (Kau Fakamāu 11⁠:​30, 31, 34-36) Ko tona faka ʼuhiga maʼa tona ʼofafine, neʼe tonu ke nofo selipatea pea ke ʼaua naʼa manatu ʼe ina maʼu anai hona famili, pea neʼe tali lelei e te taʼahine te fakapapau ʼaia pea neʼe gāue ʼi te sagatualio ʼi Silo ʼi tona maʼuli katoa. Neʼe tokagaʼi koa tana sakilifisio? Ei: “ ʼI te taʼu fuli neʼe ʼolo te ʼu taʼahine ʼo Iselaele ʼo fakavikiviki ki te ʼofafine ʼo Sefeteo te Kileate, ia ʼaho e fā ʼi te taʼu.” (Kau Fakamāu 11⁠:40) Ei, ko te fakavikiviki ʼe ina lava fakaloto mālohiʼi ia nātou ʼaē ʼe fai age ki ai te potu ʼaia. Koia, tou fakavikiviki tuʼumaʼu kia nātou ʼaē ʼe tāu mo te faʼahi ʼaia.

ʼE toe lelei foki ke tou tokagaʼi te faʼifaʼitaki ʼa Sesu. Logope neʼe mole ko he agamāhani ʼa te kau Sutea ke fai palalau te hahaʼi tagata pea mo te hahaʼi fafine, kae neʼe toʼo e Sesu tona temi ke fai palalau mo Malia pea mo Maleta. ʼE mahalo ia neʼe lagi ko he ʼu fafine vitua peʼe ko he ʼu fafine neʼe mole heʼeki ʼohoana. Kae neʼe loto e Sesu ke nā maʼu tatau te ʼu lelei fakalaumālie ʼi te fakakaumeʼa mo ia. (Luka 10⁠:​38-42) ʼE tou lava mulimuli ki te faʼifaʼitaki ʼa Sesu, ʼo tou fakaafe totatou ʼu tuagaʼane fakalaumālie ʼaē mole heʼeki ʼohoana ki tatatou ʼu kiʼi fakafiafia, peʼe tou fai he ʼu fakatuʼutuʼu ke tou fai faka mafola mo nātou. (Loma 12⁠:13) ʼE nātou leleiʼia koa te taʼi tokaga ʼaia? Neʼe ʼui fēnei e te tuagaʼane: “ ʼE ʼau ʼiloʼi ko te ʼu tuagaʼane ʼe nātou ʼoʼofa pea mo leleiʼia ia ʼau, kae ʼe ʼau fakafetaʼi mokā makehe tanatou tokakaga ʼaē kia ʼau.”

ʼE fakamahino fēnei e Sandra: “Mai te ʼaluʼaga ʼaē ʼe mole he tahi ʼe ʼa kita totonu, koia ʼaē ʼe ʼaoga lahi ai kia mātou ke ʼofainaʼi mātou, ke mātou logoʼi ʼe mātou kau ki he famili ʼo he ʼu tēhina mo tuagaʼane fakalaumālie.” ʼE mahino mai, ʼe tokaga ia Sehova kia nātou ʼaia, pea ʼe tou gāue tahi mo ia ʼo tou faigaʼi ke nātou logoʼi ʼe tou tokagaʼi pea mo ʼoʼofa kia nātou. (1 Petelo 5⁠:​6, 7) ʼE mole ʼalunoa te taʼi ʼofa ʼaia, koteʼuhi “ko ia ʼaē ʼe ina fakahā te ʼofa kia ia ʼe veliveli, ʼe ina tokagaʼi ia Sehova, pea ko Ia [ia Sehova ʼAtua] ʼe ina liufaki anai kia ia.”​—Tāʼaga Lea 19⁠:⁠17.

“E Tahi Fua’pe Anai e Te Tagata Tana Kavega Totonu”

Logope ʼe lava tokoni ʼihi kia nātou ʼaia, pea mo ʼaoga tanatou tokoni moʼo fakaloto mālohi, kae “e tahi fua’pe anai e te tagata tana kavega totonu.” (Kalate 6⁠:⁠5) Kae ʼi te fua ʼo te kavega ʼo te nofo tokotahi, ʼe ʼi ai te ʼu tuʼutāmaki ʼe tonu ke tou mahino kiai. Ohage la, ʼe feala ke puleʼi tatou e te nofo tokotahi mo kapau ʼe tou to kehe, ʼo mole tou fakahā ki he tahi te ʼu meʼa ʼaē ʼi totatou loto. Kae ʼi te tahi faʼahi ʼe tou lava tauʼi ia te nofo tokotahi ʼaki te ʼofa. (1 Kolonito 13⁠:​7, 8) Ko te foaki pea mo te vaevae ʼe ko te faʼahiga fai ʼaia ʼe lelei age ke tou maʼu ai te fiafia​—logo aipe totatou ʼu ʼaluʼaga. (Gaue 20⁠:35) ʼE ʼui fēnei e te tuagaʼane pionie ʼe gāue mālohi: “ ʼE mole maʼu hoku temi ke ʼau manatu ʼo ʼuhiga mo taku nofo tokotahi. Mai te ʼaluʼaga ʼaē ʼe ʼi ai toku ʼaoga pea ʼe ʼau maʼumaʼua, ʼe mole ʼau logoʼi taku nofo tokotahi.”

ʼE tonu ke tou tokakaga naʼa taki tatou e tatatou nofo tokotahi ke tou fai he faʼahiga fakatahi ʼe mole fakapotopoto. Ohage la, ko he meʼa fakaloto mamahi mo kapau ʼe kita tuku tokita holi ki te ʼohoana ke ina fakatupu te ʼu tuʼuga fihifihia mokā kita ʼohoana mo he tahi ʼe mole tui tahi mo kita, pea tāfito la mokā kita līaki te tokoni faka Tohi-Tapu ʼaē ke ʼaua naʼa tou fai te taʼi fakatahi ʼaia! (2 Kolonito 6⁠:14) Neʼe ʼui fēnei e te fafine Kilisitiano kua mavete mo tona ʼohoana: “ ʼE ʼi ai te meʼa e tahi ʼe kovi age ʼi takita nofo selipatea. Ko takita ʼohoana mo he tahi neʼe mole tonu ke kita ʼohoana mo ia.”

Kapau ʼi te temi ʼaenī ʼe mole ʼi ai he puleʼaki ki te fihifihia ʼaia, pea ʼe tonu ke tou kātakiʼi. ʼAki te tokoni ʼa te ʼAtua, ʼe feala pe ke tou kātakiʼi tatatou nofo tokotahi. Kapau ʼe tou haga tauhi kia Sehova, pea ʼe tou lava falala ʼe ʼi ai he ʼaho ʼe fakahoko katoa anai pea mo fakahoko lelei anai te ʼu meʼa ʼaē ʼe ʼaoga kia tatou.​—Pesalemo 145⁠:⁠16.

[Kiʼi nota]

[Paki ʼo te pasina 28]

ʼE tou lava ʼutakiʼi tatatou nofo tokotahi ʼaki te foaki pea mo te vaevae