Fakamālohiʼi Ia Koutou
ʼI TE Tohi-Tapu, ʼe tuʼa lahi ia te fakaʼaogaʼi ʼo te kupu ‘nima.’ ʼI te faka Hepeleo, ʼe ʼi ai te ʼu tākuga lea ʼe fakaʼaogaʼi ai te nima. Ohage foki la, ko he nima maʼa ʼe faka ʼuhiga ki te mole fai ʼo he aga ʼe kovi. (2 Samuele 22:21; Pesalemo 24:3, 4) Ko te avahi ʼo te nima ʼe faka ʼuhiga ki te fakahā ʼo te loto fia foaki ki niʼihi. (Teutalonome 15:11; Pesalemo 145:16) Ko he tahi ʼe ina fai he meʼa ʼe fakatupu tuʼutāmaki ai ki tona maʼuli, ʼe ʼui ʼe ina ʼai tona nefesi ki tona nima. (1 Samuele 19:5) Ko he tahi ʼe ina fakatō tona ʼu nima, ko tona faka ʼuhiga kua lotovaivai. (2 Fakamatala 15:7) Pea ko te fakamālohiʼi te nima ʼo he tahi, ko tona faka ʼuhiga ʼe tonu ke fakamālohiʼi ia ia pea mo fakanofo ki he tuʼulaga.—1 Samuele 23:16.
ʼI te temi nei ʼe maʼuhiga ke tou fakamālohiʼi ia tatou, peʼe ke tou fakamālohiʼi totatou ʼu nima ohage ko tona ʼui mai ʼi te tohi faka Hepeleo. ʼE tou maʼuʼuli nei ʼi “te ʼu temi maʼuhiga ʼaupito mo faigataʼa.” (2 Timoteo 3:1, MN ) ʼI totatou ʼuhiga tagata, mokā tou lotovaivai, ʼe tou lītuʼa peʼe tou fakatō totatou ʼu nima heʼe mole kei ʼi ai hotatou mālohi. ʼE ko he agamāhani hatatou sisio ki he kau tūpulaga ʼe nātou līaki te ako, peʼe ko he ʼu tagata ʼohoana ʼe nātou siʼaki tonatou ʼu famili, peʼe ko he ʼu faʼe ʼe nātou līaki tanatou ʼu fānau. ʼI totatou ʼuhiga Kilisitiano, ʼe ʼaoga ke tou fakamālohiʼi ia tatou ke tou kātakiʼi te ʼu ʼahiʼahi ʼaē ʼe tau mo tatou ʼi tatatou tauhi ki te ʼAtua. (Mateo 24:13) ʼI tatatou fai feiā, ʼe tou fakafiafia ai te loto ʼo Sehova.—Tāʼaga Lea 27:11.
E Feafeaʼi He Fakamālohiʼi
Neʼe ʼaoga ki te kau Sutea ʼo te temi ʼo Esitalasi ke nātou fakamālohiʼi ia nātou totonu ke nātou fakaʼosi te toe laga ʼo te fale lotu ʼo Sehova ʼi Selusalemi. Neʼe fakamālohiʼi feafeaʼi ia nātou? ʼE fakamatala fēnei: “Neʼe nātou fai ai leva te lafeti ʼo te ʼu keke ʼaē ʼe mole hona meʼa fakatupu ia ʼaho e fitu ʼaki he loto fiafia; he neʼe fakafiafiaʼi ia nātou e Sehova, pea neʼe ina fakamaliu kia nātou te loto ʼo te hau ʼo Asilia moʼo fakaloto mālohiʼi tonatou ʼu nima ki te gāue ʼo te fale ʼo te ʼAtua moʼoni, te ʼAtua ʼo Iselaele.” (Esitalasi 6:22) ʼE mahino papau ia, neʼe fakaʼaogaʼi e Sehova tona mālohi gāue moʼo uga “te hau ʼo Asilia” ke ina fakagafua ki te hahaʼi ʼa te ʼAtua ke nātou toe liliu, pea neʼe Ina uga te loto ʼo te hahaʼi, koia neʼe nātou fakaʼosi ai te gāue ʼaē neʼe kua nātou kamata.
Ki muli age, ʼi te temi ʼaē neʼe ʼaoga ke toe gaohi fakafoʼou ai ia te ʼu kaupā ʼo Selusalemi, ko Nehemia neʼe ina fakamālohiʼi te ʼu nima ʼo tona ʼu tēhina Sutea moʼo fai te gāue. ʼE tou lau fēnei: “Neʼe ʼau fakahā age kia nātou te nima ʼo toku ʼAtua, pea neʼe lelei ʼaupito kia te ʼau, pea mo te ʼu folafola ʼa te hau ʼaē neʼe ina ʼui mai kia te ʼau. Pea neʼe nātou ʼui fēnei: ‘Tou tutuʼu ake, pea ʼe tonu ke tou laga.’ Neʼe nātou fakamālohiʼi ai tonatou ʼu nima ki te gāue lelei ʼaia.” ʼAki tonatou kua fakamālohiʼi, ko Nehemia mo tona ʼu tēhina Sutea neʼe nātou lavaʼi ia te toe laga ʼo te ʼu kaupā ʼo Selusalemi ia ʼaho pe e 52!—Nehemia 2:18; 6:9, 15.
ʼO toe feiā aipe, ʼe fakamālohiʼi totatou ʼu nima e Sehova ke tou faka mafola te logo lelei ʼo te Puleʼaga. (Mateo 24:14) ʼE ina fakahoko te faʼahi ʼaia ʼo ina ‘teuteuʼi tatou ʼaki te meʼa lelei fuli pe moʼo fai tona finegalo.’ (Hepeleo 13:21) Neʼe ina fakatoʼo mai kia tatou te meʼa gāue ʼe lelei ʼaupito. ʼE tou maʼu te Tohi-Tapu pea mo te ʼu tohi faka Tohi-Tapu, mo te ʼu nusipepa, mo te ʼu kaupepa lalahi, mo te ʼu kiʼi pepa lotu, pea mo te ʼu foʼi fime fakalogo pea mo te ʼu foʼi fime viteo ʼe tou fakaʼaogaʼi moʼo fakahoko ʼo te gāue ki te hahaʼi ʼi te malamanei katoa. ʼI tona fakahagatonu, ʼe maʼu tatatou ʼu tohi ʼi te ʼu lea e 380 tupu. Pea tahi ʼaē meʼa, ʼaki te ʼu fono ʼo te kokelekasio, mo te ʼu fakatahi lalahi, ʼe foaki mai e Sehova ia te ako faka teokalatike ʼo ʼuhiga mo te fakaʼaogaʼi ʼo te ʼu meʼa gāue lelei ʼaia moʼo fakahoko tatatou minisitelio.
Logope ʼe tuʼa lahi te fakamālohiʼi ʼo tatou e Sehova, kae ʼe ina fakaʼamu foki ke tou faiga mo tatou. Koutou manatuʼi te meʼa ʼaē neʼe ʼui e te polofeta ko Eliseo ki te Hau ko Seoasi, ʼaē neʼe haʼu ʼo kumi tokoni age ki ai moʼo tauʼi te kau Silia ʼaē neʼe nātou ʼohofi te fenua. Neʼe ʼui e Eliseo ki te hau ke ina toʼo he ʼu kauʼi nahau pea ke ina tukiʼi ki te kele. ʼE ʼui fēnei e te Tohi-Tapu: “Neʼe ina tukiʼi tuʼa tolu, pea tuku. Pea neʼe ʼita te tagata ʼa te ʼAtua moʼoni kia te ia, ʼo ina ʼui fēnei age ki ai: ‘Neʼe tonu ke ke tukiʼi tuʼa nima peʼe tuʼa ono! ʼE mahino papau ia, neʼe feala ke ke tāʼi ia Silia ʼo kaku ai mo tona pulinoa; kae koʼeni ia, ʼe ke tāʼi tuʼa tolu pe anai ia Silia.’ ” (2 Hau 13:18, 19) ʼI tana mole faiga mālohi, neʼe siʼisiʼi te mālo ʼa Seoasi ʼi te kau Silia.
ʼE tatau mo tatou, mo kapau ʼe tou fia fakahoko te meʼa ʼaē neʼe fakatotonu mai e te ʼAtua ke tou fai. ʼE mole tou tuʼania anai ki te ʼu faʼahi ʼe tou tuta ai peʼe ki te faigataʼa ʼo te gāue ʼaē ʼe kole mai ke tou fai, kae ʼe tonu anai ke fakahoko totatou maʼua ʼaki he faiga mālohi pea mo totatou loto katoa. ʼE tonu ke tou fakamālohiʼi totatou ʼu nima pea mo tou falala ki te tokoni ʼa Sehova.—Isaia 35:3, 4.
ʼE Fakamālohiʼi Anai Tatou e Sehova
ʼE tokoni tuʼumaʼu mai anai ia Sehova pea mo ina fakamālohiʼi tatou moʼo fai tona finegalo. ʼE mahino ia, ʼe mole fai anai e te ʼAtua he milakulo pea ʼe mole ina fai anai te ʼu meʼa fuli maʼa tatou. ʼE ina fakaʼamu ke tou faiga mo tatou—ke tou lau te Tohi-Tapu, ke tou teuteuʼi pea mo tou kau tuʼumaʼu ki te ʼu fono, ke tou kau ki te fai faka mafola ʼo mulimuli ki tatatou ʼu fealagia, pea mo tou faikole tuʼumaʼu age ki ai. Kapau ʼe tou agatonu mo tou faiga mokā tou maʼu he faigamālie, ʼe foaki mai anai e Sehova te mālohi moʼo fakahoko te meʼa ʼaē ʼe ina fakaʼamu ke tou fai.—Filipe 4:13.
Koutou tokagaʼi te Kilisitiano neʼe mate tona ʼohoana pea mo tana faʼe ʼi te taʼu pe e tahi. Neʼe kei lolotoga tau mo te mamahi ʼaia, kae mavete tona foha mo tona ʼohoana pea neʼe mavae te fafine ʼi te moʼoni. Neʼe ʼui fēnei e te tēhina ʼaia: “Neʼe ʼau mahino ai ʼe mole feala hatatou filifili totatou ʼu ʼahiʼahi, peʼe ko te temi ʼaē ʼe tonu ke hoko mai ai kia tatou, pea mo tona hoko liuliuga.” Neʼe maʼu feafeaʼi e te tēhina ia te mālohi ke hoko atu tona maʼuli? “Ko te faikole mo te ako takitokotahi neʼe ko he hāofakiʼaga ʼaia ke ʼau haga taupau aipe toku maʼuli. Pea neʼe ʼau maʼu te fīmālie lahi ʼaki te tokoni ʼa toku ʼu tēhina mo tuagaʼane fakalaumālie. Ko te faʼahi tāfito, neʼe ʼau mahino ki te maʼuhiga ʼo te fakatuputupu ʼo he felogoi takitokotahi mo Sehova ʼi muʼa ʼo te hoko mai ʼo he ʼu ʼaluʼaga faigataʼa.”
Logope te ʼu meʼa kua hoko atu kia koutou ʼi te maʼuli, koutou faiga ke koutou tuku katoa takotou falala kia Sehova pea mo fakaʼaogaʼi lelei tana ʼu fakatuʼutuʼu fuli moʼo fakamālohiʼi ia koutou. ʼE koutou lava fakahoko anai he tauhi ʼe lelei ʼaupito kia Sehova, pea mo koutou fakavikiviki pea mo faka maʼuhigaʼi tona huafa maʼuhiga.—Hepeleo 13:15.
[Paki ʼo te pasina 31]
ʼI tana mole faiga mālohi, neʼe siʼisiʼi te mālo ʼa Seoasi ʼi te kau Silia