Te Hahaʼi Fafine Kilisitiano Agatonu​—Ko He Kau Atolasio Maʼuhiga ʼa Te ʼAtua

“Ko te fofoga matalelei ʼe feala pe ke kākā, pea ko te matalelei ʼe feala ke vaʼiganoa; kae ko te fafine ʼaē ʼe manavasiʼi kia Sehova, ko ia ʼaia ka ina maʼu te ʼu fakavikiviki.”​—Tāʼaga Lea 31:30.

1. ʼE feafeaʼi te manatu ʼa Sehova pea mo te manatu ʼa te malamanei ʼo ʼuhiga mo te matalelei?

ʼE FAKA maʼuhigaʼi e te malamanei ia te agaaga ʼaē ʼe ʼasi ki tuʼa, tāfito ki te hahaʼi fafine. Kae ko Sehova ʼe ina tokagaʼi tāfito te agaaga ʼo te loto, ʼaē ʼe feala ʼaki te temi, ke toe lahi tona matalelei. (Tāʼaga Lea 16:31) Koia ʼe tokoniʼi fēnei ai te hahaʼi fafine e te Tohi-Tapu: “Ko te teuteu a natou alâ, ke aua naa ko he u teuteu fakahaha, aia ko te fiʼulu, te ai o te u mea gigila aulo, te u teu taulekaleka, kae ke liliu ia ko he fakatokaʼaga fakafufu o te loto, ko he teuteu e mole auha o he laumalie agamalu mo tokalelei, e mauhiga aupito ia mua o te Atua.”​—1 Petelo 3:3, 4.

2, 3. Neʼe lagolago feafeaʼi te ʼu fafine ki te haʼele ki muʼa ʼo te logo lelei ʼi te ʼuluaki sēkulō, pea neʼe fakakikite feafeaʼi te faʼahi ʼaia?

² Tokolahi te ʼu fafine ʼe palalau ki ai ia te Tohi-Tapu, neʼe nātou fakahā te taʼi kalitate maʼuhiga ʼaia. ʼI te ʼuluaki sēkulō, ko ʼihi ia nātou neʼe nātou maʼu te pilivilesio ʼaē ko te tauhi kia Sesu mo tana kau ʼapositolo. (Luka 8:1-3) Ki muli age, neʼe liliu te ʼu fafine Kilisitiano ʼaia ko te kau fai faka mafola faʼafai; ko ʼihi neʼe nātou lagolago lelei ki te ʼu tagata Kilisitiano ʼaē neʼe kau ki te kau takitaki, ohage ko te ʼapositolo ko Paulo; pea ko ʼihi neʼe nātou fai he tali kāiga makehe, ʼo nātou faka fealagia ke fakaʼaogaʼi tonatou ʼapi ke fai ai te ʼu fono ʼo te kokelekasio.

³ Neʼe fakakikite ʼi te Tohi-Tapu, ʼe fakaʼaogaʼi mālohi anai e Sehova ia te hahaʼi fafine moʼo fakahoko tana fakatuʼutuʼu. Ohage la, neʼe fakakikite ia Soele 2:28, 29 ko te hahaʼi tagata mo fafine, tūpulaga mo matuʼa, ʼe nātou maʼu anai te laumālie maʼoniʼoni pea ʼe nātou kau anai ki te faka mafola ʼo te logo lelei ʼo te Puleʼaga. Neʼe kamata fakahoko te lea faka polofeta ʼaia ʼi te Penikosite ʼo te taʼu 33 ʼo totatou temi. (Gaue 2:1-4, 16-18) Ko ʼihi fafine ʼaē neʼe fakanofo e te laumālie, neʼe nātou maʼu te ʼu fealagia faka milakulo, ohage ko te fealagia ʼaē ke nātou fakakikite. (Gaue 21:8, 9) ʼAki tanatou faʼafai ʼi te minisitelio, ko te foʼi kautau fakalaumālie ʼaia ʼo te ʼu tuagaʼane agatonu, neʼe nātou tokoni ki te mafola vave ʼo te Lotu Faka Kilisitiano ʼi te ʼuluaki sēkulō. ʼI te lagi taʼu 60 ʼo totatou temi, neʼe faitohi te ʼapositolo ko Paulo ʼo ina ʼui ko te logo lelei “kua fakaha ki te keleatula fuape [“ki te meʼa katoa ʼaē neʼe fakatupu,” MN ] o te lalo lagi.”​—Kolose 1:23.

Neʼe Vikiʼi Ia Nātou Ki Tanatou Lototoʼa, Mo Tanatou Faʼafai, Pea Mo Tanatou Tali Kāiga

4. He koʼe neʼe tonu te fakavikiviki ʼaē neʼe fai e Paulo ki te hahaʼi fafine tokolahi ʼo te kokelekasio faka Kilisitiano ʼo te ʼuluaki sēkulō?

⁴ Neʼe fakafetaʼi ia te ʼapositolo ko Paulo ki te gāue ʼaē neʼe fakahoko e ʼihi fafine​—ohage ko tona fai ʼi te temi nei, ʼe fakafetaʼi te ʼu tagata taupau Kilisitiano ki te minisitelio ʼaē ʼe fakahoko e ʼihi fafine faʼafai. ʼI te ʼu fafine ʼaē neʼe toʼo higoa e Paulo, neʼe kau ai ia “Tolufano mo Tufosa e gaue naua i te Aliki,” mo “Pelesita te ofaʼaga, e lahi tana gaue i te Aliki.” (Loma 16:12) Neʼe tohi e Paulo, ko Eutia mo Sunitika neʼe nā “tau fakatahi mo [ia] o uhiga mo te Evaselio.” (Filipe 4:2, 3) Ko Pilisika mo Akila neʼe nā gāue fakatahi mo Paulo. Tahi ʼaē meʼa, “neʼe mei tuʼusi tonā ʼu kia” ʼi tanā fia hāofaki ia Paulo, ʼo tupu ai tana tohi fēnei, “ ʼe ʼau fakamālo kia nāua, ʼo mole ko ʼau tokotahi pe, kae ʼe toe kau ai mo te ʼu kokelekasio fuli ʼo te ʼu puleʼaga.”​—Loma 16:3, 4, MN; Gaue 18:2.

5, 6. Koteā te ʼu faʼifaʼitaki lelei neʼe tuku e Pilisika ki te ʼu tuagaʼane ʼi te temi nei?

⁵ Koteā ʼaē neʼe tokoni kia Pilisika ke faʼafai pea mo lototoʼa? ʼE ʼi ai te fakamatala ʼo te ʼu faʼahi ʼaia ia Gaue 18:24-26, ʼe tou lau ai neʼe lagolago ia ia ki tona ʼohoana moʼo tokoni kia Apolose, ko he tagata faiakonaki faiva, ke mulimuli ki te ʼu moʼoni foʼou ʼaē neʼe fakahā. ʼE ʼiloga ia ko Pilisika neʼe ko he tahi neʼe ina ako fakamalotoloto ia te Folafola ʼa te ʼAtua pea mo te ʼu akonaki ʼa te kau ʼapositolo. Ko te meʼa neʼe hoko ai, neʼe ina fakatuputupu te ʼu kalitate ʼo liliu ai ko he tahi ʼe maʼuhiga kia mata ʼo te ʼAtua mo tona ʼohoana, pea neʼe ko he tahi neʼe leleiʼia ʼi te ʼuluaki kokelekasio. ʼE toe feiā mo te temi nei, ʼe toe maʼuhiga feiā mo te ʼu tuagaʼane tokolahi ʼe nātou ako fakamalotoloto ia te Tohi-Tapu pea mo nātou fakaʼaogaʼi ia te meʼa fakalaumālie ʼaē ʼe foaki e Sehova ʼaki “te faifekau agatonu.”​—Luka 12:42.

⁶ Neʼe makehe ia te tali kāiga ʼa Akila mo Pilisika. Neʼe nofo ia Paulo ʼi tonā ʼapi ʼo gāue mo nāua ki te tui falelā ʼi Kolonito. (Gaue 18:1-3) ʼI te temi ʼaē neʼe nā hiki ai leva ki Efeso pea ki muli age ki Loma, neʼe nā hoko atu aipe tanā tali kāiga, ʼo nā tali ke fai ʼi tonā ʼapi ia te ʼu fono ʼo te kokelekasio. (Gaue 18:18, 19; 1 Kolonito 16:8, 19) ʼO toe feiā mo Numafa pea mo Malia te faʼe ʼa Soane Maleko, neʼe nā tali ke fai ʼi tonā ʼapi te ʼu fono ʼo te kokelekasio.​—Gaue 12:12; Kolose 4:15.

Ko He Koga Maʼuhiga ʼi Te Temi Nei

7, 8. Koteā te fakavikiviki ʼe feala ke tou fai ki te ʼu hahaʼi fafine Kilisitiano tokolahi ʼi te temi nei, pea koteā te meʼa ʼe feala ke nātou ʼiloʼi papau?

⁷ Ohage pe ko te ʼuluaki sēkulō, ʼi te temi nei ko te ʼu hahaʼi fafine Kilisitiano agatonu ʼe nātou kau mālohi ki te fakahoko ʼo te fakatuʼutuʼu ʼa te ʼAtua, kae tāfito ia te gāue fai faka mafola. Pea ʼe ʼi ai te ʼu fakamatala lelei ʼo ʼuhiga mo te ʼu tuagaʼane ʼaia! Ohage ko Gwen, ʼaē neʼe gāue agatonu kia Sehova lolotoga te ʼu taʼu e 50 tupu ʼo aʼu ki tona mate ʼi te taʼu 2002. ʼE ʼui fēnei e tona ʼohoana: “Neʼe kua logona ʼi tomatou kolo ia te faʼafai ʼa Gwen ʼi te fai faka mafola. Maʼa ia, ko te hahaʼi fuli ʼe feala ke nātou maʼu te ʼofa pea mo te ʼu fakapapau ʼa Sehova. Ko tana agatonu ki te ʼAtua, mo te kautahi, pea mo tomatou famili​—ʼo mole lau atu ia tana fakaloto mālohi ʼofa ʼi te ʼu temi ʼaē neʼe mātou lotovaivai ai​—neʼe ko he toe lagolago ia kia ʼau pea mo tamā fānau ʼi te ʼu faʼahi fuli ʼo tomā maʼuli. ʼE mātou manatuʼi ʼosi tana nofo mo mātou.” Neʼe kua taʼu 61 tanā ʼohoana.

⁸ Ko te ʼu toko lauʼi hogofulu afe kau fafine Kilisitiano, selipatea pea mo ʼohoana, ʼe nātou pionie, gāue misionea, ʼo nātou faka feʼauga pe ki te ʼu meʼa tāfito ʼo te maʼuli, ke feala hanatou faka mafola ia te logo ʼo te Puleʼaga ʼi te ʼu telituale ohage ko te ʼu kolo lalahi ʼo kaku ki te ʼu koga meʼa mamaʼo. (Gaue 1:8) Tokolahi neʼe nātou fakafisi ki he ʼapi peʼe ko he maʼu fānau, ke lahi age hanatou gāue kia Sehova. ʼE ʼi ai mo nātou ʼaē ʼe nātou lagolago lelei ki ʼonatou ʼohoana ʼaē ʼe taupau feʼoloʼaki, kae ko ʼihi lauʼi afe tuagaʼane ʼe nātou gāue ʼi te ʼu Petele ʼi te malamanei katoa. ʼE mahino ia ko te ʼu fafine ʼaia ʼaē ʼe maʼuli faka sakilifisio, ʼe nātou kau ki “te ʼu meʼa ʼaē ʼe manakoʼia ʼo te ʼu puleʼaga fuli,” ʼaē ʼe nātou fakafonu te ʼapi ʼo Sehova ʼaki te kolōlia.​—Asea 2:7.

9, 10. Neʼe fakahā feafeaʼi e ʼihi famili tanatou fakafetaʼi ki te faʼifaʼitaki lelei ʼo tonatou ʼu ʼohoana pea mo faʼe Kilisitiano?

⁹ ʼE moʼoni, ʼe tokolahi te ʼu fafine Kilisitiano ʼe lahi ʼonatou maʼua ʼe tonu ke nātou fakahoko; kae ʼe nātou haga fakamuʼamuʼa aipe ia te ʼu gāue ʼo te Puleʼaga ʼi te ʼu meʼa fuli. (Mateo 6:33) Neʼe tohi fēnei e te tuagaʼane pionie selipatea: “Ko te tui mālohi pea mo te faʼifaʼitaki lelei ʼo taku faʼe, neʼe tokoni lahi mai ke ʼau liliu ʼo pionie katoa pea neʼe kau ʼi toku ʼu kaugā pionie lelei ʼaupito.” ʼE ʼui fēnei e te tēhina ʼo ʼuhiga mo tona ʼohoana, ʼaē ko ʼana taʼahine lalahi e toko nima: “Ko tomatou ʼapi neʼe maʼa pea mo tokalelei tuʼumaʼu. Neʼe faigaʼi e Bonnie ke faigafua tona fakatokatoka, ke feala ki tomatou famili ke tokakaga tāfito ki te ʼu meʼa fakalaumālie. Ko tana lagolago ki te fakaʼaluʼalu lelei ʼo tamatou vaega falā, neʼe faka fealagia mai kia ʼau ke ʼau gāue vaeluaʼi temi lolotoga te ʼu taʼu e 32, ke ʼau fakaʼaogaʼi lahi toku temi ki toku famili pea mo te ʼu meʼa fakalaumālie. Neʼe toe akoʼi e toku ʼohoana ki tamā fānau ia te maʼuhiga ʼo te gāue kinakina, koia ʼe ʼau fia fakavikiviki ai kia ia.” ʼI te temi nei, ʼe nā gāue toko lua ʼi te ʼu pilō lalahi ʼa te kau Fakamoʼoni ʼa Sehova.

¹⁰ ʼE tohi fēnei e te tēhina ʼo ʼuhiga mo tona ʼohoana, ʼaē kua lalahi tana fānau: “Ko te ʼu kalitate ʼaē ʼe ʼau leleiʼia tāfito ia Susan, ʼe ko tona ʼofa ki te ʼAtua pea mo te hahaʼi, ʼo feiā mo tona lotomahino, mo tana agalelei pea mo tana agatonu. Maʼa ia, neʼe tonu ke tuʼumaʼu kia Sehova ia te ʼu meʼa lelei ʼaupito​—pea ʼe ko tona maʼuli ʼaia ʼi tona ʼuhiga kaugana ʼa te ʼAtua pea mo tona ʼuhiga faʼe.” ʼAki te lagolago ʼo tona ʼohoana, neʼe lava tali e te tēhina ʼaia te ʼu pilivilesio fakalaumālie ʼe lahi ake, ohage la ke tagata ʼāfea, ke pionie, ke taupau faka silikosikilipisio fetogi, pea ke kau ki te Komite Faka Felogoi Mo Te Lopitali. Koia ʼe maʼuhiga ʼaupito ia te ʼu taʼi fafine ʼaia ki ʼonatou ʼohoana, mo ʼihi Kilisitiano, kae tāfito, kia Sehova!​—Tāʼaga Lea 31:28, 30.

Ko He ʼu Fafine Maʼuhiga Kae Mole Honatou ʼOhoana

11. (a) Neʼe fakahā feafeaʼi e Sehova tana tokaga ki te hahaʼi fafine ʼaē ʼe agatonu, kae tāfito te kau vitua? (b) Koteā ʼaē ʼe feala ke ʼiloʼi papau e te kau vitua Kilisitiano, mo ʼihi tuagaʼane agatonu ʼe mole ʼi ai honatou ʼohoana?

¹¹ Neʼe tau fakahā e Sehova ia tana tokaga ki te hahaʼi vitua. (Teutalonome 27:19; Pesalemo 68:5; Isaia 10:1, 2) ʼE mole heʼeki fetogi tana tokaga ʼaia. ʼE mole gata pe tana tokaga fakamalotoloto ki te kau vitua, kae ʼe toe tokaga foki ki te ʼu faʼe ʼe mole ʼi ai honatou ʼohoana, ʼo feiā mo te ʼu fafine neʼe nātou filifili ke nātou nofonofo selipatea, pea mo nātou ʼaē ʼe selipatea heʼe mole nātou maʼu honatou ʼohoana Kilisitiano. (Malakia 3:6; Sakopo 1:27) Kapau ʼe koutou kau kia nātou ʼaia ʼaē ʼe tauhi agatonu kia Sehova kae mole ʼi ai hokotou hoa Kilisitiano, ʼe feala ke koutou ʼiloʼi papau ʼe koutou maʼuhiga kia mata ʼo te ʼAtua.

12. (a) ʼE fakahā feafeaʼi e ʼihi tuagaʼane Kilisitiano tanatou agatonu kia Sehova? (b) Koteā te ʼu meʼa ʼe logoʼi e ʼihi tuagaʼane?

¹² Ohage la, koutou tokagaʼi totatou ʼu tuagaʼane Kilisitiano ʼaē ʼe mole heʼeki nātou ʼohoana ʼuhi ko tanatou muliʼi fakalelei te tokoni ʼa Sehova ke ʼohoana pe “i te Aliki.” (1 Kolonito 7:39; Tāʼaga Lea 3:1) ʼE fakaloto mālohiʼi fēnei ia nātou e te Folafola ʼa te ʼAtua: “ ʼAki ia ia ʼaē ʼe agatonu ʼe ke [Sehova] agatonu anai kia ia.” (2 Samuele 22:26) Kae maʼa te tokolahi ia nātou, ʼe faigataʼa ia te nofo selipatea. ʼE ʼui fēnei e te tuagaʼane: “Neʼe ʼau fakatotonu ke hoki ʼau ʼohoana pe ʼi te ʼAliki, kae neʼe tuʼa lahi taku tagi ʼi taku sio ki toku ʼu kaumeʼa ʼe nātou ʼohoana mo te ʼu tagata Kilisitiano talavou, kae ʼe ʼau haga nofo tokotahi pe.” ʼE ʼui fēnei e te tahi tuagaʼane: “Kua taʼu 25 taku tauhi kia Sehova. ʼE ʼau fakatotonu ke ʼau haga nofo agatonu kia te ia, kae ʼe ʼau tautau lotomamahi ʼi taku logoʼi taku nofo tokotahi.” ʼE ina toe ʼui fēnei: “Ko te ʼu tēhina ohage ko ʼau ʼe nātou fakaʼamu ki he ʼu fakaloto mālohi.” ʼE tou lava tokoni feafeaʼi kia nātou ʼaia ʼe nātou nonofo agatonu?

13. (a) Koteā ʼaē ʼe tou ako ʼaki te faʼifaʼitaki neʼe tuku mai e nātou ʼaē neʼe nātou ʼaʼahi ia te ʼofafine ʼo Sefeteo? (b) Koteā te tahi ʼu faʼahiga fai ke tou fakahā ai ʼe tou tokakaga ki te ʼu tuagaʼane selipatea ʼi totatou kokelekasio?

¹³ ʼE ʼi ai te faʼahiga tokoni ʼe tou maʼu mai te faʼifaʼitaki ʼo te temi muʼa. ʼI te lītuʼa ʼa te ʼofafine ʼa Sefeteo ki te faigamālie ʼaē ke maʼu hona ʼohoana, neʼe mahino ki te hahaʼi neʼe ko he sakilifisio ʼaē neʼe ina fai. Koteā ʼaē neʼe nātou fai moʼo fakaloto mālohiʼi ʼo ia? “ ʼI te taʼu fuli neʼe ʼolo te ʼu taʼahine ʼo Iselaele ʼo fakavikiviki ki te ʼofafine ʼo Sefeteo te Kileate, ia ʼaho e fā ʼi te taʼu.” (Kau Fakamāu 11:30-40) ʼO toe feiā mo tatou, ʼe tonu ke tou fai he fakavikiviki fakamalotoloto ki te ʼu tuagaʼane selipatea ʼaē ʼe nātou agatonu ʼo nātou fakalogo ki te lao ʼa te ʼAtua.a E feafeaʼi hatatou fakahā ʼe tou tokagaʼi ia nātou? ʼI tatatou ʼu faikole ʼe tonu ke tou kolekole kia Sehova ke lagolago ki totatou ʼu tuagaʼane agatonu ʼaia, ke hoko atu tanatou tauhi agatonu. ʼE tau mo nātou ke nātou ʼiloʼi papau ʼe ʼofainaʼi ia nātou, pea ʼe nātou maʼuhiga kia Sehova mo te kokelekasio faka Kilisitiano katoa.​—Pesalemo 37:28.

Te ʼu Tuagaʼane ʼAē ʼe Nātou Taupau Tokotahi Tanatou Fānau

14, 15. (a) He koʼe ʼe tonu ke kole tokoni kia Sehova ia te ʼu faʼe Kilisitiano ʼaē ʼe nātou taupau tokotahi tanatou fānau? (b) Koteā ʼaē ʼe lava fai e te ʼu tuagaʼane ʼaē ʼe nātou taupau tokotahi tanatou fānau ʼo mulimuli ki tanatou ʼu faikole?

¹⁴ ʼE toe lahi foki mo te ʼu fihifihia ʼe tau mo te ʼu fafine Kilisitiano ʼaē ʼe nātou taupau tokotahi tanatou fānau. Kae ʼe nātou lava kumi tokoni kia Sehova ʼo ʼuhiga mo te akoʼi ʼo tanatou fānau ʼo mulimuli ki te ʼu pelesepeto faka Tohi-Tapu. ʼE moʼoni, kapau ʼe koutou taupau tokotahi takotou fānau, pea ʼe mole feala ia ke koutou fakahoko te ʼu faʼahi fuli ʼaē ʼe fakamaʼua ki he faʼe pea mo he tāmai. Kae ʼe tokoni atu anai ia Sehova ki takotou ʼu maʼua kehekehe, mo kapau ʼaki te tui ʼe koutou kumi tokoni kia ia. Tou toʼo he fakatā: Kapau ʼe koutou ʼōmai lalo mai takotou gāueʼaga mo he ʼāmoga mamafa, kae ʼe mamaʼo tokotou ʼapi. ʼE koutou haga haʼele lalo anai koa mo te ʼāmoga ʼaia, mo kapau ʼe tuʼu atu hokotou kaumeʼa mo tana kamio, ke ina ʼave koutou? Kailoa ia! Pea ʼe toe feiā pe, ʼaua naʼa koutou fia ʼamo tokotahi te ʼu kavega ʼo tokotou loto, kae ʼe koutou lava kole kia Sehova ke tokoni atu. ʼI tona fakahagatonu, ʼe ina fakaafe koutou ke koutou pāui kia ia. ʼE ʼui fēnei e te Pesalemo 68:19: “Fakafetaʼi kia Sehova ʼaē ʼe ina ʼamo te kavega maʼa tatou ʼi te ʼaho fuli.” ʼE toe feiā pe mo 1 Petelo 5:7, ʼe ina fakaafe koutou ke koutou vetevete takotou ʼu tuʼania kia Sehova “koteʼuhi ʼe tokaga ia kia koutou.” Koia mokā ʼe mamafa ʼokotou fihifihia pea mo ʼakotou hoha, koutou fakamaʼamaʼa ʼo koutou tuku ki takotou Tāmai ʼaē ʼe ʼi selo, ʼo koutou fai “tuumau.”​—1 Tesalonika 5:17; Pesalemo 18:6; 55:22.

¹⁵ Ohage la, kapau ko koutou ko he faʼe, ʼe mahino ʼe koutou tuʼania ki te ʼu fakaneke ʼaē ʼe hoko ki takotou fānau ʼi te faleako, peʼe ko te ʼu ʼahiʼahi ʼo tanatou agatonu. (1 Kolonito 15:33) ʼE tonu takotou ʼu hoha ʼaia. Kae ʼe feala ke koutou faikole ʼo ʼuhiga mo te ʼu faʼahi ʼaia. Ohage la, he koʼe koa ʼe mole koutou faikole ki te ʼu meʼa ʼaia mo takotou fānau ʼi muʼa ʼo tanatou ʼolo ki te faleako, ʼo lagi koutou faikole ʼo ʼuhiga mo te ʼu meʼa ʼaia mokā koutou lau fakatahi te koga tohi ʼo te ʼaho? ʼE feala ki he ʼu faikole fakamalotoloto pea mo fakahagatonu ke malave mālohi ʼi te ʼu ʼatamai ʼo nātou liliki. Kae tāfito, koutou faka fealagia ke tapuakinaʼi koutou e Sehova mokā koutou faigaʼi ʼaki te faʼa kātaki ke koutou akoʼi tana Folafola ki te loto ʼo takotou fānau. (Teutalonome 6:6, 7; Tāʼaga Lea 22:6) Koutou manatuʼi, “ko [te] fofoga o te Aliki e nofo i te hahai agatonu, pea e ava ona taliga ki anatou faikole.”​—1 Petelo 3:12; Filipe 4:6, 7.

16, 17. (a) Koteā ʼaē neʼe ʼui e te tama ʼo ʼuhiga mo te ʼofa ʼo tana faʼe? (b) Neʼe malave feafeaʼi ia te maʼuli fakalaumālie ʼa te faʼe ki tana fānau?

¹⁶ Koutou tokagaʼi te faʼifaʼitaki ʼa Olivia, ʼaē ko ʼana tamaliki e toko ono. Ko tona ʼohoana ʼaē neʼe mole lotu tahi mo ia neʼe ina līaki tona famili ʼi te temi pe ʼaē neʼe tupu ai tanā tamasiʼi muli, kae neʼe kua ina fakatotonu ke ina akoʼi tana ʼu tamaliki ʼi te ala ʼo te ʼAtua. ʼI te temi ʼaē neʼe hoko ai te mavete ʼaia, neʼe lagi taʼu 5 ia te tama ʼa Olivia, ia Darren, ʼaē kua taʼu 31 ʼi te temi nei pea ʼe ko te tagata ʼāfea pea mo pionie. ʼO hilifaki atu ki te ʼu tuʼania ʼa Olivia, ko Darren neʼe mahamahaki kovi pea ʼe kei tau hoko ʼi te temi nei. ʼI tana manatuʼi te temi ʼaē neʼe kei veliveli ai, ʼe tohi fēnei e Darren: “ ʼE kei ʼau manatuʼi pe taku heka ʼi toku palepale ʼi te lopitali, ʼo fakatalitali ke haʼu la ia Mama. Neʼe haʼu ʼo heka ʼi te palepale pea mo ina lau mai te Tohi-Tapu ʼi te ʼaho fuli. ʼOsi ʼaia pea ina hivaʼi mai te katiko ‘Mālo, Ê Sehova.’b ʼO aʼu mai ki te temi nei, ko te katiko ʼaia ʼe ʼau leleiʼia tāfito.”

¹⁷ Ko te falala pea mo te ʼofa ʼa Olivia kia Sehova ʼaē neʼe tupu ai tana lava fakahoko fakalelei tona ʼu maʼua faka faʼe, logola neʼe ina taupau tokotahi tona loto fale. (Tāʼaga Lea 3:5, 6) Neʼe ʼiloga tana fakakaukau lelei ʼi te ʼu fakatuʼutuʼu ʼaē neʼe ina faigaʼi ke fakahoko e tana ʼu tamaliki. ʼE ʼui fēnei e Darren: “Neʼe fakaloto mālohi tuʼumaʼu mātou e Mama ke mātou faiga ki he gāue temi katoa ki te ʼAtua. Ko te meʼa ʼaē neʼe hoko ai, ko te toko fā ʼo toku ʼu tuagaʼane pea mo ʼau neʼe mātou kau ki he gāue temi katoa ki te ʼAtua. Kae neʼe mole heʼeki ʼi ai he temi neʼe kua laupisi ai ia Mama kia ia totonu ʼo ʼuhiga mo te ʼu meʼa ʼaia. ʼE ʼau faigaʼi ke ʼau faʼifaʼitakiʼi tona ʼu kalitate fakaofoofo.” ʼE moʼoni, ʼe mole lalahi fuli ake te tamaliki pea nātou tauhi ki te ʼAtua ohage ko te meʼa ʼaē neʼe hoko ki te fānau ʼa Olivia. Kae ka fai e he faʼe te ʼu meʼa fuli ʼe ina lavaʼi ke ʼalutahi mo te ʼu pelesepeto faka Tohi-Tapu, ʼe feala ia ke ina ʼiloʼi papau ʼe ina maʼu ia te takitaki ʼofa pea mo te lagolago ʼa Sehova.​—Pesalemo 32:8.

18. ʼE tou lava fakahā feafeaʼi tatatou faka maʼuhigaʼi ia te ʼu fakatuʼutuʼu ʼa Sehova ʼi te kokelekasio faka Kilisitiano?

¹⁸ ʼE lahi te tokoni ʼa te ʼAtua ʼe ina fakahoko ʼaki te kokelekasio faka Kilisitiano: te polokalama ʼo te meʼa kai fakalaumālie ʼaē ʼe fai tuʼumaʼu, mo te ʼu tēhina mo tuagaʼane Kilisitiano, mo tona ʼu “meaofa ki te hahai [“ko he ʼu tagata,” MN ]” kua nātou fotufotuʼa ʼi te faʼahi fakalaumālie. (Efeso 4:8) ʼE gāue kinakina te kau tagata ʼāfea ke nātou lagalaga ʼi te kokelekasio katoa ia he tokaga makehe ki te ʼu meʼa ʼaē ʼe ʼaoga kia “natou paea mo natou finetaka i onatou mamahi.” (Sakopo 1:27) Koia koutou nonofo ōvi ki te hahaʼi ʼa te ʼAtua, ʼaua naʼa koutou to tokotahi ʼi he temi.​—Tāʼaga Lea 18:1; Loma 14:7.

Te Kalitate Matalelei ʼAē Ko Te Fakalogo

19. He koʼe koa ʼe mole faka ʼuhiga ia te fakalogo ʼa te fafine ʼe ko hona fakatō laloʼi, pea koteā te faʼifaʼitaki faka Tohi-Tapu ʼe lagolago ki te faʼahi ʼaia?

¹⁹ Neʼe fakatupu e Sehova ia te fafine ko he fakakatoa ʼo te tagata. (Senesi 2:18) Koia ko te fakalogo ʼa te fafine ʼe mole faka ʼuhiga ia ko hona fakatō laloʼi. Kae ʼe ko he faka maʼuhigaʼi ʼo te fafine, ʼaki te faka fealagia age ke ina fakaʼaogaʼi tona ʼu faiva pea mo tona ʼu fealagia ʼo ʼalutahi mo te finegalo ʼo te ʼAtua. ʼE fakamatalatala e Tāʼaga Lea kapite 31 ia te ʼu gāue kehekehe neʼe fai e te fafine faʼafai ʼi te Iselaele ʼāfea. Neʼe ʼalu kia nātou ʼaē ʼe faigataʼaʼia, neʼe ʼi ai tana gāueʼaga vite, pea neʼe ina totogi te kele. Ei, “ko te loto ʼo tona tagata pule ʼe falala kia ia, pea [neʼe] ina maʼu tuʼumaʼu tona ʼu koloā.”​—Vaega 11, 16, 20.

20. (a) ʼE tonu ke fakaʼaogaʼi feafeaʼi e he fafine Kilisitiano te ʼu fealagia peʼe ko te ʼu faiva ʼaē neʼe foaki age e te ʼAtua? (b) Koteā te ʼu kalitate matalelei neʼe fakahā e Esitele, pea neʼe fakaʼaogaʼi feafeaʼi ia ia e Sehova?

²⁰ Ko he fafine fia mālalo pea mo manavasiʼi ki te ʼAtua, ʼe mole fiameʼalahi peʼe fakafifihi ki tona ʼohoana. (Tāʼaga Lea 16:18) ʼE mole ʼuluaki faiga ki te ʼu meʼa ʼaē ʼe loto ki ai, ʼo ina fakaʼaogaʼi he ʼu fakatuʼutuʼu faka mālama, kae ʼe ina fakaʼaogaʼi tāfito tona ʼu fealagia ʼaē neʼe foaki age e te ʼAtua ke gāue maʼa ʼihi​—ki tona famili, mo te ʼu tēhina mo tuagaʼane Kilisitiano, mo te ʼu kāiga, kae tāfito kia Sehova. (Kalate 6:10; Tito 2:3-5) Koutou fakatokagaʼi te faʼifaʼitaki faka Tohi-Tapu ʼa te Fineʼaliki ko Esitele. Logola neʼe finemui, kae neʼe fia mālalo pea mo fakalogo. (Esitele 2:13, 15) ʼI te temi ʼaē neʼe ʼohoana ai, neʼe lahi tana fakaʼapaʼapa ki tona ʼohoana, ʼaē ko te Hau ko Asuelusi; neʼe mole hage ia ko Vasiti, ia te ʼuluaki ʼohoana ʼo te hau. (Esitele 1:10-12; 2:16, 17) ʼAki he fakaʼapaʼapa, neʼe toe fakalogo pe foki ki tona tokolua mataʼi tama ko Maletokeo, ʼi te ʼu ʼaluʼaga neʼe ʼaoga ai te faʼahi ʼaia​—māʼia pe la ʼi tana ʼosi liliu ko te fineʼaliki. Kae neʼe ina leleiʼia te ʼu aga ʼaē neʼe tonu ke fai! ʼAki he lototoʼa neʼe ina tala te kākā ʼa Amane, neʼe ko he tagata mālohi pea mo aga fefeka neʼe ina fonofono ke molehi te kau Sutea. Neʼe fakaʼaogaʼi e Sehova ia Esitele ʼi he ʼaluʼaga mālohi moʼo hāofaki tana hahaʼi.​—Esitele 3:8–4:17; 7:1-10; 9:13.

21. E lava feafeaʼi ki he fafine Kilisitiano hana liliu ʼo toe maʼuhiga age kia mata ʼo Sehova?

²¹ ʼE mahino mai, ʼi te temi muʼa pea mo te temi nei, neʼe fakahā e te ʼu fafine aga faka lotu ia tanatou pipiki ʼāteaina pe kia Sehova pea mo tana tauhi. Koia, ʼe maʼuhiga kia mata ʼo Sehova ia te hahaʼi fafine ʼaē ʼe nātou manavasiʼi kia te ia. ʼU tuagaʼane, koutou faka fealagia kia Sehova ke ina akoako ia koutou ʼaki tona laumālie, ke koutou liliu māmālie ai ko he “ipu” kua maʼuhiga age, “kua teuteuʼi ki te u gaue lelei fuape.” (2 Timoteo 2:21; Loma 12:2) ʼO ʼuhiga mo te kau atolasio maʼuhiga ʼaia, ʼe ʼui fēnei e te Folafola ʼa te ʼAtua: “Koutou fakatoʼo age ki [te fafine] ia te fua ʼo tana gāue, pea ke vikiʼi ia ia e tana ʼu gāue ʼi te ʼu matapā.” (Tāʼaga Lea 31:31) ʼOfa pe ke hoko te faʼahi ʼaia kia koutou ʼu tuagaʼane.

[Kiʼi nota]

ʼE Kei Koutou Manatuʼi Koa?

• Neʼe fakahā feafeaʼi e te hahaʼi fafine Kilisitiano ʼo te ʼuluaki sēkulō ʼe nātou maʼuhiga kia mata ʼo Sehova?

• Koteā ʼaē neʼe fai e te ʼu tuagaʼane kaugamālie ke nātou maʼuhiga ki te ʼAtua?

• ʼE lagolago feafeaʼi ia Sehova ki te ʼu faʼe ʼaē ʼe nātou taupau tokotahi tanatou fānau peʼe ko te ʼu tuagaʼane ʼaē ʼe mole ʼi ai honatou ʼu ʼohoana?

• ʼE lava fakahā feafeaʼi e he fafine hana fakaʼapaʼapa fakamalotoloto ki te fakatuʼutuʼu ʼo te tuʼulaga pule?

[Talanoa ʼo te pasina 17]

KO HE ʼU FAʼIFAʼITAKI KE FAKAKAUKAUʼI

ʼE koutou fia tokagaʼi koa te faʼifaʼitaki ʼo ʼihi fafine agatonu ʼe palalau kiai ia te Tohi-Tapu? Kapau ʼe koutou loto lelei kiai, koutou lau ia te ʼu vaega faka Tohi-Tapu ʼaē ʼe tuʼu ʼi lalo. ʼI takotou metitasio ki te ʼu hahaʼi ʼaē ʼe tuʼu ʼi lalo, koutou faigaʼi ke koutou maʼu te ʼu pelesepeto ʼaē ʼe koutou lava fakahā lahi age ʼi tokotou maʼuli.​—Loma 15:4.

◆ Sala: Senesi 12:1, 5; 13:18a; 21:9-12; 1 Petelo 3:5, 6.

◆ Te ʼu fafine Iselaele loto fia foaki: Ekesote 35:5, 22, 25, 26; 36:3-7; Luka 21:1-4.

◆ Tepola: Kau Fakamāu 4:1–5:31.

◆ Lute: Lute 1:4, 5, 16, 17; 2:2, 3, 11-13; 4:15.

◆ Te fafine ʼo te kolo ko Sunemi: 2 Hau 4:8-37.

◆ Te fafine Fenisia: Mateo 15:22-28.

◆ Maleta mo Malia: Maleko 14:3-9; Luka 10:38-42; Soane 11:17-29; 12:1-8.

◆ Tapita: Gaue 9:36-41.

◆ Te ʼu ʼofafine ʼe toko fā ʼo Filipe: Gaue 21:9.

◆ Foepene: Loma 16:1, 2.

[Paki ʼo te pasina 15]

ʼE koutou vikiʼi koa te ʼu tuagaʼane selipatea ʼaē ʼe nātou agatonu ʼo fakalogo ki te lao ʼa te ʼAtua?

[Paki ʼo te pasina 16]

ʼI takotou ʼu faikole, koteā te ʼu puani makehe ʼe feala ke koutou palalau kiai ʼi muʼa ʼo te ʼolo ʼo takotou fānau ki te faleako?