Koutou Fakafimālie Ia Nātou ʼe Lotomamahi

“Ko Sehova neʼe ina fakanofo ʼau . . . moʼo fakafimālieʼi ia nātou fuli ʼe putu.—Isaia 61:1, 2.

1, 2. Ko ai ʼaē ʼe tonu ke tou fakafimālieʼi, pea koteā tona tupuʼaga?

KO SEHOVA ia te ʼAtua ʼo te fakafimālie fuli ʼe ina akoʼi mai, ʼe tonu ke tou tokaga ki te hahaʼi mokā ʼe nātou tau mo ni ʼu fihifihia. ʼE ina akoʼi mai ke tou “fai he ʼu palalau fakaloto fīmālie ki te ʼu nefesi ʼaē ʼe lotomamahi” pea mo fakafimālieʼi ia nātou fuli ʼe putu. (1 Tesalonika 5:14, MN) Kapau ʼe ʼaoga he tokoni feiā, ʼe tou foaki ki totatou ʼu tēhina mo tuagaʼane fakalaumālie. ʼE tou toe ʼofa foki kia nātou ʼi tuʼa atu ʼo te kokelekasio, ʼo feiā mo nātou ʼaē neʼe lagi fehiʼa kia tatou ʼi muʼa atu.—Mateo 5:43-48; Kalate 6:10.

² Neʼe lau e Sesu Kilisito pea mo ina faka ʼuhiga kia ia totonu te gāue faka polofeta ʼaenī: “Ko Sehova neʼe ina fakanofo ʼau ke ʼau fakahā ki te kau agavaivai he logo lelei. Neʼe ina fekauʼi ʼau ke ʼau faitoʼo ia nātou ʼe lotomamahi . . . moʼo fakafimālieʼi ia nātou fuli ʼe putu.” (Isaia 61:1, 2; Luka 4:16-19) Neʼe kua mahino talu mai fualoa ki te kau Kilisitiano fakanofo ʼo te temi nei, ʼe toe kau foki mo nātou ki te gāue ʼaia, pea ko te “tahi ʼu ōvi” ʼe nātou fakatahi fakafiafia kia nātou ʼi te gāue ʼaia.—Soane 10:16, MN.

3. ʼE lava feafeaʼi hatatou tokoni ki te hahaʼi mokā ʼe nātou lagaʼi te fehuʼi ʼaenī, “He koʼe ʼe fakagafua e te ʼAtua te ʼu malaʼia?”

³ Ka hoko he ʼu tuʼutāmaki, pea ko te hahaʼi ʼe nātou lotomamahi, ʼo nātou tautau lagaʼi te fehuʼi ʼaenī: “He koʼe ʼe fakagafua e te ʼAtua te ʼu malaʼia?” ʼE tali fakalelei te Tohi-Tapu ki te fehuʼi ʼaia. Kae ko he tahi neʼe mole ina ako te Tohi-Tapu, ʼe lagi tuai anai hana mahino katoa ki te tali. ʼE feala ke maʼu he ʼu tokoni ʼi te ʼu tohi faka Tohi-Tapu ʼa te kau Fakamoʼoni ʼa Sehova.a Kae ʼi te kamata, ko ʼihi neʼe nātou maʼu he fakafimālieʼi ʼaki pe tanatou lau he vaega faka Tohi-Tapu, ohage la ko te koga tohi ʼo Isaia 61:1, 2, heʼe fakahā ai te loto ʼo te ʼAtua ke maʼu e te hahaʼi te fakafimālie.

4. Neʼe lava tokoni feafeaʼi te Fakamoʼoni ʼi Polonia ki te kiʼi finemui kei ako, pea ʼe lava tokoni feafeaʼi te faʼifaʼitakiʼi ʼaia kia koutou ke koutou tokoni ki niʼihi?

⁴ ʼE ʼaoga te fakafimālie ki te hahaʼi tūpulaga, pea mo te hahaʼi matutuʼa. Ko te kiʼi finemui ʼi Polonia neʼe lotovaivai pea neʼe kole tokoni ki tona kaumeʼa fafine. ʼAki te ʼu fehuʼi fakapotopoto ʼaē neʼe lagaʼi e tona kaumeʼa ʼaē neʼe ko te Fakamoʼoni ʼa Sehova, neʼe mahino kia ia ko te kiʼi finemui neʼe nofo hoha mo tana ʼu fehuʼi pea mo tana ʼu lotolotolua: “He koʼe ʼe lahi ʼaupito te agakovi? He koʼe ʼe maʼuli mamahi te hahaʼi? He koʼe ʼe maʼuli mamahi toku taʼokete ʼaē ʼe māʼimoa? He koʼe ʼe ʼau mahaki mafu? ʼE ʼui e te ’Ēkelesia ʼe ko te finegalo ʼaia ʼo te ʼAtua. Kae kapau koia, ʼe mole ʼau toe tui anai kia te ia!” Neʼe faikole fakalogologo te Fakamoʼoni kia Sehova pea neʼe ina ʼui age: “ʼE ʼau fiafia ʼi tau fai mai ia tau ʼu fehuʼi ʼaia. ʼE ʼau fia tokoni atu anai kia koe.” Neʼe ina ʼui age ʼi tana kei veliveli neʼe lotolotolua, pea ko Sehova neʼe tokoni age kia ia. Neʼe ina fakamahino fēnei: “Neʼe ʼau ako ko te ʼAtua ʼe mole ina fakamamahiʼi te hahaʼi. ʼE ʼofa kia nātou, ʼe loto ki te meʼa ʼaē ʼe lelei maʼa nātou, pea kua vave hoko mai te temi ʼaē ka ina fai anai he ʼu fetogi lahi ʼi te kele. ʼE pulihi anai te mahaki, te ʼu fihifihia ʼuhi ko te temi matuʼa, pea mo te mate, pea ko te hahaʼi ʼe nātou maʼuʼuli anai ʼo talu ai—ʼi te kele ʼaenī.” Neʼe ina lau age ki te kiʼi finemui te ʼu koga tohi ʼo Apokalipesi 21:3, 4; Sopo 33:25; Isaia 35:5-7 mo te 65:21-25. ʼI tanā ʼosi palalau loaloaga, neʼe ʼui fēnei age e te kiʼi finemui, ʼaē ʼe ʼiloga kua ina maʼu he fakafimālie: “Kua ʼau ʼiloʼi nei te ʼuhiga ʼo taku maʼuli. ʼE feala la ke tā toe felāveʼi?” Neʼe kamata te ako Tohi-Tapu, pea neʼe fai tuʼa lua ʼi te vāhaʼa.

Te Fakafimālie ʼAē ʼe Foaki e Te ʼAtua

5. Ka tou agalelei, koteā anai te fakafimālie moʼoni ka tou foaki?

⁵ Ka tou fia fakafimālie te hahaʼi, ʼe mahino ia ʼe lelei mokā kita fai ni ʼu palalau logo lelei. Tou faiga ke tou fakahā ʼi tatatou ʼu palalau pea mo totatou leʼo kia ia ʼaē ʼe lotomamahi ʼe tou tokaga fakamalotoloto ki tona fihifihia. ʼE mole feala ia ke ʼi ai he fakafimālie mo kapau ʼe mole ʼi ai he fakamalotoloto. ʼE ʼui mai e te Tohi-Tapu “ʼaki tatatou faʼa kātaki pea mo te fakaloto fīmālie ʼaē ʼe haʼu mai te Tohi-Tapu ʼe feala ke tou maʼu te falala.” (Loma 15:4, MN) ʼO ʼuhiga mo te faʼahi ʼaia, ʼe feala ke tou fakamahino ʼi he temi faigamālie pe koteā te Puleʼaga ʼo te ʼAtua, pea mo fakahā age ʼi te Tohi-Tapu peʼe ina fakatokatoka feafeaʼi anai te ʼu fihifihia ʼo te temi nei. ʼOsi ʼaia pea ʼe feala ke tou fakamahino lelei age kia ia pe koʼe ʼe tou lava falala ki te ʼamanaki ʼaia. Kapau ʼe tou fai feiā, ʼe tou foaki anai te fakafimālie.

6. Koteā ʼaē ʼe tonu ke tou fai moʼo tokoni ki te hahaʼi ke nātou mahino ʼe feala ke nātou maʼu katoa te fakafimālie mai te Tohi-Tapu?

⁶ Ke maʼu katoa e he tahi te fakafimālie ʼaē ʼe tou foaki age, ʼe tonu ke ina ʼiloʼi te ʼAtua moʼoni, te ʼulugaaga ʼo te ʼAtua ʼaia, pea mo te moʼoni ʼo tana ʼu fakapapau. Kapau ʼe tou fia tokoni ki he tahi ʼe mole heʼeki kaugana kia Sehova, ʼe lelei ke tou fakamahino age te ʼu puani ʼaenī. (1) Ko te fakafimālie ʼaē ʼe maʼu ʼi te Tohi-Tapu ʼe haʼu mai ia Sehova, te ʼAtua moʼoni. (2) Ko Sehova ʼe ko te Māfimāfi, te Tupuʼaga ʼo te lagi pea mo te kele. ʼE ko te ʼAtua ʼofa pea ʼe mahu ʼi te lotolelei pea mo te moʼoni. (3) ʼE tou lava lotomālohi moʼo ʼutakiʼi ni ʼu ʼaluʼaga mo kapau ʼe tou fakaōvi ki te ʼAtua ʼaki te ʼatamai mālama ʼaē ʼe haʼu mai tana Folafola. (4) ʼE fakahā ʼi te Tohi-Tapu te ʼu fakamatala ʼo te ʼu fihifihia neʼe hoko ki te ʼu hahaʼi kehekehe.

7. (a) Koteā ʼaē ʼe lava fai moʼo fakahāhā lelei ko te fīmālie ʼaē ʼe foaki e te ʼAtua ‘ʼe mahu ia Kilisito’? (b) ʼE tou lava fakafimālieʼi feafeaʼi he tahi ʼe ina ʼiloʼi te kovi ʼo tana aga?

⁷ Neʼe foaki e ʼihi te tapuakina fakalaumālie ki te hahaʼi lotomamahi ʼaē kua nātou mahino ki te Tohi-Tapu, ʼo nātou lau age ia 2 Kolonito 1:3-7 (MN). ʼI tanatou lau te vaega ʼaia, neʼe nātou faka maʼuhigaʼi tāfito te ʼu kupu “ko te fakaloto fīmālie ʼaē ʼe tou maʼu, ʼe toe mahu foki ia Kilisito.” ʼE feala ke tokoni te vaega ʼaia ki he tahi ke mahino ko te Tohi-Tapu ʼe ko te matapuna ʼo te fakafimālie ʼaē ʼe tonu ke faka maʼuhigaʼi ʼaupito. ʼE toe feala foki ke liliu te faʼahi ʼaia ko te fakatafitoʼaga ki he tahi fai palalau, lagi ʼi he tahi ʼu lakaga. Kapau ʼe logoʼi e he tahi ko tona ʼu mamahi ʼe tupu mai te ʼu meʼa kovi ʼaē neʼe ina fai, pea ʼe mole tou fakamāuʼi anai ia ia, kae ʼe lagi tou ʼui age anai ki ai ʼe ko he meʼa fakaloto fīmālie hana ʼiloʼi te meʼa ʼaē ʼe tohi ia 1 Soane 2:1, 2 pea mo Pesalemo 103:11-14. ʼAki tatatou fai ʼaia, ʼe tou fakafimālieʼi moʼoni te hahaʼi ʼaki te fakafimālie ʼaē ʼe foaki mai e te ʼAtua.

Ka Ko He Agamālohi Peʼe Ko He ʼu Faigataʼaʼia Faka Ekonomika

8, 9. E feafeaʼi he foaki fakalelei ʼo he fakafimālie ki te hahaʼi ʼaē ʼe maʼuli mamahi ʼuhi ko te agamālohi?

⁸ Ko te ʼu lauʼi miliona hahaʼi ʼe nātou maʼuli mamahi ʼuhi ko te agamālohi—ko te agamālohi ʼe fakahoko e he kūtuga peʼe ko te agamālohi ʼo te tau. E feafeaʼi hatatou fakafimālieʼi ia nātou?

⁹ ʼE tokakaga te kau Kilisitiano moʼoni ke ʼaua naʼa nātou fai he ʼu palalau peʼe ko he ʼu aga ʼe ʼasi ai ʼe nātou lagolago ki he faʼahiga koga ʼo te ʼu fihi ʼo te malamanei. (Soane 17:16) Kae ʼe nātou fakaʼaogaʼi fakalelei te Tohi-Tapu moʼo fakahā ko te ʼu ʼaluʼaga fakamamahi ʼo te temi nei ʼe mole hoko anai ʼo talu ai. ʼE feala ke nātou lau ia Pesalemo 11:5 moʼo fakahā te meʼa ʼe logoʼi e Sehova ʼo ʼuhiga mo nātou ʼaē ʼe manako ki te agamālohi, peʼe ko Pesalemo 37:1-4 moʼo fakahā te fakaloto mālohi ʼa te ʼAtua, ke mole tou fia lagavaka, kae ke tou falala ki te ʼAtua. ʼE fakahā e te ʼu palalau ʼo Pesalemo 72:12-14 ia te meʼa ʼaē ʼe logoʼi e te Salomone Lahi, ia Sesu Kilisito, ʼaē ʼe hau nei ʼi selo, ʼo ʼuhiga mo te hahaʼi ʼaē ʼe mole nātou fai he meʼa ʼe kovi kae nātou maʼuli mamahi ʼuhi ko te agamālohi.

10. Kapau la ʼe koutou maʼuʼuli lotolotoga he ʼu temi ʼe hoko tuʼumaʼu ai he ʼu tau, e feafeaʼi la he lava fakafimālieʼi ʼo koutou e te ʼu vaega faka Tohi-Tapu ʼaenī?

¹⁰ Kua lahi te ʼu tau neʼe kātakiʼi ʼe te hahaʼi ʼe faiga ai ni ʼu kūtuga ke nātou maʼu te tuʼulaga pule. Maʼa nātou, ko te tau mo te ʼu ikuʼaga ʼo te tau, ʼe ko te ʼu ʼaluʼaga ia ʼo te maʼuli. Ko te ʼamanaki pe e tahi ʼe hage ʼe lelei kia nātou ʼe ko tanatou feholaki ki he tahi fenua. Kae tokolahi te hahaʼi neʼe mole nātou lava fakahoko te faʼahi ʼaia ke tō lelei kia nātou, pea neʼe kaugamālie ia nātou neʼe nātou faigaʼi ke nātou feholaki kua nātou mamate. Ko nātou ʼaē neʼe feholaki ki he tahi fenua neʼe nātou toe felāveʼi mo te tahi ʼu fihifihia. ʼE feala ke fakaʼaogaʼi ia Pesalemo 146:3-6 moʼo tokoni ki te faʼahiga hahaʼi ʼaia ke nātou falala ki he meʼa ʼe maʼuhiga age ʼi tanatou feholaki ki he tahi fenua. ʼE feala ke tokoni age kia nātou ia te lea faka polofeta ʼo Mateo 24:3, 7, 14 peʼe ko 2 Timoteo 3:1-5 ke nātou sio katoa pea mo mālama age ki te ʼuhiga ʼo te ʼu ʼaluʼaga ʼaē ʼe nātou kātakiʼi, ko tona fakaliliu, ʼe tou maʼuʼuli nei ʼi te fakaʼosi ʼo te tuʼu ʼo te ʼu faʼahiga meʼa ʼaenī. Ko te ʼu vaega ohage ko Pesalemo 46:1-3, 8, 9 pea mo Isaia 2:2-4 ʼe feala ke tokoni kia nātou ke nātou mahino ʼe ʼi ai moʼoni te ʼamanaki ki he ka haʼu fīmālie.

11. Koteā te ʼu vaega neʼe nātou fakafimālieʼi te fafine ʼi te Potu Uesite ʼo Afelika, pea koteā tona tupuʼaga?

¹¹ Lolotoga te temi neʼe fai hoholo ai te tau ʼi te Potu Uesite ʼo Afelika, neʼe hola te fafine mai tona ʼapi kae lolotoga hoko te ʼu pa fana. Neʼe maʼuli pe ʼi te mataku, mo te lotomamahi. Ki muli age, ʼi te lolotoga mavae ʼo tona famili ke nātou ʼolo ki te tahi fenua, neʼe fakatotonu e tona ʼohoana ke ina haeʼi tanā ʼu pepa fakamoʼoni ʼo tonā ʼohoana, pea mo ina kapu ia ia logola neʼe faitama, pea mo tanā tama ʼaē neʼe taʼu hogofulu, kae liliu ia ko he patele. ʼI te temi ʼaē neʼe lau age ki te fafine ia Filipe 4:6, 7 mo Pesalemo 55:22, pea mo te ʼu alatike mai Te Tule Leʼo pea mo te Réveillez-vous !, neʼe hoki ina maʼu ai leva he fakafimālie pea mo he ʼuhiga ki te maʼuli.

12. (a) Koteā te fakafimālie ʼe fai e te Tohi-Tapu kia nātou ʼaē ʼe taʼomia ʼi te faʼahi faka ekonomika? (b) Neʼe tokoni feafeaʼi te Fakamoʼoni ʼi Asia ki te fafine neʼe haʼu ʼo faifakatau?

¹² Ko te ʼu lauʼi miliona hahaʼi kua nātou liliu ʼo māsisiva ʼuhi ko te kua masiva ʼo te fenua ʼi te faʼahi faka ekonomika. ʼI ʼihi temi ʼe feiā te ʼaluʼaga ʼuhi ko te tau pea mo tona ʼu ikuʼaga. ʼI ʼihi lakaga, ko te ʼu fai politike fakavalevale pea mo te mānumānu ʼa nātou ʼaē ʼe nātou puleʼi te fenua, neʼe nātou ʼaumai ai te hahaʼi ke nātou fakaʼaogaʼi fuli ʼonatou koloā pea mo fakakinauʼi te hahaʼi ke nātou līaki ʼonatou koloā. Ko ʼihi neʼe mole heʼeki feala ke nātou maʼu lahi honatou ʼu koloā ʼo te mālama ʼaenī. Neʼe feala ke maʼu he fakafimālie ʼi te mahino ʼaē ʼe fakahoko anai e te ʼAtua he fakafimālie maʼa nātou ʼaē ʼe nātou falala kia te ia, pea mo ina fakapapau age kia nātou he mālama faitotonu ʼe feala ai anai he fakafiafia ʼo te hahaʼi ki te gāue ʼo tonatou ʼu nima. (Pesalemo 146:6, 7; Isaia 65:17, 21-23; 2 Petelo 3:13) ʼI te fenua ʼo Asia, ko te Fakamoʼoni neʼe ina logoʼi te fafine neʼe haʼu ʼo faifakatau neʼe ina fakahā tana tuʼaniaʼi te ʼaluʼaga faka ekonomika, pea neʼe fakamahino age e te tuagaʼane ko te meʼa ʼaē neʼe lolotoga hoko ʼi te fenua ʼaia, neʼe ko he koga pe ia ʼo te ʼu meʼa ʼaē ʼe hoko ʼi te malamanei katoa. Ko te fai palalau ʼo fakatafito kia Mateo 24:3-14 pea mo Pesalemo 37:9-11 neʼe iku ai leva ki te fai ʼo te ako Tohi-Tapu.

13. (a) Ka maʼuli mamahi te hahaʼi ʼuhi ko he ʼu fakapapau loi, e feafeaʼi hatatou lava fakaʼaogaʼi te Tohi-Tapu moʼo tokoni age kia nātou? (b) Kapau ʼe manatu e te hahaʼi ko te ʼaluʼaga fakaʼofaʼofa ʼe ko te fakamoʼoni ʼaia ʼe mole ʼi ai he ʼAtua, e feafeaʼi hakotou fai age kia nātou he ʼu fakamahino?

¹³ Kapau kua fualoa te maʼuli mamahi ʼa te hahaʼi peʼe kua nātou lotomamahi ʼi te ʼu fakapapau loi, ʼe feala ke nātou hage ko te kau Iselaele ʼi Esipito ʼaē neʼe mole kei fakalogo “ʼuhi ko tanatou lotovaivavai.” (Ekesote 6:9) ʼI te ʼu taʼi lakaga ʼaia, ʼe lagi ʼaoga ke fakahā te ʼu puleʼaki ʼe lava tokoni ai te Tohi-Tapu kia nātou ke nātou tauʼi fakalelei tonatou ʼu fihifihia ʼo te temi nei, pea mo nātou fakamamaʼo mai te ʼu hele ʼaē ʼe feala ke fakatupu mamahi noa ki ʼihi. (1 Timoteo 4:8b) ʼE feala ke ʼui e ʼihi ʼo ʼuhiga mo tonatou ʼu ʼaluʼaga fakaʼofaʼofa, ʼe mole ʼi ai he ʼAtua peʼe mole tokaga age kia nātou. ʼE feala koa hakotou fakamahinohino age he ʼu vaega ʼe tokoni kia nātou ke nātou mahino ko te ʼAtua ʼe ina foaki te tokoni kae tokolahi ʼe nātou lītuʼa kiai.—Isaia 48:17, 18.

Ka Hoko He ʼu Afā Pea Mo He ʼu Mafuike

14, 15. Ka mamahi he tokolahi ʼuhi ko te ʼu meʼa fakamataku ʼaē neʼe hoko kia nātou, neʼe fakahā feafeaʼi e te kau Fakamoʼoni ʼa Sehova tonatou loto tokaga?

¹⁴ ʼE lagi hoko he tuʼutāmaki tupu mai he afā, peʼe ko he mafuike, peʼe ko he vela peʼe ko he paʼulu. Kua lagi tokolahi te hahaʼi ʼaē ʼe mamahi. Koteā te faʼahiga fakafimālie ʼe feala ke fai kia nātou ʼaē neʼe hāo?

¹⁵ ʼE ʼaoga ke ʼiloʼi e te hahaʼi ʼe ʼi ai te tahi ʼe tokaga age kia nātou. Ka hoko he fai fakapō ʼi he fenua, pea tokolahi te hahaʼi neʼe nātou punamaʼuli. Kaugamālie ia nātou kua mamate honatou ʼu famili, peʼe ko he tahi neʼe ina taupau te maʼuli ʼo te famili, peʼe ko honatou ʼu kaumeʼa. Ko ʼihi ʼe mole kei ʼi ai hanatou gāue peʼe ko he faʼahiga meʼa pe neʼe nātou maʼuli fīmālie ai. Neʼe ʼolo te kau Fakamoʼoni ʼa Sehova ʼo tokoni kia nātou ʼo tonatou nofoʼaga, ʼo nātou tokoni fakamalotoloto ki te hahaʼi ʼo ʼuhiga mo tanatou ʼu meʼa ʼaē kua maumau, pea mo foaki age kia nātou he ʼu palalau fakafimālie mai te Tohi-Tapu. Tokolahi te hahaʼi neʼe nātou leleiʼia te taʼi loto tokaga ʼaia.

16. ʼI te tuʼutāmaki ʼaē neʼe hoko ʼi te koga meʼa ʼi El Salvador, he koʼe neʼe fua lelei te gāue fai faka mafola ʼa te ʼu Fakamoʼoni ʼo te koga meʼa ʼaia?

¹⁶ ʼI El Salvador neʼe hoko ai te mafuike lahi pea mo te tafe ʼo te toe pela ki te kolo, ʼo mamate ai te tokolahi. Neʼe mamate ai te tama neʼe taʼu 25 ʼa te fafine Fakamoʼoni, pea mo te ʼu tēhina veliveli ʼo te taʼahine ʼaē neʼe nā fakatahi. Ko te faʼe ʼa te tama ʼo kau ai mo te taʼahine ʼaē neʼe fakatahi mo tana tama, neʼe nā foimo maʼumaʼua atu aipe ʼi te gāue fai faka mafola. Tokolahi neʼe nātou ʼui kia nāua neʼe ko te ʼAtua ʼaē neʼe ina toʼo ia nātou ʼaē kua mamate, peʼe nātou ʼui neʼe ko te finegalo ʼo te ʼAtua. Neʼe lau age e te ʼu Fakamoʼoni ia Tāʼaga Lea 10:22 moʼo fakahā age kia nātou ʼe mole loto e te ʼAtua ke tou maʼuli mamahi. Neʼe nā lau age mo Loma 5:12 moʼo fakahā age ko te mate neʼe maʼu mai te agahala, kae neʼe mole ko he finegalo ia ʼo te ʼAtua. Neʼe nā toe fakahā age pe foki te logo ʼaē ʼe maʼu ia Pesalemo 34:18, Pesalemo 37:29, Isaia 25:8, pea mo Apokalipesi 21:3, 4. Neʼe fagono fakalelei te ʼu hahaʼi, tāfito la ko te ʼu fafine ʼaia e lua neʼe mamate te ʼu hahaʼi ʼo tonā famili ʼi te tuʼutāmaki, pea tokolahi neʼe nātou kamata tanatou ako Tohi-Tapu.

17. ʼI te ʼu temi ʼo te ʼu tuʼutāmaki, koteā te ʼu faʼahiga tokoni ʼe feala ke tou foaki?

¹⁷ Ka hoko he tuʼutāmaki, ʼe lagi koutou felāveʼi anai mo he tahi ʼe ʼaoga ke koutou tokoni ki ai. Lagi ko he kumi mai ʼo he tōketā, peʼe ko te ʼave ʼo he tahi ki te lopitali, peʼe ko te kumi puleʼaki ke maʼu he meʼa kai pea mo he nofoʼaga. ʼI te taʼu 1998 lolotoga te tahi tuʼutāmaki ʼi Italia, neʼe tokagaʼi e te tagata fai sulunale, ko te kau Fakamoʼoni ʼa Sehova “ʼe nātou foaki he ʼu tokoni ʼaoga, ʼo nātou tokoni kia nātou ʼaē ʼe tau mo te mamahi, ʼo mole nātou lau te lotu ʼa te hahaʼi.” ʼI ʼihi koga meʼa, ko te ʼu meʼa ʼaē neʼe fakakikite ʼo ʼuhiga mo te ʼu ʼaho fakamuli ʼe fakatupu ai he toe mamahi. ʼI te ʼu koga meʼa ʼaia, ʼe fakamatalatala e te kau Fakamoʼoni ʼa Sehova ia te ʼu lea faka polofeta ʼa te Tohi-Tapu pea mo nātou fakafimālie te hahaʼi ʼaki te fakapapau ʼa te Tohi-Tapu, ko te Puleʼaga ʼo te ʼAtua ʼaē ka ina ʼaumai ia te fīmālie moʼoni ki te malamanei.—Tāʼaga Lea 1:33; Mikea 4:4.

Ka Mate He Tahi ʼo Te Famili

18-20. Ka mate he tahi ʼo te famili, koteā ʼaē ʼe koutou lava ʼui peʼe koutou lava fai moʼo fakafimālieʼi?

¹⁸ ʼI te ʼaho fuli ko te ʼu lauʼi miliona hahaʼi ʼe nātou lotomamahi ʼuhi ko te mate ʼo he tahi neʼe nātou ʼofa mamahi ai. ʼE lagi koutou felāveʼi mo nātou mokā koutou fai faka mafola peʼe mokā koutou lolotoga fai hakotou ʼu gāue ʼi te ʼaho fuli. Koteā te ʼu palalau pea mo te ʼu gāue ʼaē ʼe koutou lava fai ke nātou maʼu ai he fakafimālie?

¹⁹ ʼE lotomamahi koa te tagata ʼaia peʼe ko te fafine ʼaia? ʼE fonu koa te ʼapi ʼi te ʼu kāiga ʼe nātou lotomamahi? ʼE lagi lahi te ʼu meʼa ʼe koutou fia ʼui age kia nātou, kae ʼe maʼuhiga ke koutou maʼu he fakasiosio poto. (Tagata Tānaki 3:1, 7) ʼE lagi lelei ke koutou fakahā age takotou tokagaʼi tonatou mamahi, mo koutou tuku age he tohi faka Tohi-Tapu (ko he kaupepa lahi, peʼe ko he nusipepa, peʼe ko he kiʼi pepa lotu), pea hoki koutou toe ʼaʼahi mai hili kiai ni ʼu ʼaho, pea mo vakaʼi peʼe koteā he faʼahiga tokoni ʼe feala ke fai age kia nātou. ʼI he lakaga ʼe koutou fakafuafua kua tō lelei, koutou fakahā age leva he ʼu manatu fakaloto mālohi mai te Tohi-Tapu. ʼE lagi feala ai ke mālū ifo te mamahi pea mo maʼu ai he mālōlō. (Tāʼaga Lea 16:24; 25:11) ʼE mole koutou lava fakatuʼuake te kau mate, ohage ko tona fai e Sesu. Kae ʼe koutou lava vaevae age te ʼu manatu ʼa te Tohi-Tapu ʼo ʼuhiga mo te ʼaluʼaga ʼo te kau mate, logola ʼe mole ko he temi ʼaia ke fakafihiʼi he ʼu manatu ʼe hala. (Pesalemo 146:4; Tagata Tānaki 9:5, 10; Esekiele 18:4) ʼE koutou lava lau fakatahi te ʼu fakapapau ʼa te Tohi-Tapu ʼo ʼuhiga mo te fakatuʼuake. (Soane 5:28, 29; Gaue 24:15) ʼE lagi koutou palalau anai ki te faka ʼuhiga ʼo te ʼu fakapapau ʼaia, ʼo lagi koutou fakaʼaogaʼi he fakamatala faka Tohi-Tapu ʼo ʼuhiga mo te fakatuʼuake. (Luka 8:49-56; Soane 11:39-44) Pea koutou toe fakatokagaʼi age foki mo te ʼu kalitate ʼo te ʼAtua ʼofa, ʼaē ʼe ina foaki mai ke tou maʼu te taʼi ʼamanaki ʼaia. (Sopo 14:14, 15; Soane 3:16) Koutou fakamatala age ko te ʼu akonaki ʼaia ʼe ʼaoga kia koutou pea mo te tupuʼaga ʼo takotou falala kiai.

²⁰ ʼE lagi feala ke koutou fakaafe ia ia ʼaē ʼe tau mo te mamahi ke haʼu ʼo kau ki he fono ʼi te Fale ʼo Te Puleʼaga, ke tokoni age ki ai ke feʼiloʼiʼaki mo he hahaʼi ʼe nātou ʼoʼofa moʼoni ki tonatou ʼu kāiga pea mo nātou popoto ʼi te felagalagaʼaki. Neʼe ʼui e te fafine ʼi Suete neʼe ko te meʼa ʼaia neʼe ina kumi ʼi tona maʼuli katoa.—Soane 13:35; 1 Tesalonika 5:11.

21, 22. (a) Koteā ʼaē ʼe fakamaʼua kia tatou mo kapau ʼe tou fia foaki he fakafimālie? (b) E feafeaʼi hakotou foaki he fakafimālieʼi ki he tahi kua ina ʼiloʼi lelei te Tohi-Tapu?

²¹ Ka koutou ʼiloʼi ʼe maʼuli mamahi he tahi ʼi te loto kokelekasio peʼe ko he tahi ʼi tuʼa atu, ʼi ʼihi temi ʼe mole koutou ʼiloʼi te ʼu palalau peʼe ko te ʼu aga ʼaē ʼe tonu ke koutou fai? Ko te kupu faka Keleka ʼaē neʼe tau fakaliliu ʼaki te kupu “fakafimālie,” ʼe faka ʼuhiga totonu ʼi te Tohi-Tapu ki “he pāuiʼi ʼo he tahi ke haʼu ki ʼotatou tafa.” Ke koutou liliu ko he tahi ʼe ina fakafimālieʼi moʼoni niʼihi, ko tona fakaliliu ke koutou faka fealagia ia koutou ke koutou tokoni kia nātou ʼaē ʼe maʼuli mamahi.—Tāʼaga Lea 17:17.

²² Kae e feafeaʼi age la hakotou faʼahiga fai mo kapau la ko ia ʼaē ʼe koutou fia fakafimālieʼi, ʼe ina ʼiloʼi te meʼa ʼaē ʼe ʼui e te Tohi-Tapu ʼo ʼuhiga mo te mate, mo te totogi pea mo te fakatuʼuake? ʼE lagi feala pe ke ina maʼu he fakafimālie mai he tahi ʼe lotu tahi mo ia. Kapau ʼe fia palalau, koutou fagono fakalelei. ʼAua naʼa koutou ʼui ʼe tonu ke koutou palalau. Kapau ʼe lau he ʼu vaega faka Tohi-Tapu, koutou manatuʼi ko te ʼu vaega ʼaia ʼe ko he ʼu puleʼaki ʼa te ʼAtua moʼo fakaloto mālohiʼi te loto ʼo ia ʼaē ʼe tau mo te mamahi pea mo tokotou loto. Koutou fakahā takolua tui papau ki te ʼu fakapapau ʼaē ʼe maʼu ʼi te Tohi-Tapu. ʼAki hakotou fakahā he loto manavaʼofa pea mo te ʼu moʼoni maʼuhiga ʼaē ʼe tuʼu ʼi te Folafola ʼa te ʼAtua, ʼe koutou lava tokoni foki kia nātou ʼaē ʼe maʼuli mamahi ke nātou maʼu he fakafimālie pea mo he mālohi mai “te Atua o te u fakafimalie fuape,” ʼaē ko Sehova.—2 Kolonito 1:3.

[Kiʼi nota]

Koteā Takotou Manatu?

• Ko ai ʼaē ʼe tukugakoviʼi e te tokolahi ʼo ʼuhiga mo te ʼu malaʼia, pea ʼe tou lava tokoni feafeaʼi kia nātou?

• Koteā ʼaē ʼe lagi feala ke tou fai moʼo tokoni ki te hahaʼi ke ʼaoga katoa kia nātou te fakafimālie ʼaē ʼe maʼu ʼi te Tohi-Tapu?

• Koteā te ʼu ʼaluʼaga ʼe tupu ai te mamahi ʼo te hahaʼi tokolahi ʼo te koga meʼa ʼaē ʼe koutou nonofo ai? E feafeaʼi hakotou lava fakafimālieʼi ia nātou?

[Paki ʼo te pasina 23]

Tou tala te logo ʼo te fakafimālie moʼoni ʼi te ʼu temi mamahi

Refugee camp: UN PHOTO 186811/J. Isaac

[Paki ʼo te pasina 24]

ʼE ko he meʼa fakafimālie mokā ʼe ʼi ai hokita kaumeʼa ʼe nofo mo kita