“Ke Muli Tuʼumaʼu Ia Te ʼAu”
“Nee paui koutou ki te mea aia, pea mo Kilisito nee tali mamahi o uhiga mo koutou, pea nee ina tuku kia koutou he faifaitakiʼaga ke koutou mulimuli i ona aluʼaga.”—1 Petelo 2:21.
1, 2. He koʼe ʼe mole māʼoluga fau kia tatou ia te faʼifaʼitaki ʼo te faiako haohaoa ʼa Sesu?
KO SESU KILISITO neʼe ko te Tagata Faiako lahi tokotahi ʼi te kele. Pea tahi ʼaē meʼa, neʼe haohaoa, neʼe mole agahala lolotoga tona maʼuli ʼi te kele. (1 Petelo 2:22) Kae ko tona faka ʼuhiga koa ko te faʼifaʼitaki ʼo te faiako ʼa Sesu, ʼe mole tou lava mulimuli kiai heʼe māʼoluga fau kia tatou hahaʼi agahala? Kailoa ia.
2 Ohage ko tatatou vakaʼi ʼi te ʼuluaki alatike, ko te tafitoʼaga ʼo te faiakonaki ʼa Sesu neʼe ko te ʼofa. Pea ko te ʼofa ʼe ko he kalitate ʼe feala ke tou maʼu e tatou fuli. ʼE tau fakaloto mālohiʼi tatou e te Folafola ʼa te ʼAtua ke fakatuputupu pea mo hikihiki tatatou ʼofa ki te hahaʼi. (Filipe 1:9; Kolose 3:14) ʼE mole fakamaʼua e Sehova ki tana hahaʼi he ʼu meʼa ʼe mole nātou lavaʼi. ʼI tona fakahagatonu, ʼuhi ko “te ʼAtua ʼe ʼofa” pea neʼe ina fakatupu tatou ki tona paki, koia ʼe feala ke tou ʼui neʼe ina fakatupu tatou ke tou feʼofaʼofani. (1 Soane 4:8, MN; Senesi 1:27) Koia ka tou lau te ʼu palalau ʼa te ʼapositolo ko Petelo ʼi te vaega tāfito ʼo tatatou alatike, ʼe feala hatatou mulimuli ki te faʼifaʼitaki ʼa Sesu. ʼE feala ke tou mulimuli lelei ki te ʼu tafuga vaʼe ʼo Kilisito. ʼI tona fakahagatonu, ʼe feala hatatou mulimuli ki te fakatotonu ʼa Sesu: “Ke muli tuʼumaʼu ia te ʼau.” (Luka 9:23, MN ) Tou vakaʼi ʼuluaki peʼe tou lava faʼifaʼitakiʼi feafeaʼi te leleiʼia ʼa Kilisito ia te ʼu moʼoni ʼaē neʼe ina akoʼi pea lua, tona ʼofa ki te hahaʼi ʼaē neʼe ina akoʼi.
Tou Leleiʼia Te Ako ʼo Te ʼu Moʼoni
3. He koʼe ʼe faigataʼa ki ʼihi te ako, kae koteā te tokoni ʼe tou maʼu ia Tāʼaga Lea 2:1-5?
3 Ke feala hatatou leleiʼia te ʼu moʼoni ʼaē ʼe tou akoʼi ki te hahaʼi, ʼe tonu ke tou fia ako te ʼu moʼoni ʼaia. ʼI te malamanei ʼo te temi ʼaenī, ʼe faigataʼa ki ʼihi hahaʼi hanatou leleiʼia te ako. Ko ʼihi ʼe mole nātou leleiʼia te ako, koteʼuhi neʼe mole lelei tanatou ako, pea ʼi tonatou kei tūpulaga neʼe mole lelei tanatou ʼu agamāhani ʼi te ako. Kae ʼe maʼuhiga ke akoʼi tatou e Sehova. ʼE ʼui fēnei ia Tāʼaga Lea 2:1-5: “Ê toku foha, kapau ʼe ke tali taku ʼu folafola pea mo ke taupau fakalelei ia te koe taku ʼu fakatotonu, ke feala ai hau tokaga ki te poto ʼaki tou taliga, ke ke fakafalele ai tou loto ki te fakasiosio tonu; kapau leva ʼe ke pāui ki te ʼatamai pea mo kapau ʼe ke kalaga ʼaki tou leʼo ki te fakasiosio tonu, kapau ʼe ke haga kumi te meʼa ʼaia ohage ko te siliva pea kapau ʼe ke kumi tuʼumaʼu ohage ko he ʼu koloā maʼuhiga neʼe fufū, pea ʼe ke mahino ai anai ki te manavasiʼi kia Sehova pea ʼe ke maʼu ai anai te ʼatamai mālama ʼo ʼuhiga mo te ʼAtua.”
4. Koteā te faka ʼuhiga ʼaē ke “fakafalele” te loto, pea koteā te faʼahiga manatu ʼaē ka tokoni mai ke tou fai te faʼahi ʼaia?
4 Koutou tokagaʼi ʼi te vaega 1 ki te 4, ʼe tokoni liuliuga mai kia tatou ke tou faiga ke tou “tali” mo “taupau fakalelei” pea mo tou “kumi tuʼumaʼu.” Kae koteā ʼaē ka ina uga tatou ke tou fai te ʼu meʼa fuli ʼaia? Koutou tokagaʼi te ʼui fēnei: “Ke ke fakafalele ai tou loto ki te fakasiosio tonu.” ʼE ʼui e te tohi ko te tokoni ʼaia “ ʼe mole ko he kole pe ki he tahi ke ina tokagaʼi; ʼe ko te kole ke ina teuteuʼi tona ʼatamai: ke ina fia tali te ʼu akonaki.” Pea koteā ʼaē ka feala ai ke tou tali pea mo tou fia ʼiloʼi te ʼu meʼa ʼaē ʼe akoʼi mai e Sehova? Ko tatatou manatu ʼo ʼuhiga mo te ʼu meʼa ʼaia. ʼE tonu ke tou faka ʼuhiga “te ʼatamai mālama ʼo ʼuhiga mo te ʼAtua” ohage ko he “siliva” pea mo “he ʼu koloā maʼuhiga neʼe fufū.”
5, 6. (a) Koteā ʼaē ʼe feala ke hoko ʼaki te temi, pea koteā ʼaē ʼe tonu ke tou fai ke mole hoko te faʼahi ʼaia? (b) He koʼe ʼe tonu ke lahi age te ʼu moʼoni ʼaē ʼe tou ako ʼi te Tohi-Tapu?
5 ʼE mole faigataʼa te maʼu ʼo te manatu ʼaia. Ohage la, ʼi “te ʼatamai mālama ʼo ʼuhiga mo te ʼAtua” ʼaē ʼe tonu ke koutou ako, ʼe kau ai te moʼoni ʼo ʼuhiga mo te fakatuʼutuʼu ʼa Sehova ke maʼuʼuli te hahaʼi agatonu ʼo heʼegata ʼi te Palatiso ʼi te kele. (Pesalemo 37:28, 29) ʼI te temi ʼaē neʼe koutou ʼuluaki ako ai te moʼoni ʼaia, ʼe mahino ia neʼe ko he koloā maʼuhiga kia koutou, ko he moʼoni neʼe fakafonu ai tokotou ʼatamai pea mo tokotou loto ʼi te ʼamanaki pea mo te fiafia. E feafeaʼi ʼi te temi nei? ʼAki te temi, ʼe mole kei maʼuhiga koa kia koutou te ʼu koloā ʼaia? Koutou faiga ke koutou fai te ʼu faʼahi ʼaenī e lua. ʼUluaki koutou faigaʼi ke koutou toe leleiʼia te ʼu moʼoni ʼaia, peʼe koutou fakafoʼou tuʼumaʼu tokotou ʼatamai ke koutou sio pe koʼe ʼe maʼuhiga te ʼu moʼoni fuli ʼaē neʼe akoʼi atu e Sehova, māʼia mo te ʼu akonaki neʼe koutou ako kua hili kiai ni ʼu taʼu.
6 Lua, ke lahi age te ʼu moʼoni ʼaē ʼe koutou ako. Kapau neʼe koutou maʼu he maka maʼuhiga, pea ʼe mole koutou fafaʼo pe anai ki he kato pea koutou ʼolo. ʼE mahino ia ʼe koutou haga keli anai moʼo vakaʼi peʼe mole ʼi ai he tahi ʼu maka maʼuhiga. ʼE fonu te Folafola ʼa te ʼAtua ʼaki te ʼu moʼoni maʼuhiga ʼe hage pe ko he ʼu maka maʼuhiga peʼe ko he siliva. Tatau aipe pe neʼe mole lahi te ʼu meʼa ʼaē neʼe koutou maʼu, kae ʼe kei feala pe ke koutou maʼu he tahi ʼu koloā. (Loma 11:33) Ka koutou ako he faʼahi foʼou ʼo te moʼoni, koutou fai kia koutou te ʼu fehuʼi ʼaenī: ‘He koʼe ʼe ko he koloā maʼuhiga? ʼE tuputupu ai koa taku mahino ki te ʼulugaaga ʼo Sehova peʼe ko tana ʼu fakatuʼutuʼu? ʼE foaki mai koa he takitaki ʼaoga ʼe tokoni mai anai ke ʼau mulimuli ki te ʼu tafuga vaʼe ʼo Sesu?’ Ko te metitasio ki te ʼu fehuʼi ʼaia, ʼe tokoni anai kia koutou ke koutou leleiʼia te ʼu moʼoni ʼaē neʼe akoʼi atu e Sehova.
Tou Leleiʼia Te ʼu Moʼoni ʼAē ʼe Tou Akoʼi Ki Te Hahaʼi
7, 8. Koteā he ʼu faʼahiga fai moʼo fakahā ki te hahaʼi ʼe tou leleiʼia te ʼu moʼoni ʼaē neʼe tou ako ʼi te Tohi-Tapu? Koutou tuku mai he faʼifaʼitaki.
7 ʼI tatatou akoʼi te hahaʼi, ʼe lava feafeaʼi hatatou fakahā ʼe tou leleiʼia te ʼu moʼoni ʼaē neʼe tou ako mai te Folafola ʼa te ʼAtua? Kapau ʼe tou mulimuli ki te faʼifaʼitaki ʼa Sesu, pea ʼe tou falala lahi anai ki te Tohi-Tapu ʼi tatatou fai faka mafola pea mo faiako. Mole heʼeki faʼa fualoa, neʼe fakaloto mālohiʼi te hahaʼi ʼa te ʼAtua ʼi te kele katoa ke nātou fakaʼaogaʼi lahi te Tohi-Tapu ʼi tonatou minisitelio. ʼI takotou mulimuli ki te tokoni ʼaia, koutou kumi he ʼu ʼaluʼaga ke sio ai te hahaʼi ʼe maʼuhiga kia koutou te ʼu meʼa ʼaē ʼe koutou akoʼi age kia nātou ʼaki te Tohi-Tapu.—Mateo 13:52.
8 Ohage la, ʼi te ʼu māhina ʼaē neʼe hoa ki te ʼu meʼa fakamataku ʼaē neʼe hoko ʼi New York, neʼe lau e te tuagaʼane te vaega ʼo Pesalemo 46:1, 11 ki te ʼu hahaʼi ʼaē neʼe ina maʼu ʼi tona minisitelio. Neʼe ina ʼuluaki fehuʼi ki te hahaʼi peʼe koteā ʼaē neʼe tonu ke nātou fai moʼo tali te meʼa fakamataku ʼaia neʼe hoko. Neʼe fakalogo lelei ki tanatou tali, moʼo fakamoʼoni kiai, pea neʼe ina ʼui fēnei: “ ʼE feala koa ke ʼau lau atu he vaega faka Tohi-Tapu neʼe ʼau maʼu ai he fakaloto fīmālie moʼoni ʼi te temi faigataʼa ʼaia?” Tokolahi neʼe nātou tali, pea neʼe iku ki he ʼu fai palalau lelei. Ko te tuagaʼane ʼaia, mokā fai palalau mo te kau tūpulaga, ʼe ina tau ʼui fēnei: “Kua taʼu 50 nei taku akoʼi te Tohi-Tapu ki te hahaʼi, pea ʼe ʼau tala moʼoni atu kia koutou, ʼe tokoni mai te tohi ʼaenī ki te ʼu fihifihia fuli pe.” ʼAki he ʼu palalau fakamalotoloto pea mo fakafiafia, ʼe tou fakahā ai ki te hahaʼi ʼe maʼuhiga kia tatou pea ʼe tou leleiʼia te ʼu meʼa ʼaē neʼe tou ako mai te Folafola ʼa te ʼAtua.—Pesalemo 119:97, 105.
9, 10. He koʼe ʼe maʼuhiga ke tou fakaʼaogaʼi te Tohi-Tapu moʼo tali ki te ʼu fehuʼi ʼo ʼuhiga mo te ʼu meʼa ʼaē ʼe tou tui kiai?
9 Ka fehuʼi mai e te hahaʼi ʼo ʼuhiga mo te ʼu meʼa ʼaē ʼe tou tui kiai, ʼe tou maʼu ai he faigamālie moʼo fakahā e tou leleiʼia te Folafola ʼa te ʼAtua. Kapau ʼe tou mulimuli ki te faʼifaʼitaki ʼa Sesu, pea ʼe mole tou fakatafito anai tatatou ʼu tali ki tatatou ʼu manatu. (Tāʼaga Lea 3:5, 6) Kae ʼe tou fakaʼaogaʼi anai te Tohi-Tapu moʼo tali kia nātou. ʼE koutou tuʼania koa naʼa fai atu e he tahi he fehuʼi ʼe mole koutou lava tali anai kiai? Koutou vakaʼi te ʼu faʼahi ʼaenī e lua ʼe feala ke koutou fai.
10 Koutou teuteu lelei. Neʼe tohi fēnei e te ʼapositolo ko Petelo: “Koutou tāpuhā ʼi tokotou ʼu loto ia Kilisito ʼaē ko te ʼAliki, koutou nonofo teuteu tuʼumaʼu moʼo tali kia nātou ʼaē ʼe nātou fehuʼi atu te tupuʼaga ʼo takotou falala, kae koutou tali ʼaki he agamālū pea mo he fakaʼapaʼapa lahi.” (1 Petelo 3:15, MN ) Kua koutou teuteu koa ke feala hakotou palalau ʼo ʼuhiga mo takotou tui? Ohage la, kapau ʼe fia ʼiloʼi e he tahi pe koʼe ʼe mole koutou kau ki he agaʼi fenua ʼe mole tuʼu ʼi te Tohi-Tapu, pea ʼaua naʼa koutou ʼui age pe “ ʼE mole gafua te faʼahi ʼaia ʼi tamatou lotu.” ʼAki te faʼahiga tali ʼaia ʼe feala ke manatu ai ʼe fakalogo takotou ʼu tonu ki te hahaʼi pea ʼe koutou kau ki he magaʼi lotu. ʼE lagi lelei age ke koutou ʼui fēnei: “ ʼE tapuʼi te faʼahi ʼaia e te Folafola ʼa te ʼAtua, te Tohi-Tapu” peʼe koutou ʼui age “ ʼE mole tali e toku ʼAtua.” Pea koutou fakamahino lelei age tona tupuʼaga.—Loma 12:1.
11. Ko te kaupepa fea ʼe feala ke tokoni atu kia koutou ke koutou lava tali ki te ʼu fehuʼi ʼo ʼuhiga mo te ʼu moʼoni ʼa te Folafola ʼa te ʼAtua?
11 Kapau ʼe koutou sio ʼe mole heʼeki koutou teuteu lelei, pea koutou toʼo he temi moʼo akoako lelei te kaupepa Te ʼu Tokoni Ki Te ʼu Fai Palalau Faka Tohi-Tapu.a Koutou filifili ʼi te kaupepa ʼaia he ʼu manatu ʼe lagi lagaʼi anai e te hahaʼi, pea koutou tāʼofi fakaʼatamai he ʼu vaega faka Tohi-Tapu. Koutou toʼo tuʼumaʼu mo koutou te kaupepa ʼaia pea mo takotou Tohi-Tapu. Koutou fakaʼaogaʼi te ʼu tohi ʼaia e lua, ʼo koutou ʼui kia ia neʼe ina fai atu te fehuʼi, ʼe ʼi ai takotou kaupepa ʼe koutou fia fakaʼaogaʼi moʼo tali ʼaki te Tohi-Tapu ki te ʼu fehuʼi.
12. Koteā ʼaē ʼe feala ke tou ʼui mo kapau ʼe mole tou ʼiloʼi te tali ki he fehuʼi ʼi te Tohi-Tapu?
12 ʼAua naʼa koutou tuʼania fau. ʼE mole feala ki he tagata agahala ke ina maʼu he ʼu tali ki te ʼu fehuʼi fuli. Koia ka fai atu he fehuʼi ʼo ʼuhiga mo te Tohi-Tapu ʼe mole koutou lava tali kiai, ʼe feala pe ke koutou ʼui fēnei age: “ ʼE ʼau fakamālo atu ki tau fehuʼi lelei ʼaia. ʼE ʼau fakahā fakahagatonu atu, ʼe mole ʼau ʼiloʼi te tali ki tau fehuʼi, kae ʼe ʼau ʼiloʼi e talanoa te Tohi-Tapu ki te faʼahi ʼaia. ʼE ʼau fia fai he ʼu kumi ʼi te Tohi-Tapu, koia ʼe ʼau vakavakaʼi anai tau fehuʼi pea mo ʼau toe liliu mai anai mo tona tali.” Ko te ʼu palalau lelei pea mo agavaivai ʼaia, ʼe ko he fealagia ke toe hoko atu he tahi ʼu fai palalau.—Tāʼaga Lea 11:2.
Tou ʼOfa Ki Te Hahaʼi ʼAē ʼe Tou Akoʼi
13. He koʼe ʼe tonu ke tou ʼofa ki te hahaʼi ʼaē ʼe tou faka mafola ki ai?
13 Neʼe fakahā e Sesu tona ʼofa ki te hahaʼi ʼaē neʼe ina akoʼi. ʼE tou lava mulimuli feafeaʼi ki tona faʼifaʼitaki ʼaia? ʼE mole tonu ke tou fehiʼa ki te hahaʼi. ʼE moʼoni, ko “te tau ʼo te ʼaho lahi ʼo te ʼAtua te Māfimāfi” kua ōvi mai, pea ko te tokolahi ʼi te lauʼi miliale hahaʼi ʼe fakaʼauha anai. (Apokalipesi 16:14, MN; Selemia 25:33) Kae ʼe mole tou ʼiloʼi pe ko ai ʼaē ka maʼuli anai peʼe ko ai ʼaē ka mate anai. ʼE hoko anai te fakamāu ʼaia ʼi te ka haʼu, pea ʼe fakahoko anai e Sesu Kilisito ʼaē neʼe hinoʼi e Sehova. ʼO aʼu ki te hoko ʼo te fakamāu, ʼe tonu ke tou manatu ko te hahaʼi fuli pe ʼe feala ke nātou liliu ko he ʼu kaugana ʼa Sehova.—Mateo 19:24-26; 25:31-33; Gaue 17:31.
14. (a) Koteā te ʼu fehuʼi ʼe tonu ke tou fai ke tou ʼiloʼi ai peʼe tou mahino ki te loto ʼo te hahaʼi? (b) Koteā ʼaē ʼe feala ke tou fai moʼo fakahā ai ʼe tou mahino pea mo tokaga ki te hahaʼi?
14 Ohage ko Sesu, ʼe tou fia mahino ki te loto ʼo te hahaʼi. ʼE feala ke tou fai kia tatou te ʼu fehuʼi ʼaenī: ‘ ʼE ʼau mahino koa ki te mamahi ʼo te hahaʼi ʼuhi ko te ʼu loi pea mo te ʼu fakapapau neʼe mole fakahoko e te kau takitaki lotu, mo faka politike, pea mo te hahaʼi fakatau koloā? Kapau ʼe mole nātou fia logo ki tatatou logo, pea ʼe ʼau fia mahino koa ki tona tupuʼaga? ʼE ʼau fakamoʼoni koa ko ʼau peʼe ko ʼihi kua nātou tauhi agatonu ʼi te temi nei kia Sehova, neʼe mātou feiā ki muʼa atu? ʼE ʼau faka ʼalutahi koa taku fai faka mafola mo te faʼahi ʼaia? Peʼe ʼau fehiʼa koa ʼau ki te ʼu hahaʼi ʼaia, ʼo ʼau manatu ʼe mole feala anai ke nātou fetogi?’ (Apokalipesi 12:9) Ka logoʼi e te hahaʼi ʼe tou fia mahino moʼoni ki tonatou loto, pea ʼe nātou fia tali ai tatatou logo. (1 Petelo 3:8) Ko te mahino ki te loto ʼo te hahaʼi ʼe ina uga tatou ke tou tokaga ki te hahaʼi ʼaē ʼe tou fai faka mafola kia nātou. ʼE feala ke tou tohi tanatou ʼu fehuʼi pea mo tanatou ʼu tuʼania. Ka tou toe liliu ʼo ʼaʼahi ia nātou, ʼe feala ke tou fakahā age neʼe tou fakakaukauʼi tanatou ʼu palalau. Pea kapau ʼe ʼi ai he meʼa ʼe nātou fia ʼiloʼi, ʼe feala ai ke tou tokoni kia nātou.
15. He koʼe ʼe tonu ke tou tokagaʼi te meʼa ʼaē ʼe lelei ʼi te hahaʼi, pea ʼe tou lava fai feafeaʼi te faʼahi ʼaia?
15 Ohage ko Sesu, ʼe tou tokagaʼi te meʼa ʼaē ʼe lelei ʼi te hahaʼi. ʼE lagi faiga ʼaupito e he faʼe ke ina taupau tokotahi tana fānau. ʼE lagi gāue kinakina he tagata moʼo taupau tona famili. Ko he tahi kua matuʼa ʼe lagi fia palalau ki te ʼu manatu fakalaumālie. ʼE tou tokagaʼi koa te ʼu faʼahi ʼaia ʼi te hahaʼi ʼaē ʼe tou palalau mo nātou, pea mo tou vikiʼi ai koa ia nātou? Kapau ʼe tou fai feiā, ʼe tou femahinoʼaki ai pea ʼe lagi feala ai ke tou fai faka mafola ʼo ʼuhiga mo te Puleʼaga.—Gaue 26:2, 3.
ʼE Maʼuhiga Te Agavaivai Mokā Tou Fakahā Te ʼOfa
16. He koʼe ʼe maʼuhiga ke tou agamālū pea mo fakaʼapaʼapa kia nātou ʼaē ʼe tou fai faka mafola kiai?
16 Ko te ʼofa ki te hahaʼi ʼaē ʼe tou akoʼi ʼe ina uga anai tatou ke tou manatuʼi te fakatokaga poto ʼaenī ʼa te Tohi-Tapu: “ ʼE fiameʼameʼa te poto kae ko te ʼofa ʼe ina lagalagaʼi.” (1 Kolonito 8:1, MN ) Neʼe lahi te ʼu faʼahi neʼe mālama ki ai ia Sesu, kae neʼe mole he temi neʼe fialahi ai. Koia ka koutou palalau ki takotou tui, ʼaua naʼa koutou fialahi. ʼE tou faiga ke lave tatatou ʼu palalau ki te ʼu loto ʼo te hahaʼi pea ke nātou fia ʼiloʼi te ʼu moʼoni ʼaē ʼe tou ʼofa lahi ai. (Kolose 4:6) Koutou manatuʼi, ʼi te temi ʼaē neʼe tokoni ai Petelo ki te kau Kilisitiano ke nātou teuteu moʼo hāofaki tanatou tui, neʼe ina toe fakamanatuʼi age ke nātou fai “ ʼaki he agamālū pea mo he fakaʼapaʼapa lahi.” (1 Petelo 3:15, MN ) Kapau ʼe tou agamālū pea mo fakaʼapaʼapa, pea ʼe feala anai ke tou taki te hahaʼi ki te ʼAtua ʼaē ʼe tou tauhi kiai.
17, 18. (a) ʼE tou lava tali feafeaʼi ki te ʼu valoki ʼa te hahaʼi ʼo ʼuhiga mo te akoʼi ʼo tatou ke tou liliu ko he ʼu minisi? (b) He koʼe ʼe mole maʼuhiga ki te kau ako ʼo te Tohi-Tapu ke nātou ʼiloʼi te ʼu lea ʼo te temi ʼāfea ʼo te Tohi-Tapu?
17 ʼE mole ʼaoga ke punamaʼuli te hahaʼi ʼi tatatou ʼatamai peʼe ko tatatou faiakonaki. ʼAua naʼa koutou lotovaivai, mo kapau ko ʼihi hahaʼi ʼi tokotou telituale ʼe mole nātou fia fakalogo kia nātou ʼaē neʼe mole maʼu pepa ʼi te faleako. Neʼe mole tokagaʼi e Sesu te ʼui ʼa te hahaʼi neʼe mole kau ʼi te ʼu faleako lalahi ʼa te kau lapi ʼo tona temi, pea neʼe mole mulimuli ia ki te ʼu manatu fakapalatahi, ʼo ina faigaʼi ke ōfo te hahaʼi ʼaki tona poto lahi.—Soane 7:15.
18 Ko te agavaivai pea mo te ʼofa ʼe maʼuhiga age ki te kau Kilisitiano ʼi he toe poto lahi. ʼE ko Sehova, te Tagata Faiako Lahi, ʼaē ʼe ina akoʼi tatou ke tou popoto ʼi te minisitelio. (2 Kolonito 3:5, 6) Pea tatau aipe pe koteā te ʼu palalau ʼe fai e ʼihi kau takitaki lotu ʼa te Keletiate, kae ʼe mole ʼaoga ke tou ako te ʼu lea ʼāfea ʼo te Tohi-Tapu ke feala ai hatatou akoʼi ki te hahaʼi te Folafola ʼa te ʼAtua. Neʼe takitaki e Sehova te tohi ʼo te Tohi-Tapu, ke mahino lelei kiai, ʼaki he ʼu kupu ʼe totonu, ke feala ki te hahaʼi fuli pe ke nātou mahino ki tana ʼu moʼoni maʼuhiga. Neʼe mole fetogi te ʼu moʼoni ʼaia, logola tanatou fakaliliu ʼi te ʼu lea e lauʼi teau. Koia ko te ʼiloʼi ʼo te ʼu lea ʼāfea, logola ʼe feala ke ʼaoga ʼi ʼihi lakaga, kae ʼe mole maʼuhiga. Tahi ʼaē meʼa, ko he tahi ʼe fialahi heʼe ina maʼu te poto ʼi te ʼu lea, ʼe feala ke puli ia ia te kalitate ʼaē ʼe maʼuhiga ki te kau Kilisitiano moʼoni—te fealagia ʼaē ke akoʼi ia ia.—1 Timoteo 6:4.
19. Koteā te faka ʼuhiga ʼo te ʼui ʼaē ko totatou minisitelio faka Kilisitiano ʼe ko he tauhi?
19 ʼE mahino papau ia ko totatou minisitelio faka Kilisitiano ʼe ko he gāue ʼe tonu ke tou agavaivai ai. ʼE tau hoko kia tatou te ʼu fakafeagai, te mole fia logo ʼa te hahaʼi, pea mo te ʼu fakataga. (Soane 15:20) Kae ʼi tatatou agatonu ʼo fakahoko totatou minisitelio, ʼe tou fai ai te tauhi ʼe maʼuhiga. Kapau ʼe tou haga tauhi ki te hahaʼi ʼaki he agavaivai ʼi te gāue ʼaia, pea ʼe tou faʼifaʼitaki ai te ʼofa ʼaē neʼe fakahā e Sesu Kilisito ki te hahaʼi. Koutou fakakaukauʼi age muʼa: kapau ʼe tonu ke tou fai faka mafola ki te ʼu lauʼi afe hahaʼi ʼaē ʼe mole fia logo peʼe nātou fakafeagai, kae tou maʼu pe te tokotahi ʼe hage ko he ōvi, ʼe mole maʼuhiga koa la tatatou faiga ʼaia? ʼE mahino ia! Koia kapau ʼe tou faʼa kātaki ʼi te gāue, ʼo mole tou fiu, pea ʼe tou agatonu anai ʼo kumi te hahaʼi ʼaē ʼe hage ko te ʼu ōvi ʼe tonu ke tou maʼu. ʼE mahino papau ia ʼe tokakaga anai ia Sehova pea mo Sesu ke tou maʼu he tahi ʼu hahaʼi maʼuhiga feiā, pea mo tou tokoni kia nātou ʼi muʼa ʼo te hoko mai ʼo te fakaʼosi.—Asea 2:7.
20. Koteā ni ʼihi faʼahiga fai moʼo akoʼi te hahaʼi ʼaki tatatou faʼifaʼitaki?
20 Ko te akoʼi ʼo te hahaʼi ʼaki tatatou faʼifaʼitaki ʼe ko he tahi faʼahi ʼaia moʼo fakahā ʼe tou fia tauhi kia nātou. Ohage la, ʼe tou fia akoʼi ki te hahaʼi ko te tauhi ʼaē kia Sehova, “te ʼAtua fiafia,” ʼe ko te faʼahiga maʼuli fakafiafia pe ʼaia ʼe tahi. (1 Timoteo 1:11, MN ) Ka nātou sio ki tatatou aga pea mo tatatou felogoi mo totatou ʼu vāhaʼa fale, mo te ʼu kaumeʼa ʼi te faleako, ʼi te fale gāue, ʼe feala koa ke nātou tokagaʼi ʼe tou fiafia? ʼO toe feiā pe, ʼe tou akoʼi ki te kau ako Tohi-Tapu ko te kokelekasio ʼe ko he potu ʼe tou maʼu ai te ʼofa ʼi he mālama ʼe mole kei ʼofa pea mo agakovi. ʼE feala koa ke sio moʼoni tatatou kau ako ʼe tou ʼofa ki te hahaʼi fuli ʼi te kokelekasio, pea mo tou faiga lahi ke tou taupau te tokalelei?—1 Petelo 4:8.
21, 22. (a) Kapau ʼe tou fai he sivisivi ʼo ʼuhiga mo totatou minisitelio, pea koteā te ʼu fealagia ka tou maʼu anai? (b) Koteā ʼaē ka tou talanoa anai kiai ʼi te ʼu alatike ʼo Te Tule Leʼo ka hoko mai?
21 Kapau ʼe tou maʼu he manatu lelei ʼo ʼuhiga mo tatatou minisitelio, pea ʼi ʼihi temi, ʼe feala ai ke tou fia sivisivi ia tatou totonu. ʼI tanatou fai agatonu te faʼahi ʼaia, tokolahi neʼe nātou tokagaʼi ʼe feala ke lahi age tonatou minisitelio, ʼo nātou pionie katoa peʼe nātou ʼolo ki te ʼu koga meʼa ʼaē ʼe ʼaoga lahi ai he kau fai faka mafola. Ko ʼihi neʼe nātou fili ke nātou ako he tahi lea moʼo tauhi ki te hahaʼi kaugamālie neʼe ʼōmai mai te tahi ʼu fenua ki tonatou telituale. ʼE feala mo koutou ke koutou fili te ʼu gāue ʼaia, ʼo koutou vakaʼi fakalelei ʼi te faikole. Ko te maʼuli ʼo tauhi ki te hahaʼi ʼe maʼu ai he toe fiafia lahi pea mo he tokalelei ʼo te ʼatamai.—Tagata Tānaki 5:12.
22 Koia tou haga faʼifaʼitakiʼi ia Sesu Kilisito ke lahi tatatou leleiʼia te ʼu moʼoni ʼaē ʼe tou akoʼi pea mo te hahaʼi ʼaē ʼe tou akoʼi. Ko te maʼu pea mo te fakahā ʼo te ʼofa ʼi te ʼu faʼahi ʼaia e lua, ʼe tokoni mai anai ke tou laga he fakatafito lelei, ke tou liliu ko he kau faiako ohage ko Kilisito. Kae e feafeaʼi hatatou laga ʼo tatou ʼi te fakatafito ʼaia? ʼI Te Tule Leʼo ka hoko mai, ʼe talanoa anai te ʼu alatike ki he ʼu faʼahiga fai neʼe fakaʼaogaʼi e Sesu moʼo akoʼi te hahaʼi.
[Kiʼi nota]
a Neʼe tā e te kau Fakamoʼoni ʼa Sehova.
ʼE Koutou Tali Feafeaʼi Anai?
• He koʼe ʼe feala ke tou tui papau ʼe mole māʼoluga fau kia tatou ia te faʼifaʼitaki ʼo te faiako ʼa Sesu?
• ʼE tou lava fakahā feafeaʼi ʼe tou leleiʼia te ʼu moʼoni ʼaē neʼe tou ako ʼi te Tohi-Tapu?
• He koʼe ʼe maʼuhiga ke tou agavaivai mokā tou tuputupu ʼi te ʼatamai mālama?
• Koteā ni ʼihi faʼahi ʼe feala ke tou fakahā ai ʼe tou ʼofa ki te hahaʼi ʼaē ʼe tou fia akoʼi?
[Paki ʼo te pasina 16]
Koutou faiga lahi ʼi takotou teuteu
[Paki ʼo te pasina 16, 17]
Kapau ʼe maʼuhiga ʼaupito kia koutou “te ʼatamai mālama ʼo ʼuhiga mo te ʼAtua,” pea ʼe koutou fakaʼaogaʼi lelei anai te Tohi-Tapu
[Paki ʼo te pasina 18]
ʼE tou fakahā totatou ʼofa ki te hahaʼi ʼi tatatou vaevae mo nātou te logo lelei