“Koutou Fakaovi Ki Te Atua Pea e Fakaovi Atu Anai Kia Koutou”
Tona Maʼuli ʼi Muʼa Pea Ki Muli Age—ʼE Fetogi e Te Tohi-Tapu Te ʼu Maʼuli
KAPAU neʼe koutou felāveʼi mo Tony ʼi tona kei tūpulaga, neʼe ko te tama neʼe agamālohi pea mo agakovi, neʼe fakatahi tuʼumaʼu mo ʼihi ʼo te ʼu koga meʼa fakamataku ʼo Sydney, ʼi Ositalalia. Ko ʼihi ʼo tona ʼu kaumeʼa neʼe nātou kau ki te ʼu kūtuga fakatupu maveuveu. Neʼe nātou tau maumauʼi te ʼu fale pea mo kaihaʼa, mo fetauʼaki mo te tahi kau tama, pea mo nātou fefaifanaʼaki ʼi te ala.
Neʼe kamata suluka ia Tony ʼi tona taʼu hiva. ʼI tona taʼu 14, neʼe ina fakaʼaogaʼi te toloke ko te marijuana pea neʼe ina fai te ʼu aga heʼeʼaoga. ʼI tona taʼu 16, neʼe ina fakaʼaogaʼi te toloke ʼaē ko te héroïne, pea ki muli age ko te cocaïne, mo te toloke mālohi ʼaē ko te LSD. ʼE fakamahino fēnei e Tony: “Neʼe ʼau fakaʼaogaʼi ia meʼa fuli pe ʼaē neʼe feala ke puli ai toku ʼatamai.” Neʼe ina fakatuʼu tana faifakatau toloke mo te ʼu kautahi fai fakapō e lua neʼe ʼiloa. Mole tuai, pea neʼe ʼiloa ia Tony ko he tahi ʼe maʼuhiga ʼi te hahaʼi faifakatau toloke ʼi te potu esite ʼo Ositalalia.
ʼI te ʼaho fuli, neʼe ko tola e 160 ki te 320 neʼe foaki e Tony moʼo totogi ʼaki tana toloke ko te cocaïne pea mo te marijuana. Pea neʼe toe fakatupu tuʼutāmaki ki tona famili. ʼE ina ʼui fēnei: “Tuʼa lahi neʼe fakahaga mai te fana kia ʼau pea mo toku ʼohoana peʼe ko he hele e te hahaʼi fai fakapō, neʼe nātou kumi te toloke pea mo te paʼaga ʼaē neʼe maʼu ʼaki te ʼu meʼa ʼaē neʼe ma fakatau.” ʼI tona ʼosi pilisoniʼi tuʼa tolu, neʼe logoʼi e Tony ʼe tonu ke ina fakakaukauʼi tona maʼuli.
Logola neʼe faʼa ʼalu ki te ʼēkelesia, kae neʼe hage kia Tony neʼe mamaʼo ia mai te ʼAtua, ʼaē neʼe ʼui ʼe ina tutu ʼo heʼegata te kau agahala ʼi te afi moʼo tautea nātou. Kae ʼi te temi ʼaē neʼe ʼaʼahi ia ia e te taumatuʼa Fakamoʼoni ʼa Sehova, neʼe punamaʼuli ia Tony ʼi tana ʼiloʼi ʼaē ʼe mole feiā te ʼAtua. Pea neʼe fiafia ia Tony he neʼe feala ai ke ina fakatonutonuʼi tona maʼuli pea mo ina maʼu te ʼu tapuakina mai te ʼAtua. Neʼe loto mālohi ia Tony ʼi te ʼu palalau ʼaenī ʼa Sesu Kilisito: “E feala te meafuape ki te Atua.” (Maleko 10:27) Neʼe malave tāfito kia Tony te ʼu palalau fakaloto mālohi ʼaenī: “Koutou fakaovi ki te Atua pea e fakaovi atu anai kia koutou.”—Sakopo 4:8.
ʼI te temi leva ʼaia, neʼe ʼi ai te meʼa faigataʼa neʼe tonu ke fai e Tony moʼo faka ʼalutahi tona maʼuli pea mo te ʼu lekula ʼo te Tohi-Tapu. ʼE ina ʼui fēnei: “Ko te ʼuluaki meʼa ʼaē neʼe ʼau tuku neʼe ko te suluka, neʼe ko he meʼa neʼe mole feala ke ʼau fai ʼi muʼa atu, logola taku faiga tuʼa lahi. ʼAki te mālohi ʼaē neʼe haʼu mai ia Sehova, neʼe feala ke ʼau līaki te héroïne pea mo te marijuana, ko te ʼu agamāhani neʼe nātou puleʼi ʼau ʼi te ʼu taʼu e 15 ki muʼa atu. Neʼe mole ʼau manatu ʼe feala anai ʼi he temi ke ʼau tuku te ʼu meʼa māhani ʼaia neʼe ʼau fai.”
Neʼe mole matataku ia Tony pea mo tona ʼohoana ki he ʼAtua ʼe ina fakamamahiʼi te hahaʼi ʼi te afi heʼegata—ko he akonaki ʼe mole maʼu ʼi te Tohi-Tapu—kae neʼe nā maʼu te ʼamanaki ʼaē ke nā maʼuʼuli ʼo heʼegata ʼi te palatiso ʼi te kele. (Pesalemo 37:10, 11; Tāʼaga Lea 2:21) ʼE ʼui e Tony: “Neʼe ʼaoga he temi loaloaga pea mo haku ʼu faiga lahi ke feala ke ʼau faka ʼalutahi toku maʼuli mo te ʼu lekula ʼa te ʼAtua, kae ʼaki te tokoni ʼa Sehova neʼe ʼau lavaʼi.”
Ei, ko te tagata ʼaia ʼaē neʼe toloke ʼi te temi muʼa, kua liliu ʼi te temi nei ko he Kilisitiano. ʼI tana fia foaki tonā temi pea mo tonā ʼu koloā, ko ia pea mo tona ʼohoana ʼe nā fakaʼaogaʼi te ʼu lauʼi afe hola moʼo akoʼi te Tohi-Tapu ki te hahaʼi. ʼE nā toe maʼumaʼua ʼi te akoʼi ʼo tanā ʼu tamaliki e lua ke nā manavasiʼi ki te ʼAtua. Neʼe hoko te fetogi lahi ʼaia ʼaki te mālohi lahi ʼaupito ʼo te Folafola ʼa te ʼAtua, te Tohi-Tapu. Koia ohage ko tona ʼui e te ʼapositolo ko Paulo “e mauli te folafola a te Atua, pea e gaue.”—Hepeleo 4:12.
Logola te ʼu faʼifaʼitaki lelei ohage ko ia ʼaenī, kae ko ʼihi ʼe nātou fakafihiʼi kae mole hona tupuʼaga, ʼo nātou ʼui ko te ako ʼaē ʼe fai e te kau Fakamoʼoni ʼa Sehova ki te Tohi-Tapu, ʼe ina fakamavetevete te ʼu famili pea mo ina pulihi te ʼu meʼa ʼaē ʼe lelei ki te kau tūpulaga. ʼE mahino ia ko te hisitolia ʼo Tony ʼe ina fakahā te hala ʼo te ʼu palalau ʼaia.
Ohage ko Tony, tokolahi neʼe nātou ako ʼe feala ke nātou tuku tanatou palu te meʼa fakatupu mate ʼaē ko te toloke. ʼO feafeaʼi? ʼAki tanatou tui ki te ʼAtua pea mo falala kia te ia pea mo tana Folafola, pea ʼaki te tokoni ʼa te ʼu kaumeʼa Kilisitiano ʼaē ʼe ʼofa pea mo loto tokaga. ʼAki he loto fiafia, ʼe ʼui fēnei e Tony: “Neʼe ʼau sio ʼaki te ʼu pelesepeto ʼo te Tohi-Tapu ʼe puipui ai taku ʼu tamaliki. Neʼe hāofaki e te ako ʼo te Tohi-Tapu toku maʼuli faka taumatuʼa. Pea ʼi te temi nei ʼe momoe fīmālie toku vāhaʼa fale heʼe mole kei ʼau fakamatakuʼi he tahi.”
[Talanoa ʼo te pasina 9]
Te ʼu Pelesepeto Faka Tohi-Tapu ʼe Nātou Fetogi Te Maʼuli
Ko te ʼu pelesepeto faka Tohi-Tapu kehekehe neʼe nātou tokoni ki te tokolahi neʼe toloke, ke nātou līaki te agamāhani ʼaia ʼaē ʼe kovi kia nātou. ʼE kau kiai te ʼu pelesepeto ʼaenī:
“Tou fakamaʼa ia tatou mai te meʼa ʼuli fuli pe ʼo te kakano pea mo te laumālie, ʼo fakaʼosi te maʼoniʼoni ʼi te manavasiʼi ki te ʼAtua.” (2 Kolonito 7:1, MN ) Ko te palu ʼo te toloke ʼe fakafeagai ki te lao ʼa te ʼAtua.
“Ko te manavasiʼi kia Sehova ʼe ko te kamataʼaga ʼaia ʼo te poto, pea ko te ʼiloʼi ʼo te Maʼoniʼoni ʼAupito, koʼena ia te ʼatamai.” (Tāʼaga Lea 9:10) Ko te manavasiʼi kia Sehova ʼaē ʼe fakatafito ki te ʼatamai mālama ʼo ʼuhiga mo ia pea mo tona ʼu ala, neʼe tokoni ki te tokolahi ke nātou ʼāteaina mai te mālohi ʼo te toloke.
“Falala kia Sehova ʼaki tou loto katoa pea ʼaua naʼa ke falala ki tou ʼatamai totonu. ʼI tou ʼu ala fuli tokagaʼi ia ia, pea ko ia, ʼe ina fakatonutonuʼi anai tou ʼu ala foufou.” (Tāʼaga Lea 3:5, 6) ʼE feala ke tou fakagata he ʼu agamāhani ʼe kovi ʼaki tatatou falala mo totatou loto katoa ki te ʼAtua.
[Paki ʼo te pasina 9]
‘ ʼAki te mālohi ʼaē ʼe haʼu mai ia Sehova, neʼe feala ke ʼau līaki taku agamāhani ʼaē ko te toloke ʼaē neʼe ina puleʼi ʼau lolotoga taʼu e 15’