Ko He ʼAho ʼe Tonu Ke Fakamanatu

NEʼE ko te ʼaho ʼaia ʼaē neʼe ina fetogi katoa te ka haʼu ʼo te malamanei ʼo feala ai ke ina maʼu he ʼu tapuakina heʼegata. ʼE mole ʼi ai he tahi age ʼaho ʼo te hisitolia ʼe malave ʼaupito ki te ka haʼu ʼo te malamanei. Neʼe ko te ʼaho ʼaia ʼaē neʼe ina fakakatoa te ʼu meʼa fuli ʼaē neʼe tupu ai tana haʼu ki te kele. Kua tutuki ia ia ʼi te pou fakamamahi, pea ʼi tana tūgaki fakaʼosi neʼe kalaga fēnei: “Kua katoa te meafuape.” (Soane 19:30) Koteā te tupuʼaga ʼo te haʼu ʼa Sesu ki te kele?

ʼE ʼui fēnei e te Tohi-Tapu: “Ko te Foha ʼo te tagata, neʼe mole haʼu ke tauhi ia ia, kaʼe ke tauhi pea mo ina foaki tona nefesi ko he totogi moʼo fetogi ʼaki ʼo te tokolahi.” (Mateo 20:28, MN ) Neʼe foaki e Sesu ia tona nefesi, peʼe ko tona maʼuli, ke feala ai he hāofaki ʼo te malamanei mai te agahala pea mo te mate ʼaē neʼe tuku holo age kia nātou. ʼI tona fakahagatonu, “nee ofa lahi te Atua ki te malama-nei, ko te tupuaga aia o tana foaki mai tona Alo Ulutokotahi, ke aua naa mate ia natou fuape e tui kia te ia, kae ke natou maù te mauli heegata.” (Soane 3:16) ʼE maʼuhiga ʼaupito ia te sakilifisio ʼa Sesu!

Ko te ʼaho ʼo te mate ʼo Sesu ʼe ko he ʼaho ʼe tonu ke fakamanatu koteʼuhi ʼe ʼi ai tona tahi tupuʼaga. ʼI te ʼaho ʼaia neʼe akoʼi age e te ʼAlo ʼo te ʼAtua ki tana kau ʼapositolo ia te ʼu ako maʼuhiga ʼaupito ʼe tokoni age anai kia nātou ke nātou haga nonofo agatonu. Neʼe malave ʼaupito tana ʼu palalau ki te ʼu loto ʼo te ʼu tisipulo ʼaia! Koteā koa te ʼu akonaki ʼaia? ʼE lava ʼaoga feafeaʼi kia tatou ia te meʼa ʼaē neʼe ina akoʼi age kia nātou? ʼE hoki tou tali anai ki te ʼu fehuʼi ʼaia ʼi te alatike ʼaē ʼe hoa mai.