ʼE Ko He ‘Lotu Moʼoni’ Pe Koa e Tahi?

“KAPAU ʼe ʼi ai he Kilisito e tahi, pea ʼe ko te sino pe e tahi ʼo Kilisito, te ʼOhoana pe e tahi ʼo Kilisito: ‘ko te ’Ēkelesia Katolika pea mo apositolika e tahi.’ ”​—Dominus Iesus.

Neʼe fai te ʼu palalau ʼaia e Joseph Ratzinger, ko te kaletinale ʼo te Lotu Katolika ʼi tana faiakonaki, ʼe ʼi ai te lotu moʼoni pe e tahi. Pea ko te lotu ʼaia, neʼe ina ʼui ʼe “ko te ’Ēkelesia e tahi ʼa Kilisito, ʼaē ko te Lotu Katolika.”

“ ʼI Tona ʼUhiga Moʼoni ʼe Mole Ko He ʼu Lotu”

Logola neʼe fakahā fakalelei e te Tuʼi Tapu ko Soane Paulo 2 ko te pepa Dominus Iesus neʼe mole “ko he fiatuʼu peʼe mo fakamālaloʼi ʼo he tahi ʼu lotu,” kae ko te kau takitaki ʼo te lotu Polotesita neʼe mole nātou leleiʼia te faʼahi ʼaia. Ohage la, neʼe ʼui e te minisi ʼi te Fakatahi Lahi ʼaē neʼe hoko ʼi Belfast, ʼi Ilelani ʼo te Potu Noleto, ʼi Sūnio 2001, ko te pepa ʼaia neʼe ko he tohi ʼa “he kūtuga mālohi ʼo te Lotu Katolika . . . neʼe tuʼania ʼaupito ki te kua faka fealagia e te Vatikano 2 ke tali te tahi ʼu lotu.”

Ko Robin Eames, ʼaē ʼe kau ki te ’Ēkelesia ʼo Ilelani, neʼe ina ʼui “ko he meʼa fakaufiufi ʼaupito” mo kapau ko te pepa ʼaia ʼe “ko he toe liliu ʼa te Vatikano ki te temi muʼa.” ʼO ʼuhiga mo te ʼui ʼa te Vatikano ko te ʼu lotu ʼaē ʼe nātou fakafisi ki ʼihi akonaki Katolika, “ ʼi tona ʼuhiga moʼoni ʼe mole ko he ʼu Lotu”, neʼe ʼui fēnei e Eames: “Maʼaku ko te ʼu palalau ʼaia ʼe ko he fiatuʼu ia.”

He koʼe neʼe fai te Dominus Iesus? ʼE ʼasi mai neʼe tuʼaniaʼi e te Lotu Katolika te meʼa ʼaē neʼe fakahigoaʼi ko te ʼu akonaki faka lotu ʼaē ʼe feala ke fetogi. ʼE ʼui e te nusipepa The Irish Times, “ko te malaga ake ʼa te teolosia ʼaē ʼe ina tali te ʼu manatu kehekehe​—ʼo ina ʼui ʼe lelei te ʼu lotu fuli . . . neʼe tuʼaniaʼi ʼaupito e te Kaletinale ko Ratzinger.” ʼE ʼui ko te taʼi manatu ʼaia ʼaē neʼe tupu ai tana talanoa ki te lotu moʼoni e tahi.

ʼE Maʼuhiga Koa Te ʼIloʼi Peʼe Ko Te Lotu Fea ʼAē ʼe Koutou Kau Ai?

Maʼa ʼihi, “ko te ʼu akonaki faka lotu ʼaē ʼe feala ke fetogi,” peʼe ko “te teolosia ʼaē ʼe ina tali te ʼu manatu kehekehe” ʼe tonu age ia pea mo lelei age ʼi te ʼui ʼaē ʼe tonu ke ʼi ai he lotu moʼoni pe e tahi. Kia nātou, ʼe ʼa tatou takitokotahi te filifili ʼo te lotu ʼaē ʼe tou loto kiai. ʼE nātou ʼui fēnei: ‘ ʼI tona fakahagatonu, ʼe mole maʼuhiga te ʼiloʼi ʼaē peʼe ko te lotu fea ʼaē ʼe koutou kau ai.’

ʼE lagi feala ke tou ʼui ʼe lelei te manatu ʼaia​—logola kua tupu ai he maveuveu ʼo te lotu ʼo liliu ko he ʼu magaʼi lotu kehekehe. ʼE ʼui e te tokolahi: ‘Ko te ʼu lotu kehekehe ʼaia ʼe ko he fakahā ʼa te hahaʼi ʼe nātou fia maʼuli faʼifaʼitaliha.’ Kae ko te tagata faitohi ko Steve Bruce, neʼe ina ʼui ko te “tali ʼo te ʼu lotu kehekehe” ʼaia, ko tona faka ʼuhiga ʼe ko he “meʼa noaʼi ʼo te lotu.”​—A House Divided: Protestantism, Schism, and Secularization.

Kae koteā te manatu ʼaē ʼe tonu? Ko te lotu moʼoni pe koa ʼaē e tahi? Ko te lotu ʼaia ʼe ko te Lotu Katolika pe koa? ʼE ʼi ai koa he tahi ʼu lotu ʼe tali leleiʼi e te ʼAtua? ʼUhi ko te ʼu fehuʼi ʼaia ʼe pipiki kiai tatatou ʼu felogoi mo totatou Tupuʼaga, ʼe mahino ia ʼe maʼuhiga ke tou maʼu tana ʼu manatu ʼo ʼuhiga mo te faʼahi ʼaia. ʼE tou lava ʼiloʼi feafeaʼi tana ʼu manatu ki te faʼahi ʼaia? ʼAki tatatou ako te Folafola ʼa te ʼAtua, ia te Tohi-Tapu. (Gaue 17⁠:11; 2 Timoteo 3⁠:​16, 17) Tou vakaʼi age muʼa peʼe koteā te tonu ʼo ʼuhiga mo te lotu moʼoni pe e tahi.