Te ʼu Fehuʼi ʼa Te Kau Lautohi
Neʼe fakagafua e Sehova ke lahi te ʼu ʼohoana fafine ʼo tana kau kaugana ʼo te temi ʼāfea, ia te kau Iselaele, kae ʼi te temi nei ʼe mole kei gafua te koga ʼaia. ʼE faka ʼuhiga ʼaki koa ʼe fetogitogi tana pelesepeto?
ʼE mole heʼeki fetogi te manatu ʼa Sehova ʼo ʼuhiga mo te maʼu ʼo he ʼu tuʼuga ʼohoana. (Pesalemo 19:7; Malakia 3:6) Neʼe mole kau ia ʼi te fakatuʼutuʼu ki te tagata talu mai te kamataʼaga, pea neʼe mole ko hana fakatuʼutuʼu ʼo aʼu mai aipe la ki te temi nei. ʼI te temi ʼaē neʼe fakatupu ai e Sehova ia te fafine ko he ʼohoana maʼa Atama, neʼe ʼui ai e Sehova ko te pelesepeto fakaʼatua ko he fafine e tahi ki hona ʼohoana e tahi. “Koia ʼe mavae anai te tagata mai tana tāmai pea mo tana faʼe, pea ʼe tonu anai ke pipiki ki tona ʼohoana, pea ʼe tonu anai ke nā liliu ko he kakano e tahi.”—Senesi 2:24.
ʼI te temi ʼaē neʼe nofo ai ia Sesu Kilisito ʼi te kele, neʼe ina toe tala aipe te pelesepeto ʼaia moʼo tali age kia nātou ʼaē neʼe nātou fakafehuʼi age ʼo ʼuhiga mo te mavete pea mo te toe ʼohoana. Neʼe ina ʼui fēnei: “Pe neʼe mole koutou lau, i te kamataʼaga nee gaohi naua e te Tupuaga, tagata mo fafine? Pea nee ui maʼana: Uhi ko te mea aia, e mavae anai te tagata mai tana tamai mo tana fae, e pipiki anai ki tona ohoana, pea e hoko ai naua ko te kakano e tahi. E mole foki kei na tokolua, kae ko te kakano e tahi.” Neʼe toe ʼui fēnei e Sesu: “Ko he tahi pe e ina fakamavae tona ohoana, gatape ki te faiʼaga, pea ohoana mo he tahiʼage, e tono ia.” (Mateo 19:4-6, 9) ʼAki te manatu ʼaenī, ʼe mahino mai ia, ko te ʼohoana mo he ʼu tuʼuga fafine ʼe ko he tono ia.
Kae he koʼe koa neʼe fakagafua ʼi te temi muʼa, ke ʼohoana he tagata mo he ʼu tuʼuga fafine? Koutou manatuʼi neʼe mole ko Sehova ʼaē neʼe ina fakatuʼu ia te faʼahiga nofo ʼohoana ʼaia. ʼI te Tohi-Tapu, ko te ʼuluaki tagata ʼaē neʼe kaugamālie tona ʼu ʼohoana, neʼe ko Lameke, ko he hōloga ʼo Kaino. (Senesi 4:19-24) ʼI te fakatō e Sehova ia te Tulivio ʼi te temi ʼo Noe, ko Noe mo tona ʼu foha neʼe nātou taki ʼohoana e tahi. Ko nātou fuli ʼaē neʼe kaugamālie ʼonatou ʼohoana neʼe fakaʼauha ʼi te Tulivio.
Hili te ʼu sēkulō ʼi te temi ʼaē neʼe filifili ai e Sehova ia te kau Iselaele ko hana hahaʼi, neʼe kua maʼu ʼi te kau Iselaele ia te faʼahiga nofo ʼohoana ʼaia mo he ʼu tuʼuga ʼohoana, logola neʼe ko he agamāhani ki te hahaʼi tagata hanatou maʼu pe honatou ʼohoana e tahi. Neʼe mole fakamaʼua e te ʼAtua ki te ʼu famili ke nātou mavete, tāfito la ʼi te ʼu famili ʼaē ʼe lahi ai te ʼu fafine ʼe ʼohoana ki he tagata e tahi. Kae neʼe ina foaki te ʼu lekula ki te ʼu faʼahiga nofo ʼohoana ʼaia.—Ekesote 21:10, 11; Teutalonome 21:15-17.
ʼE ʼiloga te fakagafua faka temi ʼo te taʼi nofo ʼohoana ʼaia ʼi te palalau ʼa Sesu ʼo ʼuhiga mo te fakatuʼutuʼu ʼohoana ʼaē neʼe fai e Sehova ʼi te kamata, kae ʼe toe ʼasi pe foki ʼi te meʼa ʼaē neʼe tohi e te ʼapositolo ko Paulo ʼaki te takitaki ʼo te laumālie maʼoniʼoni ʼo te ʼAtua. Neʼe ina ʼui fēnei: “Ke tahi mau e te tagata hona ohoana pea ke tahi mau e te fafine hona ohoana.” (1 Kolonito 7:2) Neʼe toe takitaki pe foki ia Paulo e te ʼAtua ke ina tohi, ko he tahi ʼe fakanofo ko he tagata taupau peʼe ko he tagata faifekau faka minisitelio ʼi te kokelekasio faka Kilisitiano, ʼe tonu ke “ohoana mo he fafine e tahi.”—1 Timoteo 3:2, 12; Tito 1:6.
Koia, ʼaki te fakatuʼu ʼo te kokelekasio faka Kilisitiano kua hili kiai te ʼu taʼu e 2 000, neʼe mole kei tali leva e Sehova ke ʼohoana he tagata mo he ʼu tuʼuga fafine. ʼI te temi ʼaia, neʼe toe mulimuli te hahaʼi ki te pelesepeto ʼo te nofo ʼohoana, ʼaē neʼe fakatuʼutuʼu e te ʼAtua ʼi te kamata, ʼi te temi ʼaē neʼe fakatupu ai ia te tagata mo te fafine: ke ʼohoana te tagata mo te fafine e tahi. ʼI te temi nei, ʼe ko te pelesepeto ʼaia ʼaē ʼe maʼu ʼi te hahaʼi ʼa te ʼAtua ʼi te malamanei katoa.—Maleko 10:11, 12; 1 Kolonito 6:9, 10.