Te ʼu Fehuʼi ʼa Te Kau Lautohi
ʼE tali koa e te Tohi-Tapu ke hili e he Kilisitiano tona nima ki te Tohi-Tapu pea mo fakapapau ʼe ina tala anai te moʼoni ʼi te telepinale?
ʼE ʼa tatou takitokotahi te fai ʼo he tonu ʼo ʼuhiga mo te faʼahi ʼaia. (Kalate 6:5) Kae ʼe mole tapuʼi e te Tohi-Tapu hakita fakapapau ʼe kita tala anai te moʼoni ʼi te telepinale.
Ko te fai ʼo he fakapapau ʼe ko he aga kua lahi tona fai. Ohage foki la ʼi te ʼu temi muʼa, ko te kau Keleka, neʼe nātou hiki te nima peʼe nātou fāfā ki te ʼaletale mokā nātou fai he fakapapau. Ko te kau Loma, ka fai he fakapapau e he tahi, neʼe ina puke te foʼi maka ʼi tona nima pea mo ina fakapapau fēnei: “Kapau ʼe ʼau kākā ʼaki pe toku loto faʼitaliha, kae ʼe ina hāofaki te kolo pea mo te kolo tali tau, ke toʼo e [te ʼatua ko] Supitelo ia te ʼu meʼa lelei fuli ʼo toku maʼuli, ohage pe ko taku līaki te foʼi maka ʼaenī.”—Cyclopedia of Biblical, Theological, and Ecclesiastical Literature, tohi neʼe fai e John McClintock mo James Strong, ʼi te Fitu Tohi, ʼi te pasina 260.
Ko te ʼu faʼahiga fai ʼaia neʼe ko he fakahā ko te hahaʼi neʼe nātou ʼiloʼi ʼe ʼi ai te ʼatua ʼe maʼuli, pea ʼe ina sioʼi te ʼu aga ʼa te tagata pea ʼe ʼi ai tonatou ʼu maʼua ki te ʼatua ʼaia. Talu mai te ʼu temi muʼa, neʼe mahino ki te kau tauhi moʼoni ʼa Sehova, ʼe ina ʼiloʼi te ʼu palalau ʼaē ʼe nātou fai pea mo te ʼu aga ʼaē ʼe nātou fai. (Tāʼaga Lea 5:21; 15:3) Neʼe nātou fai te ʼu fakapapau ohage pe neʼe kau ai te ʼAtua, peʼe nātou faka ʼuhiga neʼe sio mata ia ia ki te fai ʼo te fakapapau. Ohage foki la, neʼe fai te faʼahi ʼaia e Poase, mo Tavite, mo Salomone, pea mo Setesiasi. (Lute 3:13; 2 Samuele 3:35; 1 Hau 2:23, 24; Selemia 38:16) Neʼe toe lotolelei pe foki e te kau tauhi ki te ʼAtua moʼoni ke fakamaʼua age ke nātou fai he ʼu fakapapau. Neʼe hoko te faʼahi ʼaia kia Apalahamo pea mo Sesu Kilisito.—Senesi 21:22-24; Mateo 26:63, 64.
ʼI ihi temi, neʼe ʼi ai te faʼahiga aga neʼe fai e ia ʼaē neʼe ina fai hana fakapapau ia muʼa ʼo Sehova. Neʼe ʼui e Apalamo (Apalahamo) ki te hau ʼo Sotoma: “ ʼE ʼau hiki toku nima ʼo fai te fakapapau kia Sehova, te ʼAtua Māʼoluga, ia Ia ʼaē neʼe ina fakatupu te lagi mo te kele.” (Senesi 14:22) Ko te ʼaselo ʼaē neʼe palalau ki te polofeta ko Taniela “neʼe ina hiki tona nima mataʼu mo tona nima hema ki te lagi pea mo fakapapau kia Ia ʼaē ʼe maʼuli ʼo aʼu ki he ʼu temi ʼe mole ʼiloʼi hona gataʼaga.” (Taniela 12:7) Māʼia foki mo te ʼAtua, ʼe ʼui ʼi he ʼaluʼaga fakatā ʼe ina hiki tona nima pea mo ina fai te fakapapau.—Teutalonome 32:40; Isaia 62:8.
ʼE mole tapuʼi e te Tohi-Tapu ke kita fai he fakapapau. Kae ʼe mole fai e he Kilisitiano he fakapapau ke hage ke fakamoʼoni ki te ʼu palalau fuli ʼaē ʼe ina fai. Neʼe ʼui fēnei e Sesu: “Ke pauga tau lea, kapau e ke ‘io’, pea e ‘io’, pea kapau e ‘kailoa’, pea e ‘kailoa.’ ” (Mateo 5:33-37) Neʼe tatau mo te palalau ʼa te tisipulo ko Sakopo. ʼI tana ʼui fēnei “aua naa koutou fuakava,” neʼe ina fai he fakatokaga ʼo ʼuhiga mo te ʼu fakapapau ʼaē neʼe hoko fai. (Sakopo 5:12) Neʼe mole ʼui e Sesu peʼe ko Sakopo ʼe kovi te fai ʼo he fakapapau moʼo tala ʼo te moʼoni ʼi he telepinale.
Koteā ʼe fai anai e he Kilisitiano mo kapau ʼe kole age ʼi te telepinale ke ina fakapapau ko te ʼu palalau ʼaē ka ina fai ʼe moʼoni? ʼE lagi ina fakafuafua anai ʼe ina lava fai he fakapapau ki te faʼahi ʼaia. Peʼe lagi fakagafua pe anai kia ia ke ina fakamoʼoni, ʼe mole loi.—Kalate 1:20.
Kapau ko he agamāhani ʼi he fale telepinale te hiki ʼo te nima peʼe ko te hili ʼo te nima ki te Tohi-Tapu kae fai he fakapapau, ʼe feala pe ki te Kilisitiano hana muliʼi te lekula ʼaia. ʼE lagi ina manatuʼi anai te ʼu faʼifaʼitaki faka Tohi-Tapu, ʼo te ʼu hahaʼi neʼe nātou fai te ʼu fakapapau pea mo nātou fai ai mo te ʼu aga ʼe fakapipiki tahi kiai. Kae ki he Kilisitiano, ko te faʼahi ʼaē ʼe maʼuhiga tāfito, ʼe mole ko te fakapapau ʼaē ʼe fai pea mo tana faʼahiga fai ia te fakapapau ʼaia, kae ko tana manatuʼi ʼe ina fakapapau ia muʼa ʼo te ʼAtua ʼe ina tala anai te moʼoni. Ko te taʼi fakapapau ʼaia ʼe ko he meʼa ʼe tonu ke fakakaukauʼi lelei. Kapau ʼe logoʼi e he Kilisitiano ʼe ina lavaʼi, pea mo tonu ke ina tali ki he fehuʼi ʼi te ʼu taʼi ʼaluʼaga ʼaia, pea ʼe tonu ke ina manatuʼi neʼe ina fai te fakapapau ke ina tala te moʼoni, pea ko te aga ʼaia ʼe tonu ke fai e he Kilisitiano ʼi te temi fuli pe.