Neʼe Maʼu e ʼIhi Te Tali Ki Tanatou ʼu Fehuʼi
KO TE ʼu lauʼi miliona hahaʼi ʼe nātou faikole. Ko ʼihi ʼe nātou faka tui ʼe nātou maʼu te ʼu tali ki tanatou ʼu faikole. Ko ʼihi ʼe nātou fia ʼiloʼi peʼe logoʼi tanatou ʼu faikole. Pea ko ʼihi ʼe nātou kumi he ʼu tali kae ʼe mole nātou fia faikole ki te ʼAtua ʼo ʼuhiga mo te ʼu faʼahi ʼaia.
ʼE ʼui e te Tohi-Tapu ko te ʼAtua moʼoni “ʼe fagono ki te faikole.” (Pesalemo 65:2) Kapau ʼe koutou faikole, pea ʼe koutou ʼiloʼi papau koa peʼe koutou faikole ki te ʼAtua moʼoni? Ko takotou ʼu faikole ʼe ko te ʼu faʼahiga faikole koa ʼaia ʼaē ʼe tali anai kiai te ʼAtua?
Ko te tokolahi ʼo te hahaʼi ʼi te potu fuli pe ʼo te kele, ʼe nātou iō kiai! Neʼe nātou maʼu feafeaʼi te ʼu tali? Koteā ʼaē neʼe nātou ako?
Ko Ai Koa Te ʼAtua?
Neʼe ʼi ai te fafine faiako ʼi Potukalia neʼe akoʼi ia ia e te ʼu taupoʼou pea mo te ʼu patele, pea neʼe ina maʼuliʼi moʼoni tana lotu. ʼI te temi ʼaē neʼe fetogi ai te lotu pea mo līaki ai te ʼu aga maʼuhiga ʼaē neʼe akoʼi age kia ia, neʼe faigataʼa tana mahino ki te faʼahi ʼaia. ʼI tana folau ki te tahi fenua neʼe sio ki te tauhi ʼaē ʼe fai ʼi te potu Esite, pea neʼe ina kamata feʼekeʼaki peʼe ʼi ai koa he ʼAtua moʼoni e tahi. Neʼe tonu koa ke feafeaʼi tana tauhi ki te ʼAtua? ʼI tana fehuʼi ʼaē ki te patele ʼo ʼuhiga mo te ʼu manatu ʼo te Tohi-Tapu, neʼe meʼa noaʼi tana ʼu fehuʼi, pea neʼe lotomamahi ai.
Neʼe tufa e te lotu Katolika te kaupepa ʼi te kolo ʼo te fafine faiako ʼaia moʼo fakatokaga te hahaʼi ke mole nātou fai palalau mo te kau Fakamoʼoni ʼa Sehova. Kae neʼe kei ina fai pe tana ʼu fehuʼi. ʼI te tahi ʼaho, ʼi te ʼolo age ʼa te kau Fakamoʼoni ki tona ʼapi, neʼe ina fakalogo pea neʼe ina fia ʼiloʼi te meʼa ʼaē neʼe logo kiai. Neʼe ko tana hoki fai palalau ʼaia mo nātou.
Moʼo tali ki tana ʼu tuʼuga fehuʼi, neʼe kamata ako te fafine ʼaia mo te kau Fakamoʼoni. ʼI te vāhaʼa fuli neʼe ina fai kia nātou tana ʼu tuʼuga fehuʼi. Neʼe ina fia ʼiloʼi te huafa ʼo te ʼAtua, peʼe ʼi ai koa he ʼAtua moʼoni e tahi, peʼe ina leleiʼia koa te fakaʼaogaʼi ʼo te ʼu paki ʼi te tauhi, pea mo te tahi atu ʼu fehuʼi. Neʼe ina tokagaʼi ko te ʼu tali fuli ʼaē neʼe fai age neʼe haʼu mai te Tohi-Tapu, kae neʼe mole ko he ʼu manatu faka tagata, koia neʼe punamaʼuli ai pea mo fiafia ʼi te ʼu meʼa ʼaē neʼe ina ako. ʼAki te temi, neʼe ina maʼu te ʼu tali ki tana ʼu tuʼuga fehuʼi. Ia ʼaho nei ʼe tauhi kia Sehova ʼaki te laumālie pea mo te moʼoni, ohage ko tona ʼui e Sesu Kilisito ʼo ʼuhiga mo “te kau atolasio mooni.”—Soane 4:23.
ʼI Sri Lanka, neʼe lau fakatahi tuʼumaʼu e te famili te Tohi-Tapu, kae neʼe mole nātou maʼu te ʼu tali ki te ʼu tuʼuga fehuʼi ʼaē neʼe maʼuhiga kia nātou. Neʼe tonu ki tanatou patele ke tokoni age kia nātou, kae neʼe mole ina lavaʼi te faʼahi ʼaia. Kae neʼe ʼaʼahi e te kau Fakamoʼoni ʼa Sehova te famili ʼaia, pea neʼe nātou tuku kia nātou te ʼu tohi faka Tohi-Tapu. Ki muli age, ʼi te kua tali age ʼa te kau Fakamoʼoni ʼa Sehova ki te ʼu fehuʼi faka Tohi-Tapu ʼa te famili, neʼe nātou tali ai he ako Tohi-Tapu. Ko te ʼu meʼa ʼaē neʼe nātou ako neʼe maʼuhiga ʼaupito kia nātou.
Kae ko te faʼe ʼo te famili ʼaia neʼe kua tauaka te ʼu akonaki faka lotu ʼaē neʼe akoʼi age kia ia talu mai tana kei veliveli, koia neʼe faigataʼa ai hana mahino ko te Tāmai ʼa Sesu Kilisito ʼe ko “te Atua e tahi mo mooni,” ohage ko tona ʼui e Sesu totonu. (Soane 17:1, 3) Neʼe akoʼi age kia ia ko Sesu ʼe tatau mo te Tāmai pea ko te “misitelio” ʼaia ʼe mole tonu ke fai kiai he kumi. ʼI tana kua lotovaivai, neʼe faikole fakamalotoloto kia Sehova, ʼo ina fakaʼaogaʼi tona huafa, pea neʼe ina kole ke ina fakahā age pe ko ai ia Sesu. Pea neʼe ina toe vakavakaʼi fakalelei te ʼu vaega tāfito. (Soane 14:28; 17:21; 1 Kolonito 8:5, 6) Neʼe mole kei kivi ʼo ʼuhiga mo te moʼoni, he neʼe kua mahino lelei leva kia ia ko Sehova—te Tupuʼaga ʼo te lagi pea mo te kele pea mo Tāmai ʼa Sesu Kilisito—ʼe ko te ʼAtua moʼoni.—Isaia 42:8; Selemia 10:10-12.
He Koʼe ʼe Tou Maʼuli Mamahi?
Neʼe lahi ʼaupito te ʼu mamahi ʼaē neʼe hoko ki te tagata ko Sopo. Neʼe mamate fuli tana ʼu tamaliki ʼi te afā, pea neʼe liliu ʼo masiva. Neʼe toe mamahi ʼuhi ko tona mahaki, pea neʼe ina kātakiʼi te ʼu fakakoviʼi ʼaē neʼe lau age e tona ʼu kaumeʼa loi. ʼI te hoko ʼo te ʼu meʼa fuli ʼaia, neʼe fai e Sopo te ʼu palalau neʼe mole ina fakakaukauʼi. (Sopo 6:3) Kae neʼe mahino ki te ʼAtua te ʼu ʼaluʼaga ʼaē neʼe hoko. (Sopo 35:15) Neʼe ina ʼiloʼi te loto ʼo Sopo pea neʼe ina foaki te tokoni ʼaē neʼe ʼaoga kia ia. ʼE ina toe fai te faʼahi ʼaia maʼa te hahaʼi ia ʼaho nei.
ʼI Mosapike, neʼe taʼu hogofulu ia Castro ʼi te temi ʼaē neʼe mate ai tana faʼe. Neʼe lotomamahi ʼaupito. Neʼe feʼekeʼaki fēnei: “He koʼe neʼe mate pea mo mavae ia tatou?” Logola neʼe pusiaki ia ia e te ʼu mātuʼa neʼe manavasiʼi ki te ʼAtua, kae neʼe lahi te ʼu fehuʼi neʼe ina fai. Koteā anai ka ina fakafimālieʼi tona ʼatamai pea mo tona loto? Neʼe ina maʼu te fīmālie ʼi tana lau te kiʼi Tohi-Tapu veliveli ʼi te lea faka Chichewa pea mo fai palalau kiai mo tona ʼu tēhina lalahi.
ʼAki te temi, neʼe mahino kia Castro ko tana faʼe neʼe mate, mole ʼuhi ko he aga heʼe faitotonu ʼa te ʼAtua, kae ʼuhi ko te agahala ʼaē neʼe tou maʼu mai tatatou ʼu mātuʼa. (Loma 5:12; 6:23) ʼAki te fakapapau ʼa te Tohi-Tapu ʼo ʼuhiga mo te fakatuʼuake, neʼe ina maʼu ai te fakaloto fīmālie lahi heʼe kua mahino kia ia, ʼe lava falala ʼe toe sio anai ki tana faʼe. (Soane 5:28, 29; Gaue 24:15) Hili pe taʼu e fā, pea mate tana tāmai. Kae neʼe kua feala leva kia Castro ʼi te temi ʼaia ke ina kātakiʼi te mate ʼo tana tāmai. Ia ʼaho nei, ʼe ʼofa kia Sehova pea ʼe ina fakaʼaogaʼi lelei tona maʼuli moʼo tauhi ki te ʼAtua. Ko te fiafia ʼaē ʼe ina maʼu ʼe hā lelei ki te hahaʼi fuli ʼaē ʼe nātou ʼiloʼi ia ia.
Ko te hahaʼi tokolahi ʼaē kua mate he tahi neʼe nātou ʼoʼofa ai, ʼe nātou maʼu he fakaloto fīmālie ʼi te ʼu moʼoni ʼa te Tohi-Tapu ʼaē neʼe nātou fakafimālieʼi ia Castro. Ko ʼihi ʼaē neʼe hoko kia nātou he mamahi lahi ʼuhi ko te aga ʼa te hahaʼi agakovi, ʼe nātou fehuʼi ohage ko Sopo: “He koʼe koa ʼe haga maʼuʼuli te kau agakovi?” (Sopo 21:7) Ka fakalogo moʼoni e te hahaʼi te tali ʼa te ʼAtua kia nātou ʼi tana Folafola, pea ʼe nātou ʼiloʼi ai ʼe fua lelei moʼoni kia nātou te faʼahiga fakatokatoka e te ʼAtua te ʼu meʼa.—2 Petelo 3:9.
Ko Barbara, ʼaē neʼe lahilahi ake ʼi Amelika, neʼe mole ina ʼiloʼi te fakalialia ʼo te tau. Kae neʼe lahilahi ake ʼi te temi ʼaē neʼe fetauʼaki ai te ʼu fenua. ʼI te ʼaho fuli, neʼe hā ʼi te ʼu tala logo te fakalialia ʼo te tau. ʼI te ʼu meʼa ʼaē neʼe ina ako ʼi te faleako, neʼe feʼekeʼaki ʼo ʼuhiga mo te ʼu meʼa fakapunamaʼuli ʼaē neʼe hoko ʼi te hisitolia. He koʼe koa neʼe hoko te ʼu meʼa ʼaia? ʼE tokagaʼi koa e te ʼAtua ia te ʼu meʼa ʼaē neʼe hoko? Neʼe faka tui ia Barbara ʼe maʼuli te ʼAtua, kae neʼe kehekehe tana ʼu manatu ʼo ʼuhiga mo ia.
Kae ʼaki te temi, neʼe fetogi māmālie te sio ʼa Barbara ki te maʼuli, ʼuhi ko tana fakatahi mo te kau Fakamoʼoni ʼa Sehova. Neʼe fakalogo ki tanatou ʼu fakamatala pea neʼe ina ako te Tohi-Tapu mo nātou. Neʼe kau ki te ʼu fono ʼi te Fale ʼo Te Puleʼaga, pea mo kau ki tanatou ʼu fakatahi lalahi. Tahi ʼaē meʼa, ʼi tana ʼu fai fehuʼi neʼe ina tokagaʼi neʼe mole kehekehe te ʼu manatu ʼa te kau Fakamoʼoni. Kae neʼe tatau tanatou ʼu tali he neʼe fakatafito tanatou ʼu manatu ki te Tohi-Tapu.
ʼAki te Tohi-Tapu, neʼe fakahā age e te kau Fakamoʼoni ʼe mulimuli te malamanei kia Satana te Tevolo, heʼe ko ia ʼaē ʼe pule kiai, pea ʼe hā ʼi te malamanei tana manatu. (Soane 14:30; 2 Kolonito 4:4; Efeso 2:1-3; 1 Soane 5:19) Neʼe nātou fakamahino age ko te ʼu meʼa ʼaē neʼe fia ʼiloʼi e Barbara, neʼe fakakikite e te Tohi-Tapu. (Taniela kapite 2, 7, pea mo te 8) Neʼe fakakikite e te ʼAtua te ʼu meʼa ʼaia heʼe feala ke sio ki te ka haʼu mokā ina loto kiai. Ko ʼihi ʼo te ʼu meʼa ʼaia neʼe fakahoko e te ʼAtua. Ko ʼihi neʼe ina fakagafua ke hoko. Neʼe fakahā e te kau Fakamoʼoni kia Barbara ʼe toe fakakikite foki e te Tohi-Tapu te ʼu meʼa ʼaē ʼe lelei pea mo te ʼu meʼa ʼaē ʼe kovi ʼaē neʼe hoko, pea ʼe fakamahino e te Tohi-Tapu tonatou faka ʼuhiga. (Mateo 24:3-14) Neʼe nātou fakahā age kia ia te ʼu fakapapau ʼa te Tohi-Tapu ʼo ʼuhiga mo he mālama foʼou, ʼe maʼu ai anai te faitotonu, pea ʼe pulihi anai te ʼu mamahi.—2 Petelo 3:13; Apokalipesi 21:3, 4.
ʼAki te temi, neʼe mahino ai kia Barbara logola ʼe mole ko Sehova ʼaē ʼe tupu ai te maʼuli mamahi ʼa te hahaʼi, kae ʼe mole ina tāʼofi te hoko ʼo te ʼu meʼa ʼaia, ʼo ina fakakinauʼi te tagata ke fakalogo ki tana ʼu fakatotonu kae ʼe mole nātou loto kiai. (Teutalonome 30:19, 20) Neʼe fai e te ʼAtua te ʼu fakatuʼutuʼu ke feala hatatou maʼuʼuli ʼo heʼegata ʼi te fiafia, kae ʼe ina foaki ʼi te temi nei te faigamālie ke tou fakahā peʼe tou maʼuʼuli anai ʼo mulimuli ki tana ʼu ala faitotonu. (Apokalipesi 14:6, 7) Neʼe fai e Barbara te tonu ʼaē ke ina ako te ʼu meʼa ʼaē ʼe fakamaʼua e te ʼAtua pea mo mulimuli kiai. Neʼe ina toe maʼu ʼi te kau Fakamoʼoni ʼa Sehova te faʼahiga ʼofa ʼaē neʼe ʼui e Sesu ka ʼiloʼi ʼaki anai tana kau tisipulo moʼoni.—Soane 13:34, 35.
ʼE feala mo koutou ke koutou ʼiloʼi te ʼu fakatuʼutuʼu ʼaē neʼe tokoni kia Barbara.
ʼE ʼi Ai Te Faka ʼUhiga ʼo Te Maʼuli
Māʼia mo nātou ʼaē ʼe hage ʼe nātou fiafia ʼi tonatou maʼuli ʼe lagi nātou kumi te ʼu tali ki te ʼu fehuʼi ʼaē ʼe nātou fai. Ohage la, ko Matthieu ko te tūpulaga ʼi Pilitania, neʼe holi mālohi ke ina maʼu te ʼAtua moʼoni pea mo te faka ʼuhiga ʼo te maʼuli. Neʼe mate tana tāmai ʼi te taʼu 17 ʼo Matthieu. Ki muli age, neʼe maʼu e Matthieu tona pepa fai musika ʼi te univelesitē. Neʼe mahino māmālie kia ia te vaʼiganoa ʼo tana kumi te ʼu koloā ʼi tona maʼuli. Neʼe mavae ʼi tona ʼapi ʼo ʼalu ʼo nofo ʼi Lonitoni pea neʼe ina palu te toloke, neʼe ʼalu ki te ʼu fale meʼe, neʼe gaohi meʼa faifakalauʼakau, pea mo kau ki te Ako Putisi ko te Zen, pea mo te tahi ʼu filosofia—neʼe ko tana fia maʼu ʼaia ia te fīmālie ʼo te maʼuli. ʼI tana lotovaivai neʼe ina kole ki te ʼAtua ke tokoni kia ia ke ina maʼu te moʼoni.
Hili ʼaho e lua neʼe felāveʼi ia Matthieu mo tona kaumeʼa kua fualoa tanā feʼiloʼiʼaki, pea neʼe ina fakamahino age kia ia tona ʼaluʼaga. Neʼe ako te tagata ʼaia mo te kau Fakamoʼoni ʼa Sehova. ʼI tana fakahā age kia Matthieu te vaega ʼo 2 Timoteo 3:1-5, neʼe punamaʼuli ʼi te fakamatala lelei ʼa te Tohi-Tapu te ʼaluʼaga ʼo te malamanei. ʼI tana lau te Akonaki ʼi te Moʼuga, neʼe malave ki tona loto. (Mateo, kapite 5 ki te 7) ʼI te kamata, neʼe lotolotolua he neʼe ina lau te ʼu tohi neʼe laukoviʼi ai te kau Fakamoʼoni ʼa Sehova, kae ki muli age neʼe ina fakatotonu ke kau ki te ʼu fono ʼi te Fale ʼo Te Puleʼaga ʼaē neʼe ōvi age ki tona ʼapi.
Neʼe leleiʼia e Matthieu te ʼu meʼa ʼaē neʼe logo kiai, pea neʼe ina kamata tana ako Tohi-Tapu mo te tagata ʼāfea ʼi te kokelekasio. Mole tuai, pea neʼe mahino kia ia ko te meʼa ʼaē neʼe ina lolotoga ako neʼe ko te meʼa ʼaē neʼe ina kumi, te tali ki te faikole ʼaē neʼe ina fai ʼi muʼa atu ki te ʼAtua. Neʼe ina maʼu te ʼu lelei ʼi tana līaki te ʼu aga ʼaē neʼe mole leleiʼia e Sehova. ʼI tana fakatuputupu tana manavasiʼi ki te ʼAtua, neʼe uga ai ia ia ke ina faka ʼalutahi tona maʼuli mo te ʼu fakatotonu ʼa te ʼAtua. Neʼe ʼiloʼi ai e Matthieu ʼe ʼi ai te faka ʼuhiga moʼoni ʼo te maʼuli.—Tagata Tānaki 12:13.
Neʼe mole heʼeki tohi fakatomuʼa ʼe maʼuli fiafia anai ia Matthieu pea mo nātou ʼaē ʼe talanoa kiai te alatike ʼaenī. Kae neʼe nātou ako ʼe ʼi ai te fakatuʼutuʼu ʼofa ʼa Sehova ʼAtua maʼa nātou fuli ʼaē ka nātou fili ʼaki he loto fakafiafia ke nātou fakalogo ki tana ʼu fakatotonu. (Gaue 10:34, 35) ʼE kau ki te fakatuʼutuʼu ʼaia te maʼuli heʼegata ʼi he mālama ʼe mole toe maʼu ai te tau, mo te mahaki pea mo te pakupaku, pea mo maʼu ai te ʼāteaina mai te mate. (Isaia 2:4; 25:6-8; 33:24; Soane 3:16) ʼE ko te ʼu ʼaluʼaga koa ʼaia ʼaē ʼe koutou loto kiai? Kapau koia, ʼe lahi te ʼu meʼa ʼe feala ke koutou ako ke koutou maʼu he maʼuli fakafiafia, ʼo koutou kau ki te ʼu fono ʼaē ʼe fakatafito ki te Tohi-Tapu, ʼi te Fale ʼo Te Puleʼaga ʼa te kau Fakamoʼoni ʼa Sehova. ʼE fakaafe atu koutou ke koutou fai te faʼahi ʼaia.
[Paki ʼo te pasina 7]
Koutou faikole fakamalotoloto ki te ʼAtua, ʼo fakaʼaogaʼi tona huafa
[Paki ʼo te pasina 7]
Koutou ako te Tohi-Tapu mo nātou ʼaē ʼe nātou ako moʼoni te meʼa ʼaē ʼe tuʼu ʼi loto
[Paki ʼo te pasina 7]
Koutou kau ki te ʼu fono ʼi te Fale ʼo Te Puleʼaga
[Haʼuʼaga ʼo te paki pasina 4]
Hiker: Chad Ehlers/Index Stock Photography