Te ʼu Fehuʼi ʼa Te Kau Lautohi
Koteā te ʼu ʼaluʼaga fakalaumālie, ʼaē ʼe tonu ai ki he fafine Kilisitiano ke ina pūlouʼi tona ʼulu?
Neʼe tohi fēnei e te ʼapositolo ko Paulo: “Ki te fafine fuape e faikole, pe talaki fakapolofeta kae mole uʼufi tona ulu pea e lainoa tona pule.” Koteā tona tupuʼaga? ʼUhi ko te pelesepeto fakaʼatua ʼaenī ki te ʼuhiga pule: “Ko te pule o te fafine e ko te tagata.” Ko te faikole peʼe ko te fai faka mafola ʼi te loto kokelekasio faka Kilisitiano ʼe ko te maʼua māhani ia ʼa te tagata. Koia, ka fakahoko e he fafine Kilisitiano he ʼu faʼahiga maʼua ʼo ʼuhiga mo te tauhi kae tonu ke fakahoko e tona ʼohoana peʼe ko he tagata kua papitema, ʼe tonu ke ina pūlouʼi tona ʼulu.—1 Kolonito 11:3-10.
ʼI te nofo faka taumatuʼa, ʼe ʼi ai te ʼu ʼaluʼaga ʼe tonu ai ki te fafine Kilisitiano ke ina pūlouʼi tona ʼulu. Ohage la, ka ako fakatahi te Tohi-Tapu e te famili peʼe ka nātou kakai, ʼi te agamāhani ʼe ko te tagata ʼaē ʼe ina takitaki te ako pea mo fakafofoga nātou ʼi te faikole ki te ʼAtua. Kae kapau leva ʼe mole lotu tahi te tagata mo te fafine, ʼe feala leva ke toʼo te maʼua ʼaia e te fafine. Koia, ka faikole leʼolahi maʼa ia pea mo ʼihi peʼe ina takitaki he ako faka Tohi-Tapu mo tana ʼu tamaliki kae kau ai tona ʼohoana, ʼe lelei ki te fafine Kilisitiano ke ina pūlouʼi tona ʼulu. Kapau leva ʼe puli tona ʼohoana, ʼe mole fakamaʼua ki te fafine ke ina pūlouʼi tona ʼulu, koteʼuhi ʼe fakagafua age ki ai mai te ʼAtua ke ina akoʼi tana ʼu tamaliki.—Tāʼaga Lea 1:8; 6:20.
Kae e feafeaʼi mo kapau la kua papitema he tamasiʼi tagata ko he kaugana ʼa te ʼAtua? Mai te ʼaluʼaga ʼaē ʼe kau ki te kokelekasio faka Kilisitiano, ʼe tonu ke akoʼi ia ia e he ʼu tēhina lalahi ʼo te kokelekasio. (1 Timoteo 2:12) Kapau ko tana tāmai ʼe ko he tēhina, pea ʼe tonu ko ia ʼe ina akoʼi tona foha. Kae kapau ʼe puli tana tāmai, ʼe tonu ai leva ki te faʼe ke ina pūlouʼi tona ʼulu mo kapau ʼe ina fai te ako ʼo tana tama ʼaē kua papitema ʼo feiā mo tana fānau ʼaē. ʼO ʼuhiga mo te faikole ki te taʼi ako ʼaia peʼe ko te temi kai, ʼe fakalogo pe leva ia ki te faʼe. ʼE lagi feala pe ke fakafuafua e te faʼe ʼe mole heʼeki katoa te poto ʼo tana tama, koia ʼe mole ina tuku age anai ke ina fai te kole. Kapau leva ʼe tonu e te faʼe ke ina fai tonu te faikole, pea ʼe tonu anai ke ina pūlouʼi tona ʼulu.
ʼE ʼi ai te ʼu faʼahiga gāue ʼo te kokelekasio ʼe kau ai te ʼu fafine Kilisitiano, pea ʼe fakamaʼua age ke nātou pūlouʼi tonatou ʼulu. Ohage la, ʼi te fono ki te fai faka mafola lolotoga te vāhaʼa, ʼe lagi feala ko te ʼu tuagaʼane pe ʼaē ʼe nātou kau ai, kae mole ʼi ai he ʼu tēhina. ʼE lagi feala pe ke ʼi ai te tahi ʼu ʼaluʼaga ʼe mole kau ai he tēhina ʼi he fono ʼo te kokelekasio. Kapau ʼe tonu ki he tuagaʼane ke ina fakahoko te ʼu maʼua ʼe fakahoko māhani e he tēhina ʼi he fono ʼa te kokelekasio peʼe ko he fono ki te fai faka mafola, pea ʼe tonu ki te tuagaʼane ʼaia ke ina pūlouʼi tona ʼulu.
ʼE tonu koa ki te ʼu fafine Kilisitiano ke nātou pūlouʼi tonatou ʼulu mokā nātou fakaliliu he akonaki ki te lea ʼa te kau tuli, peʼe mokā nātou lau he ʼu palakalafe ʼi he tohi faka Tohi-Tapu lolotoga he fono ʼo te kokelekasio? Kailoa ia. Ko te ʼu tuagaʼane ʼaē ʼe nātou fai te koga ʼaia ʼe mole ko nātou ʼaē ʼe nātou takitaki te fono peʼe nātou fai akonaki. Ohage pe ko te fai ʼo he faʼifaʼitaki e he ʼu tuagaʼane, peʼe nātou fai he ʼu fakamatala, peʼe fai he fai palalau lolotoga te Ako ʼo te Minisitelio Faka Teokalatike, ʼe mole fakamaʼua age kia nātou ke nātou pūlouʼi tonatou ʼulu.
Ko te faiakonaki ʼi te loto kokelekasio ʼe ko he maʼua ʼo te ʼu tēhina, kae ko te maʼua ʼaē ko te fai faka mafola pea mo te faiako ʼi tuʼa atu ʼo te kokelekasio, ʼe ko he maʼua ʼa te hahaʼi tagata mo fafine. (Mateo 24:14; 28:19, 20) Koia ka palalau he fafine Kilisitiano mo he ʼu hahaʼi ʼo fai ki te Folafola ʼa te ʼAtua kae tuʼu ai he tagata Fakamoʼoni ʼa Sehova, ʼe mole fakamaʼua age ki te fafine ʼaia ke ina pūlouʼi tona ʼulu.
Kae ʼe kehe leva te ʼaluʼaga mokā fai he ako faka Tohi-Tapu ʼi he ʼapi, kae ʼe kau ai he tēhina ki te ako ʼaia. Ko te koga ʼaenī ʼe ko he fakatuʼutuʼu ʼo te faiako pea ʼi te agamāhani ko ia ʼaē ʼe ina fai te ako ʼe ko ia ʼaē ʼe ina takitaki te ako. ʼI te ʼu taʼi ʼaluʼaga ʼaia, ko te taʼi ako ʼaia ʼe ko he fakaloaloa atu ʼo te kokelekasio. Koia ka fai he ako feiā e te fafine Fakamoʼoni kua papitema kae ʼe kau ai he tēhina Fakamoʼoni, ʼe lelei ki te fafine ke ina pūlouʼi tona ʼulu. Kae ʼe ko te tēhina ʼaē ka ina fai te faikole. ʼE mole fai e te tuagaʼane ia te faikole kae kau ai he tēhina, gata pe mokā ko he ʼu ʼaluʼaga makehe, ohage la ko he tēhina ʼe mole kei feala hana palalau.
ʼE feala pe ʼi ʼihi lakaga ke fai he ako faka Tohi-Tapu e he tuagaʼane kae ʼe hoa mo he tagata fai faka mafola kae mole heʼeki papitema. Kapau ʼe loto kiai te tuagaʼane, ʼe feala pe ke ina kole age ki te kaugā fagona ke ina fai te ako. Kae mai te ʼaluʼaga ʼaē ʼe mole feala ki te tagata ʼaia ke ina fakafofoga te tuagaʼane ʼaē kua papitema ʼi te faikole kia Sehova, ʼe lelei age ki te tuagaʼane ke ina fai te faikole ʼi te ako ʼaia. Kapau ko te tuagaʼane ʼaē ʼe ina takitaki te ako mo fai te kole, pea ʼe tonu anai ke ina pūlouʼi tona ʼulu. Tatau aipe peʼe mole heʼeki papitema te tagata fai faka mafola, kae ko te hahaʼi ʼo tuʼa ʼe nātou fakapipiki ia ia ki te kokelekasio ʼuhi ko tana fai faka mafola.
Neʼe tohi fēnei e te ʼapositolo ko Paulo: “Koena tona tupuaga o te ai e te fafine hona pulou ki tona ulu, . . . uhi ko te kau aselo.” Ei, ʼe maʼu e te ʼu tuagaʼane Kilisitiano ia te pilivilesio ʼaē ke nātou liliu ko he ʼu faʼifaʼitaki lelei ki te ʼu miliona ʼaselo ʼaē ʼe nātou haga nofo agatonu aipe ʼo fakalogo kia Sehova. Koia ʼe lelei ai ki te ʼu fafine ʼaē ʼe aga faka lotu ke nātou pūlouʼi tonatou ʼulu ʼi te ʼu ʼaluʼaga ʼaē ʼe fakamaʼua ai kia nātou!
[Paki ʼo te pasina 26]
Ko te pūlouʼi ʼo te ʼulu ʼe ko he fakaʼiloga ʼaia ʼo te fakaʼapaʼapa ki te ʼuhiga pule